Tag prices

کراچی:(ایمرا نیوزآن لائن) مقامی ادویہ ساز کمپنیوں نے حکومت کی جانب سے395 دواؤں کی قیمتوں میں کمی کو تسلیم کرتے ہوئے فوری طورپر موثر بہ عمل کرنے کا اعلان کردیا۔پاکستان فارماسیوٹیکل مینوفیکچررز ایسوسی ایشن کے صدر زاہد سعید نے قیصر وحید اوردیگر کے ہمراہ پریس کانفرنس سے خطاب کے دوران دواؤں کی قیمتوں میں کمی کو تسلیم کرتے ہوئے اعلان کیا، انھوں نے کہا کہ 464ضروری دوائیں بغیرکسی منافع کے پیداواری لاگت پر فروخت کی جائیں گی۔

زاہد سعید نے کہا کہ گزشتہ ڈیرھ سال میں ڈالر کی قدر104سے بڑھ کر143روپے اورشرح سودمیں6 فیصداضافے سے فارماانڈسٹری کی پیداواری لاگت 35 سے40فیصد بڑھ گئی ہے، دواؤں کی قیمتوں میں 200 فیصد اضافے کا تاثر غلط ہے کیونکہ جن چند دواؤں کی قیمتوں میں200فیصد اضافہ کیاگیا ہے وہ درآمدہ ہیں اور پاکستان میں نہیں بنتیں،45ہزار دواؤں کی قیمتوں میں صرف15فیصد جبکہ صرف 105دواؤں میں50فیصد کا اضافہ کیا گیا، انہوں نے کہا کہ حکومت جنوری2018 والی معیشت لوٹادے توفارماانڈسٹری قیمتوں میں اضافے کے مطالبے سے دستبردارہوجائیگی۔

انھوں نے بتایا کہ فارما انڈسٹری نے وزیرصحت کے دباؤ پرناقابل پیداوار464ادویہ کی قیمتوں میں رضاکارانہ طورپر کمی کی ہے، ادویہ کے نئے اسٹاک کی فراہمی آئندہ15یوم میں مکمل کرلیاجائے گا۔

کراچی(ایمرا نیوزآن لائن) کراچی میں دودھ کی قیمت میں اچانک 23 روپے فی لیٹر کا اضافہ کردیا گیا ہے۔ڈیری فارمرز نے مڈل مین کو فی لیٹر دودھ 108 روپے میں بیچنا شروع کردیا جس کا براہ راست اثر عوام پر مہنگائی کی صورت میں پڑے گا۔ڈیری فارمر ایسوسی ایشن کے رہنما شاکر عمر کا کہنا ہے کہ کمشنر کراچی سے دودھ کی قیمت سے متعلق بات چیت نتیجہ خیز ثابت نہیں ہوئی جس کے بعد مڈل مین کو فی کلو دودھ 108 روپے میں بیچنے کا فیصلہ کیا ہے۔ڈیری فارمر ایسوسی ایشن کے رہنما نے کہا کہ مڈل مینز کو 85 روپے لیٹر میں دودھ فروخت کررہے تھے تاہم اب دودھ کی قیمت میں اضافے کے فیصلے پر عمل درآمد شروع کردیا گیا ہے۔شاکر عمر کا کہنا تھا کہ ٹرانسپورٹ، چارے اور دیگر اخراجات میں اضافے کے بعد دودھ کی قیمت میں اضافہ کیا، مڈل مین اور دکان دار فیصلہ کریں کہ دودھ کے نرخ کب بڑھائیں گے۔

دالوں اورچاول کی قیمتوں میں اضافہ 2 ارب کے رمضان پیکج پربھی اثراندازہوگا
اسلام آباد(ایمرا نیوز آن لائن) یوٹیلیٹی اسٹورزپردالوں اورچاول کی قیمتوں میں ہوشربا اضافہ کردیا گیا۔ مےڈےا رپورٹس کے مطابق یوٹیلیٹی اسٹورزپردالوں اورچاول کے نرخ میں 10 روپے سے 50 روپے فی کلو تک اضافہ کیا گیا ہے۔ دالوں اورچاول کی قیمتوں میں اضافہ 2 ارب کے رمضان پیکج پربھی اثراندازہوگا۔اضافے کے بعد سپرکرنل باسمتی چاول کے نرخ میں 28 روپے فی کلو، سیلا چاول کے نرخ میں 50 روپے فی کلو تک ، دال ماش کے نرخ میں 25 روپے فی کلو تک ، باسمتی چاول کے نرخ میں 11 روپےفی کلو تک، دال چنا کی قیمت میں فی کلو10 روپے تک جب کہ دال مسور کی قیمت میں 10 روپے تک اضافہ کردیا گیا ہے۔دال ماش دہلی 115 روپے سے بڑھ کر 145 روپے فی کلو، دال مسور 90 روپے فی کلو سے بڑھ کر100 روپے فی کلو، دال چنا 120 روپے فی کلو سے بڑھ کر130 روپے، دال چنا فی کلو 115 روپے سے بڑھ کر125 روپے فی کلو، سیلا چاول 138 روپے سے بڑھ کر188 روپے فی کلو، سپرکرنل باسمتی چاول کی قیمت 128 سے بڑھ کر156 روپے جب کہ باسمتی چاول کی قیمت فی کلو116 روپے سے بڑھ کر127 روپے ہوگئی۔

