Category شوبز

لاہور کی سیشن کورٹ نے گلوکارہ میشا شفیع کی جانب سے لاہور کی ہی خصوصی عدالت کی جانب سے عدالت میں پیش ہونے کے خلاف دائر درخواست منظور کرلی۔

میشا شفیع نے لاہور سینٹرل کی خصوصی عدالت کی جانب سے گلوکار علی ظفر کو سوشل میڈیا پر بدنام کرنے کے ایک کیس میں طلب کر رکھا تھا۔

میشا شفیع بیرون ملک ہونے کی وجہ سے عدالت میں پیش نہیں ہو سکی تھیں تاہم عدالت نے انہیں دوبارہ پیش ہونے کا حکم دیا تھا، جس پر گلوکارہ نے عدالت طلبی کے خلاف سیشن کورٹ میں درخواست دائر کی تھی۔

میشا شفیع نے لاہور سینٹرل کی خصوصی عدالت کی جانب سے طلب کیے جانے کے خلاف سیشن کورٹ میں درخواست دائر کرتے ہوئے عدالت سے استدعا کی تھی کہ ان کا بیان آن لائن ریکارڈ کیا جائے۔

میشا شفیع نے وکیل اسد جمال کے توسط سے رواں ہفتے عدالت میں درخواست جمع کرائی تھی، جسے عدالت نے سماعت کے لیے منظور کردیا۔

سیشن کورٹ نے گلوکارہ کی سماعت منظور کرتے ہوئے خصوصی عدالت کے میشا شفیع کو سیکیورٹی بانڈ کی صورت میں ایک لاکھ روپے کے مچلکے جمع کرانے کے حکم کو بھی معطل کردیا۔

عدالت نے اپنے بیان میں کہا کہ گلوکارہ کی دائر کردہ اپیل کا مکمل فیصلہ آنے تک خصوصی عدالت کے جاری کیے گئے احکامات معطل رہیں گے۔

میشا شفیع نے سیشن کورٹ میں دائر کردہ درخواست میں کہا تھا کہ وہ اہل خانہ سمیت کینیڈا میں مقیم ہیں اور کورونا کی وبا کے باعث حکومت نے کچھ پابندیاں بھی نافذ کر رکھی ہیں، اس لیے وہ عدالت میں پیش نہیں ہو سکتیں۔

گلوکارہ نے درخواست میں کہا تھا کہ وہ ویڈیو لنک کے ذریعے اپنا بیان ریکارڈ کروانے کو تیار ہیں اور عدالت انہیں ورچوئل بیان ریکارڈ کروانے کی اجازت دے۔

درخواست میں میشا شفیع نے یہ بھی کہا کہ ان کے خلاف علی ظفر کی جھوٹی شکایت پر مقدمہ دائر کیا گیا۔

عدالت نے ان کی درخواست سماعت کے لیے منظور کرتے ہوئے خصوصی عدالت کے احکامات کو معطل کرتے ہوئے سماعت ملتوی کردی۔

واضح رہے کہ یہ کیس علی ظفر کی جانب سے میشا شفیع اور دیگر 9 افراد کے خلاف وفاقی تحقیقاتی ادارے (ایف آئی اے) میں دائر کردہ درخواست کا کیس ہے، جس میں علی ظفر نے دعویٰ کیا تھا کہ میشا شفیع اور دیگر افراد سوشل میڈیا پر انہیں بدنام کر رہے ہیں۔

علی ظفر نے نومبر 2018 میں ایف آئی اے سائبر کرائم ونگ میں شکایت درج کروائی تھی، جس کے بعد وفاقی تحقیقاتی ادارے نے تفتیش مکمل کرکے میشا شفیع اور دیگر 9 افراد کے خلاف لاہور سینٹرل کی خصوصی عدالت میں 16 دسمبر 2020 کو چالان پیش کیا گیا تھا۔

بعد ازاں ایف آئی اے نے مذکورہ کیس میں حتمی چالان عدالت میں پیش کرتے ہوئے میشا شفیع، عفت عمر، علی گل پیر، ماہم جاوید، لینا غنی، حسیمس زمان، فریحہ ایوب، سید فیضان رضا اور حمنہ رضا کے خلاف قانونی کارروئی کی استدعا کی تھی۔

تب سے مذکورہ کیس کی ہونے والے متعدد سماعتوں میں میشا شفیع ملک سے باہر ہونے کی وجہ سے پیش نہیں ہوسکیں اور اب انہوں نے عدالت کی جانب سے طلب کیے جانے پر سیشن کورٹ میں درخواست دی، جسے سماعت کے لیے منظور کردیا گیا، جس کی اگلی سماعت 19 اپریل کو ہوگی۔

