Tag international news

(ایمرا نیوز آن لائن)امریکا اور طالبان کے درمیان امن معاہدہ حتمی مرحلے میں داخل ہو گیا ہے۔ امریکی میڈیا کے مطابق طالبان کونسل نے عارضی جنگ بندی پر رضامندی ظاہر کر دی ہے۔ جنگ بند ی کے دوران امریکا کیساتھ امن معاہدے پر دستخط کا بھی امکان ہے۔
امریکی میڈیا کے مطابق سنئیر طالبان رہنما نے کہاکہ جنگ بندی کی حتمی منظوری طالبان کے سربراہ دیں گے۔ تاہم جنگ بندی کی مدت واضح نہیں، یہ دس دن کے لیے بھی ہو سکتی ہے جبکہ امن معاہدے کے دو ہفتے بعد انٹرا افغان مذاکرات شروع ہو سکتے ہیں۔
18 سال سے افغانستان میں موجود امریکی فوجیوں کی وطن واپسی کیلئے طالبان کیساتھ یہ امن معاہدہ انتہائی اہمیت کا حامل ہے۔ اس وقت افغان سرزمین پر کم وبیش 12 ہزار امریکی فوجی موجود ہیں۔

(ایمرا نیوز آن لائن)امریکی ریاست مینیسوٹا کے 14 سالہ بچے نے منفرد خاصیت کی بناء پر عالمی ریکارڈ ہی قائم کر ڈالا۔
مینیسوٹا کے 14 سالہ بچے نے کوئی کارنامہ کرکے عالمی ریکارڈ نہیں بنایا بلکہ انہیں سب سے بڑا منہ کھولنے کی وجہ سے ’گنیز ورلڈ ریکارڈ ‘کی فہرست میں شامل کیا گیا ہے۔
آئسیک جانسن نامی بچے کا منہ3.67 انچ کُھلتا ہے یہی وجہ سے انہیں دنیا میں سب سے بڑا منہ کھولنے والے انسان کا اعزاز حاصل ہے۔

14 سالہ بچے سے قبل دنیا میں سب سے بڑا منہ کھولنے والے شخص کا اعزاز ایک جرمن آدمی کے نام تھا جو اپنا منہ 3.46 انچ تک کھول سکتے تھے۔
لیکن اب 14 سالہ بچے نے 3.67 انچ تک اپنا منہ کھول کے یہ اعزاز خود حاصل کرلیا ہے۔
آئسک جانسن کا کہنا ہے کہ وہ اپنے منہ میں کوئی بھی چیز باآسانی فٹ کر سکتے ہیں جس میں بیس بال، بڑا سیب، برگر وغیرہ شامل ہے۔
اگر آپ 3.67انچ سے زیادہ منہ کھول سکتے ہیں تو یقیناً ورلڈریکارڈ آپ کا منتظر ہے۔

(ایمرا نیوز آن لائن)وزیراعظم عمران خان، بحرین کے فرمانرواں حمد بن عیسیٰ الخلیفہ کی دعوت پر ان کے قومی دن کی تقریبات میں بطور مہمان خصوصی شرکت کے لیے بحرین پہنچ گئے۔
سرکاری نشریاتی ادارے نے رپورٹ کیا کہ بحرین پہنچنے پر بحرین کے ولی عہد سلمان بن حمد الخلیفہ نے ان کا استقبال کیا۔

واضح رہے کہ وزیراعظم کا منصب سنبھالنے کے بعد عمران خان کا یہ پہلا دورہ بحرین ہے، جس میں وہ بحرین کے قومی دن کی تقریبات میں بطور مہمان خصوصی شریک ہوں گے۔
قبل ازیں ذرائع نے بتایا تھا کہ وزیراعظم کے ہمراہ معاون خصوصی برائے بیرون ملک مقیم پاکستانی ذوالفقار بخاری ساتھ ہیں۔

