Category شوبز

لاہور(میڈیا پاکستان) اداکارہ وماڈل زارا شیخ نے کہا ہے کہ فلم کوڈرامے سے دورنہیں رکھا جائے گا اورٹرینڈ نوجوانوں کو کام کے مواقع نہیں دیے جائیں گے، تب تک فلم انڈسٹری میں بہتری ممکن نہیں۔زارا شیخ نے میڈیا سے گفتگوکرتے ہوئے کہا کہ 70ء اور80ء کی دہائی میں پاکستانی ڈرامے نے ملک ہی نہیں بلکہ ہمارے ہمسایہ ملک بھارت کی فلم نگری کے مہان فنکاروں کوبھی اپنا گرویدہ بنا رکھا تھا۔ ڈرامے کی کہانیاں، ڈائیلاگ، فنکاروںکی اداکاری اورڈائریکٹرسمیت تکنیک کاروں کے باکمال فن کوجس طرح سے بھارتی فلم انڈسٹری والوں نے سراہا اوراپنایا ہے اگرکوئی پاکستان میں بھی اپنے اُن بے مثال فنکاروں اورتکنیک کاروں سے سیکھتا یا ان کے فن کو نئی نسل تک منتقل کرنے کے لیے اکیڈمیاں قائم کرتا توشاید آج ہم ماضی کے بجائے موجودہ دورمیںبننے والے ڈراموں کا تذکرہ کرتے۔ اسی طرح پاکستانی فلم کا ماضی بھی بے حد شاندارتھا اوراب مستقبل بھی شانداردکھائی دے رہا ہے۔
اداکارہ نے کہا کہ اگرہم بھارتی فلم نگری کی بات کریں تووہ پاکستانی ڈرامے سے اس قدرمتاثر تھی کہ آج بھی بھارت کی ’’پونا اکیڈمی آف ایکٹنگ‘‘ سمیت ممبئی، کولکتہ، دہلی اور دیگر مقامات پرقائم ایکٹنگ اسکولوں میں پاکستانی ڈرامہ دکھا کراداکاری سکھائی جاتی ہے۔

ممبئی(میڈیا پاکستان) بالی ووڈ کے سلطان سلمان خان کے خلاف ٹی وی رئیلٹی شو بگ باس سیزن 11 میں شامل زبیر خان نے مقدمہ درج کرادیا ہے۔ بھارتی ٹی وی کا متنازعہ ترین شو بگ باس کا ہر سیزن اپنے ساتھ کچھ نئی اور متنازعہ کہانیاں لے کر آتا ہے، بگ باس میں شرکت کرنے والے تمام لوگ گھر پراپنا قبضہ آخر تک جمائے رکھنے کے لیے لڑائیاں اور جھگڑا کرنے کا کوئی موقع نہیں چھوڑتے۔
بگ باس سیزن 11 میں شرکت کرنے والے بھارتی ڈان داؤد ابراہیم کی بہن حسینہ پارکر کے مبینہ داماد زبیر خان نے گھر والوں پر اپنا سکہ جمانے کے لیے نہ صرف ان کے ساتھ لڑائی جھگڑے کیے بلکہ نازیبا زبان بھی استعمال کی، جس پر شو کے میزبان سلمان خان نے انہیں خوب جھاڑ پلائی۔ جس کی وجہ سے زبیر خان کی طبیعت خراب ہوگئی اور وہ اسپتال پہنچ گئے، بہر حال زبیر خان سب سے کم ووٹ حاصل کرکے گھر سے باہر ہوچکے ہیں اور گھر سے بےگھر ہوتے ہی انہوں نے سب سے پہلا کام سلمان خان پر مقدمہ درج کرنے کا کیا ہے۔
بھارتی میڈیا کے مطابق زبیر خان نے سلمان خان کے خلاف ممبئی کے لوناوالا پولیس اسٹیشن میں شکایت درج کرواتے ہوئے کہا ہے کہ سلمان خان نے انہیں دھمکایاہے کہ وہ انہیں انڈسٹری میں کام کرنے کے قابل نہیں چھوڑیں گے، اس کے علاوہ سلمان خان نے کہا ہے کہ جب میں گھر سے باہر نکلا تو وہ مجھے اپنا پالتو کتا بنادیں گے۔
