All posts by Dua Tariq

مقبوضہ بیت المقدس : اسرائیلی سکیورٹی فورسز نے مقبوضہ مغربی کنارے میں ایک فلسطینی کو گولی مار کر شہید کر دیا۔سعودی ذرائع ابلاغ کے مطابق غزہ کی پٹی میں حکمران جماعت حماس کا کہنا ہے کہ یہ حملہ گزشتہ ہفتے اسرائیلی حکام کے مقبوضہ بیت المقدس میں مسجداقصیٰ پر دھاوے کے جواب میں کیا گیا ہے۔اسرائیلی ایمرجنسی سروسز کا کہنا ہے کہ مقبوضہ مغربی کنارے میں واقع بڑی یہودی بستی معالی اَدومیم میں واقع شاپنگ مال کے باہر فائرنگ کے نتیجے میں6اسرائیلی آبادکار زخمی ہو گئے ، جن میں سے ایک کی حالت تشویشناک ہے۔اسرائیلی چینل 12 کا کہنا ہے کہ فلسطینی حملہ آور کو ایک آف ڈیوٹی افسر نے گولی ماری ہے۔

ریاض : سعودی عرب نے ڈنمارک سے قرآن پاک کی بے حرمتی کی کارروائیوں کو روکنے کے لیے فوری اقدامات کرنے کا مطالبہ کردیا۔ سعودی میڈیا کے مطابق سعودی عرب کے وزیرخارجہ شہزادہ فیصل بن فرحان نے ڈنمارک کے ہم منصب لارس لوکے راسموسن سے ٹیلی فونک رابطہ کیا اور قرآن پاک کی بے حرمتی کے واقعات کی مذمت کرتے ہوئے کہا کہ سعودی عرب ایسے واقعات کو مسترد کرتا ہے۔بتایا گیا ہے کہ اس دوران انہوں نے ڈنمارک پر زور دیا کہ وہ اس طرح کی انتہاپسندانہ کارروائیوں کو روکنے کے لیے فوری اقدامات کرے، انتہاپسندوں نے نفرت کو ہوا دینے کے لیے اظہار رائے کی آزادی کا غلط استعمال کیا ہے، ایسی اشتعال انگیز کارروائیوں دنیا بھر کے مسلمانوں کے جذبات کو ٹھیس پہنچی ہے۔سعودی وزیر خارجہ نے کہا کہ انتہا پسند نا صرف دین اسلام پر تنقید کرنا چاہتے ہیں بلکہ مسلمانوں کو مشتعل بھی کرنا چاہتے ہیں، اس طرح کی کارروائیوں سے فائدہ اٹھانے والے صرف انتہاپسند ہیں۔اس موقع پر ڈنمارک کے وزیر خارجہ نے کہا کہ ڈنمارک پہلے ہی اس طرح کی کارروائیوں کی مذمت کرچکا ہے۔ اسی طرح اسلامی ممالک نے قرآن پاک کی بے حرمتی پر اقوام متحدہ کی خاموشی افسوسناک قرار دی ہے، جنیوا میں اسلامی تعاون تنظیم کے گروپ نے بعض یورپی ممالک میں بار بار قرا?ن پاک کی بے حرمتی کے واقعات کی مذمت کرتے ہوئے کہا کہ اقوام متحدہ کے متعلقہ ماہرین کی طرف سے ایسے واقعات پر خاموشی افسوس ناک ہے، ہم متعلقہ حکومتوں کی جانب سے ایسے واقعات کی مذمت کو تسلیم کرتے ہیں لیکن اس بات پر تشویش ہے کہ انتہا پسند ایسے ممالک میں انتہائی ضروری حفاظتی، قانونی اور انتظامی پالیسی کی عدم موجودگی میں استحصال جاری رکھ سکتے ہیں۔او آئی سی گروپ نے اپنے ایک بیان میں کہا کہ کچھ واقعات کے پیچھے نسلی مقاصد کو واضح طور پر نظر انداز کیا جاتا ہے، بعض ریاستوں میں پہلے اس طرح کی کارروائیوں کی منظوری دینے اور پھر اس کی مذمت کرنے میں سیاسی سطح پر خاموشی اختیار کی جاتی ہے، افراد اور کمیونٹیز کو مذہبی منافرت، دشمنی اور قرآن پاک یا دیگر مقدس کتابوں کی بے حرمتی اور تشدد کو بڑھا نے سے بچانے کے لیے اس طرح کے واقعات کی روک تھام اور جوابدہی کی ضرورت ہے۔گروپ کی جانب سے یاد دہانی کرائی گئی کہ مذہبی منافرت کی روک تھام کے لیے حال ہی میں انسانی حقوق کونسل میں قرارداد منظور کی گئی جس میں قرآن پاک کی بے حرمتی کے واقعات کی مذمت کی گئی اور مذہبی منافرت اور تشدد کو اکسانے کی روک تھام کے لیے احتساب کا مطالبہ کیا گیا، قرارداد میں ہائی کمشنر اور انسانی حقوق کے اداروں پر زور دیا گیا کہ وہ ایسے واقعات کو روکیں، تاہم ایسے واقعات پر اقوام متحدہ کے متعلقہ ماہرین کی خاموشی افسوس ناک ہے، ہم اس بات پر یقین رکھتے ہیں کہ ذاتی علمی نظریات کو کسی کو بھی اپنی اخلاقی اور قانونی ذمہ داریوں سے نہیں روکنا چاہیے جیسا کہ ان کے متعلقہ مینڈیٹ میں بیان کیا گیا ہے۔او آئی سی گروپ نے کہا کہ ہم اس نظریے کو مسترد کرتے ہیں کہ قرآن پاک کی سرعام اور طے شدہ منصوبے کے تحت بے حرمتی قابل اعتراض ہے لیکن قانونی طور پر قابل اجازت فعل ہے، اس کے برعکس یہ بین الاقوامی قانون کے تحت قابل مذمت اور ممنوعہ فعل ہے کیوں کہ یہ مذہبی منافرت، دشمنی اور تشدد کو بڑھاوا دیتا ہے، انسانی حقوق کونسل ذاتی علمی نظریات کو کالعدم قرار دیتی ہے خاص طور پر ان لوگوں کے لیے جو کونسل کے سامنے جوابدہ ہیں اور اس حوالے سے اپنے مینڈیٹ کے پابند ہیں۔

