Category شوبز

بالی وڈ کی معروف اداکارہ دیپیکا پڈوکون نے خود کو بھارتی علاقے اندرا نگر کی غنڈی قرار دے دیا۔

سوشل میڈیا پلیٹ فارم انسٹاگرام پر اداکارہ دیپیکا پڈوکون نے بچپن کی تصویر شیئر کرتے ہوئے کیپشن بھی درج کیا۔

اداکارہ نے اپنی پوسٹ میں لکھا کہ اندرانگر کی غنڈی ہوں میں۔

دیپیکا کی جانب سے شیئر کی گئی تصویر میں انہیں موسم سرما کی اونی کیپ اور سویٹر پہنے، منہ میں ہاتھ لیے مسکراتے ہوئے دیکھا جاسکتا ہے۔

دوسری جانب اداکارہ کی پوسٹ کو کچھ ہی گھنٹوں لاکھوں مرتبہ لائیک کیا جا چکاہے۔

اداکارہ میرا کا کہنا ہے کہ وہ افسردہ ہیں لیکن اس کا مطلب یہ نہیں کہ ان کی ذہنی حالت ٹھیک نہیں۔

نجی ویب سائٹ کو دیے گئے حالیہ انٹرویو کے دوران میرا نے مینٹل اسپتال میں داخلے اور ذہنی حالت خراب ہونے سے متعلق خبروں پر وضاحت پیش کردی۔

میرا کا کہنا تھا کہ امریکا میں وہ اسپتال کورونا ویکسی نیشن کے لیے گئی تھیں تاہم ان کی مینٹل اسپتال میں داخل ہونے کی خبریں وائرل ہوگئیں۔

اداکارہ نے مزید کہا کہ ذہنی حالت ایک سنگین مسئلہ ہے اور میں نہیں جانتی کہ لوگ ذہنی حالت سے متعلق کیسے باتیں بنا لیتے ہیں اور پھر مذاق اڑاتے ہیں۔

میرا نے افسردہ ہونے کی وجہ سے متعلق انکشاف کرتے ہوئے بتایا کہ نئے پراجیکٹ نہ ملنے پر اگرچہ وہ افسردہ ہیں لیکن ذہنی طو پر بیمار نہیں اور ان خبروں نے انہیں کافی افسردہ کیا۔

واضح رہے کہ سوشل میڈیا پر میرا کی والدہ کی ایک ویڈیو وائرل ہوئی تھی جس میں ان کا کہنا تھا کہ ان کی بیٹی کو کسی نے امریکا کے مینٹل اسپتال میں داخل کرادیا ہے۔

بعد ازاں اداکارہ میرا کے سسر راجہ پرویز نے دعویٰ کیا کہ ان کے بیٹے اور میرا کے شوہر کیپٹن نوید نے 50 ہزار ڈالر کی گارنٹی کے عوض میرا کو اسپتال سے فارغ کرایا۔

گزشتہ کچھ سال سے پاکستانی ڈراموں کو ان کی کہانیوں اور کرداروں کی وجہ سے کافی تنقید کا سامنا ہے اور حال ہی میں نشر ہونے والے ڈرامے ’اوئے موٹی‘ کی کہانی پر بھی لوگ ناخوش دکھائی دیے۔

ایکسپریس انٹرٹینمنٹ پر نشر ہونے والے ڈرامے ’اوئے موٹی‘ کو اگرچہ ابتدائی طور پر رواں برس فروری میں نشر کیا گیا تھا اور 10 اپریل تک اس کی 9 اقساط دکھائی جا چکی تھیں۔

تاہم ڈرامے کے شروع ہونے کے دو ماہ بعد سے اب تک اس پر تنقید کی جا رہی ہے اور سوشل میڈیا صارفین مذکورہ ڈرامے پانچویں گریڈ کا ڈراما تک قرار دے رہے ہیں۔

’اوئے موٹی‘ کا آغاز فروری کے وسط سے ہوا تھا اور ڈرامے میں فربہ خواتین کو پیش آنے والی مشکلات دکھائی جاتی ہیں۔

ڈرامے کی ہر قسط میں کسی نہ کسی خاتون یا لڑکی کو ان کے زائد وزن اور موٹاپے کی وجہ سے مشکلات کا شکار دکھایا گیا ہے۔

