Tag pakistan

لاہور(نیٹ نیوز/ایمرا نیوز) گوگل نے راتوں رات پاکستانی کرنسی کی قدر بڑھا دی، گوگل سرچ انجن ڈالر اور یورو سمیت غیر ملکی کرنسی کے غلط ریٹس دکھانے لگا، میڈیا پر خبر نشر ہوئی تو چند گھنٹوں بعد غلطی درست کرلی گئی۔مارکیٹ میں ڈالر کی قیمت بھلے 139 روپے ہی کیوں نہ ہو، مگر سرچ انجن میں ایک امریکی ڈالر کی قدر 76 روپے 25 پیسے دکھائی گئی۔گوگل کرنسی کنورٹر پر امارتی درہم 20 روپے 76 پیسے نظر آیا جبکہ گوگل کے مطابق ایک یورو 87 روپے 3 پیسے کا خریدا جاسکتا تھا۔گوگل نے اسی طرح ہر کرنسی کے مقابلے میں پاکستانی کرنسی کی شرح بڑھا دی، نومبر میں ایک ہی دن میں ڈالر کی قدر میں ریکارڈ اضافہ ہوا تھا، مگر گوگل نے ڈالر کی قدر میں کمی کے سب ریکارڈ توڑ ڈالے۔گوگل کے کرنسی کنورٹر پر پاکستانی روپے اور دیگر کرنسیوں کے شرح مبادلہ کے غلط نتائج پروگرامنگ کی غلطی کا نتیجہ ہوسکتے ہیں، لیکن یہ کارنامہ سوشل میڈیا پر وائرل ہونے سے لوگ ضرور تجسس میں مبتلا ہوگئے ہیں۔

کراچی(نیٹ نیوز/ایمرا نیوز) چیئرمین پیپلز پارٹی بلاول بھٹو زرداری کو بچہ کہنے پرمرکزی ترجمان پاکستان پیپلز پارٹی سینیٹر مولابخش چانڈیو نے وزیراطلاعات فواد چوہدری کو جواب دیتے ہوئے کہا ہے کہ بلاول بھٹو پاکستان کا مستقبل ہیں، بچہ کہنے والوں کو میرے چیئرمن بلاول بھٹو نے ہر جگہ شکست دی ہے۔مولابخش چانڈیو کا کہنا ہے کہ فواد چوہدری صاحب آپ کے سیاسی بڑوں کو بھی بلاول بھٹو سے سیاست سیکھنے پڑے گی۔ آج کے حکمرانوں میں ضیا الحق کی روح داخل ہو چکی ہے۔انہوں نے کہا کہ آصف علی زرداری جیل سے باعزت بری ہوچکے، نواز شریف جیل میں ہیں اب جیل جانے کی باری حکمرانوں کی ہے۔جب موجودہ حکمران جیل جائیں گے تو فواد کس پارٹی میں جائو گے؟انہوں نے مزید کہا کہ عمران خان غروب ہو رہا ہے، بار بار پارٹیاں بدلنے والے تیرا کیا ہوگا کالیا، حکمران قومی اسمبلی سے اپنے پہلے خطاب سے آج تک بلاول بھٹو سے شکست کھاتے آ رہے ہیں، بلاول بھٹو کے ہاتھوں شکست کی شرمندگی چھپانے کیلئے بچہ بچہ کہہ رہے ہیں۔مولابخش چانڈیو نے کہا کہ درست ہے کہ تمہاری عمریں بڑی ہیں، مگر قیادت کیلئے فہم و فراست اور تدبر چاہئے، مولابخش چانڈیو قوم کی قیادت کیلئے تدبر، وطن پرستی اور قربانی کا جذبہ چاہئے سینیئا رٹی نہیں۔بلاول بھٹو اس خاندان کے چشم و چراغ ہیں جس نے چھوٹی عمر میں پاکستانی سیاست کے سامری جادوگروں کو شکست دی۔انہوں نے کہا کہ سندھ فتح کرنے کا خواب دیکھنے والے خود اپنے لئے ڈرائونا خواب بن چکے ہیں، سندھ کے عوام نے پی پی اور ہمارے قائد نے مراد علی شاہ پر اعتماد کا اظہار کیا ہے، مراد علی شاہ کو غیرآئینی طریقے سے ہٹانے کے ہتھکنڈے وفاق کے ساتھ کھلواڑ ہوگا۔رہنما پیپلز پارٹی نے کہا کہ آصف علی زرداری پہلے بھی مقدمات سے باعزت بری ہوئے اب بھی سرخرو ہوں گے، فواد چوہدری دبئی، نیوجرسی کے جائیدادوں اور پارٹی فنڈ کا حساب تو دیں۔

