Tag کالم

مطاہر خان کے قلم سے …..

فنون اور صحافت کے شعبوں میں بھی ایک طویل عرصے سے یہ بحث جاری ہے کہ آیا صارفین کو آگہی دی جائے یا پھر وہ جو چیز پسند کرتے ہیں انہیں وہی چیز فراہم کی جائے اور ان کے رجحانات کو مزید مضبوط کردیا جائے۔

آپ سوچیے کہ کس طرح مصالحہ فلموں (یا پاکستانی ڈراموں) کے ہدایت کار اپنے لگے بندھے طرزِ عمل کا جواز پیش کرتے ہیں۔ وہ اکثر یہ دلیل دیتے ہیں کہ عوام میں اسی چیز کی طلب ہے۔ نتیجتاً سب ایک ہی طرح کا مواد پیش کرتے ہیں اور یوں وقت کے ساتھ ساتھ دیکھنے والوں کا ذوق مزید گرجاتا ہے۔ بڑی ٹیکنالوجی کمپنیوں اور ایلگورتھمز کے ساتھ ان کے جنون کی وجہ سے یہ مسئلہ مزید واضح ہوگیا اور معاشرے میں تقسیم کی وجہ بنا۔

کچھ ایسا ہی پاکستان میں مالیاتی خدمات کے ساتھ بھی ہورہا ہے۔ ذرا سوچیے کہ یہاں اکثر لوگوں کے پاس بس ایک کرنٹ یا بچت اکاؤنٹ ہی ہے اور یہ بالکل بنیادی چیز ہے۔ یہاں قرض لینا تو چھوڑیے کریڈٹ کارڈ کا حصول بھی ایک مشکل کام ہے۔ اس کے باوجود کچھ سالوں بعد اسٹیٹ بینک میدان میں آتا ہے اور پہلے سے موجود سادہ اکاؤنٹس کی مزید سادہ صورت متعارف کروا دیتا ہے۔ تاہم اس کی نیت اچھی ہوتی ہے اور اسٹیٹ بینک کا مقصد مالیاتی اداروں کو درست سمت میں چلانا ہوتا ہے۔ لیکن یہ کوشش بینکنگ کے معیار کو مزید نیچے لے جاتی ہے جو چند یادداشتوں اور ستائشی پیغامات پر معاملات نمٹا دیتے ہیں۔

کچھ عرصے تک (اور شاید کسی حد تب اب بھی) اسٹیٹ بینک نے خواتین کو مالیاتی شمولیت کے جال میں لانے کے لیے آسان اکاؤنٹس متعارف کروانے کے منصوبے پر عمل کیا۔ تاہم یہ منصوبہ خاطر خواہ نتائج نہیں دے سکا اور اب اسٹیٹ بینک کی جانب سے ایک سے زیادہ جامع پالیسی اپنائی گئی ہے۔ گزشتہ جمعے کو اسٹیٹ بینک نے Equality Policy: To Reduce the Gender Gap in Financial Inclusion جاری کی ہے۔

اس کا آغاز مسئلے کی سنگینی بیان کرنے سے ہوا ہے۔ فنڈیکس (Findex) کے مطابق 2014ء میں پاکستان میں جو صنفی فرق 12 فیصد تھا وہ 2017ء میں بڑھ کر 28 فیصد ہوگیا۔ یوں ہم جنوبی ایشیا میں سب سے بُری کارکردگی دکھانے والے ممالک میں سے ایک بن گئے ہیں۔ گزشتہ 3 سالوں میں ملک میں 55 لاکھ نئے اکاؤنٹ کھلے ہیں تاہم جون 2020ء تک ملک میں خواتین کے کل اکاؤنٹس کی تعداد صرف ایک کروڑ 86 لاکھ تھی جو بالغ خواتین کی آبادی کا تقریباً 18 فیصد بنتا ہے۔

36 صفحات پر مشتمل اس دستاویز میں مالیاتی خدمات میں خواتین کی شمولیت بڑھانے کے لیے 5 پہلوؤں پر توجہ دینے کی بات کی گئی ہے۔

ان میں سے پہلی چیز مالیاتی اداروں میں صنفی تنوع ہے۔ اس کے مطابق مالیاتی اداروں کو یہ حکم دیا گیا ہے کہ وہ 2024ء تک اپنے اداروں میں خواتین کی نمائندگی 20 فیصد کرنے کے لیے 6 ماہ کے اندر منصوبے تیار کریں۔ اس کے علاوہ وہ ایک سب کمیٹی اور فوکل پرسن کو بھی نامزد کریں جو جائزے کے لیے سہ ماہی بنیادوں پر اسٹیٹ بینک سے ملاقات کرے۔

اس چیز کا اطلاق برانچ لیس بینکنگ پر بھی ہوگا جس میں اس وقت خواتین کی نمائندگی صرف ایک فیصد ہے۔ اسٹیٹ بینک کے منصوبے میں اسے دسمبر 2022ء تک 4 فیصد اور 2024ء کے اختتام تک 10 فیصد پر لانا شامل ہے۔

دوسرا پہلو ایسے اہداف اور خدمات ہیں جن میں خواتین کو مرکزیت حاصل ہو۔ اس میں قرضوں اور بچت کے حوالے سے خصوصی اہداف کی تیاری اور ان خدمات کو صنفی پہلو سے دیکھنے کی بات کی گئی ہے۔

منصوبے کا ایک حصہ خواتین پر مبنی مارکیٹنگ ٹیم تشکیل دینا بھی ہے جو مالیاتی آگہی کے فروغ کے لیے کام کرے اور جس میں انفلوئنسرز اور مذہبی اسکالرز کو بھی شامل کیا جاسکے۔

دستاویز میں احساس پروگرام جیسے دیگر اداروں کے ساتھ شراکت کی بھی بات کی گئی ہے جس میں پروگرام سے فائدہ اٹھانے والوں کو نقد رقم کی فراہمی کے بجائے مزید بہتر ذرائع کی جانب لایا جائے۔ آخر میں اس دستاویز میں قرض کی فراہمی اور اس کے لیے ہونے والے دستاویزی عمل کو آسان بنانے کی بات کی گئی ہے۔

اس دستاویز میں اس بات کو بھی تسلیم کیا گیا ہے کہ خواتین بینک کی برانچوں میں جانے سے کتراتی ہیں۔ اس مسئلے کے حل کے لیے تمام کسٹمر ٹچ پوائنٹس پر ویمن چیمپئنز کی موجودگی کی تجویز دی گئی ہے۔

یہ ویمن چیمپئنز مالیاتی خدمات کی معلومات، غیر مالیاتی مشاورت اور شکایات کے حل کے لیے کام کریں گے۔ فی الحال بینک اپنے موجودہ مرد، خواتین اور مخنث اسٹاف کو صنفی حساسیت کے حوالے سے تربیت دے سکتے ہیں لیکن اگلے 3 سال میں کم از کم 75 فیصد خواتین چیمپئنز کا ہونا ضروری ہوگا اور اس مقصد کے حصول کے لیے وقت بھی مقرر کیا جائے گا۔

ایک اہم بات یہ ہے کہ اب شاید اسٹیٹ بینک کو بھی اس چیز کا احساس ہوگیا ہے کہ صرف باتیں کرنے اور مالیاتی خدمات میں برابری پر سیمینارز کروانے سے مارکیٹنگ کے علاوہ کچھ نہیں ہوتا۔ اس وجہ سے بلآخر مالیاتی اداروں کو کہا گیا ہے کہ وہ ’سہ ماہی بنیادوں پر صنفی تفریق پر اعداد و شمار جمع کریں اور اسے اسٹیٹ بینک میں جمع کروائیں تاکہ وہ بینک اکاؤنٹس، قرضوں کی طلب، ادائیگیوں، زرعی ادائیگیوں، اسلامک فنانس وغیرہ میں خواتین کی شراکت کے حوالے سے مستعد رہیں‘۔

یہ ایک اچھا آغاز ضرور ہے لیکن افسوس کے ساتھ کہنا پڑتا ہے کہ کوئی بھی، یہاں تک کہ بینکنگ لائسنس رکھنے والی ٹیکنالوجی کمپنیاں بھی اس پر عمل درآمد ممکن نہیں بنا سکتیں۔ اور اس کام کے لیے ایک جامع پالیسی کی ضرورت ہے۔

اسٹیٹ بینک کا منصوبہ ہے کہ کم از کم صنفی معیارات متعارف کروائے جائیں۔ ان معیارات کے حصول پر مالیاتی ادارے کو پاکستان بینکرز ایسوسی ایشن کی جانب سے ’ویمن فرینڈلی‘ ہونے کا سرٹیفیکیٹ ملے گا۔ کچھ اور نہ صحیح تو کم ازکم خود کو یہ دیکھنے کے لیے تیار کرلیجیے کہ کس طرح بینک یہ کم از کم معیار حاصل کرکے اخبارات کے اشتہار اور سوشل میڈیا پوسٹوں سے خود کو شاباشی دیتے ہیں۔

ان پہلوؤں میں سے آخری پہلو صنف اور مالیات کے حوالے سے ایک پالیسی فورم کی تشکیل ہے۔ یہ فورم سال میں کم از کم 2 مرتبہ ملاقات کرے گا جس کا مقصد موجودہ فریم ورک کا جائزہ لینا اور اس میں بہتری کے لیے تجاویز دینا ہوگا۔

اسی دوران یہ امید بھی رکھی جارہی ہے کہ سیکیورٹیز اینڈ ایکسچینج کمیشن بھی غیر مالیاتی شعبے کے لیے ایک روڈ میپ متعارف کروائے گا۔ حوصلہ افزا بات یہ ہے کہ اسٹیٹ بینک اپنے لیے بھی یہی معیار لاگو کرنے کا منصوبہ رکھتا ہے۔ اس دستاویز میں ادارے کے اندر خواتین کی خدمات حاصل کرنے، انہیں برقرار رکھنے اور انہیں ترقی دینے کا ذکر کیا گیا ہے۔

ظاہر ہے کہ پاکستان میں موجود کسی سروس گیپ کے حوالے سے یہ کوئی پہلی پالیسی نہیں ہے۔ حقیقت تو یہ ہے کہ مک کینسی (McKinsey) اور دیگر ترقیاتی ادارے ہر سال ایک کے بعد دوسرے مسئلے پر جامع دستاویزات جاری کرتے رہتے ہیں لیکن زمینی حالات میں کچھ زیادہ تبدیلی نہیں آتی۔ ہم امید ہی کرسکتے ہیں کہ اس پالیسی کا انجام بھی اسی طرح نہ ہو۔
بشکریہ ڈان نیوز

امجداسلام امجد کے قلم سے….

