Category شوبز

بالی وڈ کنگ شاہ رخ خان اور ان کی اہلیہ گوری خان کا شمار بالی وڈ کی خوبصورت اور مثالی جوڑیوں میں کیا جاتا ہے۔

گوری خان مشہور شو ’کافی ود کرن ‘ میں گفتگو کرتے ہوئے انکشاف کرچکی ہیں کہ اگر شاہ رخ نے انہیں دھوکہ دیا تو وہ کیا کریں گی۔

دوران شو کرن جوہر نے گوری سے سوال کیا کہ شاہ رخ چونکہ ہر وقت خوبصورت خواتین کے حصار میں رہتے ہیں تو کیا کبھی گوری کو شاہ رخ کی خواتین میں بے پناہ مقبولیت سے عدم تحفظ کا احساس ہوا؟

جواب میں گوری خان کا کہنا تھا کہ اگر کوئی ان سے اس طرح کے سوال پوچھے تو وہ واقعی الجھن کا شکار ہوجاتی ہیں لیکن چونکہ یہ سوال آپ نے کیا ہے اس لیے اس سوال کا جواب دینے کا فیصلہ کیا ہے۔

گوری خان کا کہنا تھا کہ میں روزانہ خدا سے دعا کرتی ہوں کہ اگر ہمارا ساتھ نہیں لکھا اور اگر شاہ رخ نے کسی اور کے ساتھ رہنا ہو تو خدا میرے لیے بھی کوئی تلاش کرلے۔

انہوں نے کہا کہ شاہ رخ ہینڈسم ہیں مجھے یقین ہے، اگر وہ کسی اور کے ساتھ رہنا چاہیں گے تو میں ان کے ساتھ نہیں رہنا چاہوں گی، اس لیے اگر شاہ رخ نے کبھی ایسا کیا تو میں یہی کہوں گی کہ ٹھیک ہے مجھے بھی کسی اور کے ساتھ آگے بڑھنے دیں۔

کراچی: اداکارہ و سابق ماڈل اور میزبان عفت عمر نے سیاسی اثرورسوخ استعمال کرکے کورونا ویکسین لگانے پر سوشل میڈیا پر ہونے والی تنقید کے بعد معافی مانگ لی۔
چند روز قبل سوشل میڈیا پر ایک ویڈیو وائرل ہوئی تھی جس میں عفت عمر کو پاکستان مسلم لیگ (ق) کے سیکریٹری جنرل طارق بشیر چیمہ کی رہائشگاہ پر کورونا ویکسین لگواتے ہوئے دیکھا جاسکتا ہے۔ عفت عمر کے علاوہ طارق بشیر چیمہ کے اہلخانہ نے بھی ویکسین لگوائی تھی۔
یہ ویڈیو کچھ ہی دیر میں پورے سوشل میڈیا پر وائرل ہوچکی تھی اور لوگوں نے ویڈیو کو شدید تنقید کا نشانہ بنایا تھا کیونکہ جس وقت عفت عمر اور طارق بشیر چیمہ کے اہلخانہ نے کورونا ویکسین لگوائی تھی اس وقت صرف 60 سال سے زائد کے عمر کے لوگوں کو اور صحت کے کارکنوں کو ہی ویکسین لگوانے کی اجازت تھی۔ اس کے علاوہ طارق بشیر چیمہ پر کورونا ویکسین لگوانے کے لیے سیاسی اثرورسوخ استعمال کرنے کا بھی الزام لگایا گیا جس کی وجہ سے انہیں بھی شدید تنقید کا نشانہ بنایا گیا۔

معروف پاکستانی مصنف اور ڈرامہ نگار خلیل الرحمان قمر نے انکشاف کیا ہے کہ انہیں متعدد مرتبہ بھارت سے فلم لکھنے کی پیشکش کی گئی مگر انہوں نے صاف انکار کر دیا۔

