Tag technology

اسلام آباد(ایمرا نیوزآن لائن): وزیر سائنس و ٹیکنالوجی فواد چوہدری کے مطابق موبائل فون کی سمیں، اسمارٹ کارڈز اور اے ٹی ایم کارڈز پاکستان میں بنانے کے لیے ٹیکنالوجی منگوالی گئی ہے۔
انہوں نے بتایا کہ حکومت نے پاکستانیوں کی معلومات کے تحفظ کیلئے اہم قدم اٹھایا ہے اور اب مذکورہ بالا اشیا چین یا دیگر ممالک سے درآمد نہیں ہوں گی۔ فواد چوہدری کے مطابق وزیر اعظم کی ہدایت پر وزارت آئی ٹی نے ابتدائی ہوم ورک مکمل کرتے ہوئے مقامی سموں کا ڈیزائن بھی تیار کر لیا ہے۔ انہوں نے ذرائع ابلاغ کے نمائندوں کو آگاہ کیا کہ نئی پیش رفت کے متعلق تمام اسٹیک ہولڈرز سے مشاورت مکمل لی گئی۔ ان کا کہنا تھا کہ وزارت آئی ٹی نے ٹیلی کام سیکٹر کو معیار اور قمیت مناسب رکھنے کی ہدایت بھی کی ہے۔ وزیرسائنس و ٹیکنالوجی نے بتایا کہ حکومت نے پاکستانی کمپنی ایئرلفٹ کے ساتھ معاہدہ کر لیا جو ملک میں آن لائن بس سروس کا آغاز کرے گی اور بیٹری بس سروس متعارف کرائے گی۔ فواد چوہدری کا کہنا تھا کہ آن لائن بس سروس سے پاکستان میں پبلک ٹرانسپورٹ کا نظام بہتر ہوگا۔

ان کا کہنا تھا کہ پاکستان کو سائنس و ٹیکنالوجی میں واپس لے آئے ہیں اور اب ہم سولر سسٹم اور لیتھیئم ٹیکنالوجی پر کام شروع کر رہے ہیں۔آنیوالے چار سالوں میں پاکستان ان دونوں ٹیکنالوجیز میں آگے ہوگا۔ وزیرسائنس نے بتایا کہ ہمارا ہدف ہے کہ 30 فیصد بجلی گرین سورسز سے پیدا کی جائے جس کے لیے بہت جلد جنوبی ایشیا کا سب سے بڑے بائیو ٹیکنالوجی پارک بنایا جائے گا جس سے 10 ارب ڈالر کمائے جا سکتے ہیں۔ مستقبل کے منصوبوں کے متعلق انہوں نے بتایا کہ پاکستان ہربل دواؤں پر کام شروع کر رہا ہے، ایئر فورس اور دفاعی اداروں کے ساتھ ملکر ایگریکلچر ڈرونز پر بھی کا شروع کریں گے۔ طبی سہولیات میں بہتری کیلئے ایئرایمبولینس پر کام شروع کریں گے۔ ان کا کہنا تھا کہ تمام منصوبوں پر عمل درآمد یقینی بنانے کے لیے سائنس وٹیکنالوجی کے بجٹ میں اگلے سال 15 سو فیصد اضافہ کیا جائے گا۔

لاہور(نیٹ نیوز/ایمرا نیوز) اس ترقی یافتہ دور میں ماہرین حیران کن ایجادات متعارف کر وا رہے ہیں ۔اب ایسی بیٹریاں تیار کی جارہی ہیں جو بیکٹیریا(جر ثومے) پر مشتمل ہوگی اور ان کی مدد سےچھوٹے آلات کو بآسانی چلایا جا سکے گا ۔میسا چیو سیٹس انسٹی ٹیوٹ آف ٹیکنا لوجی (ایم آئی ٹی ) کے ماہرین نے بجلی پیدا کرنے والے بیکٹیریا کو الگ کرنے اور ان کی درجہ بندی کا ایک نیا طر یقہ وضع کیا ہے ۔