زبیرخان کی جانب سے دائر کی جانے والی ایف آئی آر پر سلمان خان کا کوئی موقف سامنے نہیں آیا ہے۔
واضح رہے کہ زبیرخان کا دعویٰ ہے کہ وہ انڈرورلڈ دان داؤد ابراہیم کی بہن حسینہ پارکرکا داماد ہے، تاہم بھارتی میڈیا نے حسینہ پارکر کے خاندان کے حوالے سے کہا ہے کہ زبیرخان کا داؤد ابراہیم یا حسینہ پارکرکے خاندان سے کسی قسم کا کوئی تعلق نہیں۔

ممبئی(میڈیا پاکستان) بالی ووڈ اداکارہ دپیکا پڈوکون کا کہنا ہے کہ انہیں لگتا ہے وہ آج بھی ڈپریشن کے مرض میں مبتلا ہیں اوراب تک اس بیماری سے پیچھا چھڑانے میں ناکام رہی ہیں۔بہترین اداکاری اورخوبصورتی کے باعث بالی ووڈ کے ساتھ ہالی ووڈ پر بھی اپنا سکہ جمانے والی ناموراداکارہ دپیکا پڈوکون ماضی میں ڈپریشن کے مرض کا شکاررہ چکی ہیں، اس دور کو وہ اپنی زندگی کا خوفناک ترین دور قراردیتی ہیں، ایک انٹرویو کے دوران ان کا کہنا تھا کہ ڈپریشن کی وجہ سے وہ اکثر بیٹھےبیٹھے رونے لگتی تھیں اور کام پر بھی توجہ نہیں دے پارہی تھیں لہٰذاجب صورتحال بہت زیادہ خراب ہوگئی تو انہوں نے ڈاکٹر سے مشورہ لینے کا فیصلہ کیااوراپنی بیماری پرقابوپانے کے لیے علاج کرایا۔ تاہم دوسال بعد ایک بار پھر دپیکا نے انکشاف کرتے ہوئے کہا ہے کہ علاج کے باوجود وہ آج تک اپنی دماغی بیماری سے باہرنہیں نکل سکیں۔
بھارتی میڈیا کے مطابق اداکارہ نے اپنی دماغی بیماری کےبارے میں بات کرتے ہوئے کہا کہ انہیں ایسا محسوس ہوتا ہے جیسے وہ اپنی بیماری سے آج تک باہر نہیں نکلی ہیں ، انہیں ہروقت اس بات کا خدشہ رہتا ہے کہ ڈپریشن کی بیماری ایک بار پھر ان پر حاوی ہوجائے گی۔
دپیکا کا کہنا تھا کہ فلم انڈسٹری میں ایسے لوگ موجود ہیں جومجھے صرف اس وجہ سے کام کی پیشکش نہیں کرتے کہ میں ڈپریشن کی مریضہ ہوں اور کام نہیں کرسکتی، لیکن میں یہ بات یقین سے نہیں کہہ سکتی، ہوسکتا ہے یہ بات صحیح نہ ہو،تاہم میں پھر بھی بہت خوش ہوں کیونکہ بہت سے لوگوں کی جانب سے کام کی پیشکش نہ ہونے کے باوجود میرے پاس اتنا کام ہے کہ میں اپنی مرضی اور خواہش کے مطابق کام کا انتخاب کرتی ہوں۔
بالی ووڈ اداکارہ نے کہا کہ بھارتی عوام ذہنی بیماری سے آگہی کے متعلق بہت کم جانتے ہیں اور ہمارا المیہ یہ ہے کہ ہم اس بارے میں بات بھی نہیں کرتے ، دپیکا نے کہا کہ بنیادی تعلیمی ادارے یعنی اسکولوں میں ہی طالب علموں کو ذہنی بیماری سے متعلق آگاہ کرنا چاہئے۔اس کے علاوہ وہ تمام افراد جو کام کے دوران کسی بھی قسم کا ڈپریشن محسوس کرتے ہیں انہیں چاہئے کہ وہ اس بارے میں بغیر کسی ڈر اور خوف کے کھلے عام بات کریں۔ دپیکا نے ایک ادارہ بھی قائم کیا ہے جہاں ڈپریشن میں مبتلا افراد کا علاج کیا جاتا ہے۔

