Tag islamabad high court

اسلام آباد(وقت نیوز آن لائن)
مسلم لیگ ن کے رہنما اور سابق وفاقی وزیر داخلہ احسن اقبال نے نارووال سپورٹس سٹی کمپلیکس کیس ضمانت کیلئے اسلام آباد ہائیکورٹ سے رجوع کرلیا۔

میڈیا رپورٹس کے مطابق احسن اقبال کے بھائی نے ضمانت بعدازگرفتاری کیلئے اسلام آبادہائیکورٹ میں درخواست دائر کی ،درخواست میں موقف اختیار کیاگیا ہے کہ احسن اقبال کو26دسمبر2019 کو گرفتار کیاگیا،26 روزہ جسمانی ریمانڈ پر نیب کی حراست میں رکھا گیا، درخواست میں احسن اقبال کو ضمانت پر رہا کرنے کی استدعا کی گئی ہے۔

اسلام آباد (میڈیا 92نیوز آن لائن) اسلام آبادہائیکورٹ نے جج ویڈیو سکینڈل میں ڈی جی ایف آئی اے کیخلاف توہین عدلت کی درخواست مستردکردی، اسلام آبادہائیکورٹ نے درخواست عدم پیروی کی بنیادپرخارج کی۔
تفصیلات کے مطابق اسلام آبادہائیکورٹ میں جج ویڈیو سکینڈل میں ڈی جی ایف آئی اے کیخلاف توہین عدالت کی درخواست کی سماعت ہوئی،اسلام آباد ہائیکورٹ کے چیف جسٹس اطہرمن اللہ نے کیس کی سماعت کی،لیگی وکیل جہانگیر جدون نے ایف آئی اے کےخلاف ہراساں کرنے کی درخواست دائرکی تھی،ڈپٹی اٹارنی جنرل طیب شاہ نے کہا کہ ایف آئی اے کی جانب سے جہانگیر جدون کو ہراساں نہیں کیا گیا،الزامات بے بنیاد ہیں ،عدالت سے استدعا ہے کہ درخواست مسترد کی جائے،عدالت نے جج ویڈیوسکینڈل میں ڈی جی ایف آئی اے کےخلاف توہین عدالت کی درخواست مستردکردی،عدالت نے درخواست عدم پیروی کی بنیادپرخارج کی۔

اسلام آباد(ایمرا نیوز آن لائن)اسلام آباد ہائی کورٹ نے وفاقی دارالحکومت میں نیلامی کے سوا دیگر پلاٹوں کی الاٹمنٹ پر پابندی برقرار رکھنے کا حکم دے دیا۔اسلام آباد ہائی کورٹ کے چیف جسٹس اطہر من اللہ نے وفاقی دارالحکومت میں ایکوائر زمین کے متاثرین اور الاٹیز کو پلاٹ الاٹمنٹ کے کیس کی سماعت کی۔ وزیراعظم کے معاون خصوصی علی اعوان نے کمیشن کی رپورٹ پیش کی۔

ہائی کورٹ نے حکم امتناع میں توسیع کرتے ہوئے اسلام آباد میں نیلامی کے سوا دیگر پلاٹوں کی الاٹمنٹ پر پابندی برقرار رکھی۔چیف جسٹس اطہر من اللہ نے ریمارکس دیے کہ اسلام آباد میں کچہری کے لیے جگہ نہیں،ہسپتالوں کے لیے جگہ نہیں،

یہاں کبھی بھی عام آدمی کو سہولت دینا ترجیح نہیں رہی، 1960سے جن کی زمینیں ایکوائر کی گئیں پہلے ان کو معاوضہ دیا جائے گا، لوگ پھر رہے ہیں ان کو آج تک انصاف نہیں ملا، یہ ریاست کی ناکامی ہے۔

چیف جسٹس اطہر من اللہ نے مزید کہا کہ لینڈ ایکوزیشن پوری دنیا میں حکومتیں مارکیٹ ریٹ سے زیادہ دیتی ہیں، جو بڑے لوگوں کو پلاٹ دئیے گئے کیوں نہ وہ متاثرین کوالاٹ کردئیے جائیں۔
عدالت نے کیس کی مزید سماعت تین فروری تک ملتوی کردی۔