اسلام آباد(نیٹ نیوز/ایمرا نیوز) چیف جسٹس پاکستان میاں ثاقب نثارنے کہا ہے کہ مجھےنہیں لگتا حکومت ڈیم بنانے پر سنجیدہ ہے،بیوروکریسی کے پاس کام کرنے کا جذبہ اور نیت نہیں۔سپریم کورٹ میں نئیں گاج ڈیم سے متعلق کیس کی سماعت ہوئی۔ وفاقی وزیر خزانہ اسد عمر سپریم کورٹ میں پیش ہوئے۔اسد عمر نے عدالت میںکہا کہ کل نئیں گاج ڈیم کے حوالے سے ایکنک میں درخواست آئی، یہ معاملہ جب ایکنک میں آتا ہے تو میرے علم میں آتا ہے، ہم نے نئیں گاج معاملہ کابینہ کو بھجوا دیا۔چیف جسٹس نے ریمارکس دیئے کہ پھر آپ کی حکومت میں کوآرڈینیشن نہیں۔
اسد عمر نے جواب دیا کہ ہو سکتا ہے جناب۔
چیف جسٹس نے اسد عمر سے مکالمہ کرتے ہوئے کہا کہ حکومت کا مطلب حکومت ، وفاق کا مطلب وفاق ہے،جس تیزی سے مسئلہ حل کرنے کی کوشش کر رہے ہیں ہو نہیں رہا،آپ لوگ کام نہیں کر سکتے۔اس ملک کے لیے آپ لوگوں کی محبت کم ہو گئی ہے، بیوروکریسی کے پاس کام کرنے کا جذبہ اور نیت نہیں۔جسٹس اعجازالاحسن نے ریمارکس دیئے کہ ایکنک اجلاس ہوگیا تو منٹس پر دستخط ہونے میں کتنا ٹائم لگتا ہے۔چیف جسٹس ثاقب نثار نے کہا کہ ہم اس حکومت کو ڈکٹیٹ نہیں کرنا چاہتے،نہ ہی ہم حکومت چلانا چاہتے ہیں، ہم نے بنیادی حقوق سے متعلق کام کیا ہے۔وفاقی وزیر خزانہ اسد عمر نے کہا کہ میں آپ کے کردار کا معترف ہوں،25 جنوری کو ایکنک کا اجلاس ہے اس میں معاملہ زیرغور لائیں گے۔سپریم کورٹ نے حکم جاری کرتے ہوئے کہا کہ ایکنک اجلاس کے فوراً بعد عدالت کو فیصلوں سے آگاہ کریں۔چیف جسٹس نے اسد عمر سےمکالمہ کرتے ہوئے کہا کہ تاریخ میں ڈیم کے حوالے سے آپ کو یاد رکھا جائے گا۔فیصل صدیقی ایڈووکیٹ نے چیف جسٹس سے کہا کہ 25 جنوری کو آپ کو اس بنچ میں مس کریں گے۔نئیں گج ڈیم تعمیر سے متعلق کیس کی سماعت دو ہفتوں کیلئے ملتوی کر دی گئی۔

