All posts by News Editor

پاکستان بھر میں کورونا وائرس سے متاثر ہونے والے افراد کی تعداد 9 لاکھ 91 ہزار 727 ہوگئی ہے۔

این سی او سی کے مطابق ملک میں کورونا وائرس سے ہونے والی بیماری کووِڈ 19 کے فعال کیسز کی تعداد 48 ہزار 850 ہے۔

علاوہ ازیں 24 گھنٹے کے دوران کورونا سے مزید 30 اموات کے بعد اب تک وبا کے باعث لقمہ اجل بننے والوں کی تعداد 22 ہزار 811 ہوگئی۔

دوسری جانب کورونا کے مزید 903 مریض صحت یاب ہونے میں کامیاب رہے اور صحت یاب افراد کی مجموعی تعداد 9 لاکھ 20 ہزار 66 تک جا پہنچی۔

اسلام آباد، آزاد کشمیر، گلگت بلتستان میں گزشتہ 24 گھنٹوں کے دوران مجموعی طور پر 338 کورونا کیسز سامنے آگئے۔

اسلام آباد میں 159 کیسز

آزاد کشمیر میں 127 کیسز

گلگت بلتستان میں 52 کیسز، ایک موت
صوبہ خیبرپختونخوا میں گزشتہ 24 گھنٹوںکے دوران مزید 258 افراد کے عالمی وبا کورونا وائرس سے متاثر ہونے کی تصدیق ہوئی جبکہ ایک مریض زندگی کی بازی ہار گیا۔

خیبرپختونخوا میں اب تک ایک لاکھ 40 ہزار 818 کیسز اور 4 ہزار 438 اموات سامنے آچکی ہیں۔

محکمہ بنیادی و ثانوی صحت پنجاب نے عید الاضحی کے موقع پر کورونا وائرس کی ڈیلٹا قسم کے پھیلاؤ کو روکنے کے لیے ایس او پیر جاری کیے ہیں۔

ایس او پیز کے مطابق صرف ویکسینیٹڈ افراد کو صوبے کی حدود میں یا سیاحتی مقامات پر جانے کی اجازت ہوگی جبکہ ویکسین نہ لگوانے والے افراد کے لیے ہوٹل بکنگ نہیں کی جاسکے گی،

علاوہ ازیں ریسٹورنٹس میں صرف 50 فیصد گنجائش کے ساتھ ڈائننگ ان کی اجازت ہوگی۔

مزید براں سیاحتی مقامات پر ریپڈ اینٹجن ٹیسٹنگ کو بھی بڑھایا جائے گا۔

کینیڈا کی ویسٹرن یونیورسٹی آف اونٹاریو نے گزشتہ ماہ جون میں قتل کیے جانے والے پاکستانی جوڑے کی یاد میں ہر سال دو طرح کی اسکالر شپس دینے کا اعلان کردیا۔

کینیڈا کی یونیورسٹی گزشتہ ماہ جون کے اوائل میں اونٹاریو میں دہشت گردی کے واقعے میں قتل کیے جانے والے سلمان افضال اور ان کی اہلیہ مدیحہ سلمان کے اعزاز میں دو طرح کی اسکالرشپس فراہم کرے گی۔

پاکستانی نژاد جوڑے کو 6 جون کو دیگر دو اہل خانہ کے ہمراہ بے دردی سے قتل کردیا گیا تھا۔

رپورٹ کے مطابق یونیورسٹی کی جانب سے جاری اعلامیے کے مطابق یونیورسٹی ہر سال ’مدیحہ سلمان میموریل‘ اور ’سلمان افضال میموریل‘ اسکالر شپس فراہم کرے گی۔

مدیحہ سلمان میموریل اسکالر شپ سول اور ماحولیاتی انجنیئرنگ کے شعبوں میں ماسٹر اور پی ایچ ڈی کرنے والی لڑکیوں کی دی جائے گی۔

اسی طرح سلمان افضال میموریل اسکالر شپ ہر سال فزیکل تھراپی میں ماسٹر اور پی ایچ ڈی کرنے والے طلبہ کو دی جائے گی۔

جس یونیورسٹی نے پاکستانی نژاد جوڑے کی یاد میں اسکالر شپ کے قیام کا اعلان کیا ہے، دونوں نے اسی یونیورسٹی سے تعلیم حاصل کی تھی۔

