Tag sarfraz ahemd

(ایمرا نیوزآن لائن)

قومی ٹیسٹ ٹیم کے کپتان اظہر علی نے آسٹریلیا میں پاکستان کی مایوس کن کارکردگی کا اعتراف کرتے ہوئے کہا ہے کہ شکست کی کوئی معافی نہیں ہے۔

لاہور میں پریس کانفرنس کرتے ہوئے اظہر علی نے کہا کہ ہم نے اچھی تیاری کی تھی لیکن بدقسمتی سے نتیجہ نہیں دے سکے۔

انہوں نے کہا کہ ٹیم میں نوجوان کھلاڑی شامل تھے، پہلے ٹیسٹ میں بیٹنگ کی لیکن فائدہ نہ اٹھا سکے، آسٹریلیا میں بولرز وکٹ نہیں لے سکے جس کا نقصان ہوا لیکن ہم نے اس ٹور سے کچھ مثبت چیزیں بھی سیکھیں۔

اظہر علی نے کہا کہ بابر اعظم نے بہت اچھے کھیل کا مظاہرہ کیا، نوجوان کھلاڑی اچھے ہیں اور پاکستان کا مستقبل بہت اچھا ہے۔

اپنی کارکردگی کے حوالے سے بات کرتے ہوئے اظہر علی نے کہا مجھے خود بھی احساس ہے کہ میں رنز نہیں کر رہا، بولرز جب کام نہیں کرتے تو آل راؤنڈرز یا پارٹ ٹائم بولر سے کام چلانا پڑتا ہے۔

نوجوان فاسٹ بولر نسیم شاہ کے حوالے سے قومی ٹیم کے کپتان کا کہنا تھا نسیم شاہ نے بہت متاثر کیا جب کہ شاہین آفریدی پہلے سے بہتر بولر بن کر سامنے آئے۔

سری لنکا کے خلاف ٹیسٹ سیریز کے حوالے سے پوچھے گئے سوال پر اظہر علی نے کہا کہ آسٹریلیا کے خلاف سیریز میں کافی ایسی چیزیں سامنے آئیں جو ہمیں آنے والی سیریز میں دہرانی ہیں۔

اظہر علی نے کہا کہ پاکستان میں 10 سال بعد ٹیسٹ کرکٹ واپس آ رہی ہے اور سب ہی کھیلنا چاہتے ہیں، سری لنکا کے خلاف سیریز کا سب کو انتظار ہے۔

خیال رہے کہ سری لنکا کی ٹیم دو ٹیسٹ میچوں کی سیریز کے لیے رواں ماہ پاکستان کا دورہ کرے گی۔

(ایمرا نیوزآن لائن) قومی کرکٹ ٹیم کے ہیڈ کوچ اور چیف سلیکٹر مصباح الحق کا کہنا ہے کہ آسٹریلیا میں کھیلنا ایک چیلنج ہے ، تمام شعبوں نے اگر صورتحال کے مطابق کارکردگی دکھائی تو ہم اچھے نتائج دے سکتے ہیں۔

قومی ٹی ٹوئنٹی ٹیم 3 میچوں کی سیریز کیلئے آسٹریلیا پہنچ چکی ہے جہاں سڈنی کرکٹ گراؤنڈ میں قومی ٹیم کے کھلاڑیوں کا پہلا تربیتی سیشن ہوا۔ پریکٹس سیشن سے قبل میڈیا سے گفتگو کرتے ہوئے ہیڈ کوچ مصباح الحق کا کہنا تھا کہ ہر ٹیم کیلئے آسٹریلیا میں کھیلنا ایک چیلنج ہوتا ہے لیکن پاکستان کی نوجوان ٹیم کیلئے یہ اور بھی بڑا چیلنج ہے۔

مصباح الحق کا کہنا تھا کہ اگر ٹیم نے تمام شعبوں میں کنڈیشنز کے مطابق اچھی کارکردگی دکھائی توہم بہتر نتائج دے سکتے ہیں۔ پاکستان کرکٹ ٹیم کے سابق اسٹار لیگ اسپنر عبدالقادر کے صاحبزادے لیگ اسپنر عثمان قادر کی قومی ٹیم میں شمولیت کے سوال پر مصباح کا کہنا تھا کہ آسٹریلیا میں کھیلنے کی وجہ سے عثمان قادر یہاں کی کنڈیشنز سے اچھی طرح واقف ہیں۔

اس سوال پر کہ’ قومی ٹیم کی غیر متوقع اور سرپرائز کارکردگی دکھانے کی عادت آسٹریلیا کیلئے باعث خوف بھی ہوسکتی ہے؟’ ان کا کہنا تھا کہ ہم اس بات کا فائدہ اٹھانے کی کوشش کریں گے لیکن ہماری کوشش ہے کہ اپنی کارکردگی میں تسلسل لایا جائے۔ نوجوان فاسٹ بولر نسیم شاہ کے حوالے سے ان کا کہنا تھا کہ وہ اچھی بولنگ کررہے ہیں اور صرف تیز بولنگ ہی ان کی خاصیت نہیں بلکہ انہوں نے لائن اور لینتھ پر بھی بہتر کنٹرول کا بھی مظاہرہ کیا ہے۔

’بابر اعظم اور اظہر علی کیلئے بہتر ہوگا کہ وہ انفرادی کارکردگی پر توجہ مرکوز رکھیں‘
جب ہیڈ کوچ و چیف سلیکٹر مصباح الحق سے پوچھا گیا کہ کیا بابر اعظم اور اظہر علی پر کپتانی کا دباؤ ہوگا اور اس دباؤ کی وجہ سے ان کی ذاتی کارکردگی متاثر ہوسکتی ہے؟ تو انہوں نے کہا کہ ’کسی بھی کپتان کیلئے ہمیشہ میرا یہی مشورہ رہا ہے کہ ٹیم کی کارکردگی تو اپنی جگہ اہم ہے لیکن کپتان کیلئے بطور کھلاڑی ٹیم میں کردار ادا کرنا سب سے زیادہ اہم ہوتا ہے‘۔

انہوں نے کہا کہ اظہر علی اور بابر اعظم اچھے بیٹسمین ہیں اور ان دونوں کیلئے سب سے اہم یہ ہے کہ وہ بطور بیٹسمین اپنی کارکردگی پر سب سے پہلے فوکس رکھیں۔ مصباح نے کہا کہ ٹیم میں ہر کھلاڑی پروفیشنل ہوتا ہے، ہر کھلاڑی کو معلوم ہوتا ہے کہ اسے کیا پرفارمنس دینی ہے، کپتان کا کام انہیں آپریٹ کرنا ہوتا ہے، وقت کے ساتھ انسان سیکھتا ہے، ابتداء میں کپتانی کا پریشر ہوتا ہے لیکن میری ذاتی رائے یہ ہے کہ جب آپ پر ذمہ داری آتی ہے تو کئی دفعہ اس سے آپ کی کارکردگی بہتر ہوتی ہے۔

مصباح نے کہا کہ بابراعظم ٹی ٹوئنٹی کا بہترین بیٹسمین ہے اور اگر وہ اپنی پرفارمنس برقرار رکھے گا تو اسے اپنی کپتانی میں بھی اس کا فائدہ ہوگا۔ واضح رہے کہ ،پاکستان ٹیم 3 میچوں کی ٹی 20 سیریز سے پہلے جمعرات کو آسٹریلیا الیون سے پریکٹس میچ بھی کھیلے گی جس کے بعد دونوں ٹیموں کے دوران 5،3 اور 8 نومبر کو تین ٹی ٹوئنٹی میچز کھیلے جائیں گے۔

آسٹریلیا سے 3 ٹی ٹوئنٹی میچوں کی سیریز کے بعد قومی ٹیم کینگروز سے اظہر علی کی قیادت میں 2 ٹیسٹ میچز بھی کھیلے گی۔

آسٹریلیا (میڈیا 92 نیوزآن لا ئن) کے خلاف ٹیسٹ اور ٹی20 ٹیم کے انتخاب کے بعد چیف سلیکٹر اور ہیڈ کوچ مصباح الحق ان دنوں شدید تنقید کی زد میں ہیں تو دوسری جانب بیک وقت دو عہدوں پر کام کرنے والے سابق ٹیسٹ کپتان کو اب 1992ء ورلڈ کپ کی فاتح ٹیم کے رکن عامر سہیل نے خاصا آڑے ہاتھوں لیا ہے۔

