All posts by News Editor

بابر اعظم اور محمد رضوان نے 20اوورز سے کم میں 179 رنز کی بہترین شراکت قائم کی اور اس شراکت کا خاتمہ اس وقت ہوا جب رضوان 58 گیندوں پر 74 رنز بنانے کے بعد آؤٹ ہو گئے۔

اس کے بعد صہیب مقصود، حسن علی اور فہیم اشرف ایک دو بڑے شاٹس لگا کر پویلین لوٹ گئے جبکہ شاداب خان اور شاہین آفریدی نے اسکور بورڈ کو زحمت نہیں دی۔

لیکن دوسرے اینڈ سے بابر اعظم نے بہترین کھیل پیش کرتے ہوئے نہ صرف ون ڈے کرکٹ میں اپنی سب سے بڑی اننگز کھیلی بلکہ ہاشم آملہ کا تیز ترین 14 سنچریوں کا ریکارڈ بھی تور ڈالا، وہ اننگز کے آخری اوور میں 4 چھکوں اور 14 چوکوں کی مدد سے 158 رنز بنانے کے بعد پویلین لوٹے۔

پاکستانی کپتان سے قبل ون ڈے میں تیز ترین سنچریوں کا ریکارڈ ہاشم آملہ کے پاس تھا، انہوں نے یہ اعزز 84 اننگز کھیل کر حاصل کیا تھا جب کہ بابر نے 81 اننگز میں ہی یہ ریکارڈ توڑ کر پہلی پوزیشن پر قبضہ جما لیا۔

اس فہرست میں تیسرے نمبر پر ڈیوڈ وارنر ہیں جنہوں نے 98 اننگز جب کہ ویرات نے 103 اننگز کھیل کر یہ اعزاز حاصل کیا تھا۔

پاکستان نے مقررہ اوورز میں 9 وکٹوں کے نقصان پر 331 رنز بنائے، انگلینڈ کی جانب سے بریڈن کارس نے 5 وکٹیں حاصل کیں۔

انگلینڈ کے فل سالٹ نے پہلے اوور میں شاہین شاہ آفریدی کو 4 چوکے لگا کر دھواں دار آغاز کیا تاہم دوسرے اوور میں حسن علی نے ڈیوڈ مالان کو صفر پر آؤٹ کرکے میزبان ٹیم کے ارادوں کو روک دیا۔

فل سالٹ نے زیک کرالی کے ساتھ مل کر اسکور 53 رنز تک پہنچایا لیکن حارث رؤف کی گیند پر وہ اپنی وکٹ نہیں بچا سکے اور 37 رنز کی اننگز کھیلنے کے بعد فخر زمان کو کیچ دے کر پویلین لوٹ گئے۔

انگلینڈ کی تیسری وکٹ زیک کرالی کی صورت میں گری جب حارث رؤف نے ان کی جارحانہ اننگز کا خاتمہ کردیا، جس میں 7 چوکے شامل تھے۔

شاداب خان نے پاکستان کے لیے خطرناک بننے والی جوڑی کی شراکت کو توڑتے ہوئے تجربہ کار آل راؤنڈر اور قائم مقام کپتان بین اسٹوکس کو محمد رضوان کے ہاتھوں کیچ کروا دیا۔

بین اسٹوکس 28 گیندوں پر 32 رنز بنا کر آؤٹ ہوئے، وہ آؤٹ ہونے والے انگلینڈ کے چوتھے کھلاڑی تھے۔

پاکستان کو پانچویں کامیابی کے لیے بھی زیادہ انتظار نہیں کرنا پڑا اور شاداب نے ایک اور وکٹ حاصل کرتے ہوئے جان سمپسن کو چلتا کر کے انگلینڈ کو پانچواں نقصان پہنچایا۔

165 رنز پر پانچ وکٹیں گرنے کے بعد میچ میں پاکستان کی فتح کے امکانات روشن ہو گئے تھے اور ایسا محسوس ہوتا تھا کہ قومی ٹیم جلد ہی فتح سے ہمکنار ہو جائے گی لیکن جیمز ونس اور گزشتہ میچ کے ہیرو لوئس گریگری نے پاکستان کی خوش فہمی کو جلد دور کردیا۔

