Category صحت

(ایمرا نیوزآن لائن) چینی شہر چانگشا میں 3 سالہ بچی نے کھیلنے والی چھوٹی مقناطیسی گیندیں نگل لیں جس کے باعث بچی کی حالت بگڑ گئی۔

غیر ملکی میڈیا کے مطابق 3 سالہ بچی کو اچانک پیٹ میں شدید تکلیف کے باعث چانگشا کے ہنان چلڈرنز اسپتال میں منتقل کیا گیا جہاں ڈاکٹرز بچی کا معائنہ کرنے کے بعد حیران رہ گئے۔ ڈاکٹر نے انکشاف کیا کہ 3 سالہ بچی کے پیٹ میں 37 مقناطیسی گیندیں موجود تھیں جو کہ اسکین میں ایک ساتھ جُڑے ہوئے ایک بریسلیٹ کی طرح نظر آرہی تھیں اور ان مقناطیسی گیندوں نے بچی کے معدے میں 5 سوراخ کردیے تھے۔

ڈاکٹر نے کہا کہ بچی کے معدے کے اسکین کے بعد معلوم ہوا کہ یہ مقناطیسی گیندیں جنہیں ’بکی بالز‘ بھی کہا جاتا ہے یہ قوتِ کشش کی وجہ سے آپس میں جُڑ گئیں تھیں اور دِکھنے میں ایک بریسلیٹ نما لگ رہی تھیں۔ ڈاکٹرز نے 3 سالہ بچی کے معدے سے فوری طور پر 37 مقناطیسی گیندیں نکالیں جس کے بعد اس کی ایک اور سرجری کر کے معدے کے سوراخوں کو ٹھیک کیا گیا۔

بچی کے والدین نے بتایا کہ یہ بکی بالز ان کے 12 سالہ بڑے بھائی کی تھیں جس سے وہ کھیلا کرتے تھے وار ان کی غیر موجودگی میں 3 سالہ بچی نے انہیں نگل لیا ہوگا۔ ڈاکٹر نے بتایا کہ یہ مقناطیسی گیندیں بچوں کی پہنچ سے دور رکھنے چاہیں کیونکہ یہ 10 انچ کے فاصلے سے دوسری مقناطیسی گیندوں کو اپنی جانب کھینچ لیتی ہیں۔ انہوں نے مزید بتایا کہ یہی وجہ ہے کہ بچی کے معدے میں متعدد سوراخ ہوئے کیونکہ یہ ساری گیندیں ایک دوسرےکو آپس میں کھینچ رہی تھیں اور اس وجہ سے بچی کا معدہ متاثر ہوگیا۔

(ایمرا نیوزآن لائن) ماہرین کا کہنا ہے کہ دن میں کم سے کم 3 مرتبہ دانت صاف کرنا امراضِ قلب کے خطرات میں 10 فیصد تک کمی لا سکتا ہے۔

جنوبی کوریا کے شہر سیئول کی ایھوا ویمن یونیورسٹی کے حالیہ مطالعے سے یہ بات ثابت ہوئی ہے کہ دن میں 3 مرتبہ دانت صاف کرنے کا تعلق براہ راست امراضِ قلب کے خطرات میں کمی سے ہے۔

ماہرین نے بتایا کہ دانت صاف کرنے سے ’آٹریئل فبریلیشن‘ کے خطرات کم ہوتے ہیں جس کی وجہ سے دل کی دھڑکن متاثر ہوتی ہے۔ مطالعے کے سینئر مصنف ڈاکٹر طائی جِن سونگ نے کہا ہم نے طویل عرصے تک ایک بڑے گروپ کا مطالعہ کیا جس سے ہمیں بہترین نتائج حاصل ہوئے۔

یہ تحقیق یورپی جرنل آف پریوینٹو کارڈیالوجی میں شائع ہوئی ہے۔ ماہرین نے بتایا کہ متعدد مرتبہ دانت صاف کرنے سے دانت، مسوڑھوں اور منہ میں موجود جراثیم کم ہو جاتے ہیں جس کے بعد یہ جراثیم منہ کے ذریعے خون میں داخل نہیں ہو پاتے۔