ایک رستے پہ ہوں‘ سب یہ پیر و جواں

عزم ہوں بے لچک حوصلے ہوں جواں

ہم تیرے ہم قدم‘ ہم تیرے ہم زُباں
اے زمینِ وطن‘ مادرِ مہرباں

6 ستمبر کی شام یوم شہداء اور یوم دفاع کی خصوصی تقریب میں جب پروگرام کے آغاز میں میرے لکھے ہوئے قومی گیت مادر مہربان کی پیشکش کا اعلان کیا گیا تو میرا ذہن یک دم نومبر 2020کی اس شام کی طرف چلا گیا جب آئی ایس پی آر کی ٹیم اس قومی گیت کا آئیڈیا لے کر پہلی مرتبہ میرے گھر تشریف لائی تھی۔ یہ آئیڈیا بیک وقت اتنا نیا اور تجرباتی تھا کہ مجھے اس کی نوعیت اور اس کی فارم کو سمجھنے کے لیے آیندہ دو ماہ میں ان سے مزید کئی ملاقاتیں کرنا پڑیں۔

کسی قومی گیت میں وعدے اور ورثے کے حوالے سے پرانی اور نئی نسل کو یکجا کرنا اور انھیں ایک ہی زنجیر کی کڑیوں کی شکل میں پیش کرنے تک تو بات آسان تھی مگر یہ پابندی کہ سینئر اور جونیئر گلوکاروں میں براہ راست خونی رشتہ بھی ہو کہ باپ یا ماں کے ساتھ ان کا سگا بیٹا یا بیٹی مل کر اپنے حصے کے بند کو گائیں اور اس کے ساتھ ساتھ شاعری کے حوالے سے اس کی بحر، ردیف، قافیہ اور مصرعوں کی ترتیب اس کی کمپوزیشن اور بانٹ میں بھی برابری رہے اور یہ کہ ہر بند میں سینئر نسل وعدے اور جونیئر نسل ورثے کی حفاظت کا اعلان کرے۔

ایک پیچیدہ معاملہ تھا۔ خیر اللہ کا نام لے کر اس تھیم کو پیش نظر رکھتے ہوئے میں نے تین چار ابتدائی لائنیں جنھیں موسیقی کی زبان میں استائی کہا جاتا ہے ترتیب دیں جن میں ہم تیرے ہم قدم ہم تیرے ہم زباں… اے زمین وطن مادر مہربان کو زیادہ پسند کیا گیا۔

اسی اثنا میں پاکستان کے تمام بڑے اور نامور گلوکاروں سے آئی ایس پی آر کے ماہرین کا رابطہ جاری رہا جب کہ دوسری طرف میں اور کمپوزر ساحر علی بگا اس کی کمپوزیشن کے حوالے سے مختلف طرح کے تجربات میں مصروف رہے۔

میرا مشورہ تھا کہ اس گیت کی تھیم، اس کا مزاج اور اس کی مخصوص پابندیاں اس بات کی متقاضی ہیں کہ اس میں نفس مضمون اور میلوڈی کو زیادہ اہمیت دی جائے۔ پوری ٹیم نے میری اس بات سے اصولی طور پر اتفاق کر لیا۔

اس گیت کے تین بند ہیں جنھیں بالترتیب شفقت امانت علی، ان کے بیٹے سادات، سجاد علی اور ان کی بیٹی ضو علی۔ عابدہ پروین اور ان کے صاحبزادے سارنگ لطیف نے گایا ہے۔ فارم کے لحاظ سے میرے لیے ایک نیا تجربہ تھا کہ جس لائن پر سینئر گلوکار ختم کرے اس کے جونیئر کی اگلی دونوں لائنیں بات کو اس طرح سے آگے بڑھائیں کہ ان میں قافیے کو برقرار رکھا جائے کہ یوں نہ صرف ان کی نغمگی میں اضافہ ہوگا بلکہ اس سے اگلی چاروں لائنوں کے ردھم اور موسیقیت میں بھی اضافہ ہوگااور ایسا ہی ہوا اور یوں وعدے کے تسلسل کو، ورثے کی شکل میں آگے بڑھانے کا آئیڈیا نومبر 2020 میں ایک پودے کی شکل میں سامنے آیا تھا اور وہ دس ماہ کے اندر ایک تناور اور سایہ دار درخت کے روپ میں ڈھل گیا۔

اور یوں ہم قوم کے سامنے ایک ایسے گیت کو پیش کر پائے جس میں ہماری تاریخ، قومی امنگیں، نئی اور پرانی نسل کی ہم آہنگی اور وہ خوبصورت مستقبل یک جان ہو گئے جس کی خاطر ہمارے لوگوں نے وردی میں اور وردی کے بغیر بھی بے شمار قربانیاں دی ہیں اور مجھے بہت خوشی ہے کہ آئی ایس پی آر کی اس خوبصورت اور بامعنی پیش کش میں مجھے بھی اپنی بساط بھر حصہ ڈالنے کا موقع ملا ہے. یقینا ڈی جی آئی ایس پی آر، ان کی ٹیم اور وہ سب لوگ بھی مبارکباد کے مستحق ہیں جنھوں نے کسی بھی شکل میں اس کی تکمیل میں ہاتھ بٹایا ہے۔ آج ہم سب بھی ایک کورس کی شکل میں ان گلوکاروں کی آواز میں آواز ملا کر یہی کہنا چاہتے ہیں کہ

ہم تیرے ہم قدم ، ہم تیرے ہم زباں

اے زمین وطن، مادر مہربان

بشکریہ:.ایکسپریس نیوز

مناظرعلی کے قلم سے:.