(ایمرا نیوز آن لائن)لاہور ہائی کورٹ نے سابق صدر جنرل (ر) پرویز مشرف کی جانب سے خصوصی عدالت کی کارروائی کو رکوانے کے لیے دائر کی گئی متفرق درخواست پر وفاقی حکومت کو نوٹس جاری کردیا۔
خیال رہے کہ اسلام آباد کی خصوصی عدالت میں زیرسماعت سنگین غداری کیس کا فیصلہ گزشتہ ماہ محفوظ کیا تھا تاہم اسلام آباد ہائی کورٹ نے وزارت داخلہ اور پرویز مشرف کی درخواست پر خصوصی عدالت کو فیصلہ سنانے سے روک دیا گیا تھا، جس کے بعد خصوصی عدالت نے کیس کی روزانہ بنیاد پر سماعت کا فیصلہ کیا تھا اور اب ان کی جانب سے 17 دسمبر (منگل) کو فیصلہ سنائے جانے کا امکان ہے۔
واضح رہے کہ اسلام آباد ہائی کورٹ کا حکم 27 نومبر کو آیا تھا جبکہ 28 نومبر کو خصوصی عدالت نے فیصلہ سنانا تھا۔
عدالتی فیصلے کے علاوہ جنرل (ر) پرویز مشرف نے اپنے وکیل خواجہ طارق احمد رحیم اور اظہر صدیقی کے ذریعے لاہور ہائی کورٹ میں ایک اور متفرق درخواست دائر کی تھی، جس میں موقف اپنایا گیا کہ ان کی پہلی درخواست ہائی کورٹ میں زیرسماعت ہے اور اس پر فیصلہ ہونے تک خصوصی عدالت کی کارروائی کو روکا جائے۔اپنی درخواست میں سابق صدر نے سنگین غداری کے تحت ان کے ٹرائل کے لیے خصوصی عدالت کی تشکیل اور طریقہ کار میں قانونی خامیوں کو چیلنج کیا تھا۔
پرویز مشرف نے اپنی درخواست میں ہائی کورٹ پر زور دیا تھا کہ وہ فوری طور پر دائر کی گئی شکایت، چالان، استغاثہ کی ٹیم کا تقرر اور ٹرائل کورٹ کی تشکیل سمیت تمام اقدامات کو معطل کرے۔
اس درخواست پر صوبائی عدالت عالیہ کے جسٹس سید مظاہر اکبر علی نقوی نے سماعت کی اور پوچھا کہ جب ایک درخواست لاہور ہائی کورٹ میں زیرسماعت ہے تو پھر یہ دوسرے درخواست کیوں دائر کی گئی؟ جس پر پرویز مشرف کے وکیل کا کہنا تھا کہ یہ متفرق درخواست ٹرائل رکوانے کے لیے دائر کی گئی۔
اس پر عدالت عالیہ کے وکیل نے پوچھا کہ کیا پرویز مشرف کی درخواستوں پر سماعت کے لیے فل بینچ تشکیل دینا مناسب ہوگا؟ جس پر وفاقی حکومت کے وکیل نے کہا کہ عدالت تقریباً اس کیس کو سن چکی ہے، ایسے میں فل بین کی تشکیل کی بظاہر ضرورت نہیں۔

بعد ازاں عدالت نے پرویز مشرف کی درخواست پر وفاقی حکومت کو کل (17 دسمبر) کے لیے نوٹس جاری کرتے ہوئے ریمارکس دیے کہ منگل کو مرکزی درخواست سماعت کے لیے مقرر ہے، اس درخواست کو بھی اسی کے ساتھ سنیں گے۔
واضح رہے کہ لاہور ہائی کورٹ کے جسٹس مظاہر علی نقوی پر مشتمل لاہور ہائی کورٹ کے بینچ نے 10 دسمبر کو سماعت میں سابق صدر جنرل (ر) پرویز مشرف کی مرکزی درخواست پر ایڈیشنل اٹارنی جنرل کو سیکریٹری داخلہ سے ہدایت لے کر پیش ہونے کا حکم دے دیا تھا۔

