All posts by EMRA

لاہور ( وقت ٹی وی آن لائن ) کورونا وائرس کے پیش نظر رواں سیزن میں پاکستانی آم 40 فیصد کم برآمد ہو گا۔

پاکستان فروٹ ویجیٹیبل ایکسپوٹرز ایسوسی ایشن کے سرپرست اعلیٰ وحید احمد کا کہنا ہے کہ آم کا رواں برآمدی سیزن مشکل ترین ہوگا۔

سرپرست اعلی پی ایف وی اے کے مطابق پاکستانی آم رواں سیزن 40 فیصد کم برآمد ہوگا۔

وحید احمد کا کہنا ہے کہ آم کا برآمدی ہدف رواں سیزن 80 ہزار ٹن مقرر کیا ہے جس سے 5 کروڑ ڈالر حاصل ہوں گے۔

پی ایف وی اے کے سرپرست اعلیٰ کا کہنا ہے کہ پچھلے سیزن 9 کروڑ ڈالر کا ایک لاکھ 30 ہزارٹن آم برآمد ہوا تھا تاہم رواں برس کورونا وائرس کی وجہ سے آم کی طلب کم رہے گی۔

ان کا کہنا ہے کہ سیاحت، ہوٹلنگ اور شاپنگ سینٹرز بند ہونے سے آم کی طلب کم ہوئی جب کہ ائیرلائنز نے یورپ اور مشرق وسطیٰ کا کرایہ 200 فیصد بڑھا دیا ہے۔

پاکستان فروٹ ویجیٹیبل ایکسپوٹرز ایسوسی ایشن نے مطالبہ کیا کہ کورونا وائرس کے باعث حکومت رواں سیزن آم ایکسپورٹ پر فریٹ سبسڈی فراہم کرے۔

کراچی ( وقت ٹی وی آن لائن ) چیئرمین آل کراچی تاجر اتحاد عتیق میر کا کہنا ہے کہ اس سال عید کے موقع پر 10 ارب روپے سے بھی کم کا کاروبار ہوا۔

آل کراچی تاجر اتحاد کی جانب سے جاری اعلامیے کے مطابق لاک ڈاون میں نرمی کے بعد مارکیٹوں میں آنےوالے خریدار مصنوعی ثابت ہوئے۔

چیئرمین آل کراچی تاجراتحاد نے کہا کہ 11 مئی سے 23 مئی کے دوران 10 روز کاروبار ہوا، عیدکی 80 فیصدخریداری بچوں کے ملبوسات، جوتے، پرس اور کھلونوں کی مدمیں ہوئی۔

عتیق میر نے کہا کہ پچھلے سال عید پر 35 ارب روپے کا کاروبار ہوا تھا تاہم اس بار عید کے موقع پر 10 ارب روپے سے بھی کم کا کاروبار ہوا۔

خیال رہے کہ وزیراعظم عمران خان نے 9 مئی سے ملک بھر میں لاک ڈاؤن میں نرمی کا اعلان کیا تھا جس پر عمل کرتے ہوئے سندھ حکومت نے 11 مئی سے لاک ڈاؤن میں نرمی کرتے ہوئے کاروباری طبقے کو ہفتے میں 4 روز مخصوص اوقات میں کاروبار کھولنے کی اجازت دی تھی تاہم بعدازاں سپریم کورٹ نے پورا ہفتہ کاروبار کھولنے کے احکامات جاری کیے تھے۔

لاہور( وقت تی وی آن لائن ) مسلم لیگ (ن) کے صدر اور قومی اسمبلی میں اپوزیشن لیڈر شہباز شریف کے ذاتی کیمرہ مین کا کورونا ٹیسٹ مثبت آگیا۔

جیو نیوز کے مطابق شہبازشریف کے ذاتی کیمرہ مین محمد بدر نے لیگی صدر کے ساتھ عیدالفطر کی نماز ادا کی تھی۔

محمد بدر نے کورونا ٹیسٹ مثبت آنے پر خود کو گھر میں آئسولیٹ کرلیا ہے جب کہ قائد حزب اختلاف بھی احتیاطی طور پر گھر میں ہی قرنطینہ میں چلے گئے ہیں۔

