Tag کالم

سلیم صافی کے قلم سے…..

بڑے سادہ ہیں وہ لوگ جو عمران خان کو سادہ سمجھتے ہیں۔ بلاشبہ اسٹیٹس مین شپ ان کے قریب سے بھی نہیں گزری لیکن سیاست میں ان کا کوئی ثانی نہیں۔ ضرورت ختم ہو تو اکبر ایس بابر سے لے کر جہانگیر ترین تک جیسے محسنوں کو پرے پھینکنے میں دیر نہیں لگاتے اور ضرورت پڑے تو شیخ رشید احمد اور بابر اعوان جیسے لوگوں کو بھی گلے لگالیتے ہیں جنہوں نے ٹی وی پر بیٹھ کر ان کے روبروان پر ذاتی حملے کئے تھے۔

مذہب کا کارڈ خان صاحب جس طرح استعمال کررہے ہیں، اس طرح ہمارے سیاسی مولویوں نے بھی کبھی نہیں کیا۔ پہلے میاں نواز شریف کے خلاف توہین رسالت اور مذہب کا کارڈ استعمال کیا۔ اقتدار میں آنے کے بعد اپنے گرد شہباز گل، زلفی بخاری اور اسد عمر جیسے لوگ جمع کئے لیکن نام ریاست مدینہ کا استعمال کرنے لگے۔ عدلیہ، میڈیا اور نیب جیسے اداروں کو جس طرح انہوں نے استعمال کیا، وہ بیس نواز شریف اور دس آصف زرداری مل کر بھی نہیں کرسکتے۔ قومی سلامتی کے اداروں کو جس قدر انہوں نے متنازعہ بنایا، وہ سینکڑوں نریندر مودی بھی نہیں بناسکتے۔

ان دنوں سیاسی ضرورتوں کے تحت عمران خان بولتے ہوئے وزیراعظم کم جبکہ علامہ، مورخ اور مبلغ زیادہ دکھنے کی کوشش کرتے ہیں۔ تاہم تاریخ کا حوالے دیتے ہیں تو بھی سلیکٹڈ دیتے ہیں اور کسی دینی حکم کا سہارا لیتے ہیں تو اس میں بھی مرضی کے مطابق سلیکشن کرلیتے ہیں۔ مثلاً ان دنوں انہوں نے ایک بار پھر حضرت عمرفاروق رضی اللہ عنہ کے ہاتھوں حضرت خالد بن ولیدؓ کی معزولی کا تذکرہ شروع کیا ہے اور ہر کوئی جانتا ہے کہ اس کے ذریعے وہ کس کو پیغام دینا چاہتے ہیں لیکن سوال یہ ہے کہ حضرت عمر فاروق ؓنے کیا صرف یہی ایک کام کیا تھا؟ جس کا وہ بار بار تذکرہ کرتے ہیں۔

حضرت عمر فاروقؓ کی شہرت تاریخ کے سب سے بڑے عادل حکمران کے حوالے سے ہے جس کا عمران خان کی حکومت میں نشان تک نہیں۔ سوال یہ ہے کہ وہ اس عدل کا ذکر کیوں نہیں کرتے ؟ آپؓ کی شہرت اس حوالے سے تھی کہ ان کے دور خلافت میں ان کے بیٹے کو سزا ہوئی جبکہ عمران خان نے اپنے آپ کو اور اپنے سب چہیتوں کو احتساب سے مبرا کردیا ہے۔ حضرت عمر فاروق ؓ وہ خلیفہ تھے کہ ان کے دسترخوان پر کبھی دو سالن نہیں رکھے گئے۔

کیا خان نے کبھی ان کی شخصیت کے اس پہلو کا ذکر کیا؟آپ رضی اللہ عنہ جب کسی سرکاری عہدے پر کسی شخص کا تقرر کرتے تو اس کے اثاثوں کا تخمینہ لگوا کر اپنے پاس رکھتے، کیا عمران خان نے شاہ محمود قریشی، زلفی بخاری اور دیگر سے متعلق ایسا کیا؟آپ رضی اللہ جب کسی کو گورنر بناتے تو اسے نصیحت فرماتے کہ کبھی ترکی گھوڑے پر نہ بیٹھنا، باریک کپڑے نہ پہننا، چھنا ہوا آٹا نہ کھانا، دربان نہ رکھنا اور کسی فریادی پر دروازہ بند نہ کرنا۔ کیا خود خان صاحب نے دربان نہیں رکھے؟ کیا وزیراعظم ہائوس اور بنی گالہ کے محل کے دروازے عام آدمی کے لئے کھلے ہیں؟ حضرت عمر فاروقؓ کا یہ فقرہ انسانی حقوق کے چارٹر کی حیثیت رکھتا ہے کہ ”مائیں بچوں کو آزاد پیدا کرتی ہیں، تم نے انہیں کب سے غلام بنا لیا ہے“۔

کیا خان نے اقتدار میں آنے کے بعد کبھی اس فقرے پر سوچا ؟ ان کے دور میں کتنے ہزار لوگ مسنگ ہیں؟ انہوں نے پرویز مشرف، زرداری اور نواز شریف کے دور کی دی ہوئی اظہار کی آزادی بھی چھین لی اور ایک ایک سیاسی مخالف حتیٰ کہ خواتین تک کو جیلوں میں ڈالا۔ حضرت عمر فاروق ؓ دنیا کےواحد حکمران تھے کہ جو فرمایا کرتے تھے کہ اگر فرات کے کنارے کوئی کتا بھی بھوک سے مر گیا تو اس کیباز پرس بھی عمر سے ہوگی۔ لیکن خان کی حکومت میں روزانہ کتنے لوگ بے گناہ قتل ہورہے ہیں۔

کیا انہوں نے حضرت عمر فاروق ؓکی سنت پر عمل کرتے ہوئے کبھی یہ سوچا کہ قیامت کے دن اس ایک ایک قتل کے لئے ان سے پوچھا جائے گا؟ لئےحضرت عمر فاروقؓ کی ایک وجہ شہرت یہ بھی ہے کہ آپ ؓکے دورِ خلافت میں مسلمانوں کو بے مثال فتوحات اور کامیابیاں نصیب ہوئیں۔ قیصر و کسریٰ کو پیوند خاک کرکے اسلام کی عظمت کا پرچم لہرانے کے علاوہ مسلمان فاتح بن کر شام، مصر، عراق، جزیرہ، خوزستان، عجم، آرمینہ، آذربائیجان، فارس، کرمان، خراسان اور مکران تک جا پہنچے۔ دوسری طرف عمران خان کی حکومت میں مودی نے ہم سے ہمارا کشمیر ہڑپ کرلیا اور ہم تماشہ دیکھتے رہ گئے۔

عمران خان صاحب اپنی تقریروں کا آغاز ایاک نعبدوایاک نستعین سے کرتے اورپھر روایتی سیاستدانوں والی باتیں شروع کرتے۔ میں نے کئی بار بالواسطہ اور بلاواسطہ سمجھانے کی کوشش کی کہ وہ اھدناالصراط المستقیم بھی ساتھ پڑھ لیا کریں لیکن وہ اور ان کے ساتھی صرف ایاک نعبدووایاک نستعین پر اکتفا کرتے۔ چنانچہ نتیجہ یہ ہوا کہ حکمران بننے کے بعد صراط مستقیم پر چلنے کے بجائے وہ یوٹرن پر یوٹرن لے رہے ہیں۔ اب میری ان سے گزارش ہے کہ وہ اگر حضرت عمر فاروق رضی اللہ کی شخصیت یا دور خلافت کا ذکر کرنا چاہتے ہیں تو صرف خالد بن ولید کے واقعے کو سلیکٹ نہ کریں۔

ان کی شخصیت کے دیگر محاسن، عدل، خوداحتسابی اور مثالی طرز حکومت کا بھی تذکرہ کریں۔ ویسے خان صاحب کی اطلاع کے لئے یہ بھی عرض ہے کہ حضرت عمر فاروقؓ کا بطور امیرالمومنین انتخاب ان کے انتخاب کی طرح متنازعہ نہیں تھا۔ان کا انتخاب حضرت ابوبکر صدیق رضی اللہ عنہ نے کیا تھا جس کے بعد تمام اکابر صحابہ اور مسلمانوں نے شورائیت کے اصولوں کے تحت انہیں امیرالمومنین مانا تھا۔ یہ بھی مدنظر رکھیں کہ خلفائے راشدین صرف حکمران نہیں بلکہ سپریم کمانڈر بھی تھے۔ کبھی عمران خان، حضرت خالد بن ولیدؓ کی معزولی کی وجہ بھی معلوم کرلیں۔

مورخین بتاتے ہیں کہ حضرت عمر فاروقؓ کو یہ احساس ہونے لگا تھا کہ کہیں مسلمان اپنی فتوحات کو اللہ کی نصرت کی بجائے ایک شخصیت سے منسوب نہ کرنے لگ جائیں۔ گویا حضرت عمر فاروقؓ شخصیت کو بت بنانے کی بجائے اجتماعیت اور شورائیت کے قائل تھے لیکن یہاں تو عمران خان نے کرکٹ میں پوری ٹیم کی فتح کو اپنی ذات کے کارنامے میں بدل دیا۔ اور ہاں حضرت خالد بن ولید کو معزول کرکے حضرت ابوعبیدہؓ جیسے جلیل القدر صحابی کو سپہ سالار مقرر کیا گیا تھا لیکن کیا قوم نہیں جانتی کہ عمران خان کا انتخاب شہباز گل، شبلی فراز، فردوس عاشق اعوان اور فیاض چوہان جیسے لوگ ہوا کرتے ہیں۔
بشکریہ جیو نیوز

ڈاکٹرمجاہد منصوری کے قلم سے …..
محسنِ پاکستان ڈاکٹر عبدالقدیر خان فانی دنیا سے رخصت ہوکر بارگاہِ رب العزت میں حاضر ہو گئے۔ انا للہ وانا الیہ راجعون۔ پیچھے چھوڑی بنی اور بنتی جدید عالمی تاریخ میں امر ہو گئے۔

وہ بھاری بھر کم وسائل کی حامل زوال پذیر مسلم دنیا کے ہر وقت سیاسی و اقتصادی بحران کی کیفیت میں مبتلا ڈگمگاتے پاکستان کے دفاع کو ناقابلِ تسخیر بنا گئے، کیسی اور کتنی منفرد تاریخ سازی ہے یہ، جسے ڈاکٹر عبدالقدیر نے اپنے حاصل علم کے کمال اطلاق سے ممکن بنا دیا۔

پوری اسلامی تاریخ میں یہ نصیب محسن پاکستان ہی کا بنا۔ اپنے واضح نظر آتے آسودہ مستقبل کی راہ ترک کرکے وہ 1976میں ہالینڈ سے خستہ حال پاکستان کو مضبوط بنانے چلے آئے۔ ذوالفقار علی بھٹو سیاست دان بعد میں پہلے پولیٹکل سائنٹسٹ تھے، عوامی رجحانات کو خوب سمجھتے اور عملی سیاست میں اس سے کھیلنے اور اس کھیل سے مشکل سیاسی اہداف حاصل کرنے کا فن خوب جانتے ہی نہیں تھے بلکہ اس کے بڑے بینی فشری بننے کے تجربے کے حامل بھی تھے۔

وزیر خارجہ ہو کر بھی کابینہ اور ملک میں سب سے سرگرم وزیر اور ایوب خاں کی آنکھوں کا تارا، 1965کے اوائل جنوری میں صدر جنرل ایوب اور مادر ملت فاطمہ جناح میں صدارتی انتخابی معرکے کی مہم میں جلسوں کے سب سے ڈیمانڈنگ مقرر بن گئے۔ مقابل متحدہ اپوزیشن کو خوب ادھیڑتے، ملک خصوصاً پنجاب میں انہوں نے ایوب حکومت کے حامیوں کے دل موہ لئے۔

الیکشن ہوئے تو مشرقی پاکستان اور کراچی و حیدر آباد میں شدت سے متنازعہ قرار پائے، احتجاجی جلسے جلوسوں کا سلسلہ چل پڑا تو حکومت نے اپنے دعوے کے دلدلی متنازعہ سرحدی علاقے میں سرجیکل اسٹرائیک کرکے رن آف کچھ والی محدود جنگ سے بنتا مخالف سیاسی ماحول تبدیل کر دیا۔

انٹرنیشنل ٹربیونل کی مدد سے رن آف کچھ کا تنازعہ حل کرنے پر اتفاق سے جنگ بھی چند روز میں بند ہو گئی لیکن وزیر خارجہ بھٹو نے ایوبی عہد کے زوال کی دستک سن لی تھی ۔ ناچیز اور وقت کے واقفانِ حال کا تجزیہ یہ ہی ہے کہ اس مرحلے پر بھٹو صاحب ’’جنگی ہیرو شپ‘‘ کے حصول کو اپنا سیاسی ہدف بنا چکے تھے پھر جنرل اختر ملک اور سیکرٹر ی امور خارجہ عزیز احمد سے میل ملاپ کرکے آرمی +مجاہدین کے ذریعے مقبوضہ کشمیر آزاد کرانے کے لئے بڑی سرجیکل اسٹرائیک بنام ’’جبرالٹر آپریشن‘‘ ترتیب دیا جو فروری 19بالا کوٹ میں بھارتی کوا مار سرجیکل اسٹرائیک کے برعکس دفاعی کامیابیوں سے جھولی تو بھر رہی تھی لیکن ایک دو روز کے لئے آپریشن روکا نہ جاتا تو اکھنور کی فتح کے بعد عسکری ذریعے سے مسئلہ کشمیر حل کرنے کا امکان تیزی سے روشن ہو رہا تھا۔

عجب یہ تھا کہ سیالکوٹ سے لیکر صحرائی ساحلی علاقوں تک طویل اور حساس پاک بھارت سرحد بغیر کسی جنگی تیاری اور الرٹ کے خالی پڑی تھی، جبکہ بھارت آپریشن جبرالٹر کی 48جیسی ہوتی کامیابیوں سے گھبرا کر مکمل تیاری سے طویل سرحد کے لاہور، قصور اور سیالکوٹ جیسے حساس ترین پاکستانی سرحدی علاقوں پر بھرپور حملہ کرکے لاہور پر جلد سے جلد قبضے کو پہلا ہدف بنا چکا تھا۔

جنگ ہوئی پاکستان مملکت خداداد ثابت ہوا بڑی عسکری تیاری کے متذکرہ خلا کے باوجود پاکستان نے اچانک بڑے بھرپور بھارتی حملے کو پہلے تو کچھ نقصانات کے باوجود نہ صرف سہہ لیا بلکہ پلٹ کر جو کامیاب ترین مزاحمت کی پھر ایئر فورس نے جو لوہا منوایا اس نے دفاع پاکستان کو یقینی بنا دیا۔

سیسہ پلائی ہوئی دیوار کا محاورہ لڑتے فوجیوں کے شانہ بشانہ عمل میں ڈھل گیا۔ پاکستان کی اس جنگ میں بڑی فتح یہ تھی کہ اس کی قومی دفاعی صلاحیت 5گنا بڑے دشمن کے مقابل مکمل ٹیسٹ ہو کر مکمل کامیاب ہوئی جبکہ بھارتی شکست یہ تھی کہ وہ جنگی تیاری اور حجم میں کئی گنا بڑا اور اچانک حملہ آور ہو کر بھی ’’ لاہور پر قبضہ‘‘ کا جنگی ہدف حاصل کرنے میں ناکام رہا اور اپنی ائیر فورس برباد کر ا بیٹھا یوں بھارتی دفاعی صلاحیت حوصلہ شکنی کے بلند درجے پر پوری دنیا میں بے نقاب ہوئی۔

قارئین کرام! محسن پاکستان کا اپنے وطن کی سلامتی کو یقینی بنانے کے لئے تاریخ ساز علمی کردار، ملکی سیاسی تاریخ پاکستان کی موجودہ ایٹمی دفاعی صلاحیت، دشمن کے ارادوں اور تیزی سے بدلتی صورتحال کے تناظر میں قوم خصوصاً نئی نسل کے ذہن نشین رہنا ہماری ایک بڑی علمی قومی ضرورت ہے اس سے ایٹمی پاکستان کے بانی ڈاکٹر عبدالقدیر خان کی دفاع پاکستان کے لئے مکمل نتیجہ خیز خدمات کا احاطہ ہونے میں بھی مدد ملے گی جو انہیں بمطابق اور مطلوب خراج تحسین و عقیدت پیش کرنے کا بھی تقاضاہے سو آئندہ ’’آئین نو‘‘ بھی زیر بحث موضوع پر ہی جاری رہے گا جس میں واضح کیا جائے گا کہ اکثر و بیشتر سیاسی عدم استحکام میں مبتلا پاکستان کے ایٹمی پاکستان بننے کا مرحلہ وار سفر کیسے اور کتنی عظیم کامیابیوں کے ساتھ حتمی کامیابیوں تک جاری و ساری رہا۔ (جاری ہے)
بشکریہ جیو نیوز

ڈاکٹرعبدالقدیرخان کے قلم سے ….

دیکھئے اللہ تعالیٰ نے جو بے شمار نعمتیں ہمیں عطا کی ہیں وہ ہم کبھی دنیا بھر کے درختوں کے قلموں اور سمندروں کی سیاہی یا روشنائی سے بھی مکمل طور پر نہیں لکھ سکتے۔ آپ سے چند چیزوں کا ذکر کرتا ہوں مثلاً ہدایت، رزق، صحت، مال و دولت، قوّت و طاقت، عزت وغیرہ۔ سب سے زیادہ اہم نعمت ہدایت ہے۔

سورۃ کہف، آیت 17میں اللہ تعالیٰ فرماتا ہے کہ ’’جس کو اللہ ہدایت دے وہ ہدایت یاب ہے اور جس کو وہ گمراہ کرے تو تم اس کے لئے کوئی دوست ہدایت دینے والا، راہ دکھانے والا نہ پائو گے‘‘۔ کلام مجید میں بار بار ان چیزوں کا ذکر ہے جن کا میں نے ابھی اوپر ذکر کیا ہے۔ آج آپ کی خدمت میں غورو خوض کے لئے ان ہی چند باتوں کی جانب توجہ دلانا چاہتا ہوں۔

آپ جانتے ہیں کہ ہندو ایک نہایت تعلیم یافتہ قوم ہے ان کی تاریخ و تہذیب بہت پرانی ہے۔ یہ دنیا میں اپنی عقل و فہم کے بارے میں مشہور ہیں۔ اتنی پرانی تہذیب، اعلیٰ تعلیم، عقل و فہم کے باوجود اللہ تعالیٰ کی ہدایت سے محروم ہیں۔ گائے کا پیشاب پیتے ہیں۔ گوبر کھا لیتے ہیں۔ یہی نہیں بلکہ خود مٹی اور لکڑی کی مورتیاں بناتے ہیں اور ان کو نعوذ باللہ خدا مان کر پوجتے ہیں جو چیز آپ خود بنائیں خود اس کے خالق ہوں وہ آپ کا خالق کیسے ہوسکتا ہے؟

ٍیہی حال مسیحیوںکا ہے۔ ایک صلیب، کراس بناتے ہیں اس پر حضرت عیسیٰ ؑ کی مورتی بناتے ہیں اور اس کو پوجتے ہیں۔ اعلیٰ تعلیم یافتہ عیسائی دیوار پر ایسی ہی لگی مورتی کو پوجتے ہیں، بیمار ہوتے ہیں تو اس کراس اور مورتی کو لپٹ کر پکڑتے ہیں اور دعائیں مانگتے ہیں یہ جانتے ہوئے بھی کہ یہ پیتل کا ٹکڑا نا ان کی فریاد سن سکتا ہے اور نا ہی فائدہ پہنچا سکتا ہے۔

مسلمان بھی ایسی باتوں سے مبرّا نہیں ہیں لاتعداد رسم و رواج بنا رکھے ہیں جو اسلام کے بنیادی اصولوں کے خلاف ہیں۔ مثلاً رسول اللہﷺ کے وصال کے بعد ہی مسیلمہ بن کذّاب نے نبوّت کا دعویٰ کردیا، حالانکہ ابھی اسلام کی تعلیم، اللہ کے فرمان، احادیث تازہ تھیں۔ حضرت ابوبکر صدیقؓ نے فوراً اس فتنے کا سر کچلنے کا حکم دیا، ہزاروں مسلمان جن میں تقریباً 1200جیّد صحابی تھے شہید ہوگئے مگر اس فتنہ کا سر کچل دیا گیا۔ آپ سوچئے کلام مجید یعنی فرمان اِلٰہی کی موجودگی میں بھی کیا یہ ممکن تھا! جی تھا، جب ہی تو ہوا اور سورۃ کہف کی آیت کی سچائی ثابت ہوئی۔ کلام مجید میں بار بار آیا ہے کہ اللہ اور اس کے رسول (محمدؐ) کی اطاعت کرو ان کے فرمان کی نافرمانی کروگے تو سخت عذاب اور عتاب نازل ہوگا۔ اس پر مزید روشنی ڈالنے اور اہمیت بتانے کے لئے اللہ پاک نے فرمایا ہے کہ اللہ کے رسول اور اللہ کے احکامات کی تعمیل کرو۔ پھر کلام مجید میں صاف صاف فرمایا کہ محمدؐ اللہ کے آخری رسول ہیں اور مہر لگادی گئی ہے کہ اب کوئی اور نبی نہیں آئے گا۔

خود رسول اللہ صلی اللہ علیہ وسلم نے خطبہ حجۃ الوداع میں صاف صاف فرمایا کہ لوگوسنو! اب میرے بعد کوئی نبی نہیں آئے گا اور نا ہی کوئی نئی اُمت آئے گی۔ پھر انسان اپنی فطرت (جھگڑالو، جلدباز اور احسان فراموشی وغیرہ) کی وجہ سے ایسی باتیں کرتا ہے جو اللہ اور اس کے فرمان کے سخت خلاف ہیں۔ دیکھئے ایسے رویے ایسے کردار کے لئے اللہ تعالیٰ نے کلام مجید میں کئی جگہ فرمایا ہے۔ ’’بہرے، گونگے، اندھے ہیں پس یہ اپنی گمراہی سے باز نہیں آسکتے، بہرے گونگے اندھے ہیں پس یہ دیکھتے نہیں، بہرے گونگے اندھے ہیں پس یہ سمجھتے نہیں ہیں۔ ہم نے ان کے دلوں پر مہر لگادی ہے یعنی سوچنے اور سمجھنے کی قوّت کو سلب کرلیا ہے اور ان کو اب کوئی صحیح راہ نہیں دکھا سکتا۔

دیکھئے آج بھی وہی المیہ ہے جو 1400سال سے کچھ پہلے موجود تھا۔ یعنی ہم تو وہی کرینگے جو ہمارے آبائو اجداد کرتے آئے ہیں۔ آج کی نئی جوان قوم کے دماغ او ر دل میںبھی یہی چیز سما گئی ہے۔ اگر والدین غلط راہ، یعنی دین اسلام اور احکامات اِلٰہی کے منافی کاموں میں مصروف ہیں تو اس کو صحیح اور جائز سمجھ کر اس کی پیروی کرتے ہیں۔ نماز نہ پڑھنا، شراب پینا اور دوسرے غلط کاموں کی نقل عام ہے۔

میں نے اپنے پچھلے کالم میں ایک مفید مشورہ دیا تھا کہ ریڈیو پاکستان صبح 7بجے سے رات تک صوت القرآن کے نام سے تلاوت قرآن مع اردو ترجمہ پیش کرتا ہے یہ بہت ہی اعلیٰ پروگرام ہے آپ دکان میں، بڑے ڈیپارٹمنٹل اسٹورز میں نرم آواز یعنی ہلکی آواز میں اس کو لگائیں۔ آواز اُونچی، لوگوں کو ہراساں کرنے والی نہ ہو۔ آپ اللہ کے احکامات سن سن کر ان پر عمل کرنے لگیں گے۔ اور عوام بھی۔

(نوٹ) پچھلے کالم میں سورہ یوسف کی جگہ سورہ کہف لکھ دیا گیا تھا اور سورہ قمر کی جگہ سورہ حجرات شائع ہوگیا تھا۔ صحیح کرلیں، معذرت خواہ ہوں۔

اب تک مجھے روز ہزاروں ہمدردوں کی نیک خواہشات اور دُعائیں بذریعہ ای میل، ایس ایم ایس، واٹس ایپ موصول ہورہی ہیں اللہ پاک قبول فرمائے۔ آپ سب کا تہہ دل سے شکرگزار ہوں۔ الحمداللہ اب پہلے سے صحت بہت بہتر اور خطرے سے باہر ہے صرف تھوڑی کمزوری ہے ان شااللہ وہ بھی جلد دور ہوجائے گی۔ حقیقت یہ ہے کہ میرا رب کبھی مجھے تنہا نہ چھوڑے گا۔
بشکری جیو نیوز

سلیم صافی کے قلم سے …..

اللہ عمر چیمہ کی عمر دراز کرے۔ وہ ان چند ایک صحافیوں میں سے ایک ہیں جنہوں نے جرأت اور صحافتی اخلاقیات کے ساتھ انوسٹی گیٹیو جرنلزم کو زندہ رکھا ہے۔ اب کی بار اُن کے ساتھ صحافت کے ایک اور فخر یعنی فخر درانی بھی مل گئے ہیں جو اپنی جگہ محنت اور بہادری کی مثال ہیں۔ دونوں نے مل کر جو کام کیا، وہ نہایت محنت طلب اور مشکل تھا۔

اِن دونوں نے پنڈورا لیکس کے حوالے سے جو کارنامہ سرانجام دیا وہ قابلِ فخر ہے لیکن افسوس کہ پچھلی مرتبہ اُن کی محنت سے ملک کے لئے کوئی خیر کا راستہ نکالا گیا اور نہ اب کی بار ایسا ہوگا۔ وجہ ظاہر ہے کہ اِس ملک میں احتساب کا کوئی ادارہ ہے اور نہ منصفانہ نظام۔ قومی احتساب بیورو سے تو کوئی توقع نہیں کہ یہ ادارہ پنڈورا لیکس کی بنیاد پر کسی کا میرٹ پر احتساب کر سکے گا۔

دوسری جگہ عدلیہ ہو سکتی ہے لیکن ہم دیکھ چکے ہیں کہ پانامہ لیکس میں کس طرح صرف شریف فیملی کو پھنسایا اور باقی سب سے متعلق مٹی پائو والی پالیسی اپنائی۔ تیسرا پلیٹ فارم پارلیمنٹ ہو سکتا ہے جو اس طرح کے معاملات کے لئے فورم بن سکتا ہے لیکن ہم سب جانتے ہیں کہ اِس ادارے میں بھی اتنی سکت باقی نہیں بچی۔ جہاں چیئرمین سینیٹ کے معاملے میں 60 ممبران پر 30 غالب آجاتے ہیں، اس پارلیمنٹ کی قومی اسمبلی کے اسپیکر وزیراعظم کے تابعداروں جیسا رویہ اپنائے ہوئے ہیں اور ڈپٹی اسپیکر اسٹے آرڈر پر چل رہے ہیں۔ یوں پارلیمنٹ میں بھی اس کا نتیجہ کوئی نہیں نکلے گا۔ اس لئے مجھے پختہ یقین ہے کہ پنڈورا لیکس چند دنوں تک میڈیا ٹاک شوز کا موضوع رہے گا۔ پھر اسی طرح دفن ہو جائے گا جس طرح پانامہ لیکس۔

وزیراعظم عمران خان نے حسبِ روایت بیان جاری کرکے قوم کو گمراہ کرنے کی کوشش کی کہ ان کی حکومت پنڈورا لیکس میں آنے والے ناموں کی تحقیقات کرے گی اور اس سلسلے میں ایک اجلاس بھی منعقد کیا لیکن ان کی اس بات کو کوئی احمق ہی سنجیدہ لے گا۔ وجہ اس کی یہ ہے کہ اقتدار سنبھالنے کے بعد ان کی حکومت نے بیان جاری کیا تھا کہ پانامہ لیکس کے باقی ناموں کے خلاف بھی کارروائی ہوگی لیکن انہوں نے عملاًکیا کیا؟ اس حوالے سے ان کی حکومت کے سیف الرحمٰن یعنی شہزاد اکبر نے بڑے دعوے بھی کئے تھے لیکن عملاً صورت حال یہ تھی کہ ایک بڑا گروپ ہمارے صوابی کی سگریٹ انڈسٹری سے وابستہ ترکئی خاندان تھا۔ اس خاندان کے بڑی تعداد میں آف شور اکائونٹس تھے۔ اس خاندان کے شہرام ترکئی عمران خان کی پارٹی کے صوبائی وزیر ہیں۔ اس خاندان کا ایک اور فرد ایم پی اے ہے۔ شہرام ترکئی کے والد اور چچا بالترتیب سینیٹر اور ایم این اے ہیں۔ کارروائی تو درکنار ان پر خان کی یہ عنایتیں ساری قوم کے سامنے ہیں۔

دوسری مثال زلفی بخاری ہیں۔ پانامہ لیکس میں ان کا نام بھی آف شور اکائونٹس میں تھا۔ ان سے حساب لینا تو درکنار، برطانوی شہری ہونے کے باوجود ان کو مشیر بنایا گیا۔ اب جب انہیں فارغ کیا گیا ہے تو اس کی وجہ بھی آف شور اکائونٹس یا پھر رنگ روڈ اسکینڈل نہیں بلکہ اصل وجہ یہ ہے کہ وہ ایک ایسی جگہ سے بلیک لسٹ ہو چکے ہیں کہ جہاں سے بلیک لسٹ ہونے کے بعد جہانگیر ترین ہو یا کوئی اور، عہدے پر فائز نہیں رہ سکتا البتہ عمران خان آج بھی ان سے چپکے چپکے ملتے رہتے ہیں۔ یوں اگر کوئی یہ توقع کرتا ہے کہ عمران خان کی حکومت ایسے معاملے کو سنجیدگی سے آگے بڑھالے گی جس میں اُسکے اے ٹی ایمز کے نام شامل ہیں، تو وہ احمقوں کی جنت میں رہتے ہیں۔

تاہم پانامہ اور پنڈورا لیکس کا بعض حوالوں سے تجزیہ کرنے کی طرف کسی کا دھیان نہیں گیا، جس کا تذکرہ ضروری سمجھتا ہوں۔ مثلاً ان سے ثابت ہو گیا کہ بدنام تو صرف سیاستدان ہوتے ہیں لیکن حقیقت یہ ہے کہ کرپشن ہو یا پھر آف شور اکائونٹس کا معاملہ، اس کی بہتی گنگا میں سب طبقات نے یکساں ہاتھ دھوئے ہیں تاہم ذکر صرف سیاستدانوں کا ہو رہا ہے۔

دوسرا پہلو یہ ہے کہ کرپشن کے حوالے سے سیاست کا زیادہ گند اس وقت سب سے زیادہ پی ٹی آئی اور پیپلز پارٹی میں ہی جمع ہے لیکن کمال دیکھ لیجئے کہ پی ٹی آئی آج بھی پروپیگنڈے کے زور پر مخالفین کو کرپٹ اور اپنے آپ کو فرشتوں کی جماعت ثابت کرنے میں لگی ہے۔

دوسری طرف اس جانب کسی نے توجہ نہیں دی کہ مذہبی اور قوم پرست جماعتیں، جو پاکستان میں سب سے زیادہ معتوب ہیں، کا اس حوالے سے ریکارڈ کافی حد تک صاف ہے۔ پنڈورا لیکس میں جماعت اسلامی، جے یو آئی، اے این پی یا پختونخوا ملی عوامی پارٹی کے رہنماؤں کے نام نہیں ہیں تاہم جماعت اسلامی کے امیر سراج الحق پر اس حوالے سے ایک اخلاقی ذمہ داری عائد ہوتی ہے۔ وہ یہ کہ پاناما لیکس کی آڑ میں وہ بھی عمران خان اور شیخ رشید کی طرح نواز شریف کو ٹھکانے لگانے کے لئے استعمال ہوئے۔ اب اخلاقیات کا تقاضا یہ تھا کہ سراج الحق،نواز شریف کی فراغت کے بعد باقی ناموں کا بھی اسی طرح تعاقب کرتے جس طرح انہوں نے ان کے معاملے کا کیا تھا لیکن چند بیانات پر اکتفا کے سوا انہوں نے کوئی عملی قدم نہیں اٹھایا۔

جماعت اسلامی احتجاج کی بھرپور صلاحیت رکھتی ہے اور آئے روز مظاہرے کرتی رہتی ہے لیکن نواز شریف کی فراغت کے بعد جماعت اسلامی نے باقی 4سو سے زیادہ افراد کے آف شور اکاؤنٹس کے معاملے پر کوئی تحریک نہیں چلائی۔ حالانکہ اخلاقیات کا تقاضا یہ ہے کہ سراج الحق نہ صرف پنڈورا لیکس کے معاملے پر سپریم کورٹ جائیں بلکہ پانامہ لیکس کے باقی ناموں کا بھی تعاقب کریں۔

سراج الحق اب اگر اس معاملے کو اس شدت کے ساتھ نہیں اٹھاتے جس شدت کے ساتھ انہوں نے نواز شریف کے آف شور اکاؤنٹس کو اٹھایا تھا تو اس سے بجا طور پر یہ مطلب لیا جائے گا کہ وہ بھی اس وقت اسی طرح اسکرپٹ کے مطابق استعمال ہوئے جس طرح کہ عمران خان اور شیخ رشید ہوئے تھے۔ ان دونوں کو تو پھر بھی صلہ مل گیا لیکن سراج الحق کو تو وہ بھی نہیں ملا۔ ان کا یہ بھی فرض بنتا ہے کہ وہ جسٹس (ر) ثاقب نثار کو اپنا وکیل بناکر پانامہ اور پنڈورا کی بنیاد پر سپریم کورٹ چلے جائیں۔ ریٹائرمنٹ کے بعد ثاقب نثار میدان سے غائب ہیں۔ شاید وہ ڈیم پر پہرا دینے میں مصروف ہیں لیکن اگر سراج الحق ان کو اپنی وکالت پر آمادہ کر لیں تو ایک تو عمران خان اپنے اس محسن کو بھی دوبارہ دیکھ اور سن لیں گے اور دوسرا یہ پتہ بھی چل جائے گا کہ اب وہ کس حال اور موڈ میں ہیں۔
بشکریہ جیو نیوز

انصار عباسی کے قلم سے …..
سیاست پاکستان میں اور پیسہ باہر، یہ کام نہیں چلنا چاہئے۔ اگر سیاست کرنی ہے، حکمرانی کا شوق ہے تو ضرور کریں لیکن پھر جتنا بھی پیسہ ہے، پاکستان کے اندر ہی ہونا چاہئے۔

کروڑوں اربوں کی جائیدادیں باہر ہوں اور سیاست پاکستان میں کریں، اس رواج کو بدلنے کی ضرورت ہے۔ ’’جینا مرنا عوام کے ساتھ‘‘ کی بات کرتے ہیں تو پھر اُس پر عمل بھی کریں۔

بدھ (6اکتوبر) کو جنگ میں شائع ہونے والی ایک خبر کے مطابق قومی اسمبلی کے 29 ارکان ایسے ہیں جن کے 2019 میں الیکشن کمیشن کو جمع کرائی گئی دستاویزات کے مطابق اثاثے، کاروبار اور جائیدادیں ملک سے باہر ہیں۔

اہم ترین ناموں میں شہباز شریف، بلاول بھٹو زرداری، شاہ محمود قریشی، علی زیدی، فہمیدہ مرزا، خواجہ آصف اور دوسرے ارکانِ اسمبلی شامل ہیں۔ خبر کے مطابق کسی رکنِ اسمبلی نے اپنے اثاثوں میں کسی آف شور کمپنی کو ظاہر نہیں کیا۔

اگرچہ وزیراعظم عمران خان کے پاکستان سے باہر کوئی اثاثے نہیں ہیں جبکہ آصف علی زرداری نے بھی کوئی اثاثہ ظاہر نہیں کیا لیکن پاکستان سے باہر دولت رکھنے والوں میں حکمران جماعت پی ٹی آئی سے 13، پی ایم ایل این سے 10، پیپلز پارٹی سے دو، ایم ایل کیو، بی این پی، ایم ایم اے اور ایم کیو ایم سے ایک، ایک ایم این اے ان میں شامل ہیں جنہوں نے پاکستان سے باہر اپنے اثاثے اور کاروباری سرمایہ ڈکلیئر کیا۔

بلاول بھٹو نے کوئی ڈیڑھ ارب کی جائیداد اور پیسہ ملک سے باہر ظاہر کیا، شہباز شریف نے تقریباً 14 کروڑ کے اثاثے ملک سے باہر بتائے۔

شاہ محمود قریشی نے اپنے اور اپنی اہلیہ کے کوئی دو لاکھ پاونڈ ملک سے باہر اکاونٹ میں ظاہر کیے۔ سید علی حیدر زیدی نے دبئی میں ڈھائی ملین درہم مالیت کا کاروباری سرمایہ ظاہر کیا۔

وزیر نے دبئی میں تین لگژری کاروں کے علاوہ ایک بینک اکاونٹ بھی ظاہر کیا جس میں ڈیڑھ لاکھ درہم بیلنس ہے۔ عمران خان کا اپنا پیسہ یا جائیداد باہر نہیں۔

اُن کی حکومت بیرون ملک پاکستانیوں سے بار بار مطالبہ کرتی ہے کہ پاکستان کو ڈالرز بھیجیں تاکہ ہمارے فارن ایکسچینج ریزوز بہتر ہوں لیکن اپنے وزیروں اور ارکانِ اسمبلی کا پیسہ اور جائیدادیں باہر پڑی ہیں۔ یہ ایسا تضاد ہے جس کو دور کیا جانا چاہئے۔

شہباز شریف نے تو کئی سال پہلے اعلان کیا تھا کہ وہ بیرون ملک سے اپنا تمام پیسہ اور جائیداد واپس پاکستان لائیں گے لیکن اس خبر سے ظاہر ہوا کہ اُنہوں نے ایسا نہیں کیا، جو قابل افسوس بات ہے۔

بلاول بھٹو بھی غریبوں کی بات بہت کرتے ہیں، وہ بھی پاکستان کی معیشت اور یہاں کے کاروباری حالات کی بہتری کی تمنا ظاہر کرتے ہیں لیکن ایسا کیوں کہ اپنا پیسہ اور جائیدادیں ملک سے باہر رکھی ہوئی ہیں۔

یہی گلہ بہت سے لوگ نواز شریف سے کرتے ہیں کہ اُنہوں نے بھی اپنا سارا کاروبار اور پیسہ باہر رکھا ہوا ہے۔ اُن کے بچوں کی تو پاناما لیکس میں آف شور کمپنی بھی نکل آئی جس کی وجہ سے اُن کو وزارتِ عظمیٰ سے بھی ہاتھ دھونا پڑے۔

چند دن قبل پنڈورا لیکس بھی سامنے آگئیں جن میں کوئی سات سو پاکستانی نکلے جن کی ملک سے باہر آف شور کمپنیاں ہیں لیکن پاناما کے برعکس پنڈورا لیکس کا وہ سیاسی اثر عمران خان کی حکومت پر نہ ہو سکا جس کی وجوہات پر بعد میں کبھی بات ہو گی۔

میری خواہش ہے کہ پاکستان میں یہ قانون بنایا جائے کہ جس نے سیاست کرنی ہے، ممبر پارلیمنٹ بننا ہے یا صوبائی اسمبلیوں کا الیکشن لڑنے کی خواہش ہے تو ایسے لوگوں کے لئے یہ لازمی قرار دے دیا جائے کہ اُن کا نہ کوئی اثاثہ، جائیداد، بنک اکاونٹ، بزنس ملک سے باہر ہو سکتا ہے اور نہ ہی وہ کوئی آف شور کمپنی ملک سے باہر رکھ سکتے ہیں۔

یہ شرط ایسے سیاستدانوں اور اُن کی بیویوں اور بچوں (جو Independentنہ ہوں) پر ضرور لاگو ہونی چاہئے۔ سیاست اور حکمرانی پاکستان میں اور پیسہ جائیداد باہر یہ تماشہ بند ہونا چاہئے۔
بشکریہ جیو نیوز

حسن نثار کے قلم سے ……
یوں تو پوری زندگی پر شور، ہنگامہ خیز، دلچسپ، ایڈونچرس اور خوب صورت لوگوں سے بھرپور رہی لیکن یونیورسٹی کے دن دل و دماغ پر نقش ہو کر رہ گئے۔ جب بطور انڈر گریجویٹ آنرز میں داخلہ لیا تو عمر سولہ سال سے کچھ اوپر تھی۔ اللہ بخشے والد، حفیظ خان کو اور مجھے اپنی نیلے رنگ کی خوبصورت ’’برلینا‘‘ میں ہاسٹل چھوڑنے آئے جس کا نمبر حفیظ خان نے برسوں بعد اپنے مقبول انگریزی کالم کے ذریعے مجھے یاد دلایا۔’’ایل آر 16‘‘۔

تب لائل پور کا نام چوری نہیں ہوا تھا۔ عجب اتفاق کہ 16 پلس کے دو لڑکے اور گاڑی کا نمبر بھی 16۔ حفیظ خان تب بھی 6 فٹ کا وجیہہ نوجوان اور میں ساڑھے 5 فٹ کا۔ چند روز ہم دونوں نے ایک ہی کمرہ شیئر کیا تو تاثر یہ ابھرا کہ میں حفیظ خان کا چھوٹا بھائی ہوں جو اسے سیٹل کرکے واپس چلا جائے گا لیکن جب میں کمرہ نمبر 104 میں سیٹل ہوا تو سب جان گئے کہ میں بھی ’’معزز‘‘انڈر گریجویٹ ہوں۔

شروع حفیظ خان سے ہی کرتے ہیں جو بعد ازاں ’’ڈمپل خان‘‘ کے نام سے مقبول ہو کر، جہانگیر بدر یعنی ’’جے بی‘‘ کو شکست دے کر سٹوڈنٹس یونین کا صدر منتخب ہوا اور جاوید ہاشمی سیکرٹری بن گیا۔ آج ان دوستوں کو ان کے ’’نک نیمز‘‘ سے یاد کرنے کو جی چاہتا ہے۔

دن جو پکھیرو ہوتے پنجرے میں میں رکھ لیتا

یا پھر یوں سہی . . . . . . .

اجالے اپنی یادوں کے ہمارے ساتھ رہنے دو

نہ جانے کس گلی میں زندگی کی شام ہو جائے

چند ہفتوں میں زندگی بھر کے بندھن بندھ گئے۔ ایسے رشتے جنہیں موت بھی نہیں توڑ سکتی ورنہ میں آج انہیں اس طرح یاد نہ کر رہا ہوتا۔

اک یاد ہے کہ دامنِ دل چھوڑتی نہیں

ایک بیل ہے جو لپٹی ہوئی ہے شجر کے ساتھ

6 فٹ 2 انچ کا سرخ و سفید یوسف زمان شنواری یاد آتا ہے جو بچوں کی طرح سادہ اور معصوم تھا۔ جوانی میں رخصت ہوگیا۔ ہم سب اسے پیار سے ’’ڈِگلو‘‘کہتے تھے اور کیوں؟ مجھے آج تک معلوم نہیں۔ آج بھی اسے ’’ڈگلو‘‘ کہہ کر ہی یاد کرتے ہیں۔ سردار رجب علی پتافی کو چلتا دیکھ کر نجانے سب کو ’’فوکر‘‘ کیوں یاد آتا تھا سو یہ نام ہٹ ہوگیا۔ اس کا دیا ہوا سو سال سے بھی پرانا ایک مشکیزہ آج بھی میرے پاس محفوظ ہے۔

وہ ’’بیلی پور‘‘ آتا تو میں کئی کئی روز زبردستی اسے روکے رکھتا لیکن جب اسے روکنا ضروری تھا، میں کچھ بھی نہ کرسکا اور وہ پھولوں میں لدا رخصت ہوگیا۔ وہ میرے بچوں کو میری محمدہ، میرا حاتم، میرا ہاشم کہہ کر بلایا کرتا تھا۔ جاوید قریشی سیشن جج ریٹائر ہوا لیکن آج بھی جاوید ’’ککڑ‘‘ ہے۔ ککڑ کی ایسی آواز نکالتا کہ ککڑیاں اپ سیٹ ہو جاتیں اور تقریب درہم برہم۔ ’’نگر‘‘ کےپرنس برکت کے دو نام تھے۔

برکت سے بکو یا پرنس پیرٹ کیونکہ سرخ چہرہ پر طوطا ناک نمایاں تھی۔ زیارتوں پر گیا اور پھر کبھی اس کی زیارت نصیب نہ ہوئی۔ جمیل اختر بہت پڑھاکو لیکن پائوں باہر نکال کر چلنے کی وجہ سے ’’پھاتاں‘‘ مشہور ہوگیا جبکہ اعجاز کو اعجاز بائی گاڈ اس لئے کہتے کہ ’’بائی گاڈ‘‘ اس کا تکیہ کلام تھا اور ہائے ہم سب کا مسعود داڑھو،جتنا ہینڈ سم اتنا ہی سریلا۔ آج بھی میں اس کی یاد میںا س کا فیورٹ گیت گنگناتا ہوں ’’تم بھلائے نہ گئے ہائے بھلائے نہ گئے‘‘۔

افتخار فیروز کو کیسے بھلائیں جو شروع سے ہی ’’ڈھلی‘‘ مشہور تھا کیونکہ اس کے اٹھنے بیٹھنے، چلنے پھرنے، بولنے، پہننے میں اک ناقابل بیان قسم کا ’’ڈھیلا پن‘‘ تھا جو اس پر جچتا بھی بہت تھا۔ اور یاد آیا شیر قادر بلوچ، اک نامور جیالوسٹ جسے ’’شکاری‘‘ اس لئے کہتے کہ چھوٹے سے چھوٹے روشندان سے گزر کر کچھ بھی اڑا لے جاتا لیکن یہ چوریاں اتنی بے ضرر اور معصوم ہوتیں کہ لٹنے والا بھی لوٹ پوٹ ہو جاتا۔ دو بنگالی یاد آئے ایک عبدالعلی جسے اس کے اسٹائل کی وجہ سے ’’گیری کوپر‘‘ کہا جاتا اور دوسرا بابل جو بہت ہی مختصر ہونے کی وجہ سے ’’پستہ‘‘ کہلاتا۔ اللہ نے اسے جسم چھوٹا لیکن دماغ بڑا دیا۔ سقوط ڈھاکہ کے بعد یہ پھر کبھی دکھائی سنائی نہ دیئے لیکن بھولتے نہیں۔

تم بھول گئے ہم کو، ہم تم کو نہیں بھولے

نامور سکن سپیشلسٹ ضیا الدین کو ہم ڈاکٹر ژواگو کہتے۔ والد سینئر فوجی افسر تھے۔ کنگ ایڈورڈ میں داخلہ نہ ملا تو والد نے کہا ’’ایم بی بی ایس‘‘ تو صرف KE میں ورنہ کچھ اور کرو‘‘۔ اس نے جیالوجی میں داخلہ لے لیا۔ دو سال بعد KE کا میرٹ گرا۔ ژواگو بھاگ نکلا۔ اللہ سدا سلامت رکھے۔ یوسف ہونڈا کی وجہ شہرت اس کی موٹر سائیکل اور ترکیب استعمال تھی۔

آج کل بیمار ہے، اللہ اسے صحت کاملہ عطا فرمائے۔ اور اب چلتے ہیں جاوید گتہ کی طرف جو جیالوجی ڈیپارٹمنٹ کے سربراہ شمس صاحب کا فرزند ارجمند ہے۔ ن،م راشد صاحب کا بیٹا شہر یار راشد امریکہ سے آیا، کوالیفائیڈ مارشل آرٹسٹ تھا اور ہم سب کا دوست جس نے شغلاً ہمیں جوڈو کراٹے سکھانے کی دعوت دی۔ صلو درانی اور میں تو بھاگ گئے لیکن جاوید ڈٹ گیا۔ انتہائی ٹف اور ڈینٹ پروف ثابت ہوا تو خلق خدا نے گتہ کا خطاب دیا جس پر کسی چوٹ، ضرب کا اثر نہ ہوتا۔ شیری فارن سروس میں گیا اور پھر بھری جوانی میں رخصت ہوگیا۔

شیری کو سب ’’ماسٹر‘‘ کہتے تھے۔ خالد ہٹلر، ہٹلر اس لئے تھا کہ ہاسٹل میں پلاسٹر آف پیرس سے ہٹلر کے مجسمے بنایا کرتا تھا، حفیظ خان کے ساتھ کینیڈا میں ہوتا ہے۔ اعجاز نقوی ’’ہیرو‘‘ مشہور تھا۔ نہر کنارے اک لڑکی کے قدموں میں ’’تاج محل‘‘ کا چھوٹا سا رپلیکا رکھا۔ اس سنگدل نے ٹھوکر ماری اور ’’ہیرو‘‘ کا پلاسٹک سے بنا ’’تاج محل‘‘ چکنا چور ہوگیا اور آج تک فیصلہ نہ ہو سکا کہ دل کے ٹکڑے زیادہ تھے کہ تاج محل کے۔

جمیل ڈوگی، ڈوگی اس لئے مشہور ہوا کہ سبز آنکھوں والی اک لڑکی جس کی ماں جرمن تھی، اسے ’’بلی بلی‘‘ کہتا تو دوستوں نے ’’بلی‘‘ کے مقابل اسے ’’ڈوگی ڈوگی‘‘ کہنا شروع کردیا جس پر جمیل کو کوئی اعتراض نہ تھا۔ سگِ لیلیٰ تو سگِ لیلیٰ ہی ہوتا ہے۔ صبح کے 4 بجے ہیں، سناٹا بول رہا ہے۔ میں لکھ رہا ہوں لیکن کیا اور کیوں لکھ رہا ہوں؟

تمہاری یاد کے جب زخم بھرنے لگتے ہیں

کسی بہانے تمہیں یاد کرنے لگتے ہیں

دن تو کسی نہ کسی طرح گزر ہی جاتا ہے، یہ رات کیوں آتی ہے جو تاروں بھری نہیں… یادوں بھری ہوتی ہے۔
بشکریہ جیو نیوز

محمد عمران چودھری کے قلم سے ……

فتح افغانستان کا جشن ختم ہوچکا ہے لیکن فتح کو برقرار رکھنے کی ذمے داریوں کا سفر شروع ہوچکا ہے۔ اگر ہم نے من حیث القوم اپنی ذمے داریاں ادا نہ کیں تو یقینی طور پر انڈیا پھر چھا جائے گا، کیونکہ ہندوستان کی تاریخ گواہ ہے کہ وہ بری طرح پٹائی کے بعد بھی مسلسل جدوجہد پر یقین رکھتے ہوئے آگے بڑھتا ہے اور کامیابی حاصل کرنے کی کوشش کرتا ہے۔ مثال کے طور پر 1965 کی جنگ میں ہماری بہادر افواج کے ہاتھوں بدترین شکست کے بعد بھارت نے ہمت نہ ہاری اور 1971 کی جنگ میں ہماری سیاسی قیادت کی نااہلی کا فائدہ اٹھاتے ہوئے دنیا کو ورطہ حیرت میں ڈال دیا۔

بھارت نے دوسرے موقع پر اپنی شکست کو جیت میں اس وقت تبدیل کیا جب دو دہائی قبل سری لنکا میں دہشت گردی عروج پر تھی، جس کے دوران بھارت وکٹ کے دونوں اطراف کھیل رہا تھا اور دہشت گردوں کو ہر طرح کی مدد دیتے ہوئے سری لنکا کے صوبے جافنا کو علیحدہ کرنے کی کوششوں میں مصروف تھا۔ ایسے میں پاکستان پوری دنیا میں واحد ملک تھا جو سری لنکا کی مدد کو آیا۔ پاکستان نے سری لنکا کی ہر طرح سے غیر مشروط مدد کرتے ہوئے اسلحے کے ڈپو یہ کہتے ہوئے کھول دیے کہ ہم دوستوں کے ساتھ حساب نہیں کرتے۔ ہماری عسکری قیادت کے دانشمندانہ اقدامات کی بدولت سری لنکا دولخت ہونے بچ گیا۔

