All posts by EMRA

کراچی (وقت ٹی وی آن لائن ) نیپرا نے شہر قائد میں بدترین لوڈشیڈنگ کے معاملے پر سماعت مکمل کرلی جس کا فیصلہ بعد میں سنایا جائے گا۔

کراچی میں بجلی کی لوڈشیڈنگ کے معاملے پر چیئرمین نیشنل الیکٹرک پاور ریگولیٹری اتھارٹی (نیپرا) توصیف فاروقی کی سربراہی میں سماعت ہوئی جس میں وائس چیئرمین، چاروں صوبوں کے ممبرز نیپرا اور کے الیکٹرک کے سی ای او سمیت پی ٹی آئی رہنما فردوس شمیم نقوی، ممبر قومی اسمبلی آفتاب صدیقی اور وکلا بھی شریک ہوئے۔

عام حالات میں کراچی میں لوڈشیڈنگ 3سے ساڑھے 7گھنٹے تک ہوتی ہے:سی ای او کے الیکٹرک

سماعت کے آغاز پر نیپرا حکام نے کہا کہ کےالیکٹرک نیپرا کو بجلی میں کمی اور لوڈشیڈنگ کی وجہ تیل کی کمی بتاتی رہی، اس پر کے الیکٹرک کے چیف ایگزیکٹو آفیسر (سی ای او) مونس علوی نے کہا کہ عام حالات میں کراچی میں لوڈشیڈنگ 3سے ساڑھے 7گھنٹے تک ہوتی ہے لیکن 22 جون کے بعد شہر میں لوڈ شیڈنگ بڑھی، پی ایس او وفاقی حکومت کو لکھ چکا تھاکہ کے الیکٹرک کی تیل کی ضرورت پوری نہیں ہوسکے گی۔

مونس علوی نے بتایا کہ کے الیکٹرک کے پلانٹس کو فرنس آئل کی قلت ہوئی، تیل فراہمی کا مسئلہ کے الیکٹرک کو ہی نہیں سرکاری تھرمل پاورپلانٹس کو بھی رہا، پی ایس او نے وفاقی حکومت سے تیل درآمد کی اجازت مانگی تھی، پی ایس او کو کے الیکٹرک کے پاورپلانٹس کے لیے تیل درآمد کی اجازت تاخیر سے ملی۔

سی ای او کے الیکٹرک کا کہنا تھا کہ طلب بڑھنے سے ان علاقوں میں بھی لوڈ شیڈنگ کرنی پڑی جہاں نہیں کرتے، نیشنل گرڈ سے اضافی بجلی کیلئے ہماری درخواست پرغور نہیں کیا جاتا، نیشنل گرڈ سے 720 سے 730 میگاواٹ تک بجلی لے رہے ہیں۔

کے الیکٹرک کو صورتحال کی پہلے سے منصوبہ بندی کرنی چاہیے تھی: چیئرمین نیپرا

اس موقع پر چیئرمین نیپرا نے سوال کیا کہ کیا 22 جون کے بعد سے لوڈ شیڈنگ پر کے الیکٹرک کی کوئی ذمہ داری ہے، اس پر مونس علوی کا کہنا تھا کہ اس معاملے میں کے الیکٹرک کی کوئی غلطی نہیں جس پر چیئرمین نیپرا نے جواباً کہا کہ صورتحال کی پہلے سے منصوبہ بندی کرنی چاہیے تھی، سی ای او کے الیکٹرک نے بتایا کہ 10 کروڑ ڈالر تو ہم نے ترسیلی نظام پر خرچ کیے۔

لوڈ شیڈنگ کی ذمہ دار کے الیکٹرک ہے: فردوس شمیم
دوران سماعت پی ٹی آئی رہنما فردوس شمیم نقوی نے کہا کہ لوڈ شیڈنگ کی ذمہ دار کے الیکٹرک ہے، ان کو معلوم ہوتا ہے کس موسم میں کتنی بجلی درکار ہے، کے الیکٹرک کے پاس ایک ماہ کے تیل کا اسٹاک کیوں نہ تھا، صارفین کا تحفظ نیپرا کی ذمہ داری ہے اور نیپرا اپنی ذمہ داری میں فیل ہو چکا ہے، کراچی کو لوڈ شیڈنگ سے پاک کرنے کے لیے نیپرا اپنا کردار ادا کرے گا، کے الیکٹرک 3100 میگاواٹ بجلی اٹھا ہی نہیں سکتا۔