مدیحہ سلمان نے یونیورسٹی سے انجنیئرنگ میں ماسٹر کیا تھا اور وہ ماحولیاتی انجنیئرنگ میں وہاں سے پی ایچ ڈی کر رہی تھیں کہ ان کا بیہمانہ قتل کیا گیا اور یونیورسٹی نے بعد از مرگ گزشتہ ماہ ہی انہیں ڈگری سے نوازا تھا۔

قتل کیے جانے والے سلمان افضل نے بھی اسی یونیورسٹی سے 2010 میں فزیکل تھراپی میں ماسٹر کرنے کے بعد کیئر ہوم میں انہوں نے ملازمت اختیار کی تھی۔

یونیورسٹی کی جانب سے پاکستانی جوڑے کی یاد میں اسکالرشپس دیے جانے کے اعلان پر ان کے اہل خانہ نے مسرت کا اظہار کرتے ہوئے کہا ہے کہ مدیحہ افضال مسلمان خاتون ہونے کے ناتے مساوات پر یقین رکھتی تھیں، اس لیے ان کی یاد میں دی جانے والی اسکالر شپس بھی دنیا کے تمام خطوں سے تعلق رکھنے والے طلبہ کو دی جائیں گی۔

خیال رہے کہ جوڑے کو 6 جون کو کینیڈا کے صوبے اونٹاریو میں ایک ٹرک ڈرائیور نے سلمان افضال اور مدیحہ سلمان سمیت ان کی 15 سالہ بیٹی یمنیٰ اور 9 سالہ بیٹے فیاض کو ٹکر مار دی تھی، اس واقعے میں 9 سالہ فیاض زندہ بچ گئے تھے جبکہ خاندان کے دیگر افراد جاں بحق ہوگئے تھے۔

بعد ازاں پولیس کی تفتیش میں یہ بات سامنے آئی کہ پاکستانی خاندان کو مسلمان ہونے کی وجہ سے نشانہ بنایا گیا تھا۔

اسلاموفوبیا کے مذکورہ واقعے پر کینیڈین وزیر اعظم جسٹن ٹروڈو نے بھی گہرے دکھ اور افسوس کا اظہار کیا تھا جب کہ کینیڈا بھر میں مسلمانوں سے اظہار یکجہتی کے لیے مارچ بھی نکالے گئے تھے۔

سکیورٹی فورسز کی جانب سے جنوبی وزیرستان کے ضلع سینائی نارائی میں آپریشن کیا گیا، فائرنگ کے تبادلے میں پاک فوج کا سپاہی شہید ہو گیا۔

آئی ایس پی آر کے مطابق یہ آپریشن دہشت گردوں کی موجودگی کی اطلاع پر کیا گیا۔ دہشتگردوں کیساتھ فائرنگ کے تبادلے میں سپاہی جنید شہید ہو گئے۔

پاک فوج کے شعبہ تعلقات عامہ کے مطابق 20 سالہ سپاہی جنید بالاکوٹ ضلع مانسہرہ کے رہائشی تھے۔ فورسز علاقے کو گھیرے میں لے کر سرچ آپریشن کر رہی ہیں۔

دفتر خارجہ نے کہا ہے کہ بھارتی وزیر خارجہ کے بیان نے عالمی مالیاتی نگراں ادارے میں ’بھارت کے منفی کردار‘ کے بارے میں پاکستان کے دیرینہ مؤقف کی توثیق کردی ہے، جس میں انہوں نے کہا تھا کہ بھارتی وزیراعظم نریندر مودی کی حکومت نے پاکستان کو فنانشل ایکشن ٹاسک فورس (ایف اے ٹی ایف) کی گرے لسٹ پر برقرار رکھنے کو یقینی بنانے کے لیے بھرپور کوشش کی ہے۔

ترجمان دفتر خارجہ کے جاری بیان میں کہا گیا ہے کہ بھارت کے وزیر خارجہ کے بیان نے بھارت کے ’حقیقی رنگ‘ اور ’گمراہ کن‘ کردار کو بے نقاب کردیا ہے۔

ان کا کہنا تھا کہ ’پاکستان ہمیشہ عالمی برادری کو بھارت کے ایف اے ٹی ایف میں سیاست کرنے اور اس کی کارروائی میں رکاوٹیں ڈالنے کے بارے میں بات کرتا رہا ہے، حالیہ بھارتی بیان پاکستان کے خلاف ایک اہم تکنیکی فورم کو استعمال کرنے کے لیے جاری کوششوں کی حمایت کرتا ہے‘۔

ترجمان دفتر خارجہ کا کہنا تھا کہ ’جہاں ایکشن پلان پر عمل درآمد کے دوران پاکستان ایف اے ٹی ایف کے ساتھ مخلصانہ اور تعمیری طور پر مشغول رہا ہے وہیں بھارت نے مذموم اقدامات سے پاکستان کی پیش رفت پر شکوک و شبہات پیدا کرنے میں کوئی کسر نہیں چھوڑی ہے‘۔

اس میں کہا گیا کہ پاکستان ایف اے ٹی ایف اور بین الاقوامی برادری کے نوٹس میں حالیہ ’اعتراف‘ لا کر عالمی برادری کے سامنے بھارت کے کردار کو اجاگر کرتا رہے گا۔

مذکورہ بیان میں مزید کہا گیا کہ پاکستان اس معاملے میں ’مناسب کارروائی‘ کے لیے مالیاتی نگران ادارے سے رجوع کرنے پر بھی غور کر رہا ہے۔

بیان میں ’بھارتی حکومت کے حالیہ اعتراف کے بعد بھارت کے مشترکہ گروپ کی شریک صدر کے طور پر ایف اے ٹی ایف میں پاکستان کا جائزہ لینے پر سوالات کھڑے کردیے ہیں جس پر ہم ایف اے ٹی ایف کو غور کرنے کی درخواست کرتے ہیں‘۔

ترجمان دفتر خارجہ نے کہا کہ انسداد منی لانڈرنگ/دہشت گردی کی مالی اعانت (اے ایم ایل / سی ایف ٹی) کا مقابلہ کرنے میں ’پاکستان کی پیش رفت‘ کا اعتراف ایف اے ٹی ایف نے کیا ہے۔

ان کا کہنا تھا کہ ’ہم اپنے بین الاقوامی شراکت داروں کے تعاون سے اس رفتار کو برقرار رکھنے کے لیے پرعزم ہیں، بھارت کا پاکستان پر دباؤ ڈالنے کا خیال ہمیشہ ہی ادھورا رہا ہے‘۔

ترجمان دفتر خارجہ کے بیان میں کہا گیا کہ ’اختیارات کے ذریعے ایف اے ٹی ایف کے عمل کو سیاسی بنانے سمیت خلفشار کے باوجود پاکستان اپنے لیے بین الاقوامی معیار پر اپنے اے ایم ایل/سی ایف ٹی کے نظام کو لانے اور اپنی بین الاقوامی ذمہ داریوں اور وعدوں کو پورا کرنے کے اپنے عہد کی توثیق کرتا ہے‘۔

مودی حکومت نے پاکستان کے گرے لسٹ میں رہنے کو ’یقینی بنایا‘، ایس جے شنکر
بھارتی اخبار ہندوستان ٹائمز کی رپورٹ کے مطابق ایک روز قبل بھارت کے وزیر برائے امور خارجہ ایس جے شنکر نے کہا تھا کہ نریندر مودی کی سربراہی میں بھارتیہ جنتا پارٹی (بی جے پی) کی حکومت نے اس بات کو یقینی بنایا ہے کہ پاکستان فنانشل ایکشن ٹاسک فورس (ایف اے ٹی ایف) کی ‘گرے لسٹ’ میں شامل رہے۔

ایس جے شنکر نے بی جے پی رہنماؤں کے لیے خارجہ پالیسی سے متعلق ورچوئل ٹریننگ پروگرام سے خطاب کرتے ہوئے کہا تھا کہ ’ہماری وجہ سے پاکستان ایف اے ٹی ایف کی نظروں میں ہے اور اسے گرے لسٹ میں رکھا گیا ہے‘۔

