All posts by News Editor

راولپنڈی: سول ایویشن اتھارٹی (سی اے اے) نے نجی ایئرلائن ‘الویر ایئرویز’ کو سیاحت کے فروغ اور علاقائی ہم آہنگی (ٹی پی آر آئی) لائسنس جاری کرنے کی منظوری دے دی۔

الویر ایئرویز کو 5 سال کی مدت کے لیے یہ لائسنس قومی ایوی ایشن پالیسی 2019 کے تحت جاری کیا گیا ہے جو جون 2026 تک کارآمد ہوگا۔

رپورٹ کے مطابق ترجمان سول ایوی ایشن اتھارٹی سعد بن ایوب نے کہا کہ الویر ایئرویز کے چیف ایگزیکٹو افسر (سی ای او) تحسین اعوان کو ڈائریکٹر جنرل سول ایوی ایشن اتھارٹی خاقان مرتضیٰ کی جانب سے کراچی ہیڈکوارٹرز میں منعقدہ تقریب میں لائسنس دیا گیا۔

انہوں نے کہا کہ الویر ایئرویز ایمبرر کے دو جہاز خریدنے کا ارادہ رکھتی ہے اور اس نے مستقبل میں جہازوں کی تعداد میں اضافے کا عزم ظاہر کیا ہے۔

سیاحت کے فروغ اور علاقائی ہم آہنگی بڑھانے کے لیے آپریشن کا آغاز پاکستان کے تین بڑے ایئرپورٹ کراچی، لاہور اور اسلام آباد میں حب اسٹیشنز کے ساتھ گوادر، اسکردو اور تربت کے لیے کیا جائے گا۔

ان کا کہنا تھا کہ ‘ٹی پی آر آئی’ آپریشنز کے ذریعے مقامی اور غیر ملکی شہری محفوظ اور آرام دہ ہوائی سفر کے ذریعے پاکستان کو جان سکیں گے اور دنیا میں ملک کا تصور بہتر ہوگا۔

سیاحت کے فروغ کے لیے اس سے قبل پاکستان ایئرلائنز (پی آئی اے) فیصل آباد سے اسکردو کے لیے ہوائی سفر کا آغاز کر چکی ہے، 129 مسافروں پر مشتمل پہلی فلائٹ نے گزشتہ بدھ کو پرواز بھری۔

پی آئی اے کی جانب سے اسکردو کے لیے پروازیں چلانے کا مقصد ناصرف ملک میں مقامی سیاحت کو فروغ دینا ہے، بلکہ مسافروں کو موثر ہوائی سفر کے ساتھ اندورن ملک کارگو سہولیات بھی فراہم کرنا ہے۔

پی آئی اے کی جانب سے فیصل آباد سے اسکردو کے لیے پروازوں کی سہولت نے کاروباری برادری اور فیصل آباد کے رہائشیوں کی دیرینہ خواہش پوری کردی ہے۔

سمندر پاکستانیوں کی جانب سے ریکارڈ ترسیلات زر بھیجنے کا سلسلہ جاری ہے اور گزشتہ سال کی نسبت مالی سال 2021 میں ترسیلات زر میں نمایاں بہتری کے ساتھ 27فیصد کی بہتری ریکارڈ کی گئی۔

اسٹیٹ بینک کی جانب سے جاری اعلامیے مطابق سمندر پار پاکستانیوں کی جانب سے ترسیلات زر کی مد میں 2 ارب ڈالر سے زائد بھیجنے کا ریکارڈ مسلسل 13ویں مہینے بھی جاری رہا اور جون 2021 میں تقریباً 2.7ارب ڈالر کی رقم آئی جو 9فیصد نمو ظاہر کرتی ہے۔

اس حوالے سے کہا گیا کہ ترسیلات زر بڑھنے کی وجہ عید سے قبل موسمی رقوم کی آمد ہے۔

ترسیلات زر مالی سال 2021 میں 29.4ارب ڈالر کی سالانہ تاریخی سطح تک پہنچ گئی ہیں جس کی بدولت گزشتہ سال کے مشکل معاشی حالات کے باوجود ملک کے بیرونی شعبے کی پوزیشن بہتر کرنے میں مدد ملی۔

مالی سال 2021 میں پچھلے سال کی نسبت ترسیلات زر میں نمایاں بہتری کے ساتھ 27فیصد کی نمو ریکارڈ کی گئی جو مالی سال 2003 کے بعد اب تک اضافے کی تیز ترین شرح ہے۔

مالی سال 2021 میں آنے والی ترسیلات زر میں سے سعودی عرب سے 7.7ارب ڈالر، متحدہ عرب امارات سے 6.1ارب ڈالر، برطانیہ سے 4.1ارب ڈالر اور امریکا سے 2.7ارب ڈالر آئے۔

واضح رہے کہ گزشتہ سال کووڈ-19 کی وبا آنے کے بعد خدشہ ظاہر کیا گیا تھا کہ عالمی سطح پر معیشت پر مرتب ہونے والے منفی اثرات کے پیش نظر پاکستان آنے والی ترسیلات زر کی شرح متاثر ہو سکتی ہے۔

ورلڈ بینک نے بھی پاکستان سمیت خطے کے دیگر ممالک میں ترسیلات زر میں کمی کی پیش گوئی کی تھی کیوں کہ عالمی وبا کورونا وائرس نے دنیا بھر میں ممالک کو اپنی معیشت لاک ڈاؤن کرنے اور تارکین وطن ورکرز کو ان کے گھر واپس بھیجنے پر مجبور کردیا تھا۔

تاہم مایوس کن تخمینوں کے برعکس سال 2020 کے دوران پاکستان میں ترسیلاتِ زر میں 17 فیصد اضافہ ہوا تھا۔

آئی ایم ایف کی کڑی شرط پر عملدرآمد کا آغاز کر دیا گیا اور تمام وزارتوں، ڈویژن اور محکموں کے اعلی افسران کو بیرون ملک اثاثوں کی مکمل تفصیلات ہر سال 31 جولائی تک جمع کرانا ہوں گی۔

اعلی سرکاری ملازمین کے لیے سختی، بیرون ملک کیا بنایا کیا چھپایا، سب بتانا ہوگا، ورنہ کارکردگی الاؤنس بند ہوجائے گا۔ آئی ایم ایف نے یہ مطالبہ عالمی انسداد بدعنوانی کے تحت کیا گیا ہے۔ بیورو کریسی کے بیرون ملکوں اثاثوں کی تفصیلات طلب کرلی ہیں۔ نئے مالی سال میں بیرون ملک اثاثے ظاہر کرنا ہوں گے۔ بیورو کریسی 31 جولائی تک اثاثہ جات کی مکمل تفصیلات جمع کرائیں۔

بیرون ملک منقولہ اور غیر منقولہ اثاثہ جات سے بھی آگاہ کیا جائے، بیرون ملک اثاثہ جات خفیہ رکھنے والے بیورو کریٹس کے خلاف کارروائی ہوگی۔ وزارتوں اور محکموں کے افسران 31 جولائی تک بیرون ممالک اثاثوں کی تفصیلات کے پابند ہوں گے اور معلومات نہ دینے کی صورت میں کارکردگی الائونس سے محروم ہونا پڑے گا۔

کراچی: ایسے میں جب مقامی سطح پر الیکٹرانک بائیک (ای بائیک) کی تیاری میں اشتراک کے لیے زیادہ تر بائیک اسمبلرز چین کی جانب دیکھ رہے ہیں، وہیں پنجاب سے تعلق رکھنے والے اسمبلر نے مارکیٹ میں ایک مقامی ماڈل متعارف کروانے کا دعویٰ کیا ہے جو سستا بھی ہے۔