اس سے قبل بھی جنوبی کوریا کے سائنسدانوں نے 40 سے 79 سال کی عمر کے ایک لاکھ 61 ہزار افراد کے مطالعے سے منہ کی صحت و صفائی اور دل کی بیماریوں کے مابین تعلق کا جائزہ لیا تھا۔

امریکہ(ایمرا نیوز آن لائن)امریکی ویب سائٹ کی رپورٹ میں امریکا میں روزانہ ایک ڈاکٹر کی خودکشی کا انکشاف ہوا ہے۔امریکی خبروں کی ویب سائٹ ’دی ہل‘ نے اپنی خصوصی رپورٹ میں دعویٰ کیا ہے کہ امریکا میں کئے جانے والے متعدد سرویز اور مطالعات سے پتہ چلتا ہے کہ عام آدمیوں اور دیگر پیشوں کے مقابلے میں ڈاکٹروں میں خودکشی کی شرح سب سے زیادہ ہے۔ان کا ماننا ہے کہ معالج یا ڈاکٹر کے مقابلے میں کسی بھی دوسرے پیشے سے منسلک افراد اپنی روزمرہ زندگی سے اتنے تنگ نہیں کہ وہ خودکشی جیسا انتہائی قدم اٹھائیں۔رپورٹ میں کے مطابق ڈاکٹروں میں خودکشی کرنے کے واقعات سب سے زیادہ ہیں اور یہ خطرہ تربیت اور عمل کے دوران ہمیشہ رہتا ہے۔

واضح رہے کہ معالج کے خودکشی کرنے سے 135 افراد متاثر ہوتے ہیں، متعدد تحقیقی مطالعات میں یہ بات سامنے آئی ہے کہ ایک لاکھ ڈاکٹروں میں سے 28 سے 40 ڈاکٹر خودکشی کرتے ہیں جبکہ عام لوگوں میں یہ شرح ایک لاکھ آبادی میں صرف 12 ہے۔تحقیق میں یہ بات سامنے آئی کہ ڈاکٹروں میں خودکشی کی بڑی وجہ ذہنی دباؤ اور کام کرنے کے سخت اوقات کار ہیں جن کے باعث وہ اکثر و بیشر تفریح اور تناؤ سے نکلنے کے لیے وقت نہیں نکال پاتے ہیں۔میڈیکل کے شعبے میں ڈیپریشن کی شرح مردوں میں 12 فیصداور خواتین میں ساڑھے 19 فیصد ہے۔ ایک مطالعے کے مطابق 23 فیصد میڈیکل طلبہ میں خودکشی کے خیالات پائے گئے۔

رواں برس برطانوی خبر رساں ادارے کی رپورٹ میں بتایا گیا تھا کہ عام لوگوں کی نسبت ڈاکٹروں میں ہلاکت کی سب سے بڑی وجہ خودکشی ہے، عام لوگوں کی نسبت 40 فیصد مرد ڈاکٹر خودکشی سے اپنی زندگی کا خاتمہ کرلیتے ہیں۔امریکا میں میڈیکل تعلیم حد سے ذیادہ مہنگی ہو چکی ہے اور ایک اندازے کے مطابق ڈاکٹر 4 لاکھ ڈالرز سے زائد خرچہ آتا ہے، ڈاکٹر بننے کے لیے حصول تعلیم جسمانی، فکری اور جذباتی طور پر تھکا دیتا ہے۔

195 مطالعات اور ایک لاکھ 29 ہزار سے زائد میڈیکل طلبہ کے جائزے سے یہ نتیجہ اخذ کیا گیا ہے کہ کم از کم 25 فیصدڈاکٹروں میں افسردگی یا بیزاری اور 11 فیصد میں شدید ذہنی دباؤ کے باعث خودکشی کے خیالات پائے گئے۔طب کے شعبے سے وابستہ افراد کو خودکشی کرنے سے روکنے کے لیے امریکن فاؤنڈیشن فار سوسائڈ پریونشن (اے ایف ایس پی) کے میڈیکل ڈائریکٹر کا کہنا ہے کہ ہمیں میڈیسن میں کلچر کو تبدیل کرنے کی اشد ضرورت ہے۔

