Tag pakistan actor

لاہور(ایمرا نیوزآن لائن) گلوکارہ میشا شفیع نے اپنے خلاف اداکار اور گلوکار علی ظفر کی جانب سے 100 کروڑ روپے ہرجانے کے دعوے میں بیان ریکارڈ کرا دیا۔

گلوکارہ میشا شفیع بیان ریکارڈ کرانے اپنی والدہ اداکارہ صبا حمید کے ساتھ تیسری بار ایڈیشنل سیشن جج امجد علی شاہ کی عدالت میں پیش ہوئیں، انہوں نے 3گھنٹے سے زائد وقت تک بیان ریکارڈ کرایا۔ میشا شفیع نے اپنے اس الزام کو دہرایا کہ انہیں ساتھی گلوکارعلی ظفر نے متعدد بار جنسی طور پر ہراساں کیا، انہوں نے انتہائی مجبوری کی حالت میں یہ بات ظاہر کی۔ گلوکارہ کے مطابق انہوں نے بہت عرصے تک ایک ساتھ پرفارم کرنا تھا لیکن وہ اس رویے کو مزید برداشت نہیں کرسکتی تھیں۔

‘شوہر تربیت یافتہ باکسر ہیں ،نہیں چاہتی تھی کہ لڑائی ہو ‘: میشا کے مطابق علی ظفر نے اپنے سسر کے گھر پر پہلی بار ہراساں کیا، علی ظفر کایہ رویہ ان کے لیے حیران اور پریشان کن تھا، انہوں نے فوری طور پر اس گھر کے لان میں موجود اپنے شوہر کو ان باتوں سے آگاہ کیا ،لیکن ساتھ ہی شوہر کو علی ظفر سے اس معاملے پر بات کرنے سے روک دیا کیونکہ ان کے شوہر تربیت یافتہ باکسر ہیں اور وہ نہیں چاہتی تھیں کہ لڑائی ہو۔

میشا شفیع نے یہ بھی بتایاکہ علی ظفر کی فیملی سے تعلق ہونے کی وجہ سے انہوں نے یہ بات ان کی بیوی کو نہیں بتائی، میشا شفیع نے عدالت میں مختلف واٹس ایپ میسجز بھی دکھائے۔ احاطہ عدالت میں میشا شفیع نےمیڈیا کو بتایا کہ انہیں ڈرانےاوردباؤ میں لانے کے لیے کیس فائل کیا گیا ہے ،ہراسانی کے الزامات لگانے کے بعد ان کاکافی مالی نقصان بھی ہوچکا ہے۔ عدالت نے کیس پر مزیدسماعت 20 دسمبر تک ملتوی کردی، آئندہ سماعت پرمزید گواہوں کے بیانات ریکارڈ کیے جائیں گے۔ میشا شفیع نے گلوکارعلی ظفر پر جنسی ہراساں کرنے کا الزام لگا دیا میشا شفیع کا کہنا تھا کہ جنسی ہراسانی پر بات کرنا آسان نہیں لیکن اس پر خاموش رہنا بھی بہت مشکل ہے، میں خاموش رہنے کے کلچر کو توڑوں گی جو معاشرے میں سرائیت کرچکا ہے۔

گلوکار و اداکار علی ظفر نے میشا شفیع کی جانب سے ہراساں کرنے کے الزامات کی تردید کر تے ہوئےکہا تھا کہ میں الزام کا جواب الزام سے نہیں دوں گا بلکہ میشا شفیع کے خلاف عدالت جاؤں گا اور مجھے پورا یقین ہے کہ سچ ہمیشہ غالب ہوتا ہے۔ علی ظفر کی جانب سے ہراسانی کا الزام لگانے پر میشا شفیع پر 100 کروڑ روپے ہرجانے کا مقدمہ دائر کیا گیا ہے۔

(میڈٰیا92نیوزآن لائن) پاکستان کے مقبول ترین اداکار فواد خان کو سالگرہ کی موقع پر معروف بھارتی فلم فیئر ایڈیٹر جتیش پِلائی نے پیار بھرا پیغام بھیجا۔

فواد خان آج کل فلموں اور ڈراموں میں نظر تو نہیں آرہے لیکن ان کے مداحوں کو ان کے ہر ڈرامے اور فلم کا انتظار رہتا ہے۔ اداکار نا صرف لالی وڈ میں مقبول ہیں بلکہ سرحد پار بھی انہیں بے شمار لوگ پسند کرتے ہیں اور انہیں اسکرین پر دیکھنے کے منتظر رہتے ہیں۔

حال ہی میں اداکار کی 38ویں سالگرہ کے موقع پر جہاں پاکستان سے انہیں بے شمار لوگوں نے سالگرہ کی مبارکباد دی وہیں معروف بھارتی فلم فیئر ایڈیٹر نے بھی ان کی سالگرہ کے موقع پر ایک خوبصورت پیغام لکھا۔ فلم فیئر ایڈیٹر جتیش پِلائی نے اپنے انسٹاگرام اکاؤنٹ پر پاکستانی اداکار کی متعدد تصاویر اور ویڈیوز شیئر کرتے ہوئے فواد خان کو سالگرہ کی مبارکباد بھیجی۔

