All posts by fayaz

لاہور:(نیٹ نیوز/ایمرا نیوز) زیادتی کے بعد قتل کی گئی قصور کی کمسن زینب کو انصاف مل گیا اور اس کے والد محمد امین انصاری کا کہنا ہے کہ مجرم عمران کو پھانسی معمولی سزا ہے۔
کوٹ لکھپت جیل میں مجرم عمران کو پھانسی دیے جانے کے موقع پر زینب کے والد محمد امین بھی جیل پہنچے اور میڈیا سے بات کرتے ہوئے کہا کہ میری بیٹی کا قاتل اپنے انجام کو پہنچا، عمران جیسے درندوں کو ایسی عبرتناک سزا ملنی چاہیے۔
محمد امین نے کہا کہ آج انصاف کے تقاضے پورے ہوگئے، مجرم عمران کی سزا پر مطمئن ہوں۔
کمسن زینب سے زیادتی اور قتل کے مجرم عمران کو تختہ دار پر لٹکا دیا گیا
زینب کے والد نے شکوہ کیا کہ ہم نے مجرم کو سرعام پھانسی دینےکا مطالبہ کیا تھا اگر سرعام پھانسی نہیں دینی ہے تو اس قانون کو ہی ہٹا دینا چاہیے۔امین انصاری نے اپنی بیٹی کا ذکر کرتے ہوئے کہا کہ زینب زندہ ہوتی تو آج 7 سال اور 2 ماہ کی ہوتی۔یاد رہے کہ رواں برس کے آغاز میں پنجاب کے ضلع قصور سے اغواء کی جانے والی بچی زینب کو زیادتی کے بعد قتل کردیا گیا تھا، جس کی لاش 9 جنوری کو ایک کچرا کنڈی سے ملی۔
تحقیقات کے بعد مجرم عمران کو گرفتار کیا گیا اور عدالت نے اسے سزائے موت کا حکم دیا اور آج صبح اسے تختہ دار پر لٹکادیا گیا۔

لاہور(سپورٹس ڈیسک/ایمرا نیوز) پاکستان کرکٹ بورڈ کے چیئرمین احسان مانی نے اپنے اختیارات کو محدود کرنے کیلئے منیجنگ ڈائریکٹر کا نیا عہدہ متعارف کرانے کا فیصلہ کرلیا۔
پی سی بی کے حد درجہ مصدقہ ذرائع نے تصدیق کی ہے کہ چیف آپریٹنگ آفیسر کی موجودگی میں چیف ایگزیگٹو آفیسر کی تقرری کا فیصلہ واپس لے لیا گیا ہے۔
بورڈ کے چیئرمین احسان مانی نے 12 اکتوبر کو بورڈ آف گورنرز (بی او جی) کو ایک خط تحریر کیا ہے جس میں ایم ڈی کی تقرری کیلئے بی او جی اراکین سے رسمی منظوری مانگی گئی ہے۔
پی سی بی اگر اس نئی تقرری کا فیصلہ کرلیتی ہے تو یہ تقرری بورڈ کے آئین کے منافی ہوگی کیوں کہ بورڈ کے موجودہ آئین میں بورڈ آف گورنرز کے پاس چیف آپریٹنگ آفیسر، چیف فنانشل آفیسر اور الیکشن کمیشن کی تقرری کا اختیار ہے۔
ذرائع کے مطابق نئے ایم ڈی کیلئے عارف عباسی، سلیم الطاف، زاہد نورانی کے ناموں پر غور ہورہا ہے۔
ذرائع کا کہنا ہے کہ احسان مانی کو بورڈ آف گورنرز سے منظوری ملنے کے بعد ایم ڈی کے نام کا اعلان کردیا جائے گا تاہم اس سلسلے میں بورڈ کو آئین میں بھی ترمیم کرنا پڑے گی۔
ترمیم کے بغیر اس تقرری کو غیر آئینی قرار دیتے ہوئے اسے عدالت میں چیلنج کیا جاسکتا ہے۔
ایم ڈی کو چیئرمین کے زیادہ تر اختیارات منتقل کردیئے جائیں گے جب کہ چیئرمین کا عہدہ صرف پالیسی بنانے والے کا ہوگا اور اس پالیسی پر عمل درآمد ایم ڈی اور چیف آپریٹنگ آفیسر کرائیں گے۔