انہوں نے مزید کہا تھا کہ ’ہم پاکستان پر دباؤ ڈالنے میں کامیاب رہے ہیں اور حقیقت یہ ہے کہ پاکستان کے طرز عمل میں تبدیلی آئی ہے جس کی وجہ بھارت کی جانب سے مختلف اقدامات کے ذریعے دباؤ ڈالنا ہے‘۔

رپورٹ کے مطابق بھارتی وزیر نے اجلاس کے دوران لشکر طیبہ اور جیش محمد جیسی کالعدم تنظیموں پر پابندیوں کا بھی ’اقوام متحدہ کے توسط سے‘ بھارتی حکومت کی کوششوں کا سہرا لیا۔

واضح رہے کہ پاکستان جون 2018 سے ایف اے ٹی ایف کی گرے لسٹ میں موجود ہے۔

حال ہی میں 25 جون کو فنانشل ایکشن ٹاسک فورس نے اعلان کیا تھا کہ پاکستان کا نام بدستور گرے لسٹ میں رہے گا تاہم ملک نے 27 میں سے 26 نکات پر بہتری دکھائی ہے۔

ایف اے ٹی ایف کے صدر مارکوس پلیئر نے اجلاس کے بعد لائیو پریس کانفرنس میں کہا کہ اجلاس میں کئی معاملات پر تبادلہ خیال کیا گیا۔

ان کا کہنا تھا کہ پاکستان بدستور نگرانی میں رہے گا، پاکستانی حکومت نے انسداد دہشت گردی فنانسگ نظام کو مضبوط اور مؤثر بنانے کے لیے بہتر کام کیا ہے۔

صدر ایف اے ٹی ایف نے کہا کہ پاکستان نے 27 میں سے 26 نکات پر کام کیا ہے تاہم ایک پوائنٹ پر کام کرنا ضروری ہے۔

ان کا کہنا تھا کہ فنانشل ٹیرارزم کے منصوبے پر کارروائی کی ضرورت ہے، جس میں اقوام متحدہ کی دہشت گردوں کی فہرست میں شامل رہنماؤں اور کمانڈرز کے خلاف تفتیش اور سزائیں دلانا شامل ہے۔

ان کا کہنا تھا کہ 2019 میں ایف اے ٹی ایف کے ریجنل پارٹنر اے پی جی اے نے پاکستان کے انسداد منی لانڈرنگ اور انسداد دہشت گردی فنانسگ سسٹم کے حوالے سے اقدامات کی نشان دہی کی تھی لیکن اس کے بعد بہتری آئی ہے اور کیسز بنانے کے لیے فنانشل انٹیلی جنس کا استعمال کیا گیا۔

انہوں نے کہا کہ پاکستان تاحال کئی شعبوں میں ایف اے ٹی ایف کے عالمی سطح کے معیارات پر مؤثر عمل درآمد میں ناکام رہا ہے، اس کا مطلب ہے کہ منی لانڈرنگ کے خدشات اب بھی بہت زیادہ ہیں، جو کرپشن اور منظم جرائم کے خطرات ہیں، اسی لیے ایف اے ٹی ایف پاکستانی حکومت کے ساتھ ان شعبوں میں کام کررہا ہے جہاں بہتری کی ضرورت ہے۔

صدر ایف اے ٹی ایف نے کہا کہ میں پاکستانی حکومت کا شکریہ ادا کرنا چاہتا ہوں کہ اس عمل میں وہ پرعزم ہیں، پاکستان نے اے پی جی کی جانب سے نشان دہی کے بعد واضح بہتری دکھائی ہے اور حکام ضروری تبدیلیوں پر کام کر رہے ہیں اور نیا ایکشن پلان دیا گیا ہے۔

مارکوس پلیئر نے کہا کہ آخری نکتے پر اولین ایکشن پلان کے مطابق کام ہوا تھا لیکن نام فہرست سے نہیں نکالا گیا کیونکہ اس کے برابر ایک اور ایکشن پلان بھی دیا گیا تھا۔

ایک سوال پر انہوں نے کہا کہ پاکستان جانتا ہے کہ اس سے کیا توقعات ہیں اور وہ ان اہداف کو پورا کرے گا، ہم ان کے ساتھ تعاون کریں گے اور نگرانی کریں گے، 4 ماہ بعد دوبارہ جائزہ لیں گے۔

