All posts by EMRA

(میڈیا پاکستان) پنجاب حکومت نے نشتر سپورٹس کمپلیکس میں باکسنگ ایرینا کے لئے ایک کروڑ جاری کر دئیے۔

ذرائع کے مطابق نشتر پارک سپورٹس کمپلیکس میں پچیس برس قبل پاکستان سپورٹس بورڈ نے باکسنگ کمپلیکس بنانے کے کام کا آغاز کیا تھا ۔فنڈز کی کمی کے باعث کام کو روک دیا گیا تھا ۔اٹھارویں ترمیم کے بعد باکسنگ کا نامکمل سٹیڈیم پنجاب کے حصے میں آیا تھا ۔سپورٹس سٹینڈنگ کمیٹی کے سربراہ حنیف عباسی کی کوششوں سے اب اس نامکمل پراجیکٹ کو مکمل کرنے کے لیے ایک کروڑ روپے کے فنڈز جاری کر دئیے گئے ہیں ۔

ڈپٹی ڈائریکٹر سپورٹس پنجاب حفیظ بھٹی کے مطابق باکسنگ کمپلیکس میں انٹرنیشنل معیار کا باکسنگ رنگ ااور اکیڈمی بنائی جائے گی ، کام کا آغاز اس مہینے کے آخر میں کر دیا جائے گا۔

(میڈیا پاکستان): پرائیویٹ ہاؤسنگ سوسائٹیز میں قبرستان کی جگہ مختص کرنے کیلئے نئی قانون سازی کا فیصلہ کر لیا گیا ، دوسری جانب قبرستان کے لیے لینڈ مختص نہ کرنے والی پرائیویٹ ہاؤسنگ سوسائٹیز کے خلاف وزیر اعلیٰ پنجاب نے شہر اور پنجاب بھر کی تمام پرائیویٹ سوسائٹیز کی چھان بین کا حکم دے دیا۔

شہر خموشاں منصوبے کے پیش نظر وزیر اعلیٰ پنجاب کی جانب سے محکمہ ہاؤسنگ پنجاب اور لوکل گورنمنٹ ڈیپارٹمنٹ کو نئے احکامات جاری کیے گئے ہیں کہ شہر سمیت پنجاب کے دیگر اضلاع میں قائم پرائیویٹ سوساٹیز کی رپورٹ مرتب کی جائے جہاں قبرستان کے لیے جگہ مختص نہ ہو۔ وزیر اعلیٰ پنجاب نے سات روز میں رپورٹ طلب کرلی ہے۔ محکمہ ہا ؤسنگ پنجاب نے وزیر اعلیٰ کے احکامات پر لاہور ڈویلپمنٹ اتھارٹی سمیت پنجاب کی دیگر اتھارٹیز کو مراسلہ جاری کر دیا۔

پنجاب میں ہا ؤسنگ اسٹینڈرڈ کے مطابق پرائیویٹ سوسائٹیز کو دو فیصد زمین قبرستان کے لیے مختص کرنا ہوتی ہے۔ اتھارٹیز متعلقہ سوساٹیز کے نقشہ جات اور پلاننگ سے رپورٹ مرتب کریں گے۔

ذرائع کا کہنا ہے کہ اگر کسی سوسائٹی میں قبرستان کی جگہ مختص نہ کی گئی تو اس سوسائٹی کی انتظامیہ اور متعلقہ اتھارٹیز کے افسران کے خلاف مقدمہ اور منظوری دینے پر کارروائی کی جائے گی ۔دوسری جانب پنجاب حکومت کی جانب سے پرائیویٹ ہاوسنگ سوسائٹیز میں قبرستان کے لیے جگہ مختص کرنے پر نئی قانون سازی کی جارہی ہےکہ اب پرائیویٹ سوسائٹیز میں قبرستان کے لیے دو کی بجائے تین فیصد زمین مختص کرنے پر سمری تیاری کی جارہی ہے۔ وزیر اعلیٰ کی منظوری کے بعد ہر نئی تعمیر پرائیویٹ سوسائٹی قبرستان کے لیے تین فیصد جگہ مختص کرے گی۔

