All posts by EMRA

اسلام آباد (وقت ٹی وی آن لائن ) پاکستان میں مقیم امریکی خاتون سنتھیا رچی نے وفاقی تحقیقاتی ایجنسی (ایف آئی اے) کو تحریری بیان جمع کرادیا۔

سنتھیا رچی نے بیان میں کہا ہے کہ 10 سال سے پاکستان میں ہوں اور خیبر پختونخوا حکومت کیلئے محکمہ آرکیالوجی اور مختلف این جی اوز کیلئے کام کرتی ہوں۔

انہوں نے کہا کہ پیپلز پارٹی سے نہیں لڑنا چاہتی، بلاول کو مستقبل کا طاقتور لیڈر دیکھتی ہوں، ایمانداری کی بات ہے بلاول کا مستقبل کے رہنما کے طور پر ڈاکیومنٹری میں انٹرویو کرنا چاہتی تھی۔

سنتھیا رچی کا کہنا تھا کہ ایک تحقیقاتی ڈاکیومنٹری بنا رہی ہوں جس میں پیپلز پارٹی اور پشتون تحفظ موومنٹ (پی ٹی ایم) کے درمیان تعلقات اور رابطوں کی تحقیقات کررہی ہوں اور اِس تحقیقات میں پاکستان کے سیکیورٹی ادارے تعاون کررہے ہیں۔

خیال رہے کہ حال ہی میں امریکی شہری سنتھیا رچی نے سوشل میڈیا پر پیپلز پارٹی کی اعلیٰ قیادت کے خلاف الزامات کی بوچھاڑکی تھی۔

انھوں نے سابق وزیر داخلہ رحمان ملک پر جنسی زیادتی جب کہ سابق وزیراعظم یوسف رضا گیلانی اور سابق وفاقی وزیر مخدوم شہاب الدین پر دست درازی کا الزام عائد کیا تھا۔

اس سے قبل سنتھیا رچی نے سابق وزیراعظم بینظیر بھٹو کے حوالے سے بھی متنازع اور نامناسب ٹوئٹ کی تھیں۔

امریکی خاتون کے الزامات پر پیپلز پارٹی نے قانونی چارہ جوئی کیلئے عدالت سے بھی رجوع کیا ہے جس پر سنتھیا کو 9 جون کو جسٹس آف پیس کے سامنے پیش ہونے کا حکم دیا ہے۔

اسلام آباد ( وقت ٹی وی آن لائن ) وفاقی حکومت نے چینی کمیشن رپورٹ میں آئے ناموں کے خلاف کارروائی کا فیصلہ کرلیا ہے۔

ذرائع کے مطابق چینی بحران میں ملوث افراد کے خلاف حتمی کارروائی کا فیصلہ کل اہم اجلاس میں کیا جائے گا۔

خیال رہے کہ گذشتہ دنوں حکومت چینی بحران پر وفاقی تحقیقاتی ایجنسی (ایف آئی اے) کی تحقیقاتی رپورٹ کا فرانزک کرنے والے کمیشن کی حتمی رپورٹ منظر عام پر لے آئی تھی۔

رپورٹ کے مطابق جہانگیر ترین، مونس الٰہی، شہباز شریف اور ان کے اہل خانہ، اومنی گروپ اور عمرشہریار چینی بحران کے ذمے دار قرار دیے گئے ہیں۔

فارنزک آڈٹ رپورٹ میں چینی اسیکنڈل میں ملوث افراد کےخلاف فوجداری مقدمات درج کرنے اور ریکوری کرنےکی سفارش کی گئی ہے جب کہ رپورٹ میں تجویز دی گئی ہے کہ ریکوری کی رقم گنےکے متاثرہ کسانوں میں تقسیم کردی جائے۔

جہانگیر ترین نے اپنے دورہ برطانیہ سے متعلق قیاس آرائیوں کو مسترد کردیا

یاد رہے کہ وزیراعظم عمران خان نے اعلان کیا تھا کہ وہ چینی بحران کی فارنزک رپورٹ موصول ہونے کے بعد ذمہ داروں کے خلاف کارروائی کریں گے۔