واضح رہے کہ عمران خان نے اس سے قبل سعودی عرب کا ایک روزہ دورہ بھی کیا تھا، جہاں انہوں نے سعودی عرب کی اعلیٰ قیادت سے ملاقات کی تھی۔
بحرین پہنچنے پر وزیراعظم عمران خان کا پرتپاک استقبال کیا گیا جبکہ ایک ہفتے قبل عرب نیوز کو وزیراعظم کے معاون خصوصی زلفی بخاری نے بتایا تھا کہ اس دورے میں عمران خان کو بحرین کا اعلیٰ ترین سول ایوارڈ دیا جائے گا۔

(ایمرا نیوزآن لائن) 80 سے زائد خواتین کے ساتھ جنسی ہراسانی کے الزامات میں گرفتار ہالی وڈ پروڈیوسر ہاروی وائن اسٹین اور ان کے سابق فلم اسٹوڈیو بورڈ نے 2 کروڑ 50 لاکھ ڈالرز میں متاثری کے ساتھ تصفیہ کر لیا۔

غیر ملکی میڈیا کے مطابق ہاروی وائن اسٹین نے جنسی ہراسانی کے الزامات لگانے والے افراد سے 25 ملین ڈالرز کا معاہدہ کیا ہے جس کے تحت نا تو وہ کوئی بھی غلط کام قبول کریں گے اور نا ہی کوئی اور جرمانہ ادا کریں گے۔ وائن اسٹین کمپنی کی نمائندگی کرنے والی انشورنس کمپنیاں اس تصفیے کی لاگت کو پورا کریں گی۔

مجوزہ تصفیہ میں شامل بڑی جماعتوں سے ابتدائی منظوری حاصل ہو گئی ہے جب کہ اس معاہدے کو آگے بڑھنے کے لیے عدالت کی منظوری کی ضرورت ہو گی۔ خیال رہے کہ اکتوبر 2017 میں شائع ہونے والی نیویارک ٹائمز کی تہلکہ خیز تحقیقاتی رپورٹ نے اس اسکینڈل کا انکشاف کیا تھا جس کے بعد خواتین کی بڑی تعداد نے ہالی وڈ پروڈیوسر سے متعلق ہوشرُبا حقائق سے پردہ اٹھایا تھا۔

ان ہی انکشافات کے بعد ’می ٹو‘ مہم کا بھی آغاز ہوا تھا۔ وائن اسٹین پر الزامات لگانے والی خواتین میں ہالی وڈ کی صف اول کی اداکارائیں انجیلینا جولی، سلما ہائیک، گائینتھ پیلٹرو، ایشلے جَڈ، روز میک گوئن اور ہیتھر گراہم شامل ہیں۔

سلمیٰ ہائیک نے ہاروی وائن اسٹین کے حوالے سے بتایا تھا کہ کس طرح ان کو ہراساں کرتے تھے اور دھمکیاں دیتے تھے۔ سلمیٰ ہائیک نے بتایا تھا کہ 2002 میں فلم ” فریدا ” میں سرمایہ لگانے کے بعد ہاروی وائن اسٹین نے انہیں بلیک میل کرنا شروع کیا اور طرح طرح کی جنسی خواہشات کی بھرمار کی۔ اداکارہ کے مطابق ہر بار کا انکار وائن اسٹین کا غصہ بڑھاتا رہا یہاں تک کہ پروڈیوسر نے ایک بار قتل کی بھی دھمکی دی۔

(ایمرا نیوزآن لائن) انٹرنیشنل کرکٹ کونسل (آئی سی سی) ایلیٹ پینل میں شامل پاکستانی امپائر علیم ڈار نے ایک اور بڑا اعزاز اپنے نام کر لیا۔
پاکستانی امپائر علیم ڈار ویسٹ انڈیز کے اسٹیو بکنر کا ریکارڈ توڑتے ہوئے سب سے زیادہ ٹیسٹ میچ سپر وائز کرنے والے امپایر بن گئے ہیں۔