ممبئی(میڈیا پاکستان) بالی ووڈ کنگ شاہ رخ خان نے معروف رئیلٹی شو بگ باس کا میزبان بننے کی خواہش ظاہر کردی۔اپنے حس ِ مزاح کے لیے مشہور سپر اسٹار شاہ رخ کو ایک بہترین مقرر کے طور پر بھی پسند کیا جاتا ہےوہ متعدد ٹی وی شوز میں اپنی مخصوص انداز بیان سے مداحوں کو خوب محظوظ کرتے رہے ہیں۔
خیالات اور آئیڈیاز شیئر نگ کے مشہور پلیٹ فارم TED Talk کے ہندی ورژن ’نئی سوچ‘ میں بالی ووڈ بادشاہ بطور میزبان شریک ہورہے ہیں جب کہ اسی اثنا میں رئیلٹی شو بگ باس 11 بھی ٹی وی اسکرین کی زینت بنا ہواہے جسے دبنگ خان ہوسٹ کررہے ہیں۔ بالی ووڈ خانز کے بیک وقت ٹی وی شوز کی میزبانی کو مداح نمبرون بننے کے چیلنج کے طور پر دیکھ رہے ہیں۔
’نئی سوچ‘ شو کے آغاز پر جب شاہ رخ خان سے پوچھا گیا کہ کیا وہ بگ باس کو ہوسٹ کریں گے تو بالی ووڈ اسٹار نے کہا کہ انہوں نے بہت سے شوز کی میزبانی کی لیکن اس قسم کے رئیلٹی شو کی میزبانی کا موقع نہیں ملا ،ہاں اگر وقت ہوا اور موقع ملا تو میزبان بننے پر خوشی ہوگی تاہم اس کا دارومدار معاوضے پر ہے۔ انہوں نے کہا کہ میں دوسرے اداکاروں کی طرح شوز کی میزبانی کرنے کے حوالے سےزیادہ پرُجوش نہیں ہوں۔

ممبئی(میڈیا پاکستان) بالی ووڈ اداکارہ کنگنا رناوت کی ہریتھک روشن کے ساتھ لڑائی ہر روز نیا رخ لے رہی ہے اور حال ہی میں کوئن کی ایک ای میل منظر عام پر آئی ہے جس میں انہوں نے سلمان خان پر گالیاں دینے کا الزام لگایا ہے۔بھارتی میڈیا نے کنگنا رناوت کی ایک ای میل کا سراغ لگایا ہے جس میں انہوں نے سلمان خان پر ہراساں کرنے کا الزام لگایا ہے۔ یہ ای میل ہریتھک روشن کو 9 اکتوبر 2014 کو کی گئی تھی اور اس میں کنگنا، ہریتھک روشن سے مخاطب ہیں۔
ای میل میں کنگنا کا کہنا ہے کہ ’’ تم (ہریتھک) اپنی فلم کی تشہیر کے لیے ’’بگ باس‘‘ گئے تھے یہ اچھی بات ہے، وہ (سلمان خان) عجیب انسان ہیں، جب میں نے ان کی فلم میں کام کرنے سے انکار کیا تو کہنے لگے کہ کرینہ یہ فلم کررہی ہے لیکن میں یہ فلم تمہیں دے رہا ہوں، کیونکہ میں کرینہ کی مدد کرنے کے بجائے تمہارا (کنگنا) کا کیرئیر بنانا چاہتا ہوں‘‘۔
کنگنا اپنی ای میل میں ہریتھک کو کہہ رہی ہیں کہ ’’ یہ سن کر میں حیران تھی کہ کیا وہ (سلمان خان) پاگل ہے، کیا کرینہ کا بجرنگی بھائی جان والا کردار میرا کیرئیر بناسکتا ہے، اس کی ایسی کون سی ہیروئن ہے جس نے کیرئیر بنالیا ہے۔ سب نے ہی مجھے فلم میں کام کرنے سے صاف منع کیا ہے، اس حوالے سے بہت خوش ہوں کہ میں نے کبھی ان کے ساتھ کام نہیں کیا، جو پروڈیوسر، ڈائریکٹر مجھ پر پیسہ لگاتے ہیں انہوں نے مجھے صاف منع کیا تھا کہ یہ فلم میرے امیج کو خراب کردے گی۔‘‘