قبل ازیں 3 دسمبر کو ہونے والی سماعت میں لاہور ہائی کورٹ نے وفاقی حکومت کو پرویز مشرف کے خلاف سنگین غداری کیس کا مکمل ریکارڈ پیش کرنے کے لیے وقت دیا تھا۔
مسلم لیگ (ن) کی حکومت نے خصوصی عدالت میں پرویز مشرف کے خلاف سنگین غداری کے 5 الزامات عائد کیے تھے لیکن عدالت کی متعدد سماعتوں میں وہ پیش بھی نہیں ہوئے، بعد ازاں بیماری کو جواز بناتے ہوئے ملک سے باہر چلے گئے تھے اور واپس وطن نہیں لوٹے۔
اسلام آباد کی خصوصی عدالت نے رواں سال 19 نومبر 2019 کو سنگین غداری کیس کا فیصلہ محفوظ کیا تھا جسے 28 نومبر کو سنایا جانا تھا۔
تاہم مذکورہ فیصلے کو روکنے کے خلاف پرویز مشرف نے لاہور اور اسلام آباد ہائی کورٹ میں درخواست دائر کردی تھی۔
ساتھ ہی وفاقی حکومت نے بھی خصوصی عدالت کو فیصلہ سنانے سے باز رکھنے کے لیے اسلام آباد ہائی کورٹ سے رجوع کیا تھا جس پر عدالت نے خصوصی عدالت کو فیصلہ سنانے سے روک دیا تھا البتہ لاہور ہائی کورٹ کی جانب سے اب تک کوئی فیصلہ نہیں کیا گیا۔

اسلام آباد ہائیکورٹ(میڈٰیا92نیوزآنن) بار ایسوسی ایشن نے نئے ججز کی حلف برداری کی تقریب کا بائیکاٹ کر دیا۔

خیال رہے کہ وکلاء کی جانب سے دل کے اسپتال پنجاب انسٹیٹیوٹ آف کارڈیالوجی (پی آئی سی) پر حملے کے الزام میں گرفتار وکلاء کے حق میں ملک بھر میں دوسرے روز بھی ہڑتال جاری ہے جب کہ اسلام آباد ہائیکورٹ بار ایسوسی ایشن نے ججز کی حلف برداری تقریب کا بائیکاٹ کر دیا ہے۔

اسلام آباد ہائی کورٹ کے تین نئے ایڈیشنل ججز کی آج حلف برداری کی تقریب ہو گی جس میں فیاض احمد جندران، غلام اعظم قمبرانی اور لبنیٰ سلیم پرویز سے چیف جسٹس اسلام آباد ہائیکورٹ جسٹس اطہر من اللہ حلف لیں گے۔ ذرائع کے مطابق چیف جسٹس سے اسلام آباد ہائی کورٹ بار ایسوسی ایشن کے صدر کی سربراہی میں وفد کی ملاقات ہوئی مگر بار اور بینچ میں ڈیڈ لاک اب تک برقرار ہے۔

گزشتہ روز جنرل سیکریٹری اسلام آباد ہائیکورٹ بار عمیر بلوچ کا کہنا تھا کہ چیف جسٹس اسلام آباد ہائیکورٹ جسٹس اطہرمن اللہ نے ہمیں احتجاج نہ کرنے کا کہا، ہم نے جواب دیا کہ جب آپ احتجاج کرتے تھے تو ہم آپ کے پیچھے چلتے تھے، آج ہم احتجاج کرتے ہیں تو کیا ٹھیک نہیں ہے؟

یاد رہے کہ دو روز قبل وکلاء کی جانب سے لاہور میں پی آئی سی پر حملہ کر کے توڑ پھوڑ کی گئی تھی اور اس ہنگامہ آرائی کے دوران ایک خاتون سمیت 3 مریض انتقال کر گئے تھے۔ پی آئی سی میں ہنگامہ آرائی اور توڑ پھوڑ کے الزام میں پولیس نے 46 وکلاء کو گرفتار بھی کیا تھا۔

اسلام آباد ہائیکورٹ(ایمرا نیوز آن لائن) نے طبی بنیادوں پر پاکستان پیپلز پارٹی کے صدر آصف علی زرداری کی ضمانت منظور کر لی۔

عدالت نے آصف زرداری کی ضمانت ایک کروڑ روپے کے مچلکوں کے عوض منظور کرتے ہوئے انہیں ضمانتی مچلکے داخل کرانے کی ہدایت کی ہے۔ یاد رہے کہ سابق صدر آصف علی زرداری جعلی بینک اکاؤنٹس کیس میں جوڈیشل ریمانڈ پر اڈیالہ جیل میں قید تھے جنہیں طبیعت ناساز ہونے پر 23 اکتوبر کو پمز منتقل کیا گیا جہاں وہ اب تک زیر علاج ہیں۔

پاکستان پیپلز پارٹی کی جانب سے سابق صدر آصف علی زرداری کی طبی بنیادوں پر ضمانت کے لیے درخواست اسلام آباد ہائیکورٹ میں دائر کی گئی تھی۔ چند روز قبل اسلام آباد ہائیکورٹ نے آصف علی زرداری کے لیے پاکستان انسٹی ٹیوٹ آف میڈیکل سائنسز (پمز) اسپتال کے میڈیکل سپرنٹنڈٹ (ایم ایس) کو نیا میڈیکل بورڈ تشکیل دینے کا حکم دیا تھا۔