پاکستانی اداکارہ میرا، جن کی منفرد انداز میں انگریزی بولنے کی ویڈیوز وائرل ہوتی رہی ہیں اور انہیں درست انداز میں انگریزی نہ بول پانے پر بھی تنقید کا نشانہ بنایا جاتا رہا ہے، اب ان سے متعلق یہ خبریں زیر گردش ہیں کہ انہیں مبینہ طور امریکا میں پاگل قرار دے کر ہسپتال میں داخل کرایا گیا ہے۔

گزشتہ روز پاکستان کے نجی چینل کی جانب سے یہ خبر نشر کی گئی تھی کہ ‘امریکا میں مقیم ڈاکٹرز نے اداکارہ میرا کو پاگل قرار دے دیا ہے اور انہیں مینٹل ہسپتال داخل کرایا گیا ہے’۔

نجی چینل کی خبر میں یہ بھی کہا گیا تھا کہ اداکارہ میرا کی والدہ نے حکومت سے مدد کی اپیل کی ہے۔

جس کے بعد دیکھتے ہی دیکھتے یہ خبر وائرل ہوگئی کہ پاکستانی اداکارہ میرا امریکا گئی تھیں اور اس دوران ڈاکٹروں نے ان کی ذہنی صحت ٹھیک نہ ہونے کے باعث انہیں مینٹل ہسپتال میں داخل کرایا۔

وائرل ہونے والی رپورٹس میں دعویٰ کیا گیا کہ اداکارہ میرا کو کورونا ویکسین لگوانے کے بعد بخار ہوگیا تھا جس کے علاج کے لیے انہوں نے ڈاکٹر سے بات کی لیکن ڈاکٹروں کے سامنے غلط انگریزی بولنے پر انہیں پاگل قرار دے دیا گیا۔

علاوہ ازیں دی نیوز کی رپورٹ میں نجی چینل دنیا نیوز کا حوالہ دیتے ہوئے کہا گیا کہ اداکارہ میرا نے اس دوران دعویٰ کیا تھا کہ انہیں وزیراعظم کی جانب سے پروٹوکول دیا گیا تھا لہذا ان کے ساتھ اچھا رویہ رکھا جائے۔

رپورٹ کے مطابق اداکارہ کے دعوے سننے کے بعد ڈاکٹر نے ذہنی صحت کے ماہرین کو بلایا اور مبینہ طور پر وہ 2 روز کے لیے کسی مینٹل نفسیاتی امراض کے مرکز میں داخل رہیں۔

اداکارہ میرا کے مبینہ طور پر پاگل خانے میں داخل ہونے سے متعلق ان کی والدہ شفقت زہرہ بخاری نے ایک ویڈیو بیان بھی جاری کیا جس میں انہوں نے مذکورہ واقعے کی تصدیق کی۔

میرا کی والدہ نے ویڈیو بیان میں کہا کہ 5 اپریل کو ان کی میرا سے بات ہوئی تھی، ‘ان کی بیٹی نے فون کرکے بتایا کہ امی جان، مجھے کسی نے پاگل خانے میں داخل کرادیا ہے’۔

انہوں نے کہا کہ ‘میرا نے بتایا کہ وہ چیختی چلاتی رہیں کہ وہ پاگل نہیں ہیں لیکن پھر بھی انہیں لے جایا گیا اور ڈاکٹرز نے کہا کہ آپ کے کچھ ٹیسٹ لیں گے’۔

اداکارہ میرا کی والدہ نے وزیراعظم عمران خان سے اپیل کی ہے کہ میری بیٹی کو بازیاب کرایا جائے، میری بیٹی پاگل نہیں اس دنیا میں وہی میرا ایک سہارا ہے۔

انہوں نے مزید کہا کہ ‘میں نے میرا سے دوبارہ رابطہ کرنے کی کوشش کی تو نہیں ہوسکا اور ان کے تمام نمبرز بھی بند ہیں’۔

اداکارہ کی والدہ نے ویڈیو بیان میں وزیراعظم عمران خان سے مدد کی اپیل کی اور کہا کہ ‘میری بیٹی کو بازیاب کرواکے پاکستان واپس بلائیں’۔

گزشتہ روز سے میڈیا و سوشل میڈیا پر گردش کرنے والی خبروں اور والدہ کے بیان کے بعد اداکارہ میرا نے ان تمام خبروں کو مسترد کرتے ہوئے کہا ہے کہ وہ مینٹل ہسپتال میں داخل نہیں ہیں۔