جتیش پِلائی نے فواد خان کو سالگرہ کی مبارکباد دیتے ہوئے یہ بھی کہا کہ ’ہم جہاں بھی جاتے ہیں آپ کا ایک حصہ اپنے ساتھ لے کر جاتے ہیں اور مجھے یقین ہے کہ آپ بھی یہی کرتے ہوں گے۔‘ بھارتی فلم فیئر ایڈیٹر نے نا صرف اپنی انسٹاگرام پوسٹ کے ذریعے فواد خان کو سالگرہ کی مبارکباد دی بلکہ انہوں نے انسٹاگرام اسٹوری پر بھی فواد کی پرانی تصاویر شیئر کرتے ہوئے ماضی کی یادیں تازہ کیں اور انہیں سالگرہ کی مبارکباد دی۔

جتیش پِلائی نے اپنی اسٹوریز میں یہ بھی لکھا کہ ’ہم آپ کو یاد کرتے ہیں‘۔ دوسری جانب بالی وڈ کی معروف اداکارہ سونم کپور جو کہ فواد خان کے ساتھ فلم خوبصورت میں اداکاری کے جوہر بھی دکھا چکی ہیں، انہوں نے بھی اداکار کو سالگرہ کی مبارکباد دی۔ عوام میں مقبول ترین ڈرامہ سیریل ہم سفر اور زندگی گلزار ہے میں فواد خان کی اداکاری کو بے حد پسند کیا گیا تھا۔

اداکار نے 2014 میں بالی وڈ میں قدم رکھتے ہوئے فلم خوبصورت میں اداکارہ سونم کپور کے ساتھ مرکزی کردار ادا کیا جس کے بعد انہوں نے 2016 میں بالی وڈ کی ایک اور فلم کپور اینڈ سنز میں بھی اداکاری کی تھی۔ فواد خان نے 2016 میں بالی وڈ کی ایک اور فلم کپور اینڈ سنز میں اداکاری کی تھی۔۔۔۔فوٹو: بشکریہ فواد خان انسٹاگرام
جس کے بعد 2016 میں بھارت کی جانب سے پاکستانی آرٹسٹ کے بھارت آکر کام کرنے پر پابندی عائد کی گئی تھی جس کے بعد فواد خان بالی وڈ میں دوبارہ کام نہیں کر سکے تھے۔

اس پابندی کے کچھ سال بعد 2019 میں ہونے والے پلوامہ حملے کے بعد آل انڈین سائن ورکرز ایسوسی ایشن (اے آئی سی ڈبلیو اے) نے بھارتی فلمی صنعت میں کام کرنے والے پاکستانی اداکاروں اور فنکاروں پر مکمل پابندی کا اعلان کرنے کے ساتھ اس عزم کا اظہار کیا تھا کہ جو بھی پاکستانی فنکاروں کے ساتھ کام کرے گا اس کے خلاف سخت کارروائی کی جائے گی۔ اس بیان کے بعد پاکستان میں بھی کسی بھی قسم کا بھارتی مواد نشر کرنے پر پابندی عائد کر دی گئی تھی۔

(ایمرا نیوزآن لائن) علی گل پیر اور نامور گلوکار علی ظفر کے درمیان چند ماہ قبل سوشل میڈیا پر ایک تنازع بھی سامنے آیا تھا۔

یہ تنازع اس وقت سامنے آیا تھا جب گلوکارہ میشا شفیع نے علی ظفر پر جنسی ہراسانی کے الزامات لگائے تھے جس کے بعد مقبول آرٹسٹ علی گُل پیر نے میشا شفیع کی حمایت بھی کی تھی۔ علی گُل پیر علی ظفر کے ہراسانی کے معاملے کے بعد سوشل میڈیا پر اس سے متعلق میمز اور پوسٹ کے ذریعے اکثر میشا شفیع کی حمایت کرتے ہوئے علی ظفر کو تنقید کا نشانہ بناتے تھے جس کے بعد علی ظفر نے رواں سال سوشل میڈیا پر جعلی ویڈیوز اور پوسٹ کے خلاف وفاقی تحقیقاتی ادارے (ایف آئی اے) سے شکایت کی تھی۔

بعد ازاں ایف آئی اے کی جانب سے علی گُل پیر کو ایک نوٹس بھی موصول ہوا تھا جو انہوں نے اپنے ٹوئٹر اکاؤنٹ پر ایک وضاحت کے ساتھ شیئر کیا تھا کہ، انہوں نے ایف آئی اے کے نوٹس کا جواب بھی دے دیا ہے۔ اب علی گل پیر کا حال ہی میں ریلیز کیا جانے والا گانا ’کر لے جو کرنا ہے‘ جو کہ لیاری کی گلیوں میں شوٹ کیا گیا ہے اس گانے میں انہوں نے علی ظفر کو کا نام لیے بغیر ہی انہیں تنقید کا نشانہ بنایا۔

