Category شوبز

پیرس (میڈیا پاکستان ) پیرس فیشن ویک میں فیشن کے جلوے جاری ہیں ۔نئے اور پرانے انداز کا امتزاج لیے ماڈلز نے ریمپ پر واک کی جس پر شائقین نے بھرپور داد دی ۔ خوشبوؤں کے شہر پیرس میں فیشن کے جلوے دیکھ کر شائقین مبہوت رہ گئے ۔دنیا بھر کے فیشن ڈیزائنرز کے بنائے رنگ برنگ دلکش ڈیزائن کے ملبوسات کی نمائش بھی ایونٹ کے دوران ہوئی ۔
سلک کے زری والے لباس ، کوٹ اور بیگ اٹھائے ماڈلز نے ریمپ پر واک کی تو شائقین نے بھرپور داد دی ۔ رنگوں کی برسات بکھیر کر فیشن ویک کل اپنے اختتام کو پہنچے گا ۔

ممبئی(میڈیا پاکستان)بالی ووڈ کی باربی ڈول کترینہ کیف اپنی اگلی فلم میں رنویر سنگھ کی دلہن بنیں گی۔بالی ووڈ کے چاکلیٹی ہیرو رنبیر کپور سے علیحدگی کے بعد کترینہ کیف کی قسمت کھل گئی ہے انہیں ایک کے بعد ایک فلم کی آفر ہورہی ہے، کترینہ ان دنوں سلمان خان کے ساتھ فلم ’’ٹائیگر زندہ ہے‘‘ کی شوٹنگ میں مصروف ہونے کے ساتھ ہدایت کار آنند لال رائے کی فلم میں بھی شاہ رخ خان کے مقابل مرکزی کردا ادا کررہی ہیں اور اب انہیں رنویر سنگھ کے ساتھ فلم کی پیشکش ہوئی ہے جس میں وہ رنویر سنگھ کی بیوی کا کردار نبھائیں گی۔
بھارتی میڈیا کے مطابق ہدایت کار کبیر خان بھارتی کرکٹ کے مایہ ناز کھلاڑی اور سابق کپتان کپل دیو کی سوانح حیات پر فلم بنارہے ہیں، فلم میں کپل دیو کے مرکزی کردار کے لیے رنویر سنگھ کو کاسٹ کیا گیا ہے جب کہ ان کی اہلیہ رومی دیو کے کردار کےلیے کترینہ کیف کا نام لیا جارہا ہے، 1983 میں کپل دیو کی قیادت میں بھارت نے ورلڈ کپ جیتا تھا اس کے علاوہ بھی ان کی زندگی کے کئی دلچسپ پہلو ہیں جنہیں کبیر خان کہانی میں ڈھال کر پردہ اسکرین پر پیش کریں گے۔
دوسری جانب کترینہ کیف کبیر خان کی پسندیدہ اداکارہ ہیں، دونوں ایک ساتھ کئی پروجیکٹس میں کام کرچکے ہیں جن میں ’’نیویارک‘‘ ، ’’ایک تھا ٹائیگر‘‘اور’’فینٹم‘‘ شامل ہیں، کبیر اور کترینہ اس وقت فلم ایک تھا ٹائیگر کے سیکوئل’’ٹائیگر زندہ ہے‘‘کی شوٹنگ میں بھی مصروف ہیں جس میں سلمان خان مرکزی کردار ادا کررہے ہیں۔
میڈیا رپورٹس کے مطابق فلم کے لیے کترینہ کے علاوہ دو نئی اداکاراؤں کے نام بھی زیرغور ہیں لیکن کہا جارہا ہے کہ فلم میں رومی کے کردار کے لیے کترینہ کیف مضبوط امیدوار ہیں اور کبیر خان انہیں ہی فلم میں کاسٹ کریں گے۔
واضح رہے کہ کترینہ کیف اور رنویر سنگھ نے ابھی تک ایک ساتھ کام نہیں کیا ہے لہٰذا مداح دونوں کی جوڑی کو ایک ساتھ دیکھنے کے لئے بے چین ہیں۔

