All posts by News Editor

ملک میں روپے کے مقابلے میں ڈالر کے تگڑا ہونے کا سلسلہ آج بھی جاری رہا۔

اسٹیٹ بینک آف پاکستان کی جانب سے جاری اعداد و شمار کے مطابق انٹر بینک تبادلہ مارکیٹ میں ڈالر کی قدر 9 پیسے اضافے سے 164 روپے ایک پیسے رہی۔

اوپن مارکیٹ میں ڈالر کی قدر 30 پیسے اضافے سے 164 روپے 30 پیسے ہے۔

ملک میں سونے کی فی تولہ قیمت میں مزید 800 روپے کا اضافہ ہوا ہے ۔

سندھ صرافہ بازار جیولرز ایسوسی ایشن کے مطابق 800 روپے اضافے کے بعد ملک میں فی تولہ سونے کی قدر ایک لاکھ 9 ہزار 100 روپےہوگئی ہے۔

10 گرام سونے کی قدر 686 روپے اضافے سے 93 ہزار 536 روپے ہے۔

صرافہ ایسوسی ایشن کے مطابق عالمی صرافہ بازار میں سونے کی قدر 15 ڈالر اضافے سے 1752 ڈالر فی اونس ہے۔

حکومت کی جانب سے مہنگے داموں ایل این جی خریدے جانے کے معاملے کی تصدیق ہوگئی۔

آڈیٹر جنرل آف پاکستان کی رپورٹ نے پروگرام آج شاہ زیب خان زادہ کے ساتھ کی جانب سے کی گئی تحقیق کی تصدیق کردی۔

آڈیٹر جنرل کی رپورٹ میں بتایا گیا ہے کہ بدانتظامی، بری پلاننگ اور غیر ضروری تاخیر کی وجہ سے مہنگے داموں ایل این جی خریدی گئی جس کی وجہ سے ملکی خزانے کو اربوں روپے کا نقصان ہوا۔

رپورٹ میں مزید بتایا گیا ہے کہ ٹرمینلز پوری طرح استعمال نہ کرنے کی وجہ سے 11 ارب روپے سے زائد کی اضافی ادائیگی کرنا پڑی۔

رپورٹ کے مطابق انتظامیہ ملک میں نہ سردیوں کی ڈیمانڈ کے تاریخی رحجان کو مدِنظر رکھ سکی اور نہ ہی بین الاقوامی مارکیٹ میں گیس کی بڑھتی ہوئی قیمتوں پر نظر رکھ سکی۔

واضح رہے کہ گزشتہ دنوں پروگرام ’آج شاہزیب خانزادہ کے ساتھ‘ میں یہ انکشاف کیا گیا تھا کہ حکومت نے ستمبر کے لیے تاریخ کی مہنگی ایل این جی خریدی جب کہ طویل مدتی معاہدوں کی اوسط کے مقابلے میں 13 ارب روپے اضافی ادا کیے جائیں گے۔

کراچی: بجلی کے بل ادا کرنیوالے لاکھوں صارفین اپنی ماہانہ بجلی کے بلوں میں اضافی ٹیکس کی ادائیگیاں کرنے پر مجبور ہوگئے ہیں۔

مقامی 8 پاور ڈسٹری بیوشن کمپنیوں(ڈیسکوز) کی جانب سے انکم دینے والے صارفین کی عدم رجسٹریشن کے باعث 25ہزار روپے مالیت کے بجلی کے بل ادا کرنیوالے لاکھوں صارفین اپنی ماہانہ بجلی کے بلوں میں اضافی ٹیکس کی ادائیگیاں کرنے پر مجبور ہوگئے ہیں۔

واضح رہے کہ رواں سال کے وفاقی بجٹ میں 25ہزار روپے کے بجلی کے بل پر 7.5فیصد ٹیکس عائد کیاگیا تھا اور فنانس بل کے مطابق انکم ٹیکس گوشوارے جمع کرانے والے رجسٹرڈ ٹیکس دہندگان مذکورہ ٹیکس کا ریفنڈ کلیم کرنے کے مجاز ہیں۔
ذرائع نے بتایا کہ ایف بی آر نے ڈیسکوز کو انکم ٹیکس ریٹرن فائل کرنے والے صافین کا ڈیٹا بل کے ساتھ منسلک کرنے کی ہدایت کی تھی لیکن اب تک لیسکو اور کے الیکٹرک کے علاوہ کسی ڈیسکو نے ٹیکس فائیلرز کا ڈیٹا بل سے منسلک نہیں کیا۔

یہی وجہ ہے کہ اب 25ہزار روپے مالیت کے بل ادا کرنے والے انکم ٹیکس فائلر صارفین کو ٹیکس کی کٹوتی کے بعد ریفنڈ کے لیے انتظار کرنا ہوگا۔ ایف بی آر میں پہلے سے ٹیکس ریفنڈ کی مخدوش صورتحال کی وجہ سے تاجرو صنعتکاروں کی ریفنڈز میں تاخیر کی شکایات زدعام ہیں۔

ذرائع نے بتایا کہ مقامی 10 میں سے 8 ڈیسکوز کی نااہلی کی وجہ سے ہزاروں انکم ٹیکس دہندگان کو دہرے ٹیکس کا سامنا کرنا پڑرہا ہے۔

ایف بی آر کے ذرائع کا کہنا ہے کہ مقامی پاورڈسٹری بیوشن کمپنیوں (ڈیکسوز) نے تاحال انکم ٹیکس ریٹرن بھرنے والے صارفین کو سہولت فراہم نہیں کی ہے۔

وزیر خارجہ شاہ محمود قریشی نے کہا کہ داسو ہائیڈرو پاور پلانٹ پر حملے میں افغانستان اور بھارت کی خفیہ ایجنسیز ‘این ڈی ایس’ اور ‘را’ ملوث ہیں اور ان عناصر کو پاکستان میں چین کی سرمایہ کاری اور معاشی روابط ہضم نہیں ہو رہی۔

یاد رہے کہ 14 جولائی کو خیبر پختونخوا کے ضلع اپر کوہستان میں داسو ہائیڈرو پاور پلانٹ کے قریب ’حملے‘ میں 9 انجینئرز، دو فرنٹیئر کور (ایف سی) اہلکاروں سمیت کم از کم 12 افراد ہلاک اور متعدد زخمی ہوگئے تھے۔

وزیر خارجہ نے اسلام آباد میں پریس کانفرنس کرتے ہوئے کہا کہ داسو واقعے کے بعد پاکستان کے تمام ادارے حرکت میں آئے اور انہوں نے اپنی تحقیقات کا فی الفور آغاز کیا، چین سے ہمارے تعلقات کی نوعیت کے پیش نظر ہم نے چین کو صورتحال سے باخبر رکھا اور اپنی اس کوشش میں کافی حد تک کامیاب بھی رہے۔

ان کا کہنا تھا کہ چین کو اس واقعے پر تشویش تھی اور وہ موقع کا جائزہ لینا چاہتے تھے جس پر ہم نے ان کو خوش آمدید کہا اور ان کو جائے حادثہ پر لے کر گئے اور ان کو تمام تر پیشرفت سے آگاہ کرتے آئے ہیں۔

انہوں نے کہا کہ اس واقعے کی تحقیقات کے دوران 1400 کلومیٹر طویل راستے پر تمام 36 سی سی ٹی وی کیمروں کی فوٹیج کا مکمل جائزہ لیا گیا اور ہم اپنی تحقیقات میں اسی کو بنیاد بنا رہے ہیں۔

شاہ محمود قریشی نے کہا کہ یہ خود کش حملہ تھا اور جہاں یہ واقعہ رونما ہوا وہاں بارودی مواد کی گاڑی لے کر جانے والی گاڑی کے ڈرائیور کے انگوٹھا اور انگلی کے ساتھ ساتھ جسم کے اعضا ملے ارو ان اعضا اور وہاں سے ملنے والی دیگر اشیا کا باریک بینی سے جائزہ لیا گیا۔

انہوں نے کہا کہ وہاں سے ملنے والے موبائل کے ڈیٹا کے تجزیے کے بعد ہم اس نتیجے میں پر پہنچے یہ ایک بلائنڈ کیس ہے اور اس کو حل کرنا آسان کھائی نہیں دے رہا تھا لیکن یہ مشکل اور پیچیدہ کام ہمارے اداروں نے کامیابی سے کیا۔

ان کا کہنا تھا کہ داسو ہائیڈرو پاور پراجیکٹ پر کام کرنے والے ایک ہزار سے زائد افراد کی جانچ پڑتال کی گئی، سوالات کیے گئے اور تحقیق میں شامل کیا گیا، جو گاڑی اس واقعے میں استعمال کی گئی، اس کے بارے میں آج ہم یہ کہہ سکتے ہیں کہ ہم نے اس کو کو شناخت کر لیا ہے اور اس کی نقل و حرکت کو پکڑ لیا ہے کہ وہ کہاں سے آئی۔

وزیر خارجہ نے کہا کہ یہ واقعے کے ہینڈلرز تک بھی ہم پہنچ گئے ہیں اور اس کے تانے بانے جہاں سے جڑتے ہیں، واقعے میں جو گاڑی استعمال کی گئی اسے ملک میں اسمگل کیا گیا اور تحقیقات میں یہ بات بھی سامنے آئی کہ ان لوگوں کا پہلا ہدف داسو پراجیکٹ نہیں تھا بلکہ ان کی پہلی کوشش دیامر بھاشا ڈیم کے مقام پر حملہ کرنے کی تھی لیکن وہاں کامیابی نہ ملنے پر انہوں نے پھر دوسرا رخ اختیار کیا اور داسو پراجیکٹ کو نشانہ بنایا۔

انہوں نے کہا کہ ہماری تحقیقات کے مطابق اس منصوبے میں افغانستان کی سرزمین کو استعمال کیا، اس کی منصوبہ بندی اور عملدرآمد میں این ڈی ایس اور را کے گٹھ جوڑ کا تعلق دکھائی دے رہا ہے اور ان عناصر کو پاکستان میں چین کی سرمایہ کاری اور معاشی روابط ہضم نہیں ہو رہے۔

ان کا کہنا تھا کہ یہ عناصر اپنے عزائم میں ناکام ہوئے اور جو چاہتے تھے وہ حاصل نہ کر پائے اور اس واقعے کے بعد چین اور پاکستان نے فیصلہ کیا کہ ہم نے مل کر اس بزدلانہ حرکت کا مقابلہ کرنا ہے۔

شاہ محمود قریشی نے کہا کہ میں چین گیا تھا جہاں اسٹریٹیجک ڈائیلاگ کے دوران یہ معاملہ بھی زیر بحث آیا اور اس میں یہ تبادلہ خیال کے بعد ہم اس نتیجے پر پہنچے ہیں کہ چین اب تک ہونے والی تحقیقات سے مطمئن نظر آیا، وہ سمجھتے ہیں کہ پاکستان نے انہیں شفاف انداز میں تمام صورتحال سے باخبر رکھا ہے اور ان سے چیزیں شیئر کی ہیں۔

ان کا کہنا تھا کہ پاکستان اور چین نے اس عزم کا اظہار کیا ہے کہ تحقیقات کو اس حد تک لے کر جائیں گے کہ اس واقعے میں ملوث افراد کو ناصرف بے نقاب کیا جائے بلکہ قرار واقعی سزا بھی دی جائے۔

انہوں نے کہا کہ ہم نے اپنے ایسے تمام منصوبوں کی سیکیورٹی کو بڑھانے کا فیصلہ کیا ہے اور اپنے سیکیورٹی اقدامات پر نظرثانی کے بعد اسے بہتر کرنے کی بھی کوشش کی ہے۔

وزیر خارجہ نے کہا کہ ہم نے فیصلہ کیا ہے کہ ہمارے سی پیک کے تمام منصوبے جاری رہیں گے اور بروقت مکمل کیے جائیں گے، پاکستان اور چین کی اسٹریٹیجک شراکت داری کسی منصوبہ بندی کا شکار نہیں ہو گی اور جاری رہے گی، ہمارے برادرانہ تعلقات پر ایسے منصوبے اثر انداز نہیں ہوں گے اور ہم اپنے تعاون کو مزید توسیع دینے کی کوشش کریں گے۔

اس موقع پر خیبر پختونخوا کے محکمہ انسداد دہشت گردی کے ڈی آئی جی جاوید اقبال نے حملے کی تفصیلات بتاتے ہوئے کہا کہ 14جولائی کو یہ قافلہ بسین کیمپ میں اپنی رہائش گاہ سے نکل کر کام کے مقام پر جانا تھا لیکن مرکزی شاہراہ پر ان کو یہ واقعہ پیش آیا۔

ان کا کہنا تھا کہ میں نے اس واقعے تحقیقات کی سربراہی کی اور اس دوران خفیہ اداروں اور ایجنسیوں نے ہم سے مکمل تعاون کیا۔

انہوں نے کہا کہ وقوعہ سے ہمیں حملے میں استعمال ہونے والی گاڑی کے پرزے اور مبینہ خود کش حملہ آور کے اعضا ملے، اس کا فارنزک اور کیمیائی تجزیہ کیا اور اعضا کا ڈی این اے کیا۔

انہوں نے کہا کہ ہزار کلومیٹر طویل راستے سے سی سی ٹی وی فوٹیج لی، 500 جی بی سے زائد کی فوٹیج لی جن کا مختلف ٹیموں نے جائزہ لیا تاکہ نقل و حرکت کا پتہ چلایا جا سکے جس کے نتیجے میں حملے میں استعمال ہونے والی ہونڈا اکارڈ گاڑی کی شناخت ہو گئی۔

ڈی آئی جی نے بتایا کہ ہونڈا اٹلس سے گاڑی کا انجن نمبر چیک کرایا لیکن کوئی کامیابی نہ ملی جبکہ وہاں سے ملنے والے موبائل فون بھی واقعے میں ہلاک و زخمی ہونے والوں کے ہی تھے۔

ان کا کہنا تھا کہ اس بلائنڈ کیس میں کامیابی اس وقت ملی جب ہمیں فوٹیج ملی، گاڑی پر ‘اپلائیڈ فار’ کی نمبر پلیٹ لگی ہوئی تھی اور اس کو جب زیادہ قریب سے دیکھا تو ہمیں اس گاڑی کے ڈیلر کا پتہ چل گیا جو چمن سے تعلق رکھتا تھا۔

انہوں نے بتایا کہ مالکان نے گاڑی کی شناخت کر لی اور یہ واقعے سے چھ سے سات ماہ قبل ان کے پاس آئی تھی اور ایک وبائل نمبر ملا جس سے ہم اس شخص تک پہنچے جو واقعے میں ملوث تھا اور حسین نامی یہ شخص نومبر میں یہ گاڑی ے کر چلا گیا تھا۔

ڈی آئی جی جاوید اقبال نے مزید بتایا کہ اس شخص کی باریک بینی سے جانچ پڑتال کے بعد ہم ایک دوسرے مشتبہ شخص تک پہنچئے جسے ہم نے کراچی سے گرفتار کیا۔

انہوں نے بتایا کہ ان دو افراد کی تفتیش سے پتہ چلا کہ اس واقعے میں ملوث چوتھا اہم شخص طارق افغانستان سے اسی واردات کو انجام دینے کے لیے آیا تھا اور تحریک طالبن سے تعلق رکھنے والا یہ شخص نے واقعے سے ایک دن قبل خوش کش بمبار سمیت گاڑی کو وقوعہ تک لے کر گیا اور ان لوگوں کی تفتیش سے تمام سہولت کاروں کو گرفتار کر لیا گیا ہے۔

انہوں نے کہا کہ ایاز اور حسین کی تفتیش سے یہ بات بھی سامنے آئی کہ معاویہ اور طارق سمیت تین افراد نے افغانستان میں بیٹھ کر یہ منصوبہ تیار کیا اور سہولت کاری کے لیے را اور این ڈی ایس کے سینئر افسران اس حوالے سے ان کی رہنمائی کررہے تھے۔

ان کا کہنا تھا کہ یہ منصوبہ سات آٹھ ماہ قبل تیار کرنا شروع کیا گیا اور اسی لیے گاڑی کئی ماہ تک چھپا ر رکھی گئی کیونکہ ان کا پہلا ہدف دیامر بھاشا ڈیم تھا۔

راولپنڈی: آرمی چیف جنرل قمرجاوید باجوہ نے کہا ہے کہ افغانستان میں جاری کشیدگی میں پاکستان کا کوئی پسندیدہ نہیں.

آئی ایس پی آر کے مطابق آرمی چیف جنرل قمرجاوید باجوہ سے جرمنی، اٹلی اور ہالینڈ کے سفیروں نے ملاقات کی، جس میں باہمی دلچسپی کے امور ، علاقائی سلامتی کی صورتحال پر تبادلہ خیال کیا گیا، اس موقع پر افغانستان کی صورتحال اور یورپی یونین کے ساتھ دوطرفہ تعاون بڑھانے پربھی بات چیت کی گئی۔

ملاقات کے دوران آرمی چیف نے کہا کہ افغانستان میں امن کا مطلب پاکستان میں امن ہے،افغانستان میں جاری کشیدگی میں پاکستان کا کوئی پسندیدہ نہیں ہے، ہماری واحد خواہش افغانستان میں امن اور استحکام کے حصول میں مدد کرنا ہے ، پاکستان یورپی یونین کے ممالک کے ساتھ اپنے تعلقات کو قدر کی نگاہ سے دیکھتا ہے، ہم مشترکہ مفادات کی بنیاد پر باہمی فائدہ مند ملٹی ڈومین تعلقات کو بڑھانے کے لیے سنجیدہ ہیں۔

ملاقات کے دوران ٖیر غیر ملکی سفرا نے علاقائی استحکام میں پاکستان کے کردار کو سراہا اور ہر سطح پر پاکستان کے ساتھ مزید تعاون کے لیے اپنا کردار ادا کرنے کے عزم کا اظہار کیا۔

وزیراعظم عمران خان نے کہا ہے کہ وہ امریکی صدر جوبائیڈن کی فون کال کا حقیقت میں ‘انتظار’ نہیں کر رہے ہیں۔

اسلام آباد میں اپنی رہائش گاہ پر غیر ملکیوں صحافیوں سے گفتگو کے دوران نیوز ایجنسی رائٹرز کے نمائندے کے سوال پر وزیراعظم عمران خان نے کہا کہ ‘میں سن رہا ہوں کہ صدر جوبائیڈن نے مجھے کال نہیں کی، یہ ان کا معاملہ ہے، ایسا نہیں ہے کہ میں ان کا انتظار کر رہا ہوں’۔

وزیراعظم عمران خان کا یہ بیان ایک ایسے وقت میں سامنے آیا ہے جب چند روز قبل ہی قومی سلامتی کے مشیر معید یوسف نے کہا تھا کہ اگر جوبائیڈن نے ہماری قیادت کو اسی طرح نظر انداز کیا تو ہمارے پاس اور مواقع بھی ہیں۔

فنانشل ٹائمز کو انٹرویو میں معید یوسف کا کہنا تھا کہ ‘امریکا کےصدر نے ایک اہم ملک کے طور پر وزیراعظم سے بات نہیں کی، حالانکہ امریکا خود کہتا ہے کہ افغانستان میں بہت اہمیت ہے اور ہم اشارے کو سمجھنے کی کوشش کر رہے ہیں’۔

انہوں نے وضاحت کرنے سے انکار کرتے ہوئے کہا تھا کہ ‘ہمیں ہر وقت یہی کیا گیا کہ فون آئے گا، یہ ٹینکیکل وجہ ہے یا کچھ اور لیکن لوگ اس پر یقین نہیں کرتے، اگر فون کال رعایت ہے، اگر سیکیورٹی کے تعلقات ایک رعایت ہیں تو پھر پاکستان کے پاس آپشنز ہیں’۔

وزیراعظم عمران خان نے غیرملکی صحافیوں سے گفتگو کے افغانستان کی صورت حال، پاکستان پر اس کے اثرات اور جنگ زدہ ملک سے امریکی فوج کے انخلا کے حوالے سے بھی بات کی۔

انہوں نے کہا کہ ‘امریکا جلدی بازی میں چھوڑ گیا، اگر وہ سیاسی حل چاہتے تھے تو پھر عقل مندی کا تقاضا یہی ہے کہ جب آپ طاقت میں ہوں تو مذاکرات کریں’۔

ان کا کہنا تھا کہ امریکا اب پاکستان پر الزام عائد کر رہا ہے جب کوئی موقع نہیں بچا ہے۔

‘امریکا، پاکستان کو صرف افغانستان میں گند صاف کرنے کیلئے کارآمد سمجھتا ہے’

عمران خان نے کہا کہ ‘میرے خیال میں امریکی فیصلہ کر چکے ہیں کہ بھارت اسٹریٹجک شراکت دار ہے، ہوسکتا ہے کہ اسی لیے پاکستان کے ساتھ مختلف سلوک کیا جارہا ہے، پاکستان کو صرف گند صاف کرنے کے لیے کارآمد تصور کیا جاتا ہے’، جو وہ 20 سال سے جاری لڑائی کے بعد افغانستان میں چھوڑ کر جارہا ہے۔

انہوں نے کہا کہ پاکستان کی چین کے ساتھ قربت بھی امریکی رویے میں تبدیلی کی دوسری وجہ ہے۔

ڈان اخبار میں شائع ہونے والی رپورٹ کے مطابق ایسے میں کہ جب عسکریت پسندوں اور افغان حکومت کے مابین مذاکرات تعطل کا شکار ہیں اور افغانستان میں پرتشدد کارروائیاں بڑھ چکی ہیں، واشنگٹن اسلام آباد پر دباؤ ڈال رہا ہے کہ وہ امن معاہدہ کرانے کے لیے طالبان پر اپنا اثر و رسوخ استعمال کرے۔

اسلام آباد میں اپنی رہائش گاہ پر غیر ملکی صحافیوں سے بات کرتے ہوئے وزیر اعظم کا کہنا تھا کہ ‘پاکستان کو صرف یہ گندگی ٹھکانے لگانے کے تناظر میں کارآمد سمجھا گیا ہے جو 20 سال سے ایک فوجی حل تلاش کرنے کی کوشش میں پیچھے رہ گئی ہے جبکہ کوئی عسکری حل تھا ہی نہیں’۔

امریکا سال 2001 میں طالبان کی حکومت ختم کرنے کے 20 سال بعد 31 اگست کو اپنی افواج افغانستان سے نکال لے گا لیکن آج طالبان اس وقت سے کہیں زیادہ علاقے پر قابض ہیں۔

وزیر اعظم نے کہا کہ اسلام آباد، افغانستان میں طرف داