All posts by News Editor

بولی وڈ اداکارہ سارہ علی خان نے ورلڈ ایموجی ڈے پر منفرد چیلنج قبول کرتے ہوئے ایک ویڈیو سوشل میڈیا پر شیئر کی ہے جسے خوب پسند کیا جارہا ہے۔

انسٹاگرام اکاؤنٹ پر شیئر کی گئی اس دلچسپ ویڈیو میں سارہ علی خان ’30 سیکنڈز میں 15 تاثرات’ کا اظہار کرتی ہوئی نظر آئیں۔

ویڈیو میں سارہ علی خان گزشتہ روز ایموجی ڈے کے حوالے سے چیلنج قبول کرتے ہوئے نظر آرہی ہیں۔

انسٹاگرام پر شیئر کی گئی اس ویڈیو میں محض 30 سیکنڈز کے دورانیے میں 15 ایموجیز جیسے تاثرات اپناتی ہوئی نظر آئیں۔

سارہ علی خان کے مداحوں نے اس ویڈیو کو بہت زیادہ پسند کیا اور کمنٹس میں کسی نے انہیں ’کوئین’ تو کسی نے ’کیوٹ‘ کہا۔

خیال رہے کہ سارہ علی خان اپنے سوشل میڈیا اکاؤنٹس پر مختلف مزاحیہ تصاویر اور ویڈیوز شیئر کرتی رہتی ہیں۔

چند روز قبل سوشل میڈیا پر وائرل ہونے والی ایک ویڈیو شیئر کی گئی تھی جس میں وہ اپنی ایک دوست، جس کا نام بھی سارہ ہی تھا، کو گود میں اٹھائے ہوئے دکھائی دی تھیں۔

یہ ویڈیو سارہ علی خان نے انسٹاگرام اسٹوریز کے طور پر شیئر کی تھی اور بعدازاں پاپا رازی اکاؤنٹ نے بھی اس ویڈیو کو شیئر کیا تھا۔

اس سے قبل انہوں نے سوشل میڈیا پر آسام کے کامکھیا مندر کی تصاویر شیئر کی تھیں۔

خیال رہے کہ سارہ علی خان کو آخری مرتبہ گزشتہ برس فلم ’قلی نمبر ون‘ میں ورون دھون کے مقابل اداکاری کرتے دیکھا گیا تھا۔

قلی نمبر ون 1990 کی دہائی کی سپر ہٹ فلم کا ریمیک تھی جس میں گووندا اور کرشمہ کپور نے اداکاری کی تھی تاہم اس کا ریمیک کامیاب نہیں ہوسکا۔

کراچی: معین اور اعظم خان پاکستان کی انٹرنیشنل کرکٹ میں نمائندگی کرنے والے باپ بیٹے کی پانچویں جوڑی بن گئے۔

سابق وکٹ کیپر معین خان کے صاحبزادے نے انگلینڈ کے خلاف جمعے کو پہلا ٹی 20 انٹرنیشنل میچ کھیلا، ان سے قبل نذر محمد اور ان کے بیٹے مدثر نذر، حنیف محمد اور بیٹے شعیب محمد، ماجد خان اوربیٹے بازید خان جبکہ عبدالقادر اور بیٹے عثمان قادر کو پاکستان کی نمائندگی کا اعزاز حاصل ہوچکا ہے۔

کراچی: اظہر علی کی ٹویٹ کو شعیب اختر پر طنز قرار دیا جانے لگا۔

انگلینڈ کے خلاف ون ڈے سیریز میں مایوس کن کارکردگی پر سابق پیسر نے کہا تھا کہ پاکستان ٹیم میں اب کوئی اسٹار نہیں ہے، اس لیے شائقین میچ دیکھنے نہیں آتے۔

جمعے کو انگلینڈ سے پہلے ٹی 20 میں گرین شرٹس کی فتح پر اظہر علی نے جوش و خروش کا مظاہرہ کرنے والے کراؤڈ کی تصویر شیئر کرتے ہوئے لکھاکہ ’’یہ فینز کس کو دیکھنے آئے تھے‘‘ ان کے اس ٹویٹ کو شائقین شعیب اختر کے ٹویٹ پر طنز قرار دے رہے ہیں۔

