All posts by EMRA

کوئٹہ (وقت ٹی وی آن لائن ) بچی کے اغواء میں معاونت کے کیس میں مقامی عدالت نے سینیٹر سرفراز بگٹی کے ناقابل ضمانت وارنٹ گرفتاری جاری کردیے۔

سینیٹر سرفراز بگٹی کے ناقابل ضمانت وارنٹ گرفتاری کوئٹہ کے ایڈیشنل ڈسٹرکٹ اینڈ سیشن جج کی عدالت نے جاری کیے۔

عدالت نے پولیس کو سرفراز بگٹی کوگرفتار کرکےعدالت میں پیش کرنے کا حکم دیا ہے۔

واضح رہے کہ گزشتہ روز سپریم کورٹ کے دو رکنی بینچ نے سینیٹر سرفراز بگٹی کی عبوری ضمانت کی درخواست مسترد کردی تھی۔

اس سے قبل بلوچستان ہائیکورٹ سے بھی سرفراز بگٹی کی ضمانت قبل ازگرفتاری کی درخواست مسترد ہوگئی تھی۔

سینیٹر سرفراز بگٹی پر کوئٹہ سے ایک 9 سالہ بچی کے اغواء میں معاونت کا الزام ہے۔بچی ماریہ کی نانی کی جانب سے کوئٹہ میں سرفراز بگٹی کے خلاف بچی کے اغواء میں معاونت کے حوالے سے ایف آئی آر درج کرائی گئی تھی۔

لاہور (وقت ٹی وی آن لائن ) چین کی معروف برانڈ شین نے حال ہی میں جائے نماز کو بطور سجاوٹی قالین فروخت کرنے کا اعلان کیا تھا جس کے بعد مسلمانوں کی جانب سے غم و غصے کا اظہار کیا گیا۔

آن لائن چینی اسٹور شین نے اپنی ویب سائٹ پر مسلمانوں کی نماز پڑھنے کی جائے نماز کو بطور سجاوٹی قالین فروخت کے لیے پیش کیا تھا جس کے بعد سوشل میڈیا پر برانڈ کو شدید تنقید کا سامنا کرنا پڑا۔

سوشل میڈیا پر صارفین کی جانب سے نا صرف برانڈ پر تنقید کی جانے لگی بلکہ شین کو بائیکاٹ کرنے کا بھی مطالبہ کیا جا رہا تھا۔

View this post on Instagram

To our community? We’re sorry.

A post shared by SHEIN.COM (@sheinofficial) on Jul 5, 2020 at 10:10am PDT

بعد ازاں آن لائن اسٹور شین نے اپنے انسٹاگرام اکاؤنٹ کے ذریعے مسلمانوں سے معذرت کرتے ہوئے ایک پیغام شیئر کیا۔

شین نے جائے نماز کو بطور سجاوٹی قالینوں کے طور پر فروخت کرنے کو اپنی ’سنگین غلطی‘ قرار دیتے ہوئے معافی مانگی اور اپنی ایسی تمام مصنوعات کو ناصرف ویب سائٹ سے ہٹا دیا بلکہ دکانداروں کو بھی فروخت کرنے سے منع کردیا۔

بین الاقوامی چینی برانڈ ’شین‘ نے اپنے پیغام میں مزید لکھا کہ ہمیں اپنی اس غلطی پر دل سے افسوس ہے۔

ان کا مزید کہنا تھا کہ ایسی مصنوعات کی فروخت کے حوالے سے ایک کمیٹی بھی تشکیل دی جائے گی جو ایسی چیزوں کا جائزہ لے گی۔

اوکاڑہ (وقت ٹی وی آن لائن ) چونیاں میں لڑکی سے مبینہ طورپر ملنے پر نوجوان کے بال، بھنویں اور مونچھیں مونڈ ڈال دی گئیں۔

رپورٹ کے مطابق لڑکی کے والد نے نوجوان پر لڑکی سے زیادتی کا الزام لگایا ہے جس کا مقدمہ بھی درج کرلیا گیا ہے۔

