Tag lollywood

کراچی(ایمرا نیوز آن لائن) پاکستان شوبزانڈسٹری کی نامورفنکارہ بشریٰ انصاری نے بچوں کے ساتھ بڑھتے ہوئے جنسی زیادتی کے واقعات پرکہا ہے کہ ان واقعات کی روک تھام کے لیے دینی مدارس اور مولویوں کے کمروں میں کیمرے لگائے جائیں۔اداکارہ بشریٰ انصاری کی ایک ویڈیوسوشل میڈیا پر وائرل ہورہی ہے جس میں وہ مدرسوں میں پڑھنے والے معصوم بچوں کے ساتھ ہونے والے جنسی زیادتی کے واقعات اوراسکولوں میں طالبعلموں کے ساتھ اساتذہ کے بہیمانہ سلوک پرنہ صرف بات کرتی ہوئی نظر آرہی ہیں بلکہ انہوں نے ان واقعات کی روک تھام کے لیے مسئلے کا حل بھی پیش کیا ہے۔

بشریٰ انصاری نے کہا دینی مدارس میں تنہائی کا ماحول زیادہ ہوتا ہے، مسجد اور مدرسہ ہونے کے باعث تعظیم کی وجہ سے وہاں شورنہیں ہوتا، زیادہ لوگ نہیں ہوتے اورمخصوص ماحول ہوتا ہے لہذٰا وہاں ان لوگوں کوموقع مل جاتا ہے۔ اسلیے ہرمدرسے اورہر مولوی کے کمرے میں کیمرے لگائیں۔ اس کے علاوہ اسکول میں موجود اساتذہ جو طالبعلموں پرتشدد کرتے ہیں، انہیں مختلف طرح سے اذیتیں دیتے ہیں انہیں تھپڑوں سے، لکڑی سے مارتے ہیں الٹا ٹانگ دیتے ہیں ان اسکولوں میں بھی کیمرے لگائے جانے چاہیئں تاکہ اس طرح کے لوگوں پرنظر رکھی جاسکے۔
یہ بھی پڑھیں: پنوعاقل میں طالبہ سے زیادتی کے الزام میں مدرس گرفتار

بشریٰ انصاری نے کہا کمزوراورجابرکا رشتہ بہت پرانا ہے جہاں کسی کے پاس کوئی اختیارآجاتا ہے وہ اپنی ساری فرسٹریشن بیچارے مظلوم پرنکالتا ہے پھر چاہے وہ کوئی عورت ہو، اس کی بیوی ہویا پھر کوئی طالبعلم ہو۔

بشریٰ انصاری نے مزید کہا کہ آبادی میں اضافے کی وجہ بھی ان واقعات میں اضافے کا ایک سبب ہے ۔ زیادہ بچے لوگوں سے سنبھالے نہیں جاتے اور والدین اپنے بچوں پر پوری طرح نظرنہیں رکھ پاتے، کچھ لوگ تو صرف اس لیے اپنے بچوں کو مدرسے میں ڈال دیتے ہیں کہ وہاں انہیں کھانا بھی ملے گا، قرآنی تعلیم بھی ملے گی اوریہ بچے ہمیں جنت میں بھی لے جائیں گے لیکن دراصل قرآنی تعلیم کی ضرورت ان والدین کو ہے آپ خود قرآن پڑھیے اورترجمے سے سمجھئے اورپھر اپنے بچوں کو خود قرآن پڑھائیں لیکن جن کے 12، 14 بچے ہوں گے وہ کہاں پڑھائیں گے ان کے لیے تو صبح سے شام اتنے بچوں کے ساتھ کام مشکل ہوجاتا ہے

