Tag supreme court

لاہور(میڈیا 92نیوزآن لائن) ہائیکورٹ نے سابق صدر پرویز مشرف کے خلاف سنگین غداری کیس کا فیصلہ سنانے کے خلاف دائر درخواست کو قابل سماعت قرار دے دیا۔

گزشتہ روز لاہور ہائی کورٹ نے اسلام آباد کی خصوصی عدالت کو سنگین غداری کیس کا فیصلہ سنانے سے روکنے کے لیے سابق صدر پرویز مشرف کی درخواست کے قابلِ سماعت ہونے پر اعتراض اٹھایا تھا۔ لاہور ہائیکورٹ میں جسٹس مظاہر علی اکبر نقوی کی سربراہی میں سابق صدر پرویز مشرف کے خلاف سنگین غداری کیس کا فیصلہ سنانے سے روکنے کے لیے دائر درخواست کی سماعت ہوئی جسے عدالت نے قابلِ سماعت قرار دے دیا۔

وکیل کے توسط سے دائر درخواست میں پرویز مشرف نے استدعا کی ہےکہ سپریم کورٹ کے فیصلوں کے مطابق سنگین غداری کیس کی دوبارہ سماعت کی جائے اور خصوصی عدالت کا فیصلہ محفوظ کرنے کا حکم معطل کیا جائے سابق صدر کی درخواست میں ان کی صحت کے لیے غیر جانبدار میڈیکل بورڈ بنانے کی بھی استدعا کی گئی ہے۔

درخواست پر سماعت کے بعد عدالت نے پرویز مشرف کی درخواست پر لگائے گئے اعتراضات ختم کر دیئے اور اسے سماعت کے لیے منظور کرلیا۔ جسٹس مظاہر اکبر نقوی نے 28 نومبر کے لیے وزارت داخلہ اور وفاقی حکومت سے جواب طلب کرلیا اور وفاقی حکومت کے متعلقہ حکام کو ہدایات لے کر پیش ہونے کی ہدایت کی ہے۔ خیال رہے کہ اسلام آباد کی خصوصی عدالت نے 19 نومبر کو سابق صدر پرویز مشرف کیخلاف سنگین غداری کیس کا فیصلہ محفوظ کیا تھا جو 28 نومبر کو سنایا جانا ہے۔

اسلام آباد(ایمرا نیوزآن لائن) وزیراعظم عمران خان نے کہا ہے کہ ریاست پہلے سیاست بعد میں آتی ہے اور ریاست کو کسی صورت کمزور نہیں پڑنے دیں گے۔

وزیراعظم عمران خان سے ڈاکٹر بابر اعوان نے ملاقات کی جس میں ملکی تازہ سیاسی صورتحال سمیت آئینی اور قانونی امور پر تبادلہ خیال کیا گیا۔ اس موقع پر گفتگو کرتے ہوئے وزیراعظم عمران خان نے کہا کہ ریاست پہلے سیاست بعد میں آتی ہے اور ریاست کو کسی صورت کمزور نہیں پڑنے دیں گے۔

انہوں نے کہا کہ قانون کی نظر میں سب برابر ہیں اور قانون کا اطلاق سب پر یکساں ہوگا، خود انسداد دہشتگردی کی عدالت سے لے کر سپریم کورٹ تک ہرجگہ خود پیش ہوا ہوں۔ وزیراعظم کا کہنا تھا کہ ہم ملکی ادارے مزید مستحکم کریں گے کیونکہ پاکستان کا استحکام اداروں کے ساتھ وابستہ ہے۔

عمران خان نے مزید کہاکہ کرنٹ اکاونٹ خسارے میں 32 فیصد کمی ریکارڈ ہوئی جب کہ ترسیلات زر میں ریکارڈ اضافہ بیرون ملک پاکستانیوں کا حکومت پر اعتماد ہے، تجارتی خسارے میں کمی او ربرآمدات میں اضافہ خوش آئند ہے، اس حوالے سے مزید اقدامات جاری ہیں جن سے آنے والے چند ماہ میں مزید بہتری آئے گی۔

سکھر (ایمرا نیوز آن لائن) احتساب عدالت نے پیپلزپارٹی کے رہنما خورشید شاہ کے جسمانی ریمانڈ میں مزید 6 روز کی توسیع کردی۔سکھر کی احتساب عدالت میں خورشید شاہ کے خلاف آمدن سے زائد اثاثہ جات کیس کی سماعت ہوئی جس سلسلے میں نیب حکام نے پی پی رہنما کو عدالت کے روبرو پیش کیا۔خورشید شاہ جسمانی ریمانڈ پر نیب کے حوالے دورانِ سماعت خورشید شاہ اور جج کے درمیان مکالمہ ہوا جس میں پی پی رہنما نے کہا کہ اگر میں باہر ہوتا تو نیب کو ہر ثبوت فراہم کرسکتا تھا، لوگ ہم کو ڈر کر ووٹ نہیں دیتے بلکہ پیار کرتے ہیں۔

جج نے خورشید شاہ سے مکالمہ کیا کہ شاہ صاحب آپ کو ضمانت دینے کا اختیار میرے پاس نہیں ہے، ضمانت اور رہائی کے لیے آپ کو پراپر فورم پر جانا ہوگا، اس پر خورشید شاہ نے کہا کہ جج صاحب آپ مجھے تین ماہ کے ریمانڈ پر نیب کے حوالے کردیں، میں عزت دار سیاستدان ہوں اور مجھے اس سب سے تکلیف ہورہی ہے، میں نے اس سال 27 لاکھ ٹیکس دیا اور بچوں نےالگ ٹیکس دیا۔پی پی رہنما نے عدالت کو بتایا کہ مجھے دل کا عارضہ لاحق ہے اور آکسیجن کا بھی مسئلہ ہے لہٰذا رات بھی میری طبعیت خراب ہوگئی تھی، اس وقت یہ نیب والے میرے ساتھ تھے لیکن میں نے کسی کو نہیں کہا کہ میری طبعیت خراب ہوئی بلکہ سپاہی نے خود دیکھا۔

پی پی رہنما کا عدالت میں کہنا تھا کہ آج میری آنکھوں میں آنسو کیوں ہیں،کیوں کہ مجھ پر بے بنیاد الزامات لگائے گئے، اس پر جج نے مسکرا کر خورشید شاہ سے مکالمہ کیا کہ شاہ صاحب آپ سے ایک غلطی ہوگئی کہ آپ نے نیب قانون ختم نہیں کیا۔علاوہ ازیں دورانِ سماعت خورشید شاہ کے وکیل نے اپنے دلائل میں کہا کہ آپ کے حکم کے باوجود خورشید شاہ کو چیک اپ کیلئے نہیں بھیجا گیا جس پر نیب وکیل نے عدالت کو بتایا کہ ملزم کا چیک اپ نیب کے ڈاکٹرز روزانہ کی بنیاد پر کرتے ہیں اور ہمارے ڈاکٹرز کے مطابق خورشید شاہ کو باہر علاج کی ابھی ضرورت نہیں ہے۔

نیب وکیل نے عدالت کو مزید بتایاکہ خورشید شاہ سے آمدن کے ذرائع پوچھتے ہیں تو کہتے ہیں فیملی سے پوچھ لو، ان کے ایک اکاؤنٹ میں 30کروڑ روپے کہاں سے آئے، جب اس بارے میں ان سے پوچھتے ہیں تو وہ کوئی جواب نہیں دیتے جب کہ ان کے اکاؤنٹ میں اس وقت تک 28 کروڑ روپے کی ٹرانزکشن ہوئی ہے لیکن خورشید شاہ نے اس رقم کے بارے میں نیب کو اب تک کو کوئی ثبوت نہیں دیا۔