اسلام آباد(نیٹ نیوز/ایمرا نیوز) قومی اسمبلی میں قائد حزب اختلاف شہباز شریف کی دعوت پر اپوزیشن جماعتوں کے سربراہان کا اجلاس جاری ہے۔اجلاس میں قائد حزب اختلاف شہباز شریف ، پیپلز پارٹی کے صدرآصف زرداری اور چیئرمین بلاول بھٹو زرداری بھی موجود ہیں۔ذرائع کے مطابق اجلاس میں فوجی عدالتوں میں توسیع کے معاملے پر مشاورت ہوگی۔اجلاس میں ملکی سیاسی صورتحال اور قومی اسمبلی میں اپوزیشن کے کردار پر بھی بات چیت ہو گی۔آصف علی زرداری نے پارلیمنٹ ہاؤس آمد پر کہا کہ اپوزیشن پہلے دن سے واک آؤٹ کر رہی ہے، این آر او کیوں لے گی۔ این آر او کی تعریف وزیر اعظم کو نہیں آتی اور حکومت کچھ بھی دینے کی پوزیشن میں نہیں ہے، ہمیں این آر او کی ضرورت ہی نہیں۔اس موقع پر بلا ول بھٹو زرداری نے کہا کہ حکومت سے این آر او مانگا، نہ پیپلزپارٹی کو چاہیے۔عمران خان صاحب ایوان میں آتے نہیں ،اُنہیں کیا پتا پارلیمان میں کیا ہورہا ہے ۔صحافی کے سوال پر انہوں نے کہا کہ عمران خان کاایوان میں آکراپوزیشن کے سوالات کے جوابات دینے کا دعویٰ جھوٹا نکلا ، خان صاحب کا ہر وعدہ جھوٹا نکلا ،فوجی عدالتوں کی توسیع سے متعلق بل کوسپورٹ کرنا پیپلز پارٹی کے لیے مشکل ہو گا ۔

(نیٹ نیوز/ایمرا نیوز)
دنیا کی کم عمر ترین پاکستانی نوبل انعام یافتہ ملالہ یوسف زئی برطانیہ کی آکسفورڈ یونیورسٹی میں زیر تعلیم ہیں جہاں اُن کے کمرے میں پاکستان اور اسلامی دنیا کی پہلی منتخب خاتون وزیر اعظم ’بے نظیر بھٹو‘ کی تصویر لگی ہے۔’دی بی بی سی‘ کو انٹرویو دیتے ہوئے 21 سالہ ملالہ یوسف زئی نے بتایا کہ انہیں دیواروں پر پوسٹرز یا تصاویر لگانے کا شوق نہیں ہے لیکن اس کے باوجود انہوں نے اپنے کمرے کی دیوار پر پاکستان کی سابقہ وزیر اعظم ’بے نظیر بھٹو‘ کی تصویر لگائی ہوئی ہے۔

دوران انٹرویو نوبل انعام یافتہ ملالہ یوسف زئی نے بتایا کہ انہیں برطانوی سٹ کامس یعنی مزاحیہ ڈرامےدیکھنا بے حد پسند ہےجس میں ’بلیک ایڈر، مائنڈیور لینگویج‘ شامل ہیں۔اس کے علاوہ انہوں نےاپنی پسند سے متعلق بتایا کہ وہ اپنے فارغ وقت میں کرکٹ کھیلتی ہیں ، انہیں کرکٹ کھیلنا بہت پسند ہے۔ملالہ سے سوال کیا گیا کہ پاکستان چھوڑ کر بیرون ملک شفٹ ہونا ان کے لیے کتنا آسان تھاتو اس کے جواب میں انہوں نے کہا کہ سوات چھوڑ کر امریکا منتقل ہوناابتداء میں اُن کے لیے کافی مشکل تھا لیکن اب وہ وہاں سیٹ ہوگئی ہیں اور انہوں نے یونیورسٹی میں نئے دوست بھی بنا لیے ہیں۔واضح رہے ملالہ یوسف زئی کی کتاب’وی آر ڈسپلیسڈ‘ (We Are Displaced) رواں ماہ کے آغاز میں فروخت کے لیے پیش کی گئی تھی جس میں انہوں نے نا صرف اپنی بلکہ دنیا بھر کی دیگر خواتین کے بے گھر ہونے کی کہانی بیان کی ہے۔ اس سے قبل وہ اپنی سوانح حیات بھی لکھ چکی ہیں۔