گزشتہ دنوں ایک نجی ٹی وی کے شو میں گفتگو کرتے ہوئے خلیل الرحمان قمر نے کہا کہ ‘مجھے بھارت سے بہت سے آفرز ہوئی ہیں، جب 2006 میں پہلی دفعہ بھارت گیا تو میں نے دیکھا کہ ٹی وی پر سب چینلز تھے مگر پاکستان کا کوئی چینل نہیں تھا۔ ‘

انہوں نے کہا کہ اس وجہ سے بھارت میں لوگ ہم پاکستانیوں کو جانتے ہی نہیں۔

خلیل الرحمان قمر نے کہا کہ متعدد دیگر افراد کے ساتھ ساتھ مہیش بھٹ نے بھی انہیں فلم لکھنے کی پیشکش کی لیکن انہوں کچھ وجوہات کی بنا پر لکھنے سے صاف منع کر دیا۔

ان کا کہنا تھا کہ وہ اس وقت تک بھارت کے لیے کام نہیں کریں گے جب تک وہاں پاکستانی لوگوں کی اپنی پہچان نہیں بن جاتی۔

انہوں نے کہا کہ مہیش بھٹ کے علاوہ بھی ایک بھارتی فلم ڈائریکٹر نے انہیں فلم لکھنے کی آفر کی مگر انہیں بھی منع کر دیا۔

جب ان سے اس ڈائریکٹر کا نام پوچھا تو انہوں نے کہا کہ وہ اس ڈائریکٹر کو برصغیر کا بہترین ڈائریکٹر تسلیم کرتے ہیں اس لیے اس کا نام نہیں لیں گے.

کینسر کی شکار سینئر اداکارہ نائلہ جعفری کی جانب سے ڈراموں کو دوبارہ نشر کیے جانے پر اداکاروں کو بھی دوبارہ معاوضہ دیے جانے اور مالی مدد کی اپیل کے بعد اداکار بھی ان کی مدد کے لیے سامنے آگئے۔

نائلہ جعفری گزشتہ 5 سال سے کینسر سے جنگ لڑ رہی ہیں اور حال ہی میں انہیں انفیکشن کی وجہ سے ہسپتال داخل کرایا گیا تھا۔

نائلہ جعفری کینسر کے علاج کے لیے کیموتھراپی کروا رہی ہیں تاہم انفیکشن کی وجہ سے انہیں ہسپتال میں داخل کرایا گیا تھا۔

ہسپتال میں داخل کرائے جانے کے بعد چند دن قبل ان کی ایک ویڈیو سامنے آئی تھی، جس میں وہ ہسپتال کے بستر سے کسم پرسی کی حالت میں مدد مانگتے ہوئے آبدیدہ ہوگئی تھیں۔

نائلہ جعفری نے واضح طور پر شوبز شخصیات یا ٹی وی مالکان سے مالی مدد نہیں مانگی تھی تاہم انہوں نے مطالبہ کیا تھا کہ جن اداکاروں کے ڈرامے دوبارہ نشر کیے جاتے ہیں، انہیں ان کا معاوضہ بھی دوبارہ ملنا چاہیے۔

اداکارہ نے بتایا تھا کہ ایک ٹی وی چینل نے ان کے ایک ڈرامے کو 5 سال میں 6 بار نشر کیا مگر انہیں معاوضہ ایک بار ہی ملا تھا۔

مذکورہ ویڈیو میں اداکارہ جذباتی ہوگئی تھیں، جس کے بعد ان کی ویڈیو وائرل ہوگئی تھی۔

اداکارہ کی ویڈیو وائرل ہونے کے بعد سندھ کی وزارت ثقافت نے نائلہ جعفری کی مدد کا اعلان کیا تھا اور اداکارہ کے علاج کے تمام اخراجات برداشت کرنے کی یقین دہانی بھی کروائی تھی۔

اور اب نائلہ جعفری کی مدد کے لیے اداکار میکال ذوالفقار اور یاسر حسین بھی سامنے آگئے۔