(ایمرا نیوزآ ن لائن) جیسے جیسے انسان کی عمر بڑھتی جاتی ہے ویسے ویسے اسے صحت سے متعلق بے شمار مسائل کا سامنا بھی ہوتا ہے اور عمر کے ساتھ یادداشت بھی متاثر ہوتی ہے۔

ڈیمینشیا ایک ایسی بیماری ہے جس میں انسان کا حافظہ کمزور اور یادداشت آہستہ آہستہ ختم ہونے لگتی ہے لیکن ڈاکٹرز نے اس بیماری سے بچنے کے لیے حال ہی میں ایک تحقیق کی ہے۔

کینیڈا کی میک ماسٹر یونیورسٹی کے ایسوسی ایٹ پروفیسر نے بتایا کہ انسان اگر جسمانی طور پر پھرتیلا نہیں ہوگا تو اس کا تعلق بھی ڈیمینشیا کی بیماری سے ہے۔

ڈاکٹر نے کہا کہ ہماری حالیہ تحقیق کے مطابق ورزش کی شدت بے حد معنی رکھتی ہے، ہم نے بزرگوں کو ایک نئے ورزش پروگرام میں داخلہ دیا اور صرف 12 ہفتوں میں ہی ان بزرگوں کی یادداشتیں بہتر ہوگئیں لیکن یہ اس وقت ممکن ہوا جب انہوں نے (ہائی انٹنسیٹی) یعنی شدت والی ورزش کی جس کی وجہ سے انکی یادداشت بہتر ہوئی۔

ڈاکٹر کا کہنا تھا کہ اب ہمارا اگلا قدم یہ سمجھنا ہے کہ ورزش کس طرح دماغ کو تبدیل کرتی ہے، لہٰذا ہم نے دماغی صحت کی مشق کے حوالے سے کچھ تجاویز مرتب کی ہیں، جو کہ یہ ہیں۔

صحت مند دماغ کیلیے تربیت: جیسا کہ ہم سب جانتے ہیں کہ بڑھتی ہوئی عمرکو ڈیمینشیا پیدا ہونے کے کچھ خطرہ ہوتے ہیں، اس بیماری میں ہمارے طرزِزندگی بہت اہمیت کی حامل ہے۔ نئے شواہد کے مطابق بہتر طرزِزندگی، تعلیم اور صحت کا خیال ڈیمینشیا کی بیماری کے خطرات میں واضح کمی کرتا ہے۔ صحت مند دماغ کی تربیت کے لیے سب سے زیادہ مددگار جسمانی طور پر فعال رہنا ہے، جسمانی طور پر فعال یعنی ورزش کرتے رہنے سے ڈیمینشیا کے خطرات کم ہوجاتے ہیں۔

ورزش غذا کا کام کرتی ہے: ماہرین کا کہنا ہے کہ ورزش ایک ایسی چیز ہے جو کہ دماغ کو دوبارہ تخلیق کرنے کے مترادف ہے، ورزش کرنے سے دماغ میں نئے نیورونز بنتے ہیں جو کہ حافظے کو بہتر بناتے ہیں، ورزش کرنے سے جسم میں نئے خلیوں کی افزائش اور دماغ کی بہترین نشونما ہوتی ہے۔

ورزش کی شدت معنی رکھتی ہے: ماہرین کا کہنا ہے کہ ورزش کی شدت بے حد معنی رکھتی ہے، تحقیق سے یہ بات ثابت ہوئی ہے کہ اگر آپ ورزش کی شدت میں اضافہ کردیں گے تو اس کے صحت پر حیرت انگیز نتائج برآمد ہوں گے۔

ورزش کی شدت میں اضافہ کرنے کا مطلب یہ ہے کہ چہل قدمی سے زیادہ بہتر دوڑ صحت کے لیے مفید ہے۔

(ایمرا نیوزآن لائن) عام طور پر موسم سرما آتے ہی نزلہ، زکام، بخار اور کھانسی جیسی بیماریاں بڑھ جاتی ہیں اور ہم ان بیماریوں سے بچنے کے لیے ڈاکٹروں کے پاس جانے کے علاوہ بے شمار گھریلو ٹوٹکے بھی کرتے ہیں۔