اسلام آباد:(نیٹ نیوز/ایمرا نیوز) فنانشل ایکشن ٹاسک فورس (‎ایف اے ٹی ایف) ایشیا پیسیفک گروپ آج قومی احتساب بیورو (نیب) حکام سے فالو اپ مذاکرات کرے گا، جس کے دوران منی لانڈرنگ اور عالمی تعاون سے متعلق سرگرمیوں پر بات چیت ہوگی۔ملاقاتوں کے ایجنڈے کے مطابق ‎ایشیا پیسیفک گروپ کا وفد اسٹیٹ بینک اور وزارت خارجہ سے بھی آج دوبارہ مذاکرات کرے گا، جس میں ‎دہشت گردوں کی مالی معاونت روکنے سے متعلق امور پر غور کیا جائے گا۔
دوسری جانب اٹارنی جنرل سے ملاقات میں پراسیکیوشن سے متعلق امور پر بات چیت کی جائے گی
پاکستان دہشتگردوں کی مالی معاونت روکنے کے تمام اقدامات کرچکا: ایف اے ٹی ایف کو بریفنگ
ایف اے ٹی ایف کا ‎وفد پاکستان کی صوبائی عدلیہ کے نمائندوں سے بھی ملے گا جبکہ ریئل اسٹیٹ ایجنٹس اور اینٹی نارکوٹکس فورس کے حکام سے بھی ملاقاتیں ایجنڈے میں شامل ہیں۔
اس سے قبل 8 اکتوبر کو ایشیا پیسفک گروپ سے ہونے والے مذاکرات کے دوران پاکستان نے وفد کے سوالوں کے جوابات دیتے ہوئے آگاہ کیا تھا کہ اقوام متحدہ کی ہدایات کے مطابق دہشت گردوں کی مالی معاونت روکنے کے تمام اقدامات کیے جاچکے ہیں۔ایف اے ٹی ایف ایشیا پیسفک گروپ پاکستانی حکام سے 19 اکتوبر تک مذاکرات کرنے کے بعد 21 اکتوبر کو اپنی رپورٹ ایف اے ٹی ایف کو پیش کرے گا، جس میں پاکستان کو گرے لسٹ سے نکالنے یا بلیک لسٹ کرنے کی سفارشات مرتب کی جائیں گی۔
فنانشل ایکشن ٹاسک فورس
فنانشل ایکشن ٹاسک فورس کے ارکان کی تعداد 37 ہے جس میں امریکا، برطانیہ، چین، بھارت اور ترکی سمیت 25 ممالک، خیلج تعاون کونسل اور یورپی کمیشن شامل ہیں۔
اس تنظیم کی بنیادی ذمہ داریاں عالمی سطح پر منی لانڈرنگ اور دہشت گردوں کی مالی معاونت روکنے کے لیے اقدامات کرنا ہیں۔عالمی واچ لسٹ میں پاکستان کا نام شامل ہونے سے اسے عالمی امداد، قرضوں اور سرمایہ کاری کی سخت نگرانی سے گزرنا ہوگا جس سے بیرونی سرمایہ کاری متاثر ہوگی اور ملکی معیشت پر منفی اثرات مرتب ہوں گے۔
خیال رہے کہ اس سے قبل 2012 سے 2015 تک بھی پاکستان ایف اے ٹی ایف کی واچ لسٹ میں شامل تھا۔

نیوجرسی:(نیٹ نیوز/ایمرا نیوز) ایک امریکی استاد مائیک رومن، پیزا کے اتنے رسیا ہیں کہ وہ گزشتہ 37 برس سے روزانہ شام میں کم از کم ایک پیزا کھاتے ہیں اور خود ان کی عمر 41 برس ہے۔ اس سے ظاہر ہوتا ہے کہ انہیں چار سال کی عمر میں پیزا کھانے کی عادت پڑگئی تھی۔