(میڈیا پاکستان) مون سون کی بارشوں سےدریاؤں میں پانی کی سطح بلند ہونے لگی، ممکنہ سیلابی صورتحال سے بچنے کے لیے لاہور میں کسی قسم کے اقدامات نہیں کیے گئے۔

ذرائع کے مطابق دریائے راوی کےقریب چوہنگ اور موہلنوال کے نشیبی دیہات ہمیشہ ہی سیلاب کی زد میں آتے ہیں ، سیلاب کم ہو یا زیادہ یہ گاؤں پانی میں ڈوبتے ہی ہیں ،یہاں کم نشیبی علاقوں میں منو وال، خود پور اور اسکے ساتھ کی کچی بستیاں شامل ہیں، دریا کنارے موجود کشتی دریا پار دیہات میں آمدورفت کے لیے استعمال کی جاتی ہے۔

دریا سے ملحقہ سب سے زیادہ نشیبی علاقہ دریائی گزرگاہ ہونے کے باعث سیلابی پانی سب سے پہلے یہاں ہی پہنچتا ہے، پھر یہاں سے ہوتا ہوا تین کلو میٹر دورآگے آبادیوں تک جا پہنچتا ہے۔

ان نشیبی علاقوں میں بھینی، کھوکھراں دا واڑا، ٹھٹھہ نولاں، لوہاراں دا کھوہ، ڈھانا، بھینی ، شاہ پور اور دیگر دیہات شامل ہیں۔

ممکنہ سیلاب کےخطرے اورحکومتی دعوؤں کے باوجود ان دیہات کے آس پاس دور دور تک کوئی ریلیف کیمپ دیکھنے میں نظر نہیں آرہا ۔ بظاہر پرسکون بہنے والا یہ دریا جب سیلاب کا ریلہ لاتا ہے تو ہر چیز ساتھ بہالے جاتا ہے ۔ضلعی انتظامیہ جتنا جلد اس سے نمٹنے کی تیاری کر لے اتنا ہی بہتر ہے۔

(میڈیا پاکستان)لاہور ائیر پورٹ ذرائع کے مطابق ائیربلیو کی لاہور سے ابوظہبی جانے والی پرواز 430 کی روانگی کے فوری بعد جہاز سے پرندہ ٹکرا گیا جس کا علم ہوتے ہی پائلٹ نے جہاز کو ہنگامی طور پر واپس لاہور لینڈ کرایا اور ماہرین کو طلب کر کے ائیر بلیو کے ائیر بس اے تھری ٹوئنٹی ون طیارے کا تفصیلی معائنہ کرایا۔

ماہرین کے مطابق جہاز سے پرندہ ٹکرانے کی نوعیت معمولی ہونے پر جہاز کو زیادہ نقصان نہیں پہنچا لہذا جہاز اڑان کے قابل قرار دے دیا گیا۔ طیارے کے پائلٹ نے جہاز کو کلئیرنس ملتے ہی ڈیڑھ گھنٹے کی تاخیر سے پرواز کو ایک مرتبہ پھر لاہور سے ابوظہبی کے لیے ٹیک آف کیا۔ واقعے کے بعد ائیرپورٹ انتظامیہ نے رن وے اور اطراف سے پرندے ہٹانے کا کام مزید تیز کر دیا۔

پائلٹ کی جانب سے ابتدائی بیان میں بتایا گیا ہےکہ ائیربس اے تھری ٹوئنٹی ون طیارے سے پرندہ ٹکرانے کا واقعہ لاہور ائیرپورٹ کی حدود میں پیش آیا ہے تاہم انتظامیہ نے اس کی تصدیق نہیں کی البتہ تحقیقاتی ٹیم تشکیل دے کر حقائق معلوم کرنا شروع کر دیئے ہیں۔