میکال ذوالفقار اور یاسر حسین نے نائلہ جعفری کی کسم پرسی پر ڈان امیجز کی خبر پر انسٹاگرام پر کمنٹ کرتے ہوئے اداکارہ کے مطالبے کی حمایت کی اور کہا کہ ٹی وی مالکان کو ڈرامے دوبارہ نشر کرنے یا انہیں یوٹیوب سمیت دیگر سائٹس پر چلانے کا معاوضہ بھی دینا چاہیے۔

میکال ذوالفقار نے نائلہ جعفری کی معاونت کا اعلان کرنے پر سندھ حکومت کی تعریف کی اور ساتھ ہی کہا کہ یہ لازمی ہوگیا ہے کہ ٹی وی مالکان ڈرامے کو دوبارہ نشر کرنے یا پھر اسے یوٹیوب سمیت دیگر سائٹس پر چلائیں تو اداکاروں کو بھی دوبارہ معاوضہ دیں۔

میکال ذوالفقار کے مطابق ٹی وی مالکان کو لکھاریوں، ہدایت کاروں اور پروڈیوسرز سمیت اداکاروں کو بھی ہر بار معاوضہ دینا چاہیے اور اب اس عمل کو تبدیل ہونا چاہیے کہ صرف ایک بار ہی معاوضہ ملے گا۔

میکال ذوالفقار پہلے بھی مطالبہ کر چکے ہیں کہ ڈرامے کو دوبارہ نشر کرنے پر ٹی وی مالکان اداکاروں کو معاوضہ بھی دوبارہ فراہم کریں۔

اداکار یاسر حسین نے بھی کمنٹ کیا اور نائلہ جعفری کی کسم پرسی کے حوالے سے کہا کہ یہ ٹی وی والوں اور اداکاروں کے لیے شرم کا مقام ہے۔

یاسر حسین نے لکھا کہ افسوس صد افسوس، پھر ہم کہتے ہیں کہ ہمیں خدا کا خوف ہے اور آخرت سے ڈرتے ہیں۔

دونوں اداکاروں کی طرح دیگر شوبز شخصیات نے بھی نائلہ جعفری کی کسم پرسی پر آواز اٹھائی اور ان کی مالی معاونت کا مطالبہ کیا۔

خیال رہے کہ نائلہ جعفری 2016 سے بیمار ہیں اور ابتدائی طور پر ان میں اوورین کینسر کی تشخیص ہوئی تھی اور بعد ازاں ان میں معدے کے کینسر کی بھی تشخیص ہوئی۔

نائلہ جعفری سے متعلق 4 سال قبل 2017 میں یہ خبر سامنے آئی تھی کہ کینسر کے تیسرے اسٹیج کی وجہ سے انہیں تشویش ناک حالت میں ہسپتال داخل کرایا گیا۔

بعد ازاں نائلہ جعفری کو کچھ عرصہ ہسپتال میں رکھنے کے بعد ڈسچارج کردیا گیا تھا تاہم وہ 2016 سے مسلسل زیر علاج ہیں اور وقتاً فوقتاً ہسپتال داخل ہوتی رہی ہیں۔

بھارت میں کورونا وائرس کی نئی لہر کے نتیجے میں بولی وڈ فنکاروں میں کووڈ 19 کے کیسز تیزی سے بڑھ رہے ہیں۔

اب کترینہ کیف , وکی کوشال اور بھومی پڈنیکر بھی اس فہرست میں شامل ہوگئے ہیں جو کووڈ 19 کا شکار ہوگئے ہیں۔

کترینہ کیف نے انسٹاگرام اسٹوریز میں اس بات کی تصدیق کی کہ ان میں کووڈ 19 کی تشخیص ہوئی ہے۔

اداکارہ نے بتایا ‘مجھ میں کووڈ 19 کی تشخیص ہوئی ہے، جس کے فوری بعد خود کو آئسولیٹ کرتے ہوئے گھر میں قرنطینہ میں چلی گئی ہوں، میں اپنے ڈاکٹروں کے تجویز کردہ تمام حفاظتی تدابیر پر عمل کررہی ہوں، مجھ سے رابطے میں رہنے والے ہر فرد سے میری درخواست ہے کہ وہ اپنا ٹیسٹ فوری کروا لیں’۔

اس سے قبل 5 اپریل کو اداکار وکی کوشال میں بھی کووڈ 19 کی تشخیص ہوئی تھی۔

وکی کوشال اور کترینہ کیف کے درمیان رومانوی تعلق کی افواہیں کافی عرصے سے گردش کررہی ہیں، تاہم دونوں کی جانب سے تردید یا تصدیق نہیں کی گئی۔

وکی کوشال نے انسٹاگرام اکاؤنٹ میں کووڈ 19 کی تشخیص کے بارے میں بتایا تھا اور خود کو گھر تک محدود کرلیا تھا۔

کترینہ کیف اور وکی کوشال کے ساتھ ساتھ اداکارہ بھومی پڈنیکر میں بھی 5 اپریل کو کووڈ 19 کی تصدیق ہوئی تھی۔

ان تینوں سے قبل گزشتہ دنوں بھارت کے کئی اداکاروں میں کورونا وائرس کی تصدیق ہوچکی ہے۔

اکشے کمار، عامر خان، کارتک آریان، گووندا، فاطمہ ثنا شیخ، پریش راول، عالیہ بھٹ، رنبیر کپور اور دیگر میں حالیہ دنوں میں کووڈ کی تشخیص ہوئی۔

گزشتہ ماہ مارچ میں فیشن برانڈ ’کھاڈی‘ نے پلس سائز یعنی فربہ خواتین کے لیے ملبوسات متعارف کراتے ہوئے پہلی بار فربہ ماڈل کو تشہیری مہم کا حصہ بھی بنایا تھا۔

تاہم زیادہ تر لوگوں کو یہ علم نہیں کہ پاکستان میں ایک ایسا فیشن برانڈ بھی موجود ہے جو خصوصی طور پر فربہ خواتین کے لیے دیدہ زیب لباس تیار کرتا ہے۔

جی ہاں، ’دی ریک کوچیور‘ نامی کلاتھنگ برانڈ ایک ایسا برانڈ ہے جو ہر طرح کی جسامت رکھنے والی خواتین کے لیے خصوصی لباس متعارف کراتا ہے۔

’دی ریک کوچیور‘ کو اپریل 2018 میں متعارف کرایا گیا تھا جو اس وقت تک ملک کا پہلا ایسا برانڈ ہے جو فربہ خواتین سمیت زائد وزن کے علاوہ مختلف طرح کی جسامت رکھنے والی خواتین کے لیے بھی لباس متعارف کراتا ہے۔

مذکورہ برانڈ دراز قد، فربہ یا اضافی وزن رکھنے والی خواتین کے لیے بھی ہر طرح کے فیشن ایبل لباس متعارف کراتا ہے اور یہ برانڈ اب تک ہر تیسرے مہینے کوئی نئی ملبوسات پیش کرتا آیا ہے۔

مذکورہ برانڈ کو ایک ایسی ٹیم چلا رہی ہے جو خود بھی مختلف طرح کی جسامت رکھتے ہیں اور انہیں اس بات کا ادراک بھی ہے کہ فربہ یا اضافی وزن کی حامل خواتین کے لیے فیشن ایبل لباس کا ملنا پاکستان میں مشکل ہے۔

’دی ریک کوچیور‘ کی کریئیٹو ڈائریکٹر زینب علی خود بھی فربہ خاتون ہیں اور انہیں بھی مذکورہ برانڈ سے قبل اپنے لیے دیدہ زیب لباس تلاش کرنے میں مشکل پیش آتی تھی۔

