Category شوبز

ممبئی(میڈیا پاکستان)بالی ووڈ کنگ شاہ رخ خان کو کیرئیر کا پہلا بریک دینے والے بھارتی فلم انڈسٹری کے نامور فلمساز لیکھ ٹنڈن انتقال کرگئے۔بالی ووڈ کو ’’جھک گیا آسماں‘‘، ’’دوراہیں‘‘اور ’’آم راپالی‘‘ جیسی شاندار فلمیں دینے والے نامور فلمساز،ہدایت کار اوراداکار لیکھ ٹنڈن 88 برس کی عمر میں چل بسے۔ ان کا انتقال گزشتہ شام 5 بج کر 38 منٹ پران کی رہائشگاہ پرہوا، لیکھ ٹنڈن طویل عرصے سے بیمار تھے۔ پورا بالی ووڈ لیکھ ٹنڈن کی موت پر افسردہ ہے۔
بھارتی میڈیا کے مطابق شاہ رخ خان نے اپنے فنی کیرئیر کا آغاز ڈراما سیریل ’’فوجی‘‘سے کیا تھا لیکن یہ بات بہت کم لوگ جانتے ہیں کہ انہیں پہلے ’’فو جی‘‘ نہیں بلکہ ڈراما سیریل’’دو دریا‘‘کی پیشکش ہوئی تھی اور یہ پیشکش ہدایت کاروفلمساز لیکھ ٹنڈن نے کی تھی، شاہ رخ خان اس ڈرامے میں کام کرنے کی ہامی بھی بھر چکے تھے لیکن کسی وجہ سے ڈرامے کی شوٹنگ تاخیر کا شکار ہوگئی اور ڈراما سیریل’’فوجی‘‘،’’دودریا‘‘سے پہلے نشر ہوگیا۔
سال 2000 کے بعد لیکھ ٹنڈن نے ہدایت کاری کے ساتھ اداکاری بھی کی اور شاہ رخ خان کے ہمراہ فلم ’’سوادیس‘‘، ’’چنائی ایکسپریس‘‘اورعامر خان کے ساتھ فلم’’رنگ دے بسنتی‘‘میں اپنی اداکاری کے جوہر دکھائے ۔ پوری بالی ووڈ انڈسٹری لیکھ ٹنڈن کی موت پر افسردہ ہے، اداکارہ شبانہ اعظمی نے ٹوئٹرپرپیغام دیا ہے کہ لیکھ ٹنڈن بہت اچھے انسان تھے مجھے ان کی موت کا افسوس ہے۔
بالی ووڈ اداکارآشوتوش گواریکر نے بھی ٹوئٹ کیا ہے کہ لیکھ ٹنڈن بالی ووڈ کے بہت ہی باصلاحیت ہدایت کار تھے، انہوں نے بالی ووڈ کو کئی کامیاب فلمیں دیں، ٹنڈن ہمیشہ ہمیں یاد آئیں گے۔
بھارتی شوبز انڈسٹری کی لیجنڈ گلوکارہ لتا منگیشکر نے بھی لیکھ ٹنڈن کی موت پر افسوس کا اظہار کیا ہے۔

ممبئی(میڈیا پاکستان) نامور بالی ووڈ اداکارہ پریانکا چوپڑا نے ماضی میں اپنے ساتھ پیش آئے ایک تکلیف دہ واقعے کے بارے میں بتاتے ہوئےکہا ہے کہ 18 سال کی عمر میں انہیں اس حد تک ذہنی دباؤ میں مبتلا کیا گیا تھا کہ ان کا صبر جواب دے گیا تھا،تاہم اس واقعے نے ایک نئی پریانکا کو جنم دیا۔بالی ووڈ فلمیں کہانی، ایکشن، موسیقی اور ہیروئنوں کے بغیر نامکمل ہیں ، بھارتی فلم انڈسٹری میں آج تک کسی نے بھی ایسی فلم بنانے کی کوشش نہیں کی جو ہیروئن کے بغیر ہو، اداکارائیں بالی ووڈ کا اہم اور لازمی جز سمجھی جاتی ہیں اور بیشتر شائقین اداکاراؤں کو دیکھنے کے لیے ہی سینما کا رخ کرتے ہیں ۔ تاہم فلموں کا لازمی جز سمجھی جانے والی ہیروئنوں کو آج بھی بالی ووڈ میں قدر کی نگاہ سے نہیں دیکھا جاتا ، ان کے ساتھ نہ صرف صنفی امتیاز برتا جاتا ہے بلکہ انہیں معاوضہ بھی فلم کے ہیرو کے مقابلے میں کم دیاجاتا ہے۔