بہت سے بیکٹیریابجلی پیدا کرنے کےکام آتے ہیں ،تاہم انہیں لیبارٹری میں رکھنا اور ان کی تعداد میں اضافہ کرخاصاً مشکل اور مہنگا کام ہوتا ہے ۔ایم آئی ٹی کے ماہرین کے نئے طر یقے پر عمل کرتے ہوئے برق پیدا کرنے والے بیکٹیریا کو الگ کرنا قدرے آسان ہوگیا ہے ۔اس طر ح بیکٹیریا کا الیکٹران کی خلوی جھلی سے باہر آتا ہے اور یہ عمل ایکسٹر سیلو لر الیکٹران ٹرانسفر یا ای ای ٹی کہلا تا ہے ۔ماہرین کے مطابق بیکٹیریا میں ای ای ٹی کے عمل کو دیکھنا اور اس کی درجہ بندی سب سے بڑا چیلنج تھا ۔ نئی تکنیک ڈائی الیکٹروفوریس کو استعمال کرکے دو اقسام کے بیکٹیریا الگ کیے گئے ہیں ،جس کے ذریعے زیادہ بجلی بنانے والے بیکٹیریا سامنے آئے ۔بعدازاں ماہرین ان پر مشتمل بیٹری بنانے پر کام کریں گے ۔

نیویارک:(نیٹ نیوز/ایمرا نیوز) امریکی کمپنی نے ایسا انقلابی بلیو ٹوتھ ٹرانسمیٹر بنایا ہے جو ہوا میں موجود برقناطیسی یا ریڈیائی امواج سے توانائی جذب کرکے بیٹری کے بغیر توانائی پیدا کرتا ہے اور اسمارٹ فون تک سگنل بھیجتا ہے۔نیویارک میں واقع ویلیئٹ کمپنی نے اس کے لیے 5 کروڑ میں سے 3 کروڑ ڈالر کی فنڈنگ جمع کرلی ہے۔ اسٹیکر نما بلو ٹوتھ پیوند میں اے آر ایم پروسیسر نصب ہے جو اطراف سے توانائی جمع کرکے خود کو چلاتا ہے۔

اس میں ایک چھوٹی سی چپ پر اینٹینا چھاپ کر اسے کسی بھی کاغذ یا پلاسٹک کے ٹکڑے پر پیوست کیا جاسکتا ہے جسے آپ ویڈیو میں بھی دیکھ سکتے ہیں۔اس کی ڈیزائننگ میں خیال رکھا گیا ہے کہ بلو ٹوتھ کے دیگر بہت سے اجزا کو کم کیا جائے یا اسے مائیکرو الیکٹرانکس میں سمودیا جائے۔ اس آلے کو نینو واٹ کمپیوٹنگ کا ایک حصہ بھی قرار دیا جاسکتا ہے۔بلو ٹوتھ اسٹیکر کسی بھی اسمارٹ فون، آئی او ٹی (انٹرنیٹ آف تھنگس) یا دیگر پلیٹ فارم سے رابطہ کرسکتا ہے۔

ابتدائی ٹیسٹ میں اس نے شاندار کارکردگی دکھائی ہے اور اس کی تحقیق کا زیادہ تر کام اسرائیل میں کیا گیا ہے۔ اس کے لیے فنڈنگ ایمیزون اور سام سنگ نے کی ہے۔ماہرین کے مطابق فضا میں ہر وقت ہزاروں ریڈیائی سگنل گزرتے رہتے ہیں اور یہ اسٹیکر ان سے توانائی جذب کرتا ہے اسے ری سائیکل ریڈی ایشن آلات بھی کہا جاسکتا ہے۔ ڈاک ٹکٹ جتنا بلو ٹوتھ اسٹیکر کسی بیٹری کے بغیر مسلسل کام کرسکتا ہے اور اس کی بدولت ہر جگہ ہرموقع پر موجود انٹرنیٹ آلات (آئی او ٹی) کو ممکن بنا کر تمام اشیا کو باہم جوڑا جاسکتا ہے۔