لیکن ان تمام تر ٹوٹکوں کے علاوہ کیا آپ نے کبھی اس بارے میں سوچا ہے کہ نزلے اور زکام کی کیفیت میں ایک موم بتی راحت کا باعث بن سکتی ہے؟ موجودہ دور میں سائنس خوب ترقی کر رہی ہے اور حال ہی میں برطانیہ کی ایک کمپنی کی جانب سے ایسی موم بتی متعارف کرائی گئی ہے جو نزلے اور زکام کی کیفیت میں معاون ثابت ہو سکتی ہے۔

بی اینڈ ایم کی جانب سے پیش کی جانے والی اس موم بتی کو جلانے کے بعد اس سے نکلنے والی خوشبو ’وکس بام‘ کی طرح ہے۔ نزلے اور زکام کے وقت اکثر ہم وکس کو ناک اور گلے پر لگاتے ہیں جس سے بے حد سکون ملتا ہے۔ اسی بات کو ہی مدِنظر رکھتے ہوئے کمپنی نے یہ موم بتی متعارف کرائی ہے۔

برطانیہ کے ایگل آئی آئیڈ اسٹور سے ایک صارف نے موم بتی خریدنے کے بعد اسے فیس بک پر شیئر کیا۔ انہوں نے لکھا کہ یہ موم بتی انتہائی سستی ہے اور یہ موسم سرما میں نزلے زکام کی کیفیت میں راحت پہنچانے کا باعث بنتی ہے، اگر یہ نزلہ زکام ٹھیک نہیں بھی کرتی تو اس کی خوشبو گھر میں راحت کا باعث بنتی ہے۔

لاہور(رپورٹ۔ زیشان علی + ایمرا نیوز آن لائن) گندے انڈوں پھر سے پکڑے گئے ۔ڈی جی فوڈ اتھارٹی کی ہدایت پر گندے انڈے رکھنے والے کولڈ سٹورزکے خلاف گرینڈ آپریشن شروع کر دیا گیا۔ ڈی جی فوڈ اتھارٹی نے بتایا کہ ساہیوال اور چیچہ وطنی میں 8کولڈ سٹورز کی چیکنگ کی گئی جس میں 79ہزار200 گندے انڈے برآمد کر کے تلف کر دیے گئے۔

ڈی جی فو ڈ اتھارٹی کا مزید کہنا تھا کہ چیچہ وطنی میں گندے انڈے سٹور کرنے پر فیضان کولڈ سٹوریچ اور راوی کولڈ سٹوریچ کو بھاری جرمانہ کیا گیا۔ کیپٹن (ر) محمد عثمان نے کہا کہ قانون کے مطابق زائد المیعاد اور ہیچری کے گندے انڈے سٹور کرنے پر سخت پابندی عائد ہے۔

ڈی جی فوڈ اتھارٹی کا کہنا تھا کہ بیکریوں،اور ایگ پاؤڈر تیار کرنے والی فیکٹریوں کے لیے زائدالمعیاد اور گندے انڈے سٹور کیے جاتے ہیں۔ کیپٹن (ر) محمد عثمان کاکہنا تھا کہ گزشتہ ایک سال میں 50 لاکھ سے زائد گندے انڈے تلف کیے جا چکے ہیں۔

چیئرمین فوڈ اتھارٹی نے بتایا کہ عوام سے گزارش ہے کہ وہ کسی بھی جگہ ٹوٹے،گندے یا ہیچری کے انڈے بکتے دیکھیں تو فورا ہمیں اطلاع دیں۔فوڈ اتھارٹی روز اول سے پنجاب میں خوراک کے معیار کو بین الاقوامی سٹینڈر زکے مطابق لانے کے لیے محنت کر رہی ہے۔