ہر شخص چاہتاہے کہ اس کی جیب پیسوں‌سے بھری رہے،کوئی شخص تو اس کے لیے خواب ہی دیکھتا رہتاہے تو کوئی میدان عمل میں‌بھی باقاعدہ اترتاہے،اگرآپ چاہتے ہیں‌ کہ آپ کے معاشی حالات بہترہوجائیں توپھریہ کوئی مشکل کام نہیں جوکرناآپ کے لیے کسی پہاڑ کو کھودنے کے مترادف ہو،توآئیے چلتے ہیں ان باتوں‌کی جانب جن کی وجہ سے بہت سے لوگ معاشی طورپرمضبوط ہوئے ہیں.
یہ غالبادوہزاردس کی ایک دوپہر تھی، دو بجے کاوقت تھاجب میں‌لاہور کے مشہوربزنس مین کے دفتر میں چاہے پی رہاتھا،ایک شخص آتاہے اور کہتاہے کہ کیاآپ نے مجھے پہچانا تومیرے سامنے بیٹھابزنس مین اپنی عینک کو ناک پر فٹ کرتے ہوئے اس کی طرف دھیان سے دیکھتاہے تو کہتاہے کہ ہاں….بشیر(فرضی نام) کیوں نہیں‌ تمہاری فلاں‌ جگہ پر دکان ہوا کرتی تھی اور تم اچھے بھلے کاروباری آدمی تھے،آج کل کیا کررہے ہو،تو وہ شخص آبدیدہ ہوگیا اور اپنی بیساکھی کو اوپر کرتے ہوئے بولا کہ میری ایک ٹانگ کام نہیں‌کرتی اور اب بہت مشکل میں ہوں،کاروبار نہیں رہا،بیٹی کی شادی ہے اور بہت پریشان ہوں،آپ تو جانتے ہیں‌کہ میں بھیک مانگنے والا نہیں،آپ میرے لیے کیا کرسکتے ہیں؟…تو میرے سامنے بیٹھے بزنس مین نے اپنے کوٹ کی دونوں‌جیبوں‌میں‌ہاتھ ڈالا،ہزار ہزار کےکافی نوٹ گنے بغیرہی اسے تھما دئیے،یہ دیکھ کر میں‌ذرا حیران ہوامگر خاموش رہا اور وہ شخص رقم لے کر خاموشی سے چلاگیا،ابھی میری چائے ختم نہیں‌ہوئی تھی کہ ایک ادھیڑ عمر شخص کمرے میں داخل ہوا،اس نے کان میں‌ کوئی سرگوشی کی تو اس نے کوٹ‌کی اندر والی جیب سے اسی طرح کچھ رقم نکال کر اسے تھما دی وہ بھی چلاگیا،اسی طرح چند افراد مزید آئے اور اپنی قسمت کی رقم لے کر واپس چلے گئے.
میری چائے ختم ہوگئی تو وہ میری طرف باقاعدہ متوجہ ہوا اور حال چال پوچھنے کے بعد دریافت کیا کہ میرے لیے کوئی بھی کام ہو تو بتائیں لیکن مجھے چونکہ ان کی سٹوری جاننا تھی اس کے علاوہ کچھ کام نہیں تھا لہذا یہ کہاکہ آپ کی کامیابی کا راز کیاہے؟حالانکہ میں‌کافی حدتک جان چکاتھا،پھر بھی انہوں‌نے ایک طویل کہانی سناناشروع کردی جس میں‌ سے کچھ حصہ یہاں پیش کرتاہوں.
انہوں‌ نے کہاکہ جب میں‌نے کچھ کرنے کاسوچا تو میرے پاس دو آپشنز تھیں،ایک کہ میں‌کوئی نوکری کرلوں اور سکون سےہرمہینے کی پہلی تاریخ کو ایک مقررہ رقم اپنی جیب میں ڈالتارہوں اور دوسری یہ کہ میں‌کوئی چھوٹا موٹا کام شروع کروں‌ چاہے وہ سو روپے سے ہی کیوں‌ نہ ہواور پھر اس پر محنت کرکے مستقبل میں‌نوکری کرنے کی بجائے لوگوں کو نوکری دوں اور لوگوں کے کام آسکوں لہذا میں‌نے نوکری کرنے کافیصلہ نہ کیا اور ایک چھوٹا سا کام شروع کیاجو بالکل معمولی رقم سے شروع ہوگیا،میرے پاس روزانہ جتنے پیسے بچتے تھے،ان میں‌ سے اپنی ضرورت کے رکھ کر میں‌ فٹ پاتھ پرسونے والے مزدوروں کو کھانا کھلا دیتاتھا،یہ سلسلہ کافی سال چلتارہااور پھرمجھے پتہ ہی نہیں‌چلا کہ میرا کاروبار روزانہ کی بنیاد پر ترقی کرتاگیا،میں روٹین کا کام کرتا اور کام بڑھتاگیا،پھریہ سلسلہ رکا نہیں،کام آگے بڑھتاگیامگر جو میری عادت پہلے دن تھی،وہ آج بھی ہے کہ ضرورت کے پیسے رکھ کر باقی ضرورت مندوں‌ کی مدد کرتاہوں،میں تب بھی مطمئن تھااورآج بھی مطمئن ہوں،میری تب کی ضروریات بھی میرے کام کی بچت سے ہی پوری ہوجایا کرتی تھیں اورآج ضرورتیں‌ بڑی ہیں تو آمدن بھی اتنی ہی ہے اوروہ اب بھی پوری ہورہی ہیں.انہوں‌نے کہاکہ زندگی میں‌دو ہی کام کیے ہیں‌ کہ ایک تو نوکری کی بجائے کاروبار کوترجیح دی اور دوسراخود پر دوسروں‌کو ترجیح‌دی،ضرورت مند کو خالی ہاتھ کبھی نہیں‌جانے دیا،لوگوں‌کی مدد کرنااور انہیں‌کھانا کھلانا مجھے بہت پسند ہےاور یہ میرا کمال نہیں،یہ اس ذات کا فضل ہے جس نے مجھے پیسہ دیااور پھر مجھے اس پیسے کو لوگوں پر خرچ کرنے کی بھی توفیق دی.
شام ہوچکی تھی اوران کی سٹوری ابھی چل رہی تھی لیکن میں‌ان کی کامیابی کا راز جان چکاتھا،اگرآپ بھی کامیابی کا راز جان چکے ہیں تو اس کامیاب بزنس مین کی طرح کچھ ایسا کریں‌ کہ زندگی میں انقلاب آجائے مگر اس کے لیے یہ ضروری ہےکہ آپ کوئی بھی کام کرتے وقت عارمحسوس نہ کریں،محنت کریں مگر توکل اللہ تعالیٰ پر رکھیں،اللہ تعالیٰ‌محنت کبھی رائیگاں‌ نہیں‌کرتا.

بلاگرکاتعارف:
مناظرعلی کاتعلق پاکستان کے ایک بڑے میڈیاہاوس سے ہےاور مختلف بڑی ویب سائٹس پرسماجی مسائل پر اکثر لکھتے رہتے ہیں،لوگوں‌کی ہمت بڑھاناانہیں‌پسند ہے،معاشرے کی بہتری کیلئے کوشاں‌رہتے ہیں‌اور ان کاماننا ہے کہ ہرشخص اگر اپنا اپنا کردار اداکرےتومعاشرہ بہترہوسکتاہے..مناظرعلی سے اس فیس بک پررابطہ کیاجاسکتاہے.
https://www.facebook.com/munazer.ali

بشکریہ،ڈیلی پاکستان

(ایمرا نیوز آن لائن)
(بشکریہ جنگ لاہور)
بات تو یہاں سے بھی شروع کی جا سکتی ہے ’’کھایا پیا کچھ نہیں، گلاس توڑا،12آنے‘‘۔
یہ ان دنوں کی بات ہے جب روپیہ 16آنے کا تھا لیکن میں گہرے اندوہ میں ہوں۔ میری ماں میری ریاست پر قریباً چھ ارب ڈالر کا جرمانہ عائد ہو چکا ہے۔ اِن دنوں، جب ہم ایک ایک ڈالر جوڑ رہے ہیں کہ دنیا کا قرضہ اتار سکیں، غلط اقدامات حکمران طبقے کے لیکن زرِ تلافی ایک ایک پاکستانی کو دینا پڑے گا۔

عجیب ہیں میرے وہ ہم وطن جو اس جرمانے پر بھی بغلیں بجارہے ہیں حالانکہ 6ارب ڈالر میں سے کچھ ان کو بھی دینا ہے۔ ریکوڈک جو سونے کی کان ہے، جس میں ہمارے تمام مصائب کا مداوا ہے۔ جہاں بین الاقوامی کمپنی نے پورے دس سال کی کھدائی اور عرق ریزی کے بعد یہ نوید دی کہ یہاں 5.9ارب ٹن(کچ دھات) Oreموجود ہے۔ جس میں 41فیصد تانبا ہے اور اس میں 41ملین اونس سونے کے ذخائر بھی ہیں۔ جہاں بہت اعلیٰ قسم کا یورینیم بھی ہے۔

میں تو ریکوڈک کے بارے میں برسوں سے لکھ رہا ہوں۔ بلوچستان اس خطّے کا خوشحال مستقبل ہے۔ ہمیں یہاں رہنے والوں کو حقوق دینا چاہئیں، اُنہیں ایسی تعلیم اور تربیت دیں تاکہ وہ اپنے صدیوں سے انتظار کرتے پہاڑوں سے ہم کلام ہوں۔ ہتھیار لے کر پہاڑوں پر نہ چڑھیں بلکہ اوزار لے کر، معلومات لے کر اِن پہاڑوں کے سینے چیریں۔ ان میں اللہ تعالیٰ نے ہمارے لئے جو خزانے رکھے ہوئے ہیں انہیں نکالیں۔

ریکوڈک کی پہاڑیوں میں کسی زمانے میں یہاں لاوا پھوٹتا تھا اب یہ خاموش آتش فشاں اس ریاست کو سونا، تانبا اور بہت کچھ دے کر مالا مال کرنا چاہتا ہے۔ ٹی تھیان کمپنی نے 2001سے 2010کے طویل عرصے میں تلاش کے مراحل طے کیے تھے۔ وہ مطلوبہ دھاتیں نکالنے کا کام شروع کرنا چاہتی تھی۔ فروری 2011میں اس نے ریکوڈک کی لیز کے لئے درخواست دی۔ نومبر 2011میں بلوچستان حکومت نے اجازت دینے سے انکار کردیا۔ ٹی تھیان نے عالمی ادارے میں پاکستان کے خلاف درخواست دائر کردی۔

ہماری عدالت عظمیٰ نے 7جنوری 2013کو کمپنی ٹی تھیان کے ساتھ معاہدے کو کالعدم قرار دے دیا۔ کسی نے نہ سوچا کہ اس کے کتنے بھیانک نتائج نکل سکتے ہیں۔ ٹی تھیان کوئی غریب مظلوم پاکستانی نہیں ہے جس کی داد فریاد کہیں نہیں سنی جاتی۔ عالمی بینک کے ٹریبونل نے پاکستان کے خلاف فیصلہ دیا۔ ریاست پاکستان کو قصور وار قرار دیا۔ یہ بات ہے 21مارچ 2017کی۔ لیکن 18جولائی 2017کو بلوچستان کی عظیم حکومت نے 11.5ارب ڈالر کے جرمانے کو مسترد کردیا۔ پاکستان نے ملکی غیر ملکی وکیلوں پر اربوں روپے خرچ کیے لیکن کسی فورم پر وہ متعلقہ اتھارٹی کو مطمئن نہیں کرسکے۔

وقت گزرتا رہا، قوم نے ریکوڈک کو اپنا مسئلہ نہیں سمجھا، یہاں سے خوشیاں مل سکتی تھیں۔ ہمارے مسئلے حل ہو سکتے تھے۔ ہمارے سر پر جرمانے کی تلوار لٹک رہی تھی لیکن کسی اخبار نے خاص اشاعت پیش کی نہ کسی چینل نے کوئی ٹاک شو کیا۔ بلوچستان میں پی پی پی کی حکومت تھی جب ٹی تھیان سے تنازع شروع کیا گیا۔ ان سے پہلے وزیراعلیٰ بلوچستان جام یوسف کو تو ٹی تھیان والے چلی بھی لے گئے تھے اور تانبے سونے کی کان کنی کے عملی مظاہر بھی دکھائے تھے۔ جناب اسلم رئیسانی نے ٹی تھیان کی درخواست کیوں مسترد کی۔ کیا اس میں انہوں نے صدر آصف زرداری، وزیر اعظم گیلانی سے مشورہ کیا تھا۔ اس میں ٹیکنیکل اسباب تھے یا مالی معاملات ؟ کسی نے جائزہ نہیں لیا۔ اس کے بعد پاکستان مسلم لیگ (ن)کی حکومت آگئی۔ انہوں نے بھی اس مسئلے کی سنگینی کا احساس نہیں کیا اور نہ یہ اہمیت دی کہ ٹی تھیان کمپنی سے ماورائے عدالت کچھ طے کرکے اس سونے کی کان سے سونا نکالنا شروع کیا جائے۔

