Tag Pakistan Cricket Board

(ایمرا نیوز آن لائن) پاکستان اور سری لنکا کے درمیان دو ٹیسٹ میچوں کی سیریز کے پہلے میچ کے آخری دن پاکستان نے سری لنکا کی پہلی اننگز کے سکور 308 رنز کے جواب میں لنچ کے وقفے تک ایک وکٹ کے نقصان پر 54 رنز بنائے ہیں۔ عابد علی اور اظہر علی کریز پر موجود ہیں۔ عابد علی 31 رنز اور کپتان اظہر علی 21 رنز پر ناٹ آؤٹ ہیں۔ پاکستان کو اننگز کے آغاز میں ہی اس وقت نقصان اٹھانا پڑا جب شان مسعود بغیر کوئی رنز بنائے سری لنکا کے کاسون رجتھا کی گیند پر آؤٹ ہوئے۔
اس سے قبل سری لنکا نے اپنی پہلی اننگز چھ وکٹوں کے نقصان پر 308 رنز پر ڈکلیئر کر دی تھی۔ اتوار کی صبح سری لنکا نے اپنی پہلی اننگز جمعے کے سکور 6/282 پر شروع کی۔ ہفتے کے دن بارش کی وجہ سے ایک اوور کا کھیل بھی نہیں ہو سکا تھا۔ راولپنڈی سٹیڈیم میں اتوار کی صبح دھنن جایا ڈی سلوا نے اپنے کیریئر کی پانچویں سینچری مکمل کی۔ ڈی سلوا کی سینچری مکمل ہوتے ہی سری لنکا نے اننگز ڈکلیئر کردی۔ ڈی سلوا 102 رنز ناٹ آؤٹ اور پریرا نے 16 رنز کی ناقابل شکست اننگز کھیلی۔ اس سے قبل ہفتے کو چوتھے روز کا کھیل بھی خراب موسم کے باعث شروع ہوئے بغیر ہی ختم کر دیا گیا تھا۔
راولپنڈی میں صبح سے وقفے وقفے سے بارش کا سلسلسہ جاری رہا تھا جس کے باعث پنڈی سٹیڈیم میں کھیلے جانے والے ٹیسٹ کے چوتھے روز کا آغاز ہی نہ ہو سکا اور کھلاڑی ڈریسنگ روم تک ہی محدود رہے۔ سری لنکن کپتان نے ٹاس جیت کر پہلے بیٹنگ کا فیصلہ کیا تھا اور کھیل کے پہلے روز 66 اوورز کا کھیل ہو سکا جب کہ دوسرے روز صرف 20 اوورز اور تیسرے روز 5 اوورز کا کھیل ہو سکا۔ سری لنکا 91 اعشاریہ 5 اوورز میں 5 وکٹوں کے نقصان پر 282 رنز بنا لیے ہیں اور مہمان ٹیم کی پہلی اننگز ابھی تک مکمل نہیں ہو سکی ہے۔
دھنن جایا ڈی سلوا نے اپنے کیریئر کی پانچویں سینچری مکمل کی (فوٹو: اے ایف پی)تقریباً تین دن کا کھیل بارش کے باعث متاثر ہونے کی وجہ سے دونوں ٹیموں کے درمیان پہلا ٹیسٹ بغیر کسی نتیجے کے ختم ہو جانے کا قوی امکان ہے۔

دبئی(ایمرا نیوز آن لائن): انٹرنیشنل کرکٹ کونسل (آئی سی سی) نے نئی ٹی ٹونٹی رینکنگ جاری کردی جس میں پاکستان کے کپتان بابر اعظم بدستور بیٹنگ کی کیٹیگری میں سرفہرست ہیں۔

آئی سی سی رینکنگ کے مطابق بیٹنگ کی فہرست میں پاکستان کے کپتان بابر اعظم پہلے، آسٹریلیا کے ایرون فینچ دوسرے، انگلینڈ کے ڈیوڈ ملان تیسرے اور نیوزی لینڈ کے کولن منرو چوتھے نمبر پر موجود ہیں۔جب کہ آسٹریلیا کے گلین میکس ویل پانچویں، بھارت کے کےایل راہول چھٹے اور ویسٹ انڈیز کے ایون لیوس ساتویں نمبر پر ہیں۔
آئی سی سی رینکنگ میں قومی کھلاڑیوں کی اونچی اڑان، بابر تیسری پوزیشن پر آ گئے
آئی سی سی کی نئی ون ڈے رینکنگ میں بابراعظم اور فخر زمان کی ترقی
ان کے علاوہ افغانستان کے حضرت اللہ زازئی آٹھویں، بھارت کے روہت شرما نویں اور ویرات کوہلی دسویں پوزیشن پر براجمان ہیں۔
آئی سی سی بالرز کی فہرست میں افغانستان کے راشد خان پہلے نمبر پر موجود جب کہ پاکستانی اسپنر عماد وسیم چوتھے اور شاداب خان آٹھویں پوزیشن پر موجود ہیں۔