اسلام آباد(ایمرا نیوز آن لائن)ہم میں سے اکثر لوگوں کو کھانے کے بعد یا رات کے وقت کچھ میٹھا کھانے کی طلب محسوس ہوتی ہے لیکن میٹھا کھانے کی خواہش آپ کو موٹاپے کے ساتھ دیگر بیماریوں کی طرف لے جاتی ہے۔ماہرین نے میٹھے کی خواہش کو کم کرنے کے چند طریقے بتائیں ہیں جو کہ ہم آپ کو بتائیں گے۔آسٹریلوی ماہر خوراک جیسیکا سیپل کا کہنا ہے کہ پھل کسی چاکلیٹ یا بسکٹ کھانے سے تو بہتر ہے لیکن اگر پھل کو شام یا دوپہر کے وقت کھایا جاتا ہے تو یہ خون میں شکر کی مقدار کو بڑھاوا دیتا ہے اور اس وجہ سے انسان کو رات کے وقت میٹھے کی طلب ہوتی ہے۔

انہوں نے کہا کہ میرے تجربے کے مطابق جو لوگ دوپہر یا شام میں اسنیک کی جگہ پھل کھاتے ہیں انہیں رات میں میٹھا کھانے کی خواہش ہوتی ہے۔انہوں نے تجویز دی کہ پھل بہترین صحت کے لیے بے حد مفید ہیں لیکن اسے دوپہر 12 بجے کے بعد نہ کھایا جائے۔خوراک میں روزانہ ایک چھوٹا چمچ دارچینی کا استعمال:ماہرین خوراک کا کہنا ہے کہ تحقیق کے مطابق دار چینی کا روزانہ استعمال خون میں شکر کی مقدار کو معتدل رکھتا ہے۔تحقیق میں یہ بات بھی سامنے آئی ہےکہ چینی میٹھا کھانے کی خواہش کو کم کرنے میں بھی مدد دیتی ہے۔

ماہرین خوراک کا کہنا ہے کہ روز مرّہ کی خوراک کا متوازن ہونا بہت ضروری ہے جس کا مطلب یہ ہے کہ آپ کی غذا میں پروٹین کاربوہائڈریٹس اور دیگر غذائی اجزاء ضرور شامل ہوں۔ان کا کہنا ہے کہ اگر ہماری خوراک ان تمام غذائی اجزاء سے بھرپور ہوگی تو ہم بھرپور محسوس کریں گے اور توانا بھی رہیں گے جس کی وجہ سے ہمیں میٹھا کھانے کی خواہش نہیں ہوگی۔ماہرین کا کہنا ہے کہ ہمارے جسم کو دن بھر کام کرنے کے لیے غذا کی ضرورت ہوتی ہے اگر ہم کھانا نہیں کھائیں گے تو اس سے جسم کے اعضاء متاثر ہونے لگیں گے۔انہوں نے کہا کہ پورا دن وقت پر کھانا کھانے سے آپ توانا اور بھرپور محسوس کریں گے۔ماہرین خوراک جیسیکا سیپل کا کہنا ہے کہ باہر سے خریدے ہوئے پیک فوڈ کا استعمال ہرگز نہ کریں کیونکہ اس میں چینی اور چربی (فیٹ) زائد مقدار میں پائی جاتی ہے۔

کراچی (ایمرا نیوز آن لائن) انسانی جِلد کبھی ایک جیسی نہیں رہتی،اس پربچپن، جوانی اور بڑھاپے کے اثرات مرتّب ہوتے ہیں۔ عام طور پر 40سال کے بعدچہرے، ہاتھ اور پاؤں کی جِلد پر جُھرّیاں پڑنا فطری عمل ہے، تاہم بعض اوقات جُھرّیاں نوجوانی ہی میں ظاہر ہونے لگتی ہیں جس کے بےشمار عوامل ہیں۔ان میں سے کئی محرّکات ایسے ہیں جن پر قابو پانا ہمارے اختیار میں ہے۔ مثلاً سرِفہرست تو سورج کی براہِ راست شعاؤں سے محفوظ رہنا ہے۔حالانکہ مغربی مُمالک میں خاص طور پر دھوپ کے ذریعے جِلد کی رنگت گہری کی جاتی ہے۔یہ عمل طبّی اصطلاح میں”Tanned skin”کہلاتا ہے۔