اداکارہ بشریٰ انصاری نے بچوں کے ساتھ زیادتی کرنے والے درندوں کو سزائے موت دینے کی بات پرکہا کہ ایسے درندوں کو فوراً سزائے موت نہیں دینی چاہیئے بلکہ رفتہ رفتہ دینی چاہیئے۔ سزائے موت دینے سے پہلے ان لوگوں کواتنی تکلیف اور ذہنی اذیت دیں جتنی انہوں نے بچوں کوتکلیف اورذہنی اذیت دی ہے۔ تو شاید اس طرح لوگوں میں خوف پیدا ہوگا اوروہ بچوں کے ساتھ زیادتی کرنے سے پہلے سوچیں گے کہ اگر ہم نے یہ مکروح فعل کیا تو ہمارے ساتھ بھی یہی سب ہوگا۔ مجھے یہ نہیں معلوم کہ ہمارے قانون میں یہ سزا قابل قبول ہے یا نہیں لیکن اصولاً تو یہی ہونا چاہیئے۔

بشریٰ انصاری نے زیادتی جیسے قبیح فعل کے لیے ملک میں رائج قوانین میں ترامیم کرنے کا بھی مطالبہ کرتے ہوئے کہا کہ ان قوانین میں حالات کے حساب سے تبدیلی ہونی چاہیئے۔

کراچی(ایمرا نیوز آن لائن)اداکارہ و میزبان حنا الطاف کا کہنا ہے کہ اداکار فیصل رحمان کے ساتھ رومانوی سین کرنا سب سے مشکل رہا کیونکہ وہ کچھ زیادہ ہی رومانوی ہو جاتے ہیں۔اداکارہ نے ناشپاتی پرائم کے شو ’ٹو بی اونسٹ‘ میں کچھ ماہ قبل ایک انٹرویو دیا تھا جس کی مکمل قسط اب یوٹیوب پر ریلیز کی گئی ہے۔اس ویب شو کی ایک کلپ سوشل میڈیا پر خوب وائرل ہو رہی ہے جس میں اداکارہ حنا الطاف فیصل رحمان کے ساتھ رومانوی سین کے حوالے سے گفتگو کر رہی ہیں۔

انٹرویو میں اداکارہ سے فواد خان کے ساتھ رومانوی سین کرنے کے حوالے سے ایک سوال پوچھا گیا جس پر وہ کہتی ہیں کہ ’میں نے عماد عرفانی کے ساتھ بھی رومانوی سین کیے ہیں لیکن اداکار فیصل رحمان کے ساتھ رومانوی سین کرنا سب سے مشکل رہا‘۔

حنا الطاف نے کہا کہ فیصل رحمان بہت زیادہ ہی رومانوی ہو جاتے ہیں، یعنی اگر کسی سین میں انگلی پکڑنی ہو گی نا تو وہ بندہ ہاتھ پکڑ لیتا ہے، مجھے اپنا الارم آن رکھنا پڑتا ہے کہ بس ابھی کچھ ہو جائے گا جس پر شو کے میزبان مزاحیہ انداز میں کہتے ہیں کہ یہ رومانٹک نہیں ہے اسے کیس کہتے ہیں کیونکہ آپ ان کو انگلی دیتی ہیں تو وہ ہاتھ پکڑ لیتے ہیں۔

جس پر اداکارہ حنا الطاف نے کہا کہ میں نے تو فیصل رحمان کو ’می ٹو‘ کہہ کر ڈرانا شروع کر دیا تھا۔حنا الطاف کی منیب پر تنقید نے اہلیہ ایمن خان کو طیش دلادیا دوسری جانب انٹرویو کے دوران اداکارہ سے سیاست کے حوالے سے بھی سوال پوچھا گیا جس پر حنا الطاف کا کہنا تھا انہیں سیاست میں صفر دلچسپی ہے۔

واضح رہے کہ چند ماہ قبل حنا الطاف کی اسی شو کی کلپ وائرل ہوئی تھی جس میں انہوں نے منیب بٹ کی اداکاری اور ایمن کی شادی کے حوالے سے بھی تنقید کی تھی جو سوشل میڈیا پر خوب وائرل ہوئی تھی۔

