Tag media 92tv

(ایمرا نیوز آن لائن) آسٹریلیا کے سابق اسپنر شین وارن کی ٹیسٹ کیپ 10 لاکھ 7 ہزار 5 سو ڈالرز میں نیلام ہو گئی۔
آسٹریلیا کی جانب سے 145 ٹیسٹ میچوں میں 708 وکٹیں حاصل کرنے والے شین وارن کی ٹیسٹ کیپ کو بش فائر فنڈ کے لیے نیلام کیا گیا۔ شین وارن کی ٹیسٹ کیپ 10 لاکھ 7 ہزار 5 سو ڈالرز میں نیلام ہوئی، نیلامی سے حاصل ہونے والی رقم براہ راست بش فائر فنڈ میں دی جائے گی۔ سابق آسٹریلوی کرکٹر کا کہنا ہے یہ نیلامی میری توقعات سے کہیں بڑھ کر ہے۔ خیال رہے کہ آسٹریلیا کے جنگلات میں بڑے پیمانے پر لگی آتشزدگی کے باعث اب تک 27 افراد اور ایک ارب کے قریب چرند پرند ہلاک ہو چکے ہیں۔ اس کے علاوہ جنگلات میں آتشزدگی کے نتیجے میں 2000 گھر مکمل طور پر تباہ ہو چکے ہیں جب کہ ہزاروں افراد محفوظ مقامات پر نقل مکانی کر چکے ہیں۔