ڈان نیوز ڈاٹ ٹی وی سے گفتگو کرتے ہوئے اداکارہ میرا نے تردید کی کہ وہ کسی بھی مینٹل ہسپتال میں نہیں بلکہ امریکا میں اپنے سسرال میں ہیں۔

انہوں سختی سے تردید کرتے ہوئے کہا کہ میرے خلاف جھوٹی بے بنیاد خبریں نہ پھیلائی جائیں۔

میرا نے کہا کہ مجھے شوبز انڈسٹری میں کام نہیں دیا جارہا مجھے رمضان ٹرانسمیشن سے بھی کٹ کیا جارہا ہے، مجھے ٹی وی کمرشلز مییں بھی کام نہیں دیا جارہا ایک ایڈ ایجنسی مسلسل میرے خلاف پروپیگنڈا کر رہی ہے۔

اداکارہ نے مزید کہا کہ میری فلم باجی سپر ہٹ فلم ثابت ہوئی اس کے باوجود شوبز میں میرے خلاف سازشیں کی جارہی ہیں۔

میرا نے میڈیا سے اپیل کی کہ ان کے خلاف خبر کسی تصدیق کے بغیر نہ چلائی جائے۔

میرا نے بتایا کہ وہ 27 مارچ کو دبئی سے نیویارک پہنچیں اور ان کے سسر راجا خالد پرویز نے کورونا ویکسین لگوانے کا انتظام کیا تھا۔

اداکارہ میرا نے بتایا کہ انہوں نے نیویارک کے بروکلین ہسپتال سے ویکسین لگوائی اور کہا کہ پاگل قرار دینے سمیت تمام خبریں بے بنیاد ہیں۔

علاوہ ازیں سوشل میڈیا پر اداکار عمران عباس کے نام سے ایک فیس بک پوسٹ کا اسکرین شاٹ بھی گردش کررہا ہے جس کے مطابق میرا نے عمران عباس سے آج صبح بات کی تھی اور وہ بالکل ٹھیک ہیں۔

تاہم اس اسکرین شاٹ اور اس سے منسوب اکاؤنٹ کی تصدیق نہیں ہوسکی جبکہ عمران عباس کے فیس بک، انسٹاگرام اور ٹوئٹر اکاؤنٹس پر ایسی کوئی پوسٹ موجود نہیں ہیں۔

پاکستانی شوبز انڈسٹری کی سینئر اداکارہ ثمینہ احمد نے گزشتہ برس 4 اپریل کو معروف اداکار منظر صہبائی سے شادی کرکے اپنی زندگی کے نئے سفر کا آغاز کیا تھا اور اب وہ ہولی وڈ میں اپنی قسمت آزمانے کے لیے تیار ہیں۔

ثمینہ احمد ان دنوں ایک ہولی وڈ سیریز کی شوٹنگ میں مصروف ہیں، یہ انکشاف ان کے شوہر منظر صہبائی نے کیا ہے۔

فیس بک کی فوٹو اینڈ ویڈیو شیئرنگ ایپ انسٹاگرام پر شیئر کی گئی پوسٹ میں گزشتہ روز منظر صہبائی نے کورونا ویکسین لگوانے سے متعلق بتایا تھا۔

منظر صہبائی نے لکھا تھا کہ ‘اسپٹنک ویکسین کا پہلا ڈوز لگوالیا، اچھا محسوس کررہا ہوں’۔

انہوں نے مداحوں سے کہا تھا کہ اگر ممکن ہو تو وہ ویکسین لگوائیں جو ان سمیت دیگر افراد کی وائرس سے بچاؤ میں مدد کرے گی۔

منظر صہبائی کی پوسٹ پر کمنٹ کرتے ہوئے روبینہ جاوید نامی صارف نے پوچھا کہ ثمینہ جی کہاں ہیں؟

روبینہ جاوید کے اس سوال کا جواب دیتے ہوئے منظر صہبائی نے بتایا کہ ثمینہ ہولی وڈ سیریل کی شوٹنگ کے لیے تھائی لینڈ میں ہیں اور 6 مئی کو واپس آئیں گی۔

تاہم انہوں نے ثمینہ احمد کی ہولی وڈ سیریز سے متعلق مزید کوئی تفصیلات نہیں بتائیں۔

خیال رہے کہ ثمینہ احمد نے 18 سال کی عمر میں پی ٹی وی کے ڈراموں میں کام کرنے کے ساتھ شوبز میں کیریئر کا آغاز کیا تھا۔

ابتدا میں وہ کئی سنجیدہ ڈراموں میں جلوہ گر ہوئیں تاہم بعدازاں ان کی کامیڈی اداکاری کو بے حد پسند کیا گیا تھا۔

