Tag media92news

سنگاپور(نیٹ نیوز/ایمرا نیوز) سنگاپور کے رہائشی بھارتی نژاد 12 سالہ لڑکے نے جادوئی یادداشت کا مظاہرہ کرتے ہوئے یادداشت کا عالمی مقابلہ جیت لیا۔ ورلڈ میموری چیمپئن شپ کا انعقاد ہانگ کانگ میں ہوا جہاں اپنے مقابلے پر آنے والے 56 امیدواروں کو شکست دے کر بارہ سالہ دھروو منوج نے بازی لے لی اور دو سونے کے تمغے حاصل کر لئے۔مقابلے میں ’ نام اور چہرے‘ کیشناخت ،’ بے ترتیب الفاظ‘ اور’ بائنری نمبرز ‘ کی کیٹیگری شامل تھی ۔ دھروو نے 87 مختلف چہرے اور ان کے نام 15 منٹ میں یاد کئے، ایک ہزار ایک سو پچپن بائنری نمبر یاد کر کے سب کے صحیح جوابات دیئےاور بہت ہی کم وقت میں بے ترتیب الفاظ کی ترتیب درست کر ڈالی۔دھروو نے میڈیا سے بات کرتے ہوئے اپنی غیر معمولی یادداشت کا راز بتایا کہ اس نے مقابلے سے ایک ہفتہ پہلے ان چیزوں کی دو سے تین گھنٹے پریکٹس شروع کر دی تھی۔بہترین یادداشت دھروو کی واحد پہچان نہیں، وہ اپنے اسکول کا ہیڈ بوائے ہے، کمپیوٹر کلب کا ممبر، بہترین ایتھیلیٹ بھی ہے۔

لاہور(نیٹ نیوز/ایمرا نیوز) دھند اور فنی خرابی کی وجہ سے 4 پاور پلانٹ سسٹم سے گدو، بلوکی، نشاط پاور اور نشاط چونیاں ٹرپ کر گئے جس کی وجہ سے لاہور شہر کی بجلی معطل ہوگئی۔پاکستان الیکٹرک پاور کمپنی (پیپکو) کے حکام کے مطابق اس صورت حال سے مجموعی طور پر 2500 ہزار میگاواٹ بجلی کے شارٹ فال کا سامنا ہے۔پیپکو حکام کا مزید کہنا ہے کہ شارٹ فال پر قابو پانے کے لیے لوڈ شیڈنگ کا دورانیہ عارضی طور پر بڑھا دیا گیا ہے، جس کی وجہ سے لیسکو کا کوٹہ 2 ہزار میگاواٹ سے کم کر کے ایک ہزار کر دیا گیا ہے اور لاہور میں ہر ایک گھنٹے کے بعد ایک گھنٹے کے لیے فیڈر بند کیا جارہا ہےپیپکو حکام نے یہ بھی بتایا ہے کہ لاہور کے متعدد فیڈر بند ہونے کے باعث بجلی کی فراہمی معطل ہے،دھند اور فنی خرابی دور ہوتے ہی بجلی کی فراہمی بحال کر دی جائے گی۔

ممبئی(شوبز ڈیسک/ایمرا نیوز) رنویر سنگھ اور عالیہ بھٹ کی فلم ’گلی بوائے ‘ کا پہلا پوسٹر جاری کردیا گیا۔بالی ووڈ اداکار رنویر سنگھ نے فلم ’سمبا‘ کی کامیابی کے بعد اپنی ایک اور نئی آنے والی فلم ’گلی بوائے‘ کا پہلا پوسٹر جاری کرکے مداحوں کو نیا سال کا تحفہ پیش کردیا۔رنویر سنگھ نے سماجی رابطے کی ویب سائٹ انسٹا گرام پرفلم ’گلی بوائے‘ کا پوسٹر شیئر کیا۔

پوسٹر میں دیکھا جاسکتا ہے کہ رنویر ہوڈی پہنے سورج کا سامنا کرتے ایک بلڈنگ کے عقب میں بیٹھے ہیں جبکہ ساتھ ہی انہوں نے یہ بھی لکھا کہ ’اپنا ٹائم آئے گا‘۔واضح رہے کہ زویا اختر کی ہدایت کاری میں بننے والی اس فلم میں رنویر سنگھ کے ساتھ پہلی بار عالیہ بھٹ اداکاری کے جوہر دکھاتی نظر آئیں گی۔ فلم رواں سال 14 فروری کو سنیما گھروں کی زینت بنے گی۔

لاہور(نیٹ نیوز/ایمرا نیوز)قومی شاہراہوں اور موٹر ویز پر آج بھی دھند کا راج ہے ، کہیں ٹریفک کی روانی میں مشکلات ہیں تو کہیں ٹریفک بند ہے۔عمران احمد ترجمان موٹر وے کے مطابق حد نگاہ صفر سے 50 میٹر تک ہے، ملتان خانیوال موٹر وے کو شدید دھند کی وجہ سے بند کردیا گیا ہے۔موٹر وے ایم ٹو لاہور شیخوپورہ شدید دھند کی وجہ سے بند کردی گئی، مانگا منڈی، پتوکی، رینالہ خورد ، اوکاڑہ کے علاقوں میں بھی دھند ہے۔گیمبر، ساہیوال، ہڑپہ، چیچہ وطنی،میاں چنوں اور خانیوال میں شدید دھند کی وجہ سے ڈرائیوروں اور مسافروں کو ہدایت کی گئی ہے کہ وہ گاڑیوں پر فوگ لائٹس کا استعمال کریں۔انتظامیہ کا کہنا ہے کہ شہری دھند کے دوران غیر ضروری سفر سے گریز کیا جائے۔

(نیٹ نیوز/ایمرا نیوز)
امریکا اور اسرائیل نے اقوام متحدہ کے ادارے یونیسکو کی رکنیت چھوڑ دی ہے ، دونوں ملکوں کو تحفظات تھے کہ یونیسکو اسرائیل مخالف تعصب کو فروغ دے رہا ہے ۔دونوں ممالک نے نئے سال کا آغاز ہوتے ہی اقوام متحدہ کے تعلیم، سائنس اور ثقافت سے متعلق ادارے کو باضابطہ طور پر چھوڑ دیا ہے ،یونیسکو چھوڑنے کا نوٹس ٹرمپ انتظامیہ نے اکتوبر 2017ء میں دیا تھا ۔ بعد میں اسرائیل کے وزیر اعظم نیتن یاہو نے بھی ایسا ہی کیا ۔یونیسکو نے مقبوضہ بیت المقدس میں قدیم مقامات کو فلسطینیوں کا ثقافتی ورثہ قرار دے کر 2011 ء میں فلسطین کو مکمل رکنیت دے دی تھی ، اس فیصلے کے بعد امریکا اور اسرائیل نے یونیسکو کو فنڈز کی فراہمی روک دی تھی ، امریکا نے یونیسکو میں بنیادی اصلاحات کا مطالبہ کیا ہے۔اگرچہ امریکہ اور اسرائیل کا یونیسکو سے نکلنے کا عمل ضابطوں کے تحت ہوا ہے لیکن یہ اس عالمی ادارے کے لیے ایک دھچکا ہے جسے دوسری جنگ عظیم کے بعد امن کی ترویج کے لیےقائم کیا گیا تھا۔پیرس میں قائم اس تنظیم کی جانب سے اسرائیل پر نکتہ چینی کو اسرائیل مخالف تعصب کہہ کر مذمت کی جاتی رہی ہے۔ یونیسکو نے مشرقی یروشلم میں قدیم یہودی مقامات کو فلسطینیوں کا ثقافتی ورثہ قرار دے کر 2011ء میں اسے مکمل رکنیت دے دی تھی۔یونیسکو اپنے عالمی ثقافتی پروگرام، ثقافتی مقامات اور روایات کے تحفظ کی بنا پر شہرت رکھتا ہے۔یہ ادارہ لڑکیوں کی تعلیم کے فروغ، ہولوکاسٹ کے بارے میں معلومات کی فراہمی اور میڈیا کی آزادی کے تحفظ کے لیے بھی کام کرتا ہے۔امریکہ اور اسرائیل کے اخراج سے یونیسکو پر کوئی بڑا مالیاتی اثر نہیں پڑے گا کیونکہ دونوں ملکوں نے 2011ء میں فلسطین کو ایک ریاست کے طور پر رکنیت دیے جانے کے بعد اس ادارے کی فنڈنگ روک دی تھی۔ امریکہ اس ادارے کے بجٹ کا تقریباً 22 فی صد ادا کرتا تھا۔امریکہ کے محکمہ خارجہ کی جانب سے اس بارے میں کوئی تبصرہ سامنے نہیں آیا کیونکہ شٹ ڈاؤن کی وجہ سے حکومتی سرگرمیاں جزوی طور پر معطل ہیں۔ تاہم اس سے قبل امریکہ نے یونیسکو کے عہدے داروں سے کہا تھا کہ وہ غیر رکن ملک کی حیثیت سے ادارے کے لیے کام کرنا چاہتا ہے۔اس سے قبل بھی امریکہ یونیسکو سے نکل چکا ہے۔ صدر ریگن کے عہد میں 1984ء میں امریکی انتظامیہ یہ کہتے ہوئے یونیسکو سے الگ ہو گئی تھی کہ اس ادارے میں بدانتظامی و بدعنوانی ہے اور اسے روسی مفاد کے لیے استعمال کیا جا رہا ہے۔ بعد ازاں امریکہ 2003 ء میں یونیسکو میں دوبارہ شامل ہو گیا تھا۔

اسلام آباد (نیٹ نیوز/ایمرا نیوز) پاکستانیوں کے بیرون ملک اکاؤنٹس اور جائیداد سے متعلق کیس میں ایف آئی اے نےسپریم کورٹ پاکستان میں اپنی رپورٹ پیش کرتے ہوئے بتایا کہ پاکستانیوں کی بیرون ملک 2154 جائیدادیں جنکے 1211 مالکان ہیں جبکہ ایف بی آر کا کہنا ہے کہ علیمہ خان نے اب تک جرمانہ جمع نہیں کرایا،انکے پاس 13 جنوری تک کا وقت ہے ۔ چیف جسٹس نے ریمارکس دیئے کہعدالت کو تو 3؍ ہزار ار ب روپے وصول ہونے کا تاثردیا گیا تھا، بتایا جائے کہ اس حوالے سے ایف بی آر کی اب تک کی کارکردگی کیا ہے؟ خداکیلئے ملک کا پیسہ واپس لائیں۔جبکہ لاہور ڈی ایچ اے اور ایڈن ہاؤسنگ اسکیم سے متعلق کیس میں سپریم کورٹ نے ریمارکس دیئے کہڈی ایچ اے بیواؤں کو ڈھال بنا کرکاروبارچلاتی ہے، آرمی اور DHA کا کیا کام کہ ہاؤسنگ سوسائٹی بنائے، ادارہ جب بھی کمرشل سرگرمیوں میں آیا متنازع ہوا،مقدمے بازی میں الجھ گیا۔ تفصیلات کے مطابق چیف جسٹس میاں ثاقب نثار نے پاکستانیوں کے بیرون ملک اکاؤنٹس اور جائیداد سے متعلق کیس میں ریمار کس دیئے پاکستان سے پیسہ اڑا کر باہر لے جایا گیا،جا ئیدا دوں کی معلومات ڈی جی ایف آئی اے نے حاصل کیں،ا یف بی آر پر ہم ذمے داری ڈال رہے ہیں،اس دوران ایف آئی اے اور فیڈرل بورڈ آف ریونیو (ایف بی آر) کے نمائندے پیش ہوئے،ایف آئی اے کی جانب سے بیرون ملک اکاؤنٹس اور جائیداد سے متعلق رپورٹ جمع کروائی گئی،جس میں بتایا گیا کہ پاکستانیوں کی یو اے ای میں مزید جائیداد کی نشاندہی ہوئی ہے،متحدہ عرب امارات میں1211 پاکستانی مالک ہیں،اسکے علاوہ 774 افراد نے جائیداد سے متعلق بیان حلفی جمع کروا دیا ہے جبکہ 3 سو 63 افراد کو نوٹس جاری کردیے گئے ہیں،60 افراد کی شناخت نہیں ہوسکی جبکہ ایک شخص فرار ہے،اسکے علاوہ 57 افراد اس سلسلے میں تعاون نہیں کر رہے۔ رپورٹ میں بتایا گیا کہ 60 ایسے پاکستانی ہیں جن کی جائیداد زیادہ ہیں لیکن ایف بی آر کے پاس کم ظاہر کی گئی ہیں۔ایف آئی اے کی رپورٹ پر چیف جسٹس نے پوچھا کہ کہاں ہیں چیئرمین ایف بی آر؟ اب تک کیا پیش رفت ہوئی؟چیف جسٹس نے کہا کہ شروع میں تاثردیا گیا تھا کہ ٹیکس سے 3 ہزار ارب روپے اکٹھا ہوگا ،اس پر چیئرمین ایف بی آر نے کہا کہ 14 کروڑ لوگوں نے بھی ٹیکس ادا کرنے کیلئے رضا مندی ظاہر کی ہے جبکہ علیمہ خانم پر 2 کروڑ 94 لاکھ روپے واجب الادا ہیں،اس پر چیف جسٹس نے پوچھا کہ وہ کب ادا کریں گی؟ جس پر انہیں بتایا گیا کہ انکے پاس 13 جنوری تک کا وقت ہے،جس پر چیف جسٹس نے کہا کہ یہ کام جتنا جلدی ہوگا، ملک مستحکم ہوگا۔ نمائندہ ایف بی آر نے عدالت کو بتایا کہ 16 کروڑ 70 لاکھ ابتک ایف بی آر کے پاس جمع ہوئے،ایک کروڑ امتیاز افضل نے ادا کرنے ہیں جبکہ 10 کروڑ آغا فیصل کی جانب سے آئیں گے،اس معاملے میں مزید تحقیق جاری ہے،جس پر عدالت نے ایف بی آر کو 13 جنوری تک مکمل رپورٹ پیش کرنے کا حکم دیتے ہوئے سماعت 14 جنوری تک کیلئے ملتوی کردی۔ علاوہ ازیںسپریم کورٹ نے لاہور ڈی ایچ اےاور ایڈن ہاؤسنگ سوسائٹی کے درمیان تمام معاہدے کالعدم قرار دیتے ہوئے متاثرین کو کچھ ریلیف فراہم کرنے کیلئے ایڈن ہاؤسنگ کی جانب سے فروخت کیے گئے 11 ہزار پلاٹس کو ڈی ایچ اے 5 سال میں تعمیر کرکے دینے کا حکم دیدیااور ساتھ ہی عدالت نے معاملہ حل کرنے کیلئے عملدرآمد بینچ بنانے کا عندیہ دیدیا۔ علاوہ ازیں عدا لت عظمیٰ میں وقت ٹیلی ویژن چینل سے منسلک صحافیوں اور کارکنوں کی بغیر ادائیگیوں کے برخواستگیوں سے متعلق کیس کی سماعت کے دوران چیف جسٹس نے کہا ہے کہ میں ایسے جانے والا نہیں ہوں، جن جن صحافیوں اور کارکنوں کا حق بنتا ہے وہ دلوا کر جائوں گا اس کے لئے اگر مجھے رات بارہ بجے تک بھی بیٹھنا پڑا تو بیٹھوں گا،چیف جسٹس میاں ثاقب نثار کی سربراہی میں قائم جسٹس فیصل عرب اور جسٹس اعجاز الاحسن پر مشتمل تین رکنی بنچ نے منگل کے روز وقت ٹی وی ویژن چینل سے منسلک صحافیوں اور کارکنوں کی بغیر ادا ئیگیو ں کے برخواستگیوں سے متعلق کیس کی سماعت کی تو نوائے وقت میڈیا گروپ کے نمائندہ نے رپورٹ پیش کی کہ تمام میڈیا ورکرز کی تنخواہوں کی ادائیگی کے 58 چیک تیار ہو گئے ہیں ،جس پر چیف جسٹس نے انہیں چیک ڈی جی ایچ ار کو بھجوا نے کی ہدایت کرتے ہوئے کہا کہ اگر تنخواہوں کی رقم میں کسی قسم کی کوئی کمی بیشی ہوئی تو اس کا بھی جائزہ لیا جائے گا۔

اسلام آباد(نیٹ نیوز/ایمرا نیوز) عالمی بینک کی انٹرنیشنل کورٹ فار سیٹلمنٹ آف انوسٹمنٹ ڈسپیوٹس (آئی سی ایس آئی ڈی) نے پاکستان کو چار ارب ڈالر سے زیادہ کے جرمانے عائد کر دیئے ہیں۔ یہ جرمانے بروقت ادا نہ کئے گئے تو پاکستان کی قومی پرچم بردار فضائی کمپنی پی آئی اے کے طیارے 60 ممالک میں نہیں آجاسکیں گے ان طیاروں کو اس وقت تک بیرون ملک روک لیا جائے گا جب تک حکومت پاکستان انٹرنیشنل کورٹ فار سیٹلمنٹ آف انوسٹمنٹ ڈسپیوٹس کے عائد کردہ جرمانوں کی ادائیگی نہیں کرے گی۔ یہ جرمانے اس لئے کئے گئے کہ آسٹریلوی کمپنی ریکوڈیک بلوچستان سے تانبا سونا چاندی نکالنے کا کیس جیت گئی ہے اور حکومت پاکستان ریکوڈیک کیس ہار گئی ہے۔ اس کے علاوہ حکومت پاکستان ترک کمپنی کارکے (KARKEY)کا سمندری پاور پلانٹ جو ہنگامی بنیادوںپر لوڈشیڈنگ ختم کرنے کیلئے اس وقت کے پاکستان کے وزیراعظم راجہ پرویز اشرف نے رینٹل ایگریمنٹ (RENTAL AGREEMENT) کرکے منگوایا تھا یہ سمندری پاور پلانٹ 2012 میں آٹھ ماہ تک کراچی کے قریب بحیرہ عرب میں کھڑا رہا نہ تو اس سے بجلی بنوائی گئی نہ ہی اسے تیل فراہم کیا گیا اس کیس میں ترک کمپنی نے انٹرنیشنل کورٹ فار سیٹلمنٹ آف انوسٹمنٹ ڈسپیوٹس سے رجوع کیا اورآئی سی ایس آئی ڈی نے انٹرنیشنل کورٹ فار سیٹلمنٹ آف انوسٹمنٹ ڈسپیوٹس نے اپنے فیصلے میں حکومت پا کستا ن ایک ارب 20 کروڑ ڈالر ترک کمپنی کارکے کو ادا کرنے کا فیصلہ دیا، یہ ادائیگی ابھی تک حکومت پاکستان نے نہیں کی۔ اس کے علاوہ انٹرنیشنل کورٹ فار سیٹلمنٹ آف انو سٹمنٹ ڈسپیوٹس نے حکومت پاکستان کے خلاف ایک تیسر ے کیس کا فیصلہ کیا اس کیس میں بھی پاکستان پر ایک ارب ڈالر کا جرمانہ عائد کیا گیا، اگر تینوں مقدمات میں ہونے والے 4 ارب ڈالر سے زائد کے جرمانے ادا کرنا پڑ گئے تو سعودی عرب اور یو اے ای کی قرضہ نما امداد ان کی ادا ئیگیو ں میں چلی جائے گی۔ تیسرا کیس پاکستان میں دنیا بھر کی کمپنیوں کے قائم کردہ انڈی پینڈنٹ پاور پروڈویوسرز میں ان کا کیس انٹرنیشنل کورٹ فار سیٹلمنٹ آف انوسٹمنٹ ڈسپیو ٹس میں چلتا رہا جس میں ان کا موقف تھا کہ 13 آئی پی پی ز نے حکومت پاکستان کی ساورن گارنٹی پر اپنی سرمایہ کاری پاکستان میں کی ہم نے اربوں روپے کی بجلی واپڈا کو فراہم کی مگر واپڈا/حکومت پاکستان نے ہمیں ادائیگیاں نہیں کیں جس پر اگلے آنے والے دنوں میں حکومت پاکستان 4 ارب ڈالر سے زیادہ کی خطیر رقم پاکستان کی افسر شاہی اور حکومتوں کی نالائقی کی وجہ سے ادا کرنا پڑیں گی۔ کارکے سے بجلی بھی نہیں لی اور 1.2 ارب ڈالر کی ادائیگی اب پاکستان کو ترک کمپنی کارکے کو کرنا پڑے گی۔ تفصیلات کے مطابق بلوچستان حکومت نے تتھیان (TETHAN) کاپر کمپنی (COPPER COMPANY) ٹی سی سی کے ساتھ لیزنگ استدعا مسترد کر دی تھی جس پر تتھیان کاپر کمپنی نے عالمی بینک کی (آئی سی ایس آئی ڈی) انٹرنیشنل کورٹ فار سیٹلمنٹ آف انوسٹمنٹ ڈسپیوٹس میں کلیم فائل کر رکھا تھا جس کا فیصلہ 2018 میں آیا مگر پاکستان بیوروکریسی نے نہ تو مقدمہ قومی جذبے سے لڑا نہ ہی جرمانے کی رقم مدعی کمپنی کو ادا کی۔

نئی دہلی(نیٹ نیوز/ایمرا نیوز) بھارتی وزیر اعظم نریندر مودی نے روایت برقرار رکھتے ہوئے پاکستان مخالف بیان دے دیا۔انہوں نے پاکستان پر زبانی حملہ کرتے ہوئے کہا ہے کہ ’ایک لڑائی سے پاکستان سدھر جائے گا یہ سوچنا بہت بڑی غلطی ہوگی، پاکستان کو سدھارنے میں ابھی اور وقت لگے گا۔‘تین ریاستوں سے شکست پانے والےمودی نے سال نو پر بھارتی خبر رساں ادارے اے این آئی کو خصوصی انٹرویو دیا جسے بھارت کے تما م میڈیا چینلز پر نشر اور اخبارات میں شائع کیا گیا۔واضح رہے نریندر مودی نے اپنے ساڑھے چار سال کے دور اقتدار میں ایک بھی پریس کانفرنس سے خطاب نہیں کیا ،وہ کبھی کبھار ہی انٹرویو دیتے ہیں۔دوران انٹرویو انہوں نےکہا دعویٰ کیاکہ ’بھارت کی ہمیشہ سے ایک مستقل پالیسی ہےکہ بھارت کا کوئی بھی وزیر اعظم پاکستان کے ساتھ کبھی بھی مذاکرات کا مخالف نہیں رہا۔اگر پاکستان سارک میں شرکت کے لئے بھارت کو دعوت دے گا تو ہم کسی بھی موضوع پر بات کرنے کو تیار ہیں مگر پہلے پاکستان کو دہشت گردوں کی حمایت بند کرنا ہوگی۔‘بھارت نے ستمبر 2016 میں پاکستان کے زیرانتظام کشمیر کی سرزمین میں داخل ہو کر وہاں دہشت گردوں کے ٹھکانوں کو تباہ کرنے کا دعویٰ کیا تھا۔ اس سے پہلے شدت پسندوں نےبھارت کے زیر انتظام کشمیر میں اُڑی کے فوجی کیمپ پر حملہ کیا تھا۔مودی سے جب اس سرجیکل اسٹرائیک کے بارے میں پوچھا گیا تو انہوں نے کہا کہ ’ اڑی کے فوجی کیمپ پر حملے کے بعد میرے اورفوج کے اندر بہت غصہ تھا۔فوج اپنے جوانوں کی شہادت کا انتقام لینا چاہتی تھی، ان کےاندر مجھ سے بھی زیادہ آگ لگی ہوئی تھی، اس لیے فوج کو جوابی کارروائی کا منصوبہ بنانے اور اسے عملی شکل دینے کی کھلی چھوٹ دی گئی تھی۔‘اس سے قبل بھی مودی نے ایک تقریر میں الزام عائد کرتے ہوئے کہا تھا کہ تقسیم ہند کے وقت کانگریس قیادت کی کوتاہی کی وجہ سے کرتار پور صاحب پاکستان میں چلا گیا۔

کراچی:(نیٹ نیوز/ایمرا نیوز) پاکستان پیپلز پارٹی کے چیئرمین بلاول بھٹو زرداری نے کہا ہے کہ اگر آصف علی زرداری اجازت دیں تو ہم ایک ہفتے میں تحریک انصاف کی حکومت گر سکتے ہیں۔متحدہ قومی موومنٹ کے مقتول رہنما علی رضا عابدی کے گھر تعزیت کے بعد میڈیا سے گفتگو کرتے ہوئے بلاول بھٹو زرداری نے کہا کہ تحریک انصاف کو حکومت کرنا تو آتا نہیں تھا اب پتہ چلا ہے کہ ان کا حساب بھی کمزور ہیں۔انہوں نے کہا کہ ‘میرے پاس سندھ میں 99 سیٹیں اور تحریک انصاف ہماری حکومت گرانے کے لیے 49 ممبران کی ضرورت ہوگی’۔انہوں نے کہا کہ صرف 6 سیٹوں کی بات ہے، پی ٹی آئی کی حکومت ختم ہو جائے گی۔جعلی اکاؤنٹس کے حوالے سے حالیہ جے آئی ٹی رپورٹ کے بارے میں پوچھے کے سوال پر ان کا کہنا تھا کہ حکومت اور جے آئی ٹی کا گٹھ جوڑ بےنقاب ہوگیا، یہ جعلی اور جھوٹی جے آئی ٹی رپورٹ ہے، ہم ماتحت عدالت میں اپنا کیس لڑیں گے، ہم ہر سازش کو ناکام بنائیں گے۔بلاول بھٹو زرداری نے مزید کہا کہ صدر زرداری کے خلاف کتنے کیسز بنائے گئے وہ ان تمام کیسز میں سرخرو ہوں گے۔پیپلزپارٹی کے چیئرمین نے دعویٰ کیا کہ اگر صدر زرداری اجازت دیں تو ہم پی ٹی آئی حکومت کو ایک ہفتے میں گراسکتے ہیں، صرف 6 سیٹ کی بات ہے، پی ٹی آئی کی حکومت ختم ہوجائے گی۔ان کا کہنا تھا کہ جو چاہتے ہیں عوام کے مسائل حل نہ ہوں، وہ چاہتے ہیں وزیراعلیٰ سندھ تبدیل ہو، سندھ حکومت گران کی ہر سازش کو ناکام کریں گے، سندھ کے عوام وزیراعلیٰ کی تبدیلی نہیں ہونے دیں گے۔

نیوزی لینڈ(نیٹ نیوز/ایمرا نیوز) نیوزی لینڈ میں گھڑی پر رات کے 12 بجتے ہی سال 2019 کا شاندار استقبال کیا جارہا ہے اور اس موقع پر آتشبازی کا نظارہ دیکھنے ہزاروں افراد موجود ہیں۔ سال نو کے جشن کا آغاز سب سے پہلے نیوزی لینڈ کے شہر آکلینڈ کے معروف سٹی ٹاور کے مقام پر جشن سے ہوا جہاں لوگوں کی بڑی تعداد موجود ہے۔گھڑی پر 12 بجتے ہی سٹی ٹاور پر آتشبازی ہوئی اور پورا علاقہ رنگ و نور میں نہا گیا، اسی طرح آکلینڈ ہاربر برج پر بھی آتشبازی کا شاندار مظاہرہ کیا جارہا ہے۔ آسٹریلیا کے شہر سڈنی، شمالی و جنوبی کوریا، ہانگ کانگ، بیجنگ اور تائی پے میں بھی آتش بازی ہوگی۔جاپان میں سال نو کو خوش آمدید کہنے کے لیے مختلف مندروں میں اپنی روایات کے مطابق رسومات ادا کی جارہی ہیں جب کہ امریکی شہر نیویارک کے ٹائمز اسکوائر پر ڈھائی ہزار سے زائد ایل ای ڈی لائٹوں سے بنی کرسٹل بال کی رونمائی کی تقریب میں لاکھوں افراد شرکت کریں گے۔دبئی میں سال نو کو خوش آمدید کہنے کے لیے دنیا کی بلند ترین عمارت برج خلیفہ پر آتش بازی کا مواد نصب کردیا گیا، برج خلیفہ کے علاوہ برج عرب، پام جمیرا کے آٹلانٹس ہوٹل، فیسٹیول سٹی، گلوبل ویلیج، دبئی مرینہ اور دبئی کریک پر بھی آتش بازی کی جائے گی۔کراچی میں سال نو کے جشن کے لیے سی ویو پر جانے اور سمندر میں نہانے پر پابندی عائد کردی گئی ہے اور منچلوں کو سی ویو کی طرف جانے کی اجازت نہیں ہوگی۔