اسلام آباد(ایمرا نیوز آن لائن)پاکستان اور سری لنکا کے درمیان دو ٹیسٹ میچوں کی سیریز کا پہلا میچ راولپنڈی کے انٹرنیشنل کرکٹ اسٹیڈیم میں شروع ہوگیا،سری لنکا کے خلاف راولپنڈی ٹیسٹ میں پوری قومی ٹیم ہوم گراؤنڈ پر اپنا ڈیبیو کر رہی ہے۔قومی ٹیم 10 سال کے طویل عرصے کے بعد ہوم گراؤنڈ پر ٹیسٹ سیریزکھیل رہی اور ٹیم میں شامل کپتان سمیت تمام کھلاڑی سری لنکا کے خلاف ہوم گراؤنڈ پر اپنا پہلا میچ کھیل رہے ہیں۔پاکستان کی ٹیسٹ ٹیم کے کپتان اظہر علی 75 اور اسد شفیق 71 میچوں میں قومی ٹیم کی نمائندگی کر چکے ہیں لیکن دونوں سری لنکا کے خلاف ہوم گراؤنڈ پر اپنا پہلا میچ کھیل رہے ہیں۔

(ایمرا نیوزآن لائن) سابق کرکٹرز اور وزیراعظم کے معاون خصوصی نعیم الحق کے بعد تحریک انصاف کے رہنما سینیٹر فیصل جاوید بھی قومی ٹیم کی آسٹریلیا کے خلاف بدترین کارکردگی پر پھٹ پڑے۔
سینیٹر فیصل جاوید نہ گفتگو کرتے ہوئے کہنا تھا کہ سارے ادارے تباہ حال تھے اور عمران خان بڑے محاذ پر لڑ رہے تھے، مصروفیات کی وجہ سے وزیراعظم کرکٹ پر توجہ نہیں دے سکے تھے۔ فیصل جاوید نے کہا کہ عمران خان نے اب تک براہ راست کرکٹ پر توجہ نہیں دی تھی، عمران خان اب کرکٹ کو ٹھیک کر کے دکھائیں گے۔ سینیٹر فیصل جاوید نے کہا کہ اب تک کرکٹ کو جگاڑ سے چلایا جاتا رہا، کرکٹ کو طویل مدتی پالیسی کے تحت ٹھیک کریں گے، کرکٹ کا نیا ڈومیسٹک ڈھانچہ نتائج دے گا۔ قومی ٹیسٹ ٹیم کے کپتان کو تنقید کا نشانہ بناتے ہوئے سینیٹر فیصل جاوید نے کہا کہ اظہر علی ناکام کپتان تھے، ٹیسٹ میں ان کی کارکردگی صفر رہی، اظہر علی کو واپس لانا درست فیصلہ نہیں تھا۔
آسٹریلیا کے ہاتھوں قومی ٹیم کی شکست پر بات کرتے ہوئے رہنما تحریک انصاف نے کہا کہ آسٹریلیا میں ہمیشہ ہارتے رہے لیکن اس بار تو بہت بری شکست رہی۔ خیال رہے کہ قومی ٹیم کو آسٹریلیا میں دو ٹیسٹ میچوں کی سیریز کے دونوں میچوں میں اننگز کی شکست کا مزہ چکھنا پڑا تھا جس پر سابق کرکٹرز انتخاب عالم، عبدالرزاق ، رمیز راجہ اور معین خان نے شدید تنقید کی تھی۔

(ایمرا نیوز آن لائن) پاکستان کے سابق مایہ ناز کرکٹ آل راؤنڈر عبدالرزاق نے کہا ہے کہ محض نیٹ کی بنیاد پر کھلاڑیوں کو میچ کھلانا شروع کردیں تو یہی نتائج ملیں گے۔

