Tag punjab

لاہور(وقت نیوز آن لائن)پاکستان میں چین سے پھیلنے والے پُراسرار کورونا وائرس کے خطرے کے پیش نظر پنجاب میں کام کرنے والے چینی انجینئرز اور اہلکاروں کی سکریننگ شروع کردی گئی۔سیکریٹری صحت پنجاب محمد عثمان نے بتایا کہ پنجاب کے مختلف شہروں میں 20 کیمپس تیار کیے گئے ہیں جہاں چین سے آئے انجینئرز اور اہلکاروں کی سکریننگ شروع کر دی گئی ہے۔

سیکریٹری صحت نے کہاکہ اب تک 600 سے زائد چینی اہلکاروں کی سکریننگ مکمل کر لی گئی ہے جن میں 12 چینی ایسے ہیں جنہوں نے 2 ہفتوں میں چین سے پاکستان کا سفر کیا۔محمد عثمان کا کہنا تھا کہ تمام چینی اہلکاروں کی سفری معلومات کے حساب سے سکریننگ جاری رکھیں گے ساتھ ہی چینی اہلکاروں کی سکیورٹی پر مامور پولیس اور سکیورٹی اہلکاروں کی بھی سکریننگ کا عمل جاری ہے۔

پنجاب میں کورونا وائرس کے 2 مشتبہ مریض
سیکریٹری ہیلتھ پنجاب محمد عثمان نے مزید بتایا کہ پنجاب میں کورونا وائرس کے 2 مشتبہ مریض سامنے آئے ہیں ان میں سے ایک ملتان کے اسپتال میں زیر علاج ہے۔

کورونا وائرس سے بچاؤ کا سامان پاکستان کے حوالے
ادھر عالمی ادارہ صحت نے کورونا وائرس سے بچاؤ کا طبی سامان پاکستان کے حوالے کردیا ہے۔

تفصیلات کے مطابق عالمی ادارہ صحت نے کورونا وائرس سے بچاؤ کے لیے پرسنل پروٹیکٹیو ایکوپمنٹ جناح اسپتال کراچی ، ڈاؤ یونیورسٹی آف ہیلتھ سائنسز اوجھا کیمپس، ائیر پورٹ اور سی پورٹ کے حوالے کر دیئے ہیں۔

ماہر متعدی امراض کا کہنا ہے کہ کورونا سے اموات کی شرح صرف 3 فیصد ہے لہٰذا عوام خوفزدہ نہ ہوں۔

واضح رہے کہ چین سے پھیلتے ہوئے پُراسرار کورونا وائرس کے کیسز سنگاپور، ویت نام، جاپان، جنوبی کوریا اور امریکا سمیت 16 ممالک میں رپورٹ ہو چکے ہیں۔

کورونا وائرس کی علامات
کورونا وائرس کی علامات میں کھانسی، چھینک آنا اور سانس کی کمی شامل ہے جب کہ کچھ مریضوں کو سر درد اور معدے کے مسائل کا بھی سامنا کرنا پڑ سکتا ہے۔

ڈاکٹر مائیکل کری نے کہا کہ حفظانِ صحت کی مشق کرنے علاوہ اپنے نظامِ قوت مدافعت کو مضبوط رکھنے کے لیے صحت مند غذاؤں کا استعمال کرنا بھی ضروری ہے۔

انہوں نے مزید کہا کہ کورونا وائرس پر قابو پانے کے لیے کوئی ویکسین تیار نہیں کی گئی ہے اور نا ہی ہمارے پاس اس وائرس پر قابو پانے کے لیے کوئی دوائیاں ہیں۔

ڈاکٹر نے لوگوں کو ہدایت جاری کی ہیں کہ (این نائن فائیو) ماسک کا استعمال کریں جو عام طور پر پاکستان میں اسموگ کے موسم میں استعمال کیا جاتا ہے، اس ماسک کی مدد سے وائرس کے خطرات کو کم کیا جا سکتا ہے۔

لاہور(حافظ عمر سعید)صوبے میں جیلوں میں نشے کے عادی قیدیوں کی بلڈ سکریننگ، نادرا سے انکی بائیو میٹرک تصدیق کے علاوہ انکے علاج اور بحالی کے سلسلے میں اقدامات کے ساتھ ساتھ تمام تعلیمی اداروں میں طلبا و طالبات کی ہیلتھ پروفائلنگ کے جائزے کیلئے چیف سیکرٹری پنجاب میجر (ر)اعظم سلیمان خان کی زیر صدارت اہم اجلاس‌۔