گریگری نے جیمز ونس کے ساتھ مل کر شاندار بیٹنگ کا مظاہرہ کیا اور چھٹی وکٹ کے لیے 129رنز کی شراکت قائم کر کے قومی ٹیم کو فتح کی دہلیز تک پہنچا دیا۔

جیمز ونس نے مشکل وقت میں بہترین بیٹنگ کرتے ہوئے کیریئر کی پہلی سنچری مکمل کرنے کا اعزاز حاصل کیا لیکن 294 کے مجموعی اسکور پر حارث رؤف نے ان کی 102رنز کی اننگز کا خاتمہ کردیا۔

گریگری نے ایک مرتبہ پھر بہترین بلے بازی کا مظاہرہ کیا اور کیریئر کی بہترین 77 رنز کی اننگز کھیلنے کے بعد وہ بھی حارث کو وکٹ دے بیٹھے۔

7 وکٹیں گرنے کے باوجود ہدف کے تعاقب میں انگلینڈ کو کوئی مشکل پیش نہ آئی اور بریڈ کارس اور کریگ اوورٹن نے اپنی ٹیم کو دو اوور قبل ہی شاندار فتح سے ہمکنار کرا دیا۔

اس فتح کے ساتھ ہی ناتجربہ کار انگلش ٹیم نے ون ڈے سیریز میں 0-3 سے کلین سوئپ مکمل کر لیا۔

اس سے قبل پاکستان نے سیریز ہارنے کے باوجود فائنل الیون میں کوئی تبدیلی نہیں کی جبکہ انگلینڈ نے بھی فاتح ٹیم میں تبدیلی کی ضرورت محسوس نہیں کی۔

میچ کے لیے دونوں ٹیمیں ان کھلاڑیوں پر مشتمل تھیں۔

انگلینڈ: بین اسٹوکس(کپتان)، ڈیوڈ ملان، فل سالٹ، زیک کرالی، جیمز ونس، جان سمپسن، لوئس گریگوری، کریگ اوورٹن، بریڈن کارس، ثاقب محمود اور میٹ پارکنسن۔

پاکستان: بابر اعظم(کپتان)، فخر زمان، امام الحق، محمد رضوان، سعود شکیل، صہیب مقصود، شاداب خان، فہیم اشرف، حسن علی، شاہین شاہ آفریدی اور حارث رؤف

ویسٹ انڈیز کے جارح مزاج بلے باز کرس گیل ٹی ٹوئنٹی کرکٹ میں 14 ہزار رنزبنانے والے پہلے کرکٹر بن گئے۔

کرکٹ میں ’دی یونیورس باس‘ کے نام سے شہرت پانے والے ویسٹ انڈین بلے باز کرس گیل نے گزشتہ روز آسٹریلیا کے خلاف ٹی ٹوئنٹی سیریز کے تیسرے میچ میں 38 گیندوں پر 67 رنز کی اننگز کھیلی جس کے بدولت ویسٹ انڈیز نے آسٹریلیا کو 6 وکٹ سے شکست دے کر 5 میچوں کی سیریز میں 0-3 کی فیصلہ کن برتری حاصل کرلی۔

کرس گیل نے آسٹریلیا کے خلاف اپنی جارحانہ اننگز کے دوران ایک اور عالمی ریکارڈ قائم کردیا۔ وہ ٹی ٹوئنٹی کرکٹ میں 14 ہزار رنز بنانے والے پہلے اور واحد بلے باز بن گئے ہیں۔

انٹرنیشنل کرکٹ کاؤنسل (آئی سی سی) نے فوٹوشیئرنگ ایپ انسٹاگرام پر کرس گیل کی تصویر شیئر کرتے ہوئے لکھا ’’کرس گیل وہاں پہنچ چکے ہیں جہاں آج تک کوئی پہنچ نہیں پایا‘‘۔

آسٹریلیا کے سابق کرکٹر مائیکل بیون نے کمنٹ میں لکھا ’’14 ہزار رنز، ایک بہت بڑا سنگ میل ہے‘‘۔

کراچی: شاہد آفریدی نے گزشتہ روز اپنے سوشل میڈیا اکاؤنٹ پر چند تصاویر شیئر کی تھیں جن میں وہ اپنی بیٹیوں کے ساتھ بارش کا لطف لیتے ہوئے نہایت خوش نظر آرہے ہیں۔

کراچی میں شدید گرمی کے بعد گزشتہ روز مون سون کی پہلی بارش نے لوگوں کے چہروں پر مسکراہٹ بکھیردی۔ بارش کی بوندیں برستے ہی جہاں عوام نے ساحل سمندر کا رخ کیا وہیں کھیل اور شوبز کی مشہور شخصیات نے بھی بارش کا لطف لیتے ہوئے تصاویر اور ویڈیوز اپنے سوشل میڈیا اکاؤنٹس پر شیئر کیں۔

قومی کرکٹ کے سابق کھلاڑی شاہد آفریدی نے بھی بارش کا لطف لیتے ہوئے تصاویر شیئر کیں جن میں وہ اور ان کی بیٹیاں ابر رحمت کا لطف لے رہے ہیں اور نہایت خوش نظر آرہے ہیں۔ لالہ نے تصاویر کے کیپشن میں لکھا ’’کراچی کی بارشیں اور ہم‘‘۔

نیوزی لینڈ میں پیدا ہونے والے مشہور آسٹریلوی رگبی اسٹار کواڈ کوپر کی شہریت کی درخواست آسٹریلیا نے مسترد کردی ہے۔

کواڈ کوپر نے درخواست مسترد ہونے کے بعد سوشل میڈیا پر درخواست کی تصویر پوسٹ کرتے ہوئے لکھا کہ 70 میچز میں آسٹریلیا کی نمائندگی کرنے کے باوجود بھی شہریت نہیں دی گئی جو کافی عجیب بات ہے۔

33 سالہ رگبی اسٹار 13 سال کی عمر سے آسٹریلیا میں رہائش پزیر تھے جس کے تحت انہیں 2008 سے 2017 تک آسٹریلوی ٹیم کی نمائندگی کرنے کی اجازت ملی لیکن سال 2016 میں برازیل کے شہر ریو ڈی جنیرو میں کھیلے گئے اولمپک گیمز میں شرکت کی اجازت انہیں آسٹریلوی شہریت نہ ہونے کی وجہ میں نہیں مل سکی تھی۔

کواڈ کوپر نے حال ہی میں جاپان میں رگبی ٹورنامنٹ میں شرکت کی ہے ، انہوں نے ایک دہائی سے زیادہ عرصہ آسٹریلوی ٹیم کی 70 میچز سمیت دو عالمی چیمپئن شپ میں بھی نمائندگی کی ہے۔

کوپر نے شہریت کی درخواست مسترد ہونے کا خط سوشل میڈیا پر شیئر کیا جس میں انہیں آسٹریلوی حکومت کی جانب سے بتایا گیا کہ ان کی شہریت کی درخواست اس لیے مسترد کی گئی ہے کیوں کہ وہ مطلوبہ معیار پر پورا اترنے سے متعلق شواہد پیش کرنے میں ناکام رہے بمشول اس بات کے ثبوت کے کہ وہ ایسی سرگرمیوں میں شامل رہے جو آسٹریلیا کے لیے سود مند ثابت ہوئیں۔

خیال رہے کہ 2017 میں آسٹریلوی حکومت نے بیان جاری کیا تھا جس میں ان کا کہنا تھا کہ درخواست دہندگان کو آسٹریلوی اقدار کو سمجھنے کے ساتھ ان پر عمل بھی کرنا چاہیے۔

سابق کپتان وسیم اکرم کی اہلیہ شنیرا اکرم نے منال خان اور ان کے منگیتر کو ٹریفک قوانین کی خلاف ورزی کرنے اور غیر ذمہ داری کا مظاہرہ کرنے پر کھری کھری سنادی۔

منال خان نے چند روز قبل اپنے انسٹاگرام اکاؤنٹ پر ایک ویڈیو شیئر کی تھی جس میں وہ اور ان کے منگیتر احسن محسن اکرام گاڑی میں کہیں جارہے ہیں۔ احسن گاڑی چلاتے ہوئے منال خان کی ویڈیو بنارہے ہوتے ہیں اور ان سے کہتے ہیں ہمارے لیے ایک گانا گاؤ۔

منال خان تھوڑا سوچ کر بچوں کا مقبول گانا ’’بے بی شارک‘‘ گانا شروع کردیتی ہیں۔ تاہم گاڑی میں ڈرائیونگ کے دوران منال خان نے سیٹ بیلٹ نہیں باندھی تھی۔ سوشل میڈیا صارفین نے منال خان کی اس ویڈیوکو خاصا پسند کیا تھا اور انہیں کیوٹ قرار دیا تھا۔
تاہم منال خان اور احسن محسن کی سوشل میڈیا پر وائرل ہونے والی اس ویڈیو پر شنیرا اکرم نے ان دونوں کی توجہ ٹریفک قوانین کی خلاف ورزی پر کروائی ہے۔

شنیرا اکرم نے منال خان کی یہ ویڈیو اپنی انسٹااسٹوری پر شیئر کی اور لکھا ’’آپ دونوں مشہور ہیں اور آپ دونوں کے سوشل میڈیا پر لاکھوں فالوورز ہیں کیا آپ دونوں کے لیے تھوڑا سا زیادہ ذمہ دار ہونا بہت مشکل ہے؟

شنیرا اکرم نے مزید لکھا ڈرائیونگ کرتے وقت اپنی سیٹ بیلٹ باندھیں اور اپنی نظریں روڈ پر رکھیں۔ معاف کرنا لیکن یہ گانا اس وقت بالکل بھی کیوٹ نہیں لگے گا جب منال خان اسے اسپتال میں گارہی ہوں گی۔‘‘

’جوانی پھر نہیں آنی‘ جیسی فلموں میں شاندار اداکاری سے لوگوں کو دیوانہ بنانے والی ثروت گیلانی کا کہنا ہے کہ ان کی خواہش ہے کہ وہ بولی وڈ مسٹر پرفیکشنسٹ عامر خان کے ساتھ کام کریں۔

اداکارہ نے انسٹاگرام پر مداحوں کے سوالوں کے جوابات دیتے ہوئے نہ صرف اپنی خواہشات سے متعلق انکشافات کیے بلکہ لوگوں کو یہ مشورے بھی دیے کہ وہ کس طرح اپنی زندگی بہتر بنا سکتے ہیں۔

مداحوں کے سوالوں کے جوابات کے دوران بھارت سے ان کے مداحوں نے ان کی ویب سیریز ’چڑیلز‘ کی تعریف کی اور ساتھ ہی بعض مداحوں نے ان سے ویب سیریز کے دوسرے سیزن سے متعلق بھی پوچھ ڈالا۔

’چڑیلز‘ کے دوسرے سیزن سے متعلق مداح کے سوال کے جواب میں انہوں نے خود کوئی جواب دینے کے بجائے سیریز کے پروڈیوسر کو مینشن کیا۔

بعض مداحوں نے ان سے ان کی فٹنیس اور خوبصورتی سے متعلق بھی سوالات پوچھے جب کہ کچھ مداحوں نے ان سے فرمائش کر ڈالی کہ وہ ایک اچھی والدہ ہیں، اس لیے بچوں کو سکھانے کے لیے آرٹ کلاسز کا آغاز کریں۔

اپنی پسندیدہ ہولی وڈ شخصیت کے سوال پر ثروت گیلانی نے اداکارہ نتالی پورٹ مین کی تصویر شیئر کرتے ہوئے انہیں من پسند قرار دیا۔

ایک مداح کی جانب سے شوہر کے ساتھ اپنی سب سے پسندیدہ تصویر شیئر کرنے کی فرمائش پر اداکارہ نے ایک تصویر بھی شیئر کی جب کہ فہد مرزا سے ہی شادی کرنے کے سوال پر انہوں نے دو مختلف رنگوں پر مشتمل چپل کی جوڑی کی تصویر شیئر کی۔

ایک سوال کے جواب میں ثروت گیلانی نے کہا کہ والدین کے لیے تمام بچے ایک جیسے ہی ہوتے ہیں، ان کے لیے کوئی بچہ مشکل نہیں ہوتا۔

