Tag today

برسٹل(ایمرا نیوزآن لائن) مشن ورلڈ کپ کےلئےانگلینڈ میں موجود قومی ٹیم آج تیسرے ون ڈے میں میزبان ٹیم کے خلاف ایک بار پھر قسمت آزمائےگی ۔ برسٹل میں میچ پاکستانی وقت کے مطابق شام 5 بجے شروع ہوگا۔تیسرے ون ڈے میں شعیب ملک اورفاسٹ بولرجنید خان کی شمولیت کا امکان ہے۔

دورہ انگلینڈ میں پاکستان ٹیم کو واحد ٹی ٹوئنٹی میں شکست ہوئی تھی ،دونوں ٹیموں کے درمیان پہلا ون ڈے میچ بارش کے باعث منسوخ جب کہ دوسرے میچ میں پاکستان کو 12رنزسے شکست ہوئی تھی۔ورلڈ کپ سے قبل دونوں ٹیموں کےدرمیان پانچ ون ڈے انٹرنیشنل میچوں کی سیریز کا چوتھا اور پانچواں میچ 17 اور 19 مئی کو کھیلا جائے گا۔

لاہور(ایمرا نیوزآن لائن) ملک کے بیشتر علاقوں میں آج موسم گرم اورخشک رہے گا، جبکہ جنوبی پنجاب اور سندھ میں موسم آج بھی شدید گرم رہے گا۔گزشتہ روز ملک کے بیشتر علاقوں میں موسم گرم اور خشک ہی رہا جبکہ جنوبی پنجاب اور سندھ میں شدید گرم رہا، تاہم بہاولپور سٹی میں 02ملی میٹر بارش ریکارڈ کی گئی۔گزشتہ روز ریکارڈ کیے گئے گرم ترین مقامات کے درجہ حرارت کے مطابق سکرنڈمیں43 جبکہ بھکر، تربت، مٹھی اور شہید بینظرآباد میں 42 ڈگری سینٹی گریڈ ریکارڈ کیا گیا۔

محکمہ موسمیات نے رواں ہفتے کے دوران ملک کے مختلف علاقوں میں بارش کے ساتھ تیز آندھی کی پیش گوئی کی ہے جس کے باعث دن کے درجہ حرارت میں معمول سے 03 سے05ڈگری کمی کا امکان ہے۔محکمہ موسمیات کے مطابق اسلام آباد، راولپنڈی، فیصل آباد، سرگودھا، ساہیوال، ملتان، بہاولپور، ڈیرہ غازی خان، سکھر، مکران، بنوں، ڈیرا اسماعیل خان، ہزارہ، گلگت بلتستان اور کشمیر میں آندھی کے ساتھ بارش کا امکان ہے۔

لاہور(ایمرا نیوزآن لائن) اپوزیشن لیڈر قومی اسمبلی شہباز شریف بیرون ملک ہونے کے باعث آج نیب لاہور میں پیش نہیں ہوں گے۔ نیب نے اپوزیشن لیڈرکو لاہور ویسٹ مینجمنٹ کمپنی کی تحقیقات کے لیے طلب کر رکھا ہے۔نیب کی جانب سےشہباز شریف کو لاہور ویسٹ مینجمنٹ کمپنی کے حوالے سے 7سوالات پر مشتمل سمن جاری کیا گیا تھا۔

جن میں کمپنی کے قیام کی سمری فنانس اور محکمہ قانون کی رائے لیے بغیر منظور کیے جانے سمیت دیگر سوالات شامل ہیں۔شہباز شریف کو ان سوالات کے جوابات کےساتھ آج سہ پہر 3 بجے نیب لاہور میں پیش ہونےکی ہدایت کی گئی تھی۔ن لیگی رہنما کے سیکرٹری عطا تارڑکےمطابق شہباز شریف بیرون ملک ہونے کے باعث آج نیب کے سامنے پیش نہیں ہوں گے۔

اسلام آباد(ایمرا نیوزآن لائن) وزیر اعظم عمران خان نے اقتصادی ٹیم کا اہم اجلاس آج طلب کر لیا۔ذرائع کے مطابق اقتصادی ٹیم کے اجلاس میں آئی ایم ایف سے معاہدے اور ایمنسٹی اسکیم پر غور کیا جائے گا۔اجلاس میں وزارتِ خزانہ کی جانب سے وزیر اعظم عمران خان کو مالیاتی امور پر بریفنگ دی جائے گی، جس میں کابینہ اور پی ٹی آئی کے ارکان قومی اسمبلی شریک ہوں گے۔مشیرِ خزانہ عبدالحفیظ شیخ سمیت حکومتی اقتصادی ٹیم کے ارکان بھی بریفنگ میں شرکت کریں گے۔