اس صنفی امتیاز کاشکار بالی ووڈ کی تقریباً ہر اداکارہ ہوئی ہے۔ حال ہی میں پریانکا چوپڑا نے کیر ئیر کی ابتدا میں ہونے والے ایک تکلیف دہ واقعے کا ذکر کیا جس میں ان کے ساتھ واضح طور پر صنفی امتیاز برتا گیا تھا، پریانکا آج بالی ووڈ سمیت ہالی ووڈ کی بھی مقبول ترین اداکارہ ہیں تاہم وہ اپنے ساتھ ہوئے اس واقعے کو بھلا نہیں سکی ہیں۔
پریانکا نےایک انٹرویو کےدوران ماضی کے واقعات سے پردہ اٹھاتے ہوئے کہا کہ جب میں 18 سال کی تھی تو بالی ووڈ سے تعلق رکھنے والے ہدایت کار(پریانکا نے ہدایت کار کانام نہیں بتایا)نے مجھے صاف لفظوں میں کہا کہ اگر میں کم معاوضے اور ہدایت کار کی شرطوں کے مطابق کام نہیں کروں گی تو وہ مجھے فلم سے نکال کر کسی اور کو یہ فلم دے دیں گے،کیونکہ انٹرٹینمنٹ بزنس میں ہیرو کے مقابلے میں ہیروئن کو تبدیل کرناکوئی بڑی بات نہیں ۔ پریانکا یہ واقعہ شیئر کرتے وقت جذباتی ہوگئیں اور کہا کہ میں آج تک یہ سب بھلا نہیں سکی ہوں ۔ تاہم اس واقعے نے میری ہمت توڑی نہیں بلکہ مجھے مزید مضبوط بنایا اور میں نے فیصلہ کیا کہ میں خود کواس قابل بناؤں گی کہ کوئی فلمساز مجھے نکالنے کے متعلق سوچے بھی نہیں۔
پریانکا نے اپنا کہا سچ کردکھایا، آج ان کا شمار صرف بالی ووڈ کی ہی نہیں بلکہ ہالی ووڈ کی بھی صف اول کی اداکاراؤں میں ہوتا ہے ، پریانکا اس قت ہالی ووڈ کے دو پروجیکٹ ’’اے کڈ لائک جیک‘‘اور ’’از اٹ ان رومینٹک‘‘میں مصروف ہیں۔
واضح رہے کہ وقت گزرنے کے ساتھ بالی ووڈ میں خواتین کے ساتھ صنفی امیتازبرتے جانے کے رجحان میں تبدیلی آرہی ہے، ماضی کے برعکس اب بالی ووڈ ہیروئنوں کو بھی اہمیت دی جارہی ہے جس کی مثال دپیکا پڈوکون ہیں جنہیں فلم ’’پدماوتی‘‘میں اداکار رنویر سنگھ اور شاہد کپور سے زیادہ معاوضہ دیا گیا ہے۔

ممبئی (میڈیا پاکستان ) بالی ووڈ اداکارہ کنگنا رناوت فلم ’’کوئین آف جھانسی‘‘کیلئے ممبئی میں تلوار سے لڑنے کی تربیت لے رہی ہیں ۔بھارتی میڈیا کی رپورٹ کے مطابق کنگنا رناوت اپنی نئی فلم میں اپنے کردار کیلئے گھڑ سواری اور تلوار بازی کی تربیت لے رہی ہیں اس موقع پر بنائی گئی ویڈیو بھی ٹوئٹر پر شیئر کی گئی ہے جس میں کنگنا تربیت لیتے ہوئے دکھائی دے رہی ہیں ۔ فلم کے ہدایتکار کیتن مہتہ ہیں فلم آئندہ سال نمائش کیلئے پیش کی جائیگی ۔