اداکارہ نے لکھا کہ والدین کو معلوم ہوتا ہے کہ ان کے تمام بچے ایک دوسرے سے مختلف ہیں اور انہیں ان کی خصوصیات اور کمزوریوں کا بھی علم ہوتا ہے۔

ایک سوال کے جواب میں ثروت گیلانی نے اداکارہ صبا حمید کی بھی تعریف کی اور انہیں ملک کا اثاثہ قرار دیا۔

ایک مداح نے ثروت گیلانی سے پوچھا کہ ان کی اب تک کون سی خواہش پوری نہیں ہوسکی اور اس بات کی منتظر ہیں کہ ان کی خواہش پوری ہوجائے؟

مداح کے سوال پر ثروت گیلانی نے مختصر لکھا کہ ان کی خواہش ہے کہ وہ بولی وڈ مسٹر پرفیکشنسٹ عامر خان کے ساتھ کام کریں۔

بھارتی کرکٹ ٹیم کے سابق کپتان اور بورڈ آف کنٹرول فار کرکٹ(بی سی سی آئی) کے صدر سارو گنگولی نے اپنی زندگی پر فلم بنائے جانے کی تصدیق کی ہے لیکن فلم کا نام ظاہر نہیں کیا۔

انڈین ایکسپریس کی رپورٹ کے مطابق سارو گنگولی نے نیوز 18 بنگلہ کو اپنی زندگی پر فلم بنانے جانے کی تصدیق کی۔

انہوں نے کہا کہ ’میں نے اپنی زندگی پر فلم بنانے کے لیے رضامندی ظاہر کی ہے، یہ فلم ہندی میں ہوگی لیکن ابھی اس کے ہدایت کار کا نام ظاہر کرنا ممکن نہیں ہے’۔

سارو گنگولی نے کہا کہ تمام چیزوں کو حتمی شکل دینے میں مزید کچھ وقت لگے گا۔

تاہم اسکرین پر سارو گنگولی کا کردار کون ادا کرنے جارہا ہے اس حوالے سے بھی کوئی تفصیلات سامنے نہیں آئیں لیکن ان کے مداح ان کی زندگی کے اہم لمحات کے بارے میں جان سکیں گے۔

بھارتی میڈیا رپورٹس کے مطابق سارو گنگولی پر فلم ایک بڑے بجٹ کے تحت، ایک بڑی پروڈکشن کمپنی کے بینر تلے بنائی جائے گی۔

گزشتہ برس سارو گنگولی نے اداکارہ نیہا دھوپیا کے چیٹ شو نو فلٹر نیہا میں شرکت کی تھی، شو کے دوران ان سے سوال پوچھا گیا تھا کہ وہ اپنی زندگی پر بنائی جانے والی فلم میں اداکاری کے لیے کس کو ترجیح دیں گے۔

جس پر ساور گنگولی کسی اداکار کا نام تجویز نہ کرسکے تو نیہا دھوپیا نے ریتھک روشن کے نام کی تجویز دی تھی جس پر انہوں نے کہا تھا کہ ’پھر ریتھک کو جسامت میں، میرے جیسا ہونا پڑے گا‘۔

اس سے قبل بھارتی کرکٹر سچن ٹنڈولکر کی زندگی پر ’اے بلین ڈریمز’ بنائی گئی تھی جس میں خود سچن ٹنڈولکر نے اداکاری کی تھی اور ’ایم ایس دھونی : دی اَن ٹولڈ اسٹوری’ میں سشانت سنگھ نے دھونی کا کردار ادا کیا تھا۔

علاوہ ازیں رنویر سنگھ، بھارتی کرکٹر کپل دیو کی زندگی پر بنائی جانے والی فلم میں نظر آئیں گے جن کی کپتانی میں 1983 میں بھارت کو پہلا ورلڈ کیپ جیتا تھا جبکہ بھارتی وومن کرکٹر میتھالی راج کی زندگی پر بھی فلم کی تیاری جاری ہے جس میں تاپسی پنوں اداکاری کرتی ہوئی نظر آئیں گی۔

