Tag lahore

جائیداد خریداری سے قبل آن لائن پراپرٹی کے کاغذات کی جانچ سمیت جائیداد پر مقدمہ ہے تو وہ بھی معلوم ہوسکے گا
کراچی(ایمرا نیوز آن لائن) سندھ بورڈ آف ریونیو نے جائیداد کے کاغذات کی صرف 150 روپے میں جانچ پڑتال کا سسٹم متعارف کروا دیا۔بورڈ آف ریونیو نے اصلاحات پروگرام اور کاروبار کو آسان بنانے کے منصوبے کے تحت اراضیوں پر قبضوں، جعلی دستاویزات اور دہرے الاٹمنٹس کی روک تھام کے لیے بڑے نوعیت کے فیصلے کیے ہیں۔اصلاحات پروگرام کے تحت اب ہر شہری کو جائیداد کی خریداری سے قبل آن لائن پراپرٹی کے کاغذات کی جانچ سمیت جائیداد پر اگر کوئی مقدمہ بھی ہے تو معلوم ہوسکے گا جبکہ بورڈ آف ریونیو کے متعارف کردہ مثالی پورٹل سے شہریوں کو صرف 150 روپے کی قانونی فیس کے عوض دستاویزات کی جانچ پڑتال کی سہولت حاصل ہوگئی ہے۔بورڈ آف ریونیو سندھ کے ممبر آر اینڈ ایس روشن علی شیخ نے بتایا کہ سندھ میں سب رجسٹرار کے اختیارات کو بھی کم کرنے کا فیصلہ کرلیا گیا ہے اور دستاویزات کی جانچ کے لیے سب رجسٹرار کے وقت کو تین ماہ سے تین دن مقرر کردیا گیا ہے۔انہوں نے بتایا کہ جائیداد کی دستاویزات کی منتقلی کے لیے 3روز سے زائد لگنے پر سب رجسٹرار کو معطل کرنے کے ساتھی سخت تادیبی کاروائی بھی عمل میں لائی جائےگی اور اس ضمن میں رواں ہفتے ہی نوٹی فکیشن جاری کردیا جائےگا۔روشن علی شیخ نے بتایا کہ بورڈ ریونیو میں پہلے پراپرٹی رجسٹریشن کے لیے 7 ماہ کا وقت درکار ہوتا تھا لیکن اب اس مدت کو گھٹا کر17 دن کردیا گیا ہے، مستقبل میں اس مدت کو مزید گھٹا کر6 یوم کرنے کا ہدف مقرر کیا گیا ہے۔ انہوں نے بتایا کہ اب بورڈ آف ریونیو کے پورٹل کے توسط سے سندھ بھر کی تمام رجسٹریز آن لائن چیک کی جاسکتی ہیں۔انہوں نے بتایا کہ بورڈ کی آٹومیشن ٹیم کو ڈیجیٹلائزیشن کے عمل کے دوران سندھ میں اب تک 63ہزار زمینوں کی جعلی انٹریز کا انکشاف ہوا ہے ،تاہم ان تمام جعلی انٹریز کے ریکارڈ کو 3ماہ میں درست کرلیا جائےگا۔ انہوں نے کہا کہ شہری اب زمین کی جانچ کے لیے پریشان نہ ہوں کیونکہ پورے سندھ کی زمین کا ڈیٹا آن لائن کردیا گیا ہے۔انہوں نے بتایا کہ بورڈ آف ریونیو کے اصلاحات پروگرام کا دوسرا مرحلہ مکمل ہونے کی صورت میں زمین کی جانچ پڑتال گھر بیٹھے ہوسکے گی، کراچی میں بورڈ آف ریونیو کی اراضی کا حصہ 70 فیصد ہے، بورڈ کی ڈیجیٹلائزیشن کےساتھ اب کے ڈی اے، کے ایم سی، ایل ڈی اے، ایم ڈے کےساتھ نجی ہاؤسنگ سوسائٹیز کو بھی ڈیجیٹلائزیشن میں آنا ہوگا اس وقت صرف ڈی ایچ اے کا ڈیٹا ڈیجیٹلائز ہے۔روشن شیخ نے کہا کہ تمام ڈیٹا سامنے آنے پر ایک پراپرٹی کے دہرے دستاویزات والے الاٹمنٹس کی شکایت بھی ختم ہوجائےگی، اب میر پور خاص یا مٹھی کی پراپرٹی کے کاغذات بھی کراچی میں بیٹھ کر چیک کیے جا سکتے ہیں۔انہوں نے بتایا کہ بورڈ آف ریونیو نے رواں سال 9ارب 40کروڑ روپے کے اسٹیمپ سے ریونیو حاصل کیا ہے، آٹومیشن مکمل ہونے کے بعد توقع ہے کہ اسٹیمٹ ریونیو کی وصولیاں 60 فیصد بڑھ جائیں گی، ڈیجیٹلائزیشن مکمل ہونے کے بعد اسٹیمپ سے ریونیو وصولیوں کا حجم 15 ارب روپے تک بڑھنے کی توقع ہے۔روشن شیخ نے بتایا کہ آن لائن سہولت کی مکمل فراہمی اور اسٹیمپ آٹومیشن کے بعد سب رجسٹراد کی کمائی ختم ہوجائےگی جس کے بعد کوئی بھی سب رجسٹرار کے عہدے پر تقرری پسند نہیں کرے گا۔ انہوں نے بتایا کہ وزیر اعلیٰ سندھ نے بورڈ آف ریونیوسمیت متعلقہ اداروں کی ڈیجیٹلائزیشن پر خصوصی توجہ مرکوز کی ہوئی ہے، بورڈ نے بینکوں کو بھی الیکٹرانک لنک فراہم کیا ہے۔

نیویارک (ایمرا نیوز آن لائن) ہالی ووڈ اینی میٹڈفینٹیسی فلم” ڈمبو“(Dumbo)29مارچ کو سینما گھروں کی زینت بنے گی۔خبر رساں ادارے کے مطابق ٹم برٹن کی ہدایتکاری میں بننے والی اس فلم کی کہانی ایک ایسے سرکس کے معروف فنکار کے گرد گھوم رہی ہے ،جسے ایک ہاتھی کی دیکھ بھال کی ذمہ داری سونپی جاتی ہے اور اس ہی دوران اس پر یہ انکشاف ہوتا ہیکہ ہاتھی آڑنے کی صلاحیت بھی رکھتا ہے۔فلم کی کاسٹ میں کولن فیرل،مائیکل کیٹن،ڈینی ڈیویٹو،ایوا گرین،ایلن آرکن،جوزف گیٹ اور نیکو پارکر سمیت دیگر اداکار شامل ہیں۔

لیڈی گاگا نے 19 اکتوبر 2018 کو خود سے 17 سال بڑے اور ٹیلنٹ ایجنٹ 49 سالہ کرسٹیئن کرنیو سے منگنی کرلی تھی
لاس اینجلس (ایمرا نیوز آن لائن) ہالی وڈ اداکارہ اور گلوکارہ لیڈی گاگا کی منگنی ٹوٹنے کی تصدیق ہو گئی۔ لیڈی گاگا نے 19 اکتوبر 2018 کو خود سے 17 سال بڑے اور ٹیلنٹ ایجنٹ 49 سالہ کرسٹیئن کرنیو سے خاموشی سے منگنی کرلی تھی۔اگرچہ ان دونوں کی مگنی کی خبریں بھی کئی ماہ سے گردش میں رہیں ،تاہم اکتوبر میں گلوکارہ نے پہلی بار خود اعتراف کیا کہ انہوں نے کرسٹیئن کرنیو سے منگنی کرلی ہے۔لیڈی گاگا کی کرسٹن کیرینو کے ساتھ دوستی دو سال قائم رہی تاہم اختلافات کے باعث علیحدگی پر منتج ہوئی۔ذرائع ابلاغ کے مطابق گلوکارہ لیڈی گاگا کے نمائندے نے ان کے منگیتر کرسٹن کیرینو کےساتھ منگنی ٹوٹنے کی تصدیق کر دی۔ ان کا اس خبر کی تصد یق کرتے ہوئے کہنا تھا کہ کچھ رشتوں کا ختم ہونا قائم رہنے سے بہتر ہوتا ہے۔ قبل ازیں لیڈی گاگا سابق منگیتر کرسٹن کو اپنی زندگی کے اہم حصے کے طور پر متعارف کروایا کرتی تھیں۔