دوسری جانب یہ بھی معلوم ہوا ہے کہ اداکارہ اسی فلم کی شوٹنگ کے دوران تلوار لگنے سے زخمی ہوگئی ہیں ، کنگنا اپنے ٹرینر کے ساتھ جم میں پریکٹس کر رہی تھیں کہ اسی دوران تلوار ان کی ناک کے اوپر لگی جس سے ان کی ناک کے اوپر کٹ لگ گیا اور خون بہنا شروع ہوگیا ۔ سیٹ پر موجود عملے نے فوری طور پر انہیں طبی امداد دی اور بعد ازاں انہیں چیک اپ کیلئے ہسپتال لے جایا گیا جہاں ڈاکٹروں نے ان کا زخم صاف کر کے مرہم پٹی کردی ۔ کنگنا ایک دو روز میں دوبارہ اس فلم کی شوٹنگ میں حصہ لیں گی ۔

ممبئی(میڈیا پاکستان) بالی ووڈ کنگ شاہ رخ خان کی صاحبزادی سہانا خان نے انسٹاگرام پر اپنی ایک تصویرشیئر کی ہے جس میں ان کا چہرہ کافی سوجا ہوا نظر آرہا ہے، اس تصویر کے باعث سہانا خان سوشل میڈیا صارفین کی تنقید کی زد میں آگئیں۔بالی ووڈ کے بادشاہ شاہ رخ خان کی خوبصورت بیٹی سہانا خان نے ابھی بالی ووڈ میں قدم بھی نہیں رکھا ہے اور ابھی سے ان کا شمار بالی ووڈ کی خوبرو حسیناؤں میں ہونے لگا ہے، سہانا خان کے مداحوں کی تعداد لاکھوں میں ہے جو نہ صرف ان کی سادگی اور حسن کے دیوانے ہیں بلکہ ان کی تصاویر سوشل میڈیا پر پسند کرنے کے ساتھ تبصرہ بھی کرتے ہیں تاہم گزشتہ روز سہانا خان کی انسٹاگرام پر جاری ہونے والی تصویرپر لوگوں کی جانب سے منفی ردعمل دیکھنے میں آیا۔
تصویر میں سہانا خان کا چہرہ کافی سوجا ہوا لگ رہا ہے جس کی وجہ سے لوگوں نے انہیں سخت تنقید کانشانہ بنایا اوران کا چہرہ،آنکھیں اور ہونٹ سوجا ہوا ہونے کی وجہ دریافت کی۔ تاہم کچھ لوگوں نے سہانا کے اس روپ کو بھی پسند کیا اور انہیں سادگی اور حسن کا پیکر قراردیا۔
واضح رہے کہ سہانا خان سوشل میڈیا پراکثر اپنی تصاویر شیئر کرتی رہتی ہیں، جسے ہزاروں لوگ لائک کرنے کے ساتھ ان کے بارے میں کھل کر اپنی رائے کا اظہار کرتے ہیں تاہم اس بار یہ رائے مثبت کے بجائے منفی ہے۔

کراچی(میڈیا پاکستان) سروں کے شہنشاہ استاد نصرت فتح علی خان کا آج 69 واں یوم پیدائش منایا جارہا ہے۔13 اکتوبر1948 میں فیصل آباد کے معروف قوال فتح علی خان کے ہاں پیدا ہونے والے نصرت فتح علی خان قوالی اورلوک موسیقی میں اپنی پہچان آپ تھے۔ نصرت فتح علی خان کا پہلا تعارف خاندان کے دیگرافراد کی گائی ہوئی قوالیوں سے ہوا اور ’’دم مست قلندرمست مست‘‘ نے انہیں شناخت عطا کی۔
موسیقی میں نئی جہتوں کی وجہ سے ان کی شہرت پاکستان سے نکل کرپوری دنیا میں پھیل گئی۔ بین الاقومی سطح پر صحیح معنوں میں ان کا بنایا ہوا پہلا شاہکار 1995 میں ریلیز ہونے والی فلم’’ڈیڈ مین واکنگ‘‘ تھا جس کے بعد انہوں نے ہالی ووڈ کی ایک اور فلم ’’دی لاسٹ ٹیمپٹیشن آف کرائسٹ‘‘ کی بھی موسیقی ترتیب دی.