دبئی (میڈیا پاکستان ) معروف بھارتی اداکارہ کرینہ کپور نے دبئی میں زیورات کا کاروبار شروع کردیا۔میڈیا رپورٹس کے مطابق بالی ووڈ اداکارہ نے دبئی کے معروف تجارتی مرکز میں جیولری کے 2 شوروم بنائے ہیں جن کا باقاعدہ افتتاح آئندہ دو سے تین روز میں کردیا جائے گا۔ سونے کی خرید و فروخت کی مشہور کمپنی ماربالا گولڈ اینڈ ڈائمنڈ کی برانڈ ایمبیسیڈر کرینہ کپور ایک ہی روز دونوں شورومز کی افتتاحی تقریب میں شرکت کریں گی۔ واضح رہے کہ مذکورہ کمپنی نے اپریل 2013میں بھارتی اداکارہ کرینہ کپور کو اپنا برانڈ ایمبیسیڈر مقرر کیا تھا ۔

ممبئی(میڈیا پاکستان) بالی ووڈ کی بے باک اداکارہ کنگنا رناوت اپنی اداکاری سے مداحوں کو خوب محظوظ کرتی ہیں جب کہ ان کا شماران اداکاراؤں میں ہوتا ہے جنہوں نے کم وقت میں اپنا خوب نام کمایا اورترقی حاصل کی۔بھارتی میڈیا رپورٹس کے مطابق 2 بارنیشنل ایوارڈزجیتنے والی بالی ووڈ اداکارہ کنگنا رناوت میں حال ہی میں ممبئی کے علاقے باندرہ میں ایک بنگلہ خریدا جس کی قیمت 5، 10 کروڑ نہیں بلکہ پورے 20 کروڑ ہے۔
اداکارہ نے بنگلہ گزشتہ ماہ ستمبر میں رجسٹرڈ کرایا تھا جو 4 منزلہ ہے، بنگلے کے ایک مربع فٹ کے لیے 67 ہزار روپے کی رقم ظاہرکی گئی ہے، اداکارہ کے بنگلے میں 565 مربع فٹ پارکنگ کے لیے مختص کی گئی ہے۔
میڈیا رپورٹس کے مطابق اداکارہ اس بنگلے میں اپنا پروڈکشن ہاؤس کھلونے کا بھی ارادہ رکھتی ہیں جب کہ کچھ عرصے قبل اداکارہ نے ہدایتکاری کے میدان میں بھی اترنے کا فیصلہ کرلیا تھا۔