مکہ مکرمہ: خانہ کعبہ کو غسل دینے کی روح پرور تقریب میں بیت اللہ کا دروازہ کھول دیاگیا،خانہ کعبہ کو غسل دینے کا عمل اور یہ تقریب کئی گھنٹے جاری رہی۔خانہ کعبہ کو غسل دینے کا کام صدارت عامہ برائے امور حرمین شریفین کے جنرل صدر الشیخ ڈاکٹر عبدالرحمن بن عبدالعزیز السدیس کی نگرانی میں انجام دیاگیا،عرب میڈیا کے مطابق غسل کعبہ میں 20 لیٹر آب زمزم اور عرق گلاب استعمال کیا گیا اور اس موقع پر بیت اللہ کی اندرونی دیواروں اور فرش کو صاف کیا گیا۔غسل کے بعد خانہ کعبہ کو خالص عود، عرق گلاب اور بخور کی خوشبوں سے معطر کیا گیا۔غسل کعبہ کی تقریب کے دوران کلید بردار الشیخ ڈاکٹر صالح آل زین نے خانہ کعبہ کا دروازہ کھولا اور مکہ مکرمہ کے نائب گورنر شہزادہ بدر بن سلطان نے خانہ کعبہ کے اندرونی حصے کو غسل دیا۔غسل کعبہ کی تقریب میں او آئی سی سربراہ اور اعلی سول حکام شریک ہوئے۔غسل کعبہ کی تقریب میں آئمہ کرام اور حرمین شریفین انتظامی امور کے حکام بھی شریک ہوئے۔اس تقریب کے حوالے سے سیکیورٹی کے سخت انتظامات کیے گئے تھے۔صدارت عامہ برائے امور حرمین شریفین کی جدید خدمات کے نظام کے مطابق خانہ کعبہ کو غسل دینے کی یہ تقریب کئی گھنٹے جاری رہی،یہ تیاریاں سعودی عرب کی دانش مند قیادت کی خواہشات کے مطابق ہوتی ہیں اور وہ حرمین شریفین کی دیکھ بھال کا کام گہری توجہ اور دلچسپی کے ساتھ انجام دیتے ہیں۔اس سے قبل صدارت عامہ سے منسلک ایجنسیوں نے سپرد کردہ ذمہ داریوں کو مکمل کیا، صحن مطاف برقی کرنٹ کو کنٹرول کرنے والے مقامات کی جانچ پڑتال کی گئی ، صدارت عامہ کی ہدایت کے مطابق خانہ کعبہ کے دروازے کا پردہ ہٹا دیا گیا ہے۔واضح رہے کہ خانہ کعبہ کو ہر نئے ہجری سال کی 15 تاریخ کو غسل دیا جاتا ہے،کعبے کا غسل پیغمبر اسلام کی قائم کردہ مثال کے مطابق ہے،یہ رواج ہے کہ سعودی بادشاہ یا ان کا نمائندہ کعبے کو اندر سے غسل دیتا ہے،کعبے کی دیواروں کو صاف کرنے کے لیے تولیے استعمال کیے جاتے ہیں۔اندرونی دیواروں کو گلاب اور کستوری کی خوشبوں میں ڈوبے ہوئے سفید کپڑے سے صاف کیا جاتا ہے۔ گلاب کے عطر کے ساتھ ملا ہوا زمزم پانی فرش پر چھڑکا جاتا ہے اور ننگے ہاتھوں اور کھجور کے پتوں سے صاف کیا جاتا ہے۔