سری لنکن آج بھی پاکستان کے ممنون ہیں، وہ کھلے دل سے اس بات کو تسلیم کرتے ہیں کہ اگر پاکستان اس مشکل کی گھڑی میں مدد کو نہ آتا تو سری لنکا ’’جافنا‘‘ سے محروم ہوجاتا۔ مگر اس کے بعد بھارت نے دھیرے دھیرے سری لنکا میں اپنے قدم جمانے شروع کردیے۔ وہی علاقے جہاں بھارت پہلے اسلحہ بھیجا کرتا تھا، بھارت نے ان ہی علاقوں میں تعمیر و مرمت کے کام کا آغاز کردیا۔ لنکن حکومت کو مالی مدد، سیاسی جماعتوں میں سرمایہ کاری، لنکن بیوروکریٹس کی تعلیم و تربیت، بغیر ویزہ کے آمد و جامد، خوراک کی فراہمی اور دیگر ذمے داریوں کا بوجھ اٹھا کر لنکن حکومت کو اپنا محتاج بنا لیا گیا۔ اور آج صورتحال یہ ہے کہ ان کے دل پاکستان اور جسم بھارت کے ساتھ، اسی بھارت کے ساتھ جس نے انہیں دولخت کرنے کی کوشش کی تھی۔
اگر ہم نے اپنی جیت کو برقرار رکھنے کی کوشش نہ کی تو ایسا ہی کچھ افغانستان میں بھی ہوسکتا ہے۔ کیونکہ طالبان حکمت اور بصیرت کے ساتھ دنیا کو ساتھ لے کر چلنے کی کوشش کر رہے ہیں۔ امید ہے کہ وہ آج سے 20 سال قبل کی غلطیوں کو نہیں دہرائیں گے اور اپنے ملک کے وسیع تر مفاد میں ہر ایک کو ساتھ لے کر چلنے کی کوشش کریں گے۔ اس کا واضح ثبوت افغان حکام کی بھارتی سفیر سے ملاقات، حدود و قیود کے ساتھ مخلوط تعلیم کی اجازت، افغان خواتین فٹبال ٹیم کی پاکستان آمد جیسے اقدامات ہیں۔ اگر موجودہ افغان قیادت دور اندیشی کا مظاہرہ کرتے ہوئے اسی طرح آگے بڑھتی رہی تو وہ دن دور نہیں جب آج کا شکست خوردہ بھارت دوبارہ افغانستان میں اپنے قدم جمانے میں کامیاب ہوجائے گا اور ہمارے حصے میں صرف جیت کا جشن ہی آئے گا۔

ضرورت اس امر کی ہے کہ ہم دھرتی کی خاطر ایک ہوجائیں۔ آج کا پاکستان عسکری لحاظ سے ناقابل تسخیر ہے لیکن معاشی میدان میں ہمارا کشکول ہماری تحقیر کا باعث ہے۔ اگر ہم بھارت کی برابری کرنا چاہتے ہیں تو ہمیں معاشی لحاظ سے خود کو منوانا ہوگا۔ ہمیں لینے والے ہاتھ کے بجائے دینے والا ہاتھ بننا ہوگا۔ اگر ہم کرپشن کو کنٹرول نہیں کرسکتے تو ملکی آمدن کو اس قدر بڑھا لیں کہ وہ ہماری کرپشن کا بوجھ اٹھا سکے (جیسے بھارت میں ہورہا ہے)۔ دھرتی ماں ہوتی ہے یہ بات تو ہم سب تسلیم کرتے ہیں اور ماں سے سہولتیں لینے کو بھی اپنا حق سمجھتے ہیں، لیکن دھرتی کے بیٹے کا کردار ادا کرنے کی توقع ہم صرف اپنے سیکیورٹی اداروں سے رکھتے ہیں۔

اس ملک کو معاشی لحاظ سے مضبوط کرنے کےلیے ہر ایک کو اپنا کردار ادا کرنا ہوگا اور ملک کو ناقابل شکست بنانا ہوگا۔ بصورت دیگر ہماری ہر کامیابی عارضی ہوگی۔ آئیے ہم سب عزم کریں پاکستان کی خاطر پاکستان کےلیے کام کریں گے۔

بشکریہ ایکسپریس نیوز

عبدالکریم کے قلم سے ……..

ن لیگ آج کل ملکی سیاست میں بیانیے کی تقسیم کا شکار ہے ،پارٹی میں پہلے دوبیانیے تو چل ہی رہے تھے جیسے “ووٹ کو عزت دو” اور “مفاہمت کی سیاست” لیکن ن لیگ اب ایک اور بیانیے کو بھی لے کر چل رہی ہے وہ ہے “نو ایکسٹینشن”۔ ن لیگ ابھی سے الیکشن کی تیاری کر رہی ہے، نواز شریف بھی روزانہ کی بنیاد پر لندن میں بیٹھ کر پارٹی کے اجلاس کی صدارت کر رہے ہیں مگر جیسے مریم نواز پارٹی کو ملک میں چلا رہی ہیں جس طرح بیانات دے رہی ہیں ایسے لگتا ہے وہ پارٹی کو کمزور کر رہی ہیں کیونکہ بیانیے میں کنفیوژن کی وجہ سے پارٹی بکھر تی جارہی ہے پارٹی قیادت جب کنفیوژ ہو تو پارٹی ورکر بھی منقسم ہو جاتا ہے نتیجے میں وہ کسی اورکی طرف دیکھنا شروع ہو جاتا ہے جس سے پارٹی تباہی کی طرف چلی جاتی ہے۔

ن لیگ نواز شریف کی 35 سالہ جدوجہد کا نتیجہ ہے لیکن مریم نواز کے خوفناک بیانات کی وجہ سے پارٹی کا شیرازہ بکھر رہا ہے، نواز شریف اپنی بیٹی کی ضد میں پارٹی کو تباہی کی طرف لے جارہے ہیں جس کا نقصان صرف ن لیگ کو ہوگا۔

حال ہی میں مریم نواز نے ایک بیان دیا جس میں ایک صحافی نے ان سے سوال پوچھا کہ جنرل باجوہ کو ایکسٹینشن دی گئی تھی اب چیئرمین نیب کو بھی دی جارہی ہے کیا کہیں گی؟ اس سوال کے جواب میں مریم نواز نے کہا جب چیئرمین نیب کو ایکسٹینشن دے جائے گی تب جواب دیں گے “باقی کسی ایکسٹینشن میں، میں اس گناہ میں شامل نہیں ہوں”۔ مریم نواز کے کہنے کا مطلب یہ ہے کی جنرل باجوہ کی ایکسٹینشن کے گناہ میں وہ شامل نہیں ہیں۔ حالانکہ جب یہ واقعہ ہوا تھا ہمیں اچھی طرح یاد ہے ن لیگ نے پارلیمنٹ میں جا کر اس ایکسٹینشن کے حق میں ووٹ ڈالا تھا۔

ہمیں یاد ہے وزیراعظم عمران خان نے اگست 2019 میں آرمی چیف جنرل قمر جاوید باجوہ کی مدت ملازمت میں توسیع کر دی تھی لیکن سپریم کورٹ نے اس ضمن میں جاری ہونے والے نوٹیفیکیشن کو معطل کر دیا تھا اور سپریم کورٹ نے حکم دیا تھا حکومت اس ضمن میں 6 ماہ میں قانون سازی کرے۔

پھر جنوری 2020 میں پارلیمنٹ نے آرمی چیف کی مدت ملازمت میں توسیع سے متعلق سپریم کورٹ کےاحکامات کی روشی میں آرمی ایکٹ میں ترمیم کر کے آرمی چیف جنرل قمر جاوید باجوہ کی مدت ملازمت میں توسیع کر دی تھی۔ اس وقت مسلم لیگ ن سمیت تمام حزب مخالف کی جماعتوں نے اس ترمیم کے حق میں ووٹ دیا تھا لیکن جماعت اسلامی اور کچھ قبائلی اراکین نے اس بات پر احتجاج کیا تھا، یہ سب باتیں ریکارڈ کا حصہ ہیں.

اب مریم نواز کے اس بیان پر حیرت ہو رہی ہے جو وہ کہہ رہی ہیں کہ میں ایکسٹینشن کے اس گناہ کا حصہ نہیں تھی ،حالانکہ سب لوگوں نے دیکھا، ن لیگ کو پارلیمنٹ میں ایکسٹینشن کے حق میں ووٹ ڈالنے کا فیصلہ نواز شریف نے کیا تھا ۔مریم نواز سیاست میں نواز شریف کے نقش قدم پر چلتی ہیں، نواز شریف کے وژن کو لے کر چلتی ہیں، ووٹرز مریم نواز کو نواز شریف کی وجہ سے پہچانتے ہیں، مریم نواز اپنے والد کے بغیر کچھ بھی نہیں لیکن کہنے والے اب یہ بات کر رہے ہیں کہ آرمی چیف کی ایکسٹینشن کے حوالے سے مریم نواز کی سوچ نواز شریف سے مختلف تھی ،یہ بات سمجھ سے بالاتر ہے کہ مریم نواز اپنے سیاسی منٹور نوازشریف سے مختلف کیسے سوچ سکتی ہیں ؟

جب ہم شہباز شریف اور نواز شریف میں بیانیے کی تقسیم کی بات کرتے ہیں کہ یہ دونوں بھائی مختلف بیانیے رکھتے ہیں کہ نواز شریف مزاحمت کی سیاست کرتے ہیں ،اداروں کے ساتھ ٹکراؤ کی سیاست کرتے ہیں ،ووٹ کو اپنے طور پر عزت دو کی بات کرتے ہیں جبکہ شہباز شریف اداروں کے ساتھ اچھے تعلقات کی بات کرتے ہیں ،سیاست میں مفاہمت کی بات کرتے ہیں۔ شہباز شریف صاحب کا ایمان ہے کہ مفاہمت سے جمہوریت موبوط ہوتی ہے ،ہم یہ جانتے ہیں ن لیگ میں نواز شریف اور شہباز شریف دو مختلف نظریات کا نام ہیں، تب مریم نواز کہتی ہیں ن لیگ نواز شریف ہے، شہباز شریف اور نواز شریف کی سوچ میں کو ئی فرق نہیں ہے لیکن جب آرمی چیف کی ایکسٹینشن کی بات آتی ہے مریم نواز کہتی ہیں کہ اس گناہ میں وہ شریک نہیں تھیں پتہ نہیں، اس بات سے ن لیگ میں کن لوگوں کو جواب دے رہی ہیں ،پارٹی کی نائب صدر بھی ہیں لیکن پارٹی میں انتشار کی بھی بات کرتی ہیں۔

مریم نواز کے بیان سے اس بات کو تقویت ملی ہے کہ پارٹی میں ابھی بھی دو بیانیے موجود ہیں جس کی وجہ سے پارٹی ابھی تک انتشار کا شکار ہے ،اس وقت پارٹی میں دو گروپ موجود ہیں، ایک گروپ جو پارلیمانی پارٹی ہے وہ شہباز شریف کی بیانیے کے ساتھ ہے جو مفاہمت کی بات کرتا ہے جو اداروں کے ساتھ بھی ٹکراؤ نہیں چاہتا ۔یہ گروپ نواز شریف اور مریم نواز کی سوچ سے مختلف سوچتا ہے، یہ گروپ باقی پارلیمانی پارٹیوں جیسے پیپلز پارٹی ،اے این پی ہے کو بہت پسند ہے اور دوسرا گروپ جو پارٹی کے تنظیمی معاملات کو دیکھتا ہے وہ مزاحمت کی سیاست کا حامی ہے ،یہ لوگ پارٹی قیادت مریم نواز اور نواز شریف کے زیادہ قریب ہیں ان میں زیادہ تعداد لندن میں مقیم ہے۔