ڈرامے میں دکھایا گیا ہے کہ کس طرح خواتین یا نوجوان لڑکیوں کو ان کی جسمانی ساخت پر تضحیک کا نشانہ بنا کر نہ صرف کام کی جگہ پر بار بار طعنے دیے جاتے ہیں بلکہ انہیں ازدواجی زندگی میں بھی مشکلات کا سامنا ہوتا ہے۔

ڈرامے میں دکھایا گیا ہے کہ فربہ لڑکیاں یا زائد وزن کی حامل خواتین کو کس قدر گھر سے لے کر دفتر اور ہسپتالوں تک دوران علاج وزن اور جسمانی ساخت کے طعنے دیے جاتے ہیں۔

اگرچہ ڈرامے کا مقصد سماج میں اضافی وزن والی خواتین سے متعلق شعور اجاگر کرنا ہے تاہم ڈرامے کو پیش کرنے کے انداز پر لوگ اس پر سوشل میڈیا پر تنقید کرتے دکھائی دیے۔

سوشل میڈیا پر ’اوئے موٹی‘ پر اس وقت تنقید شروع ہوئی جب ڈرامے کی نویں قسط کا پرومو جاری کیا گیا، جس میں اداکارہ کنول آفتاب کو فربہ حالت میں دکھایا گیا۔

پرومو میں دکھایا گیا کہ کس طرح 160 کلو وزن رکھنے کی وجہ سے اداکارہ کو مشکلات پیش آتی ہیں اور کافی محنت کے بعد جب ایک شخص سے ان کی منگنی ہوتی ہے تو وہ منگنی کے موقع پر ہی انہیں وزن کا طعنہ دیتے ہیں۔

پرومو میں دکھایا گیا کہ منگیتر ادکارہ سے ان کا وزن 160 کلو سے 70 کلو تک لے آنے کا مطالبہ کیا اور ایسا کرنے پر ہی وہ ان سے شادی کی شرط رکھتا ہے۔

مذکورہ پرومو جاری ہونے کے بعد سوشل میڈیا پر صارفین نے ڈرامے کی ٹیم کو کہانی اور کرداروں کی وجہ سے تنقید کا نشانہ بنایا اور بعض افراد نے ڈرامے کو پانچویں گریڈ کا ڈراما قرار دیا۔

بعض مداحوں نے ڈرامے کی کہانی اور کرداروں کی ساخت پر شدید برہمی کا اظہار کیا جب کہ بعض نے لکھا کہ صرف اس بات کا اندازہ لگائیں کہ مذکورہ موضوع پر ڈراما بنانے کے لیے کیسے لوگوں نے سرمایہ کاری کی، کیسے لوگ خیال لے آئے اور وقت لگا کر ڈراما بنایا۔

بعض افراد نے تو یہ تک لکھا کہ بطور ملک ہم اسی لیے ہی ناکام ہیں، کیوں کہ ہم ’اوئے موٹی‘ جیسے ڈرامے بناتے ہیں اور ان میں ٹک ٹاکرز کو کاسٹ کرتے ہیں۔

لوگوں کی تنقید کے بعد ’اوئے موٹی‘ میں 160 کلو وزنی لڑکی کا کردار ادا کرنے والی ٹک ٹاکر کنول آفتاب نے انسٹاگرام پر پوسٹ شیئر کی اور بتایا کہ انہوں نے کتنی محنت اور وقت لگا کر مذکورہ ڈراما بنایا۔

اداکارہ نے وضاحت کی کہ انہوں نے ڈرامے میں موٹی لڑکی کا کردار صرف اور صرف ان خواتین کے مسئلے کو اجاگر کرنے کے لیے کیا، جنہیں ان کی جسمانی ساخت پر تضحیک کا نشانہ بنایا جاتا ہے۔

کنول آفتاب نے لکھا کہ لوگ نہ تو کسی ’موٹی‘ کو جینے دیتے ہیں اور نہ ہی کسی ’پتلی‘ کو زندگی سکون سے گزارنے دیتے ہیں اور انسان کبھی بھی خوش نہیں رہتا۔

اداکارہ نے لکھا کہ ہر انسان میں صلاحیتیں موجود ہوتی ہیں اور کسی کو ان کی جسمانی ساخت پر نہیں پرکھا جا سکتا۔