سونے تانبے کے ذخائر اسی طرح انسانی ہاتھوں کے لمس کو ترس رہے ہیں۔ میری اور آپ کی ریاست پر ہزاروں ارب روپے کے قرضے چڑھے ہوئے ہیں۔ ایک کان جہاں سے کچھ بہت مدد مل سکتی تھی۔ اس کا منہ بند کردیا گیا اور بین الاقوامی قوانین اور اداروں کو بھی اپنے تابع خیال کیا گیا۔ عالمی بینک کے ادارے(ICSID) سرمایہ کاری کے تنازعات کا تصفیہ کرنے والے بین الاقوامی مرکز نے بالآخر ٹی تھیان کے حق میں فیصلہ دے دیا۔ اس میں 4.08ارب ڈالر جرمانہ ہے اور 1.87ارب ڈالر سود ہے۔ اس کے خلاف اپیل کی کوئی گنجائش ہے یا نہیں اس بارے میں زیادہ تر نفی میں امکانات ہیں۔ اب ریاست پاکستان یہ جرمانہ کیسے ادا کرے گی؟۔

ہماری پارلیمنٹ کو جائزہ لینا چاہئے کہ ٹی تھیان کمپنی نے جو معاہدہ کیا تھا۔ جس میں 100میں سے 48ٹی تھیان کے اور 52حصّے پاکستان کے تھے۔ بلوچستان کے لئے الگ سے فیصد25 تھا۔ ٹی تھیان نے چاغی ایئرپورٹ بھی تعمیر کیا۔ کارکنوں کے لئے رہائشی سہولت اور انہوں نے ریکوڈک 2کی نشاندہی بھی کردی تھی۔ اس کام کے لئے بینکوں کے کنسورشیم سے 6بلین ڈالر کا اہتمام بھی کر لیا تھا۔ پروگرام یہ تھا کہ روزانہ 110000ٹن کچ دھات نکلتی۔ جسے 680کلومیٹر پائپ لائن کے ذریعے گوادر بندرگاہ پر منتظر بحری جہاز میں لادا جاتا اور پھر کسی ریفائنری میں چھان کر سونا اور تانبا الگ کیا جاتا۔ پائپ لائن کی تعمیر سے یہ سارا علاقہ بھی آباد ہو جاتا۔ اندازہ یہ تھا کہ ہر سال دو لاکھ ٹن تانبا اور اڑھائی لاکھ اونس سونا برآمد ہوتا۔ یہ سلسلہ سالہا سال تک جاری رہتا۔

کتنے دُکھ کی بات ہے کہ قدرت نے ہمیں وسائل بخشے ہوئے ہیں لیکن ہم کفران نعمت کے مرتکب ہورہے ہیں۔ ہر کوئی عقل کُل بنا ہوا ہے۔ ریاست کے مفادات کو تباہ و برباد کررہا ہے۔ روزانہ بے مقصد بحثیں ہوتی ہیں۔ یہ جذبہ پیدا کرنے کی تحریک کوئی نہیں دیتا کہ ہم اپنے زرعی شعبے کو طاقتور بنائیں، اپنی معدنیات کو دریافت کریں، ریگ زار گیس، تیل لئے ہمارا انتظار کر رہے ہیں۔ پہاڑوں میں قیمتی دھاتیں بھی ہیں، گرانقدر پتھر بھی۔ کتنے ہی ریکوڈک ہمارا مستقبل مستحکم کرنے کے لئے بے تاب ہیں ان کا راستہ روکنے والوں کو عبرت ناک مثال بنانا ضروری ہے۔

(ایمرا نیوز آن لائن)
(بشکریہ جنگ لاہور)
یہ ایک ایسے صحافی کی کہانی ہے جسے گولی مار کر ختم کر دیا گیا لیکن اُس کی کہانی آج تک تمام نہیں ہو سکی۔ اس صحافی کو ماڈرن میڈیا اور ماس کمیونی کیشن کے کئی ماہرین اور اُستاد محض ایک قصہِ ماضی سمجھتے ہیں اور اُس کے اندازِ صحافت کو آئوٹ آف فیشن سمجھتے ہیں۔ کوئی مانے یا نہ مانے لیکن ماڈرن میڈیا کے بہت بڑے بڑے نام چند سال کے بعد کسی کو یاد بھی نہ رہیں گے لیکن اس آئوٹ آف فیشن صحافی کا نام آنے والے دور میں بھی زندہ رہے گا کیونکہ یہ صحافی بار بار جنم لیتا رہے گا اور نئے نئے ناموں سے اپنا پرانا کردار دہراتا رہے گا۔ اسے ہر دور میں باغی، سرکش اور وطن دشمن قرار دے کر سچ بولنے سے باز رکھنے کی کوشش کی جائے گی لیکن یہ باز نہیں آئے گا۔ اسے پہلے بھی اپنے انجام کا پتا تھا اُسے آئندہ بھی اپنے انجام کا پتا ہے۔ اُسے ہمیشہ سے پتا ہے کہ اُسے گولی مار دی جائے گی لیکن وہ اپنی موت میں قوم کی حیات دیکھتا ہے اور بار بار گولی کھانے کے لئے تیار رہے گا۔

غور طلب بات یہ ہے کہ اگر ارباب طاقت اس سرکش صحافی کو غدار اور وطن دشمن سمجھتے تھے تو اس پر کسی عدالت میں مقدمہ کیوں نہ چلایا گیا؟ گولی کیوں مار دی گئی؟ مقدمہ چلانا ایک مشکل کام ہے۔ اکثر ایسا ہوتا ہے کہ ارباب طاقت اپنی مرضی کی عدالتیں بنا کر وہاں اپنی مرضی کے جج بٹھا دیتے ہیں لیکن ان مرضی کے ججوں کو بھی کچھ نہ کچھ ثبوت اور شہادتوں کی ضرورت ہوتی ہے تاکہ وہ ارباب طاقت کی مرضی کا فیصلہ صادر کر سکیں کیونکہ یہ فیصلے تاریخ کا حصہ بن کر عدلیہ کے کردار پر ایک داغ کی طرح ثبت ہو جاتے ہیں لہٰذا مقدمہ چلانے کے بجائے سرکشوں کو گولی مارنا یا اُن کی گردن اُڑا دینا ایک آسان راستہ ہے تاکہ کسی جج کے لئے مشکل پیدا نہ ہو کیونکہ ہم نے دیکھا ہے کہ ناانصافی کرنے والے کئی ججوں کو بعد میں ڈرائونے خواب آتے ہیں اور یہ جج پوری قوم کے لئے ڈرائونا خواب بن جاتے ہیں۔ ہم جس سرکش صحافی کا ذکر کر رہے ہیں اسے کسی عدالت میں پیش نہ کیا گیا بلکہ اُن کے دفتر سے اُٹھا کر انہیں گولی مار دی گئی۔ تاریخ کا کمال دیکھئے۔ اس صحافی کو آج غدار کی حیثیت سے نہیں بلکہ برصغیر پاک و ہند کا پہلا شہید صحافت قرار دیا جاتا ہے۔ اس شہید صحافت کا نام مولوی محمد باقر جو 1857کے زمانہ غدر میں ’’دہلی اُردو اخبار‘‘ کے ایڈیٹر تھے۔ مولوی محمد باقر نے دہلی کے اس پہلے اُردو اخبار کا اجراء 1837میں کیا تھا۔ ہندوستان میں اُردو کا پہلا اخبار ’’جام جہاں نما‘‘ کے نام سے کلکتہ میں شروع ہوا۔ یہ اخبار ایسٹ انڈیا کمپنی کی گود میں پروان چڑھا لیکن مولوی محمد باقر ایسٹ انڈیا کمپنی کے ناقدین میں شمار ہوتے تھے۔ وہ یہ اخبار اپنے بیٹے مولانا محمد حسین آزاد کی مدد سے شائع کرتے جو سیاسی حالات پر شاعرانہ تبصرے کیا کرتے۔ 10مئی 1857ء کو میرٹھ کی فوجی چھائونی میں ہندو اور مسلمان سپاہیوں نے انگریزوں کے خلاف بغاوت کی تو دہلی کے تخت پر آخری مغل بادشاہ بہادر شاہ ظفر براجمان تھے۔ بہادر شاہ ظفر کا اقتدار صرف اُن کے شاہی محل تک محدود تھا۔ کسی زمانے میں مولوی محمد باقر کو اپنے دوست شاعر شیخ محمد ابراہیم ذوق کی وساطت سے بہادر شاہ ظفر کے دربار تک رسائی حاصل تھی کیونکہ ذوق کا شمار بادشاہ کے اُستادوں میں ہوتا تھا۔ ذوق کی وفات کے بعد مرزا غالب شاہی دربار سے وابستہ ہو گئے۔ ذوق اور غالب کی معاصرانہ چشمک کسی سے ڈھکی چھپی نہ تھی۔ ایک دفعہ ذوق کی سواری غالب کے محلے سے گزری تو غالب نے پھبتی کسی
بنا ہے شاہ کا مصاحب پھرے ہے اِتراتا
کچھ دن بعد ذوق نے غالب کو شاہی مشاعرے میں مدعو کر لیا۔ غالب مشاعرے میں آئے تو ذوق نے بادشاہ کی موجودگی میں فرمائش کی کہ وہ آپ نے مجھ پر ایک فقرہ کسا تھا ذرا اُس کا دوسرا مصرعہ تو پڑھ دیں۔ غالب نے یہ شعر کچھ یوں سنایا؎
بنا ہے شاہ کا مصاحب پھرے ہے اِتراتا
وگرنہ شہر میں غالب کی آبرو کیا ہے
غالب نے اس شعر کی مدد سے مشاعرہ لوٹ لیا اور بادشاہ کے منظور نظر بن گئے لیکن مولوی محمد باقر اپنے اخبار میں غالب کی اکثر خبر لیتے رہتے تھے جس کی وجہ سے اُن کا اخبار اینٹی اسٹیبلشمنٹ سمجھا جاتا تھا۔ جب 1857ء کی بغاوت ہوئی تو ہر طرف افراتفری پھیل گئی۔ باغی سپاہیوں کو قیادت کی ضرورت تھی۔ انہیں کسی مرکز کی تلاش تھی تاکہ وہ اپنی بغاوت کو منظم کر کے ہندوستان سے ایسٹ انڈیا کمپنی کی حکومت کو ختم کر سکیں۔ باغی سپاہیوں نے دہلی میں جمع ہونا شروع کر دیا اور بہادر شاہ ظفر پر زور دیا کہ ظِل سُبحانی صرف مشاعروں کی صدارت نہ کیا کریں بلکہ باغیوں کی قیادت بھی قبول فرمائیں۔ بہادر شاہ ظفر پس و پیش سے کام لیتا رہا۔ اس دوران مولوی محمد باقر کو بھی یہ احساس ہو گیا کہ بہادر شاہ ظفر کو ہندوستان کے اصلی حکمران کے طور پر اُجاگر کرنا بہت ضروری ہے۔ یہ وہ موقع تھا جب انہوں نے فیصلہ کیا کہ ایک صحافی کی حیثیت سے حق اور باطل کی لڑائی میں نیوٹرل رہنا بزدلی اور بددیانتی ہے۔ لاہور سے شائع ہونے والے اُردو کے ایک اخبار ’’کوہِ نور‘‘ نے باغیوں کو مفسدین اور انگریزی فوج کو ’’دلیران انگریزی‘‘ لکھنا شروع کر دیا۔ ’’کوہ نور‘‘ کے ایڈیٹر منشی ہر سُکھ رائے کو ایسٹ انڈیا کمپنی سے مالی معاونت ملتی تھی اور ان صاحب کا قلم غیر ملکی سامراج کا گماشتہ بن چکا تھا۔ مولوی محمد باقر نے باغیوں کو مفسدین کے بجائے مجاہدین لکھنا شروع کر دیا اور اپنے اخبار کا نام بدل کر ’’اخبار الظفر‘‘ رکھ دیا۔ دہلی کالج کے پرنسپل فرانسس ٹیلر نے انہیں بہت سمجھایا کہ مصلحت سے کام لو کیونکہ بہادر شاہ ظفر کی کمزور حکومت چند دنوں کی مہمان ہے لیکن مولوی محمد باقر نے جان کی بازی لگانے کا فیصلہ کر لیا۔ دہلی کے نیشنل آرکائیوز میں مولوی محمد باقر کے مئی تا ستمبر 1857ء تک کے اداریے محفوظ ہیں جن کے مطالعے سے پتا چلتا ہے کہ مولوی محمد باقر اپنا اخبار تحریک آزادی کے لیے وقف کر چکے تھے لیکن اُنہوں نے افواہوں اور سنی سنائی باتوں کو اپنے اخبار میں جگہ نہیں دی بلکہ وہ اس خطے کے پہلے صحافی تھے جس نے ’’فیک نیوز‘‘ کو بے نقاب کیا۔ جب بغاوت عروج پر پہنچی تو انگریزوں نے ہندو مسلم اتحاد توڑنے کے لیے دہلی کے در و دیوار پر یہ پوسٹر چپکانا شروع کر دیئے کہ مسلمانوں کا اصل دشمن انگریز نہیں بلکہ ہندو ہے کیونکہ انگریز اہلِ کتاب ہے۔ مولوی محمد باقر نے ان پوسٹروں کے پیچھے چھپی سازش کو بے نقاب کیا۔ دہلی میں ایسے لوگوں کی کمی نہ تھی جو منشی ہر سُکھ رائے کی طرح انگریزوں سے ملے ہوئے تھے لہٰذا ان غداروں نے مجاہدین میں اختلافات پیدا کر دیئے اور انگریز شہر میں گھس آئے۔ 14ستمبر 1857ء کو مولوی محمد باقر کو اُن کے اخبار کے دفتر سے گرفتار کر لیا گیا جبکہ محمد حسین آزاد فرار ہونے میں کامیاب ہو گئے۔
16ستمبر 1857ء کو انہیں فرانسس ٹیلر کے قتل کے الزام میں میجر ولیم ہڈسن کے حکم پر گولی مار دی گئی حالانکہ مولوی محمد باقر نے ٹیلر کے قتل کا واقعہ اپنے اخبار میں خود ایک عینی شاہد کے طور پر شائع کیا تھا۔ میجر ولیم ہڈسن نے مولوی محمد باقر کا جسمانی وجود ختم کر دیا لیکن اُن کی کہانی ختم نہ کر سکا۔ مولوی محمد باقر کو مختلف ادوار میں کئی میجر ولیم ہڈسن بار بار گولی مار چکے ہیں لیکن وہ بار بار زندہ ہو جاتا ہے۔ بار بار کوئی نہ کوئی منشی ہر سُکھ رائے ’’دلیران انگریزی‘‘ کا گماشتہ بن کر مولوی محمد باقر کو غدار قرار دیتا ہے لیکن تاریخ میں مولوی محمد باقر کا نام برصغیر پاک و ہند کے پہلے شہید ِصحافت کے طور پر ہمیشہ زندہ رہے گا۔

افضل سیال
ضرب افضل
نیازی آمریت
بائیس سال جمہوریت ، میرٹ ، قانون کی بالادستی کا راگ الاپنے والے نیازی نے ضیاء مشرف کی آمریت کو بھی مات دے دی ہے !
پاکستان میں چالیس سالہ آمریت کے گناہ تاریخ میں فوجی جرنیلوں کے نام سے منسوب ہیں لیکن نیازی آمریت کے گناہ ہیں (یہ بھی جرنیلوں) کے لیکن جائیں گے ایک سویلین حکمران عمران خان کے کھاتے جو جمہوریت کے لیے ظاہر قاتل ہے !
عمران نیازی ہر وہ کام کر رہا ہے جسکو وہ اپوزیشن میں ہوتے ہوئے غلط کہتا تھا اور عوام کو تبدیلی کا لولی پاپ بیچتا تھا !

رانا ثنااللہ اغوا کے بعد احتساب کا جنازہ انتقام نے اپنے کندھوں پر اٹھا لیا ہے جو ہر باشعور آنکھ کو نظر آرہا ہے

آمریت کا منشور تو پرانا ہے نیازی آمریت نے اسکو صرف آگے بڑھایا ہے !
جو سر اٹھا کر چلے اسکا سر اڑا دو !
جو زبان سچ بولے اسکی زبان کھینچ لو!
جو نہ جھکے اسکی کمر توڑ دو !
جو سچ لکھے اسکا قلم توڑ دو !
جو مخالف سمت چلے اسکے پاؤں توڑ دو !
جو اختیار مانگے اسکو جیل میں پھینک دو !
جو آنکھوں سے دیکھنے لگے اسکی آنکھیں نوچ لو !
جو ڈٹ جائے اسکو گولیوں سے بھون دو !
جو ڈیل نہ کرے اسکو پھانسی پر چڑھا دو !
جو قانون کی حکمرانی مانگے اسکو غدار بنا دو !

مختصر یہ کہ ابھی تو اپوزیشن نے صرف طبل جنگ بجانے کی صرف دھمکی دی ہے لیکن 126 دن ریاست کے کیپٹل کو احتجاج کے نام پر یرغمال بنانے والے بزدل نیازی کی ٹانگیں کانپنا شروع ہو گئی ہیں اور وہ بوکھلاہٹ میں آمریت کو بھی بیچھے چھوڑ گیا ہے !

وزیر داخلہ کے منصوبے (اپوزیشن میں فاروڈ بلاک بناؤ) کی کامیابی میں رانا ثنااللہ سب سے بڑی رکاوٹ تھے ، انہوں نے سیاسی طوائف بننے والوں کو للکارا تھا اور کہا تھا کہ ہم انکا عوام کی عدالت میں محاسبہ کریں گے یہ بات فیصلہ سازوں کو پسند نہیں آئی اور انہوں نے رانا ثنااللہ کو راستے سے ہٹا دیا !

رانا ثنا اللہ ایک بہادر ،نڈر اصلی راجپوت سیاستدان ہے جسکا بیانیہ فیصلہ سازوں کو کبھی منظور نہیں تھا ، نوازشریف کی نااہلی کے بعد سے اب تک ادارے رانا ثنااللہ کے خلاف ثبوت ڈھونڈنے کی کوشش کررہے تھے لیکن ناکام رہے ! آخر کار آج ایک من گھڑت ڈرامہ بنا کر اسکو اغوا کر لیا گیا ہے !