فلم 29مارچ کو سینما گھروں کی زینت بنے گی
لاس اینجلس (ایمرا نیوز آن لائن) ہالی ووڈ کرائم ڈرامہ فلم” دی ہائی وے مین“کا پہلاٹریلر جاری کردیا گیا ہے۔جوہن لی کی ہدایتکاری میں بننے والی اس فلم کی کہانی دو ریٹائرڈ پولیس اہلکاروں کے گرد گھوم رہی ہے جو ایک بد نام زمانہ جرائم پیشہ گروہ کو پکڑنے کیلئے نکل پڑتے ہیں۔فلم کی کاسٹ میں کیون کوسنر،ووڈی ہارلسن،کم ڈکینز،جوہن کیرول،تھامس مین،ڈیوڈ فر اور کیتھی بیٹز سمیت دیگر اداکار شامل ہیں۔مائیکل جے میلون اور کاسے سلور کی مشترکہ پروڈیوس کردہ سنسنی سے بھرپور یہ فلم 29مارچ کو سینما گھروں کی زینت بنے گی۔

جس پراجیکٹ میں سدھو ہوں گے دیگر اراکین کام نہیں کریں گے :سربراہ فیڈریشن بی این تیواری
ممبئی(ایمرا نیوز آن لائن)سابق بھارتی کرکٹر اور سیاستدان نوجوت سنگھ سدھو پر پاکستان کی حمایت میں بیان دینے پرفلم سٹی میں داخلے پر پابندی عائد کردی گئی ہے ۔بھارتی خبر رساں ادارے کی رپورٹ کے مطابق پلوامہ حملے پر پاکستانی حمایت میں دئیے گئے بیان کے بعد نوجوت سنگھ سدھو کی مشکلات میں غیر معمولی حد تک اضافہ ہو گیا ہے ۔”دی کپل شرما“ شوسے نکالے جانے کے بعد ممبئی کی فلم سٹی میں بھی سدھوکے داخلے پر پابندی عائد کردی گئی ہے۔فیڈریشن آف ویسٹرن انڈیا سینے امپلوائز کے سیکریٹری جنرل اشوک دوبے نے فلم سٹی انتظامیہ کو خط لکھا تھا ،جس میں کہا گیا تھا کہ سدھو کے فلم سٹی میں داخلے پر مکمل پابندی عائد کی جائے۔دوسری جانب سربراہ فیڈریشن بی این تیواری نے کہا ہے کہ پاکستان کی حمایت کرنے پر سدھوکے فلم سٹی میں داخلے پرپابندی عائد کردی گئی ہے۔ فیڈریشن نے واضح کیا کہ جس پراجیکٹ میں نوجوت سنگھ سدھو شامل ہوں گے فیڈریشن سے منسلک اراکین اس پراجیکٹ میں کام نہیں کریں گے۔

