Tag Japan

لاہور(وقت نیوز آن لائن)پُراسرار کورونا وائرس نے چین کے بڑے حصے کو اپنی لپیٹ میں لے لیا ہے اور اس وقت موذی مرض سے ہلاک افراد کی تعداد 170 تک پہنچ گئی ہے۔غیر ملکی مطابق تبت میں بھی کورونا وائرس کی تصدیق ہو گئی ہے اور خطرناک مرض امریکا، جاپان، کینیڈا اور آسٹریلیا سمیت دنیا کے دیگر 16 ممالک میں بھی پہنچ چکا ہے۔

چینی حکام کے مطابق کورونا وائرس سے متاثرہ افراد کی تعداد 7 ہزار 700 سے تجاوز کر چکی ہے۔ادھر عالمی ادارہ صحت (ڈبلیو ایچ او) کا کورونا وائرس کے حوالے سے آج اہم اجلاس ہو رہا ہے جس میں وائرس کو دنیا کے لیے خطرہ قرار دینے یا ایمرجنسی کی صورت حال نافذ کرنے کے حوالے سے امور کا جائزہ لیا جائے گا۔

ڈبلیو ایچ او کے ڈائریکٹر جنرل ٹیڈروس ایڈہینم کا کہنا ہے کہ گزشتہ چند روز کے دوران چند ممالک میں کورونا وائرس کی ایک سے دوسرے انسان میں منتقلی سے شدید تشویش لاحق ہو گئی ہے۔ان کا کہنا ہے کہ چین کے علاوہ دیگر ممالک میں کورونا وائرس سے متاثرہ افراد کی تعداد بہت کم ہے لیکن اس مرض میں وبائی صورت حال اختیار کرنے کی صلاحیت موجود ہے۔

خیال رہے کہ چین کے صوبے ہوبئی کے شہر ووہان میں زیر تعلیم 4 پاکستانی طالب علموں میں بھی کورونا وائرس کی تصدیق ہو چکی ہے جس کے بعد وہاں موجود دیگر پاکستانی طالب علموں میں شدید تشویش کی لہر دوڑ گئی ہے اور انہوں نے حکومت پاکستان سے مطالبہ کیا ہے کہ فوری طور پر انہیں ووہان سے نکالا جائے۔

کینیڈا(ایمرا نیوز آن لائن) کینیڈا کے رہائشی روب اسپینس نے اپنی آنکھ ضائع ہونے پر کیمرہ لگایا ہے جو 30 منٹ کی ویڈیو بناسکتا ہے۔ آنکھ میں ٹرمنیٹر کی طرح سرخ روشنی کا حلقہ بھی نظر آتا ہے لیکن وہ خود کو ٹرمنیٹر کی بجائے آئی بورگ کہتے ہیں جو سائی بورگ کی طرح کا ایک لفظ ہے۔2008 میں ان کی دائیں آنکھ پر گولی لگی تھی جس کے بعد اسے نکالنا پڑا تھا۔ اس کے بعد مصنوعی یا پتھریلی آنکھ لگانے کی بجائے روب نے اپنی آنکھ میں کیمرہ لگانے کی خواہش ظاہر کی جس سے وہ لوگوں کے انٹرویو ریکارڈ کرتےہیں۔ واضح رہے کہ ان کی آنکھ کا کیمرہ کسی دماغی اعصاب سے نہں جڑا اور اس لیے آنکھ ضائع ہونے کے بعد یہ سسٹم انہیں دیکھنے میں کوئی مدد فراہم نہیں کرتا۔