یاد رہے کہ پاکستان نے فروری 2021 میں اپنی تیسری پیش رفت رپورٹ ایف اے ٹی ایف میں پیش کی تھی جس کا جائزہ لیا گیا تھا اور پاکستان کو بدستور گرے لسٹ میں رکھا گیا تھا۔

واضح رہے کہ رواں ماہ کے اوائل میں منی لانڈرنگ سے متعلق ایشیا پیسیفک گروپ (اے پی جی) نے منی لانڈرنگ اور دہشت گردی کی مالی اعانت کے خلاف ایف اے ٹی ایف کی 40 تکنیکی سفارشات میں سے 21 میں پاکستان کی درجہ بندی بہتر ظاہر کردی تھی۔

قبل ازیں گزشتہ سال اکتوبر میں ہونے والے اجلاس میں واچ ڈاگ نے فروری 2021 میں جائزے تک پاکستان کو ’بہتر نگرانی کے دائرہ اختیار‘ کی فہرست میں شامل رکھنے کا فیصلہ کیا تھا جب سفارشات کے ساتھ اس کی تعمیل کی حیثیت کا دوبارہ جائزہ لیا جائے گا’۔

آخری جائزے میں کہا گیا تھا کہ پاکستان نے اقوام متحدہ کی سلامتی کونسل کی فہرست میں موجود دہشت گرد گروہوں سے وابستہ تنظیموں کے خلاف مناسب کارروائی نہیں کی تھی۔

اس میں یہ بھی کہا گیا تھا کہ پاکستان نے منشیات اور قیمتی پتھروں کی اسمگلنگ کے ذریعے دہشت گردی کی مالی اعانت سے نمٹنے کے لیے بہت کم کام کیا ہے۔

اسلام آباد: وزیر خارجہ شاہ محمود قریشی نے افغان حکومت کی جانب سے اپنے سفیر کو اچانک واپس بلالینے پر تشویش کا اظہار کیا ہے۔

ایک بیان میں شاہ محمود قریشی نے کہا کہ افغانستان کی جانب سے اپنا سفیر اچانک بلالینے پر تشویش ہوئی،افغانستان کو اپنے فیصلے پر نظر ثانی کرنی چاہیے، افغان سفیر یہاں رہیں اور تحقیقات میں تعاون کریں۔

وزیر خارجہ شاہ کا کہنا تھا کہ امن کے پارٹنر بننا چاہتے ہیں، بھارت افغانستان کے امن میں مسلسل رکاوٹ ڈال رہا ہے۔

انہوں نے مزید کہا کہ افغانستان ایک طرف پاکستان پر الزام لگارہا ہے اور دوسری طرف تعاون مانگ رہا ہے،پاکستان نے پہلے ہی کہہ دیا تھا کہ بھارت ایف اے ٹی ایف کو سیاسی مقاصد کے لیے استعمال کررہا ہے۔

خیال رہے کہ گزشتہ روز افغان حکومت نے پاکستان میں تعینات اپنے سفیر نجیب اللہ علی خیل سمیت سینئر سفارتی عملے کو واپس بلالیا تھا۔

کراچی میں کورونا کے ڈیلٹا ویرینٹ کے باعث بڑے سرکاری اور غیر سرکاری اسپتالوں میں جگہ ختم ہونے لگی جس کے باعث طبی ماہرین نے شہر میں ہیلتھ ایمرجنسی کا مطالبہ کردیا۔

حکام کا کہنا ہےکہ کراچی کے سرکاری اسپتالوں میں مریض بچوں کی تعداد بڑھتی جا رہی ہے، نیپا کا انفیکشنز ڈیزز اسپتال مکمل طور پر بھر چکا ہے جب کہ ایکسپو سینٹر کراچی میں مزید مریضوں کے داخلے کی گنجائش نہیں، آغا خان اسپتال نے کورونا کے مزید مریضوں کو لینے سے منع کردیا ہے۔

حکام کے مطابق سول اسپتال کراچی میں 48 بیڈ کے سرجیکل وارڈ کو کورونا وارڈ میں بدلا جارہا ہے اور جناح اسپتال کراچی کے چیسٹ وارڈ کو بھی کورونا وارڈ میں بدلنے کی تیاریاں شروع کی جاچکی ہیں جب کہ لیاری جنرل اسپتال میں ڈیلٹا وائرس سے متاثر بچوں کی آمد شروع ہوگئی ہے جس کے باعث اسپتال کے کووڈ وارڈ میں بیڈز بڑھائے جارہے ہیں۔