لاہور(ایمرا نیوزآن لائن) پاکستان اور انگلینڈ کے درمیان دوسرا ون ڈے انٹرنیشنل آج ساؤتھمپٹن میں کھیلاجائے گا۔جس کے لئے قومی ٹیم نے بھرپور پریکٹس کی۔ میچ پاکستانی وقت کےمطابق دوپہر 3 بجے شروع ہوگا۔آل راؤنڈرشعیب ملک بھی ٹیم کو جوائن کر چکے ہیں۔پریکٹس سیشن میں کھلاڑیوں نے بولنگ، بیٹنگ اور فیلڈنگ پر بھرپور توجہ دی۔محمد حفیظ بھی بیٹنگ پریکٹس کرتے دکھائی دیئے۔انگلینڈ کےدورے کے دوران گرین شرٹس کو واحد ٹی20 میں شکست ہوچکی ہے جبکہ پہلا ون ڈے بارش کی وجہ سے منسوخ کردیا گیا تھا۔

لاہور(ایمرا نیوزآن لائن) وزارت خزانہ کا کہنا ہے کہ آئی ایم ایف سے مذاکرات میں پیش رفت ہوئی ہے، مذاکرات آج اور کل بھی جاری رہیں گے۔آئی ایم ایف سے معاہدے کے بارے میں جو اطلاعات ملی ہیں ان کے مطابق معاہدے کے مطابق ملک میں نئے ٹیکسز لگیں گے، ڈالر پر حکومتی کنٹرول ہٹانے کی بھی تجویز ہے، جبکہ بجلی اور گیس کی قیمتوں میں بھی مزید اضافہ ہو گا۔آئی ایم ایف سے جلد تین سالہ قرض معاہدے کو حتمی شکل دیے جانے کا امکان ہے، پاکستان شرطیں مان گیا تو معاہدے کے تحت پاکستان کو 6 ارب 40 کروڑ ڈالر کا قرض ملنے کی توقع ہے۔قرض معاہدے کی شرائط کے مطابق بجٹ میں 700 ارب روپے کے نئے ٹیکس لگائے جائیں گے۔

توانائی سمیت متعدد شعبوں میں سبسڈی ختم کی جائے گی، شرح سود 12 فیصد تک لائی جائے گی، بجلی اور گیس کی قیمتیں سال میں 2 مرحلوں میں بڑھائی جائیں گی۔وزارت خزانہ کا کہنا ہے کہ آئی ایم ایف سے مذاکرات آج اور اتوار کو بھی جاری رہیں گے، ذرائع کے مطابق وزیراعظم نے آئی ایم ایف، وزارت خزانہ اسٹاف لیول معاہدے کا مسودہ مسترد کر دیا۔ذرائع کے مطابق وزیراعظم افراط زر کے معاملے پر آئی ایم ایف کی شرائط میں نرمی چاہتے ہیں۔

ذرائع کا کہنا ہے کہ وزیراعظم نے ٹیکس وصولی ہدف کم کرنے کے لیے آئی ایم ایف کو راضی کرنے کی ہدایت کی ہے اور کہا ہے کہ ٹیکس استثنیٰ سے متعلق بھی آئی ایم ایف سے مزید رعایت لی جائے۔وزیراعلیٰ پنجاب کے ترجمان شہباز گل کہتے ہیں کہ نون لیگ اور پیپلزپارٹی نے پاکستان کو قرضوں کی دلدل میں دھکیلا، دونوں جماعتوں کی حکومتوں میں 50 ارب ڈالرتک قرضہ لیاگیا۔انہوں نے مزید کہا کہ آئی ایم ایف سے معاہدہ گزشتہ حکومتوں کے کرتوتوں کی وجہ سے کرنا پڑ رہا ہے، وزیر اعظم عمران خان کی قیادت میں پاکستان جلد قرضوں سے جان چھڑا کر ترقی کی راہ پر گامزن ہو گا۔

اسلام آباد: (ایمرا نیوزآن لائن) پاکستان آئی ایم ایف کے درمیان قرضے پروگرام کا مسودہ آخری مراحل میں داخل ہو گیا۔ ذرائع کا کہنا ہے یکم جولائی سے بجلی مرحلہ وار مہنگی جبکہ 700 ارب روپے کے ٹیکس لگیں گے۔ذرائع کے مطابق آئی ایم ایف سے قرض کے حوالے سے مسودہ آخری مرحلہ میں داخل ہو گیا ہے، پاکستان آئی ایم ایف سے 7 سے 8 ارب ڈالر سے زائد قرض حاصل کرے گا۔ 3 سالہ پروگرام پر معاہدہ آج طے پا جائے گا جس کے تحت یکم جولائی سے بجلی مہنگی ہوگی، بجلی کی قیمتوں میں اضافہ 2 مراحل میں ہوگا۔