کیمرے والی آنکھ کو آن کرکے انہیں دیکھنا ہوتا ہے اور پلک جھپکاتے ہی کیمرہ ریکارڈنگ شروع کرتا ہے جسے موبائل فون یا کمپیوٹر میں محفوظ کرنے کے ساتھ ساتھ آن لائن نشر بھی کیا جاسکتا ہے۔ جعلی آنکھ نما کیمرے کے ساتھ سرکٹ بورڈ، چارج ک قابل بیٹری اور ایک وائرلیس ٹرانسمیٹر بھی لگایا گیا ہے۔اسپینس صاحب کے پاس اس وقت دو طرح کی مصنوعی آنکھیں ہیں ۔ ایک مصنوعی آنکھ کے پاس جیسے ہی چھوٹا مقناطیس لایا جاتا ہے اس کی سرخ لائٹ روشن ہوجاتی ہے اور وہ ٹرمنیٹر کی طرح دکھائی دیتے ہیں۔ دوسری آنکھ میں ویڈیو کیمرہ لگا ہے جو ریکارڈنگ کا کام کرتا ہے۔ وہ دونوں آنکھیں کسی زیور کی طرح بدل بدل کر استعمال کرتے ہیں ۔ اس طرح جب بھی ویڈیو بنانے کا دل کرتا ہے روب کیمرے والی آنکھ لگالیتے ہیں۔روب کو اچھا لگتا ہے جب انہیں کوئی آئی بورگ کے نام سے پکارتا ہے۔

مقبوضہ کشمیر(ایمرا نیوز آن لائن)ہیومن رائٹس واچ کی سالانہ رپورٹ میں مقبوضہ کشمیر میں بھارتی مظالم کی مذمت کی گئی ہے۔

ہیومن رائٹس واچ نے اپنی سالانہ رپورٹ میں مقبوضہ کشمیر میں مودی سرکار اور قابض بھارتی فوج کی جانب سے جاری مظالم کی مذمت کرتے ہوئے کہا گیا کہ بھارتی حکومت نے کشمیر میں مکمل شٹ ڈاؤن کے ذریعے تباہی کو چھپانے کی کوشش کی۔

ہیومن رائٹس واچ کی سالانہ رپورٹ میں کہا گیا کہ اگست 2019 میں مقبوضہ کشمیر میں بھارتی حکومت کے یک طرفہ اقدامات کی وجہ سے کشمیریوں کو بے حد تکلیف پہنچی اور ان کے حقوق پامال ہوئے، سابق وزرائے اعلیٰ ، سیاسی رہنماؤں ، کارکنوں ، وکلا،صحافیوں کو بغیر الزام کے نظربند کردیا گیا۔

ٹوکیو(ایمرا نیوز آن لائن) جاپان کے علاقے شیزؤوکا پریفیکچر میں واقع کیمورا بیوریج کمپنی کو عالمی سطح پر بہت کم لوگ جانتے ہیں مگر یہ کمپنی پورے جاپان میں اپنی تیار کردہ سافٹ ڈرنکس کے انوکھے اور اچھوتے ذائقوں کی وجہ سے مشہور ہے، ایسے ذائقے کہ جن کا تصور کوئی دوسری سافٹ ڈرنک بنانے والی کمپنی شاید ہی کرسکے۔

کیمورا بیوریج کی تیار کردہ ’’اچاری سافٹ ڈرنک‘‘ (اچار جیسے ذائقے والی سافٹ ڈرنک) پہلے ہی خاصی مشہور ہے۔ اس کے علاوہ مچھلی کے انڈوں اور آلو کے چپس جیسے ذائقے والی سافٹ ڈرنکس بھی یہی کمپنی بناتی ہے۔

عجیب و غریب ذائقوں کی فہرست یہیں پر ختم نہیں ہوجاتی بلکہ یہ کمپنی کری کولا، خربوزے اور ڈبل روٹی کی ملی جلی خوشبو والی کولا (میلن بریڈ کولا)، یہاں تک کہ ’’اِیل کولا‘‘ جیسے ذائقوں میں سافٹ ڈرنکس پچھلے کئی سال سے بنا رہی ہے۔