کیا نیپرا کے الیکٹرک کی اجارہ داری کا خاتمہ کرے گی؟ کراچی کے وکلا کا سوال
اس موقع پر سماعت میں موجود کراچی کے وکلا نے سوال کیا کہ کیا نیپرا کے الیکٹرک کی اجارہ داری کا خاتمہ کرے گی، اس پر چیئرمین نیپرا نے کہا کہ نیپرا پاور سیکٹر میں مسابقت کی فضا کا فروغ چاہتا ہے۔

چیئرمین نیپرا کا کہنا تھا کہ سماعت کا مقصد صرف حقائق جمع کرنا ہے، فیصلہ بعد میں جاری کریں گے، ہمارے ممبر جلد کراچی جائیں گے۔

بعد ازاں نیپرا نے سماعت مکمل کرلی جس کا فیصلہ بعد میں سنایا جائے گا۔

واضح رہےکہ کراچی میں 8 سے 10 گھنٹے کی بدترین اعلانیہ و غیر اعلانیہ لوڈشیڈنگ نے شہریوں کا جینا دوبھر کر رکھا ہے جب کہ بجلی کی بندش سے پانی کا بحران بھی جنم لے چکا ہے اور کے الیکٹرک نے فیول و گیس کی کمی کا بہانہ بناکر لوڈشیڈنگ کا سلسلہ جاری رکھا ہوا ہے۔

کراچی میں لوڈشیڈنگ کے معاملے پر قومی اسمبلی میں بھی ہنگامہ آرائی ہوئی اور وزیراعظم عمران خان نے بھی شہر میں لوڈشیڈنگ کا نوٹس لیتے ہوئے کے الیکٹرک کو اضافی گیس فراہم کرنے کی ہدایت کی ہے۔

اسلام آباد (وقت ٹی وی آن لائن ) حکومت نے سرکاری ملازمین کو ایڈوانس تنخواہ جاری کرنےکی منظوری دے دی۔

وزارت خزانہ کے مطابق سرکاری ملازمین کو تنخواہیں اورپنشن 27 جولائی کو ادا کرنے کا حکم دیا گیا ہے اور اس سلسلے میں ایڈوانس تنخواہ اور پنشن کی ادائیگی کی منظوری دے دی گئی ہے۔

وزارت خزانہ کا کہنا ہےکہ اگرعید الاضحیٰ 31جولائی کو ہوئی تو تنخواہ اورپنشن ایڈوانس جاری کی جائے گی۔

لاہور (وقت ٹی وی آن لائن ) لاہور: مسلم لیگ (ق) کے صدر چوہدری شجاعت حسین نے مولانا فضل الرحمان کے دھرنے کے حوالے سے اہم انکشافات کیے ہیں۔

اپنے ایک بیان میں چوہدری شجاعت حسین نےکہا کہ کچھ لوگ اسلام آباد میں مولانا فضل الرحمان کے دھرنے پر دھاوا بولنے کے حامی تھے، عمران خان سے جا کر کوئی بات کرنے کو تیار نہیں تھا سب ایک دوسرے کو کہہ رہے تھے کہ آپ بات کریں، چوہدری پرویزالٰہی حکومتی مذاکراتی کمیٹی کے ممبر نہیں تھے جس پر پرویز الٰہی سے کہا گیا کہ وہ عمران خان سے بات کریں۔

انہوں نے کہا کہ پرویزالٰہی نے عمران خان سے ملاقات کی اورانہیں مشورہ دیا کہ اگر مار کٹائی شروع ہوگئی اور کوئی آدمی مر گیا تو الزام لینے پر کوئی تیار نہیں ہوگا، پرویزالٰہی نے عمران خان کو بتایا کہ وزیراعظم کوہر چیز کا جواب دینا پڑے گا۔