آسٹریلیا کے خلاف قومی کرکٹ ٹیم کی ناقص کارکردگی نے شائقین کے ساتھ ساتھ سابق کرکٹرز کو بھی مایوس کردیا ہے۔
لاہور میں جیو نیوز سے خصوصی گفتگو کرتے ہوئے عبدالرزاق کا کہنا تھا کہ کرکٹ کے لحاظ سے آسڑیلیا ایک مشکل ملک ہے اور مشکل حالات میں ہی صلاحیتیں دکھانے کا موقع ملتا ہے۔
انہوں نے کہا کہ محض نیٹ کی بنیاد پر کھلاڑیوں کو میچ کھلانا شروع کردیں تو یہی نتائج ملیں گے، آسٹریلوی ٹیم نچلی رینکنگ کے باعث ہمارے ساتھ کھیلنے کے لیے تیار نہیں تھی، اسے اچھا موقع سمجھیں۔ ان کا مزید کہنا تھا کہ کھلاڑیوں کو موقع اور اعتماد دیا جانا چاہیئے، دوسرے ٹیسٹ میں تین تبدیلیوں کا مطلب ہے کہ پہلے ٹیسٹ میں سلیکشن غلط تھی۔ یاد رہے کہ آسٹریلیا کی ٹیم نے دوسرے ٹیسٹ میچ میں اپنی پہلی اننگز 589 رنز تین کھلاڑی آؤٹ پر ڈکلیئر کر دی تھی جس کے جواب میں پاکستان نے دوسرے روز کا کھیل ختم ہونے تک 6 وکٹوں کے نقصان پر 96 رنز بنالیے ہیں۔

دوسرا ٹیسٹ میچ کھیلنے کے لیے پاکستانی ٹیسٹ ٹیم آج برسبین سے ایڈلیڈ جائے گی۔
(ایمرا نیوزآن لائن) تفصیلات کے مطابق آسٹریلیا کے خلاف پہلے ٹیسٹ میچ میں شکست کے بعد پاکستانی ٹیم دوسرے میچ میں کم بیک کرنے کے لیے پرعزم ہے، قومی ٹیم آج ایڈلیڈ پہنچے گی۔
ذرائع کے مطابق دوسرا ٹیسٹ 29 نومبر سے کھیلا جائے گا، آسٹریلیا کو سیریز میں ایک صفر کی ناقابل شکست برتری حاصل ہے۔
مصباح کی کوچنگ میں مسلسل شکستوں کا سلسلہ جاری ہے، ان کے ہیڈکوچ اور چیف سلیکٹر بننے کے بعد بدقسمتی سے ٹیم ایک بھی میچ نہ جیت سکی۔
واضح رہے کہ اگلا میچ ایڈلیڈ میں پنک بال سے ہوگا، پاکستان کو حکمت عملی بدلنی ہوگی ورنہ میچ کے ساتھ سیریز بھی ہاتھ سے جائے گی، ٹیم میں کیا تبدیلیاں ہوں گی اس سے متعلق کوئی حتمی فیصلہ سامنے نہیں آیا۔

(ایمرا نیوزآن لائن) آسٹریلیا نے دوسرے ٹی 20 میں پاکستان کو 7 وکٹوں سے شکست دے کر سیریز میں ایک صفر کی برتری حاصل کر لی۔

پاکستان نے پہلے بیٹنگ کرتے ہوئے آسٹریلیا کو جیت کے لیے 151 رنز کا ہدف دیا تھا جو اس نے 3 وکٹوں کے نقصان پر 19 ویں اوور میں پورا کر لیا۔آسٹریلیا کی جانب سے اسٹیو اسمتھ 51 گیندوں پر 80 رنز کی اننگز کھیلی اور ناٹ رہے جب کہ میک ڈرمٹ نے بھی بغیر آؤٹ ہوئے 21 رنز بنائے۔

پاکستان کی جانب سے محمد عرفان، محمد عامر اور عماد وسیم نے ایک ایک کھلاڑی کو آؤٹ کیا۔ قبل ازیں، پاکستانی بلے بازوں نے انتہائی مایوس کن کارکردگی کا مظاہرہ کیا لیکن افتخار احمد کی جارحانہ اننگز کی بدولت گرین شرٹس 20 اوورز میں 150 رنز بنانے میں کامیاب رہیں۔ ٹاس جیتنے کے بعد پاکستان کے کپتان بابر اعظم نے ایک مرتبہ پھر اوپنر کی حیثیت سے فخرزمان کے ساتھ اننگز کاآغاز کیا لیکن فخرزمان صرف 2 رنز بنا آؤٹ ہوگئے۔