ہالی ووڈ کے بعد بالی ووڈ نے بھی نصرت فتح علی خان کو ہاتھوں ہاتھ لیا۔ انہوں نے کئی بھارتی فلموں کی موسیقی ترتیب دی۔پاکستان کی حکومت نے بھی نصرت فتح علی خان کی خدمات کا اعتراف کرتے ہوئے انہیں تمغہ برائےحسن کارکردگی سے نوازا۔
اس کے علاوہ 1995 میں انہیں یونیسکو میوزک ایوارڈ دیا گیا جبکہ 1997 میں انہیں گریمی ایوارڈز کے لئے نامزد کیا گیا۔ اس کے علاوہ بین الاقوامی جریدے ٹائم میگزین نے 2006 میں ایشین ہیروز کی فہرست میں ان کا نام بھی شامل کیا۔

ممبئی(میڈیا پاکستان) بالی ووڈ کے سلطان سلمان خان اور اپنی مزاحیہ اداکاری سے لوگوں کے چہروں پر مسکراہٹ بکھیرنے والےاداکار کپل شرما نے انٹرنیٹ پر سرچ کیے جانے والے سب سے خطرناک اداکاروں کی فہرست میں پہلی اور دوسری پوزیشن حاصل کرلی ہے۔موجودہ دور میں فنکاروں اور ان کے چاہنے والوں کے درمیان انٹرنیٹ کی وجہ سے دوریاں سمٹ کر صرف ایک کلک تک محدود ہوگئی ہیں، اب مداح اپنے پسندیدہ اداکاروں کے بارے میں انٹرنیٹ کے ذریعے ہر وقت کسی بھی طرح کی معلومات حاصل کرسکتے ہیں اور یہ تمام معلومات بآسانی انٹرنیٹ پردستیاب ہوتی ہیں۔ تاہم ان اداکاروں کے بارے میں کلک کرنا خطرناک ثابت ہوسکتا ہے کیونکہ انٹرنیٹ پر موجود معلومات میں خطرناک وائرس کی موجودگی کا انکشاف ہوا ہے جو کمپیوٹر کو خراب کرسکتا ہے۔
بھارت کی سائبر سیکیورٹی فرم مک اے فی کی جانب سے حال ہی میں کیے جانے والے ایک سروے نے کپل شرما اور سلمان خان کو آن لائن سرچ کیے جانے والے اداکاروں میں سب سے زیادہ خطرناک اداکار قرار دے دیا۔ سروےکے مطابق ان اداکاروں کو سرچ کیے جانے کی صورت میں کمپیوٹر میں خطرناک ترین وائرس ’’میلویر‘‘کے حملے کا خطرہ بڑھ جاتا ہے جس کی وجہ سے کپمیوٹر خراب ہونے کا خدشہ ہوتا ہے۔
میک اے فی کے رکن ویکانت کرشنا پور کا کہنا ہے کہ حیرت انگیز طور پر سروے میں کپل شرما نے خطرناک ترین شخصیات کی فہرست میں نمبر ون پوزیشن حاصل کرکے سب کو دنگ کردیا ہے جب کہ سلمان خان دوسری پوزیشن حاصل کرنے میں کامیاب ہوئے ہیں،تیسرے نمبر پر عامر خان، چوتھے نمبر پر بالی ووڈ اداکارہ پریانکا چوپڑا، پانچویں نمبر پر انوشکا شرما، چھٹے پر سنی لیون،ساتویں نمبر پر کنگنا رناوت، آٹھویں نمبر پر رنویر سنگھ ، نویں پر شاہد کپور اوردسویں نمبر پر ٹائیگر شروف براجمان ہیں۔

ممبئی(میڈیا پاکستان) بھارتی ٹی وی کے مقبول ترین شو ’’کون بنے گا کروڑ پتی‘‘کے بارے میں شو کے سابق کھلاڑی نے ایک ایسا انکشاف کردیا ہے جسے آج تک امیتابھ سمیت شو کی پوری ٹیم نے لوگوں سے خفیہ رکھا ہواتھا۔’’کون بنے گا کروڑ پتی‘‘گزشتہ 8 سیزن سے بھارت سمیت دنیا بھر کے لوگوں کا پسندیدہ ترین شو ہے، پروگرام کی مقبولیت میں بالی ووڈ کے بگ بی اور شو کے میزبان امیتابھ بچن کا بھی بہت بڑاہاتھ ہے، امیتابھ جب اپنے مخصوص انداز میں کہتے ہیں ’’کمپیوٹر جی لاک کیا جائے‘‘ تو لوگ ان کے دیوانے ہوجاتے ہیں اور ایسا لگتا ہے امیتابھ کے سامنے موجود کمپیوٹر کوئی مشین نہیں بلکہ جیتا جاگتا انسان ہے جو امیتابھ بچن کی تمام باتیں نہ صرف بغور سنتا ہے بلکہ ان کی تمام باتیں مانتا بھی ہے لیکن کیا یہ واقعی سچ ہے، اس بارے میں شو کے سابق کھلاڑی نے راز کھول دیا ہے۔