اپنی ای میل میں کنگنا کا کہنا تھا کہ ’’ وہ (سلمان خان) صرف میرا مذاق اڑانا چاہتا تھا، ایک بار اس نے مجھے کہا کہ وہ کیوں کئی فلموں میں کام کرتی ہے، کترینہ کو دیکھو، کتنی اچھی ہے اور بہت کم بولتی ہے، میں نے اسے کہا کہ وہ 19 ویں صدی میں زندہ ہے، مجھے سلمان خان اور کترینہ کیف نہیں بننا ہے، اس بات پر وہ بھڑک گئے اور مجھے گالیاں دینے لگے۔ اس واقعے کے 2 سال تک میں نے ان کا چہرا نہیں دیکھا، انہوں نے مجھے فون کال اور میسیج کیے لیکن میں نے کوئی جواب ہی نہیں دیا۔ بعد میں انہوں نے مجھے اپنی سالگرہ پر بلایا تھا کیونکہ کوئن کے بعد وہ مجھ سے ملنا چاہتے تھے‘‘۔
دوسری جانب کنگنا رناوت کے وکیل رضوان صدیقی نے کہا ہے کہ ’’ان ای میلز کو مستند نہیں کہا جاسکتا کیونکہ 2014 میں ان کا ای میل اکاؤنٹ ہیک ہوگیا تھا۔‘‘

ممبئی (میڈیا پاکستان ) عامر خان نے میڈیا سے گفتگو کرتے ہوئے کہا ہے کہ میں اپنی زندگی پر مبنی کتاب لکھنے کی خواہش رکھتا ہوں لیکن میں چاہتا ہوں کہ اسے میری موت کے بعد منظر عام پر لایا جائے ۔ عامر خان نے میڈیا سے گفتگو کرتے ہوئے کہا میں اپنی زندگی پر مبنی کتاب لکھنے کی خواہش رکھتا ہوں
لیکن میں چاہتا ہوں کہ اسے میری موت کے بعد منظر عام پر لایا جائے کیونکہ میری زندگی کھلی کتاب کی مانند ہے اس لئے میں چاہتا ہوں کہ میری زندگی کے بارے میں لوگ آج سے 50 سال بعد جانیں کیونکہ مجھے نہیں لگتا کہ ابھی کوئی بھی ایسا مداح ہو گا جو میری زندگی کے بارے میں نہیں جانتا۔

نیویارک (میڈیا پاکستان ) آسکر ایوارڈ یافتہ فلمساز شرمین عبید چنائے کی ڈاکو منٹری فلم اے گرل ان دی ریور نے ایمی ایوارڈ جیت لیا ۔ شرمین عبید چنائے نے 38 واں سالانہ نیوز اینڈ ڈاکو منٹری ایمی ایوارڈ اپنے نام کرلیا ۔ پاکستانی فلمساز کی ڈاکومنٹری فلم A Girl in the River: The Price of Forgiveness کو نیویارک میں ایمی ایوارڈ سے نوازا گیا ۔ اے گرل ان دی ریور ایک ایسی لڑکی کی کہانی ہے جسے غیرت کے نام پر قتل کرنے کی کوشش کی گئی تھی تاہم وہ بچ گئی ۔ اقوام متحدہ میں پاکستانی سفیر ڈاکٹر ملیحہ لودھی بھی تقریب میں شریک تھیں ، انہوں نے شرمین کو مبارکباد دی ۔

لاہور(میڈیا پاکستان) اداکارہ وماڈل صدف بھٹی نے کہا ہے کہ پاکستانی فلموں کا معیار اورمیکنگ کا انداز جب تک بہترنہیں ہوگا، تب تک غیرملکی فنکاروں کو سائن کرنے کا سوال ہی پیدا نہیں ہوتا اور اگر معیار بہتربنائے بغیرغیرملکی فنکاروں کو سائن کیا گیا تو درست نہیں ہوگا۔صدف بھٹی نے ’’ایکسپریس‘‘ سے گفتگو کرتے ہوئے کہا کہ دنیا بھرمیں مختلف زبانیں بولی جاتی ہیں اور ہر ایک زبان میں فلمیں بنتی ہیں لیکن اس کا یہ مطلب قطعی نہیں ہوتا کہ وہ فلم صرف اورصرف کسی ایک خاص زبان تک کی پسند کی جائے گی۔ اصل تو فلم کی کہانی اور پھر فنکاروں کی اداکاری ہوتی ہے، جس کو دیکھ کر اجنبی زبان ہونے کے باوجود لوگ اس کے احساسات کوسمجھ پاتے ہیں۔ اگرایسا نہ ہوتو انگریزی زبان میں بننے والی ہالی وڈ فلموں کو پسند کرنے والے پوری دنیا میں نہ ہوتے۔