فخر کے بعد حارث سہیل بیٹنگ کے لیے آئے لیکن ایک مرتبہ پھر اونچا شاٹ کھیل کر اپنی وکٹ گنوا دی۔ 29 رنز پر دو وکٹیں گرنے کے بعد بابر اعظم اور وکٹ کیپر محمد رضوان نے مل کر ٹیم کا اسکور 62 رنز تک پہنچایا لیکن رضوان باہر نکل کر شاٹ کھیلنے کی کوشش میں اسٹمپ آؤٹ ہو گئے۔

افتخار احمد 34 گیندوں پر 6 چھکوں اور 5 چوکوں کی مدد سے 62 رنز بنا کر ناٹ آؤٹ رہے — اے ایف پی فوٹو
رضوان کے بعد آنے والے آصف علی بھی چھکا لگانے کی کوشش میں کیچ آؤٹ ہو گئے۔ انہوں نے 5 گیندوں پر صرف 4 رنز بنائے۔ کپتان بابر اعظم اور چھٹے نمبر پر آنے والے افتخار احمد نے 16 اوورز میں ٹیم کا مجموعہ 106 رنز تک پہنچایا لیکن دو رنز لینے کی کوشش میں بابر رن آؤٹ ہو گئے۔ انہوں نے 50 رنز بنائے۔

بابر اعظم کے آؤٹ ہونے کے بعد افتخار احمد نے عماد وسیم کے ساتھ مل کر جارحانہ بیٹنگ کی اور اپنے ٹی 20 کیریئر کی پہلی نصف سنچری اسکور کی۔ پاکستان نے افتخار احمد کی جارحانہ اننگز کی بدولت آخری تین اوورز میں 67 رنز اسکور کیے۔ افتخار احمد 34 گیندوں پر 6 چھکوں اور 5 چوکوں کی مدد سے 62 رنز بنا کر ناٹ آؤٹ رہے۔

یاد رہے کہ سیریز کا پہلا میچ بارش کے باعث بے نتیجہ ختم ہوا تھا لیکن اس میں پاکستانی بلے بازوں کی کارکردگی انتہائی بری رہی تھی جب کہ بارش کے باعث میچ منسوخ ہونے سے قبل تین اوورز میں 41 رنز دے کر پاکستانی بولرز کی صلاحیتیں بھی عیاں ہو گئیں۔

کینبرا(ایمرا نیوزآن لائن) میں کھیلے جا رہے دوسرےٹی 20 میچ میں پاکستان نے آسٹریلیا کے خلاف ٹاس جیت کر پہلے بیٹنگ کا فیصلہ کیا ہے۔پاکستانی ٹیم میں کوئی تبدیلی نہیں کی گئی۔

پاکستان اور آسٹریلیا کے درمیان دوسرا ٹی ٹوئنٹی آج کینبرا میں کھیلا جا رہا ہے ، پہلا میچ بارش کے باعث مکمل نہیں ہو سکا تھا ۔ سڈنی میں پہلے ٹی ٹوئنٹی میں پلیئرز سے زیادہ بادل برسے تھے اور میچ منسوخ کرنا پڑا لیکن آج بارش کا تو امکان نہیں لیکن ٹھنڈی ہوا ضرور چل رہی ہیں مگر اب اس میچ میں حریف بیٹسیمنوں کو قابو کرنے کےلیے فاسٹ بولرز پر ہی زیادہ انحصار ہو گا ۔

بارش سے متاثرہ پہلے ٹی ٹوئنٹی میچ میں میزبان آسٹریلیا کے خلاف پاکستان نے 15 اوورز میں 107 رنز بنائے تاہم ڈی آر ایس میتھڈ کے تحت آسٹریلیا کو میچ جیتنے کے لیے 119 رنز کا ہدف ملا۔