وزیر اعظم عمران خان کی جانب سے ملک میں بڑھتے ہوئے جنسی ہراسانی اور ’ریپ‘ کے واقعات کو ’فحاشی‘ سے جوڑنے پر جہاں سیاسی و سماجی شخصیات نے رد عمل دیا، وہیں شوبز شخصیات بھی ان کے بیان سے ناخوش دکھائی دے رہی ہیں۔

وزیر اعظم عمران خان نے 4 اپریل کو ٹیلی فون پر براہ راست عوام کے سوالات کے جواب دیتے ہوئے ملک میں بڑھتے ریپ واقعات سے متعلق ایک سوال کے جواب میں عریانیت یا خواتین کے بولڈ لباس کو ’ریپ‘ واقعات سے جوڑا تھا۔

عمران خان نے واضح طور پر یہ نہیں کہا تھا کہ خواتین کا بولڈ لباس ہی ریپ کا سبب بنتا ہے تاہم انہوں نے بے پردگی اور فحاشی کو ایسے واقعات سے جوڑا تھا۔

وزیر اعظم نے کہا تھا کہ ’معاشرے میں جتنی فحاشی بڑھے گی، اس کے اتنے ہی اثرات ہوں گے اور یہ کہ ہر انسان میں اتنی طاقت نہیں ہوتی کہ وہ خود کو روک سکے‘۔

ان کے ایسے بیان پر متعدد سیاسی و سماجی شخصیات سمیت دیگر خواتین نے بھی اختلاف کرتے ہوئے ان پر تنقید کی تھی جب کہ شوبز شخصیات کی اکثریت بھی ان سے نالاں دکھائی دی تاہم بعض شخصیات کے مطابق وزیر اعظم کے بیان کا مطلب غلط لیا گیا۔

حمزہ علی عباسی نے وزیر اعظم کے بیان کے تناظر میں سلسلہ وار ٹوئٹس میں مرد و خواتین دونوں کو پردے اور اپنی حفاظت کرنے کے مذہبی احکامات یاد دلائے۔

حمزہ علی عباسی کا کہنا تھا کہ مذہبی کتاب میں درج ہے کہ دونوں مرد و خواتین ایک دوسرے کے لیے جنسی کشش رکھتے ہیں، اس لیے دونوں کو اپنی حیا کی حفاظت کی تلقین کی گئی اور مرد حضرات کو اپنی نگاہیں نیچے رکھنے کا حکم دیا گیا۔

حمزہ علی عباسی نے واضح طور پر وزیر اعظم کے بیان کی حمایت یا اس سے اختلاف نہیں کیا بلکہ دونوں مرد و خواتین کو مشورہ دیا۔

موسیقار روحیل حیات نے اپنی ٹوئٹ میں اگرچہ واضح طور پر عمران خان کی حمایت نہیں کی مگر انہوں نے خیال ظاہر کیا کہ وزیر اعظم کے بیان کا مطلب غلط سمجھا گیا۔

روحیل حیات نے لوگوں کو یقین دلانے کی کوشش کی کہ وزیر اعظم نے اپنے بیان میں ’ریپ‘ واقعات کی مذمت کی اور ایک لیڈر ہونے کے ناطے انہوں نے حقائق بیان کیے کہ فحاشی کے کیا اثرات ہو سکتے ہیں۔

اداکار خالد عثمان بٹ نے بھی وزیر اعظم کے بیان پر ٹوئٹس کیں اور کہا کہ وزیراعظم نے ایک طرح سے متاثر ہونے والے فرد کو ہی مجرم قرار دیا۔

خالد عثمان بٹ نے لکھا کہ وزیر اعظم کا یہ کہنا کہ ہر مرد میں خود کو قابو کرنے کی طاقت نہیں ہوتی کا مطلب جنسی تشدد کو بڑھاوا دینا ہے۔

ساتھ ہی انہوں نے وزیر اعظم کو مشورہ دیا کہ وہ گلیوں میں قانون کا نفاذ کریں، پولیس اہلکار مقرر کریں تاکہ امن قائم ہو سکے۔