وہ ’اکڑ بکڑ‘، ’الف نون‘ اور ’سچ گپ‘ جیسے ڈراموں میں مزاحیہ اداکاری کرچکی ہیں۔

انہوں نے اپنے کیریئر میں سنو چندا، آنگن، گل رانا، فیملی فرنٹ، ڈولی کی آئے گی بارات، داستان اور سنگت جیسے ڈراموں میں کام کیا۔

جبکہ وہ فلم ناراض، دختر اور لوڈ ویڈنگ میں بھی اداکاری کے جوہر دکھا چکی ہیں۔

بھارت کے ریئلٹی شو ‘روڈیز ریولوشن’ سے شہرت پانے والے بھارتی اداکار و ماڈل ثاقب خان نے مذہب کی خاطر شوبز چھوڑنے کا اعلان کردیا۔

انسٹاگرام پر شیئر کی گئی ایک طویل پوسٹ میں ثاقب خان نے انکشاف کیا کہ وہ اب اداکاری یا ماڈلنگ پروجیکٹس کا حصہ نہیں بنیں گے۔

انہوں نے اپنی پوسٹ میں لکھا کہ ‘امید ہے کہ آپ سب ٹھیک ہوں گے، آج کی پوسٹ یہ اعلان کرنے کے لیے ہے کہ میں شوبز چھوڑ رہا ہوں لہذا اب میں مستقبل میں کوئی ماڈلنگ اور اداکاری نہیں کروں گا’۔

ثاقب خان نے اپنی پوسٹ میں مزید کہا کہ ایسا نہیں ہے کہ ان کے پاس کام نہیں تھا تو وہ شوبز چھوڑ رہے ہیں، انہوں نے کہا کہ میرے پاس اس وقت بھی بہت پروجیکٹس موجود ہیں، بس اللّٰہ تعالیٰ کی مرضی نہیں تھی، ضرور کچھ اچھا اور بہتر سوچا ہوگا اللّٰہ نے میرے لیے، انشا اللّٰہ، کیونکہ وہی سب سے بہتر منصوبہ ساز ہے۔

انہوں نے ممبئی میں اپنی جدوجہد کے حوالے سے بھی لکھا کہ ‘جہاں تک میں نے ممبئی میں جدوجہد دیکھی ہے، یہاں سروائیو کرنا بہت مشکل ہے لیکن میں فخر کے ساتھ کہہ سکتا ہوں کہ مجھے مختصر عرصے میں بہت شہرت ملی لیکن یہ صرف دنیا کے لیے ہے، آخرت کے لیے کچھ بھی نہیں ہے۔

ثاقب خان نے اپنی پوسٹ میں لکھا کہ مختصراً یہ کہ میں گمراہی کی جانب اور اپنے مذہب کے خلاف جارہا تھا، میں نماز پڑھا کرتا تھا لیکن کچھ کمی تھی اور یہ میرا سکون اور اللّٰہ کی جانب اپنی خود احتسابی تھی لہذا اب میں خود کو اللہ کے حوالے کر رہا ہوں۔

اپنی پوسٹ کے اختتام پر ثاقب خان نے لکھا کہ اگر جانے انجانے میں میری کسی بات سے کسی کو دکھ پہنچا ہو تو میں معذرت خواہ ہوں۔

خیال رہے کہ ریئلٹی ٹی وی شو روڈیز ریولوشن میں ثاقب خان پرنس نارولا کے گینگ کا حصہ تھے تاہم وہ پہلے ہی راؤنڈ میں باہر ہوگئے تھے۔

اس شو کی میزبانی رن وجے سنگھا نے کی تھی جبکہ نیہا دوپیا، نکھل اور ورون سود بھی گینگ لیڈرز کے طور پر شریک تھے۔

ثاقب خان سے قبل گزشتہ برس اکتوبر میں بگ باس سیزن 6 سے مشہور ہونے والی بھارتی اداکارہ ثنا خان نے مذہب کی خاطر شوبز کو خیرباد کہہ دیا تھا۔

ان سے قبل 2019 میں عامر خان کی سپرہٹ فلم ‘دنگل’ سے بولی وڈ میں مشہور ہونے والی اداکارہ زائرہ وسیم نے فلمی صنعت کو خیرباد کہنے کا فیصلہ کیا تھا۔

انسٹاگرام میں ایک پوسٹ میں زائرہ وسیم نے یہ اعلان کرتے ہوئے کہا تھا کہ ان کے کیرئیر کا انتخاب ان کے مذہبی عقائد پر اثر انداز

اداکار یاسر حسین نے انکشاف کیا ہےکہ ان کی اہلیہ اقرا عزیز کی والدہ نجی ٹیکسی سروس کریم کی پہلی خاتون ڈرائیور ہیں۔

انسٹاگرام پر یاسرحسین نے اقرا عزیز اور ان کی والدہ کی ایک تصویر شیئر کرتے ہوئے ایک پوسٹ شیئر کی۔

یاسر نے اپنی پوسٹ میں لکھا کہ میری خوبصورت اہلیہ اقرا عزیر اپنی والدہ آسیہ عزیز کے ہمراہ ۔

اداکار نے اپنی پوسٹ میں لکھا کہ آسیہ عزیز پاکستان میں نجی ٹیکسی سروس کریم کی پہلی خاتون ڈرائیور ہیں جوکہ اپنی بیٹی کے ہمراہ نئی کار میں بیٹھی ہیں۔

یاسرحسین نے اپنی پوسٹ میں مزید لکھا کہ طاقتور خواتین کے چہروں پر الگ ہی گلو ہوتا ہے، اپنی ماؤں، بہنوں ، بیٹیوں اور بیوی کو روکنے والے غیر محفوظ ہوتے ہیں، مرد نہیں۔

یاسر حسین نے اپنی پوسٹ میں عورت راج کا ہیش ٹیگ بھی استعمال کیا۔

بھارتی فلمساز و ہدایت کار سنتوش گپتا کی اہلیہ اور بیٹی نے خودکشی کر لی۔

مقامی پولیس کے مطابق ممبئی کے نواحی علاقے اندھیری میں ایک 55 سالہ خاتون اور اس کی بیٹی نے خودکو آگ لگا کر اپنی جان لی ۔

یہ واقعہ پیر کی دوپہر پیش آیا اور بدھ کے روز ممبئی پولیس نے اس کے بارے میں باضابطہ معلومات فراہم کیں اور بتایا کہ ہلاک ہونے والی خواتین میں والدہ کا نام اسمیتا ہے اور بیٹی کا نام سرشتی ہے اور یہ دونوں بالترتیب ہندی فلمساز سنتوش گپتا کی اہلیہ اور بیٹی تھیں ۔

سنتوش کمار نے ‘فرار’ ، ‘رومی: دی ہیرو’ اور ‘آج کی عورت’ جیسی فلموں کی ہدایت کاری کی ہے۔

پولیس نے بتایا کہ اسمیتا اورسرشتی اندھیری کے ڈی این نگر میں رہتے تھے اور پیر کی دوپہر ، انہوں نے اپنے اپارٹمنٹ میں خود کو آگ لگا لی۔

ابتدائی تفتیش میں انکشاف ہوا ہے کہ اسمیتا ایک طویل عرصے سے گردے کی بیماری میں مبتلا تھیں۔اس سے پریشان ہوکر اس نے خودکشی جیسا اقدام اٹھایا۔ اسی دوران ، سرشتی اپنی والدہ کی بیماری کا صدمہ برداشت نہیں کرسکتی تھیں اور اس نے خود کو بھی ہلاک کردیا تھا۔

مس سری لنکا 2021 کی فاتح حسینہ کے سر پر سجا تاج ان کے طلاق یافتہ ہونے کے جھوٹے دعویٰ کے باعث اتار دیا گیا تاہم دعوے غلط ثابت ہونے پر انہیں دوبارہ یہ تاج دیا گیا۔

اتوار کے روز ہونے والی تقریب میں پشپیکا ڈی سلوا کو مس سری لنکا کے خطاب سے نوازا گیا تھا تاہم کچھ ہی دیر بعد 2019 کی فاتح کیرولین جیوری نے پشپیکا کا تاج اس دعویٰ سے اتاردیا کہ پشپیکا چونکہ طلاق یافتہ ہیں لہٰذااس اعزاز کی حق دار نہیں۔

جیوری کاکہنا تھا کہ پشپیکا طلاق یافتہ ہیں لہٰذا قواعد کے مطابق مس سری لنکا کا اعزاز نہیں جیت سکتیں کیونکہ اصول کے مطابق مس سری لنکا کے فاتح کے لیے شادی شدہ ہونا ضروری ہے ناکہ طلاق یافتہ، جس کے بعد جیوری نے مس سری لنکا کا تاج پشپیکا کے سر سے اتار کر رنر اپ کے سر پر سجادیا ۔

بعد ازاں منتظمین کی جانب سے تصدیق کی گئی کہ پشپیکا طلاق یافتہ نہیں بلکہ شوہر سے علیحدگی اختیار کیے ہوئے ہیں، منتظمین نے پشپیکا سے معافی مانگتے ہوئے تاج پشپیکا کو واپس کردیا۔