ممبئی :بھارتی سنسر بورڈ نے ایکشن اور کامیڈی اسٹار اکشے کمار کی نئی فلم ’’اوہ مائی گاڈ2‘‘ کو ریلیز کی اجازت دینے سے انکار کردیا۔ میڈیا ذرائع کے مطابق سنسر بورڈ نے فلم میں 35 تبدیلیوں کے ساتھ اکشے کمار کے کردار پر بھی شدید تحفظات کا اظہار کرتے ہوئے اس میں تبدیلی لانے کا مطالبہ کیا ہے۔واضح رہے فلم میں اکشے کمار نے ہندو دیوتا شیوا کا کردار ادا کیا ہے اور ان کے ساتھ پنکج ترپاٹھی اور یامی گوتم بھی نظر آئیں گے۔ اکشے کمار کے کردار پر ہندوئوں کی جانب سے تنقید کی جارہی ہے۔

لاہور : معروف اداکارہ و ماڈل سنیتا مارشل نے کراچی ایئرپورٹ کے قریب طیارہ حادثے میں جاں بحق ہونے والی ماڈل زارا عابد کے حق میں اپنی آواز اٹھائی ہے۔ سنیتا مارشل نے نجی ٹی وی کے ایک مارننگ شو میں کہا کہ زارا عابد ایک باصلاحیت ماڈل تھیں اور وہ اپنے گھر کی واحد کفیل تھیں۔انہوں نے کہا کہ جب پی آئی اے کے طیارے کا حادثہ ہوا تو حکومت نے وعدہ کیا تھا کہ وہ متاثرین کی خاندان والوں کی مالی امداد کریں گے لیکن میں نے ابھی اس حوالے سے اخبار میں ایک خبر پڑھی کہ اس طیارہ حادثے کے متاثرین کو ابھی تک انصاف نہیں ملا ہے۔ انہوں نے حکومت سے مطالبہ کرتے ہوئے کہا کہ جن لوگوں کے پاس اس وقت اقتدار ہے ان میں سے کوئی میری آواز سن رہا ہے تو میری ان لوگوں سے درخواست ہے کہ یہ بہت سنگین معاملہ ہے اور اس حوالے سے حکومت کو سنجیدہ اقدامات کرنے چاہئیں۔انہوں نے کہا کہ اس حادثے میں جن لوگوں نے اپنے پیاروں کو کھویا ہے وہ اس حادثے کی وجہ جاننے کا حق رکھتے ہیں۔