واشنگٹن:(نیٹ نیوز/ایمرا نیوز) ماہرین نے برسوں کی کوشش کے بعد چار کائناتی قوتوں میں سے ایک ’کمزور نیوکلیائی قوت‘ یا ویک نیوکلیئر فورس کی پیمائش میں کامیابی حاصل کی ہے۔ اس ضمن میں ماہرین دہائیوں سے کوشش کررہے تھے۔یہ نتائج اوک رِج نیشنل لیبارٹریز میں این ڈی پی گیما تجربات کے ذریعے انجام دیئے گئے ہیں جن کی نگراں پروفیسر ڈبلیو مائیکل سنو نے کی ہے جو انڈیانا یونیورسٹی بلومنگٹن کالج آف سائنسس میں پروفیسر بھی ہیں۔ وہ کہتے ہیں، ’ایٹموں کے اندر مرکزے (نیوکلیئس) میں موجود پروٹون اور نیوٹرون کے درمیان کمزور قوت کو ناپنا بہت اہم کام ہے۔ اس سے کائنات پر راج کرنے والی چار بنیادی قوتوں کو جاننے میں بہت مدد ملے گی۔‘‘فزکس کی رو سے مضبوط (اسٹرونگ) قوت، برقناطیسی (الیکٹرومیگنیٹک) قوت، کمزور (ویک نیوکلیئر) قوت، اور ثقل (گریوٹی) کی چاروں قوتوں سے ہی کائنات کا نظم و نسق چل رہا ہے۔ ان میں سے ایک بھی ختم ہوجائے تو زندگی اور کائنات دونوں کا وجود ختم ہوجائے گا۔ ہم جانتے ہیں کہ پروٹون اور نیوٹرون دیگر چھوٹے ذرات یعنی کوارکس سے مل کر بنتے ہیں اور اسٹرونگ فورس کوارکس کو مضبوطی سے باندھے رکھتی ہے جبکہ کمزور نیوکلیائی قوت، ایٹمی مرکزے میں نیوٹرون کو پروٹون میں بدلنے کی وجہ بنتی ہے جس کے نتیجے میں تابکاری (ریڈیو ایکٹیویٹی) کا عمل واقع ہوتا ہے۔اس تجربے میں کمزور نیوکلیائی قوت کو الگ کرکے اس کی پیمائش کی گئی تھی۔ اس کےلیے ایک پیچیدہ تجربہ کیا گیا جس میں این پی ڈی گیما نامی ایک خصوصی آلہ استعمال کیا گیا۔ اس میں انتہائی سرد نیوٹرونوں کے گھماؤ (اسپن) کو قابو کیا گیا۔ جب تمام نیوٹرونوں کا اسپن یا اینگیولر مومینٹم ایک سمت میں آگیا تو ان نیوٹرونوں کو مائع ہائیڈروجن میں موجود پروٹونوں سے ٹکرادیا گیا جس سے طاقتور گیما شعاعیں پیدا ہوئیں۔ اب ان گیما شعاعوں کی عددی قیمت کی بنیاد پر کمزور قوت کی پیمائش کی گئی ۔یعنی ماہرین نے نیوٹرون اور پروٹون کے گھماؤ کی بنیاد پر گیما شعاعوں اور ان کے تشاکلات (سمٹری) کی پیمائش کی۔اس تحقیق کی تفصیلات ہفت روزہ تحقیقی جریدے ’’نیچر‘‘ کے تازہ شمارے میں شائع ہوئی ہیں۔