لالی وڈ(ایمرا نیوز آن لائن)مقبول ترین لالی وڈ اداکارہ میرا نے حال ہی میں فوٹو شیئرنگ ایپ انسٹاگرام پر اپنے ماضی کی کئی تصاویر شیئر کیں لیکن ایک ہی تصویر بار بار شیئر کرنے پر انہیں تنقید کا بھی سامنا کرنا پڑ رہا ہے۔اداکارہ نے مداحوں کے ساتھ ایسی بے شمار پرانی تصاویر شیئر کیں جو اس سے پہلے کسی نے بھی نہیں دیکھی ہوں گی۔

میرا نے پرانے اداکار اور اداکاراؤں کے ساتھ اپنی متعدد تصاویر بھی شیئر کی ہیں جنہیں دیکھنے کے بعد کئی سوشل میڈیا صارفین نے ان کا مذاق اُڑایا اور تنقید بھی کی۔میرا پر تنقید کی ایک وجہ یہ بھی تھی کہ انہوں نے ایک تصویر کو 10 10 بار اپ لوڈ کیا۔ یہ بات ابھی واضح نہیں کہ یہ میرا نے غلطی یا بے وقوفی سے کیا یا ان کا اکاؤنٹ ہیک ہوا؟

آئیے، اب ہم آپ کو اداکارہ کے ماضی کی کچھ جھلکیاں دکھانے کے ساتھ ساتھ یہ بھی بتائیں کہ ان تصاویر کو دیکھنے کے بعدسوشل میڈیا صارفین کی کیا رائے ہے۔اداکارہ میرا کی جانب سے شیئر کی جانے والی متعدد تصاویر پر سوشل میڈیا صارفین کی جانب سے تاحال دلچسپ تبصروں کا سلسلہ جاری ہے۔زیبو عزیز صارف نے کہا کہ ’میرے خیال میں شاید ان کا اکاؤنٹ کسی نے ہیک کرلیا ہے‘۔

مقدس نامی صارف نے لکھا کہ ’میں انہیں اَن فولو کر رہی ہوں ورنہ تو میں پاگل ہوجاؤں گی‘۔ایک صارف نے ہاتھ جوڑنے والے ایموجی کے ساتھ کمنٹ کیا کہ ’میرا جی اب بس بھی کردو‘۔ماہا کیانی نامی صارف نے کہا کہ ’لگتا ہے میرا جی خود ہی اکاؤنٹ چلا رہی ہیں‘۔

لاہور(ایمرا نیوز آن لائن)راک اسٹار علی ظفر کے چند ماہ قبل ریلیز ہونے والے بلوچی گانے ’لیلیٰ او لیلیٰ‘ کو یوٹیوب پر اب تک ایک کروڑ سے زائد بار دیکھا جا چکا ہے۔ یہ کلاسیکل بلوچی گانا 11 اکتوبر 2019 کو ریلیز کیا گیا تھا جسے راک اسٹار علی ظفر اور بلوچستان کی 12 سالہ گلوکارہ عروج فاطمہ نے بتایا اور اس گانے کو یوٹیوب پر اب تک ایک کروڑ سے زائد بار دیکھا جا چکا ہے۔

’لیلیٰ او لیلیٰ‘ گانے کی میوزک ویڈیو میں عروج کی گلوکاری کےساتھ ساتھ بلوچستان کے خوبصورت مناظربھی دکھائے گئے ہیں۔اسی ضمن میں گلوکار علی ظفر نے ٹوئٹر پر اپنی خوشی کا اظہار کرتے ہوئے ایک ٹوئٹ پیغام جاری کیا۔

علی ظفر کا کہنا تھا کہ ’یہ دیکھ کر بہت حیرت اور خوشی ہوئی ہے کہ ’لیلیٰ او لیلیٰ‘ گانے کو یوٹیوب پر اب تک ایک کروڑ سے زائد بار دیکھا جا چُکا ہے‘۔

لاہور(ایمرا نیوز آن لائن)اداکارہ مہوش حیات نے گزشتہ روز امریکی فضائی حملے میں جاں بحق ہونے والے ایرانی کمانڈر قاسم سلیمانی کے قتل کی مذمت کی ہے۔سیاست کی بات کی جائے یا کسی سماجی مسائل کی تو ستارہ امتیاز حاصل کرنے والی پاکستانی اداکارہ مہوش حیات ٹوئٹر پر اپنے خیالات کا اظہار کرنے میں کبھی پیچھے نہیں رہتی۔