چوں کہ مغرب میں ایسی جِلدصحت مند اور پُر کشش سمجھی جا تی ہے، اسی لیے وہاں کی کمپنیز سن بلاکس کریمز یا لوشنز وغیرہ میں کیمیائی اجزاء کا زیادہ استعمال کرتی ہیں،تاکہ جِلد کو Tanned کیا جاسکے۔تاہم،تحقیق سے ثابت ہوچُکا ہے کہ براہِ راست سورج کی شعاؤں میں رہنا ضمنی اثرات ظاہر کرتاہے۔ عام طور پر 40سال کی عُمر کے بعد ہی جِلد پر دھوپ کےضمنی اثرات ظاہر ہوتے ہیں، لیکن براہِ راست سورج کی شعاؤں میں رہنے سے یہ اثرات 15سال ہی کی عُمر میںظاہر ہونے لگتے ہیں۔اصل میں سورج کی شعاؤں میں الٹرا وائلٹ اے(UVA)، الٹرا وائلٹ بی(UVB) اور انفرا ریڈ ریز(infrared rays) بہت ہی نقصان دہ شعائیں ہیں جو جِلد کی ساخت متاثر کر دیتی ہیں۔یاد رکھیے،چہرے پر بڑھاپے کی 80فی صد علامات سورج کی ان ہی شعاؤں کی وجہ سے ظاہر ہوتی ہیں۔

ان علامات میں چہرے کی رنگت اور جِلد کی ساخت میں تبدیلی ،کالے دھبّے پڑنا،چہرے کی جِلد کاقدرتی گلابی پن ختم ہونا،باریک باریک خون کی نالیاں نمایاں ہونا، جِلد کا روکھا پن اور جُھرّیاں شامل ہیں،لہٰذا کوشش کریں کہ دیر تک اور براہِ راست سورج کی تیز شعاؤں میں نہ رہا جائے اورجب بھی گھر سے باہر نکلیں، چہرے پر سایاضرور کریں۔علاوہ ازیں، ذہنی تناؤ، نیند کی کمی، چینی کا زائد استعمال، چہرے کے پٹّھوں(muscles)کی مسلسل حرکات مثلاً ماتھے پر بل ڈالنا، کن انکھیوں سے دیکھنا (Squinting)،غیر معیاری غذا، ماحولیاتی آلودگی اور سگریٹ نوشی جیسے کئی اور عوامل بھی چہرے پر قبل از وقت بڑھاپےکے آثار، خصوصاً جُھرّیاں پیدا کرنے کا سبب بنتے ہیں۔جِلد خصوصاً چہرےکی حفاظت،قدرتی ترو تازگی برقرار رکھنے اورقبل ازوقت بڑھاپے کے اثرات سے محفوظ رہنے کے لیےجسم کےخصوصاً اُن حصّوں پر ،جن پہ براہِ راست دھوپ پڑتی ہو ،روزانہ سن بلاک ضرور لگائیں ،مگر سن بلاکس ہمیشہ ایسے استعمال کیے جائیں،جواپنے مُلک کی آب و ہوا اور سورج کی حدّت کے مطابق ہوں۔یعنی ان کا سن پروٹیکشن فیکٹر(Sun Protection Factor) 30یا اس سے زیادہ ہو۔

ماتھے پر بل ڈالنے اور کن انکھیوں سے دیکھنے سے گریز کیا جائے۔متوازن غذا کے ساتھ پھلوں، سبزیوں کا استعمال بڑھائیں،کیوں کہ وٹامنز اور معدنیات سے بَھرپور غذائی اجزاءچہرے کی جُھرّیاں نمایاں نہیں ہونے دیتے۔ ورزش معمول کا حصّہ بنالیں کہ اس طرح جِلد ڈھلکنے سے محفوظ رہتی ہے۔ اصل میں ورزش کے ذریعے دورانِ خون تیز ہوتا ہے اور قوّتِ مدافعت بھی بڑھتی ہے،نتیجتاًجِلد تروتازہ نظر آنے لگتی ہے۔چہرے پرموئسچرائزنگ لوشن یا کر یم ہمیشہ نرم ہاتھوں سے آہستہ آہستہ لگائیں،کیوں کہ رگڑنے سے جلن ہوتی ہے،جو بعد میں جُھرّیوں کا سبب بن سکتی ہے۔وہ افراد، جنہیں چہرے پرپسینہ آتا ہو، وہ زیادہ سے زیادہ چہرہ دھوئیں، کیوں کہ پسینہ آنے سے چہرے پر جلن محسوس ہوتی ہے۔موئسچرائزر کا استعمال ضرور کریں کہ یہ جِلد کی نمی برقرار رکھتے ہیں ۔