لاہور ( وقت ٹی وی آن لائن ) ملک میں آج کورونا سے مزید 10 افراد انتقال کرگئے جس کے بعد اموات کی مجموعی تعداد 1231ہو گئی ہے جب کہ نئے کیسز سامنے آنے کے بعد مریضوں کی تعداد 59850 تک پہنچ گئی ہے۔

اب تک سب سے زیادہ اموات خیبرپختونخوا میں سامنے آئی ہیں جہاں کورونا سے 416 افراد انتقال کرچکے ہیں جب کہ سندھ میں 380 اور پنجاب میں 362 افراد جاں بحق ہو چکے ہیں۔

اس کے علاوہ بلوچستان میں 42، اسلام آباد 18، گلگت بلتستان میں 9 اور آزاد کشمیر میں مہلک وائرس سے 4 افراد جاں بحق ہو چکے ہیں۔

آج کے کیسز کی صورتحال
کُل ٹیسٹ: 499399
صحتیاب مریض: 19142 (کمانڈ اینڈ کنٹرول سینٹر کے مطابق)

آج اب تک ملک بھر سے کورونا کے مزید 850 کیسز اور 10 ہلاکتیں رپورٹ ہوئی ہیں جن میں سے 151 کسیز اور ایک ہلاکت اسلام آباد میں جب کہ تین کیسز اور دو ہلاکتیں آزاد کشمیر میں رپورٹ ہوئی ہیں۔ اس کے علاوہ بلوچستان میں بھی ایک ہلاکت رپورٹ ہوئی ہے۔

سندھ
سندھ میں آج کورونا کے مزید 699 کیسز اور 6 ہلاکتیں رپورٹ ہوئی ہیں جس کی تصدیق وزیراعلیٰ سندھ مراد علی شاہ نے کی ہے۔

وزیراعلیٰ سندھ مراد علی شاہ نے کورونا وائرس کے حوالے سے جاری اپنے بیان میں کہا کہ گزشتہ 24 گھنٹوں کے دوران 2177 ٹیسٹ کیے گئے۔

مراد علی شاہ نے کہا کہ گزشتہ 24 گھنٹوں میں 699 نئے کیسز رپورٹ ہوئے جس کے بعد صوبے میں کورونا کے کیسز کی تعداد 24206 ہوگئی ہے۔

وزیراعلیٰ سندھ نے کہا کہ گزشتہ 24 گھنٹوں میں مزید 6 مریض انتقال کرگئے جس کے بعد صوبے میں اموات کی تعداد 380 ہوگئی ہے۔

مراد علی شاہ کا کہنا ہے کہ صوبے میں 235 مریضوں کی حالت تشویشناک ہے جس میں سے 42 مریض اس وقت وینٹی لیٹر پر ہیں۔

ان کا کہنا ہے کہ آج 755 مریض صحت یاب ہوکر گھروں کو چلے گئے جس کے بعد صوبے میں صحت یاب ہونے والوں کی تعداد 9 ہزار 270 ہوگئی ہے۔

پنجاب
پنجاب سے بھی منگل کو کورونا کے مزید 464 کیسز اور 10 ہلاکتیں سامنے آئیں۔

پنجاب ڈیزاسٹر مینجمنٹ اتھارٹی (پی ڈی ایم اے) کے مطابق صوبے میں کورونا کے مریضوں کی مجموعی تعداد 21118 اور اموات 362 ہو گئی ہیں۔ صوبے میں اب تک کورونا سے 6185 افراد صحت یاب بھی ہو چکے ہیں۔

اسلام آباد
وفاقی دارالحکومت سے آج کورونا وائرس کے مزید 151 کیسز اور ایک ہلاکت سامنے آئی جو سرکاری پورٹل پر رپورٹ کیے گئے ہیں۔

سرکاری پورٹل کے مطابق اسلام آباد میں کیسز کی مجموعی تعداد 1879 جب کہ اموات 18 ہو چکی ہیں۔

اسلام آباد میں اب تک کورونا وائرس سے 152 مریض صحت یاب بھی ہو چکے ہیں۔

آزاد کشمیر
آزاد کشمیر میں آج مزید تین افراد میں کورونا کی تصدیق ہوئی ہے جب کہ 2 افراد جاں بھی بحق ہو گئے ہیں جس کی تصدیق سرکاری پورٹل کی گئی ہے۔