یکم جولائی سے 700 ارب سے زائد کے ٹیکس لگیں گے۔ گیس کی قیمتیں دوسرے مر حلے میں بڑھائی جائیں گی۔ذرائع کے مطابق ترقیاتی بجٹ گزشتہ سال کی سطح پر منجمد کیا جائے گا، خسارے میں چلنے والے اداروں کی نجکاری کی جائے گی، ایکسچینج ریٹ طے کرنے میں اسٹیٹ بینک خود مختار ہوگا، بجٹ خسارہ کم کر کے 3 سال میں 6.8 فیصد سے 4 فی صد تک لایا جائے گا، مالی نظم و ضبط پر عمل اور غیر ترقیاتی اخراجات محدود رکھے جائیں گے۔

لاہور(ایمرا نیوزآن لائن) آج ملک بھر میں زکوٰۃ کی کٹوتی کے لیے تمام بینک اور مالیاتی ادارے بند ہیں ، تاہم بینک ملازمین کی چھٹی نہیں ہے۔اسٹیٹ بینک کی جانب سے جاری کیے گئے اعلامیے کے مطابق یکم رمضان کو بینک کھاتوں سے زکوٰۃ کی کٹوتی ہو گی، جس کی وجہ سے تمام مالیاتی ادارے اور بینک آج یکم رمضان کو بند رہیں گے۔واضح رہے کہ وزارت مذہبی امورکی جانب سے رواں سال کے لیے زکوٰۃ کا نصاب 44 ہزار 415 روپے مقرر کیا گیا ہے۔

زکوٰۃ کے نصاب کے حوالے سے اسٹیٹ بینک نے وزارت مذہبی امور سے مشاورت کی اور زکوٰۃ کا نصاب ساڑھے 52 تولے چاندی کی قیمت کی بنیاد پر کیا گیا ہے۔واضح رہے کہ بینکوں میں سیونگ اکاؤنٹس میں 44 ہزار 415 روپے یا اس سے زائد رقم موجود ہونے پر ازخود ڈھائی فیصد زکوٰۃ آج منہا کر لی جائے گی جبکہ کرنٹ اکاؤنٹ اور غیر ملکی کرنسی اکاؤنٹس پر زکوٰۃ نہیں کٹے گی۔

کراچی: (ایمرا نیوزآن لائن) سٹاک مارکیٹ میں آج کاروباری ہفتے کے آخری روز مندی کے بادل گرجتے رہے اور 244 پوائنٹس کی کمی دیکھنے میں آئی۔سٹاک مارکیٹ میں منفی رجحان کے سبب ٹریڈنگ3 سال کی کم ترین سطح پرپہنچ گئی۔ کاروبار کے دوران مارکیٹ میں 244 پوائنٹس کی کمی ہوئی جس کے بعد 100 انڈیکس 36 ہزار 303 پوائنٹس کی سطح پرآ گیا۔تجزیہ کاروں کے مطابق حکومت کی ٹھوس پالیسیاں اپنانے تک مارکیٹ میں غیر یقینی کی صورتحال برقرار رہے گی اور سرمایہ کار پیسہ نکالنے کو زیادہ ترجیح دیں گے۔

اسلام آباد(ایمرا نیوزآن لائن) پاکستان تحریک انصاف آج تئیسواں یوم تاسیس منائے گی، بانی چیئرمین اور وزیراعظم عمران خان کنونشن سینٹر اسلام آباد میں تقریب سے خصوصی خطاب کریں گے۔تقریب کے انتظامات اور تیاریوں کا جائزہ لینے کے لیے معاون خصوصی اطلاعات فردوس عاشق اعوان نے کنونشن سینٹر کا دورہ کیا، اس موقع پر میڈیا سے گفتگو کرتے ہوئے فردوس عاشق اعوان نے کہا کہ عمران خان نے آج سے 23 سال پہلے جو پودا لگایا آج وہ تناور درخت بن چکا ہے۔

فردوس عاشق اعوان نے مزید کہا ہے کہ عمران خان نے نوجوانوں کو متحرک کیا اور آج وہ پارٹی کا اثاثہ ہیں، عمران خان کی جدوجہد کا پھل عوام کو ضرور ملے گا۔انہوں نے کہا کہ عوام کو یکساں حقوق اور فوری انصاف اور کرپشن سے پاکستان کے نعرے کے ساتھ عمران خان نکلے تھے، جس نظام کو عمران خان نے چیلنج کیا تھا اس کے حل کے لئے کام کرنا ہے۔ان کا کہنا ہے کہ عمران خان کی جدوجہد کے نتیجے میں پاکستان قائد اعظم کا پاکستان بنے گا، پاکستان کو مسائل سے نکالنے میں عمران خان کا ساتھ دیں۔