جاپان:(نیٹ نیوز/ایمرا نیوز) اگر آپ تنہائی کا شکار ہیں یا پھر آپ کو لگتا ہے کہ آپ کا کوئی ساتھی نہیں رہا تو ایسی صورت میں کسی بھی انسان سے دوستی یا پالتو جانور پالنے کی کوئی ضرورت نہیں کیونکہ جدید ٹیکنالوجی سے مزین ‘ساتھی روبوٹ’ متعارف کروا دیا گیا ہے۔

خلیج ٹائمز کی رپورٹ کے مطابق جاپانی ٹیکنالوجی کمپنی گرو ایکس نے گزشتہ روز ٹوکیو میں ایک ایسا روبوٹ متعارف کیا ہے جو گھر کے کاموں کے بجائے انسانی جذبات اور احساسات کے لیے کام کرے گا۔یہ روبوٹ مصنوعی ذہانت یعنی آرٹیفیشل انٹیلیجنس سے مزین ہے جس کو کمپنی کی جانب سے ’دی لووٹ‘ نام دیا گیا ہے جو کہ محبت اور روبوٹ کا مجموعہ ہے۔مصنوعی ذہانت سے آراستہ ساتھی روبوٹ اپنے اردگرد افراد کو ردعمل دے سکتا ہے اور صارف بھی اپنے جذبات اور احساسات ساتھی روبوٹ سے شیئر کرسکتا ہے۔اس میں ٹچ سینسر، کیمرہ، اور 6 لیئرز آئیز (6layers eyes) ڈسپلے شامل ہے جب کہ اس کا ڈیزائن ایک پینگوئن کی طرح پرکشش ہے۔کمپنی کے مطابق یہ روبوٹ صارفین کو دماغی دباؤ اور تناؤ سے باہر لانے میں مددگار ہے، جسے صارف گلے بھی لگا سکتے ہیں۔ اس میں نصب کیمرے کی مدد سے والدین اپنے اسمارٹ فون پر بچوں کی سرگرمیوں پر بھی نظر رکھ سکتے ہیں۔کمپنی کا کہنا ہے کہ اس روبوٹ کو متعارف کروانے کا اہم مقصد انسانوں میں محبت بڑھانا ہے۔

واشگٹن:(نیٹ نیوز/ایمرا نیوز) شہد کی مکھیاں بہت طویل فاصلہ طے کرتی ہیں۔ ان کی پیٹھ پر ہلکے برقی آلات لگا کر ایک وسیع علاقے کے متعلق معلومات حاصل کی جاسکتی ہیں۔
یونیورسٹی آف واشنگٹن میں پال ایلن اسکول آف کمپیوٹر سائنس اینڈ انجینئرنگ کے شیام گولکاٹا اور ان کے ساتھیوں نے کہا ہے کہ عام ڈرون 20 سے 30 منٹ تک پرواز کرسکتا ہے اور اسے دوبارہ چارج کرنا ہوتا ہے لیکن اگر مکھیوں پر نہایت مختصر اور نفیس آلات لگا دیئے جائیں تو وہ کئی گھنٹوں تک ڈرون بن کر ہمیں کسی علاقے کا درجہ حرارت، نمی یا فصل کی کیفیت سے آگاہ کرسکتے ہیں یوں زندہ مکھیاں بہت کارآمد برقی ڈرون میں بدل سکتی ہیں۔ماہرین نے برقی آلات کا ایک ایسا مجموعہ تیار کیا ہے جس میں کئی طرح کے سینسرموجود ہیں جو کسی بھی علاقے کی خبر دے سکتے ہیں۔

انہیں چلانےوالی بیٹری ایک مرتبہ چارج ہونے کے بعد سات گھنٹے مسلسل چلتی رہتی ہے اور جوں ہی مکھیاں واپس اپنے چھتے میں جاتی ہیں تو رات کے وقت بیٹری چارج ہونے لگتی ہے۔ماہرین کا دعویٰ ہے کہ تاریخ میں پہلی مرتبہ کسی محنتی کیڑے کو ڈرون بنانے کا تجربہ کیا گیا ہے لیکن اس میں کئی مسائل آڑے آئے۔ ننھی مکھی زیادہ وزن نہیں سہار سکتی جبکہ جی پی ایس ریسیور بہت زیادہ توانائی استعمال کرتے ہیں۔ ان دونوں کے لیے ماہرین نے کئی ٹیکنالوجی کو آزمایا اور آخرکار یہ مسائل حل کرلیے۔پہلے مرحلے میں مکھیوں پر صرف سادہ ٹریکنگ آلات لگائے اور انہیں 10 انچ کے فاصلے تک اڑایا۔ اس پورے سامان کا وزن 102 ملی گرام تھا جو چاول کے سات کچے دانوں کے برابر ہے اور چارج ہونے والی بیٹری کا وزن 70 ملی گرام تھا جبکہ بقیہ 30 ملی گرام میں تمام سینسر اور آلات لگائے گئے۔چونکہ جی پی ایس اینٹینا زیادہ بجلی کھاتا ہے اس لیے ماہرین نے مکھی کا محلِ وقوع ناپنے کے لیے لوکلائز تکنیک کی طرز پر جگہ جگہ بیس اسٹیشن قائم کرکے کئی انٹینا لگائے جس سے مکھیوں کی پوزیشن کو 80 میٹر کے اندر اندر جاننے میں مدد ملی۔ اس کے بعد کئی سینسر سے مکھیوں کو آزادانہ گھمایا گیا اور اس سے ڈیٹا لیا گیا۔چھتے میں واپسی پر ’بیک اسکیٹر‘ نامی طریقے سے مکھیوں کا ڈیٹا جمع کیا گیا۔ اگلے مرحلے میں ڈرون مکھیوں پر کیمرے لگا کر براہِ راست کسی جگہ کی ویڈیو بنانا ممکن ہوسکے گا۔ماہرین کا خیال ہے کہ اس تحقیق سے نہ صرف فصلوں اور باغات میں تحقیق پر مدد ملے گی بلکہ کسان ڈرون کے مقابلے میں مکھوں کے ذریعے بہتر طور پر اپنی زراعت کو سمجھ سکیں گے۔

کراچی:(نیٹ نیوز/ایمرا نیوز) خلاء سے متعلق معاملات میں دلچسپی رکھنے والے افراد آج شہاب ثاقب کا نظارہ کرسکیں گے۔انٹرنیشنل میٹرولوجیکل آرگنائزیشن کے مطابق شہاب ثاقب کو ‘ٹون میٹیورائڈ’ کا نام دیا گیا ہے۔واضح رہے کہ شہاب ثاقب سیارچوں کے ٹوٹے ہوئے ذرات ہوتے ہیں، جو زمین کے ماحول میں آتے ہوئے آکسیجن کے باعث جلنے لگتے ہیں۔انٹرنیشنل میٹرولوجیکل آرگنائزیشن نے بتایا ہے کہ دبئی کے وقت کے مطابق آج شام ساڑھے 4 بجے شہاب ثاقب نظر آسکتے ہیں۔جبکہ پاکستان میں جہاں روشنی کی آلودگی نہ ہو، وہاں آسمان پر شہاب ثاقب کا نظارہ ممکن ہوگا اور تقریباً 60 سے 120 شہاب ثاقب نظر آسکتے ہیں۔امریکی خلائی تحقیقاتی ادارے ‘ناسا’ نے بھی اپنے ٹوئٹر پیغام میں خلاء میں دلچسپی رکھنے والوں کو شہاب ثاقب کے نظارے کے لیے تیار رہنے کو کہا۔انٹرنیشنل میٹرولوجیکل آرگنائزیشن کے مطابق شہاب ثاقب سے زمین کو کوئی خطرہ نہیں۔