امریکی شہری کے مطابق کبھی کبھی وہ ایک سے زائد پیزا کھاتے ہیں اور تین سے چار سال کی عمر میں ان کی والدہ نے پہلی مرتبہ انہیں پیزا پیش کیا تھا۔ اس کے بعد انہوں نے ہر روز اپنی والدہ سے پیزا مانگنا شروع کیا۔
والدین نے انہیں دیگر اشیا کھلانے کی کوشش کی لیکن پیزا سے ان کا لگاؤ بڑھتا ہی گیا یہاں تک کہ وہ بچپن، لڑکپن، جوانی اور اب ادھیڑ عمری میں بھی اسی رغبت سے پیزا کھارہے ہیں۔ کبھی کبھار وہ دوپہر میں پیزا کی بجائے مونگ پھلی کے مکھن (پینٹ بٹر) کے ساتھ سینڈوچ کھاتے ہیں تاہم اس سے قبل وہ روزانہ تینوں وقت صرف پیزا پر ہی ہاتھ صاف کررہے تھے۔
مائیک اپنے شہر کی ہردکان کا پیزا چکھ چکے ہیں لیکن انہوں نے کہا کہ وہ ذائقے سے زیادہ پیزا سے بھوک مٹانے پر توجہ دیتے ہیں۔ مائیک نے اعتراف کیا کہ انہوں نے بہت کوشش کی کہ وہ پیزا کی بجائے کچھ اور بھی کھائیں لیکن گھوم پھر کر وہ دوبارہ اسی ڈش پر آگئے۔ انہوں نے اپنی شادی کے روز بھی پیزا کھایا تھا۔چند روز قبل ان کا کولیسٹرول بڑھ گیا تھا لیکن ورزش اور دواؤں سے اسے قابو کرلیا گیا لیکن کبھی کبھی انہیں معدے میں تکلیف ہوتی ہے۔

لاہور:(نیٹ نیوز/ایمرا نیوز) قومی احتساب بیورو کی ٹیم نے اپوزیشن لیڈر شہباز شریف کو پارلیمنٹ ہاؤس پہنچا دیا جہاں وہ قومی اسمبلی کے اجلاس میں شرکت کریں گے۔
اسپیکر قومی اسمبلی اسد قیصر نے اپوزیشن جماعتوں کے مطالبے پر شہباز شریف کے پروڈکشن آرڈر جاری کیے تھے جس پر انہیں نیب کی دو رکنی ٹیم نے انہیں لاہور سے بذریعہ پی آئی اے کی پرواز پی کے 652 اسلام آباد پہنچایا۔
نیب نے شہباز شریف کو قومی اسمبلی کے ڈپٹی سارجنٹ آف آرمز کے حوالے کیا جب کہ ڈپٹی سارجنٹ آف آرمز نے حوالگی کے لئے دستاویزات پر دستخط کیے۔
شہباز شریف نے اپنے چیمبر میں پہنچ کر لباس تبدیل کیا اور پیپلز پارٹی کے رہنما خورشید شاہ سے ملاقات بھی کی۔
ذرائع کے مطابق اگر اجلاس ایک دن سے زیادہ مدت کا ہوا تو شہباز شریف کو نیب تھانے کے حوالات میں رکھا جائے گا۔
اپوزیشن جماعتوں کی ریکوزیشن پر طلب کیے گئے قومی اسمبلی کے اجلاس میں شہباز شریف کی گرفتاری کے خلاف حزب اختلاف کی جماعتوں کی جانب سے احتجاج کا بھی امکان ہے۔
اپوزیشن لیڈر شہباز شریف قومی اسمبلی کے اجلاس میں تقریر کریں گے اور اس موقع پر تمام ن لیگی ارکان بازوؤں پر سیاہ پٹیاں باندھ کر اجلاس میں شریک ہوں گے۔
یاد رہے کہ آشیانہ ہاؤسنگ اسکینڈل کیس میں گرفتار مسلم لیگ (ن) کے صدر اور قومی اسمبلی میں قائدِ حزب اختلاف شہباز شریف جسمانی ریمانڈ پر نیب کی حراست میں ہیں۔
نیب لاہور نے 5 اکتوبر کو سابق وزیراعلیٰ پنجاب شہباز شریف کو صاف پانی کیس میں طلب کیا تھا، تاہم اُن کی پیشی پر انہیں آشیانہ اقبال ہاؤسنگ کیس میں کرپشن کے الزام میں گرفتار کرلیا گیا تھا۔
وفاقی وزیر اطلاعات فواد چوہدری کہہ چکے ہیں کہ اپوزیشن کی درخواست پر شہباز شریف کے معاملے پر قومی اسمبلی کا اجلاس 17 اکتوبر کو بلارہے ہیں، وزیراعظم عمران خان کو شہباز شریف کے پروڈکشن آرڈر پر کوئی اعتراض نہیں ہے اور وہ اجلاس میں شریک ہوسکتے ہیں۔