کراچی(نیٹ نیوز/ایمرا نیوز) پاکستان ٹیلی کمیونی کیشن اتھارٹی (PTA)نے اعلان کیا ہے آج (منگل) رات بارہ بجے تک استعمال ہونے والے موبائل فون کار آمد ہونگے اس کے علاوہ تمام اسمگل شدہ، چوری یا چھینے گئے موبائل فونز بند کردئیے جائیں گے ، پی ٹی اے کی ترجمان طیبہ افتخار کے مطابق ، تاہم موبائل فون چوری شدہ یا چھینے گئے ہیں اور ان کی رپورٹ پی ٹی اے کو کی گئی ہے یاآج کے بعد جو موبائل فون چھینے یا چوری کئے جائیں گے انہیں پی ٹی اے فوری بلاک کردے گایا سراغ لگا کر استعمال کرنے والے سے موبائل فون کے اصل مالک کو واپس کرنے کو کہے گا ، پی ٹی اے نے اس سلسلے میں ایک نظام وضع کر لیا ہے ، ماضی میں لاکھوں روپے مالیت کے کئی ہزار موبائل فون چھینے اور فروخت کردیئے گئے مگر پی ٹی اے یا سی پی ایل سی میں رپورٹ نہ کرنے کی وجہ سے وہ ٹریس نہ ہوسکے اس سلسلے میں پی ٹی اے کا کہنا تھا کہ اگر کوئی مسافر باہر سےموبائل فون لاتا ہے تو ایئر پورٹ پر ٹیکس ادا کرکے اسے قابل استعمال بنایا جاسکے گا۔

اسلام آباد(نیٹ نیوز/ایمرا نیوز) سابق صدر اور پاکستان پیپلز پارٹی کے شریک چیئرمین آصف علی زرداری صدر مسلم لیگ نون اور قومی اسمبلی میں قائد حزب اختلاف میاں شہباز شریف سے آج ملاقات کریں گے۔ذرائع کا کہنا ہے کہ آصف زرداری اور شہباز شریف کے درمیان یہ ملاقات آج دوپہر اپوزیشن چیمبر میں ہوگی۔ذرائع کا یہ بھی کہنا ہے کہ دونوں رہنماؤں کے درمیان ملاقات میں ملکی سیاسی صورت حال اور قومی اسمبلی میں اپوزیشن کے کردار پر بات چیت ہوگی۔

کراچی(نیٹ نیوز/ایمرا نیوز) کراچی کے علاقے لیاقت آباد کے ایک گھر اور نارتھ کراچی میں مسلح ڈکیت آفس کا صفایا کر کے فرار ہو گئے، شہر میں مختلف کارروائیوں کے نتیجے میں 8 ملزمان گرفتار کر لیے گئے۔لیاقت آباد سندھی ہوٹل کے قریب دن دیہاڑے ڈکیتی کی واردات کی سی سی ٹی وی فوٹیج کے مطابق 3 موٹر سائیکلوں پر سوار 5 ملزمان اطمینان کے ساتھ گھر میں داخل ہوگئے۔ملزمان اسلحے کے زور پر اہل خانہ کو یرغمال بنا کر گھر میں موجود 4لاکھ روپے اور سونے کے زیورات لے کر فرار ہوگئے، جبکہ انہوں نے جاتے ہوئے گھر کے دروازے کو باہر سے لاک بھی کر دیا۔دوسری جانب نارتھ کراچی کے سیکٹر فائیو سی ون میں انٹرنیٹ سروس کے آفس میں 2 مسلح ڈکیت اسلحے کے زور پر لوٹ مار کر کے فرار ہوگئے۔اس واردات کی سی سی ٹی وی فوٹیج کے مطابق 2مسلح ڈکیت آفس میں داخل ہوئے جنہوں نے وہاں موجود افراد سے موبائل فون، نقد رقم اور دیگر قیمتی اشیاء لے کر فرار ہو جاتے ہیں۔ڈاکس کے علاقے سلطان آباد میں پولیس نے منشیات فروشی کے اڈے پر چھاپہ مار کر 3 منشیات فروشوں کو ہیروئن، چرس اور اسلحے سمیت گرفتار کر لیا جبکہ کارروائی کے دوران بدنام زمانہ منشیات فروش عظمت عرف کاکی 3 کلو چرس چھوڑ کر فرار ہو گیا۔سہراب گوٹھ اور میمن گوٹھ میں 2 منشیات فروش فقیر اور خورشید کو گرفتار کر کے 1 کلو سے زائد چرس برآمد کرلی۔تیموریہ پولیس نے کے بی آر سوسائٹی میں کارروائی کر کے 3 اسٹریٹ کرمنل علی، مدثر اور عمران کو اسلحے، موبائل فون اور موٹر سائیکل سمیت گرفتار کر لیا۔ہجرت سیکٹر 2 ڈی میں شادی کی تقریب میں ہوائی فائرنگ سے 25 سالہ شہباز زخمی ہو گیا۔