حکومتی اعدادو شمار کے مطابق علاقے میں کورونا کے مریضوں کی تعداد 214 ہوگئی ہے جب کہ علاقے میں اب تک وائرس سے 4 افراد جاں بحق ہو چکے ہیں۔

سرکاری پورٹل کے مطابق آزاد کشمیر میں کورونا سے اب تک 99 افراد صحت یاب ہوچکے ہیں۔

بلوچستان
بلوچستان میں بھی کورونا وائرس کے باعث آج مزید ایک ہلاکت سامنے آئی ہے جس کے بعد صوبے میں مہلک وائرس سے جاں بحق افراد کی تعداد 42 ہو گئی ہے جب کہ متاثرہ افراد کی تعداد 3536 ہے۔

صوبائی محکمہ صحت کے مطابق بلوچستان میں اب تک 1156 افراد صحت یاب بھی ہو چکے ہیں۔

خیبرپختونخوا
خیبر پختونخوا میں منگل کو مزید 8 افراد جان کی بازی ہار گئے جس کے بعد صوبے میں ہلاکتوں کی مجموعی تعداد 416 تک جا پہنچی ہے۔

صوبائی محکمہ صحت کے مطابق کے پی میں متاثرہ مریضوں کی تعداد 8259 ہوگئی ہے جب کہ اب تک 2578 افراد کورونا وائرس سے صحت یاب بھی ہو چکے ہیں۔

گلگت بلتستان
گلگت بلتستان میں بھی گزشتہ روز مہلک وائرس سے ایک اور شہری انتقال کرگیا جس کے بعد ہلاکتوں کی تعداد 9 ہوگئی ہے۔

محکمہ صحت گلگت بلتستان کےمطابق علاقے میں متاثرہ مریضوں کی تعداد 638 ہے جب کہ اب تک 457 افراد صحت یاب ہوچکے ہیں۔

لاہور ( وقت ٹی وی آن لائن ) عالمگیر وبا کورونا وائرس کی صورتحال کے پیش نظر انٹرنیشنل فنانس کارپوریشن کی جانب سے ائیر پورٹ پر مسافروں کی آمد کے حوالے سے ایک رپورٹ جاری کی گئی ہے۔

ائیرپورٹس اور کورونا وائرس کی صورتحال سے متعلق انٹرنیشنل فنانس کارپوریشن کی جاری کردہ رپورٹ کے مطابق دنیا کے 4 ہزار سے زائد ائیرپورٹس پر 2019 میں ماہانہ اوسطاً 75 کروڑ مسافروں نے سفر کیا۔

آئی ایف سی کی تازہ ترین رپورٹ کے مطابق اپریل 2020 میں ائیر پورٹس پر مسافروں کی آمد میں 90 فیصد کمی آئی ہے۔

انٹرنیشنل فنانس کارپوریشن کی رپورٹ میں بتایا گیا ہے کہ کورونا سے پہلے ائیر پورٹس کی آمدنی 172 ارب ڈالر رہنے کے اندازے تھے جب کہ اب کورونا کے بعد 74 ارب ڈالر آمدنی کے اندازے ہیں۔

آئی ایف سی کی رپورٹ کے مطابق کریڈٹ ریٹنگ ایجنسیز نے بیشتر ائیرپورٹس کی ریٹنگ آؤٹ لک منفی کی ہے۔

اسلام آباد ( وقت ٹی وی آن لائن ) اسلام آباد کے علاقے ترنول میں فائرنگ کر کے ڈیوٹی پر مامور ہیڈ کانسٹیبل اور اسسٹنٹ سب انسپکٹر (اے ایس آئی) کو شہید کر دیا گیا۔

ترنول کے علاقے میں رات گئے فائرنگ سے شہید ہونے والے ہیڈ کانسٹیبل کی شناخت محمد سجاد اور اے ایس آئی کی شناخت محسن ظفر کے نام سے ہوئی۔

بعدازاں شہید پولیس اہلکار کی نماز جنازہ پولیس ہیڈ کوارٹر میں ادا کر دی گئی جس میں آئی جی اسلام آباد محمد عامر ذوالفقار خان، سینئر پولیس افسران اور جوانوں نے شرکت کی۔