اسلام آباد(ایمرا نیوز آن لائن) : فیڈرل بورڈ آف ریونیو(ایف بی آر) کے سابق ممبر شاہد حْسین اسد کے جعلی دستخطوں سے چیئرمین فیڈرل بورڈ آف ریونیو شبرزیدی اور ممبر ان لینڈ ریونیو آپریشن سیما شکیل کے خلاف پراپرٹی بلڈرز و ڈویلپرز کی ملی بھگت سے ریئل اسٹیٹ سیکٹر میں 500 ارب روپے سے زائد مالیت کے ٹیکس فراڈ کیس کی تحقیقات کیلیے قومی احتساب بیورو (نیب)کو درخواست دیے جانے کا انکشاف ہوا ہے۔
ایف بی آر اور تحقیقاتی اداروں نے سابق ممبر ایف بی آر شاہد حسین اسد کے جعلی دستخطوں سے لیٹر لکھنے والے کا سراغ لگانے کیلیے تحقیقات شروع کردی ہیں جبکہ چیئرمین ایف بی آر نے قانونی رائے اور جواب دینے کیلیے معاملہ ممبر لیگل کو بھجوادیا ہے۔ اس بارے میں چیئرمین ایف بی آر شبر زیدی سے رابطہ کیا گیا تو انہوں نے کہا کہ یہ لیٹر جعلی ہے اورشاہد حسین اسد سے ان کی اس حوالے سے بات ہوئی ہے، انہوں نے اس لیٹر سے لاتعلقی ظاہر کی ہے۔ اس بارے میں جب ایف بی آر کے سابق ممبر شاہد حسین اسد سے رابطہ کیا گیا تو انہوں نے بھی اس بات کی تصدیق کی کہ یہ لیٹر انکے جعلی دستخطوں سے چیئرمین نیب کو لکھا گیا ہے۔
شاہد حسین اسد نے کہا کہ انکی چیئرمین ایف بی آر شبر زیدی سے ٹیلی فون پر بات ہوئی ہے اور چیئرمین ایف بی آر کو بتایا کہ اس لیٹر پر ان کے دستخط جعلی ہیں لہٰذا انکا اس خط سے کوئی تعلق نہیں ہے۔ ایف بی آر کے ذرائع کا کہنا ہے کہ چندروز قبل ایک اہم ادارے کا اہلکار چیئرمین ایف بی آر سے ملاقات کیلیے آیا اور انہوں نے لفافہ کھول کر یہ لیٹر چیئرمین ایف بی آر کو دیا جس پر چیئرمین ایف بی آر نے معاملے کی انکوائری کا کہا اور لیٹر قانونی رائے کیلیے ایف بی آر کے ممبر لیگل کو بھجوادہا ہے۔
سابق ممبر ایف بی آر شاہد حسین اسد کے جعلی دستخطوں سے چیئرمین ایف بی آر اور ممبر ان لینڈ ریونیو آپریشن کے خلاف تحقیقات کیلیے قومی احتساب بیورو کے چیئرمین کو دی جانے والی درخواست کی کاپی میں چیئرمین ایف بی آر پر سنگین نوعیت کے الزامات عائد کیے گئے ہیں، درخواست کی کاپی وزیراعظم عمران خان،صدر پاکستان عارف علوی اور چیف جسٹس آف پاکستان کو بھجوائی گئی ہے۔
سابق ممبر ایف بی آر شاہد حْسین اسد کے جعلی دستخطوں سے بھجوائی جانیوالی درخواست میں الزام عائد کیا ہے کہ آئی ایم ایف کی جانب سے ایف بی آر کو پراپرٹی ڈویلپرز و بلڈرز کو فکسڈ ٹیکس اسکیم کے ذریعے ریلیف دینے کی مخالفت کے بعد ایف بی آر کے موجودہ چیئرمین ایف بی آر شبر زیدی اور ممبر ان لینڈ ریونیو آپریشن سیما شکیل بڑے پراپرٹی ڈویلپرز کو اربوں روپے کا ریلیف دینے کیلیے ذاتی طور پر فیور دینے کی کوشش کررہے ہیں جس سے قومی خزانے کو بھاری نقصان پہنچنے کی توقع ہے۔
شاہد حسین اسد کی جانب سے لکھے گئے لیٹر میں مزید کہا گیا ہے کہ مذکورہ آرڈر کے بعد لاہور،ملتان ،ساہیوال اور بہاولپور کے پراپرٹی ڈویلپرز و بلڈرز کے کیسوں کو صرف لاہور آفس دیکھے گا۔اسی طرح اسلام آباد، راولپنڈی، سیالکوٹ، فیصل آباد،پشاور،گوجرانوالہ اور سرگودھا کے پراپرٹی ڈویلپرز و بلڈرز کے کیس اب صرف آر ٹی او اسلام آباد دیکھے گا۔ لیٹر میں مزید بتایا گیا ہے کہ ملک بھر میں پراپرٹی بلڈرز اور ڈویلپرز کے بارہ ہزار کے لگ بھگ کیس ہیں اور یہ واضح نہیں ہے کہ ایک آفیسر کیسے تین ہزار سے چار ہزار بلڈرز و ڈویلپرز کے ٹیکس ایشوز کو ڈیل کرسکے گا جبکہ بلڈرز و ڈولپرز کے کیسوں میں انکم ٹیکس،سیلز ٹیکس اور ود لوڈنگ انکم ٹیکس سے متعلقہ ایشوز شامل ہیں۔ یہ کیسے ممکن ہے کہ ایک آفیسر تین سے چار ہزار کیسوں میں آڈٹ ،انفورسمنٹ واجبات اور ٹیکس کلکشن سے متعلقہ معاملات کی ایک ساتھ دیکھ بھال کرے۔ مذکورہ جعلی لیٹر میں الزام عائد کیا گیا ہے کہ ایف بی آر کی طرف سے پراپرٹی کے تمام کیسوں کی جوریزڈکشن اسلام آباد، لاہور اور کراچی کے تین اسپیشل سرکلز میں منتقل کرنے کا ایک ہی مقصد نظر آتا ہے کہ کسی طرح پراپرٹی ڈویلپرز پر کم سے کم ٹیکس کیسے کیا جاسکتا ہے۔