بوسٹن:(نیٹ نیوز/ایمرا نیوز) امریکی ماہرین نے سورج اور ہوا جیسے قابلِ تجدید (رینیوایبل) ذرائع سے بننے والی بجلی کو مؤثر انداز میں جمع کرنے والا ایک نظام ڈیزائن کیا ہے جسے ’ڈبے میں سورج‘ کا نام دیا گیا ہے۔واضح رہے کہ قابلِ تجدید ذرائع توانائی کو جمع کرنے کا مؤثر نظام دنیا میں کہیں موجود نہیں اور اسی بنا پر یہ ہوتا ہے کہ ہزاروں شمسی تختیوں (سولر پینلز) کی بجلی سورج ڈوبتے ہی منقطع ہوجاتی ہے۔

اسی سوچ کے تحت میسا چیوسیٹس انسٹی ٹیوٹ آف ٹیکنالوجی (ایم آئی ٹی) کے سائنسدانوں کا نیا ڈیزائن ونڈ ٹربائن اور سولر پلانٹ بند ہونے کی صورت میں بھی ایک وسیع علاقے کو بجلی فراہم کرسکت ہے۔جس سے ڈبے میں سورج کہا جارہا ہے وہ ایسے بڑے بڑے باکس ہیں جن میں مائع سلیکون رکھی جاسکے گی اور یہ مروجہ بیٹریوں (مثلاً لیتھیئم آئن) سےکہیں ذیادہ مؤثر بھی ہوگا۔ اس کےذریعے بجلی فراہم کرنے والےنظام یا گرڈ کو بھی بجلی فراہم کی جاسکے گی۔ایم آئی ٹی کے شعبہ میکینکل انجینیئرنگ کے پروفیسرایسی گن ہینری اور ان کے ساتھیوں نے کہا ہے کہ اگر یہ ٹیکنالوجی کامیاب ہوجاتی ہے تو توانائی کو جمع کرنے کا ایک بہت بڑا چیلنج حل ہوجائے گا۔ اس اختراع کی تفصیلات جرنل آف انرجی اینڈ اینوائرمینٹل سائنس میں شائع ہوئی ہے۔لیکن نیا ماڈل سولر سیل کی بجائے شمسی آئنوں کی مرتکز ہونے والی حرارت کو جمع کرتا ہے اور بجلی کی بجائے حرارت کو جمع کرنا قدرے آسان اور کم خرچ ہوتا ہے۔اس میں گرم مائع سلیکن کو استعمال کیا جائے گا اورپھر اسے ایک ہیٹ ایکسچینر پائپ سے گزار کر کسی مائع کو بھاپ میں تبدیل کرکے اس سے ٹربائن چلاکر بجلی بنائی جاسکے گی۔ لیکن اس کے لیے پورے نظام کو بلند درجہ حرارت برداشت کرنے کے قابل بنانا ہوگا تاکہ وہ اس عمل میں پیدا ہونے والی 4000 درجے فیرن ہائٹ گرمی کو برداشت کیا جاسکے۔اس کا دوسرا ورژن فوٹووولٹائک یا سولر سیل بجلی کو بھی حرارت میں تبدیل کرکے جمع کیا جاسکتا ہے۔ پورے نظام کا نام ٹی ای جی ایس ایم پی وی رکھا گیا ہے۔ گریفائٹ اور مائع سلیکن کے بڑے بڑے ٹینکوں میں گرم ہونے کے بعد سلیکون رات کے وقت دہکتا ہوا روشن مٹیریل بن جائے گا۔ پھر اسے ٹیوبوں میں بھر کر سولر سیل کے اوپر سے گزارا جائے گا اور وہ اس روشنی سے بجلی بنائیں گے۔ اب یہ ٹھنڈا مائع دوبارہ ٹینک میں آئے گا اور صبح دھوپ نکلنے پر اسے دوبارہ گرم کیا جاسکے گا۔ اسی طرح ٹینک سے توانائی حاصل کرنے کا سلسلہ جاری رہے گا۔