خالد عثمان بٹ نے ٹوئٹ میں پاکستان میں یومیہ ریپ جنسی تشدد کے واقعات کے اعداد و شمار دیے اور لکھا کہ ملک میں یومیہ 11 ریپ کیسز رپورٹ ہوتے ہیں۔

اداکار عدنان صدیقی نے بھی وزیر اعظم کے بیان سے اختلاف کیا اور لکھا کہ اس میں کوئی عقلمندی کی بات نہیں کہ بعض مرد حضرات کو خود کو قابو کرنے کی طاقت نہیں ہوتی۔

انہوں نے وزیر اعظم کی جانب سے خواتین کے لباس اور ان کی پسند سے متعلق بیان کو پدرشاہانہ سوچ کے مترادف قرار دیا۔

اداکارہ ربیا چوہدری نے مختصر ٹوئٹ میں وزیر اعظم عمران خان کے بیان کی مذمت کی۔

آمنہ الیاس نے وزیر اعظم کے بیان پر ویڈیو جاری کرتے ہوئے ان سے معافی کا مطالبہ کیا اور ساتھ ہی واضح کیا کہ اگر وہ معافی نہیں مانگتے تو وہ ان کو اپنا وزیر اعظم نہیں مانیں گی۔

انہوں نے ویڈیو میں کہا کہ قائد اعظم اور ذوالفقار علی بھٹو کے بعد پاکستانی لوگ سب سے زیادہ عمران خان کی ہی بات سنتے ہیں، انہوں نے قوم کو ’ارطغرل غازی‘ دیکھنے کا کہا تو قوم نے دیکھا، انہوں نے قوم کو کتاب پڑھنے کی تجویز دی تو لوگوں نے کتاب پڑھی۔

آمنہ الیاس نے خواتین کے لباس سے متعلق بیان وزیر اعظم کو تنقید کا نشانہ بناتے ہوئے مثالیں دی کہ ملک میں جانوروں کے ساتھ بھی ریپ کے واقعات کی خبریں سامنے آتی ہیں۔

اداکارہ انوشے اشرف نے بھی وزیر اعظم کے بیان کی مذمت کی اور لکھا کہ کس طرح خواتین کے لباس کو ریپ واقعات سے جوڑا جا سکتا ہے؟ کیوں کہ ملک میں بچوں اور جانوروں کے ساتھ بھی برے سلوک کے واقعات رپورٹ ہوتے رہتے ہیں

مقبول بھارتی رئیلیٹی شو بگ باس کے سیزن 9 کی کنٹسٹنٹ اداکارہ ریمی سین کا کہنا ہے کہ وہ ہمیشہ سوچا کرتی تھیں کہ بگ باس ایک بیکار شو ہے لیکن اس میں صرف پیسوں کے لیے کام کیا۔

بھارتی میڈیا کو دیے گئے انٹرویومیں ریمی سین نے کہا کہ انہوں نے بگ باس کے سیزن 9 میں کام صرف اس لیے کیا کیوں کہ انہیں اچھے خاصے پیسوں کی پیش کش ہوئی تھی۔

انہوں نے کہا کہ وہ ہمیشہ سوچا کرتی تھیں کہ بگ باس ایک بیکار شو ہے جہاں لوگ 3 ماہ تک کافی کے لیے لڑتے ہیں لیکن کیونکہ بگ باس اچھے خاصے پیسوں کی آفر کرتا ہے لہٰذا کام کرنے کے لیے راضی ہوگئی۔

میں اس گھر (بگ باس) میں داخل ہوئی تو مجھے محسوس ہوا کہ یہ کس طرح آپ کی نفسیات سے کھیل رہا ہے: اداکارہ ریمی سین
ریمی کے مطابق بگ باس شو ایک ایسی تعطیلات کی طرح لگتا ہے جس کا آپ کو معاوضہ ملتا ہے لیکن جب میں اس گھر (بگ باس) میں داخل ہوئی تو مجھے محسوس ہوا کہ یہ کس طرح آپ کی نفسیات سے کھیل رہا ہے، بگ باس میں ہر شخص ایک دوسرے کو برا کہتا ہے، میں نہیں لڑتی کیونکہ یہ میرے نزدیک کوئی حل نہیں ہے۔