تاہم جہانگیر ترین علاج کی غرض سے گزشتہ روز لندن روانہ ہوگئے ہیں۔ ان کی اچانک لندن روانگی کی بعض افراد نے سوال بھی اٹھایا تاہم انہوں نے قیاس آرائیوں کو مسترد کرتے ہوئے کہا کہ وہ سال میں دو بار چیک اپ کیلئے لندن جاتے ہیں اور جلد وطن واپس آجائیں گے۔

واشنگٹن ( وقت ٹی وی آن لائن ) عالمی ادارہ صحت (ڈبلیو ایچ او) نے خبردار کیا ہے کہ لاطینی امریکا کے ملک دنیا بھر میں کورونا وبا کا نیا مرکز بن گئے ہیں۔

عالمی ادارہ صحت نے خبردار کیا ہے کہ لاطینی امریکی ملک کورونا کے باعث عائد پابندیاں اٹھانے میں جلدی نہ کریں، اس خطے میں کورونا کےکیس اور اس سے اموات میں دنیا میں سب سے زیادہ تیزی سے اضافہ ہو رہا ہے۔

امریکی نشریاتی ادارے کے مطابق لاطینی امریکی ممالک میں ایک کروڑ 20 لاکھ کے قریب کیس ہیں جب کہ وہاں 60 ہزار سے زائد اموات ہو چکی ہیں۔

برازیل میں اب تک 6 لاکھ 73 ہزار سے زائد کیس اور 36 ہزار کے قریب اموات ہو چکی ہیں۔ برازیل کورونا مریضوں کی تعداد کے حساب سے دنیا میں دوسرے اور اموات کے معاملے میں تیسرے نمبر پر پہنچ چکا ہے۔

فیڈرل یونیورسٹی آف ریو کی تحقیق کے مطابق 20 جون تک برازیل میں کورونا کیسوں کی تعداد 10 لاکھ اور اموات کی تعداد 50 ہزار تک پہنچ جائیں گی۔ اس کے باوجود برازیل کے شہر ساؤ پالو میں چرچ،کاروں کی دکانوں اور ڈیکوریشن اسٹور کھولنے کی اجازت دے دی گئی ہے۔

میکسیکو میں کورونا کے ایک لاکھ 10ہزار سے زائد کیس جب کہ 13 ہزار اموات ہو چکی ہیں، حکام کا کہنا ہے کہ ٹیسٹنگ انتہائی کم ہونے کے باعث کیسز کی اصل تعداد لاکھوں میں ہوسکتی ہے۔

ادھر یوروگوئے،کورونا وبا پر قابو پانے میں کام یاب رہا ہے جہاں تقریباً ساڑھے تین کروڑ کی آبادی میں صرف 845کیسز اور 23اموات ہوئی ہیں۔

ماہرین کا کہنا ہے کہ اس کامیابی کی وجہ قرنطینہ کے بروقت اقدامات،متاثرین کا پتہ لگا کر انہیں آئسولیٹ کرنے کا بہترین نظام شامل ہے۔

رحیم یار خان ( وقت ٹی وی آن لائن ) رحیم یارخان میں موٹر وے ایم فائیو پر ترنڈہ محمد پناہ انٹر چینج کے قریب کار الٹ گئی جس کے نتیجے میں ایک ہی خاندان کے چار افراد جاں بحق اور تین زخمی ہو گئے۔

ریسکیو حکام کے مطابق بدنصیب خاندان بہاولپور سے رحیم یار خان جا رہا تھا کہ گاڑی کی رفتار تیز ہونے کے باعث حادثہ پیش آیا، حادثے کے بعد گاڑی میں آگ لگ گئی جس کے نتیجے میں ایک ہی خاندان کے چار افراد جاں بحق اور تین زخمی ہو گئے۔

ریسکیو حکام کا کہنا ہے کہ جاں بحق ہونے والوں میں 2 بچے بھی شامل ہیں جب کہ زخمی ہونے والی خواتین کو تشویشناک حالت میں شیخ زید اسپتال منتقل کر دیا گیا ہے۔

بہاول نگر (وقت ٹی وی آن لائن ) بہاول نگر کی تحصیل چشتیاں میں دو جعلی آرتھوپیڈک سرجن نجی اسپتال میں مریض کی ٹانگ کا آپریشن کرتے ہوئے گرفتار ہو گئے۔

تھانا سٹی اے ڈویژن چشتیاں پولیس کے مطابق انہیں 15 کے ذریعے اطلاع ملی کہ بہاول نگر روڈ پر واقع ایک نجی آرتھوپیڈک اسپتال میں دو جعلی سرجن کئی گھنٹوں سے افضال نامی مریض کی ٹانگ سے راڈ نکالنے کے لیے آپریشن کر رہے ہیں۔

اطلاع ملنے پر پولیس نے فوری طور اسپتال جا کر دونوں جعلی سرجنز وسیم اور وقاص کو حراست میں لے لیا اور مریض کو تحصیل ہیڈ کوارٹر اسپتال منتقل کر دیا ہے۔

مقامی نجی اسپتال کے ڈاکٹر نے جیو نیوز کو بتایا کہ میں نے ملزمان کے خلاف پولیس کو درخواست دی ہے کہ یہ میرے اسپتال میں آپریشن اسسٹنٹ اور اٹنیڈنٹ ہیں اور میرے آرتھوپیڈک اسپتال میں آپریشن کے لیے مریضوں کو کم پیسوں میں آپریشن کرنے کا لالچ دے کر ایک اور نجی اسپتال میں لے جا کر خود سرجن بن کر آپریشن کرتے ہیں اور انھوں نے کئی مریضوں کو غلط آپریشن کر کے معذور بنا دیا ہے۔

متاثرہ مریض افضال کا کہنا ہے کہ حکومت ایسے جعلی سرجنوں اور اسپتالوں کے خلاف کارروائی کرے اور مجھے بھی انصاف فراہم کیا جائے۔

فیصل آباد ( وقت ٹی وی آن لائن ) فیصل آباد میں پولیس اہکاروں کی جانب سے ایس او پیز کی خلاف ورزی کرنے والے شہریوں پر الیکٹرک شاک اسٹک کا استعمال کیا گیا۔

رپورٹ کے مطابق فیصل آباد میں ایس او پیز کی خلاف پر پولیس اہلکاروں نے شہریوں کے خلاف الیکٹرک شاک اسٹک کا استعمال کیا۔

پولیس اہلکاروں کی جانب سے شہریوں کو ماسک استعمال نہ کرنے پر بجلی کے جھٹکے دیے گئے اور سزا کے طور پر دیوار کی طرف مُنہ کر کے کھڑا کر دیا گیا۔

ڈپٹی کمشنر نے واقعے کا نوٹس لیتے ہوئے اہل کاروں کے خلاف کارروائی کی ہدایت کر دی ہے۔

اسلام آباد ( وقت ٹی وی آن لائن ) اسلام آباد کے ایڈیشنل سیشن جج نے امریکی خاتون سنتھیا ڈی رچی کے خلاف مقدمے کی درخواست پر وفاقی تحقیقاتی ادارے (ایف آئی اے) کے سائبر کرائم ونگ کو نوٹس جاری کرتے ہوئے 9 جون تک جواب طلب کر لیا ہے۔

پیپلز پارٹی اسلام آباد کے صدر شکیل عباسی نے امریکی صحافی سنتھیا ڈی رچی کے خلاف مقدمہ درج کرنے کی درخواست کی تھی جس پر اسلام آباد کے ایڈیشنل سیشن جج جہانگیر اعوان نے سماعت کی۔

درخواست میں مؤقف اختیار کیا گیا تھا کہ امریکی صحافی نے سوشل میڈیا پر بے نظیر بھٹو کے خلاف مہم چلائی ہے۔

درخواست میں کہا گیا کہ سوشل میٖڈیا سے سنتھیا رچی کا ٹوئٹ ڈیلیٹ کرانے کے لیے پاکستان ٹیلی کمیونیکیشن اتھارٹی (پی ٹی اے) کو درخواست دی گئی تھی اور ان کے خلاف مقدمہ درج کرنے کے لیے ایف آئی اے کو درخواست بھی دی گئی مگر ان درخواستوں پر کوئی کارروائی نہیں ہوئی، اس لیے عدالت مقدمہ درج کرنے کے احکامات جاری کرے۔