چیف سیکرٹری پنجاب میجر (ر)اعظم سلیمان خان کی زیر صدارت اجلاس میں لاہور ہائیکورٹ اور پنجاب حکومت کے احکامات کی روشنی میں صوبے میں جیلوں میں قید افرادکی بلڈ سکریننگ، نادرا سے انکی بائیو میٹرک تصدیق کے علاوہ نشے کے عادی قیدیوں کے علاج وبحالی کا فیصلہ کیا گیا ہے۔اجلاس میں ایڈیشنل چیف سیکرٹری داخلہ، سپیشلائزڈ ہیلتھ کیئر اینڈ میڈیکل ایجوکیشن، پرائمری اینڈ سیکنڈری ہیلتھ کیئر، سکولز ایجوکیشن، ہائر ایجوکیشن، سوشل ویلفیئر کے محکموں کے ایڈ منسٹریٹو، سیکرٹریز، آئی جی جیل خانہ جات، ایڈیشنل آئی جی آپریشنز اور متعلقہ افسران نے شرکت کی۔

اجلاس میں صوبے میں تعلیمی اداروں اور جیلوں میں منشیات کی روک تھام کے سلسلے میں کئے جانیوالے اقدامات کا تفصیلی جائزہ لیا گیا۔چیف سیکرٹری پنجاب نے کہا کہ منشیات کی روک تھام کے ساتھ ساتھ نشے کے عادی افراد کی بحالی کیلئے بھی اقدامات کئے جائیں اور اس سلسلے میں سرکاری سطح پر بحالی مراکز قائم کئے جائیں۔ اجلاس میں تقریبا 25کروڑ روپے کی لاگت سے کالا شاہ کاکو کے قریب بحالی مرکز کے قیام کے پائلٹ پراجیکٹ سے متعلق تجویزپر تفصیلی غور کیا گیا۔

لاہور(عمر سعید)وزیرِ اطلاعات پنجاب فیاض الحسن چوہان نے کہا ہے کہ آٹے کا بحران پنجاب میں نہیں، سندھ میں ہے۔ سندھ حکومت کی انتظامی نا اہلی کے سبب پاسکو کی جانب سے ریلیز کی جانے والی چار لاکھ ٹن گندم میں سے صرف ایک لاکھ ٹن گندم اٹھائی جا سکی جسکی سزا سندھ کی عوام کو آٹے کی قلت کی صورت میں ملی۔

ان خیالات کا اظہار صوبائی وزیر براۓ اطلاعات فیاض الحسن چوہان نے وزیرِ صنعت و تجارت میاں اسلم اقبال اور وزیرِ خوراک سمیع اللہ چوہدری کے ہمراہ آٹا بحران پر ایک پریس کانفرنس کے دوران کیا۔ اس موقع پر وزیرِ اطلاعات نے کہا کہ بلاول بھٹو اور شہباز شریف نے غلط اعدادوشمار پر مبنی پراپیگنڈہ مہم چلا کر سیاسی پوائنٹ سکورنگ کرنا چاہی لیکن وزیرِ اعلٰی پنجاب سردار عثمان بزدار کی بروقت اور موثر حکمتِ عملی کی بدولت عوام دشواری سے بچ گئے۔

انہوں نے مزید کہا کہ رسوائی اور جگ ہنسائی انہی مخالفین کے حصے میں آئی جو نااہلی نااہلی کا وِرد کرتے کرتے خود نااہل ثابت ہو گئے۔ فیاض الحسن چوہان نے مزید کہا کہ سندھ حکومت کے ہوش ٹھکانے آ گئے ہیں اور اب وہ باقی ماندہ تین لاکھ گندم اٹھانے جا رہے ہیں۔ فیاض الحسن چوہان نے سندھ حکومت پر تنقید کرتے ہوئے کہا کہ سندھ حکومت کی اعلیٰ قیادت بالخصوص سعید غنی اور مراد علی شاہ اپنے گریبان میں جھانکیں، دنیا انہیں خردبردگان کے نام سے یاد کر رہی ہے۔