(ایمرا نیوزآن لائن) افریقی ملک کانگو میں اقوام متحدہ کے دنیا کے سب سے بڑے امن مشن میں موجود اہلکاروں کے خلاف سینکڑوں افراد سڑکوں پر باہر نکل آئے، سکیورٹی فورسز کی فائرنگ سے چھ شہری ہلاک ہو گئے جبکہ متعدد زخمی ہو گئے ۔غیر ملکی خبر رساں ادارے کے مطابق افریقی ملک کانگو میں سینکڑوں افراد نے اقوام متحدہ کے مشن کے خلاف مظاہرہ کیا،مظاہرین نے امن مشن سے نکل جانے کی صدائیں بلند کرتے ہوئے کہا کہ اقوام متحدہ شہریوں کو باغیوں کے حملے سے محفوظ رکھنے میں ناکام رہی ہے۔مظاہرین کی طرف سے اقوام متحدہ کے خلاف احتجاج کے دوران سکیورٹی فورسز نے شہریوں کو مشتعل کرنے کے لیے فائرنگ کی جسکے نتیجے میں چھ شہری ہلاک ہو گئے۔سکیورٹی اہلکاروں کی طرف سے کانگو ایئر پورٹ کے نواحی علاقے بنی ایریا میں خار دار تاریں لگا کر راستہ بند کردیاجہاں پر سینکڑوں کی تعداد میں شہری اقوام متحدہ کے امن مشن کے خلاف نعرے لگائے۔

کراچی: کاروباری ہفتے کے پہلے روز یعنی پیر کے دن پاکستان اسٹاک ایکسچینج میں تیزی دیکھی جارہی ہے، دن کے آغاز پر ہی 100 انڈیکس 450 پوائنٹس اضافے کے بعد 39 ہزار 740 پوائنٹس پر پہنچ گیا۔ تفصیلات کے مطابق گزشتہ ہفتے پاکستان اسٹاک ایکسچینج میں زبردست تیزی کے بعد نئے ہفتے کے پہلے روز یعنی پیر کے دن بھی مارکیٹ میں تیزی کا رجحان دیکھا جارہا ہے، دن کے آغاز پر 100 انڈیکس میں 200 سے زائد پوائنٹس کا اضافہ دیکھا گیا۔ ایک گھنٹے بعد 100 انڈیکس میں مزید 250 یعنی کل 450 سے زائد پوائنٹس کا اضافہ ہوا جس کے بعد انڈیکس 39 ہزار 740 پوائنٹس کی سطح عبور کر گیا۔

100 انڈیکس میں 39 ہزار کی سطح گزشتہ ہفتے عبور ہوگئی تھی اور یہ 8 ماہ بعد ہوا تھا۔ گزشتہ ہفتے میں 100 انڈیکس میں 13 سو 61 پوائنٹس کا اضافہ ہوا تھا۔ جمعے کے روز 500 سے زائد پوائنٹس کے اضافے کے بعد 100 انڈیکس 39 ہزار 287 پوائنٹس پر بند ہوا تھا۔ گزشتہ ہفتے سرمایہ کاروں کا اعتماد بھی بحال ہوا، مارکیٹ میں 1.73 ارب شیئرز کے سودے ہوئے۔ مارکیٹ کے ہفتہ وار کاروبار کی مالیت 61 ارب روپے رہی۔ کاروبار میں تیزی کے بعد مارکیٹ کیپٹلائزیشن 264 ارب روپے اضافے سے 7511 ارب روپے رہی۔

(ایمرا نیوز آن لائن) گجرات سیلفی بنانے کا جنون 18سالہ طالبعلم ٹرین تلے آکر زندگی گنوا بیٹھا۔ سائیں راجہ پھاٹک کے قریب ٹک ٹاک ویڈیو کیلئے طالبعلم جبار حسین ریلوے لائن پر راولپنڈی سے لاہور جانیوالی تیز گام کی ریکارڈنگ کر رہا تھا کہ ٹرین کی زد میں آکر دم توڑ گیا واضح رہے کہ دو ماہ کے دوران سیلفی بنانے کے جنون میں گجرات کا تیسرا نوجوان ہلاک ہوا ہے۔

(ایمرا نیوز آن لائن) سعودی عرب نے امریکا کی طرف سے ایران کے فردو جوہری پلانٹ پرپابندیوں کی دی گئی چھوٹ 15 دسمبر سے ختم کرنے کے اعلان کا خیرمقدم کیا ہے۔عرب ٹی وی کے مطابق سعودی وزارت خارجہ کے ایک سرکاری ذریعے نے بتایا کہ 15 دسمبر 2019 سے ایران کی فردو جوہری تنصیبات پرپابندیاں عاید کرنے کے امریکی فیصلے پر سعودی عرب نے اطمینان کا اظہار کیا ہے،ذریعے کا کہنا تھا کہ م±ملکت امریکا کے اس اقدام کی حمایت کرتی ہے کیونکہ ایران اپنے جوہری پروگرام متعلق بین الاقوامی عاہدوں کی خلاف ورزیوں کا مرتکب ہو رہا ہے۔سعودی حکومت نے عالمی برادری پر زور دیا کہ وہ ایران کی جانب سے خطے کو بدامنی سے دوچار کرنے کی پالیسیوں پر سخت موقف اختیار کرے۔

(ایمرا نیوز آن لائن) لندن میں برٹش سکھ کمیونٹی کی طرف سے وزیر اعظم عمران خان کو کرتارپور راہداری کھولنے پر ایوارڈ سے نوازا گیا،
وزیر اعظم کی جانب سے ان کے مشیر صاحبزادہ جہانگیر نے ایوارڈ وصول کیا۔تقریب سے خطاب کرتے ہوئے صاحبزادہ جہانگیر نے کہا کہ کرتارپور راہداری سے سکھوں اور مسلمانوں میں مزید ہم آہنگی اور پیار بڑھے گا۔ اس موقع پر میئر لندن صادق خان کا کہنا تھا کہ برطانیہ میں سماجی خدمات پر سکھ کمیونٹی کے شکر گزار ہیں۔واضح رہے وزیر اعظم عمران خان نے رواں ماہ 9 نومبر کرتار پور راہداری کا باقاعدہ افتتاح کیا تھا۔

اسلام آباد(ایمرا نیوز آن لائن ): وزیراعظم عمران خان نے ملکی معیشت کی سمت کو درست قرار دے دیا۔

ٹوئٹر پر جاری بیان میں وزیراعظم عمران خان نے کہا کہ پاکستان کی معیشت بلآخر درست سمت میں جارہی ہے، ہماری معاشی اصلاحات کا پھل ملنا شروع ہو گیا ہے۔ وزیراعظم نے مزید کہا کہ پاکستان کا کرنٹ اکاؤنٹ اکتوبر 2019 میں 4 سال میں پہلی بار سرپلس میں تبدیل ہوگیا، جاری کھاتے 9 کروڑ 90 لاکھ ڈالر سر پلس رہے جب کہ گزشتہ سال اکتوبر میں جاری کھاتوں میں ایک ارب 28 کروڑ ڈالر خسارہ تھا۔

