لاہور(ویب ڈیسک)پنجاب بھر میں جاری علامتی ہڑتال ختم کر دی گئی .تفصیلات کے مطابق فلورملز نے حکومت کی یقین دہانی کے بعد مشروط طور پرپنجاب بھر میں جاری علامتی ہڑتال ختم کرنے کا فیصلہ کیا ہے ۔فلورملز ایسوسی ایشن کے دفتر میں منعقدہ مشترکہ پریس کانفرنس ہوئی . ڈائریکٹر فوڈ پنجاب عمر جہانگیر اور چیئرمین فلورملز ایسوسی ایشن عاصم رضا نے کانفرنس کے دوران بتایا کہ آج سے تمام فلور ملز سرکاری گندم کوٹہ حاصل کریں گی اور پورے صوبے میں آٹا کی یکساں قیمت لاگو ہو گی. اب سے بیس کلو آٹے کا تھیلا 1100 روپے جبکہ دس کلو کا تھیلا 550 روپے میں فروخت کیا جائے گا.

اسلام آباد (میڈیا 92 نیوز آن لائن ) وزیراعظم عمران خان کا کہنا ہے کہ اگر کوئی سمجھتا ہے کہ ہڑتالوں سے ڈر کر پیچھے ہٹ جاؤں گا تو وہ سمجھ لے میں پیچھے نہیں ہٹوں گا اور میرا پیچھے ہٹنے کا مطلب ملک سے غداری ہوگی۔

گوجرانوالہ چیمبر آف کامرس اینڈ انڈسٹری کی تقریبِ تقسیم انعامات سے خطاب میں وزیراعظم عمران خان کا کہنا تھا کہ میں نے ووٹ لینے کیلئے اسلام کی بات نہیں کی بلکہ میں نے الیکشن جیتنے کے بعد ریاست مدینہ کی سب سے زیادہ بات کی۔

انہوں نے کہا کہ مدینہ کی ریاست کے اہم اصول میں رحم ، عدل و انصاف اور کمزوروں کی داد رسی شامل تھی لیکن آج اربوں روپے کی چوری کرنے والوں کو جیل میں ائیر کنڈیشن مل رہا ہے اور جو چھوٹی چوری کرتا ہے، سب کو پتا ہے اس کے ساتھ جیل میں کیا سلوک ہوتا ہے۔

ان کا کہنا تھا کہ میری باہر کوئی جائیداد اور کاروبار نہیں، میرا جینا مرنا پاکستان میں ہے، میں ان کی طرح نہیں جو اربوں روپیہ باہر لے گئے، ان کے مفادات کچھ اور ہیں، جب روپیہ گرتا ہے تو ان لوگوں کی دولت بڑھ جاتی ہے، ان کے رشتہ دار جن پر کیسز ہیں سب باہر ہیں۔

وزیراعظم کا کہنا تھا کہ جہاں ہم آج ہیں آگے ایسے نہیں چل سکتے، پاکستان کا 70 فیصد ٹیکس 300 کمپنیاں دیتی ہیں اور سروس سیکٹر ایک فیصد ٹیکس دیتا ہے، لوگ سمجھتے ہیں کہ ایف بی آر ایسا ادارہ ہے جس میں پیسے چوری ہوتے ہیں اور لوگوں کو ایف بی آر پر اعتماد نہیں، ایف بی آر میں اصلاحات کرنے جارہے ہیں۔

تاجروں کی شٹر ڈاؤن ہڑتال سے متعلق وزیراعظم عمران خان نے کہا کہ کوئی سمجھتا ہے کہ ہڑتالوں سے میں پیچھے ہٹ جاؤں گا تو وہ سمجھ لے میں پیچھے نہیں ہٹوں گا، برائے مہربانی سمجھ لیں میرا پیچھے ہٹنے کا مطلب ملک سے غداری ہوگی۔