لاہور(میڈیا آن لائن)سابق وزیر اعلی پنجاب شہباز شریف کو احتساب عدالت لاہور سے ریلیف مل گیا، عدالت نے شہباز شریف کی عدالت میں مستقل حاضری کی درخواست منظور کرتے ہوئے ان کو تاحکم ثانی حاضری سے استثنی دے دیا۔ تفصیلات کے مطابق احتساب عدالت نے شہباز شریف کی حاضری سے استثنی کی درخواست پر فیصلہ سنا دیا، شہباز شریف کو تاحکم ثانی ذاتی حیثیت میں پیشی سے استثنی مل گیا،
سابق وزیر اعلی پنجاب کی جانب سے طبی اور نجی وجوہات پر حاضری سے استثنی کی استدعا کی گئی تھی ۔عدالت کے روبرو شہباز شریف کے وکیل نے دلائل دیے کہ شہباز شریف کا لندن میں ہونے کا بنیادی مقصد صرف اور صرف بھائی کا علاج ہے، شہباز شریف خود بھی متعدد بیماریوں میں مبتلا ہیں، عدالت کا ہر حکم ماننے کو تیار ہیں،
شہباز شریف کی عدم موجودگی میں ان کے وکیل پیش ہونگے تاکہ عدالتی کارروائی پر فرق نہ پڑے، لہذا شہباز شریف کو حاضری سے مستقل استثنی دیا جائے ۔شہبازشریف کے حاضری سے استثنی پر نیب پراسیکیوٹر وارث علی جنجوعہ نے مخالفت کرتے ہوئے دلائل دیے کہ یہ کوئی ٹھوس دلائل نہیں جسکی بنیاد پر حاضری سے استثنی دیا جائے، وارث علی جنجوعہ نے اعتراض کیا کہ کیا بیرون ملک اور کوئی نہیں جو نواز شریف کی دیکھ بھال کر سکے ، شہباز شریف ملزم ہیں انھیں عدالتی کارروائی میں شریک ہونا چاہئے، وارث علی جنجوعہ نے استدعا کی کہ عدالت شہباز شریف کی حاضری معافی کی درخواست مسترد کرے، عدالت نے فیصلہ سناتے ہوئے شہباز شریف کو تاحکم ثانی حاضری سے استثنی دے دینے کا حکم دے دیا۔

کراچی(ایمرا نیوز آن لائن)کراچی کے سرد موسم میں بچوں کےگرم کپڑوں کی فرمائش پر غریب باپ نے تنگ آکر خودکشی کر لی۔گزشتہ روز کورنگی ابراہیم حیدری کے رہائشی میر حسن نے خود کو آگ لگائی تھی، 35 سالہ میر حسن کو زخمی حالت میں سول اسپتال برنس وارڈ منتقل کیا گیا تھا۔

سندھ: 5 سال میں 1300 افراد کی خودکشی، کس شہر میں سب سے زیادہ اموات ہوئیں؟ سول اسپتال کی انتظامیہ کا کہنا ہے کہ میر حسن زخموں کی تاب نہ لاتے ہوئے دم توڑ گیا ہے۔ اہلخانہ کا کہنا ہے کہ میر حسن 3 ماہ سے بے روزگار تھا اور مہنگائی سے تنگ تھا، میر حسن نے وزیراعظم عمران خان کو خط لکھ کر روزگار فراہم کرنے کی اپیل بھی کی تھی۔

اہل علاقہ کا بتانا ہے کہ متوفی کا ذریعہ معاش گدھا گاڑی چلانا تھا، متوفی نے پسماندگان میں 3 بیٹے اور دو بیٹیاں چھوڑی ہیں۔

لاہور(ایمرا نیوزآن لائن) پنجاب کے سرکاری اسپتالوں میں ینگ ڈاکٹرز اور پیرامیڈکس کی ہڑتال مسلسل دسویں روز بھی جاری ہے، اسپتالوں کی او پی ڈیز بند ہونے سے مریضوں کو پریشانی کا سامنا ہے۔فیصل آباد کے الائیڈ اور سول سمیت ٹیچنگ اسپتالوں کے آؤٹ ڈور وارڈز میں ینگ ڈاکٹرز اور پیرامیڈکس اسٹاف کی ہڑتال 10 ویں روز میں داخل ہو چکی ہے۔ڈاکٹرز نے میڈیکل ٹیچنگ انسٹیٹیوشن ایکٹ کے خلاف ہڑتال کر رکھی ہے۔

ڈاکٹرز کا کہنا ہے کہ ’ایم ٹی آئی‘ ایکٹ واپس نہ لیا گیا تواگلے مرحلے میں اِن ڈور اور پھر ایمرجنسی میں بھی ہڑتال کردی جائے گی۔ادھر پنجاب میں ملتان، سرگودھا، گجرات سمیت مختلف شہروں میں بھی میڈیکل ٹیچنگ انسٹی ٹیوشن ایکٹ کے خلا ف ینگ ڈاکٹرز ایسویشن ایشن کی ہڑتال جاری ہے۔ہڑتال کے باعث علاج سے محروم مریض اور ان کے لواحقین کو شدید پریشانی کا سامنا ہے۔