چوہدری شجاعت کا کہنا تھا کہ پرویز الٰہی کے بتانے پر فیصلہ مؤخر کردیا گیا اور معاملہ افہام و تفہیم سے حل ہوا، مولانا فضل الرحمان کے معاملے پر ہماری پارٹی پر الزام لگایا گیا، پرویزالٰہی کی باہمی سوچ پر عمل کرتے ہوئے معاملہ افہام و تفہیم سے حل ہوا۔

ایک طرف پولیس اور دوسری طرف مدارس کے طلبا مولانا فضل الرحمان کے آرڈر کا انتظار کر رہے تھے: چوہدری شجاعت
انہوں نے کہا کہ تاریخ میں پہلی بار ایسا ہوا کہ مولوی صاحبان اور پولیس چند قدموں پرکھڑے تھے لیکن لڑائی نہیں ہوئی، ایک گلاس تک نہیں ٹوٹا، عام آدمی سوچ بھی نہیں سکتا کہ اس وقت حالات کیا ہوں گے، ایک طرف پولیس اور دوسری طرف مدارس کے طلبا مولانا فضل الرحمان کے آرڈر کا انتظار کر رہے تھے لیکن مولانا نے ان حالات میں بڑی دور اندیشی کا ثبوت دیا۔

’نوازشریف نے ملیحہ لودھی کو گرفتار کرنے کا کہا‘
چوہدری شجاعت نے انکشاف کیا کہ سابق وزیراعظم نوازشریف نے بھی ملیحہ لودھی کو بغاوت کے کیس گرفتار کرنے کا کہا جس پر میں نے اختلاف کیا اور کہا کہ اس اقدام سے صحافی برادری اور انٹرنیشنل کمیونٹی میں اچھا تاثر نہیں جائے گا اور گرفتاری کی صورت میں نتائج اچھے نہیں ہوں گے۔

چوہدری شجاعت نے وزیراعظم عمران خان کو مسائل باہمی مشاورت سے حل کرنے کا مشورہ دیا۔

وزیراعظم کو مسائل باہمی مشاورت سے حل کرنے کا مشورہ
انہوں نےکہا کہ ا بھی اگر معاملات باہمی مشاورت سے حل کیے جائیں تو انہیں امید ہے کہ معاملات حل ہو جائیں گے کیونکہ اپنے ملک کے بحران کو سب چیزیں بھول کر حل کرنے کی کوشش کرنی چاہیے۔

(ق) لیگ کے صدر کا کہنا تھا کہ عمران خان میر شکیل الرحمان اور 24 نیوز سمیت دیگر اخبارات کے مسائل مشاورت سے حل کرنے کی کوشش کریں، امید ہے کہ میڈیا سے معاملات حل ہو جائیں گے، اس ضمن میں وزیراطلاعات شبلی فراز بھی اپنا کردار ادا کر سکتے ہیں۔

ملک میں آج اب تک کورونا سے مزید 25 افراد جاں بحق ہوگئے جس کے بعد اموات کی مجموعی تعداد 5058 ہوگئی جب کہ نئے کیسز سامنے آنے کے بعد مریضوں کی تعداد 243599 تک پہنچ گئی۔

اب تک پنجاب میں 1972، سندھ میں 1677 اور خیبر پختونخوا میں 1063 افراد جاں بحق ہو چکے ہیں جب کہ اسلام آباد میں 146، بلوچستان میں 125 ، آزاد کشمیر میں 41 اور گلگت بلتستان میں 34 افراد کا انتقال ہوا ہے۔

آج کے کیسز کی صورت حال

آج بروز جمعہ ملک بھر سے اب تک کورونا کے مزید 812 کیسز اور 25 ہلاکتیں سامنے آئی ہیں جن میں پنجاب سے 674 کیسز 17 ہلاکتیں، اسلام آباد98 کیسز 4 ہلاکتیں،  گلگت14 کیسز 3  ہلاکتیں اور آزاد کشمیر سے 26 کیسز اور ایک ہلاکت رپورٹ ہوئی ہے۔