(ایمرا نیوز آن لائن) سابق وزیراعظم نوازشریف علاج کے لیے لاہور سے لندن روانہ ہوگئے۔
میاں نوازشریف لاہور ائیرپورٹ جانے کے لیے سخت سیکیورٹی میں جاتی امرا سے روانہ ہوئے، اس موقع پر ان کی رہائش گاہ کے باہر موجود کارکنان نے نعرے بازی کی اور ان کی گاڑی پر پھول نچھاور کیے۔ ائیرپورٹ پہنچنے پر نوازشریف کی روانگی کے لیے امیگریشن کی کارروائی مکمل کی گئی جس کے بعد ان کا ائیرایمبولینس میں چیک اپ کیا گیا جس کے بعد ائیرایمبولینس نے تقریباً ساڑھے 10 بجے لاہور کے علامہ اقبال ائیرپورٹ سے اڑان بھری۔ نوازشریف کے ہمراہ ان کے بھائی شہباز شریف اور ذاتی معالج ڈاکٹر عدنان سمیت 7 افراد لندن روانہ ہوئے ہیں۔سابق وزیراعظم کو لے کر ائیر ایمبولینس پہلے قطر کے شہر دوحہ پہنچے گی جہاں کچھ دیر قیام کے بعد لندن کے لیے روانگی ہوگی۔ ذرائع کا کہناہےکہ لندن میں نوازشریف کے صاحبزادے حسن نواز کی رہائش گاہ پر سابق وزیراعظم کے لیے ایک کمرہ بک کرلیا گیا جہاں نوازشریف ابتدائی طور پر قیام کریں گے۔

مریم نواز والد کو رخصت کرنے ائیرپورٹ نہیں گئیں
مسلم لیگ (ن) کی نائب صدر مریم نواز اپنے والد نوازشریف کو رخصت کرنے ائیرپورٹ نہیں گئیں، انہوں نے اپنی دادی کے ہمراہ نوازشریف کو گھر سے رخصت کیا۔
سابق وزیراعظم کو لینے کے لیے آنے والی قطر ائیرویز کی جدید ترین سہولیات سے آراستہ ائیر ایمبولینس صبح پونے 9 بجے کے قریب لاہور کے علامہ اقبال ائیرپورٹ پہنچی تھی، ائیر ایمبولینس براہ راست لندن تک پرواز کرسکتی ہے جب کہ اس میں ڈاکٹرز اور پیرا میڈیکل اسٹاف بھی موجود ہے، کسی بھی ایمرجنسی کی صورت میں ائیر ایمبولینس میں آپریشن بھی کیا جاسکتا ہے۔

یہ بھی پڑھیں
’نواز شریف کو بھیجنے کی مخالفت تھی لیکن میں نے رحم کیا اور کہا کہ جانے دو‘
وزارت داخلہ نے نواز شریف کو بیرون ملک جانے کی اجازت دے دی
نوازشریف کا نام ای سی ایل میں شامل رہے گا: ذرائع
نواز شریف سے متعلق عدالتی فیصلے کا جائزہ لیا جائے، وزیراعظم کی قانونی ٹیم کو ہدایت
ائیر ایمبولینس شریف فیملی کی جانب سے کرائے پرحاصل کی گئی ہے، ائیر ایمبولینس قطر کی ہے جو ائیر بس طیارے میں بنایا گیا ہے، ائیر ایمبولینس میں اسٹریچر کے علاوہ ڈاکٹرز اور پیرامیڈکس اسٹاف ہوتا ہے اور یہ ائیر ایمبولینس براہ راست لندن تک پرواز کرسکتی ہے۔’نوازشریف کو اسٹرائیڈز کی ہائی ڈوز دی گئیں‘نوازشریف کی روانگی سے قبل مریم اورنگزیب نے بتایا کہ ائیرایمبولینس میں آئی سی یو اور آپریشن تھیٹر کی سہولت موجود ہے، سفر پر روانگی سے قبل ڈاکٹرز نے نواز شریف کا تفصیلی معائنہ کیا اور انہیں دوران سفر خطرات سے بچانے کےلیے اسٹیرائیڈز کی ہائی ڈوز دی گئی ہیں۔