ممبئی(میڈیا پاکستان) نامور بالی ووڈ اداکارہ شلپا شیٹھی بالی ووڈ کے بگ بی امیتابھ بچن کی سب سے بڑی مداح ہونے کی جھوٹی دعویدار نکلیں، شلپا امیتابھ بچن کی جانب سے ان کے بارے میں پوچھے جانےوالے آسان سے سوال کا جواب بھی نہ دے سکیں اور شرمندہ ہوگئیں۔بالی ووڈ کے شہنشاہ امیتابھ بچن کے سب سے بڑے مداح ہونےاوران کے بارے میں سب کچھ جاننے کا دعویٰ کرنے والے تو بہت ہیں ان ہی میں ایک ناموراداکارہ شلپا شیٹھی کانام بھی شامل ہے جنہوں نے امیتابھ کی سب سے بڑی مداح ہونے کا دعویٰ تو کیا لیکن اپنے دعوے کو سچ نہ کرسکیں اوران کے جھوٹ کا پول سب کے سامنے کھل گیا۔
دراصل شلپا شیٹھی نے بھارتی ٹی وی کے مقبول ترین شو ’’کون بنے گا کروڑ پتی‘‘میں ممبئی کے معروف وکیل افروز شاہ کے ساتھ شرکت کی، افروز شاہ کو شو کے میزبان امیتابھ بچن نے شو کے سیگمینٹ ’’نئی چاہ نئی راہ‘‘ کے لیے خود مدعو کیا تھااورانہیں ہاٹ سیٹ پربیٹھ کر گیم کھیلنے کی دعوت دی تھی، شو میں افروز شاہ اور شلپا شیٹھی نے اپنی چٹپٹی باتوں اور مزاح سے چارچاند لگادئیے تاہم شلپا کو اس وقت شرمندگی کا سامنا کرنا پڑا جب وہ امیتابھ بچن کے ایک چھوٹے سے سوال کا جواب بھی نہ دے سکیں۔
بھارتی میڈیا کے مطابق شلپا شیٹھی نے شو کے دوران امیتابھ کے سامنے ان کی سب سے بڑی مداح ہونےاور ان کے بارے میں سب کچھ جاننے کا دعویٰ کیا تاہم امیتابھ بچن نے جب ان سے 20،000 روپے کے لیے ایک آسان سا سوال پوچھا جس میں انہیں بالی ووڈ کا ایک مقبول ترین گانا پہچاننا تھاتو شلپا گانا پچاننے میں ناکام ہوگئیں، دلچسپ بات یہ ہے کہ یہ گانا(دو لفظوں کی ہے)امیتابھ بچن کی فلم’’دی گریٹ گیمبلر‘‘کا ہی تھا، بعد ازاں امیتابھ بچن نے اس گانے کے بارے میں بتاتے ہوئے کہا کہ یہ گانا ان پر اور زینت امان پر فلمایا گیا تھا یہ سن کر شلپا شیٹھی شرمندہ ہوگئیں۔
واضح رہے کہ شلپا اورافروز نے شو کے دوران مجموعی طور پر 25 لاکھ کی رقم جیتی ، جو بھارت میں ماحولیات کی حفاظت اور ساحل سمندر پر موجود کچرے اور گندگی کو صاف کرنے کے لیے استعمال کی جائے گی۔

ممبئی(میڈیا پاکستان) بالی ووڈ کے دبنگ سلمان خان کے مداحوں کی تعداد لاتعداد ہے جوانہیں بے پناہ چاہتے ہیں تاہم ان کے مداحوں میں کچھ مداح ایسے بھی ہیں جو تنقید کرنے میں پیچھے نہیں ہٹتے ہیں۔بھارتی میڈیا رپورٹس کے مطابق اداکار سلمان خان سے جب تنقید کے حوالے سے پوچھا گیا کہ جو ان کے بارے میں کہا یا لکھا جاتا ہے توان کا کہنا تھا کہ وہ تنقید پرزیادہ دیہان نہیں دہتے ہیں اس لیے کسی بھی قسم کی تنقید سے وہ تنگ بھی نہیں ہوتے ہیں اوراپنے بارے میں غلط لکھی اورکہی جانے والی تمام باتوں پرذرا بھی توجہ نہیں دیتے ہیں۔
بطوراداکارہونے کے حوالے سے جب ان سے ذمہ داریوں کا پوچھا گیا توان کا کہنا تھا کہ جب آپ اسٹارہوتے ہیں تو آپ پرذمہ داری بھی ہوتی ہے جسے آپ ہر حال میں پورا بھی کرتے ہیں، اگر آپ ایک اسٹارہیں اورایک عام آدمی سے بری طرح بات کرتے ہیں تو سب ہی بغیر کچھ سوچے سمجھے کہیں گے کہ آپ اچھے انسان نہیں ہیں۔
دوسری جانب اگرایک عام انسان کسی اسٹار کے ساتھ یہ ہی سب کرتا ہے تو لوگ اس پرزیادہ توجہ نہیں دیتے ہیں، اس لیے آپ کو اپنی شہرت کو برقرار رکھنے کے حوالے سے بہت کچھ سوچنا اور کرنا پڑتا ہے۔