عوام کو ریلیف پہنچانا ذمہ داری ہے ‘بذاتِ خود جائزہ لے رہا ہوں‘مریضوں کو پریشانی کا سامنا ہے،ذمہ داران کو نہیں چھوڑوں گا
وفاقی وزیر صحت عامر محمود کیانی
اسلام آباد(ایمرا نیوز آن لائن) وفاقی وزیر برائے قومی ادارہ صحت (این ایچ ایس) عامر محمود کیانی نے ادویات کی قیمتوں میں اضافے پر ادویات بنانے والی کمپنیوں کےخلاف ملک بھر میں کریک ڈاؤن کا حکم دے دیا ہے ۔نجی ٹی وی سے گفتگو کرتے ہوئے وفاقی وزیر صحت عامر محمود کیانی نے کہا کہ حالانکہ ڈرگ ریگولیٹری اتھارٹی پاکستان(ڈریپ) اس معاملے کو دیکھ رہی ہے لیکن بحیثیت حکومتی نمائندے کہ عوام کو ریلیف پہنچانا میری ذمہ داری ہے اور میں ان کو جوابدہ ہوں۔انہوں نے کہا کہ میں بذاتِ خود اس معاملے کا جائزہ لے ہوں اور ادویات کی قیمتوں میں غیر قانونی اور بلاجواز اضافہ برداشت نہیں کیا جائے گا۔عامر کیانی کا کہنا تھا کہ کچھ کمپنیوں کو ادویات کی قیمتوں میں اضافے کی اجازت دی گئی تھی لیکن دیکھا گیا کہ کچھ دوسری کمپنیوں نے خود سے قیمتوں میں اضافہ کیا‘۔’میں انہیں نہیں چھوڑوں گا کیوں کہ اس کی وجہ سے مریضوں کو پریشانی کا سامنا ہے، اس کے علاوہ ہم نے ایک آنلائن سہولت بھی متعارف کروانے کا فیصلہ کیا ہے جس کے ذریعے عوام قیمتوں کی تصدیق کرسکیں گے۔واضح رہے کہ ادویات کی قیمتوں میں اضافے سے حکومت کو سخت تنقید کا سامنا کرنا پڑ رہا ہے۔

مہنگائی سے عوام کی قوت خرید جواب دے چکی ‘حکومت ٹیکسز میں کمی کرے‘ اشرف بھٹی
لاہور(ایمرا نیوز آن لائن) آل پاکستان انجمن تاجران کے صدر اشرف بھٹی نے پیٹرولیم مصنوعات کی قیمتوں میں اضافے پر شدید رد عمل کا اظہار کرتے ہوئے کہا ہے کہ حکومت عوام پر بوجھ ڈالنے کی بجائے پیٹرولیم پر وصول کئے جانے والے ٹیکسز میں کمی کر کے اپنا منافع کم کرے ، حالیہ اضافے سے مہنگائی کا طوفان آئے گا ،جس سے غریب کی مشکلات مزید بڑھیں گی۔ سوموار کو ایک بیان میں انہوں نے کہا کہ حالیہ مہینوں میں مہنگائی بڑھنے اور آمدنی میں کمی کے باعث عوام کی قوت خرید ختم ہو چکی ہے جس سے کاروبار اور معیشت پر بھی منفی اثرات مرتب ہوئے ہیں۔ انہوں نے کہا کہ حکومت مہنگائی کے بوجھ تلے دبے ہوئے عوام پر مزید بوجھ ڈال رہی ہے جبکہ اپنا منافع کم کرنے کیلئے تیار نہیں۔