خاص بات یہ ہے کہ اتنے عجیب و غریب ذائقوں کے باوجود، اس کمپنی کی سافٹ ڈرنکس کو بدذائقہ نہیں کہا جاسکتا کیونکہ یہاں ریسرچ ڈیپارٹمنٹ سے وابستہ ماہرین نے ایسے ہر ایک منفرد ذائقے کو بہت تحقیق کے بعد حتمی شکل دی ہے۔

یہی وجہ ہے کہ کیمورا بیوریج کمپنی اس وقت 100 سے زائد مختلف ذائقوں میں سافٹ ڈرنکس فروخت کررہی ہے جبکہ اس سال بھی کمپنی کا ارادہ مزید نئے اور منفرد ذائقوں میں سافٹ ڈرنکس متعارف کروانے کا ہے۔

منی سوٹا(وقت آن لائن) ٹوئٹر اور سوشل میڈیا پر کئی تصاویر شیئر کی گئی ہیں جن میں بہت طویل ریلوے پٹڑی پر مکئی کے دانے ہموار انداز سے جمع ہوتے دیکھے جاسکتے ہیں۔

یہ واقعہ امریکی ریاست منی سوٹا کے شہر کرسٹل میں پیش آیا ہے جس میں مکئی کا ایک بھی دانہ ریلوے ٹریک پر موجود نہیں بلکہ دونوں آہنی پٹڑیوں کے درمیان اس طرح دکھائی دے رہا ہے کہ گویا کسی نے بوری سے بچھا کر رولر کے ذریعے اسے ہموارکیا ہے۔

سب سے پہلے ٹوئٹر پر ایک شخص مائیک پارکر نے اس کی تصاویر اور ویڈیو شیئر کی تھیں جو اس کے گھر کے باہر گزرنے والی ریلوے لائن پر دور تک پھیلے ہوئے تھے۔ حیرت انگیز بات یہ ہے کہ انہیں کھانے کےلیے کوئی پرندہ یا جانور نہیں دیکھا گیا تھا۔ تاہم یہ تصاویر تیزی سے سوشل میڈیا پر پھیلنے لگیں اور لوگوں نے اپنی اپنی فہم کے لحاظ سے اس پر تبصرہ شروع کردیا۔

مائیک کے اکاؤنٹ سے ایک شخص نے جب یہ تصاویر شیئر کی ہیں جو آگے ایک لاکھ دس ہزار صارفین تک پہنچیں۔ بعض لوگوں نے ان تصاویر کو جعلی بھی قرار دیا ہے لیکن بعض لوگوں کا اصرار یہ رہا کہ ساری تصاویر درست ہیں۔

لیکن ٹریک پر مکئی کے دانے اتنے ہموار انداز میں موجود ہیں کہ وہ حیرت میں مبتلا کردیتی ہیں۔ اس کے بعد کئی لوگوں نے یہاں کا دورہ کیا اور اس منظر کو خود اپنی آنکھوں سے دیکھا۔ ان میں سے ایک ایڈم بیلز نے خود ریلوے ٹریک کی ویڈیو بنائی اور اسے ٹوئٹر پر پوسٹ کیا۔

اس کے بعد مقامی میڈیا نے کہا ہے کہ یہاں سے گزرنے والی ٹرین کا ایک ڈبہ مکئی کے دانوں سے بھرا تھا اور اور وہ کھلا رہنے سے مکئی چلتی ٹرین سے پھسل کر گرتی رہی اور دو کلومیٹر طویل پٹڑی پر مکئی ہموار انداز میں پھیل گئی۔

نیویارک(وقت آن لائن) مقبوضہ کشمیر کی صورتحال پر اقوام متحدہ کی سلامتی کونسل کا اجلاس طلب کرلیا گیا ہے۔اقوام متحدہ کی سلامتی کونسل کا اجلاس کل نیو یارک کے وقت کے مطابق دن 12 بجے ہو گا جس میں اگست کے بعد دوسری بار مقبوضہ کشمیر کے مسئلے پر بات ہوگی جب کہ اقوام متحدہ فوجی مبصرین گروپ ایل او سی کی صورتحال پر بریف کریں گا۔