ممبئی(میڈیا پاکستان) تیزی سے ابھرتے ہوئے بالی ووڈ اداکار ورون دھون کی فلم ’’جڑواں 2‘‘ نے ایک دن میں 20 کروڑ روپے کا بزنس کرکے سب کو حیران کردیا۔بالی ووڈ ہدایت کار ڈیوڈ دھون کی فلم ’’جڑواں 2‘‘ نے ریلیز ہوتے ہی کامیابی کے جھنڈے گاڑدیئے۔ ’’جڑواں 2‘‘ نے 2 دن میں ہی 36 کروڑروپے سے زائد کا بزنس کرکے سب کو حیران کردیا ہے۔ ٹریڈ اینالسٹ ترن آدرش کا کہنا ہے کہ فلم نے ریلیز کے پہلے دن یعنی جمعے کو 16 کروڑ 10لاکھ روپے جب کہ دوسرے روز 20 کروڑ 55 لاکھ روپے کا بزنس کیا جو مجموعی طور پر 36 کروڑ 65 لاکھ روپے بنتے ہیں۔
ترن آدرش کا کہنا ہے کہ ’’جڑواں 2‘‘ ورون دھون کی پہلی فلم ہے جس نے ایک دن میں 20 کروڑ روپے سے زائد کا بزنس کیا ہے۔ اس سے قبل ورون دھون کی کوئی فلم ایک دن میں 20 کروڑ روپے کمانے میں کامیاب نہیں ہوئی تھی۔
فلم کا ٹریلراور گانے پہلے ہی مقبول ہوچکے تھے جب کہ صرف 2 دنوں میں 36 کروڑروپے سے زائد کا بزنس کرنے پر اندازہ لگایا جاسکتا ہے کہ ایک ہفتے کے دوران فلم اچھا بزنس کرسکتی ہے۔
واضح رہے فلم ’’جڑواں 2‘‘ ڈیوڈ دھون کی پہلی فلم ’’جڑواں‘‘ کا سیکوئل ہے جو 7 فروری 1997 میں ریلیز ہوئی تھی۔ سلمان خان کی جڑواں نے مجموعی طور پر ساڑھے 26 کروڑ روپے کا بزنس کیا تھا تاہم اب ورون دھون کی جڑواں نے محض 2 دنوں میں اس کا ریکارڈ توڑ دیا ہے۔ فلم جڑواں میں سلمان خان نے ڈبل رول کیا تھا جب کہ ان کی ہیروئن کرشمہ کپور اور رمبھا تھیں۔ فلم کے سیکوئل میں ورون دھون ہیرو جبکہ جیکولین فرنینڈس اور تپسی پنو ان کی ہیروئن ہیں۔

ممبئی(میڈیا پاکستان) بالی ووڈ کی بیگم اداکارہ کرینہ کپور خان بیٹے تیمور علی خان کی پیدائش کے بعد فٹنس اور وزن میں کمی کو لے کر پاگل ہوگئی ہیں اور ایسا لگتا ہے ان کے پاس ورزش کرنے کے علاوہ اور کوئی کام ہی نہیں ہے۔ناموراداکارہ کرینہ کپور خان کے وزن میں ان کے بیٹےتیمور کی پیدائش کے بعد اضافہ ہوگیا تھا تاہم کرینہ کافی عرصے سے اپنے وزن میں کمی کرنے کی کوششوں میں لگی ہوئی ہیں تاکہ جلد سے جلد بالی ووڈ میں دوبارہ انٹری دے سکیں۔
بھارتی میڈیا کے مطابق کرینہ اپنی اگلی فلم ’’ویرے دی ویڈنگ‘‘ کے لیے وزن میں کمی کررہی ہیں تاکہ شوٹنگ جلد شروع کی جاسکے اور اس کے لیے روزانہ 10 گھنٹے تک جم میں ورزش کرتی رہتی ہیں، ان کی ٹرینر نے میڈیا سے بات کرتے ہوئے کہا کہ کرینہ گزشتہ ایک ہفتے سے روزانہ 10 گھنٹے تک ورزش کررہی ہیں اور ان کے لئے باقاعدہ دہلی کے ایک ہوٹل میں ورزش کرنے کی مشین بھی سیٹ کی گئی ہے تاکہ انہیں ورک آؤٹ کرنے میں کوئی پریشانی نہ ہو۔
میڈیا رپورٹس کے مطابق کرینہ ورزش کرنے کے ساتھ اپنی غذا پر بھی بھرپور توجہ دے رہی ہیں اور کم کیلوریز اور غذائیت سے بھرپور خوراک استعمال کررہی ہیں تاکہ جلد سے جلد پہلے کی طرح اسمارٹ اور خوبصورت نظرآئیں ، کرینہ کی دن رات کی محنت کا نتیجہ بھی نظر آرہا ہےاورانہوں نے پہلے کے مقابلے میں کافی حد تک وزن کم کرلیا ہے۔
واضح رہے کہ کرینہ کپور خان ان دنوں ریحا کپور کی فلم ’’ویرے دی ویڈنگ‘‘کی تیاریوں میں مصروف ہیں جس کی شوٹنگ جلد ہی شروع کی جائے گی ، فلم میں ان کے ساتھ سونم کپورا ور سوارا بھاسکر اہم کرداروں میں نظر آئیں گی۔