نیز،چہرے پر ایسی مصنوعات کے استعمال سے اجتناب برتیں، جو جلن پیدا کریں۔ مشاہدے میں ہے کہ بعض اوقات ڈرمالوجسٹ کوئی کریم یا لوشن تجویز کرتا ہے، جس کے لگانے سے جلن محسوس ہوتی ہے،مگر مریض معالج کو بتانے سے گریز کرتے ہیں، جو قطعاً درست نہیں۔اپنے معالج کو ضرور بتا ئیں،تاکہ کوئی متبادل کریم یا لوشن تجویز کیا جاسکے۔

موجودہ دَور میں چہرے کوبڑھا پے کے اثرات سے محفوظ رکھنے کے کئی جد ید طریقےمستعمل ہیں۔ مثلاً بوٹاکس، ڈرمل فِلرز(Dermal Fillers)،لیزر ری سرفیسنگ (Laser resurfacing)، کیمیکل پیلز(chemical peels) اورڈرما بریژن (Dermabrasion) وغیرہ وغیرہ ۔ تاہم، ان سب کے اثرات صرف چھے سے آٹھ ماہ برقرار رہتے ہیں، اس کے بعد دوبارہ علاج کروانا پڑتا ہے۔

(مضمون نگار،معروف ڈرما ٹولوجسٹ ہیں اور نیشنل میڈیکل سینٹر، کراچی سے منسلک ہیں)

لندن(ایمرا نیوز آن لائن)سوتے وقت بہت سے لوگوں کو خراٹے لینے کی عادت ہوتی ہے اور یہ عادت عام طور پر ہر کسی کو ہی بری لگتی ہے کیونکہ یہ نیند خراب کرنے کا باعث بھی بنتی ہے۔رات کے پُرسکون وقت میں کسی ایسے شخص کے ساتھ سونا جسے خراٹے لینے کی عادت ہوتی ہے یہ آپ کے صبر کے امتحان سے کم نہیں ہے۔اس حوالے سے کینیڈ اکی کوئنز یونیورسٹی نے ایک مطالعہ بھی کیا جس کے مطابق خراٹے لینے والے شخص کے ساتھ سونا انسانی صحت پر منفی اثرات ڈالتا ہے۔

مطالعے کے مطابق خراٹے لینے والے شخص کے ساتھ سونے والے شخص کی نیند متاثر ہوتی ہے اور یہی وجہ ہے کہ نیند متاثر ہونے کے باعث دماغی اور جسمانی صحت پر منفی اثرات مرتب ہوتے ہیں۔ماہرین کا کہنا ہے کہ نیند خراب ہونے کے باعث بے چینی اور ڈپریشن کے خطرات میں اضافہ ہوجاتا ہے اور ساتھ ہی موٹاپے اور فالج جیسی خطرناک بیماریوں کے بھی واضح امکانات بڑھ جاتے ہیں۔

برائٹ سائڈ کی رپورٹ کے مطابق نیند پوری نا ہونے کی وجہ سے صحت پر منفی اثرات پڑتے ہیں کیونکہ انسان کے جسم میں رات کے وقت بے شمار فنکشنز ہورہے ہوتے ہیں جس میں حافظے میں استحکام اور میٹابولزم کے نظام بہتری شامل ہے۔جو لوگ رات میں خراٹوں کی وجہ سے جاگ جاتے ہیں تو دن بھر ان کی کارکردگی متاثر رہتی ہے۔ماہرین کا کہنا ہے اس کی وجہ سے آپ کے اپنے ساتھی کے ساتھ تعلق بھی خراب ہوتا ہے کیونکہ مسلسل خراٹے دوسرے شخص کی نیند میں کمی اور چڑچڑاہٹ پیدا کردیتی ہے۔

