Tag superem court

اسلام آباد(ایمرا نیوز آن لائن)حکومت نے جسٹس گلزار احمد کی بطور چیف جسٹس پاکستان تقرری کا نوٹیفکیشن جاری کر دیا۔جسٹس گلزار احمد کی بطور چیف جسٹس آف سپریم کورٹ تقرری کا نوٹیفکیشن وزارت قانون کی جانب سے جاری کیا گیا۔صدر مملکت ڈاکٹر عارف علوی نے جسٹس گلزار احمد کی بطور چیف جسٹس پاکستان تقرری کی منظوری دی۔

نئے چیف جسٹس آف پاکستان کی تعیناتی کی سمری وزیراعظم کو ارسال صدر پاکستان نے آئین کے آرٹیکل 175 اور 177 کے تحت اختیار استعمال کرتے ہوئے جسٹس گلزار احمد کے تقرر کی منظوری دی۔

خیال رہے کہ چیف جسٹس آصف سعید کھوسہ کی مدت ملازمت 20 دسمبر کو ختم ہو رہی ہے، نو منتخب چیف جسٹس 21 دسمبر 2019 کو چیف جسٹس پاکستان کے عہدے کا حلف لیں گے۔

(ایمرا نیوزآن لائن) یہ ماضی کی بات ہے، آج سے 7سال قبل مجھے اچانک فون کال آئی ’’مجھ پر کچھ نامعلوم افراد نے تشدد کیا ہے‘‘۔ کرنل ریٹائرڈ انعام الرحیم ایڈووکیٹ کی فون پر دی جانے والی اطلاع چونکا دینے والی تھی۔ اس وقت میں اپنے قریبی دوست اور سینئر صحافی سلمان مسعود کے ساتھ بلیو ایریا اسلام آباد میں گھوم رہا تھا۔

کرنل انعام الرحیم ایڈووکیٹ پر 10نومبر 2012ء کی رات کیا گیا حملہ اس لیے بڑا غیرمعمولی تھا کہ انہوں نے اس وقت کے آرمی چیف جنرل اشفاق پرویزکیانی کی مدت ملازمت میں توسیع کے خلاف عدالت سے رجوع کر رکھا تھا۔

فون سنتے ہی میں اور سلمان مسعود جائے وقوعہ کیلئے روانہ ہوگئے۔ راستے میں میری توجہ جیو نیوز پر خبر چلانے پر بھی مرکوز تھی کیونکہ اس وقت خبرنامے کا وقت نہیں تھا۔ اس لیے اسکرین پہ نیچے چلنے والے ٹکرز پر ہی انحصار تھا ۔ ان دنوں جیو نیوز پر جناب نجم سیٹھی کا پروگرام ’’آپس کی بات‘‘ بڑا مقبول تھا۔ سیٹھی صاحب ایک انگریزی روزنامے میں میرے ایڈیٹر رہے ہیں اس لیے خیال آیا کہ کیوں نہ انہیں فون پر مطلع کیا جائے۔ ان کا پروگرام براہ راست نشر ہو رہا تھا۔ پروگرام کے وقفے کے دوران سیٹھی صاحب نے میری کال کا جواب دیا توانہیں تازہ ترین صورتحال سے آگاہ کر دیا۔

سیٹھی صاحب نے فون رکھا اور اگلے ہی لمحے براہ راست پروگرام میں خبر ناظرین کو سنا ڈالی۔ تھوڑی دیر میں جیو نیوز اور باقی ٹی وی چینلز پر بھی یہ خبر ایک سرخی بن چکی تھی۔ ہم دونوں اڈیالہ روڈ پرپہنچے تو کرنل ریٹائرڈ انعام الرحیم ہمیں نظرآگئے۔ ان کے سرسے خون بہہ رہا تھا مگرحیرت انگیز طورپر ان کے چہرے پر مسکراہٹ تھی۔ ان سے خیر خیریت دریافت کی۔ ان کے ساتھ ہم ایک نجی اسپتال گئے اور انکی مرہم پٹی کے بعد واپس آگئے۔ اگلے روزکرنل ریٹائرڈ انعام الرحیم کے ساتھ یکجہتی کے لیے راولپنڈی کی وکلا برادری نے ہڑتال کی مگرآج تک اس بوڑھے وکیل کے حملہ آور گرفتار نہیں ہوئے۔