زینب علی نے اس ضمن میں بتایا کہ کیوں کہ انہیں خود اپنے لیے بھی لباس تلاش کرنے میں مشکلات پیش آتی تھیں، اس لیے انہوں نے مذکورہ برانڈ کی ملبوسات کو پیش کرتے وقت اس بات کا بھرپور خیال رکھا ہے کہ ہر طرح کی جسامت رکھنے والی خواتین کے لیے لباس پیش کیا جا سکے۔

زینب علی کے مطابق یہ لازمی نہیں ہے کہ کوئی خاتون جس سائز کی شرٹ پہنے، وہ اسی سائز سے ملتی جلتی سائز کی پینٹ یا دیگر چیزیں بھی پہنے، کیوں کہ ہر شخص کے جسم کے ہر حصے مختلف ہوتے ہیں۔

ان کے مطابق بعض اوقات ہر شخص کو مطلوب ہر طرح کے لباس کا سائز الگ اور مختلف ہوتا ہے اور فیشن برانڈز اس چیز کا خیال نہیں رکھتے مگر دی راک کوچیور اس بات کا بہت خیال رکھتا ہے۔

زینب علی کا کہنا تھا کہ بیرون ممالک میں کئی معروف برانڈز نے فربہ یا اضافی وزن کی حامل خواتین کے لیے بھی لباس متعارف کرا رکھے ہیں مگر پاکستان میں ایسا کوئی برانڈ نہیں تھا جو دبلی پتلی لڑکیوں کے علاوہ دیگر خواتین کے لیے لباس متعارف کراتا۔

انہوں نے بتایا کہ یہ اچھی بات ہے کہ حال ہی میں ’کھاڈی‘ نے بھی فربہ خواتین کو تشہیری مہم کا حصہ بنایا اور انہیں یقین ہے کہ ان کے برانڈ کے سامنے آنے سے پاکستان کی فربہ خواتین کے فیشن کا مسئلہ حل ہوجائے گا اور انہیں اپنی جسمانی ساخت کے مطابق دیدہ زیب لباس پہننے کو ملے گا۔

’دی راک کوچیور‘ نہ صرف لباس بلکہ خواتین کے فیشن کے لیے دیگر چیزیں بھی پیش کرتا ہے، جن میں جیولری اور جوتے بھی شامل ہیں۔

فوری طور پر اگرچہ مذکورہ برانڈ نے کوئی بڑے اسٹورز نہیں کھولے تاہم برانڈ ملک بھر میں آن لائن خریداری کی سہولت پیش کرتا ہے اور کسی بھی شہر سے انسٹاگرام کے ذریعے ملبوسات کی بکنگ کرائی جا سکتی ہے۔

ممبئی: بالی ووڈ اداکارہ کرینہ کپور اور سیف علی خان کے دوسرے بیٹے کی تصویر سوشل میڈیا پر وائرل ہورہی ہے۔

بالی ووڈ کی نوابی جوڑی سیف علی خان اور کرینہ کپور رواں برس 21 فروری کو دوسری بار والدین بنے تھے۔ اس بار بھی دونوں کے گھر بیٹے کی پیدائش ہوئی تھی۔ تاہم دونوں نے اپنے پہلے بیٹے تیمور کی پیدائش کے برعکس اس بار لوگوں کو نہ تو اپنے بیٹے کی تصویر دکھائی اور نہ ہی نام بتایا۔

یہی وجہ ہے کہ پورا بھارتی میڈیا اور سیف کرینہ کے مداح جاننے کے لیے بے چین ہیں کہ آخر سیفینا کا دوسرا بیٹا کیسا دکھتا ہے اور اس کا نام کیا ہے۔ تاہم گزشتہ روز کرینہ کپور کے والد رندھیر کپور کے انسٹاگرام اکاؤنٹ پر تصویر کا ایک کولاج شیئر کیا گیا تھا جس میں ایک طرف تو کرینہ کے بڑے بیٹے تیمور کی تصویر تھی اور دوسری تصویر میں ایک شیرخوار بچہ موجود ہے۔
بچے نے ہلکے نیلے رنگ کی ٹی شرٹ پہنی ہوئی ہے اور اس کے ہلکے براؤن کلر کے بال ہیں۔ دلچسپ بات تو یہ ہے کہ رندھیر کپور نے یہ تصویر انسٹاپر شیئر کرنے کے بعد فوراً ہی ہٹادی تھی۔