سلمان اکرم راجہ کے دلائل مکمل ‘اسحاق ڈار کا34سالہ ٹیکس ریکارڈ عدالت میں پیش کردیا گیا- وکلاءکو آج دلائل مکمل کرنے کی ہدایت-بچوں نے غلط کام کیا ہو تو والد پر اس کا اثر نہیں پڑتا-سلمان اکرم راجہ نے اپنے دلائل مکمل کرلیے

اسلام آباد (میڈیا پاکستان)سپریم کورٹ میں جے آئی ٹی کی حتمی رپورٹ پر پانچویں روز سماعت ہوئی اور تمام فریقین کے دلائل مکمل ہونے کے بعد عدالت عظمیٰ نے فیصلہ محفوظ کرلیا ہے جو بعد میں سنایا جائے گا۔قبل ازیںسپریم کورٹ میں جے آئی ٹی رپورٹ پر پاناما عمل درآمد کیس کی پانچویں سماعت جسٹس اعجاز فضل خان کی سربراہی میں شروع ہوئی۔
سپریم کورٹ نے وزیراعظم نوازشریف کے وکیل خواجہ حارث کی درخواست پر جے آئی ٹی کا خفیہ رکھاگیا والیم نمبر10کھول دیا ہے-اعلی عدالت کی جانب سے وزیر اعظم کے بچوں کے وکیل سلمان اکرم راجا کے دلائل جاری ہیں عدالت نے وکلاءکو ہدایت کی ہے کہ وہ آج اپنے دلائل مکمل کریں ۔ سماعت کے دوران جسٹس اعجاز افضل نے وزیراعظم کے بچوں کے وکیل سلمان اکرم راجہ نے کہا کہ کیا آپ یہ کہہ رہے ہیں کہ کیس نیب کو بھجوا دیا جائے جس پر سلمان اکرم راجہ نے کہا کہ میں نیب کا ذکر نہیں کر رہا میں صرف یہ کہہ رہا ہوں کہ اس کیس کی جامع تحقیقات کروائی جائیں۔
سپریم کورٹ کے تین رکنی بینچ نے پاناما کیس کی سماعت کے دوران جے آئی ٹی رپورٹ کی جلد نمبر دس کو کھولنے کا فیصلہ کیا جس کے لیے وزیراعظم کے وکیل خواجہ حارث نے بھی درخواست کی۔اس مو قع ہر جسٹس اعجازالاحسن نے کہا کہ والیم 10 کھولنے سے بہت سی چیزیں واضح ہو جائیں گی۔سلمان اکرم راجہ نے عدالت کو بتایا کہ لندن میں بہت سے ایسے وکلا ہیں جو ہفتہ اور اتوار کو بھی کام کرتے ہیں اور انھوں نے ایسے وکلا کی ایک فہرست بھی عدالت کو فراہم کی۔
جواب میں جسٹس اعجاز افضل نے سلمان اکرم راجہ سے پوچھا کہ کیا اس فہرست میں اس وکیل کا نام بھی شامل ہے جس نے اپ کی دستاویز تصدیق کی ہیں جس کے جواب میں سلمان اکرم راجہ نے کہا نہیں۔سماعت سے قبل وزیر خزانہ اسحاق ڈار کے وکیل نے 34 سالہ ٹیکس ریکارڈ عدالت میں پیش کیا۔ سلمان اکرم راجہ نے اپنے دلائل میں کہا کہ گزشتہ سماعت میں نیلسن اورنیسکول کے ٹرسٹ ڈیڈ پربات ہوئی تھی، عدالت کے ریمارکس تھے کہ بادی النظرمیں یہ جعلسازی کا کیس ہے اور اسی حوالے سے میں نے کل کہا تھا اسکی وضاحت ہوگی۔