پنجاب

آج پنجاب میں کورونا کے 674 کیسز اور 17   ہلاکتیں رپورٹ ہوئی ہیں جن کی تصدیق پی ڈی ایم اے کی جانب سے کی گئی ہے۔

صوبائی ڈیزاسٹر مینجمنٹ اتھارٹی کےمطابق پنجاب میں کورونا کے مریضوں کی کل تعداد 85261 اور ہلاکتیں 1972 ہوچکی ہیں۔

پی ڈی ایم اے کے مطابق پنجاب میں اب تک کورونا سے 52641 مریض صحتیاب ہوچکے ہیں۔

اسلام آباد

وفاقی دارالحکومت سے آج کورونا کے مزید 98 کیسز اور 4 ہلاکتیں سامنے آئی ہیں جس کی تصدیق سرکاری پورٹل پر کی گئی۔

پورٹل کے مطابق اسلام آباد میں کیسز کی مجموعی تعداد 13829 اور اموات 146 ہوچکی ہیں۔

اسلام آباد میں اب تک کورونا سے 10240 افراد صحتیاب ہوچکے ہیں۔

آزاد کشمیر

آزاد کشمیر سے آج کورونا کے مزید 26 کیسز اور ایک ہلاکت سامنے آئی ہے جو سرکاری پورٹل پر رپورٹ کی گئی ہیں۔

پورٹل کے مطابق آزاد کشمیر میں کورونا کے کل کیسز کی تعداد 1485 اور اموات کی تعداد 41 ہے۔

سرکاری پورٹل کے مطابق آزاد کشمیر میں کورونا سے متاثرہ 860 افراد صحت یاب ہو چکے ہیں۔

گلگت بلتستان

گلگت بلتستان سے آج کورونا کے مزید 14 کیسز اور 3 ہلاکتیں سامنے آئی ہیں جو سرکاری پورٹل پر رپورٹ کی گئی ہیں۔

پورٹل کے مطابق علاقے میں کیسز کی کل تعداد 1619 اور اموات 34 ہے۔

گلگت میں کورونا سے اب تک 1290 افراد صحتیاب بھی ہوچکے ہیں۔

بلوچستان

بلوچستان سے جمعرات کو کورونا کے 47 کیسز اور ایک ہلاکت سامنے آئی جس کے بعد صوبے میں کورونا کے کیسز کی کل تعداد 11099 اور ہلاکتیں 125 ہوگئی ہیں۔

اس کے علاوہ بلوچستان میں اب تک کورونا سے 6931 مریض صحتیاب بھی ہوچکے ہیں۔

سندھ

سندھ میں جمعرات کو کورونا سے مزید 40 افراد انتقال کرگئے جس کے بعد صوبے میں ہلاکتوں کی مجموعی تعداد 1677 ہوگئی۔

گزشتہ 24 گھنٹوں کے دوران مزید 1538 افراد میں مہلک وائرس کی تشخیص ہوئی ہے جس کے بعد متاثرہ مریضوں کی تعداد 100900 تک جاپہنچی ہے۔

سندھ پاکستان کا پہلا صوبہ ہےجہاں کورونا مریضوں کی تعداد ایک لاکھ سے تجاوز کرگئی ہے البتہ ان میں سے نصف سے زیادہ یعنی 57 ہزار 627 صحتیاب ہوچکے ہیں جبکہ 41 ہزار 596 زیر علاج ہیں۔

خیبرپختونخوا

جمعرات کو خیبرپختونخوا میں کورونا وائرس کے باعث مزید 9 افراد انتقال کرگئے جس کے بعد صوبے میں ہلاکتوں کی تعداد 1063 ہوگئی۔

صوبائی محکمہ صحت کے مطابق گزشتہ 24 گھنٹوں کے دوران مزید 354 افراد میں مہلک وائرس کی تشخیص ہوئی ہے جس کے بعد صوبے میں متاثرہ مریضوں کی تعداد 29406 تک پہنچ گئی ہے۔

اب تک صوبے میں 18791 افراد کورونا وائرس سے صحت یاب بھی ہو چکے ہیں۔

مظفر گڑھ (وقت ٹی وی آن لائن ) مظفرگڑھ میں رشتہ طے کرانے والا فراڈیہ دُلہا کو چونا لگا کر ہزاروں روپے لے اڑا جس کے بعد بارات دُلہن کو لینے کے بجائے تھانے پہنچ گئی۔

مظفرگڑھ کے تھانہ سول لائن پہنچنے والے دین پور کے رہائشی مزدور اللہ بچایا کے مطابق خادم حسین نامی شخص نے اس کا رشتہ روہیلانوالی میں طے کرایا،کچھ دن قبل خادم حسین نے روہیلانوالی میں مبینہ لڑکی کے اہلخانہ سے بات چیت بھی کرائی۔

رشتہ طے ہونے پر گزشتہ روز اللہ بچایا ویگن بھر کے بارات لے کر روہیلانوالی پہنچ گیا۔

دُلہے اللہ بچایا کے مطابق اس موقع پر فراڈیے نے اس سے 30 ہزار روپے کی رقم لی اور نکاح خواں بلانے کا بہانہ بناکر رفو چکر ہوگیا۔

دُلہے نے فراڈ ہونے پر تھانے کی راہ لی اور وہاں پہنچ کر اصرار کیا کہ یا تو پولیس اس کے پیسے واپس کرائے یا کسی لڑکی سے شادی کرادے۔

پولیس کے مطابق متاثرہ شخص کی درخواست وصول کرکے تفتیش شروع کردی گئی ہے۔

اسلام آباد (وقت ٹی وی آن لائن ) وفاقی وزیر برائے بحری امور علی زیدی کا کہنا ہے کہ سندھ حکومت کی جانب سے جاری کی گئی عزیر بلوچ سے متعلق مشترکہ تحقیقاتی ٹیم (جے آئی ٹی) کی رپورٹ نامکمل ہے، چیف جسٹس اس کا از خود نوٹس لیں۔

اسلام آباد میں پریس کانفرنس کرتے ہوئے علی زیدی نے کہا کہ جو رپورٹ سندھ حکومت نے شائع کی اس میں سیاسی تعلقات کا ذکر موجود نہیں، سندھ حکومت نے 37 صفحات کی جے آئی ٹی جاری کی جبکہ اصل رپورٹ 43 صفحات پر مشتمل ہے جس میں صاف لکھا ہے کہ پیپلزپارٹی رہنماؤں کے کہنے پر عزیر بلوچ نے قتل کیے۔

انہوں نےچیف جسٹس پاکستان سے اپیل کی کہ ملک کے سب سے بڑے شہرمیں جوقتل وغارت ہوئی اس پر 184 تھری کے تحت ازخود نوٹس لیں۔

علی زیدی نے یہ بھی کہا کہ وزیراعظم عمران خان نے انہیں یقین دلایا ہے کہ وہ اس معاملے پر اُن کے ساتھ ہیں۔

علی زیدی کا کہنا تھا کہ جے آئی ٹی رپورٹس میں ملزمان نے لوگوں کو مارنے کا تو اعتراف کیا لیکن جرم کس کے کہنے پر کیا یہ نہیں سامنے آیا۔

انہوں نے کہا کہ سندھ حکومت نے جو رپورٹ شائع نہیں کی، اس میں سیاسی تعلقات کا ذکر موجود ہے، اصل رپورٹ میں صاف لکھا ہے کہ پیپلزپارٹی رہنماؤں کے کہنے پر قتل کیے گئے۔

ان کا کہنا تھا کہ جے آئی ٹی کی اصل رپورٹ 43 صفحات کی ہے جس میں فریال تالپور، عبدالقادر پٹیل، شرجیل میمن، یوسف بلوچ، ذوالفقار مرزا اور نثار مورائی کا نام ہے۔

علی زیدی نے کہا کہ جو رپورٹ ریلیز کی گئی ہے، اس میں لکھا ہے کہ عزیربلوچ نے جلیل اور رزاق کمانڈو کے بھائی کو مارا، جس رپورٹ پر اداروں کے دستخط ہیں اس رپورٹ میں ہے کہ 2011 میں عبدالقادرپٹیل نے جلیل کے قتل کی ذمہ داری دی۔

وفاقی وزیر کا کہنا ہے کہ رپورٹ میں صاف لکھا ہے کہ ذوالفقار مرزا کے پارٹی چھوڑنے کے بعد شرجیل میمن اور ٹپی ان سے کام کراتے تھے۔

علی زیدی نے مزید کہا کہ سندھ حکومت کی رپورٹ میں چیزیں ’مسنگ‘ ہیں، ضرب عضب دہشت گردوں اور ان کے سہولت کاروں کے خلاف تھا لیکن اب بہت سارے سہولت کار اسمبلیوں میں بیٹھے ہوئے ہیں۔

انہوں نے چیف جسٹس سے معاملے پر از خود نوٹس لینے کی درخواست کی اور کہا کہ چیف جسٹس مجھے بھی بلائیں، تمام دستخط کرنے والوں کو بلائیں اور کارروائی کریں۔

خیال رہے کہ گزشتہ روز سندھ حکومت نے لیاری گینگ وار کے سرغنہ عزیر بلوچ، سابق چیئرمین فشر مین کوآپریٹو سوسائٹی نثار مورائی اور بلدیہ فیکٹری کی جے آئی ٹی رپورٹس جاری کیں تھیں جن میں اہم انکشافات سامنے آئے ہیں۔

لاہور (وقت ٹی وی آن لائن ) مسلم لیگ (ن) کے سینیئر رہنما و سابق وزیر خارجہ خواجہ آصف نے کہا ہے کہ وزیراعظم عمران خان مافیاز کی سرپرستی کررہے ہیں، کسی کو یوٹیلٹی اسٹورز، کسی کو اقتصادی رابطہ کمیٹی (ای سی سی) اور کسی کو کابینہ کے ذریعے فائدہ پہنچایا جا رہا ہے۔

خواجہ آصف کا کہنا تھا کہ بجلی ہماری ضرورت سے وافر مقدار میں موجود ہے، ہم نے فرنس آئل سے بجلی کی طلب بہتر کرنے کے لیے 3 آر ایل این جی پلانٹس لگائے،جب عمران خان کنٹینرز پرچڑھ کر بجلی کے بل جلارہے تھے تو اس وقت ہم بجلی پیدا کر رہے تھے، آج پھر بجلی کی قلت ہے، لوگ بلبلا رہے ہیں۔

انہوں نے کہا کہ پاکستان کی 70 سالہ تاریخ میں بجلی کے اتنے منصوبے نہیں لگے جتنے ہمارے دور میں لگے لیکن اب بجلی کی قلت معیشت کے برے حالات میں اور اضافہ کررہی ہے، عوام اپنے ذہنوں پر زور دے رہے ہیں کہ کوئی ایسا وعدہ جو انہوں نے پورا کیا ہو۔

ان کا کہنا ہے کہ پنجاب میں آٹا اور چینی مہنگے داموں مل رہی ہے، وزیراعظم مافیاز کی سرپرستی کررہے ہیں، ان کی اپنی صفوں میں سارے کرپٹ بیٹھے ہیں، گندم کی فصل کٹنے کے بعد بھی آج پنجاب میں آٹا مہنگا ہے، ہم حکومت کی نا اہلی اور کرپشن کو بے نقاب کرتے رہیں گے۔

ان کا کہنا تھا کہ حکومت کو اپنی صفوں میں موجود لوگوں کی کرپشن نظر نہیں آتی، ان کی اپنی صفوں میں سب حاجی بنے ہوئے ہیں۔

خواجہ آصف نے مزید کہا کہ عمران خان کنٹینرز پر کیا فرماتے تھے اور آج جب وہ اقتدار میں ہیں تو کیا کررہے ہیں، کسی کو یوٹیلٹی اسٹورز، کسی کو ای سی سی اور کسی کو کابینہ کے ذریعے فائدہ پہنچایا جا رہا ہے۔

’نالائق، نااہل اور ناتجربہ کار وزیراعظم کی وجہ سے ہماری معیشت تباہ ہوگئی‘

مسلم لیگ (ن) کے جنرل سیکرٹری احسن اقبال کا کہنا تھا کہ انرجی، فوڈ اور واٹر سیکیورٹی ہمارا 2025 کا منصوبہ تھا جو ایک ماڈل تھا لیکن اس حکومت نے اسے تہس نہس کردیا۔

انہوں نے کہا کہ بنگلا دیش، سری لنکا، نیپال اور اب افغانستان کی معیشت ہم سے آگے جارہی ہے لیکن نا اہل حکومت کی وجہ سے ملک پیچھے کی طرف جارہا ہے۔ ان کا کہنا ہے کہ وزیراعظم عمران خان مسلم لیگ ن کے منصوبوں کا فیتہ کاٹ رہے ہیں، گوادر کا پراجیکٹ بھی مسلم لیگ کا ہے جس کا ابھی سنگ بنیاد رکھنے جارہے ہیں۔

لیگی رہنما کا کہنا تھا کہ حکومت سرکاری افسران کے تبادلے کررہی ہے کوئی اس طرح اپنے نوکروں کے ساتھ بھی نہیں کرتا، نالائق، نااہل اور ناتجربہ کار وزیراعظم کی وجہ سے ہماری معیشت تباہ ہوگئی، یہ وہ حکومت ہے جو 2 سال سے بغیر ڈویلپمنٹ کے کام کررہی ہے۔

انہوں نے مزید کہا کہ جب چین کے صدر آئے تو عمران خان کنٹینر پرکھڑے ہوکر کہہ رہے تھے کہ مہنگے قرضے دینے آرہے ہیں، آج کہہ رہے ہیں کہ سی پیک سے پاکستان کا مستقبل روشن ہوگا، کیا عمران خان نے چین سے معافی مانگی؟ ایک وزیر کہہ رہے ہیں کہ احسن اقبال نے ملتان موٹروے کی تعمیر میں پیسے کھائے، ان کے متنازع بیانات نے سی پیک کو متنازع کیا۔

لاہور (وقت ٹی وی آن لائن ) اسلام آباد: سابق وزیراعظم و سینئر رہنما مسلم لیگ (ن) شاہد خاقان عباسی کا کہنا ہے کہ مائنس ون فارمولا میری نظر میں ناممکن ہے کیونکہ نہیں سمجھتا کہ تحریک انصاف میں کوئی شخص عمران خان کی جگہ لے سکتا ہے۔

جیو نیوز کے پروگرام ‘جیوپاکستان’ میں گفتگو کرتے ہوئے شاہد خاقان عباسی نے کہا کہ مجھے کورونا ہوا تو کم درجے کا بخار رہا، کورونا کی وجہ سے بے پناہ کمزوری ہوئی اور ابھی بھی کمزوری ہے۔

انہوں نے بتایا میں کورونا سے قبل 10 سے 12 کلو میٹر تک روز واک کرتا تھا لیکن کورونا سے اتنی کمزوری ہوئی کہ آدھا کلو میٹر کی واک بھی نہیں کرسکتا تھا، قرنطینہ سے پہلے 8 ماہ جیل میں گزارے اس لیے آئسولیشن کا احساس نہیں ہوا۔

شاہد خاقان عباسی نے تحریک انصاف کی حکومت پر تنقید کرتے ہوئے کہا کہ حکومت ناکام ہوچکی اور کوئی مستقبل نظر نہیں آتا، میں تو چاہتا ہوں کہ حکومت 5 سال مکمل کرے۔

سابق وزیراعظم کا کہنا تھا کہ اس حکومت کا ہر لمحہ ملک پر بھاری ہے، عدم اعتماد تحریک واحد راستہ ہے کیونکہ مائنس ون فارمولا میری نظر میں نہ ممکن ہے، نہیں سمجھتا کہ تحریک انصاف میں کوئی شخص عمران خان کی جگہ لے سکتا ہے۔

شاہد خاقان نے مزید کہا کہ جتنی میڈیا سنسر شپ اس حکومت کے دور میں ہے کسی اور دور میں نہیں رہی، اپوزیشن نے میڈیا کے لیے اسمبلی کے اندر اور باہر آواز اٹھائی ہے، موجودہ حکومت چینل بند کرواتی ہے اور لوگوں کو نوکریوں سے نکلواتی ہے، حکومت صحافیوں کا پُر امن احتجاج برداشت نہیں کرسکتی تو اور کیا کرسکتی ہے۔

ان کا کہنا تھا عمران خان کو مشورہ دوں گا کہ گورننس کی بہتری کے لیے اپنا منہ بند رکھیں، وزیر اعظم کو سوچ سمجھ کر بات کرنی چاہیے، عمران خان منہ بند رکھیں تو حالات 50 فیصد بہتر ہوسکتے ہیں۔

ریاض (وقت ٹی وی آن لائن) حج سے متعلق جاری قواعد و ضوابط کے علاوہ مسجدالحرام، منیٰ، عرفات، مزدلفہ اور قیام طعام سے متعلق بھی ضوابط جاری کیے گئے ہیں۔

مکہ مکرمہ کے گورنریٹ کی جانب سے جاری کردہ قواعد و ضوابط کے مطابق 28 ذی القعدہ سے 12 ذی الحجہ تک منیٰ، مزدلفہ اور عرفات میں بغیر اجازت جانا منع ہوگا۔

حج کے لیے آنے والے افراد اور حج کرانے والوں کو حفاظتی ماسک اور دستانے پہننا ہوں گے جب کہ سر کے بال تراشنے، مونڈھنے، داڑھی بنانے والے ایک دوسرے کے آلات استعمال نہیں کرسکیں گے۔

قواعد کے مطابق باجماعت نماز کی اجازت ہوگی تاہم نماز کے دوران ماسک پہننا لازمی ہوگا جب کہ نمازی ایک دوسرے سے 2 میٹر فاصلےکی پابندی کریں گے اور لفٹ استعمال کرتے وقت بھی سماجی فاصلہ رکھنا ہوگا۔

دوسری جانب مسجد الحرام، منیٰ، عرفات اور مزدلفہ میں کولرز ہٹا دیے جائیں گے اور پانی پینے یا زمزم کے لیے ڈسپوزیبل بوتلیں، ڈبے استعمال کیےجائیں گے جب کہ کھانے پینےکے برتن دوبارہ استعمال کرنےکی اجازت نہیں ہوگی۔

خانہ کعبہ یا حجر اسود کو چھونا منع ہوگا جب کہ حج میں جمرات کی رمی کے لیے پیک شدہ کنکریاں فراہم کی جائیں گی۔

حج ضوابط کے مطابق بسوں میں مسافروں کی تعداد متعین ہوگی، پورے سفر کے لیے ہر حاجی کی نشست متعین ہوگی اور کسی بھی حاجی کو بس میں کھڑے ہونے کی اجازت نہیں ہوگی جب کہ ڈرائیوروں اور مسافروں کو بس میں سفر کے دوران ماسک اتارنےکی اجازت نہیں ہوگی۔

میدان عرفات اور مزدلفہ میں مخصوص مقامات پر قیام کی پابندی کرنا ہوگی اور عبادت کے دوران حاجیوں کو ماسک اتارنے کی اجازت نہیں ہوگی، مطابق طواف کے لیے مطاف جانے والوں کی قافلہ بندی ہوگی اور طواف کے دوران کم از کم ڈیڑھ میٹر کا فاصلہ رکھنا ہوگا جب کہ صفا و مروہ کی سعی ہر منزل سےہوگی اور سعی کے دوران سماجی پابندی کرائی جائےگی۔

حاجیوں کو خارجی صحنوں میں کھانے کی اجازت نہیں ہوگی جب کہ طواف کی جگہ ،صفا و مروہ کے علاقےکو حاجیوں کے ہرکارواں کے بعد سینیٹائز کیا جائے گا۔

مسجد الحرام سے قالین اٹھالیے جائیں گے اور اپنی جائے نماز استعمال کرنے کی تاکید کی جائےگی۔