دوسری جانب بلاول بڑی دلیری کے ساتھ اپنے نانا والی سیاست کر رہا ہے اور فرنٹ فٹ پر کھیل رہا ہے ، اس نے ( اے پی سی) میں مذہب کے استعمال اور پارلیمنٹ کے خاتمہ کی مخالفت کرکے بڑے بڑے فیصلہ سازوں کو حیرت میں ڈال دیا ہے ، بلاول نوجوان ہے اسکی جارہانہ سیاست کا خمیازہ زرداری صاحب بھگت رہے ہیں جبکہ مریم بی بی کی سویلین بالا دستی کا کفارہ ن لیگ ادا کر رہی ہے ،
اندر کی خبر ہے کہ ابھی مزید مخالف سیاسی رہنماؤں کو قید کیا جائے گا جس میں شائد خاقان عباسی ، شہباز شریف ، خواجہ آصف ، رانا تنویر، بلاول ، یوسف رضا گیلانی ، راجہ پرویز اشرف سمیت بہت سے رہنما اس لسٹ میں شامل ہیں ۔

رانا ثنااللہ کو اغوا کرنے والی ٹیم میں وفاقی وزیر داخلہ اعجاز شاہ جوکہ سابق فوجی ہیں انکی سربراہی میں ایک برگیڈئیر (اے این ایف ) ٹیم کی سربراہ میں عمران خان کے چہرے سے جمہوریت کا ماکس اتار کر کٹھ پتلی فرنٹ مین کا اصل روپ عوام کو دکھا رہا ہے ،

ابتدائی طور پر رانا ثنااللہ پر منشیات فروشوں کے ساتھ رابط کا الزام لگایا جا رہا ہے جبکہ انکی گاڑی سے منشیات برآمد کرنے کا بھونڈہ شوشہ بھی چھوڑا جا رہا ہے ،کچھ گرفتار ملزمان کو وعدہ معاف گواہ بنایا جائے گا کچھ دیر تک رانا ثنااللہ کے اغوا کا آفیشل سکرپٹ سامنے آ جائے گا
قصہ مختصر عمران نیازی کو تاریخ انڈیا کے سامنے ہتھیار ڈالنے والے نیازی جرنیل کے ساتھ پکارے گی

(ایمرا نیوز)
ذکر اُن دو موضوعات کا، جو نظر انداز ہوئے یا کر دیئے گئے، ان پر اتنی بھی بات نہ ہوئی جتنی 55روپے فی کلومیٹر والے ہیلی کاپٹر پر یا جتنی مرغیوں، انڈوں، کٹوں پر ہو چکی، ویسے اطلاعاً عرض ہے کہ انڈے، مرغیوں، کٹے منصوبوں کے بانی شہباز شریف، 5مرغیاں ایک مرغا منصوبہ لانچ کر چکے، کٹے، مال مویشی یعنی لائیو اسٹاک ٹریننگ و پائلٹ منصوبے وہ چلا چکے، وہی گھسی پٹی مثال یاد آ رہی کہ ’’بد سے بدنام برا‘‘ مطلب خادم اعلیٰ کر چکے، کسی کو خبر، پروا نہیں، عمران خان نے بات کر دی، جگت باز لنگوٹیاں کس کر میدان میں آگئے اور مزے کی بات مسلم لیگ (ن) والے بھی جگتیں مار رہے، خیر چھوڑیں، اپنے موضوع کی طرف آتے ہیں، پہلا موضوع انتخابات 2018پر فافن کی تفصیلی رپورٹ جو پچھلے ہفتے جاری ہوئی۔

50سے زائد غیر سرکاری تنظیموں کے نیٹ ورک فافن نے 2018کے انتخابات میں 57ہزار 832پولنگ اسٹیشنوں پر 16ہزار 429تربیت یافتہ مشاہدہ کاروں کو تعینات کیا، پہلی بار نہ صرف جدید موبائل ایپلی کیشنز متعارف کرائی گئیں، سنٹرل کال سنٹر قائم کیا، الیکشن ٹربیونلز کارروائی کا جائزہ لینے کیلئے وکلاء کی خدمات لی گئیں بلکہ 9ہزار پولنگ اسٹیشنوں کے نمونے لیکر الیکشن کمیشن نتائج، فارم 33، فارم47,46,45اور فارم 48سے موازنہ بھی کیا، فافن جس نے 2013کا الیکشن بھی کور کیا تھا، اس کے مطابق 2018کے انتخابات 2013کے انتخابات سے بہتر رہے، 2013میں بے ضابطگیاں 90فیصد جبکہ 2018میں بے ضابطگیاں 38فیصد، فافن کہے 2018کے انتخابات میں 62فیصد پولنگ اسٹیشنوں پر ایک بھی بے ضابطگی نہیں ہوئی، 2013میں 2.1فیصد پولنگ اسٹیشنوں کو یرغمال بنایا گیا جبکہ 2018کے انتخابات میں ایک پولنگ اسٹیشن بھی یرغمال نہیں بنایا گیا، 2013میں 5.7فیصد پولنگ اسٹیشنوں کا نتیجہ پولنگ ایجنٹوں کو نہیں دیا گیا جبکہ 2018میں 5.2فیصد پولنگ اسٹیشنوں کا نتیجہ پولنگ ایجنٹوں کو نہ مل سکا، 2013میں 5فیصد پولنگ اسٹیشنوں پر غیر متعلقہ افراد نے دباؤ ڈالا جبکہ 2018میں 1.1فیصد پولنگ اسٹیشنوں پر تشدد کے واقعات ہوئے، فافن کے مطابق جن 180قومی اسمبلی کے حلقوں میں سب سے کم یا نہ ہونے کے برابر بے ضابطگیاں ہوئیں ان میں 66 حلقے پی ٹی آئی کے نام رہے، 50حلقوں میں مسلم لیگ (ن) کامیاب ہوئی، 34حلقوں میں پی پی جیتی جبکہ ایم کیو یم 6، مسلم لیگ ق 4، متحدہ مجلس عمل 4، بلوچستان نیشنل پارٹی 2، بلوچستان عوامی پارٹی 2، عوامی مسلم لیگ اور جمہوری وطن پارٹی نے ایک ایک جگہ پر کامیابی حاصل کی۔ فافن کا کہنا کہ 2018کے انتخابات گزشتہ تینوں انتخابات کے مقابلے میں قواعد پر عملدرآمد، ووٹنگ عمل، گنتی اور انتخابی بے ضابطگیوں میں کمی کے حوالے سے بہتر انتخابات ثابت ہوئے، فافن ہی بتائے کہ 2018کے انتخابات میں جزوی شعبوں میں بے ضابطگیوں کی نشاندہی ہوئی لیکن یہ بے ضابطگیاں ایسی نہیں کہ انتخابی نتائج پر حاوی ہو سکیں۔

یہ فافن کی رپورٹ، کچھ اسی سے ملتی جلتی یورپی یونین مبصرین کی رپورٹ بھی، اب دونوں رپورٹوں کو ذہن میں رکھ کر انتخابات والی شام سے اب تک ہوتی ’ہال دہائی‘ دیکھیں، کچھ مہربانوں کو تو واقعی پرائڈ آف پرفارمنس ملنا چاہیے، اس خوبصورتی سے رائی کا پہاڑ بنایا، اس چالاکی سے بات کا بتنگڑ بنایا، اس مکاری سے مفروضوں کو حقیقت کا رنگ دیا، اس عیاری سے منفی پروپیگنڈہ کیا اور اس مستقل مزاجی سے جھوٹ بولا کہ لگا جیسے انتخابات جعلی، مینڈیٹ نقلی، لیکن یہ کیسے نہ ہوتا، یہ ہونا ہی تھا، تین دہائیوں سے جو مافیا چہرے بدل بدل کر اقتدار کے مزے لوٹ رہا تھا، جس مافیا سے جڑے بیسوؤں چھوٹے چھوٹے مافیاز جونکوں کی طرح ہمارا خون پی رہے تھے، ان سب کیلئے تو یہ انتخابات موت ثابت ہوئے، یہ روتے دھوتے نہ تو اور کیا کرتے، یہ آج بھی جو شور و غوغا، شکوک و شبہات کی دھول، یہ پلٹنا، لپٹنا، لپٹ کر پلٹنا، یہ سب باقاعدہ منصوبہ بندی سے ہو رہا، یہ گاڈ فادروں سے چنے منے ڈانوں اور منشا بموں تک سب بقا کی جنگ لڑ رہے، حکومتی نالائقیاں، بونگیاں، نکما پن اپنی جگہ، مگر یہ اک حقیقت کہ آج پاکستان اُس فیصلہ کن موڑ پر، جہاں اگر ڈاکو، لٹیرے بچ نکلے تو پھر اگلے 50سال تو انہی کا راج، اگر آج کرپٹس، کرپشن کا رستہ نہ رکا تو پھر ان کو اپنی زندگیوں کا حصہ ہی سمجھیں، اگر آج جونکیں نہ ماریں تو پھر نسل درنسل یہ خون چوسیں گی اور اگر آج کچھ نہ ہو سکا تو پھر 22کروڑ کیلئے آگے اندھیرا ہی اندھیرا۔

دوسرا موضوع چوہدری نثار کا وہ انٹرویو جس میں انہوں نے فرمایا ’’میں مفاہمت کروانے کیلئے تیار تھا، معاملات طے پا گئے، نواز شریف رضامند تھے، آخری وقت میں ایک انقلابی آڑے آ گیا‘‘ بلاشبہ چوہدری نثار عمر بھر سچ کے قریب قریب رہے، جو کہا، کھلم کھلا کہا، یہ چوہدری صاحب ہی کہہ سکیں کہ ’’میری عزت نفس، یہ گوارا نہیں کہ بچوں کے جوتے اُٹھاتا پھروں‘‘ مطلب مریم، حمزہ کے ماتحت کام نہیں کر سکتا، غلام معاشرے میں جہاں رکوع کے عالم میں جھک کر ہاتھ چومنے اور اپنے قائد کی پرستش کا رواج ہو وہاں یہ بہت بڑی بات، بڑی ہمت کی بات، یہ بھی سچ کہ اپنوں، پرائیوں کے ڈسے چوہدری صاحب ان دنوں اس پوزیشن میں نہیں کہ کوئی کڑوی کسیلی بات کی جا سکے اور پھر اپنے دوست، بھائی، محسن میجر عامر کی ڈانٹ ڈپٹ کا بھی خوف، لہٰذا چوہدری صاحب سے صرف 3سوال، پہلا یہ کہ آپ سے پہلے بھی یہ سنا کہ ’’میرا مشورہ مان لیا جاتا تو آج شہباز شریف وزیراعظم ہوتے، میری بات مان لی جاتی تو آج مسلم لیگ کا یہ حال نہ ہوتا، میری باتوں پر عملدرآمد ہو جاتا تو نواز شریف جیل نہ جاتے‘‘ اب آپ فرما رہے کہ ’’آپ ایک اور مفاہمت، ڈیل کروانے والے تھے‘‘ چوہدری صاحب اتنا کچھ ہونے اور سامنے آ جانے کے بعد بھی آپ مفاہمت یا ڈیل کروانا چاہتے تھے، کیوں، دوسرا سوال یہ کہ بلاشبہ تین دہائیوں کی سیاست میں آپ پر ایک پیسے کی کرپشن کا الزام بھی نہ لگا مگر آپ جانتے بوجھتے ہوئے بھی کیوں عمر بھر کرپٹس کے ساتھ کھڑے رہے، انہیں بچاتے رہے، آپ کو کبھی ملک پر حم نہیں آیا، کروڑوں بھکے ننگوں پر ترس نہیں آیا، آخری سوال، چوہدری صاحب آپ ہر مشکل وقت میں جن کے ساتھ کھڑے رہے، جن کیلئے لڑتے رہے اور جن کیلئے عمر بھر لڈو کی سانپ سیڑھی والا کھیل کھیلتے رہے، انہوں نے تو اپنی اولاد کی غلامی قبول نہ کرنے پر آپ کو اپنی زندگیوں سے نکالنے میں ایک منٹ نہ لگایا، آپ کو پھر بھی انہیں کسی چور دروازے، پتلی گلی سے نہ نکال سکنے کا غم کیوں۔۔۔

لیکن پھر سوچوں چوہدری صاحب سے ہی کیا گلہ، ہم سب ہی ایسے، آج کس کو علم نہیں کہ مزاحمتی، بغاوتی کیوں چپ، ووٹ کی عزتیں کیوں خواب ہوئیں، روک سکو تو روک لو والے کیوں رُک چکے، مگر اپنے فائدے کیلئے کل انقلابی بننے والے اور اپنے مفاد میں آج چپ کا روزہ رکھے ہوئے جب کل اپنا فائدہ دیکھ کر پھر سے نعرہ انقلاب لگائیں گے تو ہم پھر سے انہیں کندھوں پہ اُٹھائیں گے اور پھر سے میاں دے نعرے ہی وجن گے، آخر پر کہنا یہ کہ کیا وقت آگیا کہ عمران خان کے 100دنوں کو نہیں بلکہ ہاؤس آف شریفس کو دیکھ کر یہ نعرہ
مارنے کو دل چاہے کہ ’’تبدیلی آ نہیں رہی، تبدیلی آ گئی ہے‘‘۔
بشکریہ جنگ نیوز