انہوں نے خبردار کیا کہ ٹیکس کے بغیر ملک نہیں چل سکتا، اگر لوگ سمجھتے ہیں کہ جیسے پہلے ہوتا رہا ویسے ہی چلتا رہے تو ایسا نہیں ہوسکتا، ہم نے سب کو ٹیکس نیٹ میں لانا ہے کیوں کہ 22کروڑ لوگوں میں صرف 15 لاکھ افراد ٹیکس دیتے ہیں، اگر ہم تھوڑا تھوڑا بھی ٹیکس دیں تو اتنا پیسہ آجائے گا کہ قرض کی دلدل سے نکل جائیں گے۔

وزیراعظم کا کہنا تھا کہ ہم تاجروں ،صنعت کاروں کیلئے آسانی پیدا کررہے ہیں، افغانستان سے اسمگلنگ کی روک تھام کیلئے بات چیت چل رہی ہے اور اسمگلنگ روکے بغیر انڈسٹری آگے نہیں بڑھ سکتی، اگر انڈسٹری نہیں چلے گی تو ملک پر جو قرضہ چڑھایا گیا وہ کیسے ادا ہوگا؟

انہوں نے کہا کہ اگلے سال کیلئے ساڑھے 5 ہزار ارب روپے اکٹھے کرنے ہیں، صنعت کاروں کے تمام مسئلے حل کریں گے، 60 کی دہائی میں حکومت نے صنعتکاروں کی مدد کی تو پاکستان خطے میں آگے آیا تھا۔

اسلام آباد میں فیڈرل بورڈ آف ریونیو (ایف بی آر) کے چیئرمین شبر زیدی کی تبدیلی کے بارے میں باتیں ہونے لگیں ہیں ۔

اخبار کی رپورٹ کے مطابق شبر زیدی کو اس سے بھی بڑا عہدہ دیا جاسکتا ہے جن میں حماد اظہر کے جانے کے بعد وزیر مملکت برائے ریونیو یا پھر وزیر اعظم کے معاون خصوصی برائے ریونیو کا عہدہ شامل ہے۔ رابطہ کیے جانے پر چیئرمین ایف بی آر کا کہنا تھا کہ ‘میں اس معاملے پر کوئی رائے نہیں دینا چاہتا، وزیراعظم عمران خان اس پر خود فیصلہ کریں گے’۔

واضح رہے کہ شبر زیدی کو رواں برس 10 مئی کو وزیراعظم نے خود چیئرمین ایف بی آر کے تعینات کیا تھا۔

وزیراعظم عمران خان کے ایک اور قریبی ذرائع نے ڈان کو بتایا کہ وفاقی کابینہ میں دو بڑی تبدیلیوں کے بارے میں غور کیا جارہا ہے، تاہم انہوں نے ان کا نام نہیں بتایا جبکہ اطلاعات ہیں کہ ان میں سے ایک شبر زیدی ہوسکتے ہیں۔

ذرائع کا کہنا تھا کہ ‘اب تک اس معاملے میں کوئی فیصلہ نہیں ہوا، وزیراعظم آخری لمحات میں بھی تبدیلیاں کرسکتے ہیں، فی الوقت نام ظاہر کرنا مناسب نہیں ہے’۔

وزیر اعظم عمران خان نے ایف بی آر اراکین کے ساتھ شیڈول 10 جولائی کو ہونے والا اجلاس منسوخ کردیا تھا جبکہ اس کے بعد 17 جولائی کو ہونے والا اجلاس بھی منسوخ کردیا تھا۔

چیئرمین ایف بی آر کے ماتحت کام کرنے والے اراکین نے بتایا کہ ان کے اور شبر زیدی کے درمیان کچھ اختلافات ہیں، ان میں سے ایک کا کہنا تھا کہ ‘چیئرمین اراکین کو کسی قسم کی معلومات فراہم نہیں کرتے، ایف بی آر کے سربراہ اور ان کی ٹیم کے اراکین کے درمیان عدم اعتماد ہے’۔

(ایمرا نیوز آن لائن)
(بشکریہ جنگ لاہور)
ہفتہ کے روز پاکستان بھر کے تاجروں اور کاروباری طبقہ کی جانب سے ملک بھر میں ہڑتال کی گئی جسے عمومی طور پر کامیاب گردانا گیا لیکن سچ پوچھیں تو یہ کیسی کامیابی ہے کہ پاکستان کی وہ اکثریت جو پیسہ تو کماتی ہے، لاکھوں کروڑوں کا کاروبار کرتی ہے لیکن ٹیکس نہیں دیتی، اور نہ دینا چاہتی ہے۔ ٹیکس دینے کا پاکستان میں رواج نہیں بلکہ پاکستان دنیا کے اُن چند ممالک میں شامل ہے جہاں سب سے کم تعداد میں لوگ ٹیکس ادا کرتے ہیں۔ بائیس کروڑ کی آبادی میں تقریباً بارہ لاکھ لوگ انکم ٹیکس فائلر ہیں جو کل آبادی کا 1فیصد سے بھی کم ہے۔ یہ کیسے ہو سکتا ہے کہ 20کروڑ کی آبادی کا سارا بوجھ پہلے سے ٹیکس نیٹ میں موجود دس بارہ لاکھ افراد پر ڈالا جائے اور پیسہ کمانے والوں کی وہ اکثریت جس کا تعلق خواہ کاروباری طبقہ سے ہو، زراعت، وکالت اور ڈاکٹری سمیت ایسے پیشوں سے جن کی آمدن کا کوئی باقاعدہ ریکارڈ نہیں ہوتا، وہ ٹیکس نیٹ میں شامل ہونے سے انکاری ہی رہے؟

پاکستان میں ٹیکس نیٹ میں شامل اکثریت کا تعلق اُس تنخواہ دار طبقہ سے ہے جن کی آمدن کا ریکارڈ پہلے سے ہی انکم ٹیکس محکمہ کے پاس موجود ہے اور جن کے انکم ٹیکس کی کٹوتی اُن کی تنخواہ کی ادائیگی سے پہلے ہی کر دی جاتی ہے۔ گویا بحیثیت قوم ہم پاکستانی نہ انکم ٹیکس دینا چاہتے ہیں اور نہ ہی اپنے اثاثے ظاہر کرنا چاہتے ہیں۔ اسی بنا پر یہاں ہر حکومت کا اپنی آمدن کے لیے اِن ڈائریکٹ یعنی بالواسطہ ٹیکسوں پر زور رہا جس کا سب سے زیادہ دبائو غریب طبقہ پر پڑتا ہے۔ مختلف حکومتوں نے اپنے ادوار میں کوششیں کیں کہ پاکستان میں انکم ٹیکس دینے والوں یعنی ٹیکس نیٹ میں اضافہ کیا جائے اور ملکی معیشت کو ڈاکیومنٹڈ کیا جائے لیکن بار بار ایمنٹسی اسکیمیں جاری کرنے کے باوجود اس سلسلے میں کوئی خاطر خواہ کامیابی نہیں ہوئی۔

کاروباری طبقے اور تاجر برادری نے ہمیشہ معیشت کو ڈاکیومنٹڈ کرنے کی کوششوں کی مخالفت کی۔ سیاسی جماعتوں کا بھی اس معاملہ میں کردار منفی اور سیاسی رہا۔ یعنی حکومت میں رہ کر سیاسی جماعتیں کوشش کرتی ہیں کہ ٹیکس نیٹ میں اضافہ ہو، معیشت ڈاکیومنٹڈ ہو، بلیک اکانومی کا خاتمہ ہو لیکن جب یہی سیاسی پارٹیاں اپوزیشن میں ہوتی ہیں تو احتجاج کرنے والے تاجروں اور دوسرے طبقوں کے ساتھ احتجاج میں شامل ہو جاتی ہیں۔ اس معاملہ میں سیاسی جماعتوں کی سیاست نے پاکستان کو بہت نقصان پہنچایا اور ٹیکس چوری ہمیشہ سے بہت بڑا مسئلہ رہا۔