(ایمرا نیوزآن لائن) العزیزیہ ریفرنس میں سزا کے خلاف سابق وزیراعظم نواز شریف کی اپیل 18 دسمبر کو سماعت کے لیے مقرر ہو گئی۔

نواز شریف نے العزیزیہ ریفرنس میں احتساب عدالت کی جانب سے دی گئی سزا کالعدم کرنےکی اپیل اسلام آباد ہائیکورٹ میں دائر کر رکھی ہے۔ اسلام آباد ہائیکورٹ نے نواز شریف کی اپیل سماعت کے لیے مقرر کر دی ہے تاہم عدالت نواز شریف کی مرکزی اپیل سے قبل جج ویڈیو کیس کے تناظر میں فیصلہ کرے گی۔

جسٹس عامر فاروق اور جسٹس محسن اختر کیانی پر مشتمل ڈویژن بنچ سماعت کرے گا۔ جج ویڈیو کیس کے مرکزی کردار ناصربٹ نے نواز شریف کی اپیل میں فریق بننےکی درخواست کر رکھی ہے۔ نواز شریف نے ویڈیو کا فرانزک کرنے والے برطانوی ماہر سمیت 5 افراد کو عدالتی گواہ بنانے کی استدعا کی ہے‎۔

العزیزیہ ریفرنس میں سزا کے خلاف نواز شریف کی اپیل 18 دسمبر کو سماعت کے لیے مقرر کر دی گئی ہے جب کہ نیب کی نواز شریف کی سزا بڑھانے کی اپیل بھی 18 دسمبر کو سماعت کے لیے مقرر کی گئی ہے۔

(ایمرا نیوزآن لائن) نیب کے پاس جے یو آئی ف کے رہنما اکرم درانی کے وارنٹ گرفتاری کا جواز پیش کرنے کے لیے مواد نہ ہونے پر اسلام آباد ہائی کورٹ نے جے یو آئی ف کے رہنما کی درخواست ضمانت سے متعلق کیس نمٹا دیا۔

اکرم درانی کی درخواست ضمانت پر سماعت اسلام آباد ہائی کورٹ کے چیف جسٹس اطہر من اللہ اور جسٹس میاں گل حسن نے کی۔ نیب نے مؤقف اختیار کیا کہ اکرم درانی کے وارنٹ گرفتاری جاری نہیں کر رکھے، جس پر جسٹس میاں گل حسن نے کہا کہ ہم درخواست نمٹا دیں اور کل آپ انہیں وارنٹ جاری کر کے گرفتار کر لیں تو پھر کیا ہو گا؟ ایک کیس میں پہلے ایسا ہو بھی چکا ہے۔

نیب پراسیکیوٹر نے کہا کہ نئے شواہد سامنے آنے پر ہی کسی کو گرفتار کیا جاتا ہے، جس پر جسٹس اطہر من اللہ نے ریمارکس دیئے کہ نیب کو کسی بھی گرفتاری کا جائز جواز بتانا بھی ضروری ہے، نیب کسی کو ٹارچر کرنے کے لیے تو گرفتار نہیں کر سکتا۔ جسٹس اطہر من اللہ نے کہا کہ نیب تفتیش کے لیے بھی روز طلب کر سکتا ہے، نیب گرفتار کر کے ہی کیوں سرکار کا خرچہ بڑھاتا ہے۔

اکرم درانی کے وکیل نے کہا کہ اگر کل کو نیب وارنٹ جاری کرے تو ہمیں پہلے بتائے، جس پر نیب پراسیکیوٹر نے کہا کوئی قانون نہیں ہے کہ ہم پہلے کسی کو بتائیں۔ نیب پراسیکیوٹر نے عدالت کو بتایا کہ اکرم درانی کے فرنٹ مین رحمت اللہ کے وارنٹ جاری کئے ہیں، رحمت اللہ اکرم درانی کے پرسنل سیکریٹری تھے اور غیر قانونی بھرتیوں میں ان کا کردار تھا۔

جسٹس میاں گل حسن نے ریمارکس دیئے کہ اُن بھرتیوں کا تو الگ سے کیس ہمارے سامنے موجود ہے، اُس کیس میں نیب الگ سے کیسے کارروائی کر رہا ہے۔ نیب پراسیکیوٹر نے عدالت کو بتایا کہ ہم اُس معاملے کے مجرمانہ پہلو پر تفتیش کر رہے ہیں، عدالت کے سامنے جو الگ کیس ہے وہ ایک سِول کیس ہے، ملزم کے فرار ہونے کا خدشہ ہے۔

