Tag train

خیرپور(وقت آن لائن)سندھ کے شہر خیر پور میں واری گوٹھ کے مقام پر بزنس ایکسپریس کی 6 بوگیاں ٹریک سے اتر گئیں۔

ریلوے ذرائع کے مطابق ٹرین کے پٹری سے اترنے کے حادثے کے باعث 500 میٹر تک ٹریک کو نقصان پہنچا ہے۔حادثے کے بعد اپ لنک اور ڈاؤن لنک ٹریفک کے لیے بند کر دیئے گئے ہیں، حادثے کی شکار ٹرین لاہور سے کراچی آ رہی تھی۔

اسلام آباد(ایمرا نیوز آن لائن)
پاکستان ریلوے نے محکمے کے ریٹائرڈ ڈرائیورز کو دوبارہ نوکری پر رکھنے کے لیے غور شروع کردیا۔ چیئرمین اسد جونیجو کی زیرصدارت سینیٹ کی قائمہ کمیٹی برائے ریلوے کا اجلاس ہواجس میں ریلوے حکام نے جناح ایکسپریس اور سکھر ریلوے حادثے پر حکام کو بریفنگ دی جب کہ وزیر ریلوے شیخ رشید بھی قائمہ کمیٹی میں پیش ہوئے۔

جناح ایکسپریس حادثے پر ریلوے حکام نے بتایا کہ خراب سگنلز سے پہلے رپیٹر سگنل اشارہ دے رہا تھا، جناح ایکسپریس کے ڈرائیور نے سگنل کو نظر انداز کیا، ڈرائیور ٹرین 50 کلو میٹر فی گھنٹہ کی رفتار سے چلا رہا تھا جب کہ اسٹیشن پر رفتار15 کلومیٹرفی گھنٹہ ہونی چاہیے اس لیے بظاہر ذمہ دار ٹرین ڈرائیور ہی ہے۔

وزیرریلوے شیخ رشید نے کمیٹی کو بتایا کہ اسسٹنٹ ڈرائیورز کی ٹریننگ کیلئے حکمت عملی تیار کررہے ہیں، ریلوے کے ریٹائرڈ ڈرائیورز کو دوبارہ رکھنے پر غور کررہے ہیں، ریٹائرڈ ڈرائیور کی بھرتیوں کیلئے وزیراعظم سے اجازت لیں گے۔

شیخ رشید کی تجویز پر چیئرمین کمیٹی نے کہا کہ ریٹائرڈ ڈرائیورز کو ٹرین کیسے دوبارہ چلانے دیں گے، ریٹائرڈ ڈرائیورز سے ٹرینیں دوبارہ چلوانا خطرناک ہے۔ ریلوے کی کارکردگی پر وزیر ریلوے کا کہنا تھا کہ 24 اگست کو ریلوے کی کارکردگی پوری قوم کے سامنے لاؤں گا، ڈالرمہنگا ہونے سے پرزوں کی خریداری کی مد میں بھی اخراجات میں اضافے کا سامنا ہے، گالف سٹی کیس جیت گئے تو ریلوے اپنے پیروں پر کھڑا ہوجائےگا، خودکار کمانڈ اینڈ کنٹرول سسٹم پر کام شروع کردیا ہے، اس سسٹم سے ٹرین کی ٹریکنگ میں آسانی ہوگی، سگنلز اور لائنوں کی مرمت کے بعد انجنوں کی تبدیلی پر غور کریں گے۔

رحیم یار خان مال گاڑی حادثہ: دوسرے روز بھی ٹرینوں کا شیڈول متاثر
مسافر رُل گئے ،رات عذاب میں گزاری،انتظامیہ غائب
کراچی(ایمرا نیوز آن لائن) رحیم یار خان میں ریلوے ٹریک متاثر ہونے سے کراچی کینٹ سٹیشن پر ہزاروں مسافر رل گئے، بچوں، خواتین اور بزرگوں نے رات عذاب میں گزاری۔ ریلوے حکام کے مطابق ریلوے ٹریک جزوی طور پر بحال کر دیا گیا ہے۔ رحیم یار خان میں مال گاڑی کو حادثے کے بعد کراچی میں بھی ٹرینوں کی آمدورفت بری طرح متاثر رہی۔ کینٹ سٹیشن پر ہزاروں مسافر وں کی نیندیں حرام ہوگئیں، بچوں، خواتین، بزرگوں کی ساری رات انتظار میں ہی کٹ گئی لیکن ظالم ٹرین نہ آئی۔بدھ کے روز بھی کینٹ سٹیشن پر مسافروں کی طویل لائن لگی رہی، کوئی زمین پر بیٹھ کر وقت گزارتا رہا تو کوئی ادھر ادھر چکر لگا تا رہا۔ سٹیشن پر سہولیات کی کمی نے بھی مسافروں کی پریشانی میں اضافہ کیا، انتظامیہ غائب رہی جبکہ مسافر بے سروسا مانی کی حالت میں پڑے رہے۔