بھارتی میڈیا کے مطابق ابھینو پانڈے نے امیتابھ بچن کے ’’کمپیوٹر جی‘‘ کے کچھ راز کھولے ہیں جو آج تک کبھی منظر عام پر نہیں آئے، ابھینو نے کہا کہ وہ کے بی سی کی ہاٹ سیٹ پر بیٹھنے سے پہلے کھیلا جانے والا ایک اور گیم ’’فاسٹر فنگر‘‘ میں امیتابھ بچن کی سیٹ کے بالکل پیچھے بیٹھے تھے اور ان کا دھیان شو کے ساتھ باقی تمام چیزوں پر بھی تھا۔ امیتابھ کے کمپیوٹر جی میں ایک کالے رنگ کا زون ہوتا ہے جس کے ذریعہ دونوں کمپیوٹر یعنی امیتابھ کا اور ان کے سامنے بیٹھے شخص کاکمپیوٹر آپریٹ ہورہا ہوتا ہے اس کے علاوہ اس زون میں پورے شو کا مواد تحریر ہوتا ہے۔
ابھینو کا کہنا ہے کہ امیتابھ کی جانب سے پوچھے گئے تمام سوالات ان کے آپشنز، صحیح جواب، جیتے ہوئے پیسوں کی فہرست اس کے علاوہ سامنے بیٹھے شخص کی کتنی لائف لائن ختم ہوچکی ہیں اور کتنی باقی ہیں یہ سب کچھ ان کے کمپیوٹر میں موجود ہوتا ہے۔اس کے ساتھ ہی کھلاڑی کی تمام تفصیلات بھی امیتابھ کے کپمیوٹر جی میں ایک طرف آرہی ہوتی ہیں یہاں تک کہ اس کی نوکری، رہائش ہر چیز اسکرین پر موجود ہوتی ہے۔جسے دیکھ کر وہ کپمیوٹر کو ہدایات جاری کرتے ہیں اور ہمیں ایسا لگتا ہے جیسے وہ کمپیوٹر جی سے براہ راست بات کررہے ہیں۔
واضح رہے کہ ابھینو پانڈے نے شو میں 12 لاکھ 50 ہزار روپے کی رقم جیتی تھی۔

ممبئی(میڈیا پاکستان) بالی ووڈ کے لیجنڈری اداکارامیتابھ بچن آج اپنی 75 ویں سالگرہ منارہے ہیں۔بالی ووڈ میں بگ بی کے نام سے مشہور اداکار امیتابھ بچن آج پورے 75 برس کے ہوگئے، امیتابھ بچن 11 اکتوبر 1942 کو بھارتی ریاست اترپردیش میں پیدا ہوئے، انہوں نے فلمی کیرئیر کا آغاز 1969 میں فلم ’’سات ہندوستانی‘‘سے کیا، جس کے لیے انہیں نیشنل ایوارڈ سے نوازا گیا۔
70 کی دہائی میں’’اینگری ینگ مین‘‘ کے نام سے مشہورہونے والے بگ بی اب تک 180 سے زائد فلموں میں کام کرچکے ہیں، امیتابھ بچن بھارتی سیاست میں بھی حصہ لے چکے ہیں تاہم ان کا سیاسی سفر نہایت مختصررہا۔
سال 2000 میں بگ بی نے’’کون بنے گا کروڑ پتی‘‘ نامی کوئز شو کی میزبانی کی جس نے بھارتی ٹی وی پرمقبولیت کے نئے ریکارڈ قائم کئے، اس شو کے اب تک 9 سیزن نشر کیے جاچکے ہیں۔ بگ بی نے کئی کامیاب فلموں میں اپنی اداکاری کے جوہردکھائے جن میں ’’دیوار‘‘، ’’زنجیر‘‘، ’’شہنشاہ‘‘، ’’قلی‘‘، ’’ڈان‘‘ اور’’شعلے‘‘وغیرہ شامل ہیں۔
امیتابھ بچن نے اپنے 40 سالہ فلمی کیرئیر کے دوران 12 فلم فیئر ایوارڈز حاصل کیے، جب کہ فلم انڈسٹری میں اعلیٰ خدمات انجام دینے پر انہیں متعدد کالجز اوریونیورسٹیوں کی جانب سے اعزازی سندوں اور ڈگریوں سے بھی نوازا جا چکا ہے۔

ممبئی(میڈیا پاکستان) ناموربالی ووڈ اداکارہ انوشکا شرما اپنے نئے برانڈ ’’نُش‘‘ کے ڈیزائنزپر چوری کا الزام لگنے کے بعد بڑی مصیبت میں گرفتار ہوگئیں۔اداکارہ انوشکا شرما بالی ووڈ کی باصلاحیت اورخوبصورت اداکارہ ہونے کے ساتھ بہت ذہین بھی ہیں اوراسی ذہانت کی وجہ سے وہ بہت کم وقت میں فلم پروڈیوسربننے کے ساتھ کامیاب بزنس وومن بھی بن گئی ہیں، حال ہی میں انہوں نے ’’نُش‘‘ کے نام سے کپڑوں کا نیا برانڈ متعارف کروایا ہے۔ انوشکا اپنے نئے برانڈ کولے کراتنی زیادہ پرجوش ہیں کہ انہوں نے اپنے برانڈ کی تشہیر کے لیے تصاویراورویڈیوز بھی مداحوں کے ساتھ سوشل میڈیا پر شیئرکی ہیں۔تاہم انوشکا اس وقت بڑی مصیبت میں پھنس گئیں جب برانڈ لانچ کرتے ہی ان پر چوری کا الزام لگ گیا۔
بھارتی میڈیا کے مطابق انوشکا شرما کے ڈیزائنرکردہ کپڑوں کے تمام ڈیزائن چوری کے ہیں اوران پر یہ الزام بھی لگایا جارہا ہے کہ انہوں نے یہ تمام ڈیزائنز ایک مقبول ترین چائنیزبرانڈزسے چوری کیے ہیں، یہ سارے ڈیزائنز بآسانی ایک چائنیزای کامرس آن لائن ویب سائٹ پردستیاب ہیں۔ انوشکا کے بارے میں یہاں تک کہا جارہا ہے کہ وہ اپنی مقبولیت کا فائدہ اٹھا کر چوری کردہ ڈیزائنز بیچ رہی ہیں۔
دوسری جانب انوشکا شرما کی ٹیم نےان الزامات کی تردید کرتے ہوئے کہا کہ اس معاملے کی جانچ پڑتال کی جارہی ہے اوراگر واقعی یہ ڈیزائنز چوری شدہ ہیں تواس کے خلاف ایکشن لیا جائے گا، انوشکا کی ٹیم کی جانب سے یہ بیان سامنے آنے کے بعد واضح ہوگیا ہے کہ انہوں نے ڈیزائنز کے چوری ہونے کی تردید نہیں کی، اب دیکھنا یہ ہے کہ انوشکا اوران کی ٹیم اس معاملے پرکیا ایکشن لیں گی۔

ممبئی(میڈیا پاکستان) سلمان خان کافی عرصے سے رومانیہ سے تعلق رکھنے والی ماڈل لولیا ونتر کے اسیر ہیں لیکن اب ان کے بھائی ارباز خان بھی اسی ملک کی ایک اور حسینہ کی زلفوں کے اسیر ہوگئے ہیں۔ابھی تک سلمان خان کی لولیا ونتر کے ساتھ محبت کے کافی چرچے ہیں لیکن دونوں میں سے کسی نے بھی اب تک اس کو باقاعدہ طور پر تسلیم نہیں کیا۔ اس کے ساتھ ہی اب سلو میاں کے چھوٹے بھائی ارباز بھی رومانیہ ہی کی ایک حسینہ سے محبت کی پینگیں بڑھارہے ہیں اور اس کا انہوں نے خود ہی اشارہ دیا ہے۔
بھارتی میڈیا کے مطابق ارباز کا نام الگزینڈرا کیمریا نامی ایک خاتون سے جوڑا جارہا ہے جو اکثرسوشل میڈیا ویب سائیٹ انسٹاگرام پوسٹس میں ان کے ساتھ دیکھی جارہی ہیں۔ دونوں کو چند روز قبل ممبئی کے ایک ہوٹل میں بھی ایک دوسرے کا ہاتھ تھامے دیکھا گیا تھا۔
اپنے ایک حالیہ انٹرویو میں ارباز خان نے اشاروں کنایوں میں یہ بات تسلیم کی ہے کہ وہ کسی سے ملاقاتیں کررہے ہیں لیکن انہوں نے کسی بھی خاتون کا نام نہیں لیا۔
واضح رہے کہ ارباز خان اور ملائکہ اروڑا خان کی 1997 میں شادی ہوئی تھی اور کم و بیش 20 برس بعد اس کا خاتمہ طلاق پر ہوا تھا۔