مہوش حیات نے ٹوئٹر پر ایرانی کمانڈر قاسم سلیمانی کے قتل کی مذمت کرتے ہوئے لکھا کہ ’’یقین نہیں ہو رہا کہ نئے سال کے 72 گھنٹے گزرنے کے بعد ہی دنیا جنگ کے دہانے پر کھڑی ہے‘‘۔

اداکارہ نے مزید لکھا کہ ’’ایسا تب ہی ہوتا ہے جب آزاد ممالک کے رہنما بین الاقوامی قوانین اور حالات کی پرواہ کیے بغیر یکطرفہ فیصلےکرتے ہیں اور یہ صرف ایران اور امریکا تک ہی محدود نہیں، اللّہ ہماری حفاظت کرے‘‘۔

مہوش حیات اپنے ٹوئٹ پیغام کے اختتام میں ہیش ٹیگ ’سلیمانی‘ بھی لکھا۔ایک صارف نے مہوش کے ٹوئٹ پر طنزیہ کمنٹ لکھا کہ’جب سے خواتین نے بین الاقوامی امور میں دلچسپی لینا شروع کیا ہے۔‘

مہوش نے صارف کو جواب دیتے ہوئے لکھا کہ ’’فرانس کی عظیم خاتون جون آف آرک، حسن و خوبصورتی کی شاہکار قدیم مصری ملکہ قلوپطرہ، برطانیہ کی پہلی خاتون وزیرِاعظم مارگریٹ تھیچر اور پاکستان کی واحد خاتون وزیر اعظم بے نظیر بھٹو شہید کا نام لیتے ہوئے کہا کہ یہ تو محض چند نام ہیں‘‘۔

اداکارہ نے صارف کے کمنٹ کا جواب دیتے ہوئے مزید کہا کہ ’’وہ وقت آگیا ہے کہ آپ اپنی اس چھوٹی جگہ سے باہر آجائیں جہاں آپ رہ رہے ہیں اور کافی سے لطف اندوز ہورہے ہیں‘‘۔

واضح رہے کہ گزشتہ روز ایرانی پاسدارانِ انقلاب کی قدس فورس کے سربراہ میجر جنرل قاسم سلیمانی عراق میں امریکی راکٹ حملے میں جاں بحق ہوگئے تھے۔

لاہور(ایمرا نیوز آن لائن) قندیل بلوچ کیس: سعودی عرب میں گرفتار مقتولہ کا بھائی پاکستان کے حوالے ماڈل گرل قندیل بلوچ کو 15 جولائی 2016 کو مظفرآباد میں غیرت کے نام پر قتل کیا گیا تھا سعودی انٹرپول نے قندیل بلوچ قتل کیس کے اشتہاری ملزم اور مقتولہ کے بھائی ملزم مظفراقبال کو پاکستان کے حوالے کردیا۔ ماڈل گرل قندیل بلوچ کو 15 جولائی 2016 کو مظفرآباد میں غیرت کے نام پر قتل کیا گیا تھا، قتل کیس کی 152 سماعتیں ہوئیں جو 17 جولائی 2016 سے 26 ستمبر 2019 تک جاری رہیں۔

عدالت نے کیس کے مختصر فیصلے میں لکھا تھا کہ مقتولہ کے بھائی ملزم وسیم نے اقبال جرم کیا جس پر اسے عمر قید کی سزا سنائی جاتی ہے جب کہ دیگر تمام ملزمان جن میں مفتی عبدالقوی سمیت قندیل بلوچ کے بھائی عارف، مظفر اقبال، کزن حق نواز، اسلم شاہین اور ٹیکسی ڈرائیور عبدالباسط شامل تھے کو بری کر دیا گیا تھا۔