گیس کی قیمتوں میں پھر 145فیصد تک اضافے کا مطالبہ
سوئی ناردرن گیس پائپ لائن لمیٹیڈ اور سوئی سدرن گیس کمپنی لمیٹیڈ نے گیس کی قیمتوں میں اضافے کے لیے درخواست دائر کر دی ، اضافہ کی صورت میں گیس کی موجودہ فی ایم ایم بی ٹی یو قیمت 501.17 سے بڑھ کر ایک ہزار 229 روپے تک پہنچ جائے گی
اسلام آباد(ایمرا نیوز آن لائن) آئندہ مالی سال کے لیے گیس یوٹلٹیز کی آمدن کی ضروریات کو پورا کرنے کے لیے یکم جولائی 2019 سے گیس کی قیمتوں میں 145فیصد تک اضافے کا مطالبہ کیا ہے۔ رپورٹ کے مطابق سوئی ناردرن گیس پائپ لائن لمیٹیڈ اور سوئی سدرن گیس کمپنی لمیٹیڈ نے گیس کی قیمتوں میں اضافے کے لیے درخواست دائر کی ہے اور یہ اقدام ایک ایسے موقع پر کیا گیا ہے جب اکتوبر 2018 میں گیس کی قیمتوں میں 35 فیصد اضافے کے سبب تحریک انصاف کی حکومت کو شدید سیاسی دباؤ کا سامنا ہے۔اس تمام تر عمل کے دوران اب تک دو کمپنیوں کے 4 منیجنگ ڈائریکٹرز کو ہٹایا جا چکا ہے۔آئل اینڈ گیس ریگولیٹری اتھارٹی(اوگرا) نے اعلان کیا ہے کہ پنجاب اور خیبر پختونخوا میں خدمات انجام دینے والی سوئی ناردرن گیس پائپ لائنز لمیٹیڈ نے مالی سال 20-2019 کے لیے یکم جولائی سے 144 فیصد اضافے کی تجویز پیش کرتے ہوئے 723روپے اضافے کے ساتھ قیمت ایک ہزار 224 روپے فی ایم ایم بی ٹی یو کرنے کی تجویز دی ہے۔ریگولیٹر کا کہنا ہے کہ سوئی ناردرن گیس کمپنی نے 19مارچ کو نظرثانی شدہ درخواست دائر کی جس میں اپنے قدرتی گیس کے کاروبار میں 722.51روہے فی ایم ایم بی ٹی یو اضافے کی درخواست کی گئی جو یکم جولائی 2019 سے نافذ العمل ہو گی۔اگر یہ اضافہ کیا جاتا ہے تو گیس کی موجودہ فی ایم ایم بی ٹی یو قیمت 501.17 سے بڑھ کر ایک ہزار 229 روپے تک پہنچ جائے گی۔اس کے ساتھ ساتھ کمپنی نے آر ایل این جی کی ڈومیسٹک صارفین کو منتقلی کی مد میں فی ایم ایم بی ٹی یو 111.32روپے اور ایل پی جی کے کاروبار کے لیے 6ہزار 84روپے فی ایم ایم بی ٹی یو اضافے کا مطالبہ کیا ہے۔دلچسپ امر یہ ہے کہ سوئی ناردرن گیس پائپ لائن لمیٹیڈ نے موجودہ قیمت 5.1 روپے فی یونٹ میں 14 فیصد یا 66روپے اضافہ کردیا ہے جس سے قیمت 566.97روپے فی یونٹ تک پہنچ گئی ہے جہاں وہ موجودہ مالی سال سمیت دو سال کی ا?مدنی کی ضروریات میں کمی کو پورا کرنے کی کوشش کررہی ہے۔دوسری جانب سوئی سدرن گیس کمپنی لمیٹیڈ نے موجودہ قیمت 591.67 فی یونٹ میں 106.54روپے اضافے کا مطالبہ کیا ہے جس سے فی یونٹ قیمت 698.21 ہو جائے گی۔متعدد پیٹرولیم پالیسیوں کے سبب گیس کی مقامی قیمتیں تیل کی عالمی قیمتیوں سے منسلک ہیں۔وزیر اعظم عمران خان یہ بات کہہ چکے ہیں کہ کمپنیوں کو گیس چوری اور بدانتظامی کی وجہ سے 50ارب ڈالر کے خسارے کا نقصان کا سامنا کرنا پڑ رہا ہے۔گیس کی قیمتیں سال میں دو مرتبہ تبدیل کی جاتی ہیں، پہلی مرتبہ یکم جولائی اور پھر جنوری میں ہوتی ہیں، ملک میں انتخابات اور سیاسی تبدیلی کے سبب قیمتیں یکم جولائی کی جگہ 27ستمبر 2018 کو تبدیل کی گئی تھیں، اس موقع پر 35فیصد اضافہ کیا گیا تھا تاکہ اضافی 116ارب روپے کی آمدنی حاصل کی جا سکے جبکہ ڈومیسٹک صارفین کو 143فیصد تک قیمتوں میں اضافے کا سامنا کرنا پڑا تھا۔

کراچی(ایمرا نیوز) بین الاقوامی گولڈ مارکیٹ میں سونے کی فی اونس قیمت میں 11 ڈالر کا اضافہ ہوا جس کے نتیجے میں مقامی صرافہ مارکیٹوں میں فی تولہ سونے کی قیمت 350 روپے مزید مہنگا ہوگیا. آل کراچی صرافہ اینڈ جیولرز ایسوسی ایشن کے مطابق جمعرات کو عالمی مارکیٹ میں سونے کی قیمت 11 ڈالر کے اضافے سے بڑھ کر 1315 ڈالر فی اونس ہوگئی، جس کے زیر اثر ملک بھر میں فی تولہ قیمت 350 روپے کے اضافے سے 69900 روپے جبکہ 10 گرام سونے کی قیمت 300 روپے اضافے سے 59928 روپے ہوگئی البتہ چاندی کی فی تولہ 870 روپے اور 10 گرام چاندی کی قیمت 745.88 روپے مستحکم رہی.