حکام کا بتانا ہےکہ کراچی میں ڈیلٹا ویرینٹ کی شرح 92 فیصد سے بڑھ چکی ہے جس سے ڈاکٹروں اور طبی عملے میں بھی کورونا وائرس انفیکشن کی شرح بڑھ رہی ہے، ڈیلٹا ویرینٹ کے باعث بڑے سرکاری اور غیر سرکاری اسپتالوں میں جگہ ختم ہونے لگی ہے۔

انڈس اسپتال کے پروفیسر عبدالباری کا کہنا ہےکہ کورونا وائرس کی صورتحال بےقابو ہو چکی ہے، اسپتال کا کورونا وارڈ اور ایمرجنسی مریضوں سے بھرگئے ہیں، عوام سے ایس او پیز پر عمل کرنے اور ویکسین لگوانے کی درخواست ہے۔

لاہور: جہانگیرترین نے حکومتی وعدوں کا جائزہ لینے کے لئے عید کے بعد اپنے گروپ کا اہم اجلاس بلایا لیا۔

ذرائع جہانگیر ترین گروپ نے بتایا ہے کہ حکومتی وعدوں کا جائزہ لینے کے لئے جہانگیرترین نے عید کے بعد اپنے گروپ کا اہم اجلاس بلایا لیا ہے۔

ذرائع کا کہنا ہے کہ اجلاس 2 اگست کو نتھیا گلی میں بلایا گیا ہے، جس میں ترین گروپ کی دو اور تین اگست کو سیاسی لائحہ عمل کے حوالے سے مشاورت ہو گی، بجٹ سے پہلے ترین گروپ سے کیے گئے وعدوں پر عمدرآمد کا جائزہ لیا جائے گا، جب کہ ترین گروپ کے رکن نذیر چوہان کیخلاف مقدمے پر بھی مشاورت کی جائے گی۔

لاہور: وزیراعلیٰ پنجاب کی معاون خصوصی فردوس عاشق اعوان نے عہدے سے مستعفی ہونے پر غور شروع کردیا۔

ذرائع کے مطابق فردوس عاشق اعوان وزیراعلیٰ پنجاب کی معاون خصوصی برائے اطلاعات کے عہدے سے مستعفی ہونے پر غور کررہی ہیں اور اس سلسلے میں انہوں نے وزیراعظم عمران خان سے بھی گفتگو کی ہے۔

ذرائع کا کہناہے کہ وزیراعظم کے جواب پرفردوس عاشق اعوان کے استعفے سے متعلق کوئی حتمی فیصلہ کیا جائے گا۔

بالی وڈ اداکارہ کاجول کی بہن و اداکارہ تنیشا مکھرجی نے 43 سال عمر ہونے کے باوجود شادی نہ کرنے کی وجہ بتادی۔

بھارتی ٹی وی کے شو میں گفتگو کرتے ہوئے تنیشا کا کہنا تھا کہ میری خوش قسمتی ہے کہ مجھے اچھا خاندان ملا اور میری خوشگوار زندگی میں گھر والوں کا اہم کردار ہے۔

انہوں نے بتایا کہ گھر والوں نے مجھ پر شادی کیلئے کبھی دباؤ نہیں ڈالا جس پر خوشی محسوس ہوتی ہے۔

شادی کے حوالے سے تنیشا نے مزید بتایا کہ 43 سالہ ہونے کے باوجود فی الحال شادی کا کوئی ارادہ نہیں۔

اداکارہ کا کہنا تھا کہ والدہ اور دادی ہمیشہ تاکید کرتی ہیں کہ زندگی بہت مختصر ہوتی ہے اس لیے اپنی زندگی کا ہر لمحہ خوشی سے گزارنا چاہیے۔

خیال رہے کہ بھارتی رئیلٹی شو ’بگ باس‘ کے ساتویں سیزن میں تنیشا مکھرجی اور ارمان کوہلی نے ایک ساتھ شرکت کی تھی اور دونوں کے درمیان قربتیں بھی بڑھ گئیں تھیں تاہم یہ دوستی پروان نہیں چڑھ سکی تھی۔