ٹوکیو اولمپکس 2020 شروع ہونے سے چند دن قبل مزید 3 ایتھلیٹس عالمی وبا کورونا کا شکار ہو گئے۔

غیر ملکی خبر رساں ایجنسی کے مطابق منتظمین نے اولمپک ولیج میں مزید 3 کورونا کیسز کی تصدیق کی ہے۔

خبر رساں ادارے کا بتانا ہے کہ میڈیا کنٹریکٹر اور دیگر اسٹاف سمیت اولمپکس سے متعلق افراد میں 10 کورونا مثبت کیسز رپورٹ ہوئے ہیں۔

جنوبی کوریا کے انٹرنیشنل اولمپک کمیٹی کے رکن ریو سیونگ من کا بھی ٹوکیو پہنچنے پر ٹیسٹ مثبت آیا ہے، بتایا جارہا ہے کہ ریو سیونگ من نے ویکسی نیشن بھی کروائی ہوئی تھی۔

یاد رہے کہ پچھلے سال کورونا وائرس کی وجہ سے ہی ٹوکیو اولمپکس کو ایک سال کے لیے ملتوی کر دیا گیا تھا۔

واضح رہے ٹوکیو اولمپکس کا آغاز تماشائیوں کے بغیر 23 جولائی سے ہوگا جس میں پاکستان کے بھی 10 کھلاڑی حصہ لیں گے۔

سیکرٹری محکمہ پرائمری اینڈ سیکنڈری ہیلتھ، نےڈیلٹا وائرس اور عیدالاضحٰی کے پیشِ نظر این سی او سی کے نوٹیفیکشن کے مطابق سپیشل ایس او پیز جاری کر د یئے۔

تفصیلات کےمطابق سیکرٹری پرائمری اینڈ سکینڈری ہیلتھ کیئر سارہ اسلم کا کہناتھا کہ ڈیلٹا وائرس اور عیدالاضحٰی کے پیشِ نظر این سی او سی کے نوٹی فکیشن کے مطابق سپیشل ایس او پیز جاری کر د یئے، آگاہی ویک برائے کورونا ایس او پیز اور ویکسی نیشن” کا دورانیہ 25جولائی تک بڑھا دیا گیا،صوبہ بھر کے تمام ڈپٹی کمشنرز کو مراسلہ جاری کردیاگیا،این سی او سی کے نوٹی فکیشن کے مطابق مختلف سیکٹرز کے لیے سپیشل ایس او پیز جاری کردیں گئیں ہیں۔

سیکرٹری سارہ اسلم کا کہناتھا کہ سیاحتی مراکز کے لئےسپیشل ایس او پیز جاری کئے گئےہیں,صرف ویکسی نیٹد افراد کو بین الصوبائی سیاحتی مقامات پر جانے کی اجازت ہو گی، ویکسی نیشن سرٹیفکیٹ کے بغیر ہوٹلز میں بوکنگ نہیں کی جا سکے گی،سیاحتی مقامات کے داخلی راستوں پر سیاحوں کی خصوصی تصدیق کی جائے،ہوٹلز میں ڈائننگ کے لئے 50 ٪ گنجائش کےاصول پر عمل کیا جائے گا۔

ٹرانسپورٹ سیکٹر کے لئےسپیشل ایس او پیزجاری کئے گئے ہیں,تما م اقسام کی ٹرانسپورٹ سروسز صرف 70٪ گنجائش کے ساتھ سفر کرنے کی پابند ہوں گی،شاپنگ مالز اورکاروباری مراکز کے لئےسپیشل ایس او پیزجاری کئے گئے ہیں,مارکیٹس اور شاپنگ مالز تفویض کردہ اوقات میں ہی کام کریں گے،مارکیٹس اور کاروباری مراکز میں رش اور ہجوم کسی صورت نہ ہونے دیں ۔

سیکرٹری سارہ اسلم کا کہناتھا کہ صرف فارمیسیز، میڈیکل فیسیلیٹز،پٹرول پمپ، ویکسینیشن سینٹرز،ڈیری شاپس، تندور، ٹیک اویز اور ڈلیوری سروسز کو 24/7کام کرنے کی اجازت ہو گی، شادی ہالز، جمز ، ہوٹلز کے لئےسپیشل ایس او پیز جاری کئے گئے ہیں,ان ڈور شادی ہالز میں 200 جبکہ آوٹ ڈور شادی ہالز میں 400 افراد کی گنجائش کے ساتھ شادی کی تقریب کی اجازت ہو گی،شادی کی تقریبات میں شامل افراد کا مکمل طور پر ویکسی نیٹد ہونا یقینی بنائیں۔

شادی ہال کےسٹاف اور مہمانوں کی رینڈم چیکنگ بھی کی جائےگی، انڈور ڈائننگ ا ور دیگر انڈور سرگرمیوں میں صرف و یکسی نیٹد افراد ہی حصہ لے سکتے ہیں،تفریحی مقامات، سوئمنگ پولز کے لئےسپیشل ایس او پیز جاری کئے ہیں,صوبائی حکومت کی ہدایات کے مطابق تمام تفریحی پارکس اور سوئمنگ پولز 50 ٪ گنجائش کے ساتھ کام کریں گے، تمام شہری گھر سے نکلتے وقت اور خصوصاً رش والی جگہوں پر ماسک پہننے کو یقینی بنائیں گے۔

عیدالاضحیٰ کے قریب آنے کے باوجود لکھوڈیہر مویشی منڈی میں جانوروں کی قیمتیں آسمان سے باتیں کررہی ہیں، رواں سال قیمت میں بیس سے تیس فیصد تک اضافہ دیکھنے میں آ رہا ہے۔

سنت ابراہیمی کی ادائیگی کیلئے ہر صاحبِ حیثیت شہری کی خواہش ہوتی ہے کہ خوبصورت جانور کو اللہ کی راہ میں قربان کرے، مویشی منڈی لکھوڈیہر میں خوبصورت جانور تو موجود ہیں لیکن قیمت عام شہری کی قوت خرید میں نہیں رہی۔ بکرے کی قیمت میں گزشتہ سال کی نسبت بیس ہزار، دنبہ پندرہ ہزار جبکہ بیل کی قیمت میں اسی ہزار سے ایک لاکھ روپے تک اضافہ ہو ا ہے، جس کی وجہ سے گاہک خالی ہاتھ لوٹ رہے ہیں۔

دوسری جانب بیوپاری مہنگائی کا رونا روتے دکھائی دیتے ہیں۔ ان کا کہنا ہے کہ جانوروں کی خوراک کی قیمتیں بڑھنے کی وجہ سے ریٹ بڑھ گیا اور یہ گاہک کی سمجھ میں نہیں آ رہا۔ چھٹی کے روز بارش سے موسم خوشگوار تو ہوا لیکن یہ موسم بھی گاہکوں کو مویشی منڈی کی طرف راغب نہ کر سکا۔

لکھو ڈیر مویشی منڈی میں گاہک نہ ہونے کے برابر ہے، بیوپاری گاہک کا انتظار کر رہے ہیں تو گاہک شائد اس بات کے منتظر ہیں کہ عید کے مزید قریب آنے سے قیمتوں میں کمی آ جائے گی۔

لاہور کے باسیوں کیلئے خطرے کی گھنٹی بج گئی، تیزی سے پھیلنے والا بھارتی وائرس ” ڈیلٹا” لاہور کی فضاؤ ں میں پھیل گیا، جین سیکوئنسنگ میں لاہور میں 80 فیصد انڈین وائرس کی تصدیق ہوئی۔