ممبئی(میڈیا پاکستان) سیف علی خان کا کہنا ہے کہ ان کی بیٹی سارہ علی خان نے اداکاری کا میدان تو چن لیا ہے لیکن انہیں فکر اس بات کی ہے کہ وہ ناکامی کا سامنا کس طرح کرے گی۔سیف علی خان اور امرتا سنگھ کی بیٹی سارہ علی خان معروف ہدایت کار ابھیشیک کپور کی فلم ’’کیدار ناتھ‘‘ سے اپنے فلمی کیرئیر کا آغاز کررہی ہیں، فلم میں ان کے مد مقابل سشانت سنگھ راجپوت ہوں گے۔ اپنے فنی سفر کے آغاز پر سارہ تو بہت پرجوش ہیں لیکن ان کے والد سیف علی خان بہت فکر مند ہیں اور بالآخر اس حوالے سے خدشات ان کی زبان پر بھی آگئے ہیں۔
اپنے انٹرویو میں سیف علی خان نے کہا کہ انہیں اس بات پر فخر ہے کہ ان کی بیٹی کسی بھی قسم کی سفارش یا مدد کے بغیر ہی بالی ووڈ کے ایک اچھے ہدایت کار کی فلم کے ذریعے فنی سفر کا آغاز کررہی ہے لیکن فلم نگری باکس آفس کا کھیل ہے۔ جس کی وجہ سے اب اس بات کی فکر ہورہی ہے سارہ ناکامی کا سامنا کس طرح کرے گی۔
واضح رہے کہ سیف علی خان بھی کئی برسوں سے بالی ووڈ کا حصہ ہونے کے باوجود وہ کامیابی حاصل نہیں کرسکے جو ان کی والدہ شرمیلا ٹیگور اور سابق و موجودہ بیویوں امرتا سنگھ اور کرینہ کپور نے حاصل کی ہیں۔

لاہور(میڈیا پاکستان) ایف بی آر نے معروف اداکارہ ثمینہ پیرزادہ سے ان کے تمام بنک اکاﺅنٹس اور اثاثہ جات کی تفصیلات طلب کرتے ہوئے نوٹس جاری کردیا ہے۔ذرائع نے بتایا ہے کہ ایف بی آر نے اداکارہ ثمینہ پیرزادہ کو 2015ءمیں ان کی آمدن کا مکمل ریکارڈ، بنک اکاﺅنٹس سمیت تمام اثاثہ جات کی تفصیلات طلب کرلی ہیں۔ اسکے علاوہ ثمینہ پروڈکشن سے حاصل ہونے والی آمدنی کی بھی تفصیلات طلب کی گئی ہیں۔