بھارتی میڈیا کے مطابق دونوں بچوں میں بے حد مشابہت ہے اور یہی وجہ ہے کہ بھارتی میڈیا اسے تیمور کا چھوٹا بھائی قرار دے رہا ہے۔ ڈیلیٹ ہونے کے باوجود تصویر کا اسکرین شاٹ پورے بھارتی میڈیا پر گردش کررہا ہے۔ تاہم ابھی تک کرینہ کپور یا سیف علی خان نے اس بات کی تصدیق نہیں کی ہے کہ یہ تصویر ان کے دوسرے بیٹے کی ہے یا نہیں۔

بھارت کے معروف مجسمہ ساز منجیت گِل سنگھ نے گزشتہ دنوں انتقال کرجانے والے معروف پاکستانی فوک گلوکار شوکت علی کا مجسمہ بنا کر انہیں خراجِ تحسین پیش کیا ہے۔

انڈین ایکسپریس کی رپورٹ کے مطابق منجیت گِل سنگھ نے یہ مجسمہ شوکت علی کو خراج تحسین پیش کرنے کے لیے تیار کیا ہے جسے بھارتی پنجاب کے گاؤں گھل کلان کے پارک میں نصب کیا جائے گا۔

منجیت سنگھ نامی بھارتی فنکار کا کہنا ہے شوکت علی کے تیار کردہ مجسمے کو ہائی وے پر نصب کیا جائے گا۔

وہ شوکت علی سے قبل معروف سماجی شخصیت عبدالستار ایدھی اور شاعر بابا نجمی کا مجسمہ بھی بنا چکے ہیں۔

رپورٹ کے مطابق بھارت کی ادبی برادری سے وابستہ افراد اور شوکت علی کے مداح بھی ان کے انتقال پر غمزدہ ہیں۔

منجیت گل اپنے فنِ مجسمہ سازی کے باعث دنیا بھر میں مقبول ہیں، ماضی میں وہ عبدالستار ایدھی، پنجابی زبان کے شاعر بشیر حسین نجمی جنہیں بابا نجمی کہا جاتا تھا کے مجسمے بھی بناچکے ہیں۔

صوفی و لوک گلوکار شوکت علی 2 اپریل کو کچھ عرصہ علیل رہنے کے بعد جگر کے عارضے کے باعث انتقال کر گئے تھے۔

شوکت علی گزشتہ کچھ عرصے سے ہسپتال میں زیر علاج تھے ان کی حالت بگڑنے پر انہیں انتہائی نگہداشت کے وارڈ (آئی سی یو) میں داخل کرایا گیا تھا، جہاں ان کی حالت مسلسل تشویش ناک ہی تھی۔

شوکت علی کے اہل خانہ نے دو اپریل کی سہ پہر کو تصدیق کی تھی کہ گلوکار جاں بر نہ ہوسکے اور خالق حقیقی سے جا ملے، گلوکار کے انتقال پر موسیقی اور شوبز سے تعلق رکھنے والی شخصیات نے گہرے دکھ کا اظہار کیا اور ان کی موت کو موسیقی کے لیے بہت بڑا نقصان قرار دیا تھا.