پشیکا نے دوران تقریب تاج سر سے اتارے جانے کے باعث زخمی ہونے کا دعویٰ بھی کیا ہے جب کہ ساتھ ہی ان کا کہنا ہے کہ وہ اپنے ساتھ ہونے والی بدسلوکی اور بے عزتی پر قانونی چارہ جوئی کریں گی۔

رواں برس 15 فروری کو شادی کے بندھن میں بندھنے والی بولی وڈ اداکارہ دیا مرزا نے یکم اپریل کو اپنے حاملہ ہونے کی تصدیق کردی تھی اور اب انہوں نے اعتراف کیا ہے کہ وہ شادی سے قبل حاملہ ہوگئی تھیں۔

دیا مرزا نے یکم اپریل کو انسٹاگرام پر اپنی تصویر شیئر کرتے ہوئے بتایا تھا کہ وہ امید سے ہیں، تصویر میں ان کے بے بی بمپ سے اندازہ ہو رہا تھا کہ ان کا حمل 12 سے 14 ہفتوں کا ہے۔

اداکارہ کی جانب سے حمل کا اعلان کرنے کے بعد لوگوں نے حیرانی کا اظہار کرتے ہوئے چہ مگوئیاں شروع کیں کہ شادی کے ایک ماہ بعد حمل ہوجانے کے بعد اس طرح کا بے بی بمپ نہیں ہوتا۔

بھارتی میڈیا رپورٹس میں بھی چہ مگوئیاں تھیں کہ ممکنہ طور پر اداکارہ شادی سے قبل حاملہ ہوگئی تھیں تاہم اب اداکارہ نے اس بات کی تصدیق کردی۔

بھارتی اخبار انڈین ایکسپریس کے مطابق دیا مرزا نے اپنے امید سے ہونے کا اعلان کرنے کے وقت شیئر کی گئی تصویر پر ایک مداح کے سوال کے جواب میں اعتراف کیا کہ جب وہ شادی کرنے کی تیاریوں میں مصروف تھیں تب انہیں علم ہوا کہ وہ امید سے ہیں۔

اداکارہ سے ایک مداح نے سوال کیا تھا کہ اگر وہ حاملہ ہو بھی گئی تھیں تو انہوں نے اس کا اعلان شادی سے پہلے کیوں نہیں کیا تھا؟ اور کیا شادی سے پہلے خواتین امید سے نہیں ہو سکتیں کیا؟

مداح کے سوال پر اداکارہ نے ان کے سوال کو دلچسپ قرار دیا اور ان پر واضح کیا کہ انہوں نے صرف اسی وجہ سے شادی نہیں کی کہ وہ حاملہ ہوگئی تھیں۔

اداکارہ نے لکھا کہ وہ ویبھو ریکھی کے ساتھ زندگی گزارنا چاہتی تھیں اور انہوں نے پہلے ہی شادی کا فیصلہ کرلیا تھا، اس لیے انہوں نے شادی کی۔

تاہم ساتھ ہی دیا مرزا نے لکھا کہ جب وہ شادی کرنے کی تیاریوں میں مصروف تھیں، تب انہیں علم ہوا کہ ان کے ہاں بچے کی پیدائش متوقع ہے مگر انہوں نے اس وقت بعض طبی پیچیدگیوں کے باعث اس بات کا اعلان نہیں کیا۔

دیا مرزا کا کہنا تھا کہ طبی پیچیدگیوں کی وجہ سے انہیں بھی مکمل طور پر یقین نہیں تھا مگر شادی کے بعد جب انہیں مکمل یقین ہوا تو انہوں نے امید سے ہونے کا اعلان کیا۔

ساتھ ہی اداکارہ نے لکھا کہ خاتون کا ماں بننا زندگی کا بہترین احساس ہوتا ہے اور اس عمل پر کسی کو شرمندہ نہیں ہونا چاہیے اور نہ ہی انہیں شرمندہ کیا جانا چاہیے۔

دیا مرزا نے جواب میں لکھا کہ ہمیں سماج کی فرسودہ روایات کو ختم کرنے کی ضرورت ہے اور ہمیں ایسے سوال بند کرنا ہوں گے کہ کیا صحیح ہے، کیا غلط ہے۔

خیال رہے کہ دیا مرزا نے عالمی یوم محبت کے موقع پر 14 فروری 2021 کو دوسری شادی ویبھو ریکھی سے کی تھی اور ان کے شوہر کی بھی یہ دوسری شادی ہے۔

دیا مرزا نے پہلی شادی 2014 میں صنعت کار و فلم پروڈیوسر ساحل سنگھا سے کی تھی تاہم دونوں کے درمیان اگست 2019 میں علیحدگی ہوگئی تھی۔

خیبرپختونخوا حکومت نے بھارتی لیجنڈ اداکاروں دلیپ کمار اور راج کپور کے آبائی گھروں کو خریدنے کے لیے قانونی کارروائی کا آغاز کردیا۔

خیبرپختونخوا حکومت نے بھارتی اداکاروں کے گھروں کو خریدنے کے لیے ریاست کے اراضی حصول ایکٹ 1894 کا ایک ضروری سیکشن نافذ کیا ہے جس کے تحت اب صوبائی حکومت دونوں گھروں کو ہنگامی بنیادوں پر اپنے قبضہ میں لے سکتی ہے۔

پاکستان کے محکمہ آثار قدیمہ نے پشاور کے قصہ خوانی بازار میں موجود بھارت کے لیجنڈ اداکار دلیپ کمار کے 4 یونٹ (101 اسکوائر میٹر) آبائی گھر کی قیمت 50 ہزار 517 ڈالرز اور راج کپور کی 6 یونٹ (151.75 اسکوائر میٹر) حویلی کی قیمت 94 ہزار 061 ڈالر مقرر کی ہے۔ یہ رقم بہت جلد مالک مکانوں کو ادائیگی کے لیے پشاور کے ڈپٹی کمشنر کو جاری کردی جائے گی۔

پاکستان کے ایک مقامی اخبار کے مطابق ایک طویل عرصے سے دونوں گھروں کے مالک مکان حکومت کو یہ گھر فروخت کرنے کے لیے راضی نہیں تھے کیونکہ حکومت ان گھروں کی مارکیٹ کے مطابق قیمت ادا کرنے پر راضی نہیں تھی۔ مالک مکانوں کا اعتراض یہ تھا کہ ان کے گھروں کی قیمتیں کم مقرر کی گئی ہیں۔

دلیپ کمار کے آبائی گھر کے مالک مکان نے اس جائیداد کے لیے 250 ملین کا مطالبہ جب کہ کپور حویلی کے مالک مکان نے 2 بلین (2 ارب روپے) مانگے ہیں۔ خیبرپختونخوا حکومت نے دعویٰ کیا ہے کہ دونوں گھروں کے مالک مکان پراپرٹی کی اہمیت کی وجہ سے غیر معمولی قیمتوں کا مطالبہ کررہے ہیں اور حکومت کو بلیک میل کررہے ہیں۔

واضح رہے کہ خیبرپختونخوا حکومت نے پشاور کے قصہ خوانی بازار میں موجود بھارتی اداکاروں کے مکانات میوزیم میں بدلنے کا فیصلہ کیاتھا۔محکمہ آرکیالوجی کی جانب سے صوبائی حکومت کو سفارش کی گئی تھی کہ بھارتی اداکاروں دلیپ کمار اور راج کپور کے گھر خستہ حالت اختیار کرچکے ہیں اور لیجنڈری اداکاروں کے یہ گھر قومی ورثہ ہیں اس لیے ان گھروں کو خرید کر اس کی تزئین و آرائش کرکے محفوظ کیا جائے۔

دلیپ کمار کے گھر کے موجودہ مالکان اورحکومت میں تنازع کیا ہے؟

برطانوی نشریاتی ادارے کے مطابق خیبر پختونخوا حکومت نے گزشتہ سال دلیپ کمار اور کپور فیملی کے آبائی گھروں کو محفوظ اثاثہ قرار دے کر ان کو حاصل کرنے کا نوٹی فیکیشن جاری کیا تھا۔ دلیپ کمار کا مکان پشاور کے قصہ خوانی بازار کے محلہ خداداد میں واقع ہے اور اس کا کل رقبہ چار مرلے بتایا گیا ہے۔

اس کا تعمیرات والا حصہ 1077 مربع فٹ سے کچھ زیادہ ہے۔ اس زمین کی قیمت 72 لاکھ 80 ہزار سے زیادہ مقرر کی گئی ہے جبکہ اس مکان کے ملبے کی قیمت کا تخمینہ 7 لاکھ 76 ہزار سے زیادہ لگایا گیا ہے۔ اس حساب سے دلیپ کمار کے گھر کی قیمت 80 لاکھ 56 ہزار سے زیادہ مقرر کی گئی ہے۔

تاہم اس قیمت پر گھر کے موجودہ مالک کو اعتراض ہے اور وہ 80 لاکھ روپے میں یہ گھر فروخت کرنا نہیں چاہتے۔ پشاور کے مقامی میڈیا کے مطابق حاجی لال محمد کا کہنا ہے کہ گھر کی موجودہ قیمت کم از کم 25 کروڑ ہے۔

