Tag kartarpur

لاہور(ایمرا نیوزآن لائن) پاکستان نے کرتار پور راہداری سے گوردوارہ درشن کے لئے آنے والی سکھ لڑکی کی پاکستانی علاقے میں داخل ہونے کی کوشش ناکام بنادی۔

اس واقعے کے بعد پورے علاقے میں سیکیورٹی مزید سخت کر دی گئی ہے اور پاکستانی وزیٹرز کے لیے گوردوارہ سے واپسی پر بھی بائیومیٹرک لازمی قرار دے دی گئی۔

روزنامہ جنگ میں شائع خبر کے مطابق 23 نومبر کو ہریانہ سے تعلق رکھنے والی سکھ لڑکی منجیت کوریاتری کے روپ میں اپنے پاکستانی فیس بک بوائے فرینڈ سے ملنے کے لیے راہداری کے ذریعے گوردوارہ پہنچی جہاں فیصل آباد سے آیاہوا اس کا بوائے فرینڈ اپنے ایک دوست اور ایک پاکستانی لڑکی کے ساتھ موجود تھا۔

ان چاروں نے گوردوارہ کی پہلی منزل پر جا کر ملاقات کی۔ ملاقات میں سکھ یاتری منجیت کور نے راہداری سے واپس جانے کی بجائے پاکستانی علاقے میں جانے کا منصوبہ بنایا۔ ذرائع کے مطابق سکھ لڑکی کے بوائے فرینڈ کے ہمراہ آنے والی پاکستانی لڑکی نے اپنا وزیٹر کارڈ بھارتی سکھ لڑکی کو دے دیا اور اس یاتری کارڈ گوردوارے کے ایک کوڑے دان میں پھینک دیا۔

وزیراعظم(ایمرا نیوزآن لائن) عمران خان نے 9 نومبر کو کرتارپورراہدری کا افتتاح کیا تھا اور اس موقع پر انہوں نے ریکارڈ مدت میں مکمل کیے جانے والے کام کا بس میں سفر کر کے تفصیلی جائزہ لیا جب کہ اس سفر میں وزیراعظم کے ہمراہ وفاقی وزرا، سابق بھارتی کرکٹر نوجوت سدھ اور بھارتی ادکار سنی دیول سمیت دیگر شخصیات بھی تھیں۔

وزیراعظم کے بس میں سفر کے خصوصی مناظر اور اس دوران ہونے والی دلچسپ گفتگو اس ویڈیو میں ملاحظہ فرمائیں۔

وزیر خارجہ(ایمرا نیوزآن لائن) شاہ محمود قریشی کا کہنا ہے کہ کرتار پور راہداری کھل سکتی ہے تو لائن آف کنٹرول کی عارضی حد بندی کیوں نہیں ختم ہو سکتی۔

کرتارپور راہداری کی افتتاحی تقریب سے خطاب کرتے ہوئے شاہ محمود قریشی کا کہنا تھا کہ مجھے آج کا دن ایک تاریخی دن دکھائی دے رہا ہے کیونکہ آج ایک محبت کی راہداری کا افتتاح ہوا ہے، حکومت پاکستان کی جانب سے سکھ یاتریوں کو خوش آمدید کہتا ہوں۔ شاہ محمود قریشی نے کہا کہ بابا گرونانک کا پیغام پیغام امن تھا، آج ہمیں اپنے گریبانوں میں دیکھنا ہے کہ امن کو کہاں سے خطرہ لاحق ہے، آج ہمیں سوچنا ہے کہ خطے میں نفرت کے بیج کون بو رہا ہے۔

انہوں نے کہا کہ بابا گرو نانک نے اپنی عملی زندگی سے خدمت کو فوقیت دی، ان کی محبت کے بوئے بیج آپ کو آج یہاں گلدستےکی صورت میں دکھائی دے رہے ہیں کیونکہ کرتار پور راہداری محبت کی راہداری ہے۔ وزیراعظم کو مبارکباد دیتے ہوئے شاہ محمود قریشی نے کہا کہ عمران خان نے ایک سال پہلے بھارت کے لوگوں سے وعدہ کیاتھا کہ محبت کی راہ بناؤں گا جس کا عملی مظاہرہ پوری دنیا آج دیکھ رہی ہے۔

وزیر خارجہ نے کہا کہ ایک وعدہ بھارتی وزیراعظم نے بھی کیا تھا، کشمیری آج بھی اس وعدےکی وفا کا انتظار کر رہے ہیں انہوں نے کہا کہ موجودہ صدی کو ایشیاء کی صدی کہا جاتا ہے، 400 مندروں کی نشاندہی کر دی گئی ہے، ان کی تزئین نو کی جائے گی۔ ان کا کہنا تھا کہ 9 نومبر کو دیوار برلن گر سکتی ہے، یورپ ایک ہو سکتا ہے، کرتارپور راہداری کھل سکتی ہے تو لائن آف کنٹرول کی عارضی حد بندی کیوں ختم نہیں ہو سکتی۔

شاہ محمود قریشی نے کہا کہ جس طرح عمران خان نے کرتار راہداری کھول کر دوسروں کو شکریہ کا موقع دیا، کشمیر سے کرفیو اٹھا کر مودی عمران خان کو بھی شکریہ کا موقع دیں۔ انہوں نے مزید کہا کہ مودی سری نگر کی جامع مسجد کھول دیں تاکہ وہاں کشمیری نماز جمعہ پڑھ سکیں۔

پاکستان(ایمرا نیوزآن لائن) میں سکھوں کے 2 مقدس ترین مقامات ہیں، پہلا جنم استھان ننکانہ صاحب ،جہاں سکھ مذہب کے بانی باباگورونانک دیو جی کی پیدائش ہوئی اور دوسرا گوردوارہ دربار صاحب کرتاپور ، جہاں باباگورونانک نے اپنی عمر کے آخری 18سال گزارے اور یہیں وفات پائی، یہاں ایک جانب ان کی سمادھی اور دوسری جانب قبر بنائی گئی ہے۔

گوردوارہ دربارصاحب کرتارپور سکھ مت کے ماننے والوں کا دوسرامقدس ترین مقام لاہور سے تقریباً 120 کلومیٹر اورپاک بھارت سرحد سے صرف 4کلومیٹر کی دوری پر واقع یہ ہے، گوردوارہ دریائے راوی کے کنارےچھوٹے سے گاؤں کوٹھے پنڈ میں آبادہے، یہ گاؤں ضلع نارووال کی تحصیل شکر گڑھ میں آتاہے، سفید رنگ کا یہ خوبصورت گوردوارہ دور سے دیکھنے میں ایک پرندےکی مانند لگتاہے۔

گوردوارہ دربار صاحب کی تاریخی اہمیت یہ ہےکہ سکھ مت کے بانی باباگورونانک دیو جی نےاپنی عمر کے آخری 18سال گاؤں کوٹھے پنڈ میں گزارےاور 22 ستمبر 1539ء کو یہیں وفات پائی، یہاں ایک جانب ان کی سمادھی اور دوسری جانب قبربنائی گئی ہے۔

گوردوارہ دربار صاحب کی قدیم عمارت دریائے راوی کےسیلاب میں تباہ ہو گئی تھی ، موجودہ عمارت 1920 ءسے 1929 ءکے درمیان پٹیالہ کے مہاراجا سردار بھوپندر سنگھ نےتعمیر کرائی ، 1995ء میں حکومت پاکستان نے اس کی دوبارہ مرمت کی، جولائی 2004ء میں یہ گوردوارہ مکمل طور پر بحال کر دیا گیا،گوردوارے کے باغیچے میں باباگورونانک کے زیرِاستعمال رہنے والا کنواں بھی ہے جسے سکھ عقیدت میں “سری کُھوہ صاحب”کہتےہیں۔

تقسیم ہند کے وقت یہ گوردوارہ پاکستان کے حصے میں آگیا، تقریباً 56 سال تک سکھ زائرین اس کی زیارت کے منتظر رہے، انہوں نے بھارتی سرحدپر دور درشن استھان بنا رکھے تھے جہاں سے وہ دوربین کی مدد سےاس کا دیدار کیا کرتے تھے، سکھ برادری کئی دہائیوں تک راہداری کی تعمیرکا مطالبہ کرتی رہی، دونوں ملکوں کی پچھلی حکومتوں نے 1998ء، 2004ء اور 2008ء میں راہداری کی تعمیر کیلئے ابتدائی بات چیت بھی کی لیکن کوئی نتیجہ نہ نکل سکا ۔

وزیراعظم عمران خان کی تقریبِ حلف برداری میں بھارتی کرکٹر سیاستدان نوجوت سنگھ سدھو سے اس سلسلے میں بات چیت ہوئی جس میں اس منصوبے کو جلد پایہ تکمیل تک پہنچانے کا اعلان کیا گیا۔

وزیراعظم (ایمرا نیوزآن لائن) عمران خان سکھ مت کے بانی اور دس سکھ گروؤں میں سے پہلے گرو بابا گرونانک کے 550 ویں جنم دن کے موقع پر 9 نومبر کو کرتار پور راہداری کا افتتاح کریں گے جس کے لیے تیاریاں تقریباً مکمل ہو چکی ہیں۔

کرتار پور افتتاحی تقریب کے حوالے سے ترجمان دفترخارجہ ڈاکٹر محمد فیصل نے ہفتہ وار بریفنگ دیتے ہوئے بتایا کہ بابا گرونانک کے 550 ویں جنم دن کے لیے تقریباً 10ہزار لوگ شرکت کریں گے۔ اس موقع پر حکومت پاکستان نے سکھ برادری کے لیے 50 روپے مالیت کا یادگاری سکہ بھی جاری کیا ہے جس کے ایک جانب اسلامی جمہوریہ پاکستان اور قومی نشان ہے جب کہ دوسری جانب سکھوں کی عبادت گاہ کی تصویر کندہ ہے۔

وزیر اعظم عمران خان نے کرتارپورراہداری منصوبے کا سنگ بنیاد 28 نومبر 2018ء کو رکھا تھا اور تقریباً ایک سال میں دربار سے پاک بھارت سرحد تک ساڑھے چار کلو میٹر لمبی سڑک اور دریائے راوی پر پلُ کی تعمیر مکمل کی جاچکی ہے۔ اس راہداری سے روزانہ پانچ ہزار افراد بغیر ویزہ پاکستان آ سکیں گے لیکن انہیں اسی شام واپس لوٹنا ہوگا۔

پاک فوج میجر جنرل آصف غفور نے بھی گزشتہ روز کہا تھا کہ کرتارپور راہداری بھارت سے آنے والوں کے لیے ون وے کوریڈور ہے،اس کے ذریعے بھارت سے آئے یاتری اسی دن واپس چلے جائیں گے اور بھارت سے آنے والے کرتارپور راہداری میں جو عبادت گاہ ہے، اس سے ایک انچ باہر نہیں جاسکتے۔ ان کا کہنا تھا کہ کرتارپور راہداری سے انٹری قانونی ہوگی، پرمٹ اور پاسپورٹ کی بنیاد پر شناخت ہوگی۔

نوجوت سنگھ سدھو کی شرکت بھارت کے سابق کرکٹر اور سکھ سیاستدان نوجوت سنگھ سدھو نے بھی افتتاحی تقریب میں شرکت پر رضامندی ظاہر کر دی ہے۔

سینیٹر فیصل جاوید سے ٹیلیفونک رابطہ کرتے ہوئے انہوں نے کہا کہ دنیا بھر میں بسنے والے کروڑوں سکھ اپنی مقدس دھرتی کی زیارت کے لیے بیتاب ہیں، بابا گرونانک کے 550 ویں جنم دن پر دربارصاحب کا افتتاح تاریخی موقع ہے جس کے لیے وہ حکومت پاکستان خصوصاً وزیراعظم عمران خان کے شکرگزار ہیں۔ کرتارپوری میں تیاریاں کہاں تک پہنچ چکی ہیں ہم آپ کو تصاویر کے ذریعے بتاتے ہیں:

(میڈیا 92 نیوز آن لائن) کرتار پور راہداری پر بھارت سے آئے سکھ یاتریوں کی کلیئرنس کے عمل میں تیزی لانےکے لیے 80 امیگریشن کاؤنٹرز قائم کر دیئے گئے ہیں۔

گزشتہ ہفتے پاکستان اور بھارت کے درمیان کرتارپور راہداری کے معاہدے پر دستخط ہوئے تھے، جس کے تحت بھارت کے سکھ یاتری بغیر ویزے پاکستان میں موجود اپنے چند مقدس مقامات کا دورہ کر سکیں گے۔

کرتارپور راہداری معاہدے کے مطابق روزانہ 5 ہزار سکھ یاتری اس راہداری کا استعمال کرتے ہوئے گوردوارہ دربار صاحب کا دورہ کرسکیں گےجہاں گرو نانک نے اپنی زندگی کے آخری 18 سال گزارے تھے۔

میڈیا رپورٹس کے مطابق وزارت داخلہ کی جانب سے بھارت سے آئے یاتریوں کی سہولت کے لیے تین داخلی راستے بنائے گئے ہیں۔ فیڈرل انویسٹی گیشن ایجنسی (ایف آئی اے) یاتریوں کی کلیئرنس لسٹ اُن کی آمد سے 10 روز قبل بھارتی حکام کو بھیجے گی ۔ میڈیارپورٹس کے مطابق پاکستان رینجرز کےزیر نگرانی خصوصی بسوں میں یاتریوں کو گوردوارہ دربار صاحب لے جایا جائے گا جبکہ گوردوارے میں داخل ہونے سے قبل اُن کے پاسپورٹ اسکین کیے جائیں گے۔

پاکستان اور بھارت دونوں ممالک سے آئے یاتریوں کو گوردوارہ دربار صاحب میں داخلےسے قبل بائیو میٹرک اسکریننگ کروانی ہوگی۔ اس کے علاوہ زیارت کے لیے آئے یاتری واپسی کے لیے اُسی گیٹ کا استعمال کریں گےجہاں سے وہ تصدیق کے بعد اندر آئے تھے۔

رپورٹ کے مطابق وزارت داخلہ نے راہداری پر کارروائیوں میں آسانی پیدا کرنے کے لیے 169 انسپکٹر اور سب انسپکٹر ، کانسٹیبل اور خواتین کانسٹیبل کے علاوہ دو اسسٹنٹ ڈائریکٹر اور ایک ڈپٹی ڈائریکٹر مقرر کیا ہے۔ کرتارپور راہداری پر زیارت کے لیے آئے یاتریوں سے 20 ڈالر سروس چارجز لیے جائیں گے۔

یہ بھی پڑھیے: کرتار پور: سکھ یاتریوں کیلئے ہدایت نامہ جاری پاکستان امیگریشن حکام ہر بھارتی یاتری کو ایک ’بار کوڈ‘ والا کارڈ جاری کریں گے، بھارتی یاتریوں کی آمد صبح 8سے دن 12بجے تک ہوگی اور غروب آفتاب تک سب یاتریوں کو واپس جانا ہوگا۔

وزیر اعظم عمران خان 9نومبر کو کرتارپور راہداری کا افتتاح کریں گےجبکہ بابا گرو نانک کے 550 ویں جنم دن کی تقریبات کا آغاز 12 نومبر سے کیا جائے گا۔

لاہور(نیٹ نیوز/ایمرا نیوز) کرتار پور راہداری کے سنگ بنیاد کے موقع پر مسئلہ کشمیر کا ذکر کرنے پر بھارت نےوزیر اعظم عمران خان کو تنقید کا نشانہ بنا دیا اور کہا کہ پاکستان اپنی بین الاقوامی ذمہ داریاں پوری کرے۔کرتار پور راہداری کے سنگ بنیاد کے موقع پر منعقدہ تقریب میں وزیر اعظم عمران خا ن نے خطاب میں کہا تھا کہ پاکستان اور بھارت میں صرف ایک مسئلہ ہے اور وہ مسئلہ کشمیر ہے، کیا ہم ایک مسئلہ حل نہیں کرسکتے؟ انسان چاند پر پہنچ چکا ہے تو کیا ہم مسئلہ کشمیر حل نہیں کر سکتے؟یہ بات بھارت کو ہضم نہ ہوئی اوربھارتی وزارت خارجہ نے تنقیدی وار کر دیا۔بھارتی وزارت خارجہ کے ترجمان روش کمار کا کہنا ہےکہ یہ افسوسناک بات ہے کہ پاکستان کے وزیراعظم نے سکھ فرقہ کے کرتارپور راہداری کے دیرینہ مطالبہ کے سلسلہ میں منعقدہ مذہبی تقریب کے موقع پر جموں کشمیر کا ذکر کرکے سیاسی رنگ دینے کی کوشش کی۔انہوں نے مزید کہا کہ اس پروگرام میں مقبوضہ کشمیر کا ذکر بلا وجہ کیاگیا کیونکہ جموں کشمیر ہندوستان کا اٹوٹ حصہ ہے۔بھارت پاکستان کو یاد دلانا چاہتا ہے کہ پاکستان اپنی بین الاقوامی ذمہ داریاں پوری کرے ارو اپنی سر زمین سے دہشت گرد تنظیموں کو پناہ دینا بند کر کے دہشت گردوں کے خلاف ٹھوس کارروائی کرے۔روش کمار نے کہا کہ بھارتی حکومت جموں و کشمیر پر پاکستان کے موقف کو بھارت کے داخلی معاملات سے تعبیر کرتی ہے۔

کراچی(نیٹ نیوز/ایمرا نیوز)بھارتی سنیئر صحافی راجدیپ سردسائی نے کہا ہے کہ کرتارپور میں جو ہورہا ہے اچھا لیکن یہ صرف ایونٹ تک معاملہ محدود نہیں رہنا چاہیے پاکستان اور ہندوستان میں گفتگو کے معاملات آگے لے جانے کی ضرورت ہے لیکن کم سے کم ایک اچھی بات ہوئی ہے لیکن ہمیں یہاں نہیں رُکنا اس سے آگے جانے کی ضرورت ہے،بھارتی میڈیا جانتا ہے نفرت پھیلانے سے ریٹنگ ملتی ہے ۔تحریک انصاف کے رہنما سینیٹر ولید اقبال نے کہا کہ اس قدم سے یہ با ت واضح ہوسکتی ہے کہ ہم امن چاہتے ہیں ہماری درمیان جو ہتھیاروں کا مقابلہ ہوتا ہے اگر ان وسائل کو غربت ختم کرنے کے لئے استعمال کیا جائے تو دونوں ملکوں کے لئے اچھا ہے۔سنیئر تجزیہ کار امتیاز عالم نے کہا کہ بڑی اندھیری رات کے بعد کرن کا پھوٹنا خوش آئند ہے ،جموں اور سیالکوٹ کا رستہ بھی کھلنا چاہئے۔مسلم لیگ نون کی عظمیٰ بخاری کا کہنا تھا کہ پاکستان انڈیا کے تعلقات کھٹے میٹھے رہے ہیں اور ایسے ہی رہیں گے سب کچھ اچھا ہوجائے ممکن نہیں ہے لیکن چھوٹے چھوٹے اقدامات کرنے سے بہت بہتری آسکتی ہے ۔راجدیپ سردسائی نے مزید کہا کہ دہشت گردی ایک بڑا مسئلہ ہے جسے حل ہونے کی ضرورت ہے۔ بھارتی میڈیا جانتا ہے نفرت پھیلانے سے ریٹنگ ملتی ہے ۔میں اتفاق کرتا ہوں کہ ہر سطح پر بات ہونی چاہیے ۔ چاہتا ہوں جس طرح میں محظوظ ہوا عمران خان اور سنیل گواسکر کو میدان میں دیکھ کر اسی طرح ہمارے بچے بھی محمد عامر اور ویرات کو ایک ساتھ کھیلتے ہوئے دیکھیں ۔ امید ہے کرکٹ کی شروعات ضرور ہوگی۔ امتیاز عالم کا مزید کہنا ہے کہ ہندوستانی میڈیا میں جس طرح نفرت انگیزی پیدا کی جاتی ہے یہ افسوسناک ہے۔ اردواگر زندہ ہے دنیا میں تو میں سمجھتا ہوں بالی ووڈ کا اس میں اہم کردار ہے ۔ پاکستان اور ہندوستان میں جس طرح مذہبی انتہا پسندی کا ابھار ہے جس کا ہم شکار ہوئے ہیں اور جس طرح ہندوستان میں ہندو مذہب سیاست میں بڑھ رہا ہے یہ بڑے خطرات آرہے ہیں کوشش کرنی چاہیے ان ریاستوں کو اگر ان کا اسیر نہیں بننا ہے تو اس سے آزاد ہو کر آگے بڑھیں۔ الزام لگانے کا سلسلہ چلتا رہے گا اسی دوران بات ہونی چاہیے اس سے کوئی فرق نہیں پڑتا، ایک وعدہ لینا چاہتا ہوں راجدیپ سے کہ آپ نے کرکٹ شروع کروانے کی مہم چلوانی ہے۔ ولید اقبال کا مزید کہنا ہے کہ دونوں ممالک کو وسعت قلبی دکھانے کی ضرورت ہے ۔ پاکستان میں جب الیکشن میں حصہ لیا جاتا ہے ہماری جتنی بھی پارٹیز ہیں وہ الیکشن مہم میں اپنے لوکل مسائل پر مہم چلاتی ہیں لیکن ہندوستان میں الیکشن مہم کا مرکز پاکستان دشمنی ہوتا ہے اس مائنڈ سیٹ کو نکالنے کی ضرورت ہے۔