اسلام آباد(نیٹ نیوز/ایمرا نیوز) پاکستان سمیت دنیا بھر میں سوشل میڈیا ویب سائٹ یوٹیوب کی سروس کچھ دیر بند رہنے کے بعد بحال ہو گئی۔دنیا بھر میں یوٹیوب سروس اچانک بندغیر ملکی خبر ایجنسی کے مطابق دنیا بھر میں یوٹیوب وڈیوز تک رسائی معطل ہو گئی تھی، یوٹیوب سروس اچانک بند ہونے کی وجہ فوری طور پر معلوم نہیں ہوسکی، موبائل فون پر بھی یوٹیوب وڈیو چلانا ناممکن تھا۔غیر ملکی خبر ایجنسی کے مطابق یوٹیوب پر وڈیو سروس کی فراہمی امریکا،آسٹریلیا اور یورپ میں بھی متاثر رہی۔ٹیم یوٹیوب کا کہنا تھا کہ یوٹیوب ٹی وی اور یو ٹیوب میوزک تک رسائی میں ایشوز کا سامنا ہے جسے دور کرنے کی کوشش کی جارہی ہے،زحمت کے لئے معذرت خواہ ہیں۔

لاہور(اپنے نمائندے سے) اختیارات کا ناجائز استعمال، یا دباﺅ ڈالنے کی کوشش پنجاب لینڈ ریکارڈ اتھارٹی کے شعبہ انٹیلی جنس ونگ کا اہلکار اراضی ریکارڈ سنٹر کوٹ ادھو سے انتقال اندراج رجسٹرڈ لیکر بھاگ نکلا پنجاب لینڈ ریکارڈ اتھارٹی نے الٹا سروس سنٹر انچارج کو معطل کر دیا تحقیقات کر رہے ہیں حقائق سامنے آنے پر میڈیا کو مزید آگاہی دیں گے ترجمان PLRA روزنامہ ”پاکستان“ کو ملنے والی مبینہ معلومات کے مطابق گزشتہ دنوں مظفر گڑھ کی تحصیل کوٹ ادھو میں عابد حسین نامی پنجاب لینڈ ریکارڈ اتھارٹی کے شعبہ انٹیلی جنس ونگ کے اہلکار نے وزٹ کیا اور سروس سنٹر انچاج منصور احمد سے انتقالات اندراج رجسٹرڈ مانگ لیا جس پر سروس سنٹر انچارج نے انتقالات مینول رجسٹرڈ انٹیلی جنس ونگ اہلکار کے حوالے کر دیا۔تاہم تھوڑی دیر بعد ہی سروس سنٹر انچارج کی جانب سے پنجاب لینڈ ریکارڈ اتھارٹی کو بذریعہ میل اور فوٹیج مہیا کرتے ہوئے آگاہی دی گئی کہ عابد حسین اہلکار انٹیلی جنس انتقال رجسٹرڈ لیکر موقع سے بھاگ نکلا ہے جس کا نوٹس لیا جائے سروس سنٹر انچارج کی آگاہی رپورٹ پرکارروائی کرتے ہوئے تھوڑی دیر بعد ہی الٹا اطلاع کندہ کو معطل کرتے ہوئے ہیڈ کوارٹر میں حاضری رپورٹ کرنے کا حکم نامہ صادر کر دیا گیا صوبے بھر کے سروس سنٹر انچارج الٹی بہنے والی اس گنگا کے خلاف سراپا احتجاج بن گئے دوسری جانب ترجمان پنجاب لینڈ ریکارڈ اتھارٹی کا کہنا ہے کہ تحقیقات کا عمل جاری ہے اصل حقائق سامنے آنے پر میڈیا کو تفصیلی آگاہی دی جائے گی۔

ممبئی(شوبز ڈیسک/ایمرا نیوز) بالی ووڈ کے معروف ہدایت کار ساجد خان نے خواتین کو دھوکا دینے اور ان کے ساتھ برا رویہ رکھنے پر خود کو ’جانور‘ قرار دے دیا۔
بھارتی فلم انڈسٹری میں می ٹو کا وشور جاری ہے جس میں کئی نامور شخصیات پرجنسی ہراسانی کا الزام عائد کیا جاچکا ہےان میں وکاس بہل، الوک ناتھ، نانا پاٹیکراور معروف ہدایت کار اور کوریو گرافر فرح خان کے بھائی ساجد خان بھی شامل ہیں۔ کچھ روز قبل اداکارہ سلونی چوپڑا، صحافی کرشمہ اوپاڈہے اور اداکارہ ریچل وائٹ نے ساجد خان پرجنسی ہراساں کرنے کا الزام عائد کیا تھا۔
تاہم ہدایت کار ساجد خان نے ان تمام الزامات کو مسترد کرتے ہوئے کہا کہ وہ اپنے اوپر لگے الزامات کی وجہ سے نئی فلم ’ہاؤس فل 4 کی ہدایت کاری سے کنارہ کشی اختیار کر رہے ہیں، اور اس وقت تک دوبارہ فلم نہیں کریں گے جب تک سچ ثابت نہ کرلیں۔

گزشتہ روز ساجد خان کی ایک ویڈیو سوشل میڈیا پر وائرل ہوئی ہے جس میں وہ خود کو جانور کہتے سنائی دے رہے ہیں۔ انہوں نے کہا کہ وہ ایک بہت ہی گھٹیا انسان ہیں جنہوں نے خواتین کے ساتھ ہمیشہ برا رویہ رکھا ہے۔
سماجی رابطے کی ویب سائٹ ٹوئٹر پر وائرل ہونے والے انٹرویو میں ساجد خان کا کہنا ہے کہ 20 سے30سال کی عمر میں میرے بہت لڑکیوں سے ساتھ تعلقات تھے جس سے میں نے یہ سیکھا کہ میں بہت بڑا کتا اور کمیناآدمی تھا، میں نے بہت دل توڑے اور بہت لڑکیوں سے جھوٹ بولا ہے۔

Please listen, what is Sajid khan saying about women! pic.twitter.com/fZPA1EFOWJ

— News Of Bollywood (@NewsOfBolly) October 16, 2018

ساجد خان نے کہا کہ جس طرح باقی لڑکے کڑکیوں کو دھوکا دیتے ہیں میں نے بھی ویسے ہی دھوکے دیے، میں اُس وقت اسکرین پر تھا اور ترقی کی جانب بھی بڑھ رہا تھا، میں ہر خواتین کے ساتھ بُرا سلوک کرتا تھا۔ ان کا کہنا تھا کہ تمام لڑکیاں بہت اچھی تھیں جن کے ساتھ میں نے دھوکا کیا، میری عمر 30 برس ہوگئی پھر میں نے اپنی ساری توجہ فلموں کی جانب گامزن کردی اور خواتین کی طرف متوجہ ہونا چھوڑ دیا۔
خواتین کی جانب سے ساجد خان پر لگائے جنسی ہراساں کرنے کی الزام کے بعد سوشل میڈیا پر انہیں شدید تنقید کا نشانہ بنایا جارہا ہےجبکہ ان کی بہن فرح خان بے بھی اپنے بھائی ساجد خان کی حمایت کرنے سے انکار کردیاہے۔ فرح خان نے اپنے ٹوئٹ میں کہا کہ اگر میرے بھائی نے اس قسم کا رویہ اختیار کیا ہے تو اسے اس کی قیمت ادا کرنی پڑے گی۔ میں کسی بھی لحاظ سے اس طرح کا رویہ برداشت نہیں کرسکتی۔

ابوظبی:(سپورٹس ڈیسک/ایمرا نیوز) فارم واپس آتے ہی قسمت سرفراز احمد سے روٹھ گئی جب کہ ابوظبی ٹیسٹ میں کپتان کی کہنی پر گیند لگ گئی۔ابوظبی ٹیسٹ کے پہلے روز فخرزمان کے ہمراہ پاکستان ٹیم کو بحران سے نکالنے والے میزبان کپتان سرفراز احمد90پر بیٹنگ کررہے تھے کہ مچل اسٹارک کی ایک شارٹ بال پسلیوں کی طرف آئی، بچاؤ کی کوشش میں انھوں نے کہنی آگے کردی، گیند لگنے کے بعد کپتان شدید تکلیف میں نظر آئے،فزیو نے درد کم کرنے کیلیے اسپرے کیا، گوکہ بعد میں وہ وکٹ کیپنگ کیلیے آئے اور ایک شاندار کیچ بھی لیا لیکن اب خدشہ ظاہر کیا جا رہا ہے کہ شاید وہ میچ میں مزید کیپنگ نہ کرسکیں۔پریس کانفرنس میں سرفراز احمد نے بتایا کہ گیند بڑی شدت کے ساتھ کہنی سے ٹکرائی تھی، اب بھی درد محسوس کررہا ہوں، رات کوبرف کی ٹکور کروں گا، امید ہے کہ سوجن کم ہوجائیگی، اگر بہتری نہیں آئی تو محمد رضوان میری جگہ وکٹ کیپنگ گلوز سنبھال لینگے، اس وقت ’’اے‘‘ ٹیم کے ساتھ موجود وکٹ کیپر کو طلب کرلیا ہے۔
یاد رہے کہ قوانین کے تحت میچ ریفری کی اجازت سے کسی کیپر کی انجری کی صورت میں ایسے متبادل کو بھی طلب کیا جاسکتا ہے جو 16رکنی اسکواڈ میں شامل نہ ہو۔