واضح رہے کہ اس سے قبل بھی ریمی سین بگ باس کے معاوضے سے متعلق گفتگو کرچکی ہیں جس میں ان کا کہنا تھا کہ میں نے بگ باس صرف پیسوں کے لیے کیا مجھے بگ باس نے 49 دنوں میں 2 کروڑ 25 لاکھ دیے جب کہ کوئی بھی شخص اتنے مختصر وقت میں اتنا پیسہ نہیں کماسکتا۔

بھارت کے نامور لکھاری اور شاعر جاوید اختر کے صاحبزادے اداکارفرحان اختر اب ہالی وڈ میں بھی نظر آئیں گے۔

بھارتی میڈیا رپورٹس میں دعویٰ کیا گیا ہے فرحان اختر نے ہالی وڈ سائنس فکشن سپر ہیرو فلمیں بنانے والے ادارے مارول اسٹوڈیو کے ساتھ ایک پروجیکٹ سائن کیا ہے جب کہ اداکار اس وقت فلم کی شوٹنگ کے سلسلے میں انٹرنیشنل کاسٹ اور عملے کے ہمراہ تھائی لینڈ کے دارالحکومت بنکاک میں موجود ہیں۔

رپورٹ میں کہا گیا ہے فلم اور شوٹنگ کے حوالے سے مزید معلومات کو فی الحال خفیہ رکھا گیا ہے ۔

خیال رہے کہ مارول اسٹوڈیو عالمی سطح پر سب سے بڑے فلم اسٹوڈیو میں سے ایک تسلیم کیا جاتا ہے تاہم اب مارول اسٹوڈیو کے اگلے بین الاقوامی پراجیکٹ میں فرحان اختر کی شرکت ایک دلچسپ پیشرفت تصور کی جارہی ہے۔

مسز ورلڈ کا اعزاز رکھنے والی کیرولین جیوری کو رواں ہفتے مسز سری لنکا کا تاج اتارنے کے معاملے پر گرفتار کر لیا گیا۔

کیرولین جیوری نے مسز سری لنکا 2021 کا اعزاز پانے والی پشپیکا ڈی سلوا پر طلاق یافتہ ہونے کا جھوٹا الزام عائد کرکے ان کا تاج اتار دیا تھا جس سے وہ مبینہ طور پر زخمی ہو گئی۔

غیر ملکی میڈیا کے مطابق سری لنکن پولیس نے گزشتہ روز کیرولین جیوری کو گرفتار کیا، لیکن بعد ازاں کیرولین جیوری کو ضمانت پر رہا بھی کردیا گیا۔

پولیس ترجمان کے مطابق، سری لنکا کی پولیس کو ڈی سلوا کی جانب سے شکایت موصول ہوئی تھی کہ دوران تقریب سر سے تاج اتارے جانے کے دوران وہ زخمی ہوگئی تھیں۔

واضح رہے کہ اتوار کو ہونے والی تقریب میں پشپیکا ڈی سلوا کو مسز سری لنکا کے خطاب سے نوازا گیا تھا تاہم کچھ ہی دیر بعد 2019 کی فاتح کیرولین جیوری نے یہ دعویٰ کرتے ہوئے پشپیکا کا تاج اتاردیا کہ پشپیکا چونکہ طلاق یافتہ ہیں لہٰذا وہ اس اعزاز کی حق دار نہیں ہیں۔

اس الزام کے بعد جیوری نے مسز سری لنکا کا تاج رنر اپ خاتون کے سر پر سجا دیا تھا۔

تاہم بعد ازاں منتظمین نے پشپیکا سے معافی مانگتے ہوئے انہیں تاج واپس کر دیااور تصدیق کی کہ پشپیکا طلاق یافتہ نہیں بلکہ شوہر سے علیحدگی اختیار کیے ہوئے ہیں۔

اداکارہ میرا کے سسر راجہ پرویز نے دعویٰ کیا ہے کہ ان کے بیٹے اور میرا کے شوہر کیپٹن نوید نے 50 ہزار ڈالر کی گارنٹی کے عوض میرا کو اسپتال سے فارغ کرایا۔

میرا کو امریکی ڈاکٹر سے بدتمیزی، پروٹوکول کے ناجائز مطالبات، دھمکی آمیز اور غیرمتوازن گفتگو پرلانگ آئی لینڈ نیویارک کے اسپتال میں داخل کیا گیا تھا تاہم اب میرا کو شوہرکیپٹن نوید کی گارنٹی کے بعد اسپتال سے ہوٹل منتقل کردیا گیا ہے۔

میرا کے سسر راجہ پرویز کا کہنا ہے کہ میرا کا آج امریکا سے پاکستان کے لیے روانگی کا امکان ہے اور وہ اگلے 48 گھنٹوں میں امریکا چھوڑ دیں گے۔

خیال رہے کہ اس سے قبل اداکارہ میرا جیو نیوز سے گفتگو کے دوران امریکا میں پاگل خانے منتقل کیے جانے کے والدہ کے دعوے کی تردید کرچکی ہیں۔

میرا کا کہنا تھا کہ وہ بالکل ٹھیک ہیں اور والدہ نےبیان ذہنی دباؤ میں دیا۔

واضح رہے کہ سوشل میڈیا پر میرا کی والدہ کی ایک ویڈیو وائرل ہوئی ہے جس میں ان کا کہنا تھا کہ ان کی بیٹی کو کسی نے امریکا کے مینٹل اسپتال میں داخل کرادیا ہے۔

اداکارہ و میزبان عفت عمر نے قوائد و ضوابط کے خلاف جاتے ہوئے ویکسین لگوانے پر ازالہ کرنے کا فیصلہ کیا ہے۔

میڈیا رپورٹس کے مطابق اداکارہ عفت عمر کی جانب سے اعلان کیا گیا ہے کہ وہ 10 افراد کو کورنا ویکسین لگوائیں گی ۔

خیال رہے کہ گزشتہ دنوں طارق بشیر چیمہ کے خاندان کو کورونا کی ویکسین لگوانے کی ویڈیو وائرل ہوئی تھی، ویڈیو میں عفت عمر کو بھی کورونا کی ویکسین لگواتے دیکھا گیا تھا جس کے بعد سوشل میڈیا صارفین کی جانب سے اداکارہ کو کڑی تنقید کا نشانہ بنایا گیاتھا۔

بعد ازاں عفت عمر نے ٹوئٹ کرتے ہوئے کورونا ویکسین لگوانے پرعوام سے معذرت کی تھی اور کہا تھا کہ وہ شرمندہ ہیں، دل کی گہرائیوں سے معافی مانگتی ہیں ، اس کا ازالہ کریں گی۔

اداکارہ حرا مانی کا کہنا ہے ان کی پہلی جاب بطور مہندی آرٹسٹ تھی جہاں انہیں چاند رات پر مہندی لگانے کے 1500 سے 2000 روپے ملا کرتے تھے۔

ایک ویب انٹرویو کے دوران حرا مانی سے ان کی پہلی جاب، سیلری اور شوبز سے متعلق مختلف سوالات کیےگئے، ایک سوال کے جواب حرا مانی کا کہنا تھا کہ وہ شوبز میں انٹری سے قبل پارلر میں مہندی لگانے کا کام کیا کرتی تھیں۔

انہوں نے بتایاکہ کہ وہ علیزہ بیوٹی پارلر میں مہندی لگایاکرتی تھیں اور انہیں اس پر فخر ہے، وہ چاند رات پر پارلر میں مہندی لگاتی تھیں اور اس کے 2000 یا 1500 ملا کرتے تھےاور ان پیسوں سے فوراًجاکر چوڑیاں خرید لیتی تھیں۔

اداکارہ نے بتایا کہ پارلر کے بعد انہوں نے بینک میں ملازمت کی جہاں ان کو 12000 روپے ملا کرتے تھے۔

شوبز کیرئیر سے متعلق حرا مانی نے بتایا کہ انہوں نے کبھی آڈیشن نہیں دیا،انہوں نے پہلا ڈائیلاگ اپنے والد کو بولا تھا اور وہ یہ تھا ’اگر ابو میں نے آپ کی پسندسے شادی کی تو مرجاؤں گی لہٰذا مجھے اپنی پسند کی شادی کرنے دیں‘۔

اداکارہ کے مطابق دوسرا ڈائیلاگ انہوں نے مانی کو بولا تھا اور وہ یہ تھا کہ ’اگر مانی تم نے مجھ سے شادی نہ کی تو میں مرجاؤں گی‘۔