آمدن سے زائد اثاثے کیس: خورشید شاہ 2 روزہ راہداری ریمانڈ پر نیب کے حوالے نیب کے وکیل نے عدالت کو مزید بتایاکہ خورشید شاہ کے پاس 25 کروڑ روپے کا گھر ہے، اس کے علاوہ ان کی سکھر اور کراچی میں کروڑوں روپے کی بے نامی جائیداد ہیں۔نیب کے وکیل کے دلائل پر جج نے وکیل سے سوال کیا کہ آپ کے پاس وکیل بننے سے قبل کتنے اثاثے تھے آپ کو یاد ہے؟ اس پر وکیل نے بتایا کہ جی میں بتا سکتا ہوں میرے کتنے اثاثے تھے، میرا کیا کاروبار ہے۔

نیب کے وکیل نے مزید کہا کہ خورشید شاہ کے پاس پبلک پراپرٹی ہے لہٰذا ان کو جواب دینا ہوگا، ان کے تین بینک اکاؤنٹ مل گئے ہیں جس میں 28 کروڑ ہیں۔نیب کی جانب سے پی پی رہنما کے جسمانی ریمانڈ میں مزید 15 روز کی توسیع کی استدعا کی گئی جس پر جج نے کہا کہ 90 دن کا بھی ریمانڈ دیدوں تو بھی آپ آخر میں صرف الزامات کی فہرست لائیں گے۔بعد ازاں عدالت نے خورشید شاہ کے جسمانی ریمانڈ میں 6 روز کی توسیع کردی اور نیب کو انہیں 21 اکتوبر کو دوبارہ پیش کرنے کی ہدایت کی۔واضح رہےکہ نیب نے پیپلزپارٹی کے رہنما خورشید شاہ کو آمدن سے زائد اثاثوں کے الزام میں 18 ستمبر کو راولپنڈی سے گرفتار کیا تھا۔

اسلام آباد(ایمرا نیوز آن لائن) سپریم کورٹ کے جج جسٹس قاضی فائز عیسیٰ نے صدارتی ریفرنس کے خلاف اپنا جواب الجواب عدالت عظمیٰ میں جمع کرادیا۔جسٹس قاضی فائز عیسیٰ کی جانب سے جواب الجواب میں کہا گیا ہےکہ اہلخانہ کی ملکیتی جائیدادوں کی منی ٹریل دینے کا پابند نہیں، اہلیہ اوربچے میرے زیر کفالت نہیں اس وجہ سے مالی معاملات کا علم نہیں، اہلیہ اور بچوں کی زیرملکیت جائیدادوں کی تفصیل سے آگاہ کرنے کا نہیں کہا جاسکتا۔

جواب میں کہا گیا ہےکہ صدارتی ریفرنس کا مقصد ججوں کی عیب جوئی اور ان کو خاموش کرانا ہے،الزام لگا کر میری شہرت اور ساکھ کو نقصان پہنچایا جا رہا ہے۔جسٹس قاضی فائز عیسیٰ نے اپنے جواب میں مزید کہا ہے کہ پہلی جائیداد 2004 میں 2 لاکھ 36 ہزار پاؤنڈ پاکستانی 2 کروڑ 60 لاکھ روپے میں خریدی، دیگر 2 جائیدادیں 2013 میں بالترتیب 2 لاکھ 45 ہزار پاؤنڈ اور 2 لاکھ 70 ہزار پاؤنڈ میں خریدیں، تمام جائیدادوں کی مالیت مل کر بھی کراچی، لاہور اور اسلام آباد کے پوش علاقوں میں ایک کنال کی قیمت سے کم ہے۔

معزز جج کے جواب کے مطابق کراچی میں 1600 مربع گز کا گھرہے جو پچھلے 10 سال سے خالی ہے، بطور چیف جسٹس بلوچستان ہائیکورٹ کوئٹہ اور جج سپریم کورٹ اسلام آباد میں رہائش پذیر رہا ہوں، لندن یا بیرون ملک کوئی جائیداد نہیں اور نا ہی اہلیہ کی دوہری شہریت ہے۔جسٹس قاضی فائز نے اپنے جواب الجواب میں اعتراض اٹھایا کہ کونسل کا جواب اٹارنی جنرل کی جانب سے جمع کرانا درست نہیں، کونسل کی جانب سے اٹارنی جنرل کو جواب جمع کرانےکی اجازت کا ریکارڈ موجود نہیں، کونسل کی جانب سے اٹارنی جنرل کا جواب جمع کرانا آئین کی خلاف ورزی ہے، اٹارنی جنرل صرف وفاقی حکومت کو قانونی معاملات میں مشورے دیتا ہے نا کہ نجی پریکٹس کرے۔