عائزہ خان نے بولی وڈ کی ’ڈانس گرل‘ کہلائی جانے والی مقبول اداکارہ مادھوری ڈکشٹ کو اپنی انسپائریشن قرار دیتے ہوئے ان سے ملنے کی خواہش کا اظہار کردیا۔

عائزہ خان نے 12 جولائی کو مادھوری ڈکشٹ کی مقبول رومانوی فلم ’دیوداس‘ کو 19 سال مکمل ہونے پر ان کے لیے انسٹاگرام پر خصوصی پوسٹ کی، جس میں انہوں نے بولی وڈ اداکارہ کی تعریف کی۔

عائزہ خان نے مادھوری ڈکشٹ کی جوانی کی تصویر شیئر کرتے ہوئے انہیں ہر دور کی خوبصورت اداکارہ قرار دیا اور ساتھ ہی لکھا کہ اگر وہ کبھی بولی وڈ اداکارہ سے ملیں تو انہیں بتائیں گی کہ وہ کتنی خوبصورت ہیں۔

عائزہ خان نے پوسٹ کا آغاز ہی مادھوری ڈکشٹ کے مقبول گانے ’اک، دو تین‘ سے کیا اور لکھا کہ وہ خوش قسمت ہیں کہ ’ڈانس گرل‘ کی فلمیں اور ڈانس دیکھ کر بڑی ہوئیں۔

عائزہ خان نے لکھا کہ وہ جب بھی مادھوری کا نام سنتی ہیں تو ان کے ذہن میں فوری طور پر ‘اک، دو تین‘ اور ’دیو بابو‘ آجاتے ہیں جب کہ اداکارہ کی طرح دیکھتے ہی ’دل تو پاگل ہے‘ جیسے جذبات آجاتے ہیں۔

اداکارہ نے مادھوری ڈکشٹ کی تعریف کرتے ہوئے انہیں حیرت انگیز ڈانسر و اداکارہ قرار دیا اور لکھا کہ وہ اپنے آنسوؤں سے لوگوں کے دل جیتنے کا فن جانتی ہیں۔

عائزہ خان نے لکھا کہ ان کی خواہش ہے کہ وہ مادھوری ڈکشٹ سے ملیں اور انہیں بتائیں کہ وہ کتنی خوبصورت ہیں اور وہ ان کے لیے کتنی بڑی انسپائریشن رہی ہیں۔

ساتھ ہی انہوں نے پوسٹ میں لکھا کہ ان کی خواہش رہی تھی کہ وہ مادھوری ڈکشٹ جیسا لباس پہن کر ان کی کاپی کریں اور ان جیسی دکھیں۔

عائزہ خان نے انسٹاگرام پر مادھوری ڈکشٹ کے پرانے لباس کی طرز کے لباس کے ساتھ تصویر بھی شیئر کی۔

لوگوں نے عائزہ خان کے مادھوری ڈکشٹ کے انداز کو کافی پسند کیا اور انہیں بولی وڈ اداکارہ سے بھی زیادہ خوبصورت قرار دیا۔

خیال رہے کہ مادھوری ڈکشٹ، شاہ رخ خان اور ایشوریا رائے کی رومانوی فلم ’دیوداس‘ کی ریلیز کو 12 جولائی کو 19 سال مکمل ہوئے، جس پر نہ صرف تینوں اداکاروں بلکہ بولی وڈ و پاکستانی اداکاروں نے بھی فلم کے حوالے سے خصوصی پوسٹس کیں۔

سنجے لیلا بھنسالی کی سپر ہٹ فلم کو 2002 میں ریلیز کیا گیا تھا اور فلم میں مادھوری ڈکشٹ کے کردار کو کافی سراہا گیا تھا۔

’دیوداس‘ کی ریلیز کو 19 سال مکمل ہونے پر خود مادھوری ڈکشٹ اور شاہ رخان نے بھی خصوصی پوسٹس کیں۔

اداکارہ و فیشن ماڈل غنا علی نے انکشاف کیا ہے کہ وہ قرآن کی حافظہ ہیں۔

گزشتہ روز اداکارہ نے انسٹاگرام پر سوال و جواب کا ایک سیشن رکھا جہاں ان کے چاہنے والوں نے شادی سے لے کر ذاتی نوعیت کے سوالات پوچھے۔