اداکارہ نے کہا کہ ہم سب یہ بات توبخوبی جانتے ہیں کہ یورپ، امریکہ، افریقہ اورمڈل ایسٹ سمیت دنیا کے بیشترممالک میں انگریزی نہیں بولی جاتی اورنہ ہی اس کوسمجھنے والوں کی تعداد کثیر ہے لیکن اس کے باوجود انگریزی زبان کی فلمیں سب سے زیادہ منافع والا کاروبار کرتی ہیں، جس کی سب سے اہم وجہ فنکاروں کی ایکٹنگ ہوتی ہے، جو جاندارکہانی کوحقیقت کا روپ دیتی ہے۔
صدف نے کہا کہ پاکستان میں باصلاحیت فلم میکرز موجود ہیں لیکن ان کو اب اپنا قبلہ درست کرنے کی ضرورت ہے۔ صرف جدید ٹیکنالوجی نہیں ہمیں فلم کے تمام شعبوں پربڑی توجہ کے ساتھ کام کرنا ہوگا۔ وگرنہ ہم آگے بڑھنے کے بجائے بہت پیچھے رہ جائیں گے۔ انہوں نے کہا کہ اس وقت ہمیں پاکستانی فلم کی سپورٹ کے لیے کوپروڈکشن پربھی کام کرنا چاہیے لیکن اس سے پہلے ہمیں اپنی خامیوں پرنظرثانی کرنے کی ضرورت ہے، اگراسی طرح ہم نے دوسرے ممالک کے ساتھ کوپروڈکشن شروع کی تو پھر ہماری تعریف ہونے کے بجائے مذاق اڑے گا جوکہ موجودہ حالات میں ٹھیک نہیں۔

ڈھاکا(میڈیا پاکستان) بنگلا دیش کی ملکہ حسن جنت النعیم ایورل سے شادی کو خفیہ رکھنے کے جرم میں ملکہ حسن کا تاج واپس لے لیا گیا۔غیرملکی خبررساں ادارے کے مطابق صرف 5 روز قبل ہی بنگلا دیش کی ملکہ حسن قرار دی جانے والی جنت النعیم کو اس وقت اپنا تاج واپس کرنا پڑ گیا جب ان کے حوالے سے انکشاف ہوا کہ وہ شادی شدہ ہیں اور انہوں نے شادی کو خفیہ رکھا اور جھوٹ سے کام لیا۔
بنگلا دیشی میڈیا کا کہنا ہے کہ بنگالی حسینہ جنت النعیم کی شادی مارچ 2013 میں ہوئی اور 2 ماہ جاری رہنے کے بعد ختم ہو گئی تھی لیکن مس ورلڈ بنگلا دیش میں کسی ایسی خاتون کو نمائندگی کا موقع نہیں دیا جاسکتا جس نے اپنے حوالے سے غلط معلومات فراہم کی ہوں جب کہ مقابلے کے قواعد و ضوابط کے تحت صرف غیر شادی شدہ خواتین ہی مس ورلڈ کے مقابلے میں حصہ لے سکتی ہیں۔ اس لئے جنت النعیم سے ٹائٹل واپس لیے جانے کے بعد رنر اپ جیسن اسلام کو ‘مس ورلڈ بنگلا دیش’ کا ٹائٹل دیا گیا ہے۔
دوسری جانب 27 سالہ جنت النعیم کا کہنا ہے کہ ٹائٹل چھین لینے کا فیصلہ میری شکست نہیں بلکہ یہ بنگلہ دیش کے قوانین کی شکست ہے۔ اعتراف کرتی ہوں کہ میری شادی صرف 16 سال کی عمر میں ہوئی جب میں دسویں جماعت کے امتحان کے بعد صرف ایک ماہ ہی ہوا تھا اور مجھے شادی کے لئے زبردستی مجبور کیا گیا تو کیا اسے شادی کہیں گے وہ عمر کیا ہوتی ہے میں اپنی عمر کے حوالے سے تمام دستاویزی ثبوت پیش کرسکتی ہوں۔