جسٹس عظمت سعید شیخ نے ریمارکس دیئے کہ یہ تو ہم بھی دیکھ سکتے ہیں کہ دستخط کیسے مختلف ہیں جس پر سلمان اکرم راجہ نے کہا کہ اکرم شیخ نے کل کہا ہے کہ غلطی سے یہ صفحات لگ گئے تھے، یہ صرف ایک کلریکل غلطی تھی جو اکرم شیخ کے چیمبر سے ہوئی، کسی بھی صورت میں جعلی دستاویز دینے کی نیت نہیں تھی، ماہرین نے غلطی والی دستاویزات کا جائزہ لیا جس پر جسٹس عظمت سعید نے ریمارکس دیئے کہ مسئلہ صرف فونٹ کا رہ گیا ہے، جس پر سلمان اکرم راجہ نے کہا کہ دوسرا معاملہ چھٹی کے روز نوٹری تصدیق کا ہے، لندن میں بہت سے سولیسٹر ہفتہ بلکہ اتوار کو بھی کھلتے ہیں جس پر جسٹس اعجاز الاحسن نے ریمارکس دیئے کہ حسین نواز سے پوچھا گیا کہ چھٹی کے روز ملاقات ہوسکتی ہے، حسین نواز نے کہا تھا کہ چھٹی کے روز اپوائنٹمنٹ نہیں ہوسکتی جس پر سلمان اکرم راجہ نے کہا کہ عام سوال کیا جائے تو جواب مختلف ہوگا مخصوص سوال نہیں کیا گیا۔
جے آئی ٹی رپورٹ کے والیم 10 کے بارے میں جسٹس عظمت سعید نے ریمارکس دیئے کہ دسویں جلد میں جے آئی ٹی کے خطوط کی تفصیل ہوگی اور دسویں جلد سے بہت سی چیزیں واضح ہوجائیں گی جس کے بعد جے آئی ٹی رپورٹ کاسربمہر والیم 10 عدالت میں پیش کردیا گیا، والیم 10 کی سیل عدالت میں کھول دی گئی اورعدالت نے والیم 10 کا جائزہ بھی لیا جب کہ جسٹس عظمت سعید نے ریمارکس میں کہا کہ خواجہ حارث یہ والیم آپکی درخواست پر کھولا جارہا ہے۔
جسٹس اعجاز الاحسن نے ریمارکس دیئے کہ کیا دستاویزات میں متعلقہ نوٹری پبلک کی تفصیل ہے جس پر سلمان اکرم راجہ نے کہا کہ حسین نواز کا اکثر سولیسٹر سے رابطہ رہتا ہے۔ جسٹس اعجاز الاحسن نے ریمارکس دیئے کہ حسین نواز نے نہیں کیا کہ انکا رابطہ سولیسٹر سے رہتا ہے، ان دستاویزات پر کسی کے دستخط بھی نہیں، کل عدالت کو بی وی آئی کا 16 جون کا خط موصول ہوا۔
جسٹس عظمت سعید نے ریمارکس دیئے کہ آج سلمان اکرم راجہ نے اچھی تیاری کی، عدالت نے خواجہ حارث کو والیم 10 کی مخصوص دستاویز پڑھنے کو دے دی تاہم عدالت کی جانب سے ریمارکس دیئے گئے کہ ابھی والیم 10 کسی کو نہیں دکھائیں گے۔جسٹس عظمت سعید نے ریمارکس دیئے کہ 23 جون کو جے آئی ٹی نے خط لکھا، جواب میں اٹارنی جنرل بی وی آئی نے خط لکھا۔ جسٹس اعجازافضل نے ریمارکس دیئے کہ کیا اس بات سے اتفاق کرتے ہیں کہ ریفرنس نیب کو بھجوا دیا جائے جس پر سلمان اکرم راجہ نے کہا کہ میرا جواب ہے کہ کیس مزید تحقیقات کا ہے، خطوط کو بطور شواہد پیش کیا جا سکتا ہے لیکن تسلیم نہیں کیا جا سکتا جس پر جسٹس اعجاز الاحسن نے ریمارکس دیئے کہ شواہد کو تسلیم کرنا نہ کرنا ٹرائل کورٹ کا کام ہے جب کہ جسٹس اعجاز افضل نے ریمارکس دیئے کہ کل پوچھا تھا کیا قطری شواہد دینے کے لیے تیارہے جس پر سلمان اکرم راجہ نے کہا کہ قطری کی جانب سے کچھ نہیں کہہ سکتا۔
سلمان اکرم راجہ نے کہا کہ کل عدالت نے کہا تھا کہ قطری نے جے آئی ٹی کے سامنے پیش ہونے سے انکارکیا، میں نے تمام قطری خطوط کا جائزہ لیا جس پرجسٹس اعجازالاحسن نے ریمارکس دیئے کہ کل جسٹس عظمت سعید نے پوچھا تھا کہ کیا آج قطری پیش ہونے کوتیارہیں۔وزیراعظم کے بچوں کے وکیل سلمان اکرم راجہ نے اپنے دلائل مکمل کرتے ہوئے کہا کہ ان کے موکلین کو رقوم اپنے دادا شریف حسین اور والد نواز شریف سے ملیں۔
اور اگر میرے موکلین نے کوئی غلط کام بھی کیا ہے تو اس کا اثر فریق نمبر ایک یعنی وزیراعظم نواز شریف پر نہیں پڑتا۔ بنچ کے سربراہ جسٹس اعجاز افضل خان نے اپنے ریماکس میں کہا کہ وزیراعظم نے قومی ا سمبلی میں کی جانے والی تقریر میں اپنے اثاثوں اور کاروبار کا ذکر کرتے ہوئے’ ’ہمارے‘ ‘کا لفظ استعمال کیا ہے اس کا مطلب یہ ہوا کہ وہ اپنے آپ کو خاندان سے الگ نہیں کر رہے۔
سلمان اکرم راجہ نے کہا کہ قطری شہزادے کوویڈیو لنک کی پیشکش نہیں کی گئی-سال 2004 تک حسین اور حسن کو سرمایہ ان کے دادا دیتے رہے، اگر بیٹا اثاثے ثابت نہ کر سکے تو ذمہ داری والدین پر نہیں آ سکتی جس پر جسٹس اعجاز افضل نے ریمارکس دیئے کہ عوامی عہدہ رکھنے والوں کی آمدن اثاثوں کے مطابق نہ ہو تو کیا ہوگا، پبلک آفس ہولڈر نے اسمبلی میں کہا” یہ ہیں وہ ذرائع جن سے فلیٹس خریدے“ جس کے بعد وزیراعظم نے کچھ مشکوک دستاویزات سپیکر کو دیں ہم ایک سال سے ان دستاویزات کا انتظار کر رہے ہیں، یہاں معاملہ عوامی عہدہ رکھنے والے کا ہے، وہ اپنے عہدے کے باعث جواب دہ ہیں۔
جسٹس اعجاز الاحسن نے ریمارکس دیئے کہ عوامی عہدہ رکھنے والے نے قومی اسمبلی اور قوم سے خطاب کیا تھا خطاب میں کہا تھا بچوں کے کاروبار کے تمام ثبوت موجود ہیں اور ہم ایک سال سے ان ثبوتوں کا انتظار کررہے ہیں، رپورٹ میں مریم کے بینیفیشل مالک ہونے کا کہا گیا ہے۔جسٹس اعجاز افضل نے ریمارکس دیئے کہ مریم نواز کی کمپنیوں کا بینیفیشل مالک ہونا کیپٹن صفدر کے گوشواروں میں ظاہر نہیں ہوتا، اگر عدالت اس نتیجے پر پہنچی کہ گوشواروں میں ملکیت کاذکر نہیں تو عوامی نمائندگی ایکٹ لاگو ہو گا جس پر سلمان اکرم نے کہا کہ عوامی نمائندگی ایکٹ لاگو کرنے کے لیے باقاعدہ قانونی عمل درکارہو گا، جے آئی ٹی کو ایرول جارج نے اپنے جواب میں 2012جون کی صورتحال کی تصدیق کی اور ایرول جارج کے بیان میں کوئی نئی بات نہیں۔
وزیراعظم کے بچوں کے وکیل سلمان اکرم راجہ نے دلائل مکمل کر لیے ہیں اور اب کیپٹن صفدر کی جانب سے طارق حسن دلائل دے رہے ہیں۔