معزز جج نے اپنے جواب میں کہا کہ سپریم کورٹ نے سابق اٹارنی جنرل ملک قیوم کے خلاف دائرہ اختیار سے باہر جانے پر کارروائی کا حکم دیا، کونسل کو اختیار حاصل نہیں تھا کہ اٹارنی جنرل کو جواب جمع کرانے کی ذمہ داری دیتی، کونسل کی جانب سے اٹارنی جنرل کو اپنا وکیل تفویض کرنا آئین کی شق 100 کی خلاف ورزی ہے۔

جواب میں مزید کہا گیا ہے کہ اٹارنی جنرل انور منصورخان وفاقی حکومت کی نمائندگی کرتے ہیں، بطور وفاقی حکومت کی نمائندگی یہ عمل آئین پاکستان کی خلاف ورزی کے زمرے میں آتا ہے، اٹارنی جنرل کوکارروائی میں ملوث نہیں ہونا چاہیے تھا جس کیلئے وفاق نےانہیں مختص نہیں کیا،کسی وکیل کو جج کے ساتھ کسی نجی معاملے پر بات چیت یا بحث نہیں کرنی چاہیے، کونسل اور سیکریٹری کے مناسب جواب نا آنے پر الزامات کو تسلیم شدہ تصور کیا جائے۔

وفاقی حکومت نے سپریم کورٹ کے جسٹس قاضی فائز عیسیٰ اور ہائی کورٹ کے 2 ججز کے خلاف سپریم جوڈیشل کونسل میں ریفرنس دائر کر رکھے ہیں۔حکومتی ذرائع کے مطابق ان ججز میں لاہور ہائیکورٹ اور سندھ ہائیکورٹ کے ایک، ایک جج بھی شامل تھے۔لاہور ہائیکورٹ کے سابق جج فرخ عرفان چونکہ سپریم جوڈیشل کونسل میں کارروائی کے دوران استعفیٰ دے چکے ہیں اس لیے ان کا نام ریفرنس سے نکال دیا گیا ہے۔

پہلے ریفرنس میں جسٹس فائز عیسیٰ اور کے کے آغا پر بیرون ملک جائیداد بنانے کا الزام عائد کیا گیا۔ صدارتی ریفرنسز پر سماعت کیلئے سپریم جوڈیشل کونسل کا اجلاس 14 جون کو طلب کیا گیا تھا، اس حوالے سے اٹارنی جنرل آف پاکستان اور دیگر فریقین کو نوٹسز بھی جاری کیے گئے تھے۔سپریم جوڈیشل کونسل میں ریفرنسز کی سماعت اختتام پذیر ہوچکی ہے۔ ذرائع کے مطابق اٹارنی جنرل انور منصور خان نے جسٹس قاضی فائز عیسیٰ کے جواب کا جواب الجواب کونسل کے اجلاس میں جمع کرا دیا ہے، کونسل اٹارنی جنرل کے جواب کا جائزہ لینے کے بعد حکم جاری کرے گی۔جسٹس قاضی کیخلاف صدارتی ریفرنس کی سماعت کرنے والا لارجر بینچ ٹوٹ گیا جسٹس قاضی فائز عیسیٰ کی جانب سے صدر مملکت کو خط لکھنے پر سپریم جوڈیشل کونسل میں ایک اور ریفرنس دائر کیا گیا تھا جس کو گزشتہ دنوں کونسل نے خارج کردیا ہے۔