علی گل پیر نے اپنے گانے میں کہیں بھی علی ظفر کا نام نہیں لیا لیکن ان کے گانے کی ریپنگ میں یہ بات ظاہر ہورہی ہے کہ یہ علی ظفر پر شدید تنقید کر رہے ہیں۔ علی گُل پیر نے اپنے گانے کو شیئر کرتے ہوئے یہ بھی لکھا کہ ’یہ گانا ان کے لیے ہے جو مجھے خاموش کرانے کی کوشش کرتے ہیں۔‘ ’کرلے جو کرنا ہے‘ گانے میں علی گل پیر نے پاکستانی راک اسٹار علی ظفر کی کامیاب ترین فلم طیفا ان ٹربل کا ذکر بھی کیا اور گانے میں کہا کہ ’نہیں ہے تو طیفا‘ ۔

علی گل پیر نے اپنے گانے میں براہ راست علی ظفر کا نام لیے بغیر انہیں تنقید کرتے ہوئے ان کے مشہور گانے ’چھنو کی آنکھوں‘ کا حوالہ دیتے ہوئے آخر میں کہا کہ یہ گانا چھنو کی موت ہے۔ علی گُل پیر نے اپنے گانے میں یہ بھی کہا کہ ’ایک مذاق سے تیرا ایگو ٹوٹا‘ انہوں نے ریپنگ میں کہا کہ وہ جیل جانے کے لیے بھی تیار ہیں۔ اس گانے کے بعد سوشل میڈیا پر صارفین کی جانب سے علی گل پیر کی ریپنگ کو بے حد سراہا جارہا ہے تاہم اس گانے کے ریلیز ہونے کے بعد گلوکار و اداکار علی ظفر کا کوئی ردِعمل سامنے نہیں آیا۔

(ایمرا نیوزآن لائن) پاکستانی ڈرامہ انڈسٹری کی معروف اداکارہ عائزہ خان نے اپنے گھر اور پیشہ وارانہ زندگی میں توازن رکھنے کی جدوجہد مداحوں سے شیئر کی۔

عائزہ خان نے اپنے انسٹاگرام اکاؤنٹ پر ایک طویل پوسٹ مداحوں سے شیئر کی۔ اداکارہ نے اس پوسٹ کے ذریعے تمام لوگوں کو اپنی روٹین اور گھر کو ایک ساتھ لے کر چلنے کی کوشش کے بارے میں بتایا۔

عائزہ خان 2019 میں متعدد ڈراموں میں نظر آئیں جس کی وجہ سے یہ سال ان کے لیے کافی مصروف رہا۔ عائزہ نے اپنی پوسٹ میں لکھا کہ ’اس سے پہلے کہ یہ سال ختم ہو، میں ان تمام لوگوں کی بے حد شکر گزار ہوں جنہوں نے مجھے اتنا پیار دیا اور میری حوصلہ افزائی کی۔

اداکارہ جو کہ دو بچوں کی والدہ بھی ہیں، انہوں نے مداحوں کو بتایا کہ صبح سویرے 7 بجے اٹھ کر بیٹی کا لنچ باکس تیار کرکے اسے اسکول چھوڑ کر آنے کے بعد دوسرے بیٹے کو تیار کر کے اپنی والدہ کے پاس چھوڑتی ہوں۔ عائزہ نے اپنی روٹین مداحوں سے شیئر کرتے ہوئے لکھا کہ کبھی کبھی تو میں اپنی والدہ سے کہتی ہوں کہ آپ میرے گھر آجائیں تاکہ میں اپنے کام پر جا سکوں۔

عائزہ خان نے طویل کیپشن میں بتایا کہ وہ کس طرح اپنی مشکل روٹین میں سے اپنے کام اور گھر کو ساتھ لے کر چلتی ہیں اور اس میں توازن قائم رکھتی ہیں۔ اداکارہ نے خود سے سوال کرتے ہوئے لکھا کہ یہ سب کرنا مشکل ہے؟ اور اس بات کے جواب میں عائزہ نے لکھا کہ کافی مرتبہ یہ میرے لیے مشکل ہوجاتا ہے لیکن جو محبت اور حوصلہ افزائی مجھے مداحوں سے ملتی ہے یہ مجھے سپر وومن (مضبوط عورت) بنا دیتی ہے۔

عائزہ نے اپنے کیپشن کے اختتام میں لکھا کہ میرے مداحوں کا پیار ہی مجھے کام کرنے کی ہمت دیتا ہے۔ واضح رہے کہ ڈرامہ انڈسٹری میں نام کمانے والی معروف اداکارہ عائزہ خان نے 2009 میں شوبز انڈسٹری میں قدم رکھا تھا۔ عائزہ خان نے پیارے افضل، دو قدم دور تھے، میری زندگی ہے تو اور دیگر ڈراموں میں اداکاری کے جوہر دکھائے ہیں۔ عائزہ نے 2014 میں پاکستانی شوبز اور فلم انڈسٹری کے معروف اداکار دانش تیمور کے ساتھ شادی کی۔