آئی جی اسلام آباد محمد عامر ذوالفقار خان کا کہنا ہے کہ شہید پولیس اہلکاروں کے قاتلوں کو جلد گرفتار کر کے کیفر کردار تک پہنچائیں گے۔

ان کا کہنا تھا کہ اسلام آباد پولیس کا ہر آفیسر و جوان شہریوں کی جان و مال کی حفاظت کے لیے اپنا خون بہانے کو ہر دم تیار ہے، ایسی بزدلانہ کاروائیوں سے پولیس کے افسران و جوانوں کے حوصلے پست نہیں ہوں گے۔

ریاض ( وقت ٹی وی آن لائن ) سعودی حکومت نے ملک میں کورونا وائرس کے باعث نافذ لاک ڈاؤن میں نرمی کا اعلان کردیا۔

عرب خبر رساں ادارے کے مطابق سعودی حکومت کورونا وائرس کے باعث نافذ لاک ڈاؤن میں رواں ہفتے سے نرمی کرنا شروع کرے گی جہاں سوائے مکہ شہر کے ملک بھر میں پابندیوں کو نرم کیا جائے گا۔

عرب میڈیا کا بتانا ہےکہ جمعرات سے شروع ہونے والے پہلے مرحلے میں ملک بھر میں 24 گھنٹوں کے لیے نافذ کرفیو کے دورانیے کو کم کیا جائے گا اور اتوار 31 مئی تک کرفیو سہ پہر 3 بجے سے صبح 6 بجے تک ہوگا جس کے بعد کرفیو کے اوقات رات 8 سے صبح 6 تک ہوں گے۔

عرب میڈیا کے مطابق 31 مئی سے ملک بھر میں کرفیو کو نرم کیا جائے گا اور اندرون ملک سفر کی اجازت دی جائے گی جب کہ مساجد میں نمازوں کی ادائیگی اور بعض نجی و سرکاری اداروں میں بھی کام کا آغاز کیا جائے گا تاہم اس دوران مکہ شہر میں 24 گھنٹے کے لیے کرفیو نافذ رہے گا۔

عرب میڈیا کے مطابق 21 جون سے ملک بھر میں ہر قسم کی پابندیوں اٹھائے جانے کا امکان ہے جس کے بعد مسجد الحرام میں بھی نمازیوں کو داخلے کی اجازت دی جائے گی۔

عرب میڈیا کاکہنا ہےکہ حج اور عمرہ زائرین کی ملک میں آمد پر پابندی اور بین الاقوامی پروازیں فی الحال معطل رہیں گی جب کہ پابندیوں میں نرمی کے بعد سماجی فاصلوں کو برقرار رکھنے کی ضرورت پر زور دیا گیا ہے جس کے تحت 50 سے زائد افراد کے جمع ہونے پر پابندی ہوگی۔

ملک بھر میں بعض معاشی سرگرمیاں بھی بحال کی جائیں گی جن میں ہول سیلز، ریٹیل ، شاپنگ سینٹرز اور کیفیز کو کھولا جائے گا جب کہ بیوٹی سیلون، حجام کی دکانیں، اسپورٹس اور ہیلتھ کلب بدستور بند رہیں گے۔

ناروال ( وقت ٹی وی آن لائن ) ملک کے مختلف علاقوں میں ٹڈی دل نے حملہ کرکے آم، ٹماٹر، کپاس، گنا، سورج مکھی اور سبزیوں کی فصلیں تباہ کردیں۔

پنجاب کے اضلاع بہاول نگر اور راجن پور میں ٹڈی دل کی یلغار جاری ہے جس کے باعث کپاس، مونگ، ٹماٹر، سورج مکھی، سبزیوں اور آم کے باغات کو نقصان پہنچا ہے۔

اُدھر سندھ کے ضلع مٹیاری میں ہالہ، نیوسعیدآباد اور بھٹ شاہ میں ٹڈی دل کے کپاس، پیاز،کیلے، گنے، گھاس اور سبزیوں کی فصلوں پر حملے سے شدید نقصان پہنچا ہے۔