اسلام آباد(ایمرا نیوز آن لائن)
پاکستان بار کونسل نے سابق چیف جسٹس افتخار محمد چودھری کے صاحبزادے ارسلان افتخار کیخلاف کرپشن کے الزامات سے متعلق معاملہ منطقی انجام تک پہنچانے کیلئے قومی احتساب بیورو (نیب )کو خط لکھ دیا۔ وائس چیئر مین پاکستان بار کونسل کی طرف سے سیکرٹری بار نے نیب کو لکھے گئے خط میں سابق چیف جسٹس افتخار چودھری کے بیٹے ارسلان افتخار کیخلاف کرپشن کے الزامات کے معاملے میں سپریم کورٹ کے حکم پر فوری عملدرآمد کا مطالبہ کیا اور کہا کہ سپریم کورٹ نے معاملہ نیب کو بھیج دیا تھا لیکن اس فیصلے کیخلاف نظر ثانی درخواست دائر کی گئی تھی۔ نظر ثانی درخواست بعد میں واپس لینے پر عدالت عظمیٰ کا فیصلہ بحال ہوگیا اور اٹارنی جنرل نے عدالت کا فیصلہ تفتیش اور ضروری کارروائی کیلئے نیب کو بھیجا لیکن کوئی پیشرفت نہیں ہوئی ۔ نیب ارسلان افتخار کیخلاف کارروائی منطقی انجام تک پہنچائے تاکہ ملک میں جاری حالیہ احتسابی عمل صحیح معنوں میں بلا امتیاز ہوتا ہوا نظر آئے ۔دریں اثنا نیب نے پاکستان بار کونسل کے خط پر وضاحت کرتے ہوئے کہا کہ ارسلان افتخار کیس میں قانون کے مطابق کارروائی عمل میں لائی جائیگی۔ سپریم کورٹ نے کیس کا 2012ء میں فیصلہ سنایا تھا جبکہ نیب کو مصدقہ نقل جولائی 2019ء میں موصول ہوئی، اس دوران سپریم کورٹ میں نظرثانی پٹیشن کا بھی فیصلہ ہواجس کی بنا پر پرانی ہدایات میں تبدیلیاں آئیں ۔ نیب پاکستان بارکونسل کا احترام کرتا ہے جبکہ سپریم کورٹ کے تمام فیصلوں پر من و عن عمل پر کاربند ہے ۔ قومی فرض کے تحت بدعنوانی کے خاتمے کیلئے عمل پیرا نیب سپریم کورٹ کے تمام فیصلوں کا بغور جائزہ لے رہا ہے ، قانون کے مطابق کارروائی کی جائیگی۔