آسٹریلیا نے ہدف کے تعاقب میں اپنی بیٹنگ کا آغاز جارحانہ انداز میں کیا اور صرف 3 اوورز میں 41 رنز بنالیے کہ اس موقع پر میچ کو ایک مرتبہ پھر سے بارش کی وجہ سے روکنا پڑگیا جس کے بعد امپائرز نے باہمی مشاورت سے میچ بے نتیجہ ختم کرنے کا اعلان کیا۔

(ایمرا نیوزآن لائن) قومی کرکٹ ٹیم کے ہیڈ کوچ اور چیف سلیکٹر مصباح الحق کا کہنا ہے کہ آسٹریلیا میں کھیلنا ایک چیلنج ہے ، تمام شعبوں نے اگر صورتحال کے مطابق کارکردگی دکھائی تو ہم اچھے نتائج دے سکتے ہیں۔

قومی ٹی ٹوئنٹی ٹیم 3 میچوں کی سیریز کیلئے آسٹریلیا پہنچ چکی ہے جہاں سڈنی کرکٹ گراؤنڈ میں قومی ٹیم کے کھلاڑیوں کا پہلا تربیتی سیشن ہوا۔ پریکٹس سیشن سے قبل میڈیا سے گفتگو کرتے ہوئے ہیڈ کوچ مصباح الحق کا کہنا تھا کہ ہر ٹیم کیلئے آسٹریلیا میں کھیلنا ایک چیلنج ہوتا ہے لیکن پاکستان کی نوجوان ٹیم کیلئے یہ اور بھی بڑا چیلنج ہے۔

مصباح الحق کا کہنا تھا کہ اگر ٹیم نے تمام شعبوں میں کنڈیشنز کے مطابق اچھی کارکردگی دکھائی توہم بہتر نتائج دے سکتے ہیں۔ پاکستان کرکٹ ٹیم کے سابق اسٹار لیگ اسپنر عبدالقادر کے صاحبزادے لیگ اسپنر عثمان قادر کی قومی ٹیم میں شمولیت کے سوال پر مصباح کا کہنا تھا کہ آسٹریلیا میں کھیلنے کی وجہ سے عثمان قادر یہاں کی کنڈیشنز سے اچھی طرح واقف ہیں۔

اس سوال پر کہ’ قومی ٹیم کی غیر متوقع اور سرپرائز کارکردگی دکھانے کی عادت آسٹریلیا کیلئے باعث خوف بھی ہوسکتی ہے؟’ ان کا کہنا تھا کہ ہم اس بات کا فائدہ اٹھانے کی کوشش کریں گے لیکن ہماری کوشش ہے کہ اپنی کارکردگی میں تسلسل لایا جائے۔ نوجوان فاسٹ بولر نسیم شاہ کے حوالے سے ان کا کہنا تھا کہ وہ اچھی بولنگ کررہے ہیں اور صرف تیز بولنگ ہی ان کی خاصیت نہیں بلکہ انہوں نے لائن اور لینتھ پر بھی بہتر کنٹرول کا بھی مظاہرہ کیا ہے۔

’بابر اعظم اور اظہر علی کیلئے بہتر ہوگا کہ وہ انفرادی کارکردگی پر توجہ مرکوز رکھیں‘
جب ہیڈ کوچ و چیف سلیکٹر مصباح الحق سے پوچھا گیا کہ کیا بابر اعظم اور اظہر علی پر کپتانی کا دباؤ ہوگا اور اس دباؤ کی وجہ سے ان کی ذاتی کارکردگی متاثر ہوسکتی ہے؟ تو انہوں نے کہا کہ ’کسی بھی کپتان کیلئے ہمیشہ میرا یہی مشورہ رہا ہے کہ ٹیم کی کارکردگی تو اپنی جگہ اہم ہے لیکن کپتان کیلئے بطور کھلاڑی ٹیم میں کردار ادا کرنا سب سے زیادہ اہم ہوتا ہے‘۔

انہوں نے کہا کہ اظہر علی اور بابر اعظم اچھے بیٹسمین ہیں اور ان دونوں کیلئے سب سے اہم یہ ہے کہ وہ بطور بیٹسمین اپنی کارکردگی پر سب سے پہلے فوکس رکھیں۔ مصباح نے کہا کہ ٹیم میں ہر کھلاڑی پروفیشنل ہوتا ہے، ہر کھلاڑی کو معلوم ہوتا ہے کہ اسے کیا پرفارمنس دینی ہے، کپتان کا کام انہیں آپریٹ کرنا ہوتا ہے، وقت کے ساتھ انسان سیکھتا ہے، ابتداء میں کپتانی کا پریشر ہوتا ہے لیکن میری ذاتی رائے یہ ہے کہ جب آپ پر ذمہ داری آتی ہے تو کئی دفعہ اس سے آپ کی کارکردگی بہتر ہوتی ہے۔