ماہرین نے یہ بھی کہا کہ اس وجہ سے مسلسل گھر کا ماحول منفی بنا رہتا ہے کیونکہ آپ تناؤ کا شکار رہتے ہیں اور اس وجہ سے قوت مدافعت کا نظام بھی متاثر ہوتا ہے۔لندن کے امپیریل کالج آف سائنس کے مطالعے کے مطابق تیز آوازوں کی وجہ سے بلند فشار خون ہوجاتا ہے جب کہ اس سے کانوں کی سماعت بھی متاثر ہوتی ہے۔

لندن: سابق وزیراعظم نوازشریف کے مرض کی تشخیص کے لیے ان کا ’پی ای ٹی‘ اسکین آئندہ ہفتے ہوگا۔

سابق وزیراعظم نواز شریف کا لندن میں علاج جاری ہے جہاں آج ان کے مزید ٹیسٹ ہوں گے۔

ذرائع کے مطابق نواز شریف کا ’پی ای ٹی‘ اسکین آئندہ ہفتے ہوگا جس سے ان کے مرض کی تشخیص میں مدد ملے گی۔ فیملی ذرائع کا کہنا ہےکہ نواز شریف کی گزشتہ روز گھر میں دو تھراپیز کی گئیں،ماہر ڈاکٹروں کی ٹیم ان کی صحت کی بحالی کیلئے کوشاں ہے۔

دوسری جانب نواز شریف کے ذاتی معالج ڈاکٹر عدنان نے سوشل میڈیا پر جاری بیان میں بتایا کہ سابق وزیراعظم کا علاج کنگز کالج لندن کے ہیماٹولوجسٹ اور امراض قلب کے بہترین ڈاکٹرز کر رہے ہیں، ابتدائی طور پر تھرومو بائسیپینیا کی وجہ معلوم کرنے کی کوشش کی جا رہی ہے۔ ڈاکٹر عدنان نے بتایاکہ نواز شریف کے مرض کی تشخیص کے لیے اسکین اور بائیپسی کی جائے گی، مرض کی تشخیص ہی نواز شریف کے علاج کے لیے معاونت فراہم کرے گی۔

نوازشریف کیس: کب کیا ہوا؟
21 اور 22 اکتوبر کی درمیانی شب نواز شریف کی طبعیت خراب ہوئی اور اسپتال منتقل کیاگیا

25 اکتوبر، چوہدری شوگر ملز کیس میں طبی بنیاد پر نواز شریف کی ضمانت منظور ہوئی

26 اکتوبر،العزيزيہ ریفرنس میں انسانی بنیادوں پر نوازشریف کی عبوری ضمانت منظور ہوئی

26 اکتوبر، نواز شریف کو ہلکا ہارٹ اٹیک ہوا، وزیرصحت پنجاب یاسمین راشد نے تصدیق کی

29 اکتوبر، العزيزيہ ریفرنس میں طبی بنیاد پر نوازشریف کی2 ماہ کے لیے سزا معطل کردی گئی

نوازشریف سروسزاسپتال سےڈسچارج ہوئے، جاتی امرامیں آئی سی یوبناکرمنتقل کیا گیا

8 نومبر، شہباز شریف نے وزارت داخلہ کو نوازشریف کا نام ای سی ایل سے نکالنے کی درخواست دی

12 نومبر ، وفاقی کابینہ نے نوازشریف کو باہر جانے کی مشروط اجازت دی،

14 نومبر ، ن لیگ نے انڈيمنٹی بانڈ کی شرط لاہور ہائی کورٹ میں چیلنج کردی

16 نومبر، لاہور ہائی کورٹ نے نواز شریف کوعلاج کےلیےبیرون ملک جانے کی اجازت دے دی

19 نومبر ، نواز شریف علاج کیلئے لندن روانہ ہوگئے

20 نومبر ،لندن کے گائز اسپتال میں نواز شریف کا 4 گھنٹے تک طبی معائنہ کیا گیا۔

خیال رہے کہ نواز شریف اپنے بھائی شہباز شریف اور ذاتی معالج ڈاکٹر عدنان کے ہمراہ 19 نومبر کی شب لندن پہنچے تھے اور 20 نومبرکو ان کا 4 گھنٹے طویل طبی معائنہ لندن کے گائز اسپتال میں ہوا تھا۔