مہمان کالم
سموگ کا آغاز لندن سے ہوا تھا‘ لوگ 5 دسمبر 1952ءکی صبح اٹھے توشہر گہرے سیاہ دھوئیں میں ڈوب چکا تھا‘ ہاتھ کو ہاتھ سجائی نہیں دے رہا تھا‘ حد نظر صفر ہو چکی تھی‘ گاڑیاں گاڑیوں کو نظر نہیں آ رہی تھیں‘ ٹرین ڈرائیور پٹڑی نہیں دیکھ پا رہے تھے‘ پائلٹس کو رن وے نظر نہیں آ رہا تھااوربچے والدین اور میاں بیوی ایک دوسرے کو دکھائی نہیں دے رہے تھے‘ پورا شہر دھند میں گم تھا‘ شام کے وقت پتہ چلا یہ دھند دھند نہیں یہ عذاب ہے‘ یہ گاڑھا سیاہ دھواں ہے‘ یہ دھواں اگلے دن چار ہزار لوگوں کی جان لے گیا‘ لوگ کھانس کھانس کر دم توڑنے لگے‘ لندن کی سماجی زندگی رک گئی‘ ٹریفک بند ہو گئی‘ ٹرینیں معطل ہو گئیں‘ فلائیٹس منسوخ ہو گئیں‘ دفتروں اور سکولوں میں چھٹی ہو گئی‘ شاپنگ سنٹرز بند ہو گئے اور لوگوں نے گھروں سے باہر نکلنا ترک کر دیا‘ شہر میں سناٹا تھا‘یہ سناٹا ایمبولینسز کی آوازوں سے پنکچر ہوتا تھا‘ قبرستان بھر چکے تھے اور ہسپتالوں میں مردے اور بیمار دونوں ایک بیڈ پر پڑے تھے‘ یہ عذاب پانچ دن جاری رہا‘ نو دسمبر کی رات بارش شروع ہوئی اور فضا آہستہ آہستہ دھل گئی لیکن اموات کا سلسلہ جاری رہا‘ دسمبر کے آخر تک لندن کے بارہ ہزار لوگ انتقال کر چکے تھے جبکہ ڈیڑھ لاکھ لوگ دمے‘ آشوب چشم‘ ٹی بی اور نروس بریک ڈاؤن کا شکار تھے‘ ماحولیات کے ماہرین نے تحقیقات شروع کر دیں‘ پتہ چلا 5 سے 9 دسمبر کے دوران لندن کی فضا میں روزانہ ہزار ٹن سموک پارٹیکلز پیدا ہوتے رہے‘ ان میں 140 ٹن ہائیڈرو کلورک ایسڈ‘ 14 ٹن فلورین کمپاؤنڈ اور 370 ٹن سلفر ڈائی آکسائیڈ شامل ہوتی تھی‘ یہ تمام مادے صحت کےلئے انتہائی مضر تھے‘ ماہرین نے سوچنا شروع کیا ”یہ تمام پارٹیکلز آئے کہاں سے تھے“ پتہ چلا یہ ساڑھے سات سو سال کی غلطیوں کا دھواں ہے‘ یہ سلسلہ 1200ءمیں شروع ہوا تھا‘ ساڑھے سات سو برسوں میں لندن کی آبادی میں دس گناہ اضافہ ہو گیا‘ جنگل کٹ گئے‘ ندیاں اور جھیلیں ختم ہو گئیں‘ گاؤں دیہات شہر میں آ گئے‘ کھیت کھلیانوں کی جگہ ہاؤسنگ سوسائٹیاں بن گئیں‘ صنعتی انقلاب آیا‘ شہر میں ہزاروں فیکٹریاں لگ گئیں‘ بجلی ایجاد ہوئی‘ کوئلے سے چلنے والے پاور پلانٹ لگ گئے‘ ٹرین سروس شروع ہوئی‘ ٹرام آئی‘ گاڑیاں آئیں‘ تعمیرات شروع ہوئیں‘ دوسری جنگ عظیم نے بھی دھواں اڑایا اور آخر میں لوگ بھی آلودگی پھیلانے لگے چنانچہ لندن کی فضا آلودہ ہوتی چلی گئی‘ ہوا میں آکسیجن کم ہو گئی‘ یہ سلسلہ چلتے چلتے 1952ءتک پہنچ گیا‘ سردی شروع ہوئی‘ لوگوں نے اپنی انگیٹھیوں میں کوئلہ جلایا‘ لاکھوں ٹن دھواںپیدا ہوا‘ یہ دھواں ساڑھے سات سو سال کی آلودگیوں میں ”مکس اپ“ ہوا‘ دسمبر کی دھند میں ملا اور گہری‘ دبیز اور سیاہ گیس میں تبدیل ہو گیا اور یہ گیس پانچ دن شہر کے اندر گھومتی پھرتی رہی‘ ماہرین نے اس دھند کو سموک اور فاگ دو لفظ ملا کر ”سموگ“ کا نام دے دیا اور لندن کے اس ”سانحے کو گریٹ سموگ آف لندن“ قرار دے دیا۔ماحولیات کے ماہرین نے سموگ کی تشخیص کر لی‘ اب علاج کی باری تھی‘ علاج کی ذمہ داری کنزرویٹو پارٹی کے ایم پی سر گیرالڈ ڈیوڈ نے لی‘ یہ شریف خاندان کی طرح بزنس مین اور کارخانے دار تھے‘ یہ 1950ءمیں سیاست میں آئے ‘ یہ گریٹ سموگ آف لندن کے دنوں میں ہاؤس آف کامنز کے تازہ تازہ رکن بنے تھے‘ یہ اٹھے اور لندن کی فضا کو صاف کرنے کا پلان بنانا شروع کر دیا‘ یہ ماہرین کے ساتھ مل کر چار سال منصوبہ بندی کرتے رہے یہاں تک کہ انہوں نے 1956ءمیں ”کلین ائیر ایکٹ“ بنا لیا‘ یہ ایکٹ ہاؤس آف کامنز میں پیش ہوا اور ایوان نے 5 جولائی 1956ءکو اس کی منظوری دے دی‘ یہ ایکٹ چھ بنیادی اصلاحات پر مشتمل تھا‘ حکومت نے شہر کے اندر کوئلے کے استعمال پر پابندی لگا دی‘ عوام کو ”فائر پلیس“ کےلئے متبادل ذرائع فراہم کرنے کا اعلان کر دیا گیا‘ حکومت نے ایک سال میں یہ ذرائع فراہم کر دیئے‘ ماڈرن ہیٹنگ سسٹم اسی ایکٹ کی پیداوار تھا‘ سردیوں میں بجلی بھی سستی کرنے کا فیصلہ کیا گیا تاکہ لوگ بجلی کے ذریعے گھر گرم کر لیں‘ حکومت نے شہر کے اندر فیکٹریاں بند کر دیں‘ مالکان کو شہر سے دور مفت جگہ بھی فراہم کی گئی‘ ٹیکس میں گنجائش بھی اور فیکٹریاں شفٹ کرنے کےلئے قرضے بھی دیئے گئے۔
بجلی کے تمام پلانٹس دو برسوں میں لندن سے دور جنگلوں میں منتقل کر دیئے گئے‘ لندن اور لندن کے اطراف میں درخت کاٹنا‘ زرعی زمینوں کے سٹیٹس میں تبدیلی اور گرین ایریاز کے خاتمے پر پابندی لگا دی گئی‘ ملکہ تک کو درخت کاٹنے سے قبل تحریری اجازت کا پابند بنا دیا گیا اور پبلک ٹرانسپورٹ میں اضافے‘ پرائیویٹ گاڑیوں کی حوصلہ شکنی اور پٹرول کے معیار کو بلند کرنے کا فیصلہ کیا گیا‘ ہاؤس آف کامنز نے ان اصلاحات کی منظوری دی‘ حکومت نے کام شروع کیا اور ایکٹ کی منظوری کے صرف چار سال بعد 1960ءمیں لندن کی فضا مکمل طور پر ”سموگ فری“ ہو گئی‘ یہ ایکٹ اس قدر مکمل اور سخت تھا کہ سرگیرالڈ ڈیوڈ کو خود اس کا نقصان اٹھانا پڑا‘ ان کی اپنی فیکٹریاں بھی لندن سے باہر منتقل ہوئیں۔ہم اب گریٹ سموگ آف لندن سے گریٹ سموگ آف لاہور کی طرف آتے ہیں‘ پنجاب پچھلے تین برسوں سے شدید سموگ کا شکار چلا آ رہا ہے‘ نومبر کے مہینے میں لاہور‘ بہاولنگر‘ پاکپتن‘ فیصل آباد اور ٹوبہ ٹیک سنگھ زہریلی دھند میں گم ہو جاتے ہیں‘پنجاب اس بار بھی سموگ میں دفن ہے‘ ہماری فضا میں اگر 80 مائیکرو گرام زہریلے مادے ہوں تو ہمارے پھیپھڑے انہیں برداشت کر جاتے ہیں لیکن لاہور اور اس کے مضافات میں اس وقت آلودگی کی شرح 200مائیکرو گرام کیوبک میٹر ہے‘ ہم اگر فضا کا ٹیسٹ کریں تو ہمیں اس میں کاربن مانو آکسائیڈ‘ سلفر اور نائیٹروجن کی بھاری مقدار ملے گی‘ یہ تمام مادے زہر ہیں‘ لاہور کی فضا میں تین سو سے چار سو فٹ تک آکسیجن کی شدید کمی بھی ہے‘ یہ فضا کتنی مضر صحت ہے آپ اس کا اندازہ سگریٹ سے لگا لیجئے‘ ہم اگر روزانہ 50 سگریٹ پئیں تو ہمارے پھیپھڑوں کو اتنا نقصان ہو گا جتنا لاہور کی فضا میں ایک دن سانس لینے سے ہو رہا ہے‘ بھارت ہم سے بھی بری صورتحال کا شکار ہے‘ بھارت میں 2012ءمیں سموگ کی وجہ سے پندرہ لاکھ لوگ مر گئے ‘ لاہور میں بھی اس سال چار لاکھ لوگ متاثر ہوئے ہیں‘ یہ لوگ 2018ءکے دوران انتقال فرما جائیں گے۔یہ سموگ کہاں سے آ رہی ہے‘ یہ سوال بہت اہم ہے‘ اس کے چار بڑے سورس ہیں‘ پہلا سورس بھارتی پنجاب کا شہر ہریانہ ہے‘ ہریانہ میں دس سال میں چاول کی فصل میں آٹھ گنا اضافہ ہوا‘ ہریانہ کے کسان ا کتوبر کے آخر میں چاول کے پودے کے خشک ڈنڈل اور خالی سٹے جلاتے ہیں‘ بھارتی کسانوں نے اس سال 3 کروڑ 50 لاکھ ٹن ڈنڈل جلائے‘ ڈنڈلوں کے دھوئیں نے دہلی سے لے کر لاہور تک پورے پنجاب کی مت مار دی‘ دو‘ لاہور کی فیکٹریوں میں اضافہ ہوتا جا رہا ہے‘ یہ فیکٹریاں دھواں پیدا کر رہی ہیں‘ تین‘ حکومت نے لاہور کے گردونواح میں درجن کے قریب بڑے پاور پلانٹس لگائے‘ بجلی کا ایشو ختم ہو گیا لیکن فضا آلودہ ہو گئی اور چوتھا سورس گاڑیاں ہیں‘ لاہور شہر میں دس لاکھ گاڑیاں ہیں‘ ہمارے پٹرول کا معیار انتہائی پست ہے چنانچہ یہ گاڑیاں چلتا پھرتا سموگ ہیں‘ ان چاروں سورسز کے علاوہ بھی سورسز ہیں‘ لاہور میں ٹائروں کو جلا کر تاریں اور تیل حاصل کیا جاتا ہے‘ شہر میں ٹائر جلانے والے سینکڑوں احاطے ہیں اور سیالکوٹ ریجن میں بھی اس موسم میں مونجی کی باقیات جلائی جاتی ہیں‘ لاہور کی آبادی بھی پھیل رہی ہے‘ مضافات میں جنگل‘ کھیت اور کھلیان بھی ختم ہو رہے ہیں اور دیہات بھی‘ آپ لاہور کے گرد ہاؤسنگ سوسائٹیوں کا ڈیٹا نکال کر دیکھ لیجئے‘ آپ سر پیٹ کر رہ جائیں گے۔
یہ ان سوسائٹیوں کا کمال ہے‘ ہم اب سبزیاں‘ پھل اور اناج بھی چین سے امپورٹ کر رہے ہیں‘ ہم امرود‘ تربوز‘ آڑو‘ کینو اور آم بھی درآمد کر رہے ہیں چنانچہ لاہور تیزی سے سموگ میں ڈوبتا چلا جا رہا ہے۔ہمیں ماننا ہوگا ترقی انتہائی اہم ہے‘ ہمیں یہ بھی ماننا ہوگا میاں شہبا زشریف نے پنجاب کےلئے بے تحاشہ کام کیا‘ لاہور اس وقت ملک کا خوبصورت اور ترقی یافتہ ترین شہر بن چکا ہے‘ پنجاب میں انگریز کے بعد پہلی مرتبہ اتنے بڑے پیمانے پر ترقیاتی کام ہوئے۔ ہمیں بہرحال میاں شہباز شریف کو اس کا کریڈٹ دینا ہوگا لیکن اس کے ساتھ ساتھ یہ بھی حقیقت ہے ترقی کا جھنڈا لاشوں پر نہیں لگا کرتا‘ پنجاب اگر اس ترقی کے ہاتھوں بیمار ہو گیا یا لوگ اگر مرنا شروع ہو گئے تو یہ ذمہ داری بھی بہرحال میاں شہباز شریف کے کندھوں پر جائے گی چنانچہ میری درخواست ہے پنجاب حکومت فوری طور پر کلین پنجاب کمیشن بنائے‘ فضائی آلودگی کی وجوہات تلاش کرے‘ اصلاحات کرے‘ اسمبلی سے منظوری لے اور لاہور کو لندن کی سپرٹ سے صاف کرنا شروع کر دے‘لاہور اور اس کے گردونواح میں اصلی شجرکاری کرائے‘ فیکٹریاں باہر شفٹ کرائے‘ گاڑیوں کی تعداد کنٹرول کرے‘ پٹرول کا معیار بہتر بنائے‘ کوڑا‘ ٹائر اور کوئلہ جانے پر پابندی لگائے اور درخت کاٹنے کی سزا متعین کرے‘ حکومت کلین ائیر لندن ایکٹ سے بھی مدد لے سکتی ہے اور یہ بھوٹان ماڈل کو بھی سٹڈی کر سکتی ہے‘ یہ بھارتی حکومت کے ساتھ مل کر دھان کی باقیات جلانے پر بھی پابندی لگا سکتی ہے اور یہ بچوں کے سلیبس میں ماحولیات کا مضمون بھی متعارف کرا سکتی ہے‘ یہ اقدامات ضروری ہیں ورنہ دوسری صورت میں پنجاب بالخصوص لاہور ایک ترقی یافتہ قبرستان بن جائے گا اور اورنج لائین ٹرین مردے ڈھونے کے کام آئے گی۔ کیا میاں شہبازشریف یہ پنجاب چاہتے ہیں۔