مصباح نے کہا کہ بابراعظم ٹی ٹوئنٹی کا بہترین بیٹسمین ہے اور اگر وہ اپنی پرفارمنس برقرار رکھے گا تو اسے اپنی کپتانی میں بھی اس کا فائدہ ہوگا۔ واضح رہے کہ ،پاکستان ٹیم 3 میچوں کی ٹی 20 سیریز سے پہلے جمعرات کو آسٹریلیا الیون سے پریکٹس میچ بھی کھیلے گی جس کے بعد دونوں ٹیموں کے دوران 5،3 اور 8 نومبر کو تین ٹی ٹوئنٹی میچز کھیلے جائیں گے۔

آسٹریلیا سے 3 ٹی ٹوئنٹی میچوں کی سیریز کے بعد قومی ٹیم کینگروز سے اظہر علی کی قیادت میں 2 ٹیسٹ میچز بھی کھیلے گی۔

دورہ آسڑیلیا کے لیے 15 رکنی ٹی ٹوئنٹی اسکواڈ میں دائیں ہاتھ کے لیگ اسپنر عثمان قادر کو شامل کر کے مصباح الحق نے نیا پنڈورا باکس کھول دیا۔

26 سال کے لیگ بریک بولر لیجنڈری عبدالقادر مرحوم کے فرزند ہیں اور پہلی بار قومی ٹیم کے لیے منتخب ہوئے ہیں، 10فرسٹ کلاس میچوں میں 52.81کی اوسط سے 11 وکٹیں لینے والے عثمان قادر پاکستان سپر لیگ کی سب سے مقبول فرنچائز لاہور قلندر کا حصہ رہنے کے ساتھ آسڑیلیا میں کھیلی جانے والی بگ بیش لیگ میں پرتھ اسکوچرز کی بھی نمائندگی کر چکے ہیں۔

تاہم ان کے قومی ٹیم میں منتخب ہونے کو چیف سلیکٹر مصباح الحق نے خود اپنے بیان سے متنازع بنا دیا، 9 اکتوبر کو سری لنکا کے خلاف تیسرے ٹی ٹوئنٹی میں شکست کے بعد مصباح نے اس وقت کے کپتان سرفراز کے ساتھ پریس کانفرنس میں لیگ اسپنر کے سوال پر کہا کہ یاسر شاہ اور شاداب کے علاوہ ڈومیسٹک ٹیموں میں کسی لیگ اسپنر کا نام بتا دیں جسے پرفارمنس کے باوجود موقع نہیں دیا جا رہا۔

جب ایک صحافی نے مصباح الحق سے استفسار کیا کہ عثمان قادر کے بارے میں کیا خیال ہے تو مسکراتے ہوئے مصباح بولے وہ کہاں کھیل رہے ہیں؟ البتہ ٹھیک گیارہ دن بعد اسی قذافی اسٹیڈیم میں جہاں مصباح الحق کو پتہ نہ تھا کہ عثمان قادر کہاں کھیل رہے ہیں؟ اسی عثمان قادر کو مصباح الحق نے بولنگ کی تعریفوں کے بلند و بانگ دعوے کرتے ہوئے آسڑیلیا کے خلاف تین ٹی ٹوئنٹی کھیلنے کے لیے جانے والی ٹیم کے لیے منتخب کر کے نیا پنڈورا باکس کھول دیا۔

عثمان قادر ڈومیسٹک ٹی ٹوئنٹی میں سینٹرل پنجاب کے لیے فیصل آباد میں کھیل رہے ہیں، دسمبر 2013 میں نیشنل بینک کی جانب سے یوبی ایل کے خلاف فرسٹ کلاس ڈیبیو کرنے والے عثمان قادر 2013 کے دورہ ویسٹ انڈیز پر نہیں جا سکے تھے، اس ٹیم کے کپتان مصباح الحق تھے اور چیف سلیکٹر اقبال قاسم تجربے کی غرض سے عثمان قادر کو بطور 17 واں کھلاڑی بھیجنے میں ناکام رہے تھے۔