لاہور: (ایمرا نیوزآن لائن) سرکاری ہسپتالوں کی ممکنہ نجکاری کے خلاف لاہور سمیت پنجاب کے مختلف شہروں میں ینگ ڈاکٹرز کی ہڑتال دوسرے روز میں داخل ہو گئی۔ محکمہ صحت اور ینگ ڈاکٹرز کے درمیان مذاکرات میں ڈیڈ لاک برقرار ہے۔لاہور کے ٹیچنگ ہسپتالوں میں مسیحا اور پیرا میڈیکل سٹاف ڈٹے ہوئے ہیں، آؤٹ ڈور میں جزوی ہڑتال ہے، مریضوں کا کوئی پرسان حال نہیں، شیخ زید ہسپتال میں ینگ ڈاکٹرز نے ممکنہ نجکاری کے خلاف احتجاج کیا۔

فیصل آباد کے ڈاکٹرز بھی پیچھے نہ رہے، سول اور الائیڈ ہسپتال میں مریضوں کے لئے آؤٹ ڈورزبند کر دیئے۔ نرسز اور پیرا میڈیکل سٹاف بھی احتجاج میں شریک ہیں، دو روز سے جاری ہڑتال سے مریض پریشان نظر آئے۔ پریشان حال شہریوں نے حکومت سے مطالبہ کیا ہے ہسپتالوں میں علاج معالجے کی سہولتیں یقینی بنائی جائیں۔

لاہور:(ایمرا نیوزآن لائن) پنجاب میں نمبر پلیٹوں اور سمارٹ کارڈ کا بحران شدید ہو گیا، وزیر اعلیٰ پنجاب عثمان بزدار نے پراجیکٹ کا چار ماہ قبل افتتاح کیا تھا۔ محکمہ ایکسائز نے نمبر پلیٹوں کا ٹھیکہ ان بکس نامی کمپنی کو دیا تھا۔ محکمانہ غفلت کے باعث کوئی حکمت عملی نہ بنائی جاسکی جس کے باعث ایکسائز ڈی جی آفس میں نمبر پلیٹیں تیار ہونا بند ہو گئیں۔رپورٹ کے مطابق نمبر پلیٹوں کی عدم فراہمی سے شہریوں کو خواری کا سامنا ہے اور ایکسائز دفاتر میں شہریوں اور ایکسائز عملے کی تکرار معمول بن گئی ہے۔ ذرائع کے مطابق لاہور میں 80ہزار سے زائد سمارٹ کارڈ شہریوں کو جاری نہیں کیے گئے۔ گاڑیوں اور موٹر سائیکلوں کی نمبر پلیٹیں پنجاب بھر میں لاکھوں کی تعداد میں شہریوں کو نہ دی گئیں۔لاہور میں موٹر سائیکلز کی 30ہزار نمبر پلیٹوں سے شہری محروم ہیں۔ محکمہ ایکسائز کی جانب سے شہریوں سے پنجاب بھر میں سمارٹ کارڈ اور نمبر پلیٹوں کی مد میں کروڑوں روپے وصول کیے گئے۔ صوبائی وزیر ایکسائز پنجاب حافظ ممتاز احمد نے افسروں کو نمبر پلیٹوں اور سمارٹ کارڈ کی عدم فراہمی پر شوکاز نوٹس بھی جاری کیے ہیں۔ڈائریکٹر ایکسائز ریجن سی عمران اسلم کا کہنا تھا کہ نمبر پلیٹیں اور سمارٹ کارڈ ڈی جی آفس سے جاری ہونا تھے، تاخیر کے ذمہ دار فیلڈ افسر نہیں ہیں، ذرائع کے مطابق اسی صورت حال پر نئے تعینات سیکرٹری ایکسائز پنجاب نبیل اعوان نے کل ہنگامی اجلاس بھی طلب کرلیا ہے۔دوسری جانب محکمہ اینٹی کرپشن نے نمبر پلیٹوں کے ٹھیکوں میں اربوں روپے کی مبینہ کرپشن کیس کی تحقیقات میں تیزی لانے کا فیصلہ کیا ہے۔ محکمہ اینٹی کرپشن نے نمبر پلیٹوں سے متعلق انکوائری اسسٹنٹ ڈائریکٹر میاں خالد سے واپس لیکر ڈپٹی ڈائریکٹر اینٹی کرپشن شاہ رخ نیازی کو دینے کا فیصلہ کیا ہے۔ نمبر پلیٹوں میں گھپلوں پر اعلٰی افسروں کیخلاف گھیرا تنگ کیا جائے گا۔