سب کو معلوم ہے کہ عمران خان کے گزشتہ سال نون لیگی حکومت کی ایمنسٹی اسکیم سے متعلق کیا خیالات تھے اور اُنہوں نے اس اسکیم میں حصہ لینے والوں کو کیا دھمکی دی تھی لیکن اس کے باوجود تحریک انصاف حکومت کی ٹیکس نیٹ کو بڑھانے کی کوشش اور معیشت کو ڈاکیومنٹڈ کرنے کی پالیسی پاکستان کے مفاد میں ہے اور اس کی کامیابی پاکستان کی کامیابی ہو گی۔

تحریک انصاف حکومت اور وزیراعظم عمران خان سے ہزار اختلاف کے باوجود تاجر برادری کی ہڑتال کی حمایت نہیں کی جا سکتی۔ چاہے یہ ہڑتالیں کتنی ہی کامیاب کیوں نہ ہوں، ان ہڑتالوں کا کوئی اخلاقی جواز نہیں۔ تاجر برادری کو سمجھنا ہوگا کہ ٹیکس دیئے بغیر پاکستان مزید آگے نہیں چل سکتا، بلیک اکانومی، بے نامی جائیداد اور کاروبار، جعلی اکائونٹس، حوالہ اور ہنڈی کا سلسلہ مزید نہیں چلایا جا سکتا۔ اگر لوگ ٹیکس نہیں دیں گے تو ہمارا کوئی مستقبل نہیں، اس سے پاکستان کو دیوالیہ ہونے کا شدید خطرہ لاحق ہوگا یعنی نقصان پاکستان اور پاکستانیوں کا ہی ہوگا۔ اس لیے ٹیکس نیٹ کو بڑھانے اور معیشت کو ڈاکیومنٹڈ کرنے کی ہر کوشش کی کامیابی کے لیے ہر پاکستانی کو اپنا کردار ادا کرنا چاہئے۔

اس وقت ’’ٹیکس تو دینا پڑے گا‘‘ کے نعرہ کو رواج دینے کی ضرورت ہے اور اس کے لیے سب کو سیاست سے بالاتر ہونا پڑے گا۔ یہاں حکومت پر بھی یہ ذمہ داری عائد ہوتی ہے کہ وہ ایف بی آر میں اصلاحات لائے اور ایسا سسٹم بنائے کہ ٹیکس دینے والوں کو انکم ٹیکس محکمہ کی طرف سے ہراساں اور بلیک میل ہونے سے بچایا جا سکے۔ انکم ٹیکس محکمے کے جو حالات ہیں، اُس کو دیکھتے ہوئے بہت سے ایسے افراد جو ٹیکس نیٹ میں آنا چاہتے ہیں، ڈر جاتے ہیں کیونکہ عمومی طور پر یہ تاثر ہے کہ محکمہ والے ٹیکس دینے والوں کو ہی بلیک میل کرتے ہیں اور جو ٹیکس نیٹ سے باہر ہے، اُسے کچھ نہیں کہا جاتا۔

ضرورت اس امر کی ہے کہ ایف بی آر ٹیکس نیٹ میں شامل ٹیکس دہندگان کو بلیک میل کرنے اور پریشان کرنے کے بجائے ٹیکس نادہندگان کو ٹیکس نیٹ میں شامل کرے۔ انکم ٹیکس محکمہ کو ٹھیک کرنے کے ساتھ ساتھ وزیراعظم عمران خان اور اُن کی حکومت کو یہ بھی سوچنا چاہئے کہ اُن کے دورِ حکومت کے دوران آخر ایسا کیا ہوا کہ کاروباری حالات نہایت ابتر ہو گئے، بیروزگاری کی شرح میں اضافہ ہوا، بہت سے صنعتیں بند ہو چکیں، یہاں تک کہ گاڑیاں بنانے والی اہم ترین کمپنیوں نے اپنی پروڈکشن میں نصف کمی کر دی۔ عمومی طور پر کاروباری طبقہ رو رہا ہے کہ کاروباری حالات بہت خراب ہیں۔ خان صاحب اور حکومت کو یہ بنیادی نکتہ سمجھنا چاہئے کہ اگر کاروبار نہیں ہوگا تو ٹیکس کہاں سے جمع ہوگا۔

کراچی سے خیبر و گلگت بلتستان تک شٹرڈاؤن ہڑتال

لاہور (اپنے رپورٹر سے ) حکومت کی جانب سے نافذ کردہ اضافی ٹیکسوں اور اس کی وصولی کے حوالے سے کئے جانے والے اقدامات کے خلاف ملک بھر کی تاجر برادری آج ہڑتال کررہی ہے لیکن چند شہروں میں تاجر تنظیموں نے ہڑتال سے لاتعلقی کا اعلان بھی کیا ہے۔جس سے جزوی طور کچھ چھوٹی موٹی مارکیٹس بند ہیں ،

تاجروں کا کہنا ہے کہ وفاقی بجٹ نے غریب عوام اور تاجر برادری کی چیخیں نکال دی ہیں اور حکومت عوام کو کسی بھی قسم کا ریلیف دینے سے انکاری ہے، اس سلسلے میں کئے گئے مذاکرات بھی حکومت کی وجہ سے ناکام ہوگئے ہیں۔ جس کے بعد احتجاج کا راستہ اپنایا گیا ہے۔ آج کی ہڑتال وفاقی حکومت کو آئینہ دکھا دے گی۔

اسلام آباد
حکومت کی جانب سے ٹیکسز کے نفاذ کے خلاف وفاقی دارالحکومت کے تاجروں نے شٹر ڈاوٴن ہڑتال کررکھی ہے۔ آبپارہ، جی 10، جی 11 ،ایف 10 مرکز ،فاروقیہ مارکیٹ، میلوڈی ،جناح سپر اور ستارہ مارکیٹ میں مکمل طور پر شٹر ڈاؤن ہے۔

پنجاب میں مکمل تالہ بندی

لاہور سمیت پنجاب کے بیشتر شہروں میں تاجر برادری کی جانب سے ہڑتال کی جارہی ہے تاہم کچھ تاجر تنظیمیں ہڑتال کے بجائے کاروبار کو رواں دواں رکھنے میں مصروف ہیں۔

صوبائی دارالحکومت لاہور میں انجمن تاجران اور پاکستان ٹریڈرز الائنس ہڑتال کے معاملے پر تقسیم ہوگئی ہیں۔ ہال روڈ، مال روڈ، لبرٹی مارکیٹ، بیڈن روڈ، اچھرہ،فیروز پور روڈ، صرافہ مارکیٹ اور جیل روڈ پر دکانیں مکمل بند ہیں جب کہ انارکلی، بادامی باغ، منٹگمری روڈ اور میکلوڈ روڈ میں تاجر تقسیم ہونے کی وجہ سے کاروباری سرگرمیاں جزوی طور پر بحال ہیں۔ جب کہ فلور ملز ایسوسی ایشن نے17 جولائی تک ہڑتال موخر کر دی ہے۔

راولپنڈی، پنڈدادن خان، گجرات، گوجرانوالہ، فیصل آباد، ملتان، مظفرگڑھ ، ڈیرہ غازی خان، لیہ، چکوال، خانیوال، ساہیوال:ہڑپہ،چیچہ وطنی، میاں چنوں، وہاڑی، شورکوٹ اور راجن پور میں تاجر برابری مکمل طور پر متحد ہوکر ہڑتال کررہی ہے جب کہ میانوالی، تونسہ شریف، نور پور تھل اور خانقاہ ڈوگراں میں تاجروں نے ہڑتال سے انکار کردیا ہے۔

تاجروں نے سندھ بند کردیا

ملک کو سب سے زیادہ ٹیکس دینے والے شہر کراچی میں بھی ہڑتال کی جارہی ہے۔ آل کراچی تاجراتحاد، انجمن تاجران میرٹ روڈ، کراچی الیکٹرانکس ڈیلرز ایسوسی ایشن، آل سندھ صراف ایسوسی ایشن اور طارق روڈ بہادرآباد ٹریڈرز الائنس سمیت 450 سے زائد مارکیٹوں کی نمائندہ تنظیموں نے ہڑتال کی حمایت کی ہے، جس کی وجہ سے شہر میں 90 فیصد سے زائد مارکیٹیں ، بازار اور کاروباری مراکز بند ہیں۔

دوسری جانب تاجرایکشن کمیٹی نے ہڑتال سے لاتعلقی کااعلان کردیا ہے، ان کا کہنا ہے کہ حکومت نے ہمارے 11 مطالبات میں سے 10 مطالبات تسلیم کرلیے ہیں، 50 ہزارسے زائد مالیت کی خریداری پرشناختی کارڈ کی شرط صرف رجسٹرڈ تاجروں کے لیے ہے غیررجسٹرڈ کے لیے نہیں ہے۔

شہر قائد کے علاوہ حیدرآباد، سکھر، میرپور خاص، ٹنڈوالہیار، ٹھٹھہ، پڈعیدن، جیکب آباد، نواب شاہ، نوشہرو فیروز، شہدادپور اور ٹنڈوآدم سمیت دیگر چھوٹے بڑے شہروں اور قصبات میں بھی ہڑتال کی جارہی ہے۔

خیبر پختونخواہ

خیبر پختونخوا حکومت اور وفاق کی جانب سے لگائے گئے ٹیکسوں اور پابندیوں کے خلاف دارالحکومت پشاور کے علاوہ صوابی، مردان، نوشہرہ، سوات، کوہاٹ، ڈیرہ اسماعیل خان، خیبر، بنوں اور لوئردیر میں تمام تجارتی مراکز اور کاروباری مراکز بند ہیں۔

پشاور میں مرکزی تنظیم تاجران خیبر پختونخوا کی کال پر مکمل شٹرڈاؤن ہے۔ شہر کے 124 چھوٹے بڑے بازار مکمل بند ہیں۔ ہڑتال کو کامیاب بنانے کے لئے تاجر رہنماؤں نے مختلف بازاروں کے دورے کئے جب کہ دوسری جانب ہڑتال کو ناکام بنانے کیلئے حکومتی حمایت یافتہ تاجر تنظیم دکانیں کھولنے کی کوشش کر رہی ہے۔

بلوچستان میں بھی ہڑتال

کوئٹہ سمیت بلوچستان بھر کے تاجر بھی حکومت کی ٹیکس پالیسیوں کے خلاف کئے جانے والے احتجاج میں شامل ہیں۔

صوبائی دارالحکومت کی اہم کاروباری مراکز منی مارکیٹ، نواں کلی،سریاب روڈ،جوائنٹ روڈ اور باچا خان چوک میں مکل ہڑتال ہے، اس کے علاوہ حب، چمن، گوادر، کچلاک، سبی، قلات، زیارت اور قلعہ عبداللہ سمیت دیگر قصبات میں بھی کاروبار مکمل طور پر بند ہے۔

گلگت بلتستان کے تاجر ہڑتال میں شامل

بلتستان ڈویژن کے تمام اضلاع میں تاجروں نے حکومتی اقدامات پر عدم اعتماد کا اظہار کردیا ہے اور ملک کے دیگر علاقوں کی طرح ٹیکسز اور مہنگائی کے خلاف بھر پور ہڑتال کررکھی ہے۔