مقتولہ قندیل بلوچ کے دونوں بھائی عارف اور مظفر مقدمے میں نامزد تھے جو فرار ہو کر سعودی عرب چلے گئے تھے۔گزشتہ برس اکتوبر میں ملزم عارف کو انٹرپول کی مدد سعودی عرب سے گرفتار کر کے ملتان منتقل کیا گیا تھا اور اب دوسرے بھائی ملزم مظفراقبال کو پاکستان کے حوالے کر دیا گیا ہے۔واضح رہے کہ قندیل بلوچ کے والد عظیم کی جانب سے عدالت میں درخواست دائر کی گئی تھی جس میں کہا گیا تھا کہ ہم نے اللہ کی رضا کی خاطر اپنے بیٹوں کو معاف کر دیا ہے لہذا عدالت بھی انہیں معاف کر دیا جائے۔

لاہور(ایمرا نیوز آن لائن)ماہرہ شوٹنگ کس وجہ سے منسوخ کرتی ہیں؟ماہرہ خان نے انکشاف کیا ہے کہ وہ بالی ووڈ کی کامیاب ترین فلم ’دل والے دلہنیا لے جائیں گے‘ بغیر بور ہوئے 10 سے زائد بار دیکھ سکتی ہیں۔

مائیکرو بلاگنگ سائٹ ٹوئٹر پر ماہرہ خان نے ’آسک ماہرہ‘ کا سیشن رکھا جس میں انہوں نے مداحوں کے سوالوں کے جواب دیئے۔ماہرہ کے اس سیشن میں ناصرف ان کے مداحوں نے بڑھ چڑھ کر حصہ لیا بلکہ مشہور و معروف شخصیات نے بھی ماہرہ سے سوالات کئے۔صارف نے ماہرہ سے گلوکار عاطف اسلم کے پسندیدہ گانے پوچھے تو ماہرہ نے عاطف اسلم کے تین گانے میری کہانی، ہونا تھا پیار، ربا سچیا کا نام لیا۔

عثمان نامی ایک صارف نے پوچھا کہ کیا کبھی ایرانی فلم میں کام کرنے کے بارے میں سوچا ہے؟ماہرہ کا کہنا تھا کہ انشاء اللہ ایک دن ضرور کروں گی۔ایک صارف نے آخری دہائی کی بہترین یاد پوچھی تو ماہرہ نے بیٹے اذلان کی پیدائش کا کہا۔پاکستان کی صف اول کی اداکارہ ماہرہ خان نے بتایا کہ وہ صرف اپنے بیٹے کی وجہ سے کوئی بھی شُوٹنگ منسوخ کرواتی ہیں ۔

ایک صارف نے ماہرہ سے کہا کہ آپ کو عوام میں کبھی غصہ کرتے ہوئے نہیں دیکھا، آپ اس سب پہ کیسے قابو پاتی ہیں؟ماہرہ نے جواب دیا کہ مجھے غصہ آتا بھی ہے اور غصہ کرتی بھی ہوں لیکن صرف قریبی دوستوں پر ۔

ایک صارف کے جواب پر ماہرہ نے بریانی سے اپنی پسندیدگی کا اظہار کیا۔شادی کے بارے میں سوال کا جواب دیتے ہوئے ماہرہ نے کہا کہ جب انہیں لگا کہ شادی کرنی چاہیے وہ کر لیں گی۔سرحد پار بھارت سے بھی ماہرہ کے مداحوں نے ان کے اس سیشن میں حصہ لیا۔جویریہ صدیقی نے ماہرہ سے پچھلی صدی کا جائزہ لینے کا کہا تو ماہرہ نے بڑا دلچسپ جواب دیتے ہوئے لکھا کہ ’اس فلم میں پیار، ایکشن، جذبات، محبت، حادثات سب ہیں۔سیشن کے اختتام پر ماہرہ نے اپنے مداحوں کا شکریہ ادا کرتے ہوئے نئے سال کی مبارکباد بھی دی۔

سھہبالی ووڈ(ایمرا نیوز آن لائن)بالی وڈ کی معروف شخصیات اداکارہ روینہ ٹنڈن، ہدایت کار فرح خان اور کامیڈین بھارتی سنگھ کے خلاف ایف آئی آر ز درج کر لی گئیں۔بھارتی میڈیا کے مطابق روینہ ٹنڈن، فرح خان اور بھارتی سنگھ کے خلاف کامیڈی ٹی وی شو میں اقلیتی برادری کے مذہبی جذبات کو ٹھیس پہنچانے کے الزام میں ایف آئی آرز درج کی گئی ہیں۔

تفصیلات کے مطابق بالی وڈ کی معروف شخصیات کے خلاف کرسچن فرنٹ آف اجنالا بلاک کے صدر کی طرف سے کرسمس تہوار کے موقع پر نشر ہونے والے کامیڈی ٹی وی شو میں مذہبی جذبات کو ٹھیس پہنچانے کی شکایت پر مقدمہ درج کیا گیا ہے۔بالی وڈ کی تینوں شخصیات پر انڈین پینل کوڈ (آئی پی سی) کی دفعہ 295 اے کے تحت مقدمہ درج کیا گیا ہے جس کا تعلق مذہب کی توہین یا مذہبی جذبات کو مجروح کرنے سے ہے۔

اسی ضمن میں مدعی نے شو کی ویڈیو کلپس بھی جمع کروائے ہیں جن میں یہ الزام لگایا گیا ہے کہ عیسائی برادری کے مذہبی جذبات مجروح ہوئے ہیں۔اس حوالے سے پولیس کا کہنا ہے کہ وہ مزید تحقیقات کر رہے ہیں۔

دوسری جانب ایف آئی آر درج کرنے پر بالی وڈ اداکارہ روینہ ٹنڈن نے صفائی پیش کرتے ہوئے مائیکرو بلاگنگ سائٹ پر ایک پوسٹ شیئر کی۔روینہ ٹنڈن نے اپنی پوسٹ میں لکھا کہ آپ تمام لوگ اس ویڈیو کو دیکھیں، ہم تینوں میں سے کسی نے بھی کسی کے جذبات کو ٹھیس نہیں پہنچائی، اگر پھر بھی ہم نے ایسا کیا ہے تو تکلیف پہنچانے پر دل سے معافی مانگتے ہیں۔

علاوہ ازیں بالی وڈ ہدایت کارہ فرح خان نے بھی ٹوئٹر پیغام کے ذریعے سب سے معافی مانگتے ہوئے کہا کہ میں بہت افسردہ ہوں کہ میرے شو کے ذر یعے سے کسی کو تکلیف پہنچی، میں تمام مذاہب کی عزت کرتی ہوں اور یہ قطعی میں نے جان بوجھ کر نہیں کیا، میں اپنی پوری ٹیم کی طرف سے دل سے معافی مانگتی ہوں۔

(ایمرا نیوزآن لائن) 80 سے زائد خواتین کے ساتھ جنسی ہراسانی کے الزامات میں گرفتار ہالی وڈ پروڈیوسر ہاروی وائن اسٹین اور ان کے سابق فلم اسٹوڈیو بورڈ نے 2 کروڑ 50 لاکھ ڈالرز میں متاثری کے ساتھ تصفیہ کر لیا۔

غیر ملکی میڈیا کے مطابق ہاروی وائن اسٹین نے جنسی ہراسانی کے الزامات لگانے والے افراد سے 25 ملین ڈالرز کا معاہدہ کیا ہے جس کے تحت نا تو وہ کوئی بھی غلط کام قبول کریں گے اور نا ہی کوئی اور جرمانہ ادا کریں گے۔ وائن اسٹین کمپنی کی نمائندگی کرنے والی انشورنس کمپنیاں اس تصفیے کی لاگت کو پورا کریں گی۔

مجوزہ تصفیہ میں شامل بڑی جماعتوں سے ابتدائی منظوری حاصل ہو گئی ہے جب کہ اس معاہدے کو آگے بڑھنے کے لیے عدالت کی منظوری کی ضرورت ہو گی۔ خیال رہے کہ اکتوبر 2017 میں شائع ہونے والی نیویارک ٹائمز کی تہلکہ خیز تحقیقاتی رپورٹ نے اس اسکینڈل کا انکشاف کیا تھا جس کے بعد خواتین کی بڑی تعداد نے ہالی وڈ پروڈیوسر سے متعلق ہوشرُبا حقائق سے پردہ اٹھایا تھا۔