وائرولوجسٹ پروفیسر وحید الزمان نے دعویٰ کیا ہے کہ بھارتی وائرس کی بڑے پیمانے پر موجود گی کا انکشاف این جی ایس میتھڈ پر و سیکوئنسنگ میں ہوا، چغتائی لیب نے این جی ایس میتھڈ پر وائرس کی سیکوئنسنگ کی، انڈین کورونا وائرس ڈیلٹا کی موجودگی نے خطرے کی سنگینی بڑھا دی، انڈین وائرس ڈیلٹا ملک کے دیگر شہروں میں بھی پایا گیا۔

پروفیسر وحید الزمان نے انکشاف کیا کہ اس وقت لاہور پر کورونا وائرس کی تین اقسام حملہ آور ہیں، لاہور میں80 فیصد انڈین ، 20 فیصد کورونا کی برٹش اور ووہان قسم بھی موجود ہے۔

دوسری جانب محکمہ صحت نے بھی 56 شہریوں میں ڈیلٹا وائرس کی تصدیق کردی ۔ ترجمان محکمہ پرائمری اینڈ سیکنڈری ہیلتھ کیئر پنجاب کا کہنا ہے کہ شہر میں ڈیلٹا وائرس کی روک تھام کے لیے تمام ممکنہ اقدامات کیے جا رہے ہیں، ڈیلٹا وائرس کے پھیلاؤ کی رفتار دوسرے وائرس سے 50 فیصد زیادہ تیز ہے، تاہم کورونا ایس او پیز پر عمل درآمد سے اس خطرناک وائرس سے بچا جا سکتا ہے۔

واضح رہےکہ کورونا وائرس کے حملوں میں پھر تیزی آگئی، گزشتہ 24 گھنٹوں کے دوران صوبائی دارالحکومت لاہور میں172 کیسز رپورٹ ہوئے جبکہ ایک شخص زندگی کی بازی ہار گیا، شہر میں مثبت کیسزکی شرح 2.7ریکارڈ کی گئی۔

ساندہ میں ڈیڑھ ماہ تک عورت کومبینہ زیادتی کا نشانہ بنانے والے جعلی پیر گرفتار کرلیا گیا۔

متاثرہ خاتون کی شادی ضلع شیخوپورہ میں ہوئی،متاثرہ خاتون ساندہ میں جعلی پیر کا نشانہ بنی،متاثرہ خاتون گھریلو ناچاکی پرجعلی پیرنوید کےپاس تعویذ کرانے آئی،ملزم ورغلاکرعورت کو ڈیڑھ ماہ تک زیادتی کا نشانہ بناتارہا،ایس ایچ او ساندہ شیخ خالد فاروق کا کہناتھا کہ عاصمہ بی بی کے گھر والے اپنے تئیں تلاش کرتے رہے نہ ملنے پر ساندہ پولیس سے رابطہ کیا ۔

ایس پی اویس شفیق کا کہناتھا کہ ساندہ پولیس نے کارروائی کرکے جعلی پیر کوگرفتار کر لیا،ملزم سے مزید تفتیش جاری کہ مزید کتنی عورتوں کو داغدار کر چکا،ملزم کے خلاف مقدمہ درج کر لیا ہے ۔

واضح رہے کہ آئے روز جعلی عالم، پیروں کے ہاتھوں خواتین، لڑکیوں کی تذلیل کی جارہی ہے،کالا جادو, شوہر کا ناراض، اولاد کا نہ ہونا اور جنات کا سایہ جیسےمسائل نے خواتین کی زندگی اجیرن کردی ہے۔ پھر خواتین ان مسائل سے چھٹکارا حاصل کرنے کیلئےجعلی عالموں سے رجوع کرتی ہیں اور ایسے لوگوں کی باتوں میں آکر اپنا خوشحال گھر اجاڑ لیتی ہیں۔

ضلعی انتظامیہ اور ایم ایس سروسز ہسپتال کی ہسپتال میں غیر قانونی رہائش پذیر ڈاکٹرز کے خلاف کارروائی، ایم ایس سروسز ہسپتال پر ڈاکٹر حامد بٹ کا حملہ، ڈاکٹر خلاف ایف آئی آر بھی درج کرلی گئی۔

تفصیلات کے مطابق ضلعی انتظامیہ اور ایم ایس سروسز ہسپتال نےغیرقانونی رہائش پذیر ڈاکٹرز کیخلاف کارروائی کی۔ کارروائی کے دوران ایم ایس سروسز ہسپتال پر ڈاکٹر حامد بٹ نے حملہ کردیا، حامد بٹ کو انتظامیہ 7 ماہ پہلے ہی نوکری سے برخاست کرچکی ہے۔ عدالت نے اے سی کو گھرکا قبضہ چھڑانےکاحکم دیا تھا۔

عدالت نے گھر اسسٹنٹ پروفیسر لقمان علی باجوہ کو الاٹ کرنے کا حکم دیا تھا۔ قبضہ چھڑوانے کےدوران ڈاکٹرحامد بٹ نے ایم ایس پرحملہ کردیا۔ ڈاکٹرحامد بٹ کےحملے میں ایم ایس سروسز محفوظ رہے جبکہ انتظامیہ نے ڈاکٹرحامد بٹ کے خلاف ایف آئی آرکا اندراج کروا دیا ہے۔

کراچی: اداکارہ عائشہ عمر ماہرہ خان کو بڑی عمر کا طعنہ دینے والی خاتون پر بھڑک اٹھیں اور انہیں کھری کھری سنادی۔

اداکارہ ماہرہ خان بہت جلد پاکستان ٹی وی کے باصلاحیت اداکار زاہد احمد اور شہریار منور کے ساتھ ویب سیریز میں نظر آئیں گی۔ مختلف سوشل میڈیا پلیٹ فارم پر ان تینوں کی ایک تصویر بھی وائرل ہورہی ہے جو شاید ویب سیریز کے سیٹ کی ہی ہے۔ تصویر میں ماہرہ خان بغیر میک اپ کے نظر آرہی ہیں۔

سوشل میڈیا پر اس تصویر کو صارفین کی جانب سے تنقید کانشانہ بنایا جارہا ہے۔ لوگ ماہرہ خان کی بغیر میک اپ تصویر پر تبصرے کرتے ہوئے کہہ رہے ہیں کہ یہ ماہرہ خان کا بغیر میک اپ اصلی روپ ہے۔ بہت سارے لوگوں نے ماہرہ خان کو بڑھتی عمر کا طعنہ دیا۔

ایسے ہی ایک تبصرے پر جس میں الیشبا نامی خاتون نے ماہرہ خان کو ’’بوڑھی‘‘ کہا تھا۔ اداکارہ عائشہ عمر نےساتھی اداکارہ ماہرہ کے لیے آواز اٹھائی ہے۔ عائشہ عمر نے خاتون کوٹیگ کرتے ہوئے انہیں جواب دیا کیا ہوا ماہرہ خان کو؟ ماہرہ کا ظاہر اور باطن بہت خوبصورت ہے۔ ہم سب کو ایک دن بوڑھا اورعقلمند ہونا ہے۔ ہر جاندار انسان کو زندگی کے قدرتی عمل سے گزرتے ہوئے بوڑھا ہونا ہے۔ کیا ہم لوگوں کو ان کے لباس، ظاہری شخصیت، رنگ اور عمر کا احساس دلاتے ہوئے انہیں شرمندہ کرنا چھوڑ سکتے ہیں؟ لوگوں کے ساتھ رحم دلی کے ساتھ پیش آئیں۔

واضح رہے مختلف سوشل میڈیا پلیٹ فارم پر کہا جارہا ہے کہ ماہرہ خان اور زاہد احمد کی ویب سیریز کو اداکار شہریار منور ڈائریکٹ کررہے ہیں۔ اس طرح شہریار منور اس ویب سیریز کے ذریعے ہدایت کاری کی دنیا میں قدم رکھ رہے ہیں۔ یہ ویب سیریز آن لائن پلیٹ فارم سی پرائم پر دکھائی جائے گی۔ تاہم ابھی تک اس ویب سیریز کا نام منظر عام پر نہیں آیا ہے۔