کاشت کاروں کی جانب سے اپنی مدد آپ کے تحت ٹڈی دل کو بھگانے کی کوشش کی جارہی ہے جب کہ آبادگار بورڈ نے حکومت سے مطالبہ کیا ہے کہ سندھ حکومت ٹڈی دل کی روک تھام کے لیے فوری اقدامات کرے اور متاثرہ علاقوں میں اسپرے کرائے۔

بلوچستان میں بھی ضلع نوشکی ٹڈی دل کی یلغار سے شدید متاثر ہوا ہے، زمیندار ایکشن کمیٹی کے مطابق ٹڈی دل کی یلغار سے کپاس، پیاز اور ٹماٹرکی فصلیں متاثر ہوئی ہیں۔

لاہور ( وقت ٹی وی آن لائن ) پاکستان مسلم لیگ (ن) کے صدر اور قومی اسمبلی میں قائد حزب اختلاف شہباز شریف نے ملک میں کورونا سے متاثرہ افراد اوراموات میں اضافے پر افسوس کا اظہار کیا ہے۔

ملک میں کورونا سے اموات اور کیسز میں اضافے پر اپنے بیان میں شہباز شریف کا کہنا تھا کہ لاک ڈاؤن کے نفاذ اور کھولنے سے پہلے حکمت عملی ہوتی تو متاثرین کی تعداد میں بے تحاشا اضافہ نہ ہوتا۔

انہوں نے کہا کہ ٹیسٹنگ کے ڈیٹا کے بارے میں قوم کو بتایاجائے اور پھیلاؤ کو روکنے کی حکمت عملی کیا ہے؟ تفصیل بتائی جائے، اسپتالوں میں مریضوں کی بڑھتی ہوئی تعداد کے پیش نظر حکومت حکمت عملی کیا ہے؟ قوم کو آگاہ کیا جائے۔

قائد حزب اختلاف کا کہنا تھا کہ وقت تیزی سے گزر رہا ہے، حالات کے مطابق متعلقہ پہلوؤں پر توجہ دی جائے تاکہ نقصانات کو کم سے کم کیاجاسکے، پچھتانے، ہاتھ ملانے اور تقدیر کا لکھا کہنا کوئی پالیسی نہیں بلکہ بہتر ین تدابیر سے نقصانات کم کیے جاسکتے ہیں۔

ان کا کہنا ہے کہ پھر کہتا ہوں کہ مزید وقت ضائع نہ کریں، ہمہ جہت جامع قومی حکمت عملی بنائیں۔

انہوں نے مطالبہ کیا کہ مشترکہ مفادات کونسل کا فوری اجلاس بلاکر حالات کا جائزہ لیا جائے اور موجودہ صورتحال کو دیکھتے ہوئے ازسرنو حکمت عملی کا تعین کیا جائے۔

قائد حزب اختلاف نے عوام سے اپیل کی کہ احتیاطی تدابیر پر عمل کریں، ورنہ خدانخواستہ حالات ہاتھ سے نکلے جا رہے ہیں۔

خیال رہے کہ ملک میں کورونا کیسز میں تیزی سے اضافہ ہورہا ہے اور 1210 افراد جاں بحق ہوچکے ہیں جبکہ متاثرہ مریضوں کی تعداد 58 ہزار سے تجاوز کرچکی ہے۔

کورونا کیسز میں اضافے پر وزیراعظم عمران خان کے معاون خصوصی برائے صحت ڈاکٹر ظفر مرزا اور سندھ کے وزیر اطلاعات سید ناصر حسین بھی دوبارہ لاک ڈاؤن لگانے کا عندیہ دے چکے ہیں۔

سورج آج خانہ کعبہ کےعین اوپر ہو گا جس کی مدد سے خانہ کعبہ کی سمت کا تعین کیا جا سکے گا۔

پاکستانی وقت کے مطابق سورج 2 بج کر 18 منٹ پر خانہ کعبہ کے عین اوپر ہو گا جس کی مدد سے پوری دنیا کے مسلمانوں کے لیے مرکز کی حیثیت رکھنے والے خانہ کعبہ کی سمت کا تعین کیا جا سکے گا۔

یاد رہے کہ ہرسال دو مرتبہ سورج عین خانہ کعبہ کے اوپرآتا ہے، سورج خانہ کعبہ پر سال میں پہلی بار 27 مئی اور دوسری بار 15 جولائی کو آتا ہے۔