اسلام آباد (میڈیا پاکستان ) پاناما عملدر آمد بینچ نے کیس کی سماعت کے دوران جے آئی ٹی کے کام کی بھی تعریف کی اور ریمارکس دیے کہ جے آئی ٹی نے اپنی حیثیت سے بڑھ کر کام کیا۔
پاناما عملدر آمد کیس کی سماعت کے دوران نعیم بخاری کے دلائل کے دوران جسٹس اعجاز افضل نے ریمارکس دیے کہ جے آئی ٹی نے اپنی حیثیت سے بڑھ کر کام کیا، دیکھنا ہوگا جے آئی ٹی کا مواد کس حد تک قابل قبول ہے ۔ جسٹس اعجاز الاحسن نے کہا کہ جے آئی ٹی نے جن حالات میں کام کیا وہ قابل تعریف ہے۔ نعیم بخاری نے کہا کہ جے آئی ٹی کو کہا گیا تھا کہ شکر ہے آپ جیسے لوگ اس ملک میں موجود ہیں، جسٹس عظمت سعید شیخ نے کہا کہ پاکستان میں اکثریت جے آئی ٹی جیسے لوگوں کی ہے۔

لاہور(میڈیا پاکستان)قائم مقام ڈی جی اینٹی کرپشن پنجاب ندیم سرور کی ہدایات پر ڈائریکٹر اینٹی کرپشن لاہور ریجن عدنان ارشد اولکھ نے لاہور ڈویژن کی حدود میں تعینات 22صوبائی محکموں میں تعینات گریڈ 17،18اور 19کے افسران کے خلاف موصول ہونے والی درخواستوں پرزیر سماعت انکوائریوں اور درج شدہ مقدمات کو ہنگامی بنیادوں پر نمٹانے کا عندیہ دے دیا ہے ،تفصیلات کے مطابق ڈائریکٹر اینٹی کرپشن عدنان ارشد اولکھ کی زیر صدارت اجلاس میں ڈپٹی ڈائریکٹر اینٹی کرپشن محمد نواز گوندل،اسسٹنٹ ڈائریکٹر انوسٹی گیشن محمد عمر مقبول ،ڈاکٹر امتیاز محسن سمیت دیگر افسران نے شرکت کی ،اجلاس میں ڈائریکٹر اینٹی کرپشن کی طرف سے گریڈ 17یا اس سے زائد کے افسران کی فہرست تیار کرنے کی ہدایت کی جن کی انکوائریاں اور کیس اینٹی کرپشن میں چل رہے ہیں اینٹی کرپشن ذرائع کے مطابق لاہور ڈویژن میں ضلع لاہور ،شیخوپورہ،ننکانہ اور قصورمیں سینکڑوں کی تعداد میں محکمہ اینٹی کرپشن کو درخواستیں موصول ہوئیں اور رواں سال کے دوران اس کے علاوہ متعدد کے خلاف کرپشن ،رشوت وصولی ،اختیارات کے ناجائزا ستعمال اور سرکاری فنڈز میں خرد برد کے الزام کے تحت انکوائریاں بھی زیر سماعت ہیں جبکہ الزام ثابت ہونے کی صورت میں بیشتر مقدمات بھی درج کئے جا چکے ہیں جن افسران کے خلاف سنگین الزامات کے تحت کیس ،انکوائریاں اور درخواستوں کی سماعت کی جارہی ہے ان میں افسران کا تعلق محکمہ ریونیو ،ایل ڈی اے،پولیس،ضلعی انتظامیہ،ٹی ایم اے ،ایجوکیشن اور کوآپریٹو سے سے ہے اس طرح ایریگیشن ،پنجاب لینڈ ریکارڈ اتھارٹی ،محکمہ خوراک،رنگ روڈ سمیت ٹریفک اور پی ایچ اے کے افسران بھی شامل ہیں

اسلام آباد(میڈیا پاکستان)پاناماکیس کی تحقیقات کرنے والی جے آئی ٹی کو برٹس ورجن آئی لینڈ کے اٹارنی جنرل نے معلومات دینے سے انکار کر دیا تھا۔
تفصیلات کے مطابق برٹش ورجن آئی لینڈ کی جانب سے جے آئی ٹی کو لکھے جانے والے خط کے مندرجات سامنے آ گئے ہیں جس میں اٹار نی جنرل برٹش ورجن آئی لینڈ کا کہناہے جے آئی ٹی کی جانب سے بھیجی جانے والی درخواست میں واضح نہیں کیا گیا کہ آف شور کمپنیاں کیسی بد عنوانی میں ملوث ہیں اور یہ بھی نہیں بتایا گیا کہ آف شور کمپنیوں نے کس نوعیت کا جرم کیا ۔خط میں کہا گیاہے کہ درخواست میں متعلقہ قوانین کا حوالہ بھی نہیں دیا گیا ۔

لاہور(میڈیا پاکستان )وزیراعلیٰ پنجاب محمد شہبازشریف نے کہا ہے کہ پاکستان کے عوام افراتفری اور انتشار نہیں بلکہ ترقی و خوشحالی چاہتے ہیں اوراس وقت جب ملک تیزی سے ترقی کررہا ہے تو سیاسی تماشا لگانے والوں کے عزائم کسی سے ڈھکے چھپے نہیں، ملک کی ترقی اور عوام کی خوشحالی کی قیمت پر تماشا لگانے والوں کو قوم پر رحم کرنا چاہیے،اپنے صوبے میں بدترین کارکردگی دکھانے والے صرف جھوٹ اور بے بنیاد الزامات کی سیاست کر رہے ہیں اورجھوٹ کو ہر قدم پر ندامت کا سامنا کرنا پڑا ہے اور سچ ہر موقع پر سرخرو ہوا ہے،نیازی صاحب پاکستان میں انتشار ،جھوٹ اور منافقت کی سیاست کے بانی ہیں اور ان کی تمام تر سیاست دشنام طرازی اور جھوٹ پر مبنی ہے ،بیان دے کر تردید کرنا اور بات کہہ کے پیچھے ہٹ جانا جھوٹ بولنے کے ماہر ان سیاستدان کا شیوہ ہے، منفی سیاست کے علمبرداروں کو 2013 کے عام انتخابات کے بعد ہر موقع پر شکست کا سامنا کرنا پڑا ہے اور شکست خوردہ عناصر کی بیمار ذہنیت قوم کے سامنے عیاں ہوچکی ہے، مخلص اور خدمت خلق سے سرشار قیادت پر بے بنیاد الزامات کی بوچھاڑ کرنے والوں کی ساری سیاست جھوٹ پر مبنی ہے، یہ عناصر ہوس اقتدار میں ملک کی ترقی کا سفر خراب کرنے کے درپے ہیں، پاکستان کو معاشی ترقی سے محروم کرنے کی سازشیں کرنے والے اپنے عزائم میں کامیاب نہیں ہوسکتے،وزیراعظم محمد نوازشریف کی قیادت میں عوامی خدمت کے نئے ریکارڈ قائم کئے ہیں اور مسلم لیگ (ن) کی حکومت نے شفافیت اور اعلیٰ معیار کے ساتھ ریکارڈ مدت میں منصوبے مکمل کرکے نئے رجحان کی داغ بیل ڈالی ہے۔وزیراعلیٰ محمد شہبازشریف نے ان خیالات کا اظہار مختلف اضلاع سے تعلق رکھنے والے اراکین قومی اسمبلی سے گفتگو کرتے ہوئے کیا ۔
