Tag lollywood

کراچی:(ایمرا نیوزآن لائن) کچھ عرصہ قبل اداکاری کو خیرباد کہنے والے سابق اداکار حمزہ علی عباسی ایک نئے انداز میں شوبز میں واپسی کررہے ہیں جس کی تصدیق ہمایوں سعید نے کی ہے۔اداکار حمزہ علی عباسی نے گزشتہ ماہ ایک ویڈیو پیغام کے ذریعے اداکاری کو خیرباد کہہ کر اپنے مداحوں کو حیران کردیا تھا۔ حمزہ علی عباسی کا کہنا تھا کہ وہ اب اپنی زندگی اسلام کے مطابق گزاریں گے اور اسلام کا پیغام عام کریں گے۔ تاہم اب ہمایوں سعید نے حمزہ علی عباسی کی شوبز میں واپسی کی تصدیق کردی ہے۔اس خبرکوبھی پڑھیں: حمزہ عباسی نے شوبز انڈسٹری کو خیرباد کہہ دیا
ایک بین الاقوامی ویب سائٹ کو دئیے گئے انٹرویو میں ہمایوں سعید نے اپنے دوست اور ساتھی اداکار حمزہ علی عباسی کے شوبز سے کنارہ کشی اختیار کرنے کے فیصلے پر بات کرتے ہوئے کہا کہ حمزہ کچھ عرصے سے اسکالر بننے کا سوچ رہے تھے جس کے لیے انہوں نے تعلیم بھی حاصل کرنی شروع کردی تھی۔

ہمایوں سعید نے کہا دراصل حمزہ علی عباسی نے کچھ مدت کے لیے شوبز کو خیرباد کہنے کا فیصلہ کیا تھا۔ لیکن مستقبل میں وہ حب الوطنی اور روحانیت پر مشتمل کرداروں میں نظر آئیں گے۔ اس کے علاوہ حمزہ علی عباسی ہدایت کاری کے میدان میں بھی قدم رکھ رہے ہیں۔اس خبرکوبھی پڑھیں: خدا حمزہ علی عباسی کو ثابت قدم رہنے کی طاقت دے
ہمایوں سعید نے کہا میں حب الوطنی کے موضوع پر فلم بنانے کی منصوبہ بندی کررہاہوں جس کی ہدایت کاری حمزہ علی عباسی کریں گے۔ پراجیکٹ کے حوالے سے سوائے نام کے تقریباً ہر چیز مکمل ہے۔واضح ہے کہ ہمایوں سعید بہترین اداکار ہونے کے ساتھ کامیاب پروڈیوسر بھی ہیں۔ حال ہی میں ان کا پروڈیوس کردہ ڈراما ’میرے پاس تم ہو‘ کامیابی کے جھنڈے گاڑ رہاہے اس کے علاوہ ہمایوں سعید ’میں ہوں شاہد آفریدی‘، ’جوانی پھر نہیں آنی‘ اور ’جوانی پھر نہیں آنی2‘ کے شریک پروڈیوسر بھی رہ چکے ہیں۔

لاہور(ایمرا نیوزآن لائن) گلوکارہ میشا شفیع نے اپنے خلاف اداکار اور گلوکار علی ظفر کی جانب سے 100 کروڑ روپے ہرجانے کے دعوے میں بیان ریکارڈ کرا دیا۔

گلوکارہ میشا شفیع بیان ریکارڈ کرانے اپنی والدہ اداکارہ صبا حمید کے ساتھ تیسری بار ایڈیشنل سیشن جج امجد علی شاہ کی عدالت میں پیش ہوئیں، انہوں نے 3گھنٹے سے زائد وقت تک بیان ریکارڈ کرایا۔ میشا شفیع نے اپنے اس الزام کو دہرایا کہ انہیں ساتھی گلوکارعلی ظفر نے متعدد بار جنسی طور پر ہراساں کیا، انہوں نے انتہائی مجبوری کی حالت میں یہ بات ظاہر کی۔ گلوکارہ کے مطابق انہوں نے بہت عرصے تک ایک ساتھ پرفارم کرنا تھا لیکن وہ اس رویے کو مزید برداشت نہیں کرسکتی تھیں۔

‘شوہر تربیت یافتہ باکسر ہیں ،نہیں چاہتی تھی کہ لڑائی ہو ‘: میشا کے مطابق علی ظفر نے اپنے سسر کے گھر پر پہلی بار ہراساں کیا، علی ظفر کایہ رویہ ان کے لیے حیران اور پریشان کن تھا، انہوں نے فوری طور پر اس گھر کے لان میں موجود اپنے شوہر کو ان باتوں سے آگاہ کیا ،لیکن ساتھ ہی شوہر کو علی ظفر سے اس معاملے پر بات کرنے سے روک دیا کیونکہ ان کے شوہر تربیت یافتہ باکسر ہیں اور وہ نہیں چاہتی تھیں کہ لڑائی ہو۔

میشا شفیع نے یہ بھی بتایاکہ علی ظفر کی فیملی سے تعلق ہونے کی وجہ سے انہوں نے یہ بات ان کی بیوی کو نہیں بتائی، میشا شفیع نے عدالت میں مختلف واٹس ایپ میسجز بھی دکھائے۔ احاطہ عدالت میں میشا شفیع نےمیڈیا کو بتایا کہ انہیں ڈرانےاوردباؤ میں لانے کے لیے کیس فائل کیا گیا ہے ،ہراسانی کے الزامات لگانے کے بعد ان کاکافی مالی نقصان بھی ہوچکا ہے۔ عدالت نے کیس پر مزیدسماعت 20 دسمبر تک ملتوی کردی، آئندہ سماعت پرمزید گواہوں کے بیانات ریکارڈ کیے جائیں گے۔ میشا شفیع نے گلوکارعلی ظفر پر جنسی ہراساں کرنے کا الزام لگا دیا میشا شفیع کا کہنا تھا کہ جنسی ہراسانی پر بات کرنا آسان نہیں لیکن اس پر خاموش رہنا بھی بہت مشکل ہے، میں خاموش رہنے کے کلچر کو توڑوں گی جو معاشرے میں سرائیت کرچکا ہے۔

گلوکار و اداکار علی ظفر نے میشا شفیع کی جانب سے ہراساں کرنے کے الزامات کی تردید کر تے ہوئےکہا تھا کہ میں الزام کا جواب الزام سے نہیں دوں گا بلکہ میشا شفیع کے خلاف عدالت جاؤں گا اور مجھے پورا یقین ہے کہ سچ ہمیشہ غالب ہوتا ہے۔ علی ظفر کی جانب سے ہراسانی کا الزام لگانے پر میشا شفیع پر 100 کروڑ روپے ہرجانے کا مقدمہ دائر کیا گیا ہے۔

(وقت نیوزآن لائن) چند روز سے امریکی ریاست فلوریڈا کی ایک آرٹ گیلری میں ’دیوار پر ٹیپ سے چپکا کیلا‘ سب کی توجہ کا مرکز بنا ہوا ہے۔

یہ فن پارہ ایک اطالوی کامیڈین و آرٹسٹ ماریزیو کیٹیلان کا تھا جو میامی آرٹ بیزل میں ایک لاکھ 20 ہزار امریکی ڈالرز میں فروخت ہوا تھا۔ آرٹسٹ ماریزیو کی یہ کلیکشن 3 ایڈیشنز پر مشتمل تھی جس میں سے 2 ایڈیشن فروخت ہو چکے ہیں جب کہ اس ایڈیشن کا ایک پیس بچا ہوا ہے، اور یہ پیس 1 لاکھ 50 ہزار ڈالرز میں فروخت ہونے کی توقع کی جا رہی ہے۔

بعد ازاں ڈیوڈ دتونا نامی شخص نے آرٹ گیلری میں موجود لاکھوں روپے مالیت کا دیوار پر ٹیپ سے چپکا کیلا اتارکر کھا لیا تھا جس پر وہاں موجود سب لوگ حیران رہ گئے تھے۔ ڈیوڈ دتونا کی جانب سے کیلا کھانے کے فوری بعد آرٹ گیلری کے ایک اسٹاف ممبر کی جانب سے تھوڑے غصے اور ناراضگی کا اظہار کیا گیا تاہم اس پر ان کے خلاف کوئی کارروائی نہیں کی گئی اور دیوار پر ایک اور کیلا چپکا دیا گیا تھا۔

سوشل میڈیا پر جہاں اس کیلے کو لے کر بحث جاری ہے وہیں پاکستان کی نامور اداکارہ مہوش حیات نے بھی کروڑوں روپے مالیت کے کیلے کے آرٹ پیس پر دلچسپ تبصرہ کر ڈالا۔ اداکارہ مہوش حیات نے عجیب و غریب خبر پر ردِعمل کا اظہار کرتے ہوئے مائیکرو بلاگنگ سائٹ ٹوئٹر پر دلچسپ تبصرہ کیا۔ اداکارہ نے لکھا کہ ’میں خود آرٹ سے محبت کرنے والوں میں سے ایک ہوں لیکن میں کچھ چیزیں سمجھنے سے قاصر ہوں جسے آج کل آرٹ سمجھا جا رہا ہے۔‘

اداکارہ مہوش حیات سابق صدر پرویز مشرف کے حق میں بول پڑیں: مہوش حیات نے دلچسپ انداز اپناتے ہوئے کہا کہ ’دراصل میں بھی ایک آرٹسٹ بننے کے بارے میں سوچ رہی ہوں اور ایک کریلے کو بذریعہ ٹیپ دیوار پر چپکانے کے بارے میں سوچ رہی ہوں۔‘ تمغہ امتیاز حاصل کرنے والی اداکارہ مہوش حیات نے لکھا کہ ’اگر ایک کیلا کروڑوں میں فروخت ہوسکتا ہے تو کریلا دیوار پر چپکانے سے حیرت انگیز فائدہ مل سکتا ہے‘۔

مہوش حیات کے ٹوئٹ پر صارفین نے بھی ملے جلے انداز میں تبصرے کرنا شروع کر دیئے۔ یاسر احمد نامی صارف نے مزاحیہ انداز میں تبصرہ کرتے ہوئے لکھا کہ ’آپ کو ٹماٹر کا استعمال کرنا چاہیے کیونکہ ان دنوں اس کی قیمت بہت ہے‘۔ ایک اور صارف نے طنزیہ انداز اپناتے ہوئے لکھا کہ ’میں یہ سمجھنے سے قاصر ہوں، ہم اس آرٹ کو کیا نام دیں گے؟‘ ایک اور صارف نے ملے جلے انداز میں تبصرہ کیا کہ ’ایسا ٹماٹر کے ساتھ کریں، پاکستان کے موجوہ حالات میں اس کی قیمت بہت زیادہ ہے‘۔

(ایمرا نیوزآن لائن) کیا گوجرانوالا میں کنسرٹ کے دوران گلوکار عاصم اظہر کو واقعی میں جوتا پڑگیا؟ گلوکار نے سوشل میڈیا پر گردش کرتی اپنی ایک وڈیو سے متعلق وضاحت کر دی۔

ایک طنزیہ وڈیو پیغام کے ذریعے عاصم اظہر نے انکشاف کیا کہ پنڈال کی جانب سے ان پراچھالی گئی چیز جوتا نہیں، درحقیقت ایک ٹوپی تھی۔ انہوں نے مزید کہا کہ ’جھوٹی خبریں پھیلانے والوں بس کردو‘۔

وڈیو پیغام میں عاصم اظہر نے وضاحت کی کہ شائقین محبت کے اظہار کے لیے اکثر اسٹیج پر پرفارمرز کی جانب اپنی کوئی چیز اچھال دیتے ہیں۔ عاصم اظہر نے کہا کہ انہیں مداحوں سے کوئی گلہ نہیں، گلہ ہے تو جھوٹی خبریں پھیلانے والوں سے۔