دراصل جنرل اشفاق پرویزکیانی کی مدت ملازمت میں اضافہ تو اس وقت کے وزیراعظم یوسف رضا گیلانی نے جولائی2010 میں کیا تھا مگر اس وقت جنرل کیانی کی عمر 60 سال نہیں تھی۔ وہ 12 اپریل 2012ءکو ساٹھ سال کے ہوئے تو کسی زمانے میں پاک فوج کی جج ایڈووکیٹ جنرل برانچ میں خدمات سرانجام دینے والے انعام الرحیم نے ان کی ملازمت میں توسیع کے فیصلے کو اس بنا پر عدالت میں چیلنج کردیا کہ اس سے پاک فوج کے کم و بیش28 سینئر افسران متاثر ہوئے ہیں۔

اس وقت سپریم کورٹ کے چیف جسٹس افتخار چوہدری تھے۔ عدالت کے رجسٹرار نے یہ کہہ کر درخواست واپس کردی کہ اسے مناسب فورم پر دائرکیا جائے۔ ہائیکورٹ کا دروازہ کھٹکھٹایا گیا تو وہاں بھی درخواست مسترد ہوگئی مگر اب اسلام آباد ہائیکورٹ کے جسٹس انورکاسی اور جسٹس شوکت عزیز صدیقی اس کیس کی انٹراکورٹ اپیل کی سماعت کرنے جارہے تھے۔

شوکت عزیز صدیقی سناتے ہیں کہ جب جسٹس انورکاسی نے انعام الرحیم کی درخواست ان سے مشورہ کیے بغیر معمول کے مطابق سماعت کے لیے مقررکی۔ اس وقت انٹراکورٹ اپیل میں بھی انعام الرحیم کی درخواست کی شنوائی نہ ہوئی مگرتاریخ میں پہلی بار توسیع کے حوالے سے عدالتی دروازہ کھٹکھٹانے کی مثال ضروربن گئی۔

جمعرات کے روز28 نومبر کو سپریم کورٹ میں جب چیف جسٹس آصف سعید کھوسہ آرمی چیف کی مدت ملازمت میں توسیع کے حوالے سے ایڈووکیٹ حنیف راہی کی درخواست کی سماعت کر رہے تھے تو عدالت میں کرنل ریٹائرڈ انعام الرحیم بھی موجود تھے۔ انہوں نے ہی عدالت کو پاکستان آرمی ایکٹ کی کتاب بھی فراہم کی۔

اس بار درخواست گزار ایڈووکیٹ حنیف راہی نے غالباً کچھ لوگوں کے کہنے پر انعام الرحیم سے رابطہ کیا مگر کرنل انعام الرحیم نے فریق بننے سے انکار کر دیا۔ شاید کچھ لوگوں کا خیال تھا کہ سپریم کورٹ کا دروازہ کھٹکھٹاتے ہی ملک میں موجود سیاسی جماعتیں سامنے آکھڑی ہونگی اور حکومت کو پیچھے ہٹنا پڑے گا۔ مگر ایسا کچھ بھی نہ ہوا الٹا سوشل میڈیا پر عدلیہ کے خلاف مہم چلائی گئی جس پر چیف جسٹس کو بھی ریمارکس دینا پڑے۔ سپریم کورٹ کی تین روزہ سماعت میں دو باتیں واضح ہوگئیں، اول یہ کہ آرمی چیف کے عہدے کی دوبارہ تعیناتی یا توسیع کے لیے ملک میں عملی طورپرکوئی قانون موجود نہیں ہے۔ دوئم یہ کہ فوج کے سربراہ کی ریٹائرمنٹ کے بارے میں بھی کافی ابہام پایا جاتا ہے۔

عدالت نے توسیع پر قانون سازی کا عملی فیصلہ پارلیمنٹ کے سپرد کر دیا ہے۔ لیکن سوال یہ ہے کہ اس سارے معاملے میں سیاسی جماعتوں نے آج تک ایک واضح سمت اختیار کیوں نہیں کی ؟

اگر سابق چیف جسٹس افتخارمحمد چوہدری کے دورمیں ہی انعام الرحیم ایڈووکیٹ کے سوالات کو عدالت میں سماعت کی پذیرائی مل جاتی اور معاملات کوئی منطقی شکل اختیار کرلیتے تو شاید آج صورتحال بہت مختلف ہوتی اور ایوان اقتدارمیں بیٹھے لوگوں کی لیاقت کا بھانڈا نہ پھوٹتا۔

(ایمرا نیوزآن لائن) سزا معطلی اور ای سی ایل سے نام خارج ہونے کے بعد توقع کی جارہی ہے کہ سابق وزیراعظم نواز شریف علاج کے لیے بیرون ملک روانہ ہوجائیں گے۔

29اکتوبر 2019 کو اسلام آباد ہائیکورٹ کے دو رکنی بینچ نے سابق وزیراعظم میاں نواز شریف کی سزا کو شدید علالت کے باعث آٹھ ہفتوں کے لیے معطل کرتے ہوئے 20 20 لاکھ کے ضمانتی مچلکے جمع کرانے پر اُنہیں طبی بنیادوں پر رہا کرنے کا حکم دیا تھا.

24 دسمبر 2018 سے سزا پانے والے سابق وزیراعظم نواز شریف اس دوران قریباً 239 دن سےجیل میں مقید تھے۔ اس سے قبل عام انتخابات سے قبل گزشتہ برس 6 جولائی کواحتساب عدالت نے سابق وزیراعظم کوان کی بیٹی مریم نواز اور داماد کیپٹن صفدر سمیت قید و جرمانے کی سزا سنائی تھی جس کے نتیجے میں میاں نواز شریف اور صاحبزادی مریم نواز69 اور کیپٹن صفدر 74 دن اڈیالہ جیل میں رہے تھے۔ 19 ستمبر 2018 کو اسلام آباد ہائیکورٹ نے احتساب عدالت کافیصلہ معطل کرتے ہوئے تینوں کو ضمانت پر رہا کرنے کا حکم دیا تھا۔اگر جائزہ لیا جائے تو گزشتہ 16 ماہ میں تین ماہ کے وقفے کے بعد میاں نواز شریف مجموعی طور پر307 دن جیل میں رہے۔

تاریخی طور پر جیل حراست ان کےلیے پہلا موقع نہیں وہ اس سے 20 برس قبل اکتوبر 1999 کو بھی ملک میں فوجی حکومت کے قیام کے بعد مستقل 425 دن جیل میں اسیررہے تھے۔ وہ9 دسمبر 2000 کوایک معاہدے کے بعد اپنے خاندان کے ہمراہ جلاوطن ہوگئے تھے۔

دسمبر2018 سے اکتوبر2019 تک کی اسیری: ن لیگ کے قائد اورسابق وزیراعظم میاں نواز شریف کو 24 دسمبر 2018 کو احتساب عدالت فیصلے کے سبب العزیزیہ ریفرنس میں سات سال قید پونے چار ارب روپے جرمانہ جائیدادیں ضبط، نااہل قرار دیتے ہوئے گرفتار کرکے پہلےاڈیالہ پھر ایک دن وقفے کے بعد انہیں کوٹ لکھپت جیل منتقل کردیا گیا تھا۔

تاہم اگلے ماہ دسمبر میں اپنی 70ویں سالگرہ منانے والے سابق وزیراعظم کے متعلق جنوری سے ہی مسلسل علالت کے خبریں آنے کے بعد 2 فروری 2019 کو میڈیکل بورڈ کی سفارش پرکوٹ لکھپت جیل سے سروسز اسپتال سمز منتقل کردیا۔ جس کے بعد 25فروری تک جیل اور اسپتال ان کا آنا جانا لگا رہا۔

رواں برس 26مارچ کوصحت کی خراب صورتحال کے سبب طبی بنیادوں پر سپریم کورٹ نے العزیزیہ ریفرنس میں نواز شریف کو 6ہفتوں کےلیے پچاس پچاس لاکھ کے دو مچلکے پر ضمانت پر رہا کرنے کا حکم دیتے ہوئے ان پربیرون ملک جانے پر پابندی لگادی تھی۔ 7 مئی 2019 کو وہ ایک بار پھر کوٹ لکھپت جیل منتقل ہوگئے۔تاہم طبیعت کی خرابی کے حوالے سے تشویشناک خبریں مسلسل سامنے آتی رہیں۔ اس دوران 21اکتوبر 2019 کو نیب نےانہیں پھر فوری طورپر سروسز اسپتال منتقل کردیا۔ تاہم طبعیت کی تشویشناک خبروں کے مسلسل آنے کے بعد 29 اکتوبر2019 کوالعزیزیہ ریفرنس میں طبی بنیادوں پر میاں نواز شریف کی سزا آٹھ ہفتوں کے لیے معطل کردی گئی۔