وزارت داخلہ نے اجازت کا میمورنڈم جاری کردیا
وزارت داخلہ نے لاہورہائی کورٹ کے حکم کی مصدقہ نقل ملنے کے بعد نوازشریف کو ایک بار کیلئے بیرون ملک جانے دینے کا ہدایت نامہ جاری کردیا ہے۔ وزارت داخلہ کی جانب سے نواز شریف کو باہر جانے کی اجازت کا میمورنڈم بھی جاری کردیا گیا ہے۔ میمورنڈم کے مطابق عبوری انتظام کےتحت نوازشریف کوباہرجانےکی ایک بار اجازت دینےکافیصلہ کیاگیا ہے اور انہیں 4 ہفتوں کے لیے بیرون ملک علاج کی غرض سے جانے کی اجازت لاہورہائی کورٹ کے حکم پردی گئی ہے۔ وزارت داخلہ کے میمورنڈم میں شہبازشریف اور نوازشریف کی جانب سے لاہور ہائی کورٹ میں جمع کروائے گئے بیان حلفی کا بھی حوالہ شامل ہے۔

ذرائع کے مطابق نوازشریف کسی بھی ائیرپورٹ پر عدالتی حکم کی تصدیق شدہ نقل دکھا کر بیرون ملک جا سکیں گے۔
’نواز شریف فیصلےکی مصدقہ کاپی دکھا کر باہر جاسکتے ہیں‘اٹارنی جنرل آف پاکستان انور منصور خان کے مطابق سابق وزیراعظم نواز شریف لاہور ہائیکورٹ کے فیصلے کی مصدقہ کاپی امیگریشن میں دکھا کر ملک سے باہر جاسکتے ہیں۔ نواز شریف کا نام ای سی ایل میں ہونے کے سوال پر انہوں نے کہا کہ عدالتی فیصلے کی مصدقہ کاپی امیگریشن میں دکھا کر نواز شریف ملک سے باہر جاسکتے ہیں۔ انہوں نے کہا کہ جنوری میں کیس کی سماعت ہوگی جب کہ اجازت میں توسیع مختلف شرائط پر بھی ہوسکتی ہے اور اس کے لیے کے لیے عدالت سے رابطہ کیا جائے گا۔انہوں نے کہاکہ میڈیکل رپورٹ کےعلاوہ دیگر شرائط اور پیسےجمع کرانے یا بونڈ پربھی قیام میں توسیع ہوسکتی ہے۔

نوازشریف کیس: کب کیا ہوا؟
21 اور 22 اکتوبر کی درمیانی شب نواز شریف کی طبعیت خراب ہوئی اور اسپتال منتقل کیاگیا
25 اکتوبر، چوہدری شوگر ملز کیس میں طبی بنیاد پر نواز شریف کی ضمانت منظور ہوئی
26 اکتوبر،العزيزيہ ریفرنس میں انسانی بنیادوں پر نوازشریف کی عبوری ضمانت منظور ہوئی
26 اکتوبر، نواز شریف کو ہلکا ہارٹ اٹیک ہوا، وزیرصحت پنجاب یاسمین راشد نے تصدیق کی
29 اکتوبر، العزيزيہ ریفرنس میں طبی بنیاد پر نوازشریف کی2 ماہ کے لیے سزا معطل کردی گئی
نوازشریف سروسزاسپتال سےڈسچارج ہوئے، جاتی امرامیں آئی سی یوبناکرمنتقل کیا گیا
8 نومبر، شہباز شریف نے وزارت داخلہ کو نوازشریف کا نام ای سی ایل سے نکالنے کی درخواست دی
12 نومبر ، وفاقی کابینہ نے نوازشریف کو باہر جانے کی مشروط اجازت دی،
14 نومبر ، ن لیگ نے انڈيمنٹی بانڈ کی شرط لاہور ہائی کورٹ میں چیلنج کردی
16 نومبر، لاہور ہائی کورٹ نے نواز شریف کوعلاج کےلیےبیرون ملک جانے کی اجازت دے دی
لاہور ہائی کورٹ کا فیصلہ
واضح رہے کہ 16 نومبر کو لاہور ہائی کورٹ نے سابق وزیر اعظم نواز شریف کو علاج کے لیے بیرون ملک جانے کی اجازت دیتے ہوئے انہیں اور شہباز شریف کو 4 ہفتوں میں وطن واپسی کے لیے حلف نامے جمع کرانے کا حکم دیا تھا۔ اس سے قبل وفاقی کابینہ نے نواز شریف کو بیرون ملک جانے کی اجازت 7 ارب روپے کے انڈیمنٹی بانڈ جمع کروانے کے ساتھ مشروط کی تھی جسے پاکستان مسلم لیگ (ن) نے مسترد کرتے ہوئے عدالت سے رجوع کیا تھا۔

نواز شریف کی خرابی صحت کا پس منظر
قومی احتساب بیورو (نیب) لاہور کی حراست میں میاں نوازشریف کی طبیعت 21 اکتوبر کو خراب ہوئی اور ان کے پلیٹیلیٹس میں اچانک غیر معمولی کمی واقع ہوئی، اسپتال منتقلی سے قبل سابق وزیراعظم کے خون کے نمونوں میں پلیٹیلیٹس کی تعداد 16 ہزاررہ گئی تھی جو اسپتال منتقلی تک 12 ہزار اور پھر خطرناک حد تک گرکر 2 ہزار تک رہ گئی تھی۔ نوازشریف کو پلیٹیلیٹس انتہائی کم ہونے کی وجہ سے کئی میگا یونٹس پلیٹیلیٹس لگائے گئے لیکن اس کے باوجود اُن کے پلیٹیلیٹس میں اضافہ اور کمی کا سلسلہ جاری ہے۔ نوازشریف کے لیے قائم میڈیکل بورڈ کے سربراہ سروسز انسٹی ٹیوٹ آف میڈیکل سائنس (سمز) کے پرنسپل پروفیسر محمود ایاز تھے۔ سابق وزیراعظم کی بیماری تشخیص ہوگئی ہے اور ان کو لاحق بیماری کا نام اکیوٹ آئی ٹی پی ہے، دوران علاج انہیں دل کا معمولی دورہ بھی پڑا جبکہ نواز شریف کو ہائی بلڈ پریشر، شوگراور گردوں کا مرض بھی لاحق ہے۔ اسی دوران نواز شریف کو لاہور ہائیکورٹ نے چوہدری شوگر ملز کیس میں طبی بنیادوں پر ضمانت دی اور ساتھ ہی ایک ایک کروڑ کے 2 مچلکے جمع کرانے کا حکم دیا۔ دوسری جانب اسلام آباد ہائیکورٹ نے 26 اکتوبر کو ہنگامی بنیادوں پر العزیزیہ ریفرنس کی سزا معطلی اور ضمانت کی درخواستوں پر سماعت کی اور انہیں طبی و انسانی ہمدردی کی بنیاد پر 29 اکتوبر تک عبوری ضمانت دی اور بعد ازاں 29 اکتوبر کو ہونے والی سماعت میں اسلام آباد ہائیکورٹ نے سابق وزیراعظم کی سزا 8 ہفتوں تک معطل کردی۔ خیال رہے کہ العزیزیہ اسٹیل ملز کیس میں سابق وزیراعظم کو اسلام آباد کی احتساب عدالت نے 7 سال قید کی سزا سنائی تھی۔