ان ہی انکشافات کے بعد ’می ٹو‘ مہم کا بھی آغاز ہوا تھا۔ وائن اسٹین پر الزامات لگانے والی خواتین میں ہالی وڈ کی صف اول کی اداکارائیں انجیلینا جولی، سلما ہائیک، گائینتھ پیلٹرو، ایشلے جَڈ، روز میک گوئن اور ہیتھر گراہم شامل ہیں۔

سلمیٰ ہائیک نے ہاروی وائن اسٹین کے حوالے سے بتایا تھا کہ کس طرح ان کو ہراساں کرتے تھے اور دھمکیاں دیتے تھے۔ سلمیٰ ہائیک نے بتایا تھا کہ 2002 میں فلم ” فریدا ” میں سرمایہ لگانے کے بعد ہاروی وائن اسٹین نے انہیں بلیک میل کرنا شروع کیا اور طرح طرح کی جنسی خواہشات کی بھرمار کی۔ اداکارہ کے مطابق ہر بار کا انکار وائن اسٹین کا غصہ بڑھاتا رہا یہاں تک کہ پروڈیوسر نے ایک بار قتل کی بھی دھمکی دی۔

پاکستان(ایمرا نیوز آن لائن) کے نامور آرٹسٹ علی گل پیر نے اپنے منفرد انداز میں بالی وڈ کی اداکارہ پریانکا چوپڑا کو طنز کا نشانہ بنایا ہے جو کہ سوشل میڈیا پر خوب وائرل ہورہا ہے۔

پریانکا چوپڑا نے رواں برس فروری میں اپنی ایک ٹوئٹ میں بھارت کے پلوامہ حملے کو سراہا اور پاکستان بھارت جنگ کو بڑھاوا دینے کا تاثر دیا تھا۔ جس کے بعد ایک ایونٹ کے دوران اداکارہ سے سوال و جواب کا سیشن ہوا جس میں ایک صحافی عائشہ ملک نے اداکارہ پر شدید تنقید کی تھی۔

انہوں نے کہا کہ آپ امن کے لیے اقوام متحدہ کے ذیلی ادارے یونیسیف کی خیرسگالی سفیر ہیں لیکن آپ نے ایٹمی لڑائی کو ترجیح دی جس میں کسی کی جیت نہیں۔ سوال کے دوران عائشہ ملک سے مائیک چھین لیا گیا تھا جب کہ اس دوران انہوں نے “when you are done venting” یعنی “جب آپ اپنی بھڑاس نکال لیں” کا جملہ استعمال کیا۔

اداکارہ پریانکا چوپڑا کے رویے پر انہیں اقوام متحدہ کے ادارے یونیسف کی خیرسگالی کی سفیر ہونے کی وجہ سے سماجی رابطے کی ویب سائٹ پر شدید تنقید کا سامنا کرنا پڑاتھا جو اب تک جاری ہے۔ گلوکار علی گل پیر نے اداکارہ پریانکا چوپڑا کے میٹ گالا لُک کا انتخاب کرکے انہیں کیپشن میں طنز کا نشانہ بنایا۔

اداکارہ پریانکا چوپڑا کے عائشہ ملک کو دیے جانے والے جواب کو مدِنظر رکھتے ہوئے علی گُل پیر نے بھی اپنے کیپشن میں “venting” یعنی “بھڑاس” کا الفاظ کا استعمال کرکے اداکارہ پر طنز کیا۔ علی گل پیر نے تصویر کے کیپشن میں لکھا کہ ’when you are done venting‘۔ سوشل میڈیا پر علی گل پیر کا انداز خوب وائرل ہورہا ہے اور اس پر صارفین کی جانب سے بھی دلچسپ تبصروں بھی کیے جا رہے ہیں۔