لڑکی کے والد کا کہنا ہےکہ نوجوان نے گھر میں گھس کر بیٹی سے زیادتی کی کوشش کی۔

پولیس نے لڑکے سمیت تشدد کرنے والے 2 افراد کو گرفتار کرلیا ہے۔

کوئٹہ (وقت ٹی وی آن لائن ) کوئٹہ میں مصنوعی انڈوں کی سر عام فروخت کا انکشاف ہونے کے بعد بلوچستان فوڈ اتھارٹی نے انڈے فروخت کرنے والی 7 دکانوں کو سیل کردیا۔

کوئٹہ میں مرغی کے انڈوں کے نام پر مصنوعی انڈوں کی شکایت عام ہے، اس پر بلوچستان فوڈ اتھارٹی ایکشن میں آئی اور شہر کے علاقے مسجد روڈ،کواری روڈ، طوغی روڈ اور علمدار روڈ پر انڈے فروخت کرنے والی دکانوں پر کارروائی کی۔

فوڈ اتھارٹی کے حکام نے مصنوعی انڈے فروخت کرنے کے شبے میں 7 دکانوں کو سیل کرکے 2 افراد کو حراست میں لے لیا۔

بعدازاں حکام نے انڈروں کے نمونے کیمیائی ٹیسٹ کے لیے متعلقہ لیبارٹری کو بھجوادیے۔

شہر میں انڈوں کے کاروبار سے منسلک افراد کا کہنا ہے کہ ابھی تک انہوں نے اپنے کاروبار میں مصنوعی انڈے نہیں دیکھے جب کہ شہریوں کا کہنا ہے کہ مصنوعی انڈے فروخت کرنے والوں کے خلاف کارروائی کی جانی چاہیے۔

لاہور (وقت ٹی وی آن لائن ) چیف جسٹس لاہور ہائیکورٹ نے کمشنرز اور ڈپٹی کمشنرز کو عدالتی اختیارات دینے کا نوٹیفکیشن معطل کردیا۔

چیف جسٹس لاہور ہائیکورٹ جسٹس محمد قاسم خان پرمشتمل سنگل بینچ نے پنجاب حکومت کی جانب سے کمشنرز اور ڈپٹی کمشنرز کو عدالتی اختیارات دینے سے متعلق کیس کی سماعت کی۔

اس دوران درخواست گزار نے مؤقف اختیار کیا کہ عدلیہ اور ایگزیکٹو کے علیحدہ علیحدہ اختیارات ہیں، پنجاب حکومت کا اختیارات دینے کا نوٹیفکیشن آئین کے آرٹیکل دو اے اور آرٹیکل نو کی خلاف ورزی ہے۔

چیف جسٹس لاہور ہائیکورٹ نے برہمی کا اظہار کرتےہوئے ریمارکس دیے کہ پنجاب حکومت کو عدالتی اختیارات کا بڑا شوق ہے، عدالتوں میں تماشا لگا رکھا ہے، تمام سسٹم کابیڑا غرق کر دیا ہے۔

چیف جسٹس نے ریمارکس میں کہا کہ جن اتھارٹیز نے نوٹیفکیشن جاری اور منظور کیا ان کے خلاف توہین عدالت کا نوٹس جاری کریں گے اور نوٹیفکیشن کالعدم ہوا تو وزیر اعلیٰ کو توہین عدالت کا نوٹس جاری کریں گے۔

بعدازاں عدالت نے نوٹیفکیشن معطل کرتے ہوئے سماعت ملتوی کردی۔

لاہور(وقت ٹی وی آن لائن ) پنجاب حکومت نے کورونا وائرس کا پھیلا ؤ روکنے کیلئے صوبے کے 7 شہروں کے مختلف علاقوں میں 15 دن کے لیے اسمارٹ لاک ڈاؤن نافذ کردیا۔

محکمہ پرائمری اینڈ سیکنڈری ہیلتھ نے نوٹیفکیشن جاری کردیا جس کے مطابق اسمارٹ لاک ڈاؤن آج رات 12 بجے سے شروع ہوکر 24 جولائی تک جاری رہے گا۔

نوٹیفکیشن کے مطابق لاہور، ملتان، فیصل آباد، گوجرانوالہ، سیالکوٹ، گجرات اور راولپنڈی کے مختلف علاقوں میں لاک ڈاؤن کیا گیا ہے۔