رپورٹ کے مطابق جولٹا الیکٹرک کے چیف ایگزیکٹو افسر (سی ای او) عثمان شیخ نے بتایا کہ ‘ہم نے مقامی ٹیکنالوجی سے تیار کردہ ‘جے ای-70’ بائیک متعارف کروائی ہے جس کے لیے کوئی غیر ملکی فنڈنگ، چین یا دنیا کے کسی ملک کے ساتھ اشتراک نہیں کیا گیا’۔

خیال رہے کہ وزیر اعظم عمران خان نے گزشتہ ہفتے اسلام آباد میں منعقدہ ایک تقریب میں جولٹا کی جے ای-70 ماڈل متعارف کروائی تھی۔

مقامی سطح پر تیار کردہ بائیک کی قیمت 82 ہزار 500 روپے اور اس کی رفتار 60 کلومیٹر فی گھنٹہ ہے۔

رپورٹس کے مطابق حکومت کو پاکستان میں ای بائیکس کی تیاری کے لیے متعدد سرمایہ کاروں کی جانب سے 17 درخواستیں موصول ہوئی ہیں۔

اسمبلی لائن میں مجموعی سرمایہ کاری کا ذکر کیے بغیر لاہور کی سندر انڈسٹریل اسٹیٹ کے سی ای او کا کہنا تھا کہ وہ یہ نہیں بتا سکتے کہ گزشتہ ہفتے افتتاحی تقریب کے بعد سے اب تک کتنی ای بائیکس فروخت ہو چکی ہیں۔

ان کا کہنا تھا کہ طلبہ، اساتذہ اور کوریئر کمپنیوں نے ای بائیکس میں دلچسپی کا مظاہرہ کیا ہے، اندرون سندھ اور پنجاب میں عوام قصبوں اور دیہاتوں کے درمیان 15 سے 20 کلو میٹر کے فاصلے کی نقل و حرکت کے پیش نظر اس ماڈل کے خواہشمند ہیں۔

انہوں نے مزید بتایا کہ ‘ای بائیک کو گھر میں ڈیڑھ یونٹ کی رات بھر چارجنگ کی ضرورت ہوتی ہے جو 80 کلو میٹر کے سفر کے لیے کافی ہوگی۔

ساتھ ہی انہوں نے یہ دعویٰ بھی کیا کہ صارفین کے لیے اس بائیک کا خرچ ایک ہزار روپے ماہانہ ہوگا، 70 سی سی بائیک کے پیٹرول کا خرچہ 4 سے 5 ہزار روپے ہے، اس سے ایک صارف کو ماہانہ 4 ہزار روپے کی بچت ہوگی۔

انہوں نے بتایا کہ پلانٹ ہر ماہ ایک ہزار ای بائیکس تیار کر رہا ہے، دسمبر تک کمپنی کا ارادہ 6 ہزار یونٹ فی ماہ جبکہ آئندہ 5 برسوں میں اس کی پیداوار ایک لاکھ یونٹس ماہانہ تک لے جانے کا ارادہ ہے۔

ان کا یہ بھی کہنا تھا کہ ہم رواں برس پروڈکشن لائن میں مزید 4 ماڈل لانے کی تیاری کر رہے ہیں، جبکہ کمپنی کا 3پہیوں سے چلنے والی گاڑی، سامان بردار اور بھاری گاڑیاں لانے کا بھی ارادہ ہے۔

اس وقت اس بائیک میں ڈرائی ای وی بیٹری استعمال ہو رہی ہے جس کی لاگت 20 ہزار روپے جبکہ معیاد ڈھائی سال ہے، تاہم کمپنی 3 سے 4 ماہ میں مقامی سطح پر تیار ہونے والے دیگر ماڈلز میں لیتھیئم بیٹریز پر منتقل ہونے کا ارادہ رکھتی ہے جس سے لاگت بڑھے گی۔’

کمپنی کے سی ای او کا کہنا تھا کہ حکومت کی جانب سے سیلز ٹیکس اور الیکٹرک پارٹس پر جنرل سیلز ٹیکس اور ڈیوٹی میں ایک فیصد کی چھوٹ نے کئی سرمایہ کاروں کو راغب کیا ہے۔

تاہم اسی قیمت کی بائیکس درآمد کی جائیں تو ٹیکس اور ڈیوٹی مراعات کے باوجود اس کی قیمت ایک لاکھ روہے ہوگی جبکہ اس کے مقابلے میں ‘جے ای-70’ 82 ہزار 500 کی ہے۔

میٹرو بس انتظامیہ کی غفلت یا نااہلی۔۔۔کچہری،قرطبہ، سول سیکرٹریٹ سٹیشن سمیت متعددسٹیشنز پر کروڑوں کی لاگت سے بنائے گئے پبلک ٹوائلٹس ناکارہ، مسافروں کو شدید مسائل کا سامنا۔

تفصیلات کے مطابق گزشتہ دور حکومت میں بنائی گئی میٹرو بس سروس تباہی کے دہانے پر پہنچ گئی ،میٹرو بسوں میں آتشزدگی اور آئے روز حادثات کے ساتھ ساتھ متعدد سٹیشنز بھی انتظامیہ کی نا اہلی کی مثال بننے لگے۔ شہر میں نئے پبلک ٹوائلٹس تو نہ بن سکے مگر میٹرو سٹیشنز پر موجود پبلک ٹوائلٹس کوبھی تالے لگ گئے، کچہری ، قرطبہ اور سول سیکرٹریٹ سمیت میٹرو کےمتعددسٹیشنز پرموجود پبلک ٹوائلٹس ناکارہ ہو گئے۔

پبلک ٹوائلٹس کےدروازوں پرتالےسینٹری سامان ٹوٹ پھوٹ کا شکار ہے،میٹرواستعمال کر نیوالےمسافروں کوشدیدمسائل درپیش ہیں، مسافروں کا کہنا ہے کہ میٹرو سٹیشنز پرموجود پبلک ٹوائلٹس کی حالت زار کو بہتر بنایا جائے۔ میٹروسٹیشنز پرکروڑوں کی لاگت سے دی جانے والی سہولیات کی حفاظت نہ کی گئی توجلد میٹرو ٹریک کھنڈرات میں تبدیل ہو جائیگا۔

گرین ٹاؤن پولیس نے حساس ادارے کے آفیسر بن کر لوگوں کو دہشتگردی کے مقدمات میں گرفتار کرنے کی دھمکی دے کر بھتہ لینے والے چار ملزمان گرفتار، ملزمان نے جوہر ٹاؤن کے رہائشیوں کو جوہر ٹاؤن دھماکے میں گرفتار کرنے کی دھمکیاں دیں اور بھتے کا مطالبہ کیا۔

ایس پی صدر حفیظ الرحمان بگٹی نے پریس کانفرنس کرتے ہوئے بتایا کے ملزمان نے جوہر ٹاؤن کے رہائشیوں کو جوہر ٹاؤن دھماکے میں گرفتار کرنے کی دھمکیاں دیں اور بھتے کا مطالبہ کیا اور ایک شہری سے پچیس لاکھ اوبر ڈرائیور کی مدد سے وصول کر لیا۔ایس پی کے مطابق ملزمان موبائل نمبر ہیک کرکے بنک سے شہریوں کی معلومات حاصل کرتے تھے ۔

ایس پی صدر حفیظ الرحمان بگٹی نے بتایا کے ملزمان نے شہری محمد رفیق کو حساس ادارے کا افسر بن کر کال کرکے دھمکایا اور بلیک میل کیا کہ آپ کا اکاؤنٹ دہشتگردوں نے استعمال کیا ہے ، ملزمان نے دیگر شہریوں سے 55لاکھ روپے بھتہ مانگا۔ گرفتار ملزمان میں چچا بھتیجا اور ان کا کزن شامل ہیں ۔ملزمان میں ،شفیق حسین، ابوبکر اور راشد شامل ہیں جبکہ ان کا ایک ساتھی مفرور ہے۔پولیس نے ملزمان سے بھتہ وصولی کی رقم 25 لکھ بھی برآمد کر لی۔

آسمان گرا نہ زمین پھٹی ,لاہور کے مضافاتی علاقے میں ماں نے مبینہ طور پر کم سن بیٹی کو تشدد کا نشانہ بنا ڈالا, چھوٹی سی غلطی پر سنگدل ماں نے بیٹی کو قینچیاں مار کر اور استری لگا شدید زخمی کر دیا۔

تفصیلات کے مطابق لاہور کے مضافاتی علاقے میں ماں نے مبینہ طور پر کم سن بیٹی کو تشدد کا نشانہ بنا ڈالا،وقوعہ ضلع شیخوپورہ کے علاقہ برج اٹاری میں پیش آیا جہاں ماں نے مبینہ طور پر اپنی بیٹی پر بہیمانہ تشدد کیا۔

11 سالہ بچی شیزا کا پورا جسم زخموں سے بھر گیا، ماں مصباح نے بچی کے بال بھی کاٹ دئیے، بچی شیزا کا کہنا تھا کہ زخموں کے باعث سویا بھی نہیں جاتا، ماں اکثر شدید تشدد کا نشانہ بناتی ہے۔

پاکستان مسلم لیگ (ن) کی نائب صدر مریم نواز نے کہا کہ کشمیر کا مقدمہ کمزور نہیں ہے، کمزور ہے تو پاکستان کا جعلی وکیل جس کا نام عمران خان ہے۔

آزاد کشمیر کے شہر کوٹلی میں پاکستان مسلم لیگ (ن) کے انتخابی جلسے سے خطاب کرتے ہوئے مریم نواز نے کہا کہ آج شہیدوں کا دن ہے تو آؤ، آج سب مل کر شہدا کو دل کی گہرائیوں سے سلام پیش کریں۔

ان کا کہنا تھا کہ آؤ وعدہ کریں کہ شہدا کی قربانیوں کو کسی عمران خان کشمیر فروش کے ہاتھوں ضائع ہونے نہیں دیں گے، پاکستان میں چوری کے ووٹوں سے بننے والا جعلی وزیراعظم عمران خان مقبوضہ کشمیر کو مودی کی جھولی میں پھینک آیا ہے۔

انہوں نے کہا کہ اس کی ڈھٹائی دیکھو کشمیر کو بھارت کی جھولی میں پھینک کر آنے کے بعد کشمیر میں ووٹ مانگنے آ رہا ہے، کشمیر کا مقدمہ کمزور نہیں ہے۔

مریم نواز نے کہا کہ مقبوضہ کشمیر کو مقدمہ کمزور نہیں ہے، کمزور ہے تو پاکستان کا جعلی وکیل ہے، جس کا نام عمران خان ہے، ہر جگہ ایک ہی نعرہ سننے کو ملتا ہے، گوعمران گو، عمران خان کو کشمری کی دھرتی پر پاؤں رکھنے سے پہلے کہہ رہے ہیں گو عمران گو۔

انہوں نے کہا کہ میں نے پہلے بھی کہا کہ پاکستان کا مقدمہ کمزور نہیں ہے، اگر کمزور ہے تو پاکستان کا مسلط شدہ وکیل عمران خان کمزور ہے، وہ نہ صرف کمزور ہے بلکہ نہایت بزدل انسان ہے۔

لاہور کے علاقہ ڈیفنس میں قتل ہونے والی ماڈل گرل نایاب کی تفتیش کا معاملہ، پوسٹ مارٹم رپورٹ کے مطابق مقتولہ نایاب سےزیادتی ثابت نہیں ہوئی، ماڈل گرل نایاب کے قتل کی وجہ کا تعین بھی نہیں کیاجاسکا۔

تفصیلات کے مطابق ڈیفنس میں قتل ہونے والی ماڈل گرل نایاب کی تفتیش کا معاملہ میں اہم پیشرفت سامنے آئی،مقتولہ نایاب کی پوسٹ مارٹم رپورٹ پولیس کو موصول ہوگئی، پوسٹ مارٹم رپورٹ کے مطابق ماڈل گرل نایاب کے قتل کی وجہ کا تعین نہیں کیاجاسکا، مقتولہ نایاب سےزیادتی ثابت نہیں ہوئی۔

پوسٹ مارٹم رپورٹ کے مطابق نایاب کے گلے پر تشدد کے نشانات ملےہیں،مقتولہ کے منہ میں خون جمع ہواتھا،مرنے سے پہلے مقتولہ نایاب نے قہہ بھی کی تھی،مقتولہ کا پوسٹ مارٹم موت کے چالیس سے اڑتالیس گھنٹے بعد کیاگیا،موت کی حتمی وجہ کا تعین فرانزک ایجنسی کی رپورٹ میں کیاجائےگا۔

قبل ازیں پولیس کے مطابق ڈیفنس بی میں قتل ہونے والی ماڈل نایاب وقوعہ سے پہلے دوستوں کے ساتھ فارم ہاؤس میں ایک پارٹی میں گئی، جہاں کسی بات پر مقتولہ اور اس کے دوستوں میں جھگڑا ہوا اورتکرار کے بعد نایاب پارٹی چھوڑ کر واپس آئی اور سوتیلے بھائی کو فون کیا۔

مقتولہ کا بھائی اس سے ملنے آیا اور کچھ وقت ساتھ گزارکر نایاب کو گھر چھوڑ کر چلا گیا۔ پولیس نے مقتولہ کے دوستوں کو شامل تفتیش کرکے پوچھ گچھ شروع کردی ہے۔ پولیس نے شبہ ظاہر کیا ہے کہ نایاب کے قتل میں کوئی قریبی عزیز ملوث ہوسکتا ہے۔

واضح رہے دو روز قبل ایچ اے فیز 5 کے علاقہ میں ماڈل کی گھر سے تشدد زدہ برہنہ لاش برآمد ہوئی تھی، نایاب نامی ماڈل کو ممکنہ طور پر گلہ دبا کر قتل کیا گیا۔ پولیس نے زیادتی، ڈکیتی سمیت مختلف پہلوؤں پرتفتیش شروع کر دی تھی جبکہ آئی جی پنجاب نے نوٹس لیتے ہوئے سی سی پی او لاہور سے رپوٹ طلب کر لی تھی۔

ملک بھر میں مسلسل دوسرے کاروباری روز کے دوران روپے کے مقابلے میں امریکی ڈالر 15 پیسے مہنگا ہو گیا جبکہ سٹاک مارکیٹ میں اُتار چڑھاؤ کے بعد 33 پوائنٹس کی تیزی ریکارڈ کی گئی۔

سٹیٹ بینک آف پاکستان کی سماجی رابطے کی ویب سائٹ ٹویٹر پر جاری کردہ اعداد و شمار کے مطابق رواں ہفتے کے دوسرے کاروباری روز کے دوران انٹر بینک میں روپے کے مقابلے میں امریکی ڈالر مزید 15 پیسے مہنگا ہو گیا اور قیمت 159 روپے 36 پیسے سے بڑھ کر 159 روپے 51 پیسے ہو گئی ہے۔

یاد رہے کہ گزشتہ روز بھی انٹر بینک میں روپے کے مقابلے میں ڈالر 19 پیسے مہنگا ہو گیا تھا اور قیمت 159 روپے 17 پیسے سے بڑھ کر 159 روپے 36 پیسے ہو گئی تھی۔

دوسری طرف پاکستان سٹاک مارکیٹ میں اُتار چڑھاؤ کے بعد 33.41 پوائنٹس کی تیزی ریکارڈ کی گئی، انڈیکس 47480.49 پوائنٹس کی سطح پر پہنچ کر بند ہوا۔ پورے کاروباری روز کے دوران کاروبار میں 10 کروڑ 24 لاکھ 58 ہزار 788 شیئرز کا لین دین ہوا۔