(ایمرا نیوزآن لائن) پاکستان فلم اور ڈرامہ انڈسٹری کی نامور اداکارہ مہوش حیات سابق صدر پرویز مشرف کے حق میں بول پڑیں۔

اداکارہ مہوش حیات نے مائیکرو بلاگنگ سائٹ ٹوئٹر سابق صدر پرویز مشرف کی اسپتال کی ایک ویڈیو شیئر کی۔ مہوش حیات نے ویڈیو کے کیپشن میں صدر پرویز مشرف کی حمایت کرتے ہوئے لکھا کہ ’آئیے ایک لمحے کے لئے سیاست کو ایک طرف رکھ دیتے ہیں، یہ شخص ہمارے ملک کاصدر رہ چکا ہے اور ہر مشکل وقت میں انہوں نے ہماری رہنمائی کی‘۔

تمغہ امتیاز حاصل کرنے والی اداکارہ نے اپنے پیغام میں مزید لکھا کہ ’آپ انہیں پسند کرتے ہوں یا ان سے نفرت کرتے ہوں، وہ سُنے جانے کے مستحق ہیں‘۔ واضح رہے کہ پاکستان کے سابق صدر جنرل (ر) پرویز مشرف کے خلاف آرٹیکل 6 کی خلاف ورزی کرنے پر سنگین غداری کا مقدمہ چل رہا ہے۔ اداکارہ مہوش حیات کے اس ٹوئٹ پر مداحوں نے بھی ان کی حمایت کرتے ہوئے اپنے ردِعمل کا اظہار کیا۔

ٹوئٹر پر ایک صارف نے اداکارہ مہوش حیات کے کیپشن سے اتفاق کرتے ہوئے سابق صدر پرویز مشرف کی حمایت کی۔ سعد ملک نامی صارف نے جذباتی انداز اپناتے ہوئے لکھا کہ ’یہ دل کے بہت صاف ہیں سب پر بھروسہ بھی کرتے ہیں‘۔ حسان احمد نامی صارف نے کہا کہ ’مشرف نے دوسرے سیاست دانوں سے زیادہ بہتر ملک چلایا تھا‘۔

(ایمرا نیوزآن لائن) پاکستان شوبز انڈسٹری کے معروف اداکار احد رضا میر نے خوبرو اداکارہ سجل علی کے ساتھ ترکی میں شادی کرنے کی خبروں کی تردید کر دی۔

ڈرامہ سیریل ’یقین کے سفر‘ سے مقبول ہونے والی جوڑی سجل اور احد کی شادی سے متعلق خبریں سوشل میڈیا پر گردش کر رہی ہیں اور کہا جا رہا ہے کہ دونوں آئندہ برس یعنی 2020 میں شادی کے بندھن میں بندھ جائیں گے۔

سوشل میڈیا پر گردش ہونے والی ان خبروں مطابق دونوں ممکنہ طور پر ترکی میں شادی کریں گے جس میں قریبی رشتے دار اور چند دوست شامل ہوں گے۔

لیکن اداکار نے حال ہی میں ایک ویب شو ’سَمتھنگ ہاٹ‘ میں دیے جانے والے انٹرویو کے دوران ایک سوال کے جواب میں بتایا کہ “میری طرف سے کوئی بھی ایسا بیان نہیں آیا ہے جس میں، میں نے یہ کہا ہو کہ میں اور سجل علی تُرکی میں شادی کریں گے۔”

اُنہوں نے کہا کہ “لوگ سوشل میڈیا پر ہماری شادی کے متعلق جھوٹی خبریں پھیلا رہے ہیں۔” اُنہوں نے کہا کہ “شادی ضرور ہوگی لیکن ترکی میں ہوگی، یہ جھوٹ ہے۔”

احد نے بتایا کہ انہوں نے سوشل میڈیا پر یہ دیکھ کر حیران رہ گئے کہ وہ اور سجل اگلے سال ترکی میں شادی کر رہے ہیں۔ واضح رہے کہ سجل اور احد نے رواں برس 6 جون کو سوشل میڈیا پر اپنے مداحوں کو اپنی منگنی کی خوشخبری دی تھی۔

(ایمرا نیوزآن لائن) پاکستان میں مختلف سیاسی جماعتوں کے رہنماؤں کے اب بعد اب گلوکار عاصم اظہر پر بھی کانسرٹ کے دوران مداح نے جوتا اچھال دیا۔

معروف گلوکار عاصم اظہر کو کم عمر میں خوب شہرت حاصل کرنے والے گلوکاروں میں سے ایک سمجھا جاتا ہے۔ حال ہی میں ایک ٹور کے دوران عاصم اظہر کے ساتھ جوتا پھینکنے کا ناخوشگوار واقع پیش آیا مگر خوش قسمتی سے وہ انہیں نہیں لگا۔

سوشل میڈیا پر مداح کی جانب سے گلوکار کی کانسرٹ کی ایک ویڈیو تیزی سے وائرل ہورہی ہے جس میں عاصم اظہر اسٹیج پر پرفارم کرتے دکھائی دے رہے ہیں اور اچانک مداحوں کی طرف سے ان پر جوتا اچھالا جاتا ہے۔

عاصم اظہر پر اچھالا گیا جوتا خوش قسمتی سے انہیں نہیں لگا لیکن اس نا خوشگوار واقعے کی وجہ سے سوشل میڈیا پر ان کے مداح برس پڑے اور اس واقعے پر شدید غصے کا اظہار کیا گیا۔

واضح رہے کہ گلوکار عاصم اظہر کو پاکستان کے جسٹن بیبر کے نام سے بھی جانا جاتا ہے، ان کے مقبول ترین گانوں میں سے ایک کوک اسٹوڈیو کا ’تیرا وہ پیار ‘ گانا ہے جسے یو ٹیوب پر 13کروڑ سے زائد بار دیکھا جا چکا ہے۔

(ایمرا نیوزآ لائن) برطانوی راک میوزک بینڈ کولڈ پلے نے اپنے البم ’ایوری ڈے لائف‘ میں پاکستان کے نامور قوال امجد صابری کو خراج عقیدت پیش کیا ہے۔

اینٹرکام کے ساتھ انٹرویو کے دوران کولڈ پلے بینڈ کے مرکزی گلوکار کرس مارٹن نے اپنے نئے گانے کے بارے میں بات کرتے ہوئے بتایا کہ اس گانے میں امجد صابری کے معروف صوفیانہ کلام ’جگہ جی لگانے‘ کے کچھ بول شامل کیے گئے ہیں۔

انٹرویو میں گلوکار نے بتایا کہ اس گانے میں میرے ساتھ مزید دو اور گلوکار بھی ہیں، افسوس اس بات کا ہے کہ امجد صابری کو قتل کر دیا گیا تھا، البتہ اب تک یہ بات واضح نہیں ہوپائی کہ کولڈ پلے نے امجد صابری کے اس گانے کو اپنے گانے میں شامل کرنے کے لیے ان کے خاندان سے اجازت لی یا نہیں؟

یاد رہے کہ پاکستان کے معروف قوال امجد صابری کو 22 جون 2016 کو کراچی کے علاقے لیاقت آباد نمبر 10 میں موٹر سائیکل سوار ملزمان نے فائرنگ کرکے قتل کر دیا تھا۔ امجد صابری معروف قوال صابری گھرانے سے تعلق رکھتے تھے۔

بھارت(ایمرا نیوزآن لائن) کے دارالحکومت نئی دہلی میں کانگریس کی جانب سے نکالی گئی ریلی میں ایک سیاسی رہنما کی زبان ہی پھسل گئی اور انہوں نے فرط جذبات میں پریانکا گاندھی کو پریانکا چوپڑا بنا ڈالا۔

کانگریس پارٹی کے سابق ایم ایل اے سریندر کمار نے ریلی میں غلطی سے پریانکا چوپڑا کا نعرہ لگا دیا جو سوشل میڈیا پر خوب وائرل ہو گیا ہے۔ سریندر کمار نے ریلی میں کانگریس پارٹی کی لیڈر پریانکا گاندھی کے نعرے کے جگہ غلطی سے ’پریانکا چوپڑا زندہ باد‘ کا نعرہ لگایا تھا۔

سوشل میڈیا پر وائرل ہونے والی ویڈیو میں دیکھا جا سکتا ہے کہ کانگریس کے سابق ایم ایل اے سریندر کمار نے سب سے پہلے ’سونیا گاندھی زندہ باد‘ کا نعرہ لگایا، پھر انہوں نے ’کانگریس پارٹی زندہ باد‘ ’راہول گاندھی زندہ باد‘ اور آخر میں ’پریانکا چوپڑا زندہ باد‘ کا نعرہ لگایا۔

زبان پھسل جانے کے فوراً بعد ہی کانگریس رہنما نے معافی مانگتے ہوئے اپنی غلطی کو ٹھیک کیا اور ’پریانکا گاندھی زندہ باد‘ کا نعرہ لگایا۔ سوشل میڈیا پر صارفین نے اس ویڈیو کو خوب شیئر کیا اور چند ہی گھنٹوں میں اس وائرل ویڈیو پر دلچسپ تبصروں کا تانتا بندھ گیا۔ ٹوئٹر پر ایک صارف نے ویڈیو پر تبصرہ کرتے ہوئے خود بھی پریانکا چوپڑا زندہ باد کا نعرہ لگایا۔

(ایمرا نیوزآن لائن) پاکستان ڈرامہ انڈسٹری کے معروف اداکار نعمان اعجاز اور اداکارہ زارا ترین کی یوٹیوب پر جاری کی جانے والی ویب سیریز ’سات ملاقاتیں‘ بہت تیزی سے مقبول ہو رہی ہے۔

موجودہ دور میں ویب سیریز کا رجحان بڑھتا جا رہا ہے اور لوگ ویب سیریز دیکھنا پسند بھی کر رہے ہیں۔ ’سات ملاقاتیں‘ ناشپاتی پرائم کی جانب سے یوٹیوب پر نشر کی جانے والی ایک ویب سیریز ہے جس کی کہانی ایک ایسے جوڑے کے گِرد گھومتی ہے جو 15 سال ساتھ رہنے کے بعد طلاق لے لیتے ہیں۔

’سات ملاقاتیں‘ ویب سیریز میں مرکزی کردار زارا ترین اور اداکار نعمان اعجاز نے ادا کیا ہے۔ ویب سیریز کی اداکارہ زارا ترین نے ایک انٹرویو میں بتایا کہ اس ویب سیریز کی کہانی ایک ایسے جوڑے کے بارے میں ہے جو کہ شادی کے 15 سال بعد اپنی شادی کی سالگرہ کے موقع پر ہی الگ ہونے کا فیصلہ کرتے ہیں۔

اس ویب سیریز ’سات ملاقاتیں‘ کی کہانی جوڑے کے الگ ہونے کہ وجوہات اور ان کی زندگی کے مسائل کے گرد گھومتی ہے۔ زارا ترین نے بتایا کہ بنیادی طور پر یہ عداوت، عدم اعتماد، دھوکہ دہی اور جذبات کے مجروح ہونے کے احساس کے بارے میں ہے جنہیں ہم بہت بڑا سمجھتے ہیں حالانکہ ایسا نہیں ہوتا۔

’سات ملاقاتیں‘ ویب سیرز کو یوٹیوب پر ریلیز کیے جانے کے بعد بے حد مقبولیت حاصل ہو رہی ہے اور اسے مداحوں کی جانب سے پسند بھی کیا جا رہا ہے۔ ویب سیریز ’سات ملاقاتیں‘ قیصر علی نے پروڈیوس کی ہے جب کہ اس کا اسکرپٹ و ہدایت کاری کاشف نثار نے کی ہے۔