اسلام آباد(ایمرا نیوز آن لائن)
عدالت عظمیٰ نے جج ارشد ملک کے ویڈیو سکینڈل کیس کی سماعت کرتے ہوئے اٹارنی جنرل کو طلب کرلیا ہے اور ہدایت کی ہے کہ وہ آئینی درخواستوں میں اٹھائے گئے نکات پر عدالت کی معاونت کریں اور تجاویزدیں کہ اس صورتحال میں کیا ایکشن لیا جاسکتا ہے ۔چیف جسٹس آصف سعید خان کھوسہ کی سربراہی میں جسٹس شیخ عظمت سعید اور جسٹس عمر عطا بندیال پر مشتمل 3 رکنی بینچ نے کیس کی سماعت 23جولائی تک ملتوی کردی اور آبزرویشن دی ہے کہ جج پر لگائے گئے الزامات اور جج کا اعتراف ایک غیر معمولی بے مثال واقعہ ہے جس کی انکوائری ضروری ہے لیکن اصل سوال یہ ہے کہ انکوائری کیسے اور کون کرے ۔ چیف جسٹس آصف سعید خان کھوسہ نے ریما رکس دیئے کہ بنیادی مسئلہ عدلیہ کی ساکھ اور عدلیہ پر اعتماد کا ہے ،لوگوں کو عدلیہ پر اعتماد نہیں ہوگا تو انصاف کیسے ہوگا ۔چیف جسٹس نے کہا اصل مسئلہ سچ کی تلاش ہے ،جب سے بنی نوع انسان پیدا ہوا ہے سچ کی تلاش جاری ہے لیکن اگر ہم سچ تلاش کرنا خودشروع کردیں تو سوال یہ ہے کہ سزائوں کیخلاف جن کی اپیلیں ہائی کورٹ میں زیر التوا ہیں ان پر اس کے اثرات کیا ہونگے ۔وکلا ئکی طرف سے معاملے کی انکوائری کرانے کی استدعا پر چیف جسٹس نے ریمارکس دیئے کہ ازخود نوٹس مطالبات پر نہیں لیا جاتا،عدالت سے ازخود نوٹس کا مطالبہ تو کرتے ہیں لیکن خود کچھ نہیں کرینگے ،کمیشن آف انکوائری ایکٹ کے تحت حکومت بھی معاملے کی انکوائری کراسکتی ہے ۔چیف جسٹس نے کہا آئین نے ہم پر ذمہ داری ڈالی ہے اور ہم ذمہ داری اٹھا ئینگے ،اﷲ کے فضل سے ہم مضبوط ہیں۔وکیل طارق اسد کی طرف سے ڈکٹیٹر پنوشے کے معاملے میں برطانوی ہائوس آف لارڈز کے فیصلے کی نظیر پیش کرنے پر چیف جسٹس نے کہا کہ یہ مسلمہ اصول قانون ہے کہ اگر بدنیتی ثابت ہوجائے تو ہر چیز ختم ہوجاتی ہے ۔جسٹس عمر عطا بندیال نے کہا کہ اس کیس کے 3 پہلو ہیں پہلا ،عدلیہ کا تقدس ،دوسرا ویڈیوز کی اصلیت اور تیسرا جج کا مس کنڈکٹ،ہم نے دیکھنا ہے کہ ادارے کے وقار کا کس طرح تحفظ کیا جاسکتا ہے ،اس ویڈیو سے ہمیں دھچکا لگا ۔وکیل اکرم چودھری کی طرف سے ویڈیو لیک کرنے والوں کیخلاف توہین عدالت کی کارروائی کی استدعا پر چیف جسٹس نے کہا کہ یہ تو بعد کی بات ہے ،توہین عدالت تو مفروضے پر مبنی ہے ، پہلے مرحلے میں توویڈیو کی اصلیت کا تعین ہونا ہے ، جسکے بعد اسے بطور ثبوت پیش کرنے کا مرحلہ ہوگا،معاملہ قانون کے مطابق چلے گا اور قانون اپنا راستہ خود بناتاہے ۔جبکہ جج کیخلاف کارروائی کرنے کی استدعا پر چیف جسٹس نے کہا کہ مجاز فورم لاہور ہائی کورٹ ہے کیونکہ وہ ہائیکورٹ لاہور سے آئے ہیں۔ انکوائری کمیشن بنانے کی استدعا پر چیف جسٹس نے کہا کہ بتایا جائے کہ کمیشن کس سطح کا ہو اور اس کا سربراہ کون ہو جس پر وکیل نے کہا کہ سپریم کورٹ کے جج کی سربراہی میں ایک رکنی کمیشن بنایا جائے ۔چیف جسٹس نے کہا کہ ہم انکوائری کیلئے تیار ہیں لیکن ہائی کورٹ میں جو اپیلیں زیر سماعت ہیں ان کا کیا ہوگا ،کیا ہائی کورٹ اخذ کردہ نتائج کی پابند ہوگی؟ وکیل اکرام چودھری نے کہا کہ معاملہ عدلیہ کے وقار کا ہے ، چیف جسٹس نے کہا کہ عدالتی نظام کھوکھلا ہورہا ہے ،جب ایک جج کے سامنے ہائی پروفائل کیس لگا ہو تو وہ کیوں لوگوں کے ساتھ میل ملاقات کررہا ہے ،جج کے مس کنڈکٹ کیلئے ان کا اعتراف ہی کافی ہے ۔تیسرے درخواست گزار طارق اسد نے ذاتی حیثیت میں پیش ہوکر کہا کہ جج کا کنڈکٹ اسے غلط ثابت کررہا ہے اب سوال ان کے فیصلوں کا ہے ۔چیف جسٹس نے کہا کہ کمیشن بنانے کا اختیار تو حکومت کو بھی حاصل ہے ۔