لاہور میں اے 2 بلاک ٹاؤن شپ، ای ایم ای سوسائٹی، چونگی امر سدھو بازار اور ملحقہ علاقے بند رہیں گے۔

اس کے علاوہ پنجاب گورنمنٹ سرونٹس ہاؤسنگ اسکیم، واپڈا ٹاؤن، جوہر ٹاؤن C بلاک اور گرین سٹی میں اسمارٹ لاک ڈاؤن رہے گا۔

نوٹیفکیشن میں کہا گیا ہے کہ لاک ڈاؤن والے علاقوں میں ضرورت کی بنیادی اشیاء بدستور میسر رہیں گی اور لاک ڈاؤن کا مقصد زیادہ کیسز والے علاقوں سے لوگوں کی آمدورفت محدود کرنا ہے۔

واضح رہے کہ پنجاب میں کورونا کے کیسز کی کل تعداد 84 ہزار سے زائد ہے اور 1900 سے زائد افراد جاں بحق بھی ہوچکے ہیں۔

لاہور(وقت ٹی وی آن لائن ) پنجاب حکومت نے نیا شہر بسانے کے لیے علیحدہ اتھارٹی قائم کرنے کا فیصلہ کیا ہے۔

ذرائع کے مطابق وزیراعلیٰ پنجاب عثمان بزدار نے ریور راوی فرنٹ اتھارٹی کے قیام کی منظوری دے دی جس کےبعد حکومت اتھارٹی کے قیام کے لیے آرڈیننس جاری کرے گی۔

ذرائع کا کہنا ہے کہ وزیراعلیٰ پنجاب اتھارٹی کے چیئرمین ہوں گے جب کہ اتھارٹی نیا شہر بسانے کے لیے کام کرے گی۔

ذرائع کے مطابق نیا شہر دبئی کی طرز پر بسایا جائے گا جو ایک لاکھ ایکڑ سے زائد کے رقبے پر بنایا جائے گا، اس میں نجی شعبے کی جانب سے 5 ہزار ارب روپے کی سرمایہ کاری متوقع ہے۔

ذرائع نے بتایا کہ نئے شہر میں ہائی رائز بلڈنگز کے قیام کو ترجیح دی جائے گی اور ایک بڑی جھیل سمیت 3 بیراج بھی بنیں گے جب کہ نیا شہر بسنے سے ماحولیات، پانی اور ٹریفک کے مسائل پر قابو پایا جاسکے گا۔

اسلام آباد (وقت ٹی وی آن لائن ) اسلام آباد ہائیکورٹ میں پیپلز پارٹی کے رہنما اعتزاز احسن کے خلاف پولٹری فیڈ کیس کی سماعت کے دوران چیف جسٹس اطہر من اللہ اور اعتزاز احسن میں دلچسپ مکالمہ ہوا۔

سماعت میں اعتزاز احسن ویڈیو لنک کے ذریعے پیش ہوئے جس پر چیف جسٹس اطہر من اللہ نے کہا کہ اعتزازصاحب ہم آپ کو ویڈیو لنک پر خوش آمدید کہتے ہیں۔

اعتزاز احسن نے بتایا کہ میں یہاں بھی ماسک ساتھ رکھ کر اور سینیٹائزر استعمال کرکے بیٹھا ہوں جس پر چیف جسٹس کا کہنا تھا کہ اکیلے ہیں تو وہاں آپ کو ماسک کی ضرورت نہیں۔

بعدازاں چیف جسٹس اطہرمن اللہ نے ریمارکس دیے کہ یہ ملک کی واحد ہائیکورٹ ہےجہاں بیرون ملک سےبھی دلائل دینےکی سہولت ہے، اس پر اعتزاز احسن نے جواب دیا کہ مطلب ہم جہاں بھی ہوں کورٹ پیچھا نہیں چھوڑے گی۔

دلائل پیش کرنے سے قبل اعتزاز احسن نے معزز جج سے کہا کہ معافی چاہتاہوں میں روسٹرم پرنہیں جہاں آپ کے سامنے کھڑا ہوسکتا۔

چیف جسٹس نے جواب دیا کہ آپ کوکھڑا ہونے کی ضرورت نہیں،آپ دلائل شروع کریں، ویسے بھی آپ کا پتہ بھی نہیں چل رہا کہ آپ کھڑے ہیں یا بیٹھے ہیں۔

اعتزاز احسن کے دلائل کے دوران اٹارنی جنرل بھی روسٹرم پر موجود تھے۔

لاہور (وقت ٹی وی آن لائن ) کورونا وائرس کی وجہ سے جہاں دنیا بھر کے تمام تر نظام متاثر ہوئے ہیں تو وہیں وائرس کی وجہ سے کھیلوں کی سرگرمیاں بھی بے حد متاثر ہوئی ہیں۔

وائرس کی وجہ سے کھیلوں کے تمام تر ایونٹس منسوخ کر دیے گئے تھے لیکن اب اس صورتحال میں احتیاطی تدابیر اور ایس او پیز پر عمل کرتے ہوئے ایک بار پھر اسٹیڈیم میں شائقین کے بغیر میچز کے انعقاد کا آغاز ہوگیا ہے۔

حال ہی میں جاپان کے بیس بال گیم کے دوران اسٹیڈیم میں ٹیم کی حوصلہ افزائی کے لیے شائقین کی جگہ ڈانس کرتے روبوٹ نے لے لی ہے۔ راکٹن ایگلز کے خلاف نپون پروفیشنل بیس بال (این پی بی) کے حالیہ کھیل سے قبل 20 سے زائد روبوٹس نے خالی اسٹیڈیم میں ٹیم کے فائٹ گانے پر رقص کیا۔

اسٹیڈیم میں 2 طرح کے روبوٹس کو رقص کرتے ہوئے دیکھا گیا ہے جس میں سے ایک ہیمنوائڈ روبوٹ یعنی انسان کی طرح دکھنے والے اور ایک کتے کی طرح 4 پاؤں والے ربورٹ شامل تھے۔

سوشل میڈیا پر ان رقص کرتے روبوٹ کی ویڈیو خوب وائرل ہوئی جب کہ چند صارفین کی جانب سے تنقید بھی کی جانے لگی کہ اس سے لوگوں کے روز گار چِھن گئے ہیں۔

اسلام آباد(وقت ٹی وی آن لائن ) امریکی شہری سنتھیا رچی نے اپنے کیس میں عدالت پر اعتماد کا اظہار کیا ہے۔

اسلام آباد میں میڈیا سے گفتگو کرتے ہوئے سنتھیا رچی نے کہا کہ پیپلز پارٹی کی جانب سے ایک کلاؤن شو کیا جارہا ہے جو جلد ہی انٹرنیشنل کمیونٹی بھی دیکھے گی۔

انہوں نے کہا کہ پاکستان کی عدالتوں پر پورا بھروسہ ہے جب کہ وزارت داخلہ اور باقی تمام اتھارٹیز بہترین کام کریں گی۔

سنتھیا رچی نے میڈیا نمائندگان کے سوالوں کا جواب دیتے ہوئے بتایا کہ میٹھی لسی، فریش آم اور خاص طور پر چونسا آم میرے پسندیدہ ہے۔

ان کا مزید کہنا تھا کہ دال چاول ہمیشہ سے پسند ہے جس پر ایک صحافی نے سوال کیا کہ گجرانوالہ کے یا یہاں کہ دال چاول؟، سنتھیا نے کہا کہ دال چاول گجرانوالہ کے پسند ہیں۔

معاملے کا پسِ منظر
سنتھیا رچی نے سابق وزیر داخلہ رحمان ملک پر جنسی زیادتی جب کہ سابق وزیراعظم یوسف رضا گیلانی اور مخدوم شہاب الدین پر دست درازی کا الزام لگایا ہے۔

پیپلز پارٹی کی اعلیٰ قیادت کی جانب سے سنتھیا رچی کے الزامات کی سختی سے تردید کی گئی ہے اور پیپلز پارٹی نے امریکی خاتون کے خلاف عدالت سے بھی رجوع کر لیا ہے۔

رحمان ملک کی جانب سے سنتھیا رچی کو 50 ارب روپے ہرجانے کا نوٹس بھیجا گیا ہے جب کہ سنتھیا رچی نے یوسف رضا گیلانی کو 12 کروڑ روپے ہرجانے کا نوٹس بھجوایا ہے۔