کوئٹہ(ایمرا نیوز آن لائن)بلوچستان میں حالیہ بارشوں کے باعث تحصیل اوتھل میں 3 افراد جاں بحق ہوگئے، وزیراعلیٰ بلوچستان جام کمال کی جانب سے صوبے بھر میں ایمرجنسی نافذ کرکے ریسکیو آپریشن کیا جارہا ہے۔اسسٹنٹ کمشنر بیلہ جمیل بلوچ کے مطابق تحصیل بیلہ میں ریسکیو آپریشن مکمل کیا جاچکا ہے تاہم بارشوں کے باعث ہونے والے نقصانات کا اندازہ لگانے کےلیے سروے کا عمل جاری ہے۔انہوں نے بتایا کہ بارشوں سے تحصیل بیلہ میں کوئی جانی نقصان نہیں ہوا تاہم فصلوں کو نقصان پہنچا ہے، جبکہ تحصیل اوتھل سے 3 لاشیں ملی ہیں اور بارش کے پانی میں 6 سے 7 افراد کے پھنسے رہنے کی اطلاع ہے جنہیں ریسکیو کرنے کے لیے روشنی ہوتے ہی آپریشن کیا جائے گا۔ پھنسے ہوئے افراد محفوظ مقام پر ہیں جس کے باعث ان کی جانوں کو کوئی خطرہ نہیں ہے۔

مظفر آباد(ایمرا نیوز آن لائن)آزاد کشمیر میں وادی نیلم اور پنجاب کے شہر لودھراں میں برفانی تودہ اور مکان کی چھت گرنے کے نتیجے میں 4 افراد جاں بحق اور 5 زخمی ہو گئے۔آزاد کشمیر کی وادی نیلم میں برفانی تودہ گرنے سے بچے سمیت 2 افراد جاں بحق اور 4 زخمی ہو گئے۔ وادی نیلم میں سام گام کے مقام پر برفانی تودہ گرنے کا واقعہ پیش آیا جس کے نتیجے میں بچےسمیت 2 افراد جاں بحق، 4 زخمی ہوگئے جبکہ 2 مکانات کو بھی نقصان پہنچا ہے۔آزاد کشمیر کے علاقے میرپور میں لینڈ سلائیڈنگ سے 10 سے زائد مکانات تباہ ہوگئے۔پنجاب کے علاقے لودھراں میں بارش کےباعث مکان کی چھت گر گئی، ملبے تلے دب کر ماں بیٹی جاں بحق ہو گئیں جبکہ دوسری بیٹی زخمی ہوئی ہے۔محکمہ موسمیات نے ملک میں موسم خشک اور سرد رہنے کی پیشگوئی کی ہے، گلگت بلتستان اور کشمیر سمیت پہاڑی علاقوں میں گرج چمک کے ساتھ بارش اور برف باری کا امکان ہے۔بلوچستان میں سیلاب کی تباہ کاریوں کے بعد بیلا اور اوتھل میں امدادی کام مکمل ہوگیا،3 لاشیں اور سیلاب میں پھنسے افراد کو نکال لیا گیا۔لاکڑہ میں پھنسے افراد کےلیے پاک فوج ریسکیو آپریشن کرے گی، بلوچستان کو سندھ سے ملانےوالے واحد پل پر خطرناک کریک پڑ گئے،جبکہ بارشوں کے بعد حب ڈیم میں پانی کی سطح 298 فٹ تک پہنچ گئی۔

پاکستانی نشانہ بازوں کو ویزا جاری نہ کرنے پر آئی او سی ایگزیکٹو بورڈ کی بھارت کو ایونٹس کی میزبانی نہ دینے کی سفارش
بھارت میں اس وقت تک اولمپکس مقابلوں کا انعقاد نہ کیا جائے جب تک وہ مذکورہ شرائط پر پورا نہ اترے ،آئی او سی
سوئٹزرلینڈ(ایمرا نیوز آن لائن)انٹرنیشنل اولمپک کمیٹی ( آئی او سی) نے پاکستانی نشانہ بازوں کو ویزا جاری نہ کرنے پر بھارت میں مستقبل کے ایونٹس کی میزبانی پر ہونے والی بات چیت معطل کردی۔آئی او سی ایگزیکٹو بورڈ نے بین الاقوامی فیڈریشنز سے بھی بھارت کو ایونٹس کی میزبانی نہ دینے کا کہہ دیا اور کہا ہے کہ جب تک بھارت کھیلوں میں تعصب کا خاتمہ اور اولمپک چارٹر کی پابندی یقینی نہیں بناتا ایونٹس کی میزبانی نہ دی جائے۔پاکستانی نشانہ باز جی ایم بشیر اور خلیل احمد نے 2020 میں ہونے والے اولمپکس مقابلوں کے لیے بھارت میں منعقدہ کوالیفائر میچز میں حصہ لینے کے لیے ویزا کے لیے اپلائی کیا تھا تاہم پلوامہ حملے کے بعد بھارت نے پاکستانی نشانہ بازوں کو ویزا جاری نہیں کیے۔ آئی او سی کا کہنا ہے کہ بھارت کو مستقبل میں اولمپکس سے متعلق کسی بھی کھیل کے انتظامات کی اجازت اس وقت تک نہیں دی جائے گی جب تک بھارتی حکومت بلاتفریق انعقاد کی تحریری طور پر یقین دہانی نہ کرادے۔آئی او سی نے بھارت میں ہونے والے شوٹنگ ورلڈ کپ کے 25 میٹر ریپڈ فائر ایونٹ کا اولمپک کوالیفائر کا درجہ بھی دستبردار کردیا۔انٹرنیشنل اولمپک کمیٹی کے ایگزیکٹو بورڈ نے فیصلہ کیا کہ مستقبل میں بھارت میں اولمپک مقابلوں کے انعقاد کے لیے بھارت کو دیے جانے والے این او سی سے متعلق بات چیت اس وقت تک معطل رہے گی جب تک بھارتی حکومت تعصب سے پاک برتاؤ کے اولمپکس قوانین پر عملدرآمد نہ کرے۔آئی او سی نے انٹرنیشنل فیڈریشن سے سفارش بھی کی کہ بھارت میں اس وقت تک اولمپکس مقابلوں کا انعقاد نہ کیا جائے جب تک وہ مذکورہ شرائط پر پورا نہ اترے۔

شہادت کے بعد وادی کے لوگ سراپا احتجاج ، دفعہ 144 بھی نافذ،موبائل اورانٹرنیٹ سروس معطل
سری نگر (ایمرا نیوز آن لائن)ضلع سوپورمیں بھارتی فورسزنے آپریشن کے دوران ایک اورکشمیری کوشہید کردیا۔ میڈیا رپورٹس کے مطابق مقبوضہ کشمیرکے ضلع سوپورمیں قابض بھارتی فوجیوں نے ایک بارپھرآپریشن کی آڑمیں کشمیری نوجوان کو شہید کردیا۔ بھارتی فورسز کا سرچ آپریشن تاحال جاری ہے اورشہادت کے بعد وادی کے لوگ سراپا احتجاج ہیں۔ ضلع بھر میں موبائل اورانٹرنیٹ سروس معطل کردی گئی ہے جب کہ دفعہ 144 بھی نافذ کردی گئی ہے۔بھا رتی فوجی نے اس متعلق میڈیا سے بات کرتے ہوئے کہا کہ مرنے والا کشمیری نوجوان عسکریت پسند تھا جو آپریشن میں مارا گیا۔

کابل(ایمرا نیوز آن لائن)افغان طالبان کا کہنا ہے کہ جنگجو گروپ کے راہنما ملا عبدالغنی برادر آئندہ ہفتے قطر میں ہونے والے مذاکراتی عمل میں شریک نہیں ہوں گے ۔ غیر ملکی خبررساں ادارے کے مطابق افغان طالبان کی جانب سے جاری ہونے والے بیان میں کہا گیا ہے کہ مذاکراتی عمل میں طالبان کے نمائندے اور امریکی حکام براہ راست ملاقات کریں گے ۔ بیان میں کہا گیا ہے کہ سفری کاغذات اور دیگر انتظامی وجوہات کی بنا پر ملابرادر سفر کرنے کے اہل نہیں ۔ واضح رہے کہ امریکہ کی کوشش ہے کہ وہ اس مذاکراتی عمل میں سینئر طالبان رہنماؤں سے ملاقاتین کرے تاکہ افغانستان میں قیام امن کی کوششوں میں تیزی آ سکے ۔( جاوید)