اسلام آباد(نیٹ نیوز/ایمرا نیوز) اپوزیشن لیڈر شہبازشریف نے وزیراعظم عمران خان کی جانب سے اپوزیشن کے این آر او لینے کے بیان کو بے بنیاد قرار دے دیا۔پارلیمنٹ ہاؤس آمد پر اپوزیشن لیڈر شہبازشریف سے ایک صحافی کی جانب سے سوال کیا گیا کہ وزیر اعظم کہہ رہے ہیں کہ آپ واک آؤٹ این آر او لینے کے لیے کررہے ہیں؟اس پر شہبازشریف نے جواب دیا کہ عمران خان کا یہ الزام اتنا بے بنیاد ہے کہ اس کا جواب دینا بھی مناسب نہیں۔انہوںنے مزیدکہا کہ اپوزیشن کے ساتھ جن امور پر مشاورت ہوگی اس سے میڈیا کو آگاہ کریں گے۔اس موقع پر پیپلز پارٹی کے سینئر رہنما خورشید شاہ نے کہا کہ عمران خان اہم پوزیشن پر ہیں کوئی بھی بات کرتے ہوئے خیال کرنا چاہیے۔انہوں نے کہا کہ عمران خان خوش قسمتی سے پاکستان کے وزیراعظم بن چکے ہیں ،ہم ماننے کیلئے بھی تیار ہیں کہ عمران خان وزیراعظم ہیں، کم از کم عمران خان کویہ علم ہوناچاہیےسیاستدان بائیکاٹ کرتےہیں تو کیوں کرتے ہیں۔انہوں نے مزید کہا کہ ایک تو بات یہ کہ حکومت نے جو ماحول پیدا کیا ہوا ہے ایک وہ وجہ ہے،ہم پارلیمنٹ آتے ہیں بائیکاٹ کرتے ہیں،آپ سے پوچھتا ہوں آپ کیوں نہیں پارلیمنٹ آتے،آپ تو پارلیمنٹ کا احترام نہیں کرتے ہم تو پارلیمنٹ پھر بھی آتے ہیں،عمران خان آپ کو ہر ہفتے پارلیمنٹ آنا تھا سوالات کے جوابات دینے تھے۔سابق قائد حزب اختلاف نے کہا کہ کم از کم ایسی بات تو نہ کریں ،جس میں جگ ہنسائی ہو ،ہم این آر او مانگنے والے نہیں ہیں ،عمران خان نے پتہ نہیں این آر او کا لفظ کہاں سے سیکھ لیا ،کس نے کوئی این آر او نہیں مانگا۔انہوں نے کہا کہ تمام سیاستدان پارلیمنٹ میں آئیں گے، بیٹھیں گے، بات کریں گے،جو اس ملک کی سیاست ہے سب اسی حساب سے چلیں گے۔

اسلام آباد(نیٹ نیوز/ایمرا نیوز) ڈائریکٹر جنرل آف پرائیویٹ اسکولز ڈاکٹر منسوب حسین صدیقی نے سپریم کورٹ آف پاکستان کے احکامات کے تحت تمام پرائیویٹ اسکول انتظامیہ کو جون جولائی کی فیس نہ لینے کے احکامات جاری کردیئے ۔ڈائریکٹر جنرل آف پرائیویٹ اسکولز نکی جانب سے جاری کردہ نوٹیفیکیشن میں پرائیویٹ اسکولز کو پچھلے جون جولائی کی فیسیں ایڈجسٹمنٹ کرنے کے بھی احکامات جاری کئے گئے ہیں۔نوٹیفکیشن میں یہ بھی کہا گیا ہے کہ اگر کوئی پرائیویٹ اسکول انتظامیہ ان احکامات کو نظر انداز کرتے ہوئے زبردستی جون جولائی کی فیسیں لیں گی تو ان کا اسکول رجسٹریشن منسوخ کردیا جائے گا۔