چیف جسٹس اسلام آباد ہائی کورٹ نے کہا کہ آپ کو یہ خدشہ ہے تو ای سی ایل میں نام ڈال دیں، آپ نے کرپشن روکنےکے لیے کیس چلانے ہیں۔ جسٹس اطہر من اللہ نے ریمارکس دیئے کہ دیکھا گیا ہے نیب کا کیس بہت کمزور ہوتا ہے، دوسرے ممالک میں وہ ہر ملزم کو گرفتار نہیں کرتے۔ انہوں نے مزید کہا کہ سنگین الزامات کے باوجود لندن میں الطاف حسین باہر پھر رہے ہیں، آپ کے پاس نئے شواہد بھی آجائیں تب بھی گرفتاری پر مطمئن کرنا ہو گا۔ چیف جسٹس اسلام آباد ہائی کورٹ نے کہا کہ تفتیشی افسر کے کافی شواہد آئے تو پھر گرفتاری کی جا سکتی ہے۔

نیب پراسیکیوٹر نے عدالت کو بتایا کہ نیب کے پاس اکرم درانی کے وارنٹ گرفتاری کا جواز پیش کرنے کے لیے مواد دستیاب نہیں ہے جس پر عدالت نے اکرم خان درانی کی درخواست ضمانت سے متعلق کیس نمٹا دیا جب کہ ملزم رحمت اللہ کی عبوری ضمانت میں 8 دسمبر تک توسیع کر دی گئی۔

(ایمرا نیوزآن لائن))سابق وزیراعظم نواز شریف علاج کے لئے قطر ائیر ایمبولینس کے ذریعے براستہ دوحہ لندن روانہ ہوگئے، وزارت داخلہ نے ایک بار باہر جانے کی اجازت دے دی۔

قائد مسلم لیگ ن کو قافلے کی صورت میں ایئر پورٹ پہنچایا گیا، جس میں مریم نواز، کیپٹن ریٹائرڈ صفدر، خاندان کے دیگر افراد بھی شامل تھے، قافلے میں مسلم لیگ ن کے رہنماؤں اور کارکنوں نے بھی بڑی تعداد میں شرکت کی، کارکن قائد کو خدا حافظ کہنے کیلئے موجود رہے۔

صدر (ن) لیگ شہباز شریف اور ذاتی معالج ڈاکٹر عدنان بھی نواز شریف کے ہمراہ ہیں، شہباز شریف سابق وزیر اعظم کی صحت یابی تک ان کے ساتھ قیام کریں گے۔ سابق وزیراعظم کے ذاتی معالج ڈاکٹر عدن نے سماجی رابطے کی ویب سائٹ پر ٹویٹ کرتے ہوئے کہا نوا شریف دوہا کے راستے برطانیہ جائیں گے، ایئر بس اے 319-133LR A7MED کے زریعے سابق وزیراعظم نواز شریف شام ساڑھے چھ بجے لندن ہیتھرو ایئر پورٹ پر پہنچیں گے۔

یاد رہے اسلام آباد ہائی کورٹ نے نواز شریف کی طبی بنیادوں پر درخواستِ ضمانت منظور کرتے ہوئے ان کی سزا 8 ہفتوں کے لیے معطل کی تھی۔ حکومت نے نواز شریف کو 4 ہفتوں کے لیے ایک بار بیرون ملک جانے کی مشروط اجازت دی تھی جس کے لیے 80 لاکھ پاؤنڈ، 2 کروڑ 50 لاکھ امریکی ڈالر، 1.5 ارب روپے جمع کرانے کی شرط رکھی گئی تھی۔

لاہور ہائی کورٹ نے حکومتی شرائط معطل کرتے ہوئے سابق وزیراعظم نواز شریف کو 4 ہفتوں کے لیے بیرون ملک جانے کی اجازت دی اور صحت بہتر نہ ہونے پر اس مدت میں توسیع بھی ممکن ہے۔ واضح رہے کہ نواز شریف کو العزیزیہ ریفرنس میں 7 سال قید بامشقت اور ڈیڑھ ارب روپے اور ڈھائی کروڑ ڈالر جرمانے کی سزا سنائی گئی تھی، جس کے بعد سے وہ کوٹ لکھپت جیل لاہور میں قید تھے۔