پاکستانی امپائر علیم ڈار نے اسٹیو بکنر کا 128 ٹیسٹ میچوں کا ریکارڈ توڑا ہے اور اس وقت وہ آسٹریلیا اور نیوزی لینڈ کی ٹیموں کے درمیان سیریز کے پہلے ٹیسٹ میں امپائرنگ کے فرائض انجام دے رہے ہیں جو ان کا 129 واں ٹیسٹ میچ ہے۔
51 سالہ علیم ڈار نے 2000 میں اپنے کیرئیر کا آغاز کیا، وہ 207 ون ڈے اور 46 ٹی ٹوئنٹی انٹرنیشنلز میں بھی ا مپائرنگ کر چکے ہیں۔

علیم ڈار کا کہنا ہے کہ اس سنگ میل کے بارے میں سوچا نہیں تھا مگر اس وقت بہت اچھا محسوس کر رہا ہوں، یہ میری زندگی کا بہترین لمحہ ہے۔خیال رہے کہ اس سے قبل علیم ڈار 200 میچز کو سپروائز کرنے والے پاکستان کے پہلے جب کہ دنیا کے تیسرے امپائر کا اعزاز حاصل کر چکے ہیں۔

(ایمرا نیوزآن لائن) مقبول سرچ انجن گوگل نے کروم براؤزر میں صارفین کے پاسورڈ کی حفاظت اور ان کا ڈیٹا ہیکرز سے بچانے کے لیے نئے اور اہم فیچر کے اضافے کا اعلان کیا ہے۔امسال اکتوبر میں گوگل نے کروم صارفین کے پاسورڈ کی حفاظت کے لیے پاسورڈ منیجر ایپ کی شکل میں ایک ویب پیج متعارف کرایا تھا جس کے ذریعے یہ معلوم کیا جا سکتا تھا کہ ان کے تمام سیو پاسورڈز گوگل کروم میں کس حد تک محفوظ ہیں اور انہیں ہیکنگ کا سامنا تو نہیں ہوا۔

اب گوگل نے کروم صارفین کے پاسورڈ اور ڈیٹا کی خاص حفاظت کو مدنظر رکھتے ہوئے مذکورہ ویب پیج کو بطور فیچر شامل کرنے کا اعلان کیا ہے۔گوگل کے مطابق کروم میں ایک نیا فیچر شامل کیا جا رہا ہے جو پاسورڈ یا ڈیٹا ہیک ہونے کی صورت میں صارفین کو فوراً خبردار کر دے گا۔

یعنی جب کروم صارفین پاسورڈ لاگ اِن کریں گے تو براؤزر کی جانب سے مطلع کر دیا جائے گا کہ صارف کا پاسورڈ اُن کا ڈیٹا ہیک کرنے کے نتیجے میں کوئی استعمال کر چکا ہے۔
گوگل فوٹو—
کروم صارفین کو نئے فیچر کے تحت یہ بھی بتا دیا جائے گا کہ ان کا ہیک ہونے والا پاسورڈ کتنی مختلف سائٹس پر استعمال کیا جا رہا ہے، ساتھ ہی پاسورڈ تبدیل کرنے کا آپشن بھی مہیا کیا جائے گا۔

یعنی اس فیچر کی مدد سے سہولت ہو گی کہ کروم صارفین کو کسی اگلی ونڈو پر جاکر اپنے خفیہ کوڈ کی حفاظت سے متعلق جاننا نہیں پڑے گا بلکہ اسی وقت انہیں ڈیٹا اور پاسورڈ کی حفاظت کے حوالے سے ہدایت فراہم کی جائے گی۔
گوگل کا کہنا ہے کہ نیا فیچر گوگل سیف براؤزر ڈیٹا بیس پر بنایا جائے گا جو پہلے سے 30 فیصد زیادہ مؤثر طور پر صارفین کے پاسورڈز اور ان کی معلومات محفوظ رکھے گا۔
گوگل کروم کا نیا حفاظتی فیچر آئندہ ہفتے متعارف کرایا جائے گا۔

(ایمرا نیوزآن لائن)جنوبی امریکا کے ملک چلی کا فوجی طیارہ انٹارکٹیکا میں واقع ایئربیس جاتے ہوئے لاپتہ ہوگیا جس میں 38 افراد سوار تھے۔
امریکی خبررساں ادارے ’اے پی‘ کی رپورٹ کے مطابق چلی کی ایئرفورس کا طیارے سے رابطہ گزشتہ شب ہی منقطع ہوگیا تھا جبکہ حکام نے کئی گھنٹے بعد عندیہ دیا کہ وہ طیارے سے متعلق پُرامید نہیں ہیں۔

اس سے قبل چلی کی فوج نے کہا تھا کہ انہوں نے الرٹ جاری کیا ہے اور تحقیقاتی ٹیمیں طیارے کا سراغ لگارہی ہیں۔
سی-130ہرکیولس میں عملے کے 17 افراد اور 21 مسافر سوار ہیں، جن میں سے 3 عام شہری ہیں جبکہ طیارے کے عملے کو چلی کے ہوائی اڈے پر ایندھن اور دیگر آلات فراہم کرنے کے لیے پہنچنا تھا۔
مزید پڑھیں: چلی میں 10 لاکھ سے زائد افراد کا حکومت مخالف احتجاج، کابینہ برطرف

چلی کے صدر سباسٹین پنیرا نے سماجی رابطے کی ویب سائٹ ٹوئٹر پر کیے گئے ٹوئٹ میں کہا کہ وہ وزرائے دفاع اور داخلہ کے ہمراہ ایئرفورس ہیڈکوارٹرز میں موجود ہیں اور اس حوالے سے پیش رفت کی نگرانی کررہے ہیں۔
طیارہ لاپتہ ہونے سے متعلق بیان میں ایئرفورس نے کہا کہ 7 گھنٹے سے زائد گزرنے کے بعد طیارے کا کچھ پتہ نہیں جبکہ اس میں رات 12 بج کر 40 منٹ پر ایندھن ختم ہوگیا ہوگا۔

بیان میں کہا گیا کہ ’ایئرفورس اس علاقے میں سرچ آپریشن کررہی ہے جہاں طیارے سے مواصلاتی رابطہ منقطع ہوا تاکہ بچ جانے والے افراد کو ریسکیو کیا جائے‘۔
ابتدائی اعلان میں کہا گیا کہ طیارے نے 4 بج کر 53 منٹ پر پنٹا ارینس سے اڑان بھری تھی جو دارالحکومت سان تیاگو سے 3 ہزار سے زائد کلومیٹرز کے فاصلے پر تھا اور شام 6 بج کر 13 منٹ پر طیارے سے رابطہ منقطع ہوا تھا۔

طیارہ ڈریک کی گزرگاہ پر لاپتہ ہوا جو شدید موسمی صورتحال کی وجہ سے شہرت رکھتا ہے، جہاں منجمد کرنے والے درجہ حرارت اور خوفناک طوفان شامل ہیں۔یہ بھی پڑھیں: جب چلی کے شہر کی خاتون میئر صحافیوں کے سوالات سے بھاگ نکلیںتاہم گزشتہ روز چلی کی ایئرفورس نے کہا تھا کہ جب طیارے نے اڑان بھری تو موسم اچھا تھا ورنہ مشن کو روانہ نہیں کیا جاتا۔

فورتھ ایئر بریگیڈ کے جنرل ایڈورڈو مسکیورا نے مقامی میڈیا کو بتایا کہ طیارے کی تلاش جاری ہے اور ایک بحری جہاز نے بھی اس علاقے میں سرچ آپریشن میں حصہ لیا جہاں طیارے کا رابطہ منقطع ہوا تھا۔
انہوں نے کہا کہ جب طیارے سے رابطہ منقطع ہوا وہ انٹارکٹیکا بیس سے نصف فاصلے پر تھا، تاہم کوئی ایمرجنسی سگنلز فعال نہیں کیے گئے تھے۔جنرل ایڈورڈ نے کہا کہ طیارے کے پائلٹ جس کے پاس وسیع تجربہ تھا ان کا گزشتہ شب ہی واپس آنا طے تھا۔

نئی دہلی(ایمرا نیوزآن لائن): بھارت میں لوک سبھا کے بعد مسلم مخالف متنازع شہریت ترمیم بل راجیہ سبھا سے بھی منظور ہوگیا جس کے بعد اس بل پر عمل درآمد کے لیے تمام رکاوٹیں ختم ہوگئیں جب کہ بل کے خلاف مشتعل مظاہروں کو بزور طاقت روکنے کیلیے آسام میں فوج طلب کرلی گئی ہے۔
بھارتی میڈیا کے مطابق ایوان زیریں لوک سبھا سے پیر کے روز منظوری کے بعد شہریت سے متعلق مسلم مخالف متنازع بل کو بھارتیہ جنتا پارٹی کی جانب سے وزیر داخلہ امیت شاہ نے آج ایوان بالا راجیہ سبھا میں بھی پیش کیا، بل کے حق میں 125 اراکین نے ووٹ دیا جب کہ 105 اراکین نے بل کی مخالفت کی۔
بل منظور ہونے پر کانگریس کی رہنما سونیا گاندھی نے آج کے دن کو پارلیمنٹ کی قانون سازی کا ’سیاہ ترین دن‘ قرار دیتے ہوئے کہا کہ بل پیش کرنے اور اس کی حمایت کرنے والوں نے تنگ نظری اور تعصب کا مظاہرہ کیا۔ اس قانون کی منظوری سے بھارت کے بنیادی اساس اور نظریات پر کاری ضرب لگی ہے اور اس بل سے ہماری پہچان سیکولر ازم کے بجائے ہندو انتہا پسندی بنادی گئی ہے۔
دوسری جانب متنازع بل کیخلاف بھارت بھر میں 2 روز سے مظاہرے جاری ہیں، سب سے زیادہ مظاہرے ریاست آسام میں جاری ہیں جہاں طلبا سڑکوں پر نکل آئے اور مودی سرکار کیخلاف نعرے بازی کی۔ حالات اس وقت کشیدہ ہوگئے جب پولیس کی فائرنگ سے چند طلبا زخمی ہوئے جس کے بعد فوج کو طلب کر لیا گیا۔

ایشیائی ترقیاتی بینک(ایمرا نیوزآن لائن) (اے ڈی بی) نے پاکستان میں رواں مالی سال کے دوران مہنگائی کی شرح میں اضافے کا امکان ظاہر کیا ہے۔

اے ڈی بی کی پاکستان کی معیشت سے متعلق رپورٹ میں بتایا گیا ہے کہ 30 جون 2019 کو ختم ہونے والے گزشتہ مالی سال کے دوران پاکستان کی معیشت میں ترقی کی شرح انتہائی گر کر 3 اعشاریہ 3 فیصد رہی تاہم اب رواں سال پاکستان کی معیشت مستحکم ہو رہی ہے۔

رپورٹ میں بتایا گیا ہے رواں مالی سال کے پہلے سہ ماہی کے دوران پاکستان میں مہنگائی کی شرح 10 فیصد ریکارڈ کی گئی جب کہ مہنگائی کی شرح میں مزید اضافہ ہو گا۔ خیال رہے کہ ایشیائی ترقیاتی بینک نے پاکستان میں معاشی استحکام کے لیے سپورٹ جاری رکھنے کے عزم کا اظہار کیا ہے اور گزشتہ روز اسٹیٹ بینک آف پاکستان کو ایشیائی ترقیاتی بینک سے قرض کے ایک ارب 30 کروڑ ڈالرز بھی موصول ہو گئے ہیں۔