کراچی (ایمرا نیوزآن لائن) پاکستان پیپلز پارٹی کے چیئرمین بلاول بھٹو زرداری کارروان بھٹو مارچ کی قیادت کرتے ہوئے آج خصوصی ٹرین کے ذریعے کراچی سے لاڑکانہ کے لیے روانہ ہوں گے ،تیاریاں کر لی گئیں ،بلاول بھٹو 25 ریلوے سٹیشنز پر کارکنوں سے خطاب کریں گے ۔ریلوے حکام کے مطابق بلاول بھٹو زرداری کے لیے کراچی سے لاڑکانہ تک خصوصی ٹرین چلانے کی درخواست دی گئی تھی جسے منظور کر لیا گیا۔ خصوصی ٹرین 10 ڈبوں پر مشتمل ہو گی جس میں ایک سیلون، ایک ایئرکنڈیشن سلیپر اور اکانومی کلاس کی 8 بوگیاں شامل ہیں۔بلاول بھٹو کے لیے ریلوے سیلون کراچی پہنچ گیاہے ، جس میں وہ اور ان کا سٹاف سفر کرے گا، اس سیلون میں ڈبل بیڈ،صوفہ،کچن،ایل سی ڈی،وی آئی پی باتھ روم کی سہولیات میسرہونگی، آج صبح 10بجے کراچی کینٹ سٹیشن سے بلاول بھٹوزرداری کاروان کی قیادت کرتے ہوئے روانہ ہونگے ،ریلوے سمیت سندھ پولیس نے سکیورٹی کے خصوصی انتظامات کیے ہیں۔ذرائع کا کہنا ہے کہ وی وی آئی پیز کو سکیورٹی فراہم کرنے والے سپیشل سکیورٹی یونٹ کے 50سے زائد افسران و اہلکار چیئرمین پیپلزپارٹی کے ہمراہ سفر کریں گے جبکہ پیپلز پارٹی کے رہنماؤں، کارکنوں اور میڈیا کی ٹیم بھی خصوصی ٹرین میں سفر کرے گی۔دوسری طرف سانگھڑمیں بلاول بھٹو کی آمد کی تیاریوں کے سلسلہ میں سرکاری مشینری کا بے دریغ استعمال کیاگیا،شہدادپوربلدیہ نے ریلوے سٹیشن کی دھلائی میں سرکاری فائربریگیڈ کااستعمال کیا،شہرکوپارٹی پرچموں سے دلہن کی طرح سجایاگیا،شہرمیں پارٹی بینرزلگانے کیلئے بھی سرکاری مشینری استعمال کی گئی۔

لاہور(ایمرا نیوزآن لائن)خواتین کو ڈرائیونگ سیٹ پر بٹھا کر لاہور میں ریلوے ڈرائیور نے سینکڑوں مسافروں کی جانیں داﺅ پر لگا دی ، لاہور میں ٹرین ڈرائیور نے غیر ذمہ داری کا مظاہرہ کرتے ہوئے خواتین کو ڈرائیونگ سیٹ پر بٹھا دیا، سوشل میڈیا پر وائرل ہونے والی ویڈیو میں دیکھا جاسکتا ہے کہ خواتین کو ڈرائیونگ سیٹ پر بٹھا کر ریلوے ڈرائیور نے سینکڑوں مسافروں کی جانیں داﺅ پر لگا دیں جب کہ ڈرائیور خواتین کو مزید رفتار بڑھانے کا کہتا ہے جب کہ خود خواتین کی مختلف سٹائل سے ویڈیو بنا رہا ہے ۔ ریلوے حکام کے مطابق ریلوے میں ٹرین انجن چلانے کے لئے خواتین ٹرین ڈرائیو بھرتی ہی نہیں جب کہ ریلوے انجنوں میں غیر متعلقہ افراد کے داخلے پر بھی پابندی ہے۔ اس سلسلے میں ریلوے انتظامیہ کا کہنا ہے کہ اس میں کچھ واضح نہیں، بعض اوقات کوئی انجن دیکھنے کے لئے بھی چڑھ جاتا ہے ، چلتے انجن میں کسی فیلمی کو سوار کرکے سفر نہیں کرایا گیا، ویڈیو میں یہ بھی واضح نہیں یہ کونسا مقام ہے۔

قصور(نیٹ نیوز/ایمرا نیوز) نجی شعبے کے اشتراک سے چلائی گئی پہلی فریٹ ٹرین کراچی سے پریم نگر ڈرائی پورٹ قصور پہنچ گئی، وزیر ریلوےشیخ رشید احمد کہتے ہیں کہ تجربہ کامیاب رہا تو نجی شعبے کے اشتراک سے مزید کارگو ٹرینیں بھی چلائی جائیں گی۔ریلوے وزیر شیخ رشید احمد نے 25 دسمبر کو کراچی میں پہلی فریٹ ٹرین کا افتتاح کیا تھا، نجی شعبے کے اشتراک سے چلنے والی پہلی کارگو ٹرین مقررہ وقت پر پریم نگر ڈرائی پورٹ قصورپہنچ گئی۔ذرائع کا بتانا ہے کہ نجی کمپنی ٹرین چلانے کے علاوہ تاجروں کا مال ان کے کاروباری مقامات تک پہنچانے کی بھی پابند ہوگی۔وزیرریلوے شیخ رشید احمد کہتے ہیں کہ ریلوے کا خسارہ مسافر ٹرینوں سے نہیں ،بلکہ زیادہ مال گاڑیاں چلانے سے کم ہوگا، تاجر کارگو ٹرین سے متعلق معلومات ٹریکنگ سسٹم سے حاصل کرسکتے ہیں۔