لاہور:(نیٹ نیوز/ایمرا نیوز) کرتار پور راہداری کے سنگ بنیاد کی تقریب میں شرکت کے لیے بھارتی وفد پاکستان پہنچ گیا۔سابق بھارتی کرکٹر اور سیاست دان نوجوت سنگھ سدھو کی قیادت میں بھارتی وفد واہگہ بارڈر کے راستے پاکستان پہنچا جہاں پنجاب رینجرز کے حکام نے ان کا استقبال کیا۔وزیراعظم عمران خان کل نارووال کے قریب کرتار پور راہداری کا سنگ بنیاد رکھیں گے جب کہ تقریب میں بھارتی وفد سمیت پاکستان میں موجود سکھ یاتری بھی تقریب میں شرکت کریں گے۔پاکستان کی تجویز پر نریندر مودی حکومت نے کرتار پور سرحد تک اپنی حدود میں راہداری بنانے کی منظوری دی، اس سے قبل پاکستان نے بھارت کو پیشکش کی تھی کہ سکھ یاتریوں کو بغیر کسی دشواری کرتارپور آنے کے لیے پاکستان راضی ہے، بھارت بھی اس کی اجازت دے۔ یاد رہے کہ ضلع نارووال میں واقع کرتار پور بھارتی سرحد سے متصل علاقہ ہے جہاں سکھ مذہب کے بانی بابا گرو نانک دیو جی نے اپنی زندگی کے آخری ایام گزارے اور یہیں گردوارے میں ان کی قبر بھی ہے۔سکھ یاتریوں کو کرتارپور تک پہنچنے کے لیے پہلے لاہور اور پھر تقریبا 130 کلو میٹر کا سفر طے کر کے نارووال پہنچنا پڑتا تھا جب کہ بھارتی حدود سے کرتارپور 3 سے 4 کلو میٹر دوری پر ہے۔
کرتارپور کی اہمیت و پس منظر
ہندوستان کی تقسیم کے وقت گردوارہ دربار صاحب پاکستان کے حصے میں آیا، دونوں ممالک کے درمیان کشیدہ تعلقات کے باعث طویل عرصے تک یہ گردوارہ بند رہا۔بھارتی سکیورٹی فورس نے سرحد پر ایک ‘درشن استھل’ قائم کیا جہاں سے سکھ دوربین کی مدد سے دربار صاحب کا دیدار کرتے ہوئے اپنی عبادت کیا کرتے تھے اور پہلی بار 1998 میں دونوں حکومتوں کے درمیان ایک معاہدہ ہوا جس کے تحت ہر سال سکھ یاتریوں کو کرتارپور کا ویزہ ملنا شروع ہوا۔