مریم نواز کے ایکسٹینشن سے متعلق بیان پر حمزہ شہباز نے کہا ہے کہ آرمی چیف کی ایکسٹینشن میں ووٹ ڈا لنے کا فیصلہ پارٹی قیادت کا تھا یعنی اس کا فیصلہ نواز شریف نے کیا تھا، آرمی چیف کی ایکسٹینشن پر کو ئی ابہام نہیں ہونا چاہیے اور قوموں کی زندگی میں ایسے معاملات آتے ہیں جبکہ ایسے معاملا ت میں قومی مفاد کو ذاتی مفاد سے اوپر رکھنا چاہیے اس وقت یہ فیصلہ درست تھا ۔حمزہ شہباز کی اس بات سے ظاہر ہوتا ہے کہ وہ اپنے والد کی طرح اداروں سے ٹکراؤ کی سیاست پر مریم نوازسے مختلف سوچ رکھتے ہیں۔ آپ اندازہ کریں ن لیگ کی سیاست کا گڑھ پنجاب ہے کیونکہ شہباز شریف پنجاب میں تین دفعہ وزیراعلٰی رہے ہیں، اسی طرح پنجاب کے انتظامی معاملات شہباز شریف کے ہاتھ میں رہے جس کی وجہ سے حمزہ شہباز بھی ان معاملات کو چلاتے رہے ہیں ،اب حمزہ شہباز اپنی پارٹی کی وجہ سےپنجاب کے اپوزیشن لیڈر بھی ہیں ،اب ان کے پاس پنجاب کی سیاست کی آئینی ذمہ داری بھی ہے۔

اگر مریم نواز اور حمزہ شہباز بیانیے میں تقسیم رہے تو اس کا نقصان پنجاب میں پارٹی کو ہو گا، آنے والے الیکشن میں ن لیگ کنفیوژ بیانیے کی وجہ سے بہت نقصان اٹھائے گی۔ ن لیگ میں اندرونی دراڑیں کافی گہری پڑ گئی ہیں جن کا بھرنا مشکل ہو چکا ہے ۔یہ اندرونی انتشار ن لیگ کو دیمک کی طرح کھا رہا ہے اب عوام بھی کنفیوژ بیانیے اور اندرونی انتشار کی وجہ سے ن لیگ سے متنفر ہو رہے ہیں۔

ن لیگ کے ووٹر چاہتے ہیں نواز شریف وطن واپس آئیں اورپارٹی کو خود لیڈ کریں، پارٹی میں کنفیوژ بیانیے اور انتشار کو ختم کریں۔ اگر پارٹی شہباز شریف کی بجائے مریم نواز کے ہاتھ میں رہی تو ن لیگ آنے والے الیکشن میں کنفیوژ بیانیے کی نذر ہو جائے گی اور2018 کے لیکشن کی طرح نواز شریف 2023 کے الیکشن میں بھی ہاتھ ملتے رہ جائیں گے۔۔۔
بشکریہ دنیا نیوز

وسی بابا کےقلم سے…..

پاکستان مسلم لیگ (ن) آج کل روزانہ کی بنیاد پر پارٹی اجلاس منعقد کر رہی ہے۔ پنجاب کے مختلف ڈویژن کے منتخب نمائندوں اور ٹکٹ ہولڈرز سے ان کی رائے لی جا رہی ہے۔ نوازشریف اجلاس میں موجود ہوتے ہیں اور نہایت صبر کے ساتھ اپنے ساتھیوں کی بات سنتے ہیں۔ یہ ساتھی انہیں یہ بتاتے ہیں کہ میاں صاحب آجاؤ، اب دل نہیں لگ رہا، یا پھر دوسری رائے دی جاتی ہے کہ نہ آنا، زمانہ خراب ہے۔

نوازشریف کا اسٹائل یہ ہے کہ وہ فیصلہ خود کرتے ہیں لیکن اس کے اعلان کے لیے ماحول ایسا بناتے ہیں کہ ہر بندہ سمجھتا ہے کہ یہ اصل میں اس کے کہنے پر ہوا ہے۔

میڈیا میں ان اجلاسوں کے حوالے سے جو خبریں آرہی ہیں وہ اس قسم کی ہیں کہ مفاہمت گروپ کی پٹواری فاختائیں انقلابی کلنگی مرغوں سے جا ٹکرائی ہیں اور میاں صاحب بیچ بچاؤ کروانے میں مصروف ہیں۔ سویر شام ہمیں بتایا جاتا ہے کہ اب مفاہمتی گروپ جیت گیا اور ووٹ کو عزت دو والے اس ووٹ کی ہلکی پھلکی ’بزتی‘ ہوتے رہنے پر بھی راضی ہوگئے ہیں۔

اگر اس کے علاوہ آپ کو مسلم لیگ (ن) کے اجلاسوں کی کچھ سمجھ آرہی ہے تو بتائیں؟

یہاں اہم بات یہ ہے کہ یہ جماعت دنیا بھر کی ٹیکنالوجی استعمال کرتے ہوئے ایک کام بہت جی جان سے کرتی ہے۔ اس ٹیکنالوجی کو بہت سیریس نہیں لینا بس اتنا سمجھنا ہے کہ اس کام پر یہ پیسے لگاتے نہیں گھبراتے اور وہ کام ہے الیکشن لڑنا۔ دنیا کی اچھی سروے فرم ہائر کی جاتی ہیں، ایک ایک حلقے کا جائزہ لیا جاتا ہے اور اس حلقے میں جو جیت سکتا ہو اسے گھیر گھار کر پارٹی میں لایا جاتا ہے۔ بہرحال اس پر پھر کبھی تفصیل سے بات ہوگی۔

ہاں، تو بات ہورہی تھی انتخابات میں حصہ لینے کی، تو اس حوالے سے توجہ طلب معاملہ یہ ہے کہ چونکہ اس جماعت کا مرکز پنجاب میں ہے، اس لیے ہر ایک سیٹ اس کے لیے اہم ہوتی ہے۔ ایسی صورت میں جنوبی پنجاب کا کردار انتہائی اہم تصور کیا جاتا ہے جہاں 94 صوبائی سیٹیں ہیں۔

اگر 2018ء کے انتخابات کا ذکر کریں تو مسلم لیگ (ن) نے ان 94 سیٹوں میں سے صرف 32 پر کامیابی حاصل کی تھی، اور سچ پوچھیے تو یہی وہ کارکردگی تھی جس کی وجہ سے صوبائی حکومت اس جماعت کے ہاتھ سے نکل گئی۔

اب جب حکومت ہی نہیں رہی تو بھلا اس پارٹی میں رہ کر لوگوں کو کیا فائدہ ہونا تھا، لہٰذا ان 32 میں سے بھی کچھ لوگ حکومت کی طرف لڑھک گئے۔ پنجاب کی حکومت جب بھی لینی ہو تو ان 94 سیٹوں کا کچھ کرنا ہوگا اور وہی کچھ کرنے کو اجلاس ہو رہے ہیں۔

سمجھنے کی بات یہ ہے کہ آخر ایسا کیا ہوگیا کہ اچانک یہ سوچنا اور سمجھنا شروع کردیا گیا ہے کہ الیکشن قریب ہیں؟

تو آئیے اس معاملے کو سمجھنے کی کوشش کرتے ہیں۔

معاملہ یہ ہے کہ شوکت ترین نے وزیرِ خزانہ کا حلف 17 اپریل کو اٹھایا تھا۔ یہ پاکستان تحریک انصاف (پی ٹی آئی) کے چوتھے وزیرِ خزانہ تھے، جو پارلیمنٹ کے رکن نہیں ہیں۔ قانون کہتا ہے کہ ایسی صورت میں یا تو وزیر کو 6 ماہ میں عہدے سے ہٹا دیا جائے، اور اگر انہیں برقرار رکھنا ہے تو پھر 6 ماہ کے اندر اندر سینیٹ یا قومی اسمبلی کا ممبر بنوا لیا جائے، اور یہاں یہ بات یاد رہے کہ شوکت ترین کے 6 ماہ اکتوبر میں پورے ہورہے ہیں۔ لہٰذا اب یہ امکان بڑھ چکے ہیں کہ شوکت ترین اپنا عہدہ چھوڑ دیں گے کیونکہ انتخابات کروانے کا وقت تقریباً گزر ہی گیا ہے۔

ایسی صورت میں اب ہمیں پانچویں وزیرِ خزانہ سے دل اور امید دونوں لگانے ہوں گے۔ پچھلے سال دسمبر میں ہم نے سعودی عرب کو 2 ارب ڈالر چین سے لے کر واپس کیے تھے۔ اب ہمیں چین سے یا تو پھر ترلا کرنا ہے کہ بس ایک سال اور، یا پھر یہ رقم واپس کرنی ہوگی۔ ہمارے ایک ارب ڈالر کے یورو بانڈ کی ادائیگی کا وقت بھی آ رہا ہے۔ منافع سمیت یہ ادائیگی بھی کرنی ہے۔ اس کے لیے ہم یا تو کسی سے پھر پیسے مانگیں گے یا نئے اور پہلے سے زیادہ مہنگے بانڈ جاری کریں گے۔

کچھ دن پہلے سینیٹ کی پلاننگ ڈیولپمنٹ کمیٹی کے اجلاس کی رپورٹ شائع ہوئی ہے۔ کمیٹی کے چیئرمین سلیم مانڈوی والا نے بتایا کہ کیسے چینی سفیر سی پیک سے متعلق پریشان نظر آئے۔ تاہم سی پیک کے حوالے سے وزیرِاعظم کے مشیر اس بات کی تردید کرتے پائے گئے۔ اس کے فوری بعد خبریں آئیں کہ چینی کمپنیوں کو ایک ارب ڈالر سے زیادہ منافع ادا کیا جانا ہے جو جزوی طور پر ادا کردیا جائے گا۔ اس کا مطلب ہے کہ چینی کمپنیوں کو یہ پیسے دیے جائیں گے تو چین سے لیا ادھار بھی ری شیڈول ہوجائے گا۔

ایف اے ٹی ایف کا اجلاس بھی سر پر آیا کھڑا ہے۔ آئی ایم ایف کا جائزہ اجلاس بھی ہونا ہے۔ نیوزی لینڈ اور انگلینڈ کی کرکٹ ٹیموں کا دورہ ملتوی ہوگیا ہے اور یہ کارنامہ فائیو (Five Eyes) آئیز کی انٹیلیجنس شیئرنگ پر ہوا ہے۔ ہمیں یہ سمجھنا ہوگا کہ دنیا ہمیں ابھی دہشت گردی کے مسئلے سے الگ کرکے نہیں دیکھنا یا دکھانا چاہتی۔

امریکا افغانستان سے چلا گیا ہے۔ جو بائیڈن کی جتنی ہونی تھی ہوچکی۔ اب طالبان کی ہونی شروع ہوگی اور ہو رہی ہے۔ تنخواہوں کا مسئلہ ہے، لوگوں کو روٹی کھلانی ہے، وہ اب تک جن سے لڑ رہے تھے ان سے ہی سویر شام اپیل کر رہے ہیں کہ ہمیں امداد دو۔ زکوٰۃ، خیرات، صدقات سب چلے گا۔ رہا پاکستان تو ہم دنیا کی چھٹی بڑی فوجی طاقت ہیں لیکن پیسوں سے البتہ ہمارا ہاتھ تنگ رہتا ہے تو افغانستان میں فتح کے بعد ہم امداد کے نام پر بس ہنس کر ہی دکھا سکتے ہیں۔

ہمارا سارا ریجن اوپر نیچے ہو رہا ہے۔ امریکا نے آسٹریلیا کو ایٹمی آبدوز بیچنے کا معاہدہ کرکے فرانس کو ناراض کرلیا ہے۔ یہ اتنی عام بات نہیں ہے۔ امریکی افغانستان کے علاوہ خلیج سے بھی رخصت باندھتے دکھائی دے رہے ہیں۔ امریکی اب اپنے تونائی کے ذرائع پر انحصار کر رہے ہیں۔ سعودی، اماراتی، قطری سب اب تیل بیچنے کے لیے مشرق کی طرف جاپان، چین اور انڈیا کو دیکھ رہے ہیں۔ جن راستوں سے یہ تیل جانا ہے، ان راستوں پر امریکیوں نے ایک اور اتحادی ڈھونڈ لیا ہے۔

یہ ساری تبدیلی اتنی تیزی سے ہو رہی ہے کہ کسی کو کچھ سمجھ نہیں آرہا۔ سعودی وزیرِ خارجہ افغانستان پر بات کرنے دہلی پہنچ جاتے ہیں، متحدہ عرب امارات چین اور امریکا میں توازن رکھنے کی کوشش کر رہا ہے اور ایران ایٹمی معاہدے پر کچھ نرم پڑتا دکھائی دے رہا ہے۔

اس ساری تبدیلی میں ہماری بہت اہمیت ہے۔ ہمارے پاس پیسے نہیں ہیں اس لیے جو پیسوں کا آسرا کرواتا ہے اس کے ساتھ ہم دو قدم چل لیتے ہیں۔ لیکن تیسرے قدم پر ہمیں جھجھک ہوتی ہے تو اگلے تپ جاتے ہیں اور پوچھتے ہیں کہ ہمارے ساتھ ہو یا خلاف؟ اس صورتحال میں کسی دن بھی حوالدار بشیر سر جی سے کہہ سکتا ہے کہ سر جی بس کریں تبدیلی کا اب مزہ نہیں آرہا چکر آ رہے ہیں، پھر سے شروع کرتے ہیں۔

تو بس نوازشریف اسی دن کا انتظار کر رہے ہیں جب انہیں تبدیلی کے ساتھ آزادی سے گھلنے کا موقع دے دیا جائے۔ پھر وہ آجائیں گے۔ یہ دن 2023ء میں بھی آیا تو بھی ان کا کوئی نقصان نہیں۔ حالات ایسے ہیں اور حکومت ایسی ہے کہ سب ہاتھ کھڑے کرسکتے ہیں اور بات نئے الیکشن کی طرف جاسکتی ہے۔ اسی کا اندازہ لگاتے ہوئے نواز شریف اب پارٹی کے لمبے لمبے اجلاس کر رہے ہیں۔
بشکریہ ڈان نیوز

حسن نثار کے قلم سے ……

جس معاشرہ میں ہوش مندوں کا پرسان حال کوئی نہیں، وہاں وزیر اعظم کی اہلیہ کا ذہنی مریضوں کے ہسپتال کے دورہ کی خبر پڑھ کر خوش گوار حیرت ہوئی کہ اس خوب صورت واقعہ کو گزرے چند روز ہی ہوئے ہیں۔

اس دورے کے نتائج کیا نکلے یا نکلیں گے؟ میں کچھ نہیں جانتا لیکن اس موضوع پر چند باتیں ضرور ریکارڈ پر لانا چاہتا ہوں ۔ اس سلسلہ میں سب سے پہلے پنجاب انسٹی ٹیوٹ آف مینٹل ہیلتھ (PIMH) کی بریف ہسٹری حاضر ہے۔

یہ ہسپتال تاج برطانیہ نے 1908 میں متعارف کرایا جس کو اس وقت “LUNATIC ASYLUM”کا نام دیا گیا ۔ اس وقت اس کا کل رقبہ 172 ایکڑ تھا جو بتدریج گھٹتے گھٹتے صرف 52 ایکڑ رہ گیا لیکن خیر ہے کیونکہ پاکستان دو لخت ہونے کےبعد اگر ملک کا رقبہ کئی گنا کم ہوسکتا ہےتو بھلا ’’پاگل خانہ‘‘ کس شمارقطار میں جو آج “PIMH” کہلاتا ہے کیونکہ ہم نام بدلنے کے بادشاہ اور کام کرنے میں پیادے بھی نہیں ہیں۔

کام کے حوالہ سے ہم ’’کام دکھانے‘‘ پر یقین رکھتے ہیں۔ قائد نے کہا تھا ’’کام، کام اور صرف کام‘‘ . . . . . ہم نے سمجھا ’’حرام، حرام اور صرف حرام‘‘۔ نہ عدل نہ احسان نہ صلۂ رحمی۔

ہسپتال میں گنجائش تو 1400 مریضوں کی ہے لیکن اس وقت صرف 1000 مریض زیر علاج ہیں جنہیں ’’زیر عتاب‘‘ کہیں تو بہتر ہوگا کیونکہ حالات صحیح معنوں میں دگرگوں ہیں۔

وارڈز بدبو دار اور خستہ حال ہیں۔

مخصوص تعداد کے مریضوں کو جانوروں کی طرح بند رکھا جاتا ہے اور “DISTURBED” قرار دیتے ہوئے یہ سلوک روا رکھا جاتا ہے۔

شام گئے اور رات بھر کے لئے 100 مریضوں کے لئے صرف ایک وارڈ اٹینڈنٹ موجود ہوتا ہے۔

نفسیاتی نرسنگ کیئر نہ ہونے کے برابر ہے۔

جنرل نرسوں کی تعداد شرمناک حد تک کم ہے اور وہ بھی زیادہ تر اپنے کمروں تک محدود رہنے کو ترجیح دیتی ہیں اور مریضوں کے دوا دارو کے لئے بھی ایک اٹینڈنٹ ہے جو شام اور رات کو 100 مریضوں کی دیکھ بھال کا حق ادا نہیں کرسکتا اور اس کی اہلیت و قابلیت بھی نہ ہونے کے برابر ہے۔ اہم ترین سوال یہ ہے کہ کتنے فیصد مریضوں کو دوا نصیب ہوتی ہے۔

شام اور رات کو صرف اور صرف ایک ڈاکٹر ڈیوٹی پر ہوتا ہے جس نے 1000 مریضوں کی ایمرجنسی ضروریات پوری کرنا ہوتی ہیں جو ممکن ہی نہیں۔

1000 مریضوں کی دیکھ بھال کے لئے صرف 4سوشل ورکرز ہیں جنہیں اپنے رول کے بارے میں بھی پختہ یقین نہیں اور وہ ہسپتال کے انتظامی کنٹرول میں بھی نہیں ہیں اور انہیں دیگر کام بھی سونپ دیئے جاتے ہیں۔

ہسپتال میں داخلہ اور ڈسچارج کے پروسیجرز بھی بہت پیچیدہ اور تکلیف دہ ہیں بلکہ انہیں غیر انسانی کہا جائے تو بہتر ہوگا۔ ڈسچارج کسی اذیت و ذلت سے کم نہیں۔

ہسپتال میں ماہرین نفسیات کی تعداد انتہائی کم اور نامناسب ہے۔

اوسطاً 600 سے 700 مریض آئوٹ ڈور PATIENT ڈیپارٹمنٹ میں دیکھے جاتے ہیں، سوائے اتوار کے جنہیں اوسطاً 8 ڈاکٹرز دیکھتے ہیں یعنی ایک ڈاکٹر 88 مریض دیکھتانہیں، بھگتاتا ہے (OPDمیں) غلط تشخیص اور ٹریٹمنٹ عام ہے۔

نو تعمیر شدہ عمارت میں HOSTILE اور VIOLENTمریضوں کیلئے “SECLUSION ROOMS” جو بہت عمدہ خیال تھا لیکن بری طرح انحطاط کا شکار ہے۔

PHARCOTHERAPYانتہائی غیر تسلی بخش ہے ۔ VIOLENT مریضوں کا حال بہت خراب ہے۔

موجودہ سہولتیں متروک، آؤٹ ڈیٹڈ اور نامناسب ہی نہیں ناکافی بھی ہیں ۔ OCCUPTIONAL THERAPISTS بھی ناکافی ہیں ۔

ڈاکٹرز کی ایک ٹیم دو ہفتوں میں ایک بار لوکل جیل جا کر قیدی ذہنی مریضوں کو EXAMINE اور ٹریت کرتی ہے۔ ہسپتال میں “BOARD OF CERTIFICATION”کی ایک ماہانہ میٹنگ بھی ہوتی ہے تاکہ عدالتوں کی معاونت کرسکے بحوالہ FORENSIC PSYCHIATRY یہ بھی ایسی خامیوں سے بھرپور ہے جن کا نوٹس لینا اشد ضروری ہے۔

یہی حال REHABILITATION FACILITES کا ہےا ور ہیومن ریسورسز کا قحط بھی ہرلیول پر انتہائوں کو چھو رہا ہے۔ تقریباً 280 منظور شدہ میڈیکل افسران کی پوسٹس زیادہ تر خالی ہیں۔ اسی طرح کلینیکل سائیکالوجسٹس کی اسامیوں کابھی یہی حال ہے اور ایئرکنڈیشنرز، بستر دیگر فرنیچر، عمارت کی خستگی، ECT مشینیں، مناسب جگہوں پر CCTV کیمروں، ایمرجنسی کے لئے الارم سسٹم وغیرہ کا بھی اﷲ ہی حافظ ہے۔

مجھے یہ صورت حال ملک کے نامور اور کوالیفائیڈ ترین ماہر نفسیات پروفیسر ڈاکٹر سعد ملک نے خاتون اول کے دورہ سے چند روز پہلے بتائی تھی جسے میں نے لٹکا دیا کہ اس معاشرہ میں تو ہوش مندوں پر کوئی رحم نہیں کھاتا ’’پاگلوں‘‘ کی کون سنے گا لیکن وزیر اعظم کی اہلیہ کے دورہ نے امید دلائی کہ شاید یہ کالم ’’فالو اپ‘‘ کے طور پر کسی کام آسکے اور بشریٰ بی بی بے زبانوں کے بارے میں بہتر طور پر جان سکیں کیونکہ ان کے دورہ پر تو تقریباً ’’سب اچھا‘‘ ہی ہوگا کہ یہی ہماری ’’روشن روایات‘‘ ہیں۔

کاش محترمہ کا یہ دورہ بابرکت ثابت ہو، نتیجہ خیز ہو۔
بشکریہ جیو نیوز