شوکت علی طویل عرصے سے جگر کے عارضے میں مبتلا تھے اور گزشتہ برس انہیں علاج کے لیے پنجاب سے سندھ بھی منتقل کیا گیا تھا تاہم ان کی طبیعت میں کوئی خاصی بہتری نہیں آئی تھی۔

ڈاکٹرز نے شوکت علی کے جگر کی پیوندکاری کی تجویز دی تھی مگر طویل العمری اور ان کی بڑھتی بیماری کے پیش نظر ٹرانسپلانٹ کے خدشات کے پیش نظر ایسا ممکن نہیں ہوسکا۔

شوکت علی نے جہاں لوک گلوکاری کی، وہیں انہوں نے صوفی گانے بھی گائے، ساتھ ہی انہوں نے میوزک کنسرٹس میں بھی فن کا مظاہرہ کیا۔

شوکت علی کو حکومت کی جانب سے 1990 میں پرائیڈ آف پرفارمنس ایوارڈ سے نوازا گیا تھا۔

ان کے مقبول نغموں میں ’ساتھیو، مجاہدو، جاگ اٹھا ہے سارا وطن، میں پتر پاکستان دا، لال میری پت رکھیو بھلا، تو ہی حق دا ولی اور تیری میری اے ازلاں دی یاری‘ سمیت دیگر گانے شامل ہیں۔

ممبئی: بالی ووڈ مسٹر پرفیکشنسٹ عامر خان نے انکشاف کیا ہے کہ وہ فلم کی ناکامی کی صورت میں کوئی معاوضہ وصول نہیں کرتے۔

بھارتی میڈیا کے مطابق اداکار عامر خان نے ایک تقریب کے دوران فلم کے معاوضے سے متعلق لب کشائی کرتے ہوئے کہا کہ میرا دستور ہے کہ باکس آفس پر فلم کی ناکامی کی صورت میں ایک روپیہ بھی معاوضہ نہیں لیتا خواہ کتنی ہی محنت کیوں نہ کی ہو۔

عامر خان نے یہ بھی کہا کہ معاوضہ تب ہی وصول کرتا ہوں جب فلم پر خرچ کی ہوئی رقم نہ صرف واپس آجائے بلکہ فلم سے جڑے تمام افراد کو اُن کا معاوضہ ادا کر دیا جائے بعد ازاں اگر فلم اپنے مقرر بجٹ سے دگنا فائدے میں ہوتی ہے تو پھر میں اپنا معاوضہ منافع میں سے وصول کرتا ہوں۔

مسٹر پرفیکشنسٹ نے یہ بھی کہا کہ میں فلم کی ریلیز سے قبل اپنا معاوضہ لینے کا نہیں سوچتا کیوں کہ میں نہیں چاہتا کہ فلم کی ناکامی کی صورت میں کسی کو نقصان کا سامنا کرنا پڑے کیوں کہ اس بات کو میں اپنی ذمہ داری سمجھتا ہوں۔

واضح رہے کہ 1988ء میں فلم ’’قیامت سے قیامت تک‘‘ میں جوہی چاولہ کے مدمقابل ڈیبیو کرنے والے عامر خان پہلی ہی فلم سے چاہنے والوں کو اپنی جانب مائل کرنے میں کامیاب رہے۔

انہوں نے فنی کیریئر میں ’’ہم ہیں راہی پیار کے، انداز اپنا اپنا، راجہ ہندوستانی، سرفروش، لگان، منگل پانڈے، رنگ دے بسنتی، تارے زمین پر، گجنی، تھری ایڈیٹ‘‘ جیسی کئی سپرہٹ فلموں میں کام کیا۔

پاکستان کے نامور شاعر اور نغمہ نگار سعید گیلانی انتقال کرگئے۔

گند ھارا ہندکو بورڈ کے مطابق سعید گیلانی کی نماز جنازہ تحصیل گور گھٹڑی پشاور میں ادا کی گئی۔

سعید گیلانی نے بے شمار گیت تخلیق کیے تاہم ‘سونا نہ چاندی نہ کوئی محل جان من تجھ کو میں دے سکوں گا’ گانا ان کی پہچان بنا۔

سعید گیلانی کے لکھےگیت بھارتی گلوکاروں نے بھی گائے۔

سعیدگیلانی کے انتقال پر شوبز سے تعلق رکھنے والے افراد نے گہرے دکھ کا اظہار کیا ہے۔