وزیر خارجہ شاہ محمود قریشی اجلاس میں شرکت کے لیے آج ہی نیویارک پہنچ رہے ہیں۔واضح رہے کہ اقوام متحدہ کی سلامتی کونسل نے 5 جنوری 1949 کو ایک قرارداد منظور کی تھی جس کے مطابق کشمیریوں کو یہ حق دیا گیا تھا کہ وہ اپنی مرضی کے مطابق اپنے مستقبل کا فیصلہ کر سکتے ہیں لیکن سلامتی کونسل کی قراردادوں کے باوجود بھارت نے خطے میں غاصبانہ قبضہ کیا ہوا ہے جب کہ وادی میں انسانی حقوق کی سنگین خلاف ورزیوں کے ساتھ چادر اور چار دیوار کا تقدس بھی پامال کیا جارہا ہے۔

کشمیر کی صورتحال کا پس منظر
بھارت نے 5 اگست کو راجیہ سبھا میں کشمیر کی خصوصی حیثیت ختم کرنے کا بل پیش کرنے سے قبل ہی صدارتی حکم نامے کے ذریعے کشمیر کی خصوصی حیثیت ختم کردی اور ساتھ ساتھ مقبوضہ کشمیر کو وفاق کے زیرِ انتظام دو حصوں یعنی (UNION TERRITORIES) میں تقسیم کردیا جس کے تحت پہلا حصہ لداخ جبکہ دوسرا جموں اور کشمیر پر مشتمل ہوگا۔

بھارت نے یہ دونوں بل لوک سبھا سے بھی بھاری اکثریت کے ساتھ منظور کرالیے ہیں۔

آرٹیکل 370 کیا ہے؟
بھارتی آئین کا آرٹیکل 370 مقبوضہ کشمیر میں خصوصی اختیارات سے متعلق ہے۔

آرٹیکل 370 ریاست مقبوضہ کشمیر کو اپنا آئین بنانے، اسے برقرار رکھنے، اپنا پرچم رکھنے اور دفاع، خارجہ و مواصلات کے علاوہ تمام معاملات میں آزادی دیتا ہے۔

بھارتی آئین کی جو دفعات و قوانین دیگر ریاستوں پر لاگو ہوتے ہیں وہ اس دفعہ کے تحت ریاست مقبوضہ کشمیر پر نافذ نہیں کیے جا سکتے۔

بھارتی آئین کے آرٹیکل 370 کے تحت کسی بھی دوسری ریاست کا شہری مقبوضہ کشمیر کا شہری نہیں بن سکتا اور نہ ہی وادی میں جگہ خرید سکتا ہے۔

بھارت نے آرٹیکل 370 کو ختم کرنے سے قبل ہی مقبوضہ کشمیر میں اضافی فوجی دستے تعینات کردیے تھے کیوں کہ اسے معلوم تھا کہ کشمیری اس اقدام کو کبھی قبول نہیں کریں گے۔

اطلاعات کے مطابق مقبوضہ کشمیر میں بھارتی فوجیوں کی تعداد اس وقت 9 لاکھ کے قریب پہنچ چکی ہے۔ کشمیر کی خصوصی حیثیت ختم کرنے کے بعد سے وادی بھر میں کرفیو نافذ ہے، ٹیلی فون، انٹرنیٹ سروسز بند ہیں، کئی بڑے اخبارات بھی شائع نہیں ہورہے۔

بھارتی انتظامیہ نے پورے کشمیر کو چھاؤنی میں تبدیل کررکھا ہے، 7 اگست کو کشمیری شہریوں نے بھارتی اقدامات کیخلاف احتجاج کیا لیکن قابض بھارتی فوجیوں نے نہتے کشمیریوں پر براہ راست فائرنگ، پیلٹ گنز اور آنسو گیس کی شیلنگ کی۔