ایک صارف نے پوچھا کہ کیا آپ حافظِ قرآن ہیں؟ اداکارہ نے جواب دیا کہ جی ہاں! میں ہوں۔

غنا سے پوچھا گیا کہ آپ نفرت کرنے والوں سے کس طرح ڈیل کرتی ہیں، اس پر اداکارہ نے جواب دیا کہ میں انہیں ڈیل ہی نہیں کرتی، ان کی نفرت سے میرا کوئی لینا دینا نہیں ہے۔

اداکارہ نے شادی کے بعد کی زندگی سے متعلق سوال کے جواب میں کہا کہ میری زندگی بہترین ہے، ظاہر سی بات ہے آپ کو بڑی تبدیلیوں سے گزرنا پڑتا ہے لیکن میں بہترین حسِ مزاح والے شخص کو پاکر خوش ہوں۔

غنا علی سے سوال پوچھا گیا کہ کیا آپ اپنے شوہر کو دبلا ہونے کا کہتی ہیں؟ اس پر اداکارہ کا کہنا تھا کہ نہیں کیونکہ وہ مجھے ایسے ہی اچھے لگتے ہیں، میں نہیں چاہتی کہ وہ اپنا وزن کم کریں۔

اداکارہ نے بتایا کہ ان کے شوہر بالکل بھی سخت نہیں ہیں لیکن کچھ دائرہ کار ہیں، جب آپ اپنی زندگی کسی کے ساتھ شیئر کرتے ہیں تو اس کی عزت کرنا ضروری ہوتا ہے۔

بالی وڈ کے سینیئر اداکار نصیرالدین شاہ کا کہنا ہے کہ لیجنڈ اداکار دلیپ کمار نے مستقبل کے اداکاروں کے لیے کوئی سبق نہیں چھوڑا۔

نصیرالدین شاہ کہتے ہیں کہ دلیپ کمار عظیم اداکار تھے لیکن انہوں نے اداکاری کے علاوہ کچھ ایسا نہیں کیا جس سے آنے والے اداکاروں کو سیکھنے کو مل سکے۔

انہوں نے مزید کہا کہ اگرچہ دلیپ کمار ایک سپر اسٹار تھے ، لیکن ان کے کیریئر میں انہوں نے صرف ایک فلم پروڈیوس کی اور کبھی ڈائریکشن میں نہیں آئے اور مجھے حیرانی ہے کہ کیوں دلیپ کمار نے آنے والی نسلوں کے لیے بہت کم کام کیا۔

نصیرالدین شاہ کا کہنا تھااگر دلیپ کمار اپنے تجربات شیئر کرتے تو ان کی اداکاری کے طریقوں سے فلم انڈسٹری فائدہ اٹھا سکتی تھی مگر ایسا نہ ہوا،اور نہ ہی دلیپ کمار نے کبھی ان سماجی کاموں میں بھی حصہ نہیں لیا جو ان کے دل کے بہتر قریب تھے۔

نصیر الدین شاہ نے کہا کہ دلیپ کمار کی 70 کی دہائی سے پہلے کی فلموں کے علاوہ نئی نسل کے لیے ان سے سیکھنے کے لیے کچھ نہیں، انہوں نے اپنے کیریئر میں تقریباً 50 فلمیں کیں حالانکہ ان کے دور کے دوسرے اداکار سال میں کم سے کم دو فلمیں کیا کرتے تھے لیکن دلیپ کمار دو سال میں ایک فلم کرتے تھے۔

البتہ نصیر الدین شاہ نے یہ بھی کہا کہ اس سب کے باوجود میں ان کے لاکھوں مداحوں میں سے ایک ہوں اور ہمیشہ ان کی سحر انگیز ی کے لیے ان کی تعظیم کروں گا۔

یاد رہے 2016 میں بالی وڈ اداکار راجیش کھنہ کی موت کے بعد بھی نصیرالدین شاہ راجیش کھنہ کو ایک ‘محدود ‘اداکار کہنے پر پریشانی میں پڑ گئے تھے۔