واضح رہے کہ اداکارہ تنیشا مکھرجی نے کیریئر کا آغاز 2003 میں کیا اور وہ متعدد فلموں میں اداکاری کے جوہر دکھا چکی ہیں اور کئی ٹی وی شوز میں بھی نظر آچکی ہیں۔

بولی وڈ اداکارہ کرشمہ کپور نے انکشاف کیا ہے کہ کئی اداکاراؤں نے مادھوری ڈکشت کی وجہ سے ’دل تو پاگل ہے’ میں کام کرنے سے انکار کردیا تھا۔

کرشمہ کپور نے مزید بتایا کہ ان کی والدہ، سابق اداکارہ ببیتہ کپور نے یہ کردار ادا کرنے کے لیے ان کی حوصلہ افزائی کی تھی۔

بولی وڈ اداکارہ کرشمہ آج ریئلٹی شو انڈین آئیڈل 12 میں بطور مہمانِ خصوصی شریک ہوں گی اور اس قسط میں شو کے ٹاپ 6 اُمیدوار کرشمہ کپور کی فلموں کے گانے گائیں گے۔

ہندوستان ٹائمز کی رپورٹ میں ریئلٹی شو انڈین آئیڈل کا ایک پرومو شیئر کیا گیا ہے جس میں کرشمہ کپور فلم ’دل تو پاگل ہے’ سے متعلق گفتگو کرتی ہوئی نظر آرہی ہیں۔

کرشمہ کپور نے بتایا کہ ہر ہیروئن نے فلم ’دل تو پاگل ہے‘ میں کام کرنے سے منع کر دیا تھا کیونکہ یہ ایک ڈانس فلم تھی اور اس میں مادھوری ڈکشت کے مدمقابل ڈانس کرنا تھا تو سب نے یہی کہہ کر منع کیا کہ ’نہیں، ہم مادھوری ڈکشت جی کے ساتھ کیسے ڈانس کرسکتے ہیں‘۔

بولی وڈ اداکارہ نے بتایا کہ ’جب مجھے اس کردار کی پیشکش ہوئی تو ابتدائی طور پر میں نے بھی انکار کردیا تھا کیونکہ یہ ایک ڈانس فلم تھی اور اس میں مادھوری کے ساتھ ڈانس کمپیٹیشن تھا تو میں نے کہا تھا یہ تو نہیں ہوسکتا‘۔

انہوں نے کہا کہ ’پھر آخرکار یش چوپڑا اور ادیتیا چوپڑا نے مجھے فلم کی کہانی بتائی اور میری والدہ نے بھی بہت حوصلہ افزائی کی تو میں نے یہ رول لے لیا تھا‘۔

کرشمہ کپور نے کہا کہ ’میری والدہ نے کہا تھا کہ ’تمہیں یہ چیلنج لینا چاہیے، تم مادھوری ڈکشت کی بڑی مداح ہو، تمہیں یہ رول لازمی کرنا چاہیے، تم محنت کرو کامیابی ملے گی’۔

خیال رہے کہ فلم ’دل تو پاگل ہے’، 1997 میں ریلیز ہوئی تھی جس میں شاہ رخ خان، مادھوری ڈکشت اور کرشمہ کپور نے مرکزی کردار ادا کیے تھے۔

یہ فلم سپر ہٹ ہوئی تھی اور ’دل تو پاگل ہے’ نے بعدازاں مختلف کیٹیگریز میں کئی ایوارڈز بھی حاصل کیے تھے۔

رواں برس 21 جون کو کرشمہ کپور کو بولی وڈ فلم انڈسٹری میں 30 برس مکمل ہوئے ہیں، جب ان کی پہلی فلم ’پریم قیدی‘ ریلیز ہوئی تھی۔

رواں ماہ کے آغاز میں کرشمہ کپور نے ایک ویڈیو شیئر کی تھی جو 90 کی دہائی کی ان کی مقبول فلموں کے مجموعے پر مشتمل تھی۔

کرشمہ کپور کو گزشتہ برس ڈیبیو ویب سیریز ’مینٹل ہوڈ‘ میں دیکھا گیا تھا۔