ممبئی : سپرسٹار شاہ رخ خان کی نئی فلم ’’جوان‘‘ کا گیت ’’زندہ بندہ‘‘ گزشتہ روز ریلیز ہوا تھا جسے اب تک ساڑھے تین کروڑ سے زائد مرتبہ دیکھا جاچکا ہے۔گانا ریلیز ہوتے کے ساتھ ہی سپر ہٹ ہوگیا، اس گانے میں شاہ رخ خان ایک ہزار خواتین رقاصاؤں کے ساتھ رقص کر رہے ہیں۔بھارتی میڈیا رپورٹ کے مطابق صرف ’زندہ بندہ‘ کی شوٹنگ پر 15 کروڑ روپے کے اخراجات آئے۔اس گیت میں تامل اور تیلگو کے الفاظ بھی ہیں جس پر شاہ رخ خان نے بہترین انداز میں ہم آہنگی کے ساتھ ہونٹوں کو حرکت دی۔خیال رہے کہ فلم’ ’جوان‘‘ 7 ستمبر کو ریلیز ہوگی، فلم کی پروڈیوسر کنگ خان کی اہلیہ گوری خان ہیں۔

لاہور : پاکستانی کامیڈی سپر اسٹار افتخار ٹھاکر کی طنز و مزاح اور قہقہوں سے بھرپور نئی انٹرنیشنل پنجابی فلم ’’منڈا ساؤتھ ہال دا‘‘ کو پاکستانی سنیماؤں میں نمائش کیلئے سنسر سرٹیفکیٹ مل گیا ہے۔برطانیہ میں فلمائی گئی رومانوی کامیڈی فلم کو دنیا بھر کے ساتھ ساتھ پاکستانی سنیماؤں میں جمعہ 4 اگست کو نمائش کیلئے پیش کیاجا رہا ہے۔رومانوی کامیڈی فلم میں فریش جوڑی ارمان بیدل اور تنو گریوال نے مرکزی کردار ادا کئے ہیں جبکہ پاکستانی کامیڈین اسٹار افتخار ٹھاکر کی بہترین اداکاری فلم کی ہائی لائٹ ہے جس نے کہانی کو چار چاند لگادیئے ہیں۔ فلم کی دیگرکاسٹ میں گولڈ بوائے، سربجیت چیمہ، روبن، پریت اوجلہ سمیت دیگر فنکار شامل ہیں۔

اسلام آباد:پاکستان تحریک انصاف نے یوم آزادی بھرپور طریقے سے منانے کا اعلان کر دیا ،میڈیا ڈیپارٹمنٹ کی جانب سے جاری بیان میں کہاگیا ہے کہ چیئرمین پاکستان تحریک انصاف عمران خان کی ہدایت کی روشنی میں ملک گیر تقریبات کے حوالے سے اہم اجلاس ہوا ،سیکرٹری جنرل تحریک انصاف عمر ایوب نے اجلاس کی صدارت کی،سیکرٹری اطلاعات پاکستان تحریک انصاف روف حسن سمیت دیگر ذمہ داران کی بھی اجلاس میں شرکت کی ،اجلاس میں یوم آزادی کی ملک گیر تقریبات اور سرگرمیوں کے حوالے سے مفصل مشاورت کی گئی ،بانیان پاکستان خصوصاً قائد اعظم اور علامہ محمد اقبال کے تصورات آزادی کو اجاگر کرنے کی حکمت عملی پر مشاورت کی گئی ،تحریک پاکستان کے روشن پہلوؤں کو نمایاں کرنے کی حکمت عملی پر بھی تبادلہ خیال،چیئرمین عمران خان کی قیادت میں یوم آزادی کی تقریبات میں عوام کی بھرپور شمولیت کی حکمت عملی پر غورکیا،یوم آزادی کی تقریبات اور تیاریوں کے حوالے سے حتمی سفارشات تیار کی گئیں،چیئرمین تحریک انصاف عمران خان کی منظوری سے آئندہ 48 گھنٹوں میں باضابطہ اعلان کیا جائے گا ۔

اسلام آباد : وزیراعظم نے کابینہ کمیٹی برائے توانائی کااہم اجلاس 7 اگست کو طلب کر لیا ،سی سی او ای میں تین نکاتی ایجنڈے پر غور کیا جائے گا،آئندہ پانچ سال کا نیشنل الیکٹریسٹی پلان 2023,27 ایجنڈے کا حصہ ہے،ہوا سے بجلی پیدا کرنے والی کمپنیوں کے ساتھ معاہدوں پر عملدرآمد کا معاملہ بھی زیر غور آئے گا،اجلاس میں آئل ریفائنری پالیسی 2023 کا مسودہ منظوری کیلئے پیش ہوگا۔

اسلام آباد:سپریم کورٹ نے چیئر مین پی ٹی آئی عمران خان کی توشہ خانہ ٹرائل بابت ہائی کورٹ کے 27 جولائی کے حکم نامہ کے خلاف دائر درخواست مسترد قرار دیتے ہوئے ریمارکس دیئے ہیں کہ ٹرائل کورٹس پر سپروائزری دائرہ اختیار ہائیکورٹ کا ہی ہے، ہم اس وقت ٹرائل کورٹ کی کارروائی میں مداخلت نہیں کر سکتے،اسلام آباد ہائی کورٹ کو فیصلہ کرنے دیں، ممکن ہے کل ہائیکورٹ ٹرائل ہی روکنے کا حکم دے دے۔ بدھ کو عدالت عظمی میں معاملہ کی سماعت جسٹس یحییٰ آفریدی کی سربراہی میں تین ر کنی بنچ نے کی۔ دوران سماعت جسٹس یحییٰ آفریدی نے پوچھا کہ ہائیکورٹ میں کیس اب کب کے لئے مقرر ہے، جس پر خواجہ حارث نے بتایا کہ کیس کل ہائیکورٹ میں سماعت کے لئے مقرر ہے،جس پر جسٹس یحیی آفریدی نے ریمارکس دیئے کہ جو ریلیف آپ نے مانگا وہ ہم نے دے دیا تھا،حیرت ہے آپ نے پھر بھی سپریم کورٹ سے رجوع کیا، خواجہ حارث نے اس موقع پر موقف اپنایا کہ اصل سوال دائرہ اختیار کا ہے، جس پر جسٹس یحیی آفریدی نے کہا کہ آپکی درخواست غیرموثر ہوچکی تھی پھر بھی ہم نے سنا اور آرڈر دیا،ہم صورتحال کو سمجھ رہے ہیں،ہم نے سمجھا تھا ہائیکورٹ آپ کو بہتر آرڈر دے گی،ہم نے حکمنامے میں لکھا تھا ہائیکورٹ درخواستوں کو اکھٹا سنے،ہوسکتا ہے جو ریلیف آپ مانگ رہے ہیں وہ ہائیکورٹ فیصلہ کردے،خواجہ حارث نے اس موقع پر عدالت کو بتایا کہ ہائیکورٹ نے حکم امتناع نہیں دیا اس لئے سپریم کورٹ آئے ہیں،عدالت عظمی نے اس موقع پر قرار دیا کہ پہلے ہائیکورٹ کو فیصلہ کرنے دیں،اگر آپ کو ریلیف نہیں ملتا تو سپریم کورٹ میں مقدمہ زیر سماعت ہے۔ عدالت عظمی نے اس موقع پر عمران خان کی فوری ریلیف کی استدعا مسترد قرار دیتے ہوئے معاملہ کی سماعت جامعہ 4 اگست تک کیلئے ملتوی قرار دے دی ہے۔ عدالت عظمی نے اس موقع پر متعلقہ فریقین کو نسٹسز بھی جاری کر دیئے ہیں۔