ممبئی(میڈیا پاکستان) بالی ووڈ کنگ شاہ رخ کے ممبئی کے علاقے گورے گاؤں میں واقع پروڈکشن ہاؤس ریڈ چلی انٹرٹینمنٹ وی ایف ایکس کی بلڈنگ میں قائم غیر قانونی تعمیر کو مسمار کردیا گیا۔شاہ رخ خان کے ساتھ ان کے پروڈکشن ہاؤس ریڈ چلی کا شمار بھی بھارت کی نمبرون کمپنیوں میں ہوتا ہے، اس پروڈکشن ہاؤس میں بیک وقت ہزاروں لوگ کام کرتے ہیں جب کہ ریڈ چلی کے بینر تلے کئی کامیاب فلمیں پروڈیوس کی گئی ہیں جن میں اوم شانتی اوم، را ون، چنائی ایکسپریس، ہیپی نیوائیر، دل والے، پھر بھی دل ہے ہندوستانی وغیرہ شامل ہیں، فلمیں پروڈیوس کرنے کے ساتھ یہ کمپنی ویژول ایفیکٹس (وی ایف ایکس)بھی بناتی ہے، تاہم گزشتہ روز شاہ رخ خان اوران کی کمپنی اس وقت مصیبت میں آگئی جب ریڈ چلی پروڈکشن ہاؤس کی بلڈنگ میں قائم غیرقانونی کینٹین برہان ممبئی میونسپل کارپوریشن(بی ایم سی) نے گرادی۔
بھارتی میڈیا کے مطابق جس بلڈنگ میں شاہ رخ خان کا آفس قائم ہے اسی بلڈنگ کی چوتھی منزل پرایک غیرقانونی کینٹین قائم تھی، لیکن یہ کینٹین فعال نہیں تھی اورپروڈکشن ہاؤس کے ملازمین اپنے گھر سے لایا ہوا کھانا وہاں بیٹھ کر کھاتے تھے، تاہم کچھ روز قبل کسی نےعمارت میں قائم اس کینٹین کے خلاف بی ایم سی میں شکایت کردی جس پر کارروائی کرتے ہوئے بی ایم سے نے یہ جگہ مسمار کردی۔بی ایم سی کے ایک سینئرآفیسر نے بھارتی میڈیا سے اس بارے میں بات کرتے ہوئےکہا کہ عمارت کی چوتھی منزل پرواقع تقریباً 2000مربع فٹ پرقائم اس جگہ پرریڈ چلی پروڈکشن ہاؤس کے ملازمین کے لیےغیر قانونی طریقے سے ایک کینٹین قائم کی گئی تھی اوراس کی تعمیرکے لیے بی ایم سی سے اجازت لینی بھی ضروری نہیں سمجھی گئی تھی، ہمیں اس جگہ کے غیرقانونی ہونے کی شکایت موصول ہوئی تھی، جس کے بعد ہم نے تحقیقات کیں اور کارروائی کرتے ہوئے اس جگہ کو صاف کردیا۔
دوسری جانب ریڈ چلی پروڈکشن ہاؤس کے ترجمان نے اس بارے میں بات کرتے ہوئے کہا کہ شاہ رخ خان اس بلڈنگ کے اصل مالک نہیں ہیں بلکہ انہوں نے یہ عمارت کرائے پرلی ہوئی ہے اس عمارت میں ایک اوپن ایریا ہے جہاں ہمارے ملازمین کھانا وغیرہ کھاتے ہیں، تاہم انہیں اس جگہ کے غیرقانونی ہونے کا علم نہیں تھا، اس کے علاوہ جس جگہ کو مسمار کیا گیا ہے وہاں سولرپینل لگے ہوئے تھے جو پوری بلڈنگ کوکلین انرجی فراہم کرتے تھے تاہم پھر بھی وہ اس بارے میں بی ایم سی آفیسرز سے بات کریں گے کہ بغیر اجازت یہ جگہ کیوں مسمار کی گئی۔واضح رہے کہ شاہ رخ خان اس سے قبل 2015 میں بھی اس طرح کی صورتحال کا سامنا کرچکے ہیں جب بی ایم سی آفیسرز نے ان کے بنگلے ’’منت‘‘ کے قریب واقع غیرقانونی تعمیرکو مسمارکردیا تھا۔