پریس کانفرنس میں ایک سوال پر سرفراز احمد نے بتایا کہ صرف 2اوورز میں 4وکٹیں گرنا خاصا حیران کن تھا،ابوظبی میں عام طور پر پچ چوتھے اور پانچویں روز اس طرح کی نظر آتی ہے لیکن ٹیسٹ کے پہلے دن 11بجے جو ہوا واقعی عجیب تھا، میرے لیے بھی کریز پر آنے کے بعد 15منٹ بڑے مشکل تھے،بہرحال کوشش کی اور کامیاب رہا، فخرزمان نے اسٹرائیک بہتر رکھنے میں اہم کردار ادا کیا۔کپتان نے کہا کہ ان فارم عثمان کی وکٹ حاصل کرنے کے بعد کینگروز پر مزید دباؤ بڑھائیں گے، کوشش ہے کہ اچھا ہدف دے کر چوتھی اننگز میں پچ کا فائدہ اٹھاتے ہوئے مہمان بیٹنگ لائن کو ڈھیراور سیریز اپنے نام کریں۔کپتانی چھوڑ دو، ٹیم سے نکال دو منفی تبصروں سے پریشان تھا، سرفراز احمد کپتان سرفراز احمد نے کہا ہے کہ منفی تبصروں کی وجہ سے میں دباؤ کا شکار تھا، کسی نے کہا کہ مجھے ٹیم سے نکال دو، کسی نے کپتانی چھوڑنے کی بات کہی، شکر ہے ابوظبی ٹیسٹ میں بڑی اننگز کھیل کر میں پریشر سے باہر نکل آیا۔

اسلام آباد(نیٹ نیوز/ایمرا نیوز) وزیرِ اعظم عمران خان نے کہا ہے کہ اگر میڈیا نہ ہوتا تو میں آج یہاں نہ ہوتا، میڈیا کی بدولت میں آج یہاں ہوں ، ہم میڈیا کو مکمل سپورٹ کریںگے، وزیرِ اعظم نے یہ بات گزشتہ روز آل پاکستان نیوز پیپرز سوسائٹی( اے پی این ایس ) کے وفد سے ملاقات میں کہی ۔ ملاقات میں وزیرِ اطلاعات فوادچوہدری، معاون خصوصی برائے میڈیا افتخار درانی، سینیٹر فیصل جاوید، سیکرٹری اطلاعات شفقت جلیل بھی موجود تھے ۔ اے پی این ایس کے وفد نے وزیرِ اعظم کو منتخب ہونے پر مبارکباد دی۔ وفد نے وزیرِ اعظم کو اخباری صنعت کو درپیش مسائل سے آگاہ کیا۔ وزیر اعظم نے کہا کہ سابقہ ادوار کے جمع شدہ میڈیا کے بقایا جات کی ادائیگیوں کے لئے لائحہ عمل مرتب کیا جا رہا ہے تاکہ اخباری صنعت کی مشکلات حل کی جا سکیں، جمہوریت کے فروغ، گڈ گورننس، شفافیت اور میرٹ کو یقینی بنانے اور عوام الناس کو آگاہی فراہم کرنے میں میڈیا کا کلیدی کردار ہے اور اس ضمن میں حکومت کی جانب سے میڈیا کو مکمل سپورٹ فراہم کی جائے گی، وزیرِ اعظم نے کہا کہتحریک انصاف کے نظریے کو عوام تک پہنچانے اور اس کو کامیاب کرانے میں میڈیا نے اہم کردار ادا کیا ہے۔