نیویارک(میڈیا نائن ٹو ڈاٹ ٹی وی) کی بورڈ سے ٹائپنگ کا زمانہ ہوا پرانا کیونکہ اب آگیا ہے بغیر تار کے ایسا جادوئی آلہ جو کسی بھی سطح پر انگلیوں کی حرکت سے تحریر کا کام کرتا ہے۔ٹیپ نامی اس آلے میں کی بورڈ کی طرح بٹن نہیں ہوتے بلکہ پانچ انگوٹھیاں ہوتی ہیں جوباہمی طور پر ایک دوسرے سے منسلک ہو کر آزادانہ انداز میں ٹائپنگ کا عمل سرانجام دیتی ہیں، اس آلے کو انگلیوں میں پہن کر آپ کسی بھی سطح پر ٹائپنگ کے ساتھ ساتھ ماؤس کو بھی استعمال کرسکتے ہیں۔
اگر کوئی شخص سفر میں کی پیڈ یا کی بورڈ کی وجہ سے تحریر کرنے میں دقت محسوس کرتا ہے تو وہ بس اس آلے کے ذریعے اپنے پاؤں، ٹھوس سطح یا ٹیبل پر انگلیوں سے ای میل، مضمون، پیغامات تحریر کرسکتا ہے۔
یہ ڈیوائس اسمارٹ فونز، کمپیوٹرز، اسمارٹ واچ اور لیپ ٹاپ کے ساتھ بلوٹوتھ سے منسلک ہوسکتی ہے جب کہ چارج ایبل بیٹری کی خاصیت کی وجہ سے اسے بآسانی ہر جگہ استعمال کیا جاسکتا ہے۔

بوسٹن(میڈیا نائن ٹو ڈاٹ ٹی وی) امریکی کمپنی بوسٹن ڈائنامکس نے ہوا میں قلابازی کھانے والا انسان نما روبوٹ تیار کرلیا ہے۔انسان نما یعنی ہیومینوئیڈ روبوٹس تیار کرنے والی مشہور امریکی کمپنی بوسٹن ڈائنامکس نے حال ہی میں اپنے مشہور روبوٹ اٹلس میں ایک حیرت انگیز صلاحیت کا اضافہ کیا ہے جسے دیکھ خود مکینیکل انجنیئرنگ کے ماہرین بھی حیران ہیں۔ پہلے اٹلس روبوٹ کو انسانوں کی طرح چلنے کے قابل بنایا گیا، اس کے بعد وہ انسانوں کی طرح سیڑھیاں چڑھنے اور اترنے لگا اور اب وہ بہت خوبصورتی سے کسی جمناسٹ کی طرح ہوا میں قلابازی کھا کر متوازن انداز میں کھڑا ہوسکتا ہے۔
روبوٹ کی حرکات و سکنات ( ڈائنامکس) کے ماہرین نے اعتراف کیا ہے کہ اگرچہ خود روبوٹ کو انسان کی طرح چلنے کے قابل بنانا ایک بہت بڑا چیلنج ہے لیکن بھاری بھرکم روبوٹ کو ہوا میں گھوم کر دوبارہ کھڑا ہونےکے قابل بنانا اس سےکئی گنا مشکل ہے جو اس ویڈیو میں بھی دیکھا جاسکتا ہے۔
بوسٹن ڈائنامکس نے گزشتہ برس اٹلس کو ایک بلندی پر چڑھایا تھا جو ہائیکنگ کے انداز میں پہاڑ پر چڑھا تھا لیکن اب وہ ہوا میں قلابازی بھی کھا سکتا ہے۔ یہ روبوٹ 180 درجے پر گھوم کر دوبارہ متوازن انداز میں کھڑا ہوسکتا ہے۔
روبوٹ کی یہ نئی خاصیت مزید نکھرے گی اور یوں ہم انسان نما روبوٹ کے قریب پہنچ سکیں گے۔ تاہم دیگر ماہرین نے کہا ہے کہ مصنوعی ذہانت کے ساتھ روبوٹ دنیا کےلیے خطرہ بن سکتے ہیں۔