بعدازاں عدالت نے درخواست پر ایف آئی اے کو نوٹس جاری کرتے ہوئے 9 جون تک جواب طلب کر لیا۔

اس سے قبل ایڈیشنل سیشن جج عابدہ سجاد نے ایک شہری وقاص عباسی کی درخواست پر مقدمہ درج نہ کرنے پر پولیس کو بھی نوٹس جاری کرتے ہوئے 8 جون تک جواب طلب کر رکھا ہے۔

خیال رہے کہ حال ہی میں امریکی شہری سنتھیا رچی نے سوشل میڈیا پر پیپلز پارٹی کی اعلیٰ قیادت کے خلاف الزامات کی بوچھاڑکی تھی۔

انھوں نے سابق وزیر داخلہ رحمان ملک پر جنسی زیادتی جب کہ سابق وزیراعظم یوسف رضا گیلانی اور سابق وفاقی وزیر مخدوم شہاب الدین پر دست درازی کا الزام عائد کیا تھا۔

سنتھیا رچی نے سابق وزیراعظم بینظیر بھٹو کے حوالے سے بھی متنازع اور نامناسب ٹوئٹ کی تھیں۔

امریکی خاتون کے الزامات پر پیپلز پارٹی نے قانونی چارہ جوئی کیلئے عدالت سے بھی رجوع کیا ہے جس پر سنتھیا کو 9 جون کو جسٹس آف پیس کے سامنے پیش ہونے کا حکم دیا گیا ہے۔

لاہور ( وقت ٹی وی آن لائن ) سیاہ فام شخص کے قتل کے خلاف امریکا میں گزشتہ کئی روز سے جاری مظاہرے ایک تحریک میں تبدیل ہونا شروع ہو گئے۔

امریکا میں سیاہ فام شہری جارج فلائیڈ کے قتل اور نسل پرستی کے خلاف وائٹ ہاؤس، کیپیٹل ہل اور لنکنز میموریل کے سامنے مظاہرےکیے گئے۔

امریکی میڈیا نے دعویٰ کیا تھا کہ مظاہرین کے خلاف فوج تعینات نہیں کی جائے گی لیکن اس کے باوجود وائٹ ہاؤس کے اطراف ڈیڑھ کلومیٹر کا احاطہ رکاوٹیں لگا کر بند کر دیا گیا اور فوج کی بکتر بند گاڑیاں اور سیکڑوں فوجی تعینات کر دیے گئے۔

جیو نیوزسے بات کرتے ہوئے پاکستانی امریکن وکیل سبحان طارق کا کہنا تھاکہ مظاہرین محض قاتلوں کو سزا نہیں بلکہ نظام میں تبدیلی چاہتے ہیں۔

نیویارک شہر کے علاقوں بروکلین اور مین ہٹن میں بھی ہزاروں افراد نے نسل پرستی کے خلاف احتجاج کیا۔

اس صورتحال کے باوجود امریکی صدر ٹرمپ نے “جارج فلائیڈ اچھاآدمی نہیں تھا ” کاپیغام دینےوالی ویڈیو ری ٹوئٹ کر دی۔

ویڈیو پیغام کنزرویٹو خاتون نے سماجی رابطے کی ویب سائٹ پر شیئر کیا تھا جس میں کہا گیا تھا کہ فلائیڈکوشہیدقرار دینا اسے برداشت نہیں۔

پاکستانی امریکن پروفیسر نعیم ظفر کاکہناتھا کہ صدر ٹرمپ کا یہ ویڈیو ری ٹوئٹ کرنا انتخابی مہم کاحصہ ہے۔

لاس اینجسم اور سان فرانسسکو میں بھی ہزاروں افراد احتجاج میں شریک ہوئے۔ مظاہرین کا کہنا تھاکہ سفید فام افراد کے ہاتھوں سیاہ فاموں سے نامساوی سلوک نہیں چلے گا۔

خیال رہے کہ امریکی ریاست منی سوٹا کے شہر مینی پولِس میں 25 مئی 2020 کو سفید فام پولیس اہلکار کے ہاتھوں 45 سالہ سیاہ فام شہری جارج فلوئیڈ ہلاک ہوگیا تھا۔

مینی پولس میں سفید فام پولیس اہلکاروں کے ہاتھوں سیاہ فام جارج فلائیڈ کے قتل کے بعد ہنگامے پھوٹ پڑے تھے جس نے امریکا کے کئی شہروں کو اپنی لپیٹ میں لے لیا۔

اسلام آباد ( وقت ٹی وی آن لائن ) پٹرولیم مصنوعات کی عدم فراہمی اور کمی پر آئل اینڈ گیس ریگولیٹری اتھارٹی (اوگرا) کے شوکاز پر آئل مارکیٹنگ کمپنیز نے جواب جمع کرادیا۔

اوگرا کے شوکاز پر اپنے جواب میں آئل مارکیٹنگ کمپنیز نےمؤقف اختیار کیا ہے کہ مارچ میں بغیر منصوبہ بندی درآمدات بند کی گئیں اور اسمگلنگ رکنے سے بھی طلب میں اضافہ ہوا۔

آئل مارکیٹنگ کمپنیز کا کہنا ہے کہ اپریل میں تیل مصنوعات درآمد کرنے کی بار بار درخواست کی گئی، تاہم طے شدہ درآمدات بھی منسوخ کردی گئیں اور اپریل میں درآمد نہ کھلنےسےکم ترین قیمت کافائدہ نہ اٹھایاجاسکا۔

آئل مارکیٹنگ کمپنیز نےکہا ہے کہ پیٹرولیم مصنوعات کی دستیابی میں کمی وزارت پیٹرولیم کے فیصلہ نہ کرنے کی وجہ سے ہوئی۔

اوگرا کو دیے گئے جواب میں کہا گیا ہے کہ ریفائنریز مکمل گنجائش پر نہیں اس لیے مطلوبہ سپلائی نہیں مل رہی، اب عالمی منڈی میں پاکستان سےکہیں زائد قیمت پرتیل دستیاب ہے اس لیے بحران سےنمٹنے کے لیے 15دن اوسط قیمت پر ریٹیل پرائس کا اعلان کیاجائے۔

خیال رہے کہ مارکیٹ میں پیٹرولیم مصنوعات کی عدم فراہمی کی شکایات پر گذشتہ روز اوگرا نے تین آئل کمپنیز کو شو کاز نوٹس بھیجا تھا۔

اوگرا کا کہنا تھا کہ یہ کمپنیاں ریٹیل آؤٹ لیٹس کو پٹرولیم مصنوعات کی پوری فراہمی نہیں کر رہی ہیں اور اس صورتحال میں مارکیٹ میں تیل سپلائی متاثر ہوئی ہے ،اوگرا نے تین آئل مارکیٹنگ کمپنیز کو شوکاز نوٹس دیتے ہوئے 24گھنٹے میں جواب طلب کیا تھا۔

اسلام آباد ( وقت ٹی وی آن لائن ) وفاقی حکومت نے ملکی معیشت اور ترقی کی منصوبہ بندی کے لیے بین الااقوامی تجربےکا حامل چیف اکانومسٹ لانے کا فیصلہ کیا ہے۔

ذرائع کے مطابق وفاقی کابینہ نے وزارت منصوبہ بندی کی سمری کی سرکولیشن کے ذریعے منظوری دے دی ہے۔

ذرائع کا کہنا ہے کہ چیف اکانومسٹ کے لیے اسپیشل پروفیشنل پے اسکیل منظور کرایا گیا ہے اور چیف اکانومسٹ کے لیے ایم پی1کو اسپیشل پروفیشنل پے اسکیل سے بدلنےکی منظوری دی گئی ہے۔

ذرائع نے بتایا ہے کہ چیف اکانومسٹ کو اسپیشل پروفیشنل اسکیل کے تحت بھاری مشاہرہ دیا جائےگا جب کہ چیف اکانومسٹ کو وفاقی وزارت منصوبہ بندی میں تعینات کیا جائے گا۔

چیف اکانومسٹ کےانتخاب کے لیے عالمی اخبارات میں اشتہار دےکرمسابقتی عمل سے تعیناتی کی جائے گی۔