عامر سہیل جو ٹیسٹ کرکٹ میں پاکستان کی جانب سے ایک دن میں ڈبل سینچری اسکور کرنے والے اب تک کے پہلے اور واحد بیٹس مین ہیں، اُن کا کہنا ہے کہ جس کوچ نے سری لنکا کے خلاف ٹیم کو نہیں کھلایا، اس سے آپ آسٹریلیا میں کیا توقعات رکھ سکتے ہیں۔

ماضی میں پی سی بی کے ڈائریکٹر گیم ڈیویلپمنٹ رہنے والے عامر سہیل جو اپنے بے باک انداز اور کھرے پن کے سبب کرکٹ کے حلقوں میں اپنا ایک منفرد انداز رکھتے ہیں، کہتے ہیں مصباح الحق نے ہیڈ کوچ اور چیف سلیکٹر بنتے ہی سب سے پہلے فٹنس کا نعرہ لگا دیا، ذرا کوئی اُن سے پوچھےسری لنکا سیریز سے پہلے انہوں نے لڑکوں کو بھگا بھگا کر نڈھال کردیا تھا، کوئی اُن سے سوال کر سکتا ہے کہ انہوں نے ایسا کیوں کیا؟

عامر سہیل نے مزید کہا کہ کیا مصباح نے لڑکوں کو اولمپکس میں دوڑانا ہے، کوچنگ میں آپ کو تکنیک پر کام کرنا ہوتا ہے، جو آپ سے ہو نہیں رہا، چوں کہ مصباح الحق بھلے کوچنگ کے بارے میں جانتے ہی کیا ہیں ،1992ء سے 2000ء تک پاکستان کے لیے 47 ٹیسٹ، 156ون ڈے کھیلنے والے عامر سہیل کا موقف ہے کہ بورڈ میں کیا اچھا اور درست ہورہا ہے کہ ہم تعریف کریں۔

انہوں نے کہا کہ چیف ایگزیکٹو وسیم خان پر کیا تنقید کروں، اسے یہاں کی کرکٹ کے حوالے سے کچھ پتہ ہی نہیں ،دراصل یہاں سب کو اپنا مفاد عزیز ہے، اسی لیے بورڈ کی کوئی سمت ہی نہیں ہے، ڈائریکٹر بین الاقوامی کرکٹ ذاکر خان کی اب بورڈ میں چوہدراہٹ ہے، کیوں کہ پورا پاکستان جانتا ہے کہ ان کے پیچھے کون ہے؟ عامر سہیل کا کہنا تھا کہ چیف آپریٹنگ آفیسر سبحان احمد کی وسیم خان کے آنے کے بعد بورڈ میں جگہ نہیں بنتی، ان سب باتوں کے بعد بھلا میں کیسے ایسے بورڈ میں کام کرسکتا ہوں، جہاں میرٹ پر نا تو کام ہورہا ہےنا لوگوں کو رکھنے اور نکالنے کا کوئی پیمانہ ہے۔

قومی ٹیم کے کپتان کی ویڈیوکو سوشل میڈیا پر خوب پذیرائی حاصل ہوئی
لندن(ایمرا نیوز آن لائن )قومی ٹیم کے کپتان سرفراز احمد کی تلاوت قر آن پاک کی ویڈیو سوشل میڈیا پر وائرل ہوگئی ہے ۔ تفصیلات کے مطابق قومی کرکٹ ٹیم کے کئی کھلاڑی مذہب کی جانب رجحان کیلئے جانے جاتے ہیں اور کپتان سرفرازاحمد حافظ قرآن بھی ہیں جن کے مذہب کی جانب رحجان کے بارے میں سب جانتے ہیں اور ان کی گاہے بگاہے نعت خوانی کی ویڈیو بھی سامنے آتی رہتی ہیں۔قومی ٹیم اس وقت انگلینڈ کے خلاف سیریز اور ورلڈ کپ کے لیے انگلینڈ میں موجود ہے جہاں ایک چیریٹی تقریب میں کپتان سرفراز احمد کی تلاوت قرآن پاک کی ویڈیو بھی سامنے آئی ہے ۔سرفراز احمد کی اس ویڈیوکو سوشل میڈیا پر خوب پذیرائی حاصل ہوئی ہے۔یاد رہے کہ انگلینڈ میں 30مئی سے شروع ہونےوالے ورلڈ کپ میں حصہ لینے سے قبل قومی کرکٹ ٹیم انگلینڈ کےخلاف سیریز کھیلے گی.