وزیراعلیٰ شہبازشریف نے اراکین اسمبلی سے گفتگو کرتے ہوئے کہا کہ ایک بار پھر محاذآرائی کی کوشش کرنے والے عوام کی ترقی پر حملہ آور ہیں۔ منفی حربوں کے ذریعے ان کا حصول اقتدار کا خواب پورا نہیں ہوگا۔ وزیراعلیٰ نے کہا کہ ملک کو مشکلات سے نکال کر ترقی کی راہ پر ڈالنا ہمارا جرم ہے تو اس کے لئے ہر سزا بھگتنے کو تیار ہیں۔ منصوبوں میں اربوں روپے کی بے مثال بچت کرنا ہمارا قصور ہے تو بھی ہر سزا کیلئے تیار ہیں۔ توانائی منصوبوں کی ریکارڈ مدت میں تکمیل ہمارا گناہ ہے تو اس کیلئے بھی سزا بھگتنے کیلئے تیار ہیں۔ مخالفین جتنا چاہیں چیختے چلاتے رہیں ، عوام کی خدمت کے مشن سے پیچھے نہیں ہٹیں گے اورعوام سے کیا گیا ہر وعدہ پورا کریں گے۔انہوں نے کہا کہ محب وطن اور دیانتدار قیادت پربے بنیاد الزامات لگانے والے عوام کے ووٹ کی حرمت کو پامال نہ کریں،انتہائی افسوسناک امر ہے کہ کرپشن او ربدعنوانی کی داستانیں رقم کرنے والے بھی احتساب کا شور مچا رہے ہیں۔جھوٹ کے مصنوعی سہارے کے ذریعے عوام کو گمراہ کرنے کی کوئی سازش کامیاب نہیں ہوگی۔انہوں نے کہا کہ عوام کی بے لوث خدمت ہمارا مشن ہے اور اسے ہر قیمت پرپورا کریں گے اور پاکستان کے با شعور عوام ملک کو آگے بڑھنے سے روکنے والوں کو اپنے عزائم میں کسی صورت کامیاب نہیں ہونے دیں گے۔ترقی کے سفر کو متاثر کرنے والوں سے پاکستان کے عوام حساب لیں گے۔ وزیراعلیٰ سے ملاقات کرنے والے اراکین قومی اسمبلی میں محسن شاہنواز رانجھا، طاہر بشیر چیمہ اور محمداصغر شامل تھے۔

لاہور(میڈیا پاکستان) پاکستان اور نیوزی لینڈ کے کرکٹ بورڈز کے درمیان سیریز کا شیڈول طے پا گیا ہے، قومی ٹیم دسمبر میں سیریز کھیلنے کے لئے نیوزی لینڈ کا دورہ کرے گی۔
پاکستان کرکٹ بورڈ اور نیوزی لینڈ کرکٹ بورڈ کے درمیان دونوں ممالک کی ٹیموں کے مابین سیریز کے معاملات طے پا گئے ہیں، سیریز دسمبر میں نیوزی لینڈ میں کھیلی جائے گی جبکہ سیریز میں پانچ ایک روزہ اور 3ٹی ٹوینٹی میچزکھیلے جائیں گے۔پاکستان کرکٹ ٹیم 26 دسمبرسے31 جنوری 2018 تک نیوزی لینڈ کا دورہ کرے گی۔