مقبوضہ وادی میں 3 ماہ سے زائد عرصے سے کرفیو نافذ ہے جس کے باعث اشیائے خوردونوش کی شدید قلت ہے جب کہ مریضوں کے لیے ادویات بھی ناپید ہوچکی ہیں، ریاستی جبر و تشدد کے نتیجے میں متعدد کشمیری شہید اور زخمی ہوچکے ہیں۔

لندن(وقت آن لائن)شوگر کے مریضوں کو خون میں شکر کی مقدار جانچنے کے لیے ایک بوند خون درکار ہوتا ہے جو انگلی پر باریک سوئی مار کر حاصل کیا جاتا ہے اوراسے ایک خاص پٹی پر لگا کر شکر کی مقدار جانی جاتی ہے۔لیکن جدید ٹیکنالوجی کی مدد سے اس روایتی اور تکلیف دہ طریقے سے نجات دلانے کے لیے ایک بہترین حل تلاش کرلیا گیا ہے۔متعدد ٹیکنالوجی کمپنیاں خون میں شکر کی مقدار جاننے کے لیے ایک ایسے طریقے پر کام کر رہی ہیں جس میں خون کا نمونہ دیے بغیر شکر کی مقدار معلوم کی جاسکتی ہے۔

جاپانی کمپنی کیوسیرا بھی اسی طرح کی ٹیکنالوجی پر کام کر رہی ہے جب کہ کمپنی نے اعتراف کیا ہے کہ وہ بلڈ شوگر کی پیمائش کرنے کے لیے فی الحال تیار نہیں ہے۔یہ نئی ٹیکنالوجی مصنوعی ذہانت (آرٹیفیشل انٹیلیجنس) کا استعمال کرتے ہوئے خون میں شکر کی مقدار بتائے گی، اس ٹیکنالوجی پر ابھی مزید کام ہورہا ہے جسے ’کنزیومر الیکٹرانک شو 2020‘ میں پیش کیا گیا ہے۔

کنزیومر الیکٹرانک شو میں پیش کی جانے والی ’گلوٹریک‘ جو کہ ایک اسمارٹ واچ ہے، یہ خون میں موجود شکر کی مقدار بتاتی ہے۔اس واچ کو ہانک کانگ کی ایڈکیئر کی جانب سے بنایا گیا ہے، یہ واچ دل کی دھڑکن کو جانچنے کے بعد آرٹیفیشل انٹیلیجنس کا استعمال کرتے ہوئے خون میں موجود شکر کی مقدار بتاتی ہے۔اس واچ کی پشت پر ایسے سینسرز نصب کیے گئے ہیں جو ہر 15 منٹ بعد صحت سے متعلق ڈیٹا کا ریکارڈ بناتا ہے جب کہ اس واچ میں ایک عدد فنگر سینسر بھی موجود ہے جس کے ذریعے آپ ریڈنگز حاصل کر سکتے ہیں۔

اس پورے مرحلے میں صارف کو خون کی شکر کی مقدار کو معلوم کرنے میں ایک منٹ کا وقت لگے گا۔اس ڈیوائس کو ان افراد کے لیے ڈیزائن کیا گیا ہے جو ’پری ڈائبیٹک‘ ہیں اور وہ یہ نہیں چاہتے کہ انگلی پر سوئی مار کر خون میں موجود شکر کی مقدار کو معلوم کریں۔یہ ڈیوائس ایسے لوگوں کے لیے نہیں بنائی گئی ہے جو پہلے ہی ذیابطیس کا شکار ہیں کیونکہ ذیابیطس میں مبتلا مریضوں کو خون میں موجود شکر کی مقدار کو باقاعدگی سے جاننا ہوتا ہے۔

اس ڈیوائس کو پری ڈائیبیٹک یعنی ایسے لوگوں کے لیے بنایا گیا ہے جنہیں ذیابیطس ہونے کا خدشہ ہوتا ہے۔یہ ڈیوائس متوقع طور پر اسی سال جاپان کی مارکیٹ میں پیش کی جائے گی فی الحال یہ آزمائشی مرحلے میں ہے۔