Tag m92news

شمالی وزیرستان:(نیٹ نیوز/ایمرا نیوز) وزیراعظم عمران خان، سربراہ پاک فوج جنرل قمر جاوید باجوہ کے ہمراہ میران شاہ پہنچے جہاں انہیں سیکیورٹی صورتحال پر بریفنگ دی گئی۔ترجمان پاک فوج میجر جنرل آصف غفور نے ٹوئٹر بیان میں کہا کہ وزیراعظم عمران خان اور آرمی چیف نے شمالی وزیرستان کا دورہ کیا، انہیں استحکام کے لیے جاری آپریشنز، سماجی و معاشی منصوبوں اور ٹی ڈی پیز کی بحالی پر بریفنگ دی گئی۔ترجمان پاک فوج کا کہنا تھا کہ وزیراعظم غلام خان ٹرمینل کا دورہ اور پاک افغان سرحد پر باڑ کا معائنہ بھی کریں گے، بعدازاں وزیراعظم میران شاہ میں جرگے سے خطاب بھی کریں گے۔

لاہور(نیٹ نیوز) مال روڈ، ہال روڈ، شاہ عالم مارکیٹ اور داتا دربار پر تجاوزات 24 گھنٹوں میں تجاوزات ختم کرنے کا حکم ۔ ڈی سی لاہور صالح سعید کی عدالتی حکم پر عمل درآمد کی یقین دہانی ۔ جسٹس علی اکبر قریشی نے درخواست پر سماعت کی، ڈی سی لاہور سے مخاطب ہوکر ان کا کہنا تھا کہ ڈی سے صاحبہ! عدالت کے حکم پر من وعن عمل ہونا چاہیے۔ بلاامتیاز تجاوزات ختم کر کے سڑکیں بحال کی جائیں۔ تمام وسائل کو بروکار لایا جائے اور کل صبح 10 بجے تک رپورٹ عدالت میں پیش کی جائے ۔

لاہور:(نیٹ نیوز/ایمرا نیوز) ہائیکورٹ نے مسلم لیگ (ن) کے رہنما خواجہ سعد رفیق اور ان کے بھائی سلمان رفیق کی پیراگون ہاؤسنگ اسکینڈل کیس میں درخواست ضمانت میں 5 دسمبر تک توسیع کرتے ہوئے چیئرمین نیب کو ہدایت کہ ہے کہ وہ تبدیلی تفتیش کی درخواست پر جلد از جلد قانون کے مطابق فیصلہ کریں۔لاہور ہائیکورٹ کے جسٹس طارق عباسی کی سربراہی میں 2 رکنی بنچ نے خواجہ برادران کی پیراگون ہاؤسنگ اسکینڈل میں ضمانت قبل از گرفتاری کی درخواست پر سماعت کی۔ درخواست گزاروں نے مؤقف اختیار کیا کہ کسی قسم کی کرپشن نہیں کی، نیب کی تفتیش میں مکمل تعاون کیا، درخواست ضمانت قبل از گرفتاری منظور کی جائے۔عدالت نے نیب کے وکیل سے استفسار کیا ‘کیا گرفتاری سے متعلق دستاویزات خواجہ برادران کو دے دی ہیں جس پر وکیل نے جواب دیا جب گرفتار کیا جائے گا، تب دستاویزات دی جائیں گی۔عدالت نے اظہار برہمی کرتے ہوئے کہا کیا وہ دستاویزات عدالت کو بھی نہیں دکھائی جا سکتیں جس پر وکیل کا کہنا تھا کہ گرفتاری کے جواز سے متعلق دستاویزات نیب آفس میں ہیں۔عدالت نے سوال پوچھا کہ کیا خواجہ سعد رفیق اور سلمان رفیق عدالت میں موجود ہیں جس پر عدالت کو بتایا گیا کہ وہ موجود ہیں، درخواست گزاروں نے کہا کہ خدشہ ہےکہ نیب کی جانب سےگرفتار کر لیا جائے گا۔عدالت نے فریقین وکلا کے دلائل سننے کے بعد خواجہ برادران کی درخواست ضمانت میں 5 دسمبر تک توسیع کردی جب کہ عدالت نے چیئرمین نیب کو بھی ہدایت کی کہ خواجہ برادران کی تبدیلی تفتیش کی درخواست پر جلد از جلد قانون کے مطابق فیصلہ کریں۔نیب پراسیکیوٹر کا مؤقف ہے کہ خواجہ سعد رفیق کے خلاف تین انکوائریز زیر التوا ہیں جن میں پیرا گون، آشیانہ اقبال اور پاکستان ریلوے میں کرپشن سے متعلق انکوائریز شامل ہیں۔ نیب کی جانب سے خواجہ سعد رفیق کے وارنٹ گرفتاری جاری کیے جا چکے ہیں اور اس حوالے سے نیب پراسیکیوٹر نے عدالت کو بھی آگاہ کر رکھا ہے۔

ممبئی(شوبز ڈیسک/ایمرا نیوز) بالی وڈ کے ایکشن اسٹار ہریتھک روشن اور فیشن ڈیزائنر سوزین خان نے 2014 میں اپنی 14 سالہ ازدواجی زندگی کے خاتمے کا اعلان کرتے ہوئے اپنی راہیں الگ کرلی تھیں، تاہم دونوں اپنے بچوں کے لیے اکثر ایک دوسرے کے ساتھ کھڑے نظر آتے ہیں۔گذشتہ روز ہریتھک روشن نے انسٹاگرام پر فیملی ٹرپ کی کچھ تصاویر شیئر کیں، جن میں سوزین خان کو ہریتھک اور بچوں کی تصاویر لیتے ہوئے دیکھا جاسکتا ہے۔ساتھ ہی اداکار نے اپنی سابق اہلیہ کا تذکرہ کرتے ہوئے ایک خوبصورت پیغام میں لکھا، ‘یہ سوزین ہے، میری قریبی دوست (اور سابق اہلیہ) جو میرے اور میرے بیٹوں کے بہترین لمحات کو کیمرے کی آنکھ میں قید کر رہی ہے۔

View this post on Instagram

Here is Sussanne , my closest friend ( also my ex wife) capturing a moment with me and our boys. . A moment in itself. . It tells a story to our kids. That in a world separated by lines and ideas , it is still possible to be united. And that you can want different things as people and yet stay undivided. . Here’s to a more united, tolerant, brave, open and loving world. It all starts at home. . #beOpen #bebrave #artoflove #tolerance #courage #abundance #loveisgreaterthanfear #explorersforever #childrenarethefuture #harmony

A post shared by Hrithik Roshan (@hrithikroshan) on Nov 25, 2018 at 3:22am PST

یہ ایک مکمل لمحہ ہے۔ یہ ہمارے بچوں کو ہماری کہانی بیان کر رہا ہے کہ لکیروں اور تصورات کے حوالے سے تقسیم شدہ اس دنیا میں بھی دوبارہ سے متحد ہونا ممکن ہے اور یہ بھی کہ آپ مختلف چیزوں اور لوگوں کو چاہ سکتے ہیں اور پھر بھی غیر منقسم رہ سکتے ہیں۔’واضح رہے کہ ہریتھک روشن نے سوزین خان سے 2000 میں پسند کی شادی کی تھی لیکن شادی کے 14 سال بعد دونوں نے اختلافات کے باعث عدالت سے باقاعدہ طلاق لے لی تھی۔ریتھک اور سوزین نے اپنے دونوں بیٹوں کی پرورش کے لیے کوئی کسر نہ چھوڑنے کا اعلان کیا تھا اور دونوں کو کئی خاندانی تقریبات میں بھی ایک ساتھ دیکھا گیا، جس کے بعد رپورٹس سامنے آئی تھیں کہ شاید دونوں دوبارہ شادی کرنے جارہے ہیں۔تاہم ہریتھک روشن کے خاندانی ذرائع نے ان خبروں کی تردید کرتے ہوئے کہا تھا کہ بچوں کی پرورش کی وجہ سے وہ دونوں ایک دوسرے سے ملتے رہتے ہیں۔واضح رہے کہ ہریتھک روشن اِن دنوں اپنی نئی فلم ‘سپر 30’ میں مصروف ہیں جو بہار سے تعلق رکھنے والے ایک ریاضی دان کی سوانح حیات پر مشتمل ہے۔

دبئی:(سپورٹس ڈیسک/ایمرا نیوز) پاکستان اور نیوزی لینڈ کے درمیان دبئی ٹیسٹ کے تیسرے روز یاسر شاہ کی تباہ کن بولنگ کے سامنے کیویز بیٹںگ لائن ریت کی دیوار ثابت ہوئی اور پوری ٹیم 90 رنز پر پویلین لوٹ گئی۔دبئی ٹیسٹ کے تیسرے روز یاسر شاہ نے عمدہ بولنگ کرتے ہوئے کسی کیوی بلے باز کو کریز پر زیادہ دیر کھڑے ہونے نہ دیا، اور 8 کھلاڑیوں کو پویلین کی راہ دکھائی۔کین ولیمسن کی قیادت میں کیویز ٹیم اپنی پہلی اننگز میں صرف 90 رنز بناسکی جس کے بعد قومی ٹیم کو مہمان ٹیم پر 328 رنز کی برتری حاصل ہوگئی۔اس سے قبل دبئی انٹرنیشنل اسٹیڈیم میں دونوں ٹیمیں ایک گھنٹہ تاخیر سے میدان میں اتریں تو کیویز نے 24 کے مجموعی اسکور سے اننگز کا آغاز کیا، جیت راول 17 اور ٹام لیتھم 5 رنز کے ساتھ کریز پر موجود تھے۔دونوں بلے بازوں نے محتاط انداز اپناتے ہوئے اسکور کو آگے بڑھایا لیکن یاسر شاہ کی عمدہ بولنگ کے سامنے کوئی بیٹسمین زیادہ دیر تک کریز پر نہ رک پایا۔ گزشتہ روز پاکستان نے کھیل کے دوسرے روز اپنی پہلی اننگز 418 رنز 5 کھلاڑی آؤٹ پر ڈکلئیر کردی تھی جس کے بعد کیویز اوپننگ بلے باز جیت راول اور ٹام لیتھم نے محتاط انداز سے کھیلتے ہوئے 24 رنز بنائے۔اس سے قبل پاکستان نے 418 رنز 5 وکٹ پر اپنی پہلی اننگز ڈکلیئر کی تو بابراعظم 127 اور کپتان سرفراز احمد 30 رنز کے ساتھ وکٹ پر موجود تھے، قومی ٹیم کی جانب سے حارث سہیل نے 147 رنز کی اننگز کھیلی۔

ممبئی:(شوبز ڈیسک/ایمرا نیوز) بالی ووڈ اداکارہ دپیکا پڈوکون اور رنویرسنگھ شادی کے بندھن میں بندھنے کے بعد مسلسل میڈیا کی خبروں کی زینت بنے ہوئے ہیں اور اب ایک بار پھر دپیکا کی ڈیزائنرسبیا ساچی کے لہنگے میں تصویریں سوشل میڈیا پروائرل ہوگئی ہیں۔

اپنی شادی میں منفرد نظرآنے والی اداکارہ دپیکا پڈوکون اپنی نند ریتیکا بھوانی کی جانب سے دی گئی شادی کی شاندارپارٹی میں معروف ڈیزائنر’سبیا ساچی‘ کے لہنگے میں نظرآئیں، اداکارہ کی سرخ اورگلابی رنگ کے لہنگے میں لی گئی تصاویرسوشل میڈیا پر تیزی سے وائرل ہورہی ہیں۔دوسری جانب رنویرسنگھ بھی ہمیشہ کی طرح پارٹی میں منفرد انداز میں نظر آئے جہاں انہوں نے لال اورکالے رنگ سمیت مختلف رنگ کا جوڑا زیب تن کیا تھا۔واضح رہے کہ دپیکا پڈوکون اوررنویرسنگھ 14 نومبرکی شام اٹلی کے خوبصورت مقام لیک کومو میں رشتہ ازدواج میں منسلک ہوئے تھے۔

لندن:(نیٹ نیوز/ایمرا نیوز) ماہرِ نفسیات کے مطابق پریشان اور فکرمندی کی سوچ کو تین آسان طریقوں سے دور کیا جا سکتا ہے۔پروفیسر ہانس نورڈال کے مطابق منفی سوچ کو وقت کا زیاں جان کر، حال پر توجہ دیتے ہوئے اور سوچ کو منتشر ہونے سے بچا کر آپ پریشان کن خیالات کو ذہن سے جھٹک سکتے ہیں اور یوں ایک پرسکون زندگی گزار سکتے ہیں۔ناروے کی جامعہ برائے سائنس و ٹیکنالوجی میں رویہ جاتی ادویہ (بیہوریئل میڈیسن) کی ماہر پروفیسر ہانس کہتی ہیں کہ ہم اداسی، پریشان خیالی اور فکرمندی کو مسائل کے حل کی ایک راہ سمجھتے ہوئے بار بار ذہن میں لاتے ہیں لیکن اصل میں ہم خود پر تنقید کر کے منفی خیالات سے خود کو ہلکان کر رہے ہوتے ہیں۔ان کا کہنا ہے کہ یہ اسی طرح ہے کہ کسی کے ہاتھ میں تھوڑی دیر تک گلاس ہو تو ٹھیک لیکن مسلسل دو گھنٹے تک گلاس تھامنا ہو تو یہ بہت بھاری اور تکلیف دہ ہو جاتا ہے اور اداسی اور پریشان کن خیالات بھی ایسے ہی ہوتے ہیں جو طویل وقت کے لیے مسلسل ذہن میں ڈیرہ جما کر بھاری بھر کم ہو جاتے ہیں۔اس فکرمندی اور اداس خیالات سے جان خلاصی کے تین طریقے یہ ہیں:

اسے وقت کا زیاں سمجھئے
اداس کرنے والےاور پریشان کن خیالات کو سب سے پہلے وقت اور توانائی ضائع کرنا والا سمجھئے۔ پریشان کن خیالات سے جان چھڑانا اتنا مشکل نہیں جتنا نظر آتا ہے لیکن اس سے قبل بعض باتوں کو سمجھنا ضروری ہو گا۔سب سے پہلے تو یہ سمجھئے کہ پریشانی اور اداس خیالی ایک طرح سے وقت اور توانائی ضائع کرنے والی وبا ہے۔ اس سے کوئی فائدہ نہیں ہوتا اور نہ ہی فکر سے مسائل حل ہوتے ہیں۔ لوگوں کی اکثریت ان منفی خیالات کو مسائل کے حل کی جانب ایک کوشش سمجھتی ہے لیکن وہ غلطی پر ہیں۔ بار بار منفی اور پریشان کن باتیں سوچنے سے آپ کا پورا مزاج منفی ہو جاتا ہے۔اب جب بھی ایسے خیالات ذہن میں آئیں تو خود سے ایک سوال کیجئے کہ آخر اس سب کا فائدہ کیا ہے؟
ابھی اور اس جگہ پر توجہ رکھیں

پریشانی اور فکر کو چھوڑ کر اسی لمحے اور اسی جگہ پر توجہ دیجئے۔پروفیسر ہانس کے مطابق مایوس کن فکروں کو نظر انداز کرتے ہوئے ان واقعات پر غور کیجئے جو آپ کے اردگرد نمودار ہو رہے ہیں۔جیسے ہی آپ حال میں جینے لگتے ہیں اور موجودہ واقعات کے لحاظ سے زندگی گزارتے ہیں آپ کی فکر مندی ازخود غائب ہو جاتی ہے۔ تاہم منفی خیالات بار بار حملہ کر سکتے ہیں لیکن انہیں وہیں چھوڑ دیں اور ہر لمحہ جینے کی کوشش کیجئے۔
خیالات کے انتشار سے بچیے
ان چیزوں سے بچیں جو آپ کے ذہن کو سکون میں نہیں آنے دیتیں اور اسے بھٹکاتی رہتی ہیں۔ پروفیسر ہانس کے مطابق کئی لوگ فکر سے بچنے کے لیے ٹی وی، گیمز اور منشیات کا سہارا لیتے ہیں۔ نفسیات کی زبان میں یہ بھٹکانے والی عارضی چیزیں ہیں اور ان کے سہارے دماغ کو طویل عرصے تک پرسکون نہیں رکھا جا سکتا۔ یہ بالکل اسی طرح ہے جیسے کہ ہم اپنی حاجت اور خوشیوں کے لیے دوسرے لوگوں پر بھروسہ رکھیں۔
اس کے بجائے آپ مسلسل مشق کر کے منفی سوچوں کو کمزور سے کمزور کرتے جائیں اور حال میں مصروف رہ کر پریشان خیالی سے چھٹکارے کی کوشش کیجئے۔

واشنگٹن:(نیٹ نیوز/ایمرا نیوز) امریکی وزیرخارجہ مائیک پومپیو کا کہنا ہے کہ پاکستان ممبئی حملوں کے ذمہ داروں کے خلاف سلامتی کونسل کی پابندیوں پر عمل کرے۔ممبئی حملوں کے 10 سال مکمل ہونے پر امریکی وزیر خارجہ مائیک پومپیو کی جانب سے جاری بیان میں کہا گیا ہے کہ اس موقع پر امریکی وزیرخارجہ مائیک پومپیو نے کہا حملوں میں ملوث عناصر کو اب تک سزا نہیں ملی، ملزمان کو سزا نہ ملنا ہلاک ہونے والوں کے ورثا کی توہین ہے لہذا تمام ممالک بالخصوص پاکستان ان حملوں میں ملوث دہشت گردوں کے خلاف سلامتی کونسل کی پابندیوں پر عمل کرے۔دوسری جانب امریکا نے ممبئی حملوں میں ملوث عناصر کی نشان دہی کرنے یا ان کے بارے میں کسی بھی قسم کی معلومات فراہم کرنے پر 50 لاکھ ڈالرز کے نئے انعام کا اعلان بھی کیا ہے۔

وینس:(نیٹ نیوز/ایمرا نیوز) اطالوی فن کار ویلرینو فیٹیکا کا دعویٰ ہے کہ وہ کھانے کے مختلف اشیا کو فن پاروں میں ڈھالنے والے دنیا کے واحد تخلیق کار ہیں۔ اگرچہ ویلرینو کا یہ دعویٰ درست تو نہیں لیکن ان جیسے فن پارے دنیا میں شاید ہی کوئی اور بناسکتا ہو۔پنیر کے بڑے ٹکڑوں سے لے کر آلو اور تربوز سے بھی ویلرینو ایسے شاہکار بناتے ہیں جنہیں دیکھ کر عقل دنگ رہ جاتی ہے۔

ویلرینو فیٹیکا کہتے ہیں کہ انہیں لڑکپن سے ہی غذائی اشیا سے مختلف اشیا بنانے کا شوق تھا اور دھیرے دھیرے وہ اس میں ماہر ہوتے چلے گئے لیکن پنیر یا آلو پر چہرے بنانے کے لیے وہ خاص اوزار استعمال کرتے ہیں۔حیرت انگیز بات یہ بھی ہے کہ ویلرینو ایک طرح کی غذائی فنگس ٹرفل پر بھی کچھ نہ کچھ بنالیتے ہیں۔ لڑکپن میں وہ اپنے خاندانی ریستوران میں اہلِ خانہ کی مدد کرتے تھے اور ان کے پاس رنگ اور کاغذ کی بجائے کھانے پینے کی اشیا ہوتی تھیں۔ بس اسی پر انہوں نے اپنی فنکاری ثابت کرنا شروع کردی۔ اب تک وہ دنیا میں تربوز سے تیارکردہ سب سے بڑا شاہکار تخلیق کرنے کا اعزاز حاصل کرچکے ہیں اور ٹرفل پر بھی اشکال بناچکے ہیں۔

اینٹیگا ( سپورٹس ڈیسک/ایمرا نیوز) آسٹریلیا نے خواتین ٹی 20 عالمی چیمپئن کا تاج چوتھی بار حاصل کرلیا۔کینگروز بولرز نے انگلش ٹیم کے ارمان پورے نہیں ہونے دیے۔اینٹیگا کے سرویوین رچرڈز کرکٹ اسٹیڈیم میں انگلش کپتان نے ٹاس جیت کر بیٹنگ کا فیصلہ کیا لیکن آسٹریلوی بولرز کے سامنے کسی کی نہ چلی، کوئی بھی لمبی شراکت نہ بن سکی۔

انگلینڈ کی طرف سےڈینئلی ویٹ 43 اور کپتان ہیتھر نائٹ25 کے سوا کوئی بھی کھلاڑی ڈبل فیگر میں اسکور نہ کرسکی ۔ پوری ٹیم 105 رنز بناسکی۔انگلینڈ کی ٹیم اپنے قلیل ہدف کا دفاع کرنے میں مایوسی کا شکار نظر آئی اور آسٹریلیا نے 16ویں اوور میں 2 وکٹوں کے نقصان پر ہدف حاصل کرلیا۔ایشلے گارڈنر نے تین، جارجیاویر ہوم اور میگن شوٹ نے دو، دو جبکہ الیزی پیری نے ایک وکٹ حاصل کی۔ جواب میں آسٹریلیا نے ہدف دو وکٹ پر پورا کرلیا۔ الیزا ہیلی 22، بیتھ مونی 14، ایشلے گارڈنر 33 اور میگ لیننگ نے 28رنز بنائے۔ گارڈنر کو الیزا ہیلی کو ٹورنامنٹ کی بہترین کھلاڑی قرار دیا گیا۔واضح رہے کہ یہ آسٹریلوی خواتین کا مسلسل 5 واں ٹی ٹوئنٹی فائنل ہے جس میں سے وہ 4 میں کامیاب ہوئیں اور ایک میں ناکامی کا سامنا کرنا پڑا۔آسٹریلیا اور انگلینڈ کے درمیان ویمن ٹی ٹوئنٹی ورلڈ کپ میں تیسرا فائنل تھا اور تینوں ہی میچوں میں آسٹریلین ٹیم کامیاب رہی۔