بھارتی کرکٹ ٹیم کے سابق کپتان اور دنیا کے بہترین آل راؤنڈرز میں شمار ہونے والے 40 سالہ مہندر سنگھ (ایم ایس) دھونی کرکٹ کے بعد اب اداکاری کے میدان میں نظر آئیں گے۔

مہندر سنگھ دھونی نے اگست 2020 میں عالمی کرکٹ سے ریٹائرمنٹ کا اعلان کیا تھا، جس کے بعد انہوں نے شوبز انڈسٹری میں کام کرنے کا عندیہ دیا تھا۔

ایم ایس دھونی اب تک درجنوں اشتہارات میں ماڈلنگ کرتے دکھائی دیے ہیں اور وہ چند بڑے انٹرٹینمنٹ منصوبوں کا حصہ بھی رہے ہیں مگر اب جلد ہی وہ ایکشن میں دکھائی دیں گے۔

جی ہاں، ایم ایس دھونی نے اپنی پروڈکشن کمپنی کے بینر تلے جاسوس اینیمیٹڈ ویب سیریز بنانے کا اعلان کردیا، جس میں وہ خود بھی ایک جاسوس کے طور پر دکھائی دیں گے۔

بھارتی اخبار’دی ہندو‘ کے مطابق ایم ایس دھونی اور ان کی اہلیہ ساکشی سنگھ دھونی کی جانب سے بنائے گئے پروڈکشن ہاؤس کی جانب سے تصدیق کی گئی کہ سابق کرکٹر جلد ایکشن میں دکھائی دیں گے۔

رپورٹ کے مطابق مہندر سنگھ ’دھونی پروڈکشن‘ اور ’بلیک وائٹ اورینج برانڈز (بی ڈبلیو او‘ مشترکہ طور پر اینمیٹڈ جاسوس ویب سیریز بنائیں گے، جس کا پہلا سیزن 2022 میں ریلیز کیے جانے کا امکان ہے۔

رپورٹ کے مطابق سیریز کا نام ’کیپٹن 7‘ ہوگا، کیوں کہ ’7‘ کے ہندسے کی ایم ایس دھونی شرٹ پہنتے تھے اور سیریز میں ممکنہ طور پر ان کی ‘اسپورٹس جرنی’ بھی دکھائی جائے گی۔

یہ واضح نہیں ہے کہ ’کیپٹن 7‘ حقیقی زندگی سے ماخوذ ہوگی یا اس کی کہانی فکشن پر مبنی ہوگی اور مذکورہ سیریز کس طرح کی جاسوس سیریز ہوگی؟

’کیپٹن 7‘ کے پہلے سیزن کی کاسٹ، کہانی اور پروڈکشن کے حوالے سے کام جاری ہے اور جلد ہی اس کی مزید کاسٹ کا اعلان بھی کیا جائے گا۔

اسی حوالے سے انڈین ایکسپریس نے اپنی رپورٹ میں بتایا کہ ساکشی سنگھ دھونی نے ’کیپٹن 7‘ کے حوالے سے بتایا کہ مذکورہ سیریز نہ صرف جاسوسی پر مبنی ہوگی بلکہ اس میں شائقین کو ایڈونچر اور تفریح بھی دیکھنے کو ملے گی۔

اسی حوالے سے ایم ایس دھونی نے بھی اپنے ایک بیان میں کہا کہ سیریز میں کرکٹ کے علاوہ دیگر معاملات بھی دکھائے جائیں گے اور سابق کرکٹر پہلی مرتبہ ایک منفرد روپ میں شائقین کے سامنے آئیں گے۔

خیال رہے کہ ایم ایس دھونی کی زندگی پر پہلے ہی بولی وڈ میں 2016 میں ’ایم ایس دھونی، ان ٹولڈ اسٹوری‘ کے نام سے فلم بھی بنائی جا چکی ہے، جس میں آنجھانی اداکار سشانت سنگھ راجپوت نے ان کا کردار ادا کیا تھا۔

اگرچہ ان کی زندگی پر بنائی گئی فلم نے زیادہ کمائی اور کامیابی حاصل نہیں کی تھی مگر سشانت سنگھ کی اداکاری اور کھلاڑی کی زندگی کی کہانی کی وجہ سے اس کی تعریفیں کی گئی تھیں۔

خیال کیا جا رہا ہے کہ ’کیپٹن 7‘ کے بعد ایم ایس دھونی دیگر سیریز، فلموں اور ڈراموں میں بھی دکھائی دیں گے تاہم اس حوالے سے کچھ بھی کہنا قبل از وقت ہے۔