سزا معطلی اور ضمانت کے بعد نواز شریف کو پہلے سروسز اسپتال سے شریف میڈیکل کمپلیکس منتقل کرنے کا فیصلہ کیا گیا تاہم بعد ازاں انہیں ان کی رہائش گاہ جاتی امرا منتقل کیاگیا جہاں عارضی آئی سی یو بھی قائم کیا گیا تھا۔نواز شریف کا نام ایگزٹ کنٹرول لسٹ (ای سی ایل) سے نکالنے کیلئے وفاقی حکومت کو ن لیگ کی جانب سے درخواست دائر کی گئی تھی۔ اس حوالے سے وفاقی کابینہ کی ذیلی کمیٹی نے وزیر قانون فروغ نسیم کی سربراہی میں فیصلہ کیا کہ نواز شریف تقریباً 7 ارب روپے کے انڈیمنٹی بانڈ جمع کرائیں اور 4 ہفتوں کیلئے بیرون ملک چلے جائیں تاہم ن لیگ نے اس شرط کو مستردکرتے ہوئے لاہور ہائی کورٹ سے رجوع کیا۔لاہور ہائی کورٹ نے انڈیمنٹی بانڈ کی شرط ختم کی اور بیان حلفی کی بنیاد پر نواز شریف کو 4 ہفتوں کیلئے بیرون ملک جانے کی اجازت دے دی۔

(ایمرا نیوزآن لائن) والدین کے لیے بچوں کی تربیت کرنا ایک مشکل مرحلہ ہوتا ہے اور خاص طور پر جب وہ اپنے بچوں کو اعلیٰ تعلیم دینے کے لیے کوشاں ہوتے ہیں اور وہ اس حد تک اس بات کو اپنے سر پر سوار کرلیتے ہیں جس سے ان کو نقصان کا بھی خدشہ ہوتا ہے، ایسا ہی چین میں ہوا جب ایک ماں کو بچے کو پڑھاتے ہوئے دل کا دورہ پڑ گیا۔

چینی میڈیا کے مطابق چین کی 36 سالہ خاتون اپنے 9 برس کے بیٹے کو ریاضی کے سوالات سمجھا رہی تھیں مگر ان کے بیٹے کو یہ سوالات سمجھ نہیں آرہے تھے، خاتون اس وجہ سے بے حد تناؤ کا شکار ہوگئیں اور انہیں دل کا دورہ پڑ گیا۔ اس حوالے سے خاتون نے بتایا کہ ’میں نے اپنے بیٹے کو کئی مرتبہ سوالات سمجھائے مگر اس کو یہ سوال سمجھ نہیں آرہے تھے جس کی وجہ سے مجھے شدید غصہ آگیا، میرا دل اچانک تیزی سےدھڑکنے لگا اور میں سہی سے سانس بھی نہیں لے پا رہی تھی۔‘

خوش قسمتی سے خاتون کو فوراً ہی احساس ہوا کہ ان کے ساتھ کچھ عجیب سا ہورہا ہےتو انہوں نے اپنے شوہر کو فون کیا اور ان کے شوہر نے انہیں اسپتال منتقل کردیا جہاں ڈاکٹروں نے خاتون کو ’مایوکارڈیل انفیکشن‘ کی تشخیص کی جسے عام طور پردل کا دورہ کہا جاتا ہے۔ ڈاکٹرز کا کہنا تھا کہ وہ خوش قسمت ہیں کہ بالکل سہی وقت پر اسپتال میں داخل ہوگئیں کیونکہ اسپتال پہنچنے میں تھوڑی سی تاخیر بھی ان کی موت کا سبب بن سکتی تھی۔

خاتون نے بتایا کہ وہ اپنے بیٹے کو روزانہ پڑھاتی ہیں ، جب ان کے بیٹے کو سمجھ نہیں آتا تو وہ اکثر اس بات سے بے حد پریشان ہوجاتی ہیں لیکن انہوں نے ایسا کبھی بھی نہیں سوچا تھا کہ اس غصے سے ان کی صحت پر اس طرح کے سنگین نتائج برآمد ہوں گے۔ ڈاکٹر ز کا کہنا تھاکہ اکثر یہ نو عمر ماؤں کے ساتھ ہوتا ہے کیونکہ وہ متوازن غذا کا استعمال نہیں کرتیں جس کی وجہ سے جذباتی اور نفسیاتی طور پر انہیں بے حد مشکلات کا سامنا کرنا پڑتا ہے۔