Tag iran

لاس اینجلس(M92)اسرائیل کے وزیراعظم بینجمن نیتن یاہو نے کہا ہے کہ ایران شام میں مستقل بنیادوں پر اپنے فوجی اڈے بنانے کی خواہش رکھتا ہے لیکن ہم ایسا نہیں ہونے دیں گے.امریکا کے شہر لاس اینجلس میں یہودی فیڈریشن برائے شمالی امریکا کی جنرل اسمبلی میں ویڈیو لنک کے ذریعے خطاب کرتے ہوئے اسرائیلی وزیراعظم بینجمن نیتن یاہو نے کہا کہ ایران شام کی صورتحال سے فائدہ اٹھا کر اسرائیل کے خلاف مورچہ بند ہونے کے منصوبے بنا رہا ہے. اس کے لیے ایران شام میں مستقل بنیادوں پر اپنے فوجی اڈے بنانے کی خواہش رکھتا ہے جو اسرائیل کے خلاف محاذ کی واضح دلیل ہے.
اسرائیلی وزیراعظم نے ایران کے ساتھ 6 عالمی طاقتوں کے جوہری معاہدے کو تاریخی غلطی قراردیتے ہوئے کہا کہ معاہدے کا فائدہ اٹھاتے ہوئے ایران آئندہ دس برسوں میں سیکڑوں جوہری ہتھیار بنانے کے قابل ہوجائے گا جو کہ اسرائیل کی سلامتی کےلئے خطرہ ہے۔ اگر عالمی برادری اس حوالے سے کوئی واضح اقدامات نہیں کرتی تو اسرائیل کو تنہا ہی اقدامات کرنا ہوں گے، ہم ایران کی جانب سے شام کو اسرائیل کے خلاف فوجی اڈا نہیں بننے دیں گے۔

بغداد(M92) ایران اور عراق کے سرحدی علاقوں میں خوفناک زلزلے سے 250 افراد ہلاک اور 1700 سے زائد زخمی ہوگئے۔امریکی زلزلہ پیما مرکز یونائیٹڈ اسٹیٹس جیالوجیکل سروے ( یو ایس جی ایس) کے مطابق ایران اور عراق کے سرحدی علاقوں میں شدید زلزلہ آیا اور لینڈ سلائیڈنگ ہوئی جس کے نتیجے میں اب تک 250 سے زائد افراد ہلاک ہوچکے ہیں جب کہ 1700 سے زائد زخمی ہیں۔ زلزلے کی شدت 7.3 ریکارڈ کی گئی ہے۔
زیادہ تر ہلاکتیں ایران میں ہی ہوئی ہیں اور ایران کے قدرتی آفات سے نمٹنے والے ادارے کے مطابق 207 افراد وہاں ہلاک ہوئے ہیں۔ سب سے زیادہ تباہی ایرانی صوبے کرمان شاہ میں ہوئی جہاں تین روزہ سوگ کا اعلان کردیا گیا ہے۔ کرمان شاہ کے شہر سرپل ذھاب میں 142 ہلاکتیں ہوئیں۔ یہ شہر عراقی سرحد کے قریب ہے۔ دوسری جانب عراق میں 6 افراد کی ہلاکت اور 50 کے قریب زخمیوں کی اطلاع ہے۔
زلزلے کی وجہ سے متعدد عمارتیں اور مکانات زمین بوس ہوگئے جب کہ بہت سے دیہات ہی صفحہ ہستی سے مٹ گئے۔ متاثرہ علاقوں میں امدادی کارروائیاں جاری ہیں اور ملبے تلے دبے افراد کو باہر نکالا جارہا ہے۔ متعدد زخمیوں کی حالت تشویش ناک ہے جس کی وجہ سے ہلاکتوں میں اضافے کا خدشہ ہے۔
زلزلے کا مرکز عراق کے کرد علاقے سلیمانیہ میں تھا جس کی گہرائی 33 کلو میٹر تھی۔ زلزلہ اس قدر شدید نوعیت کا تھا کہ اسے عراق کے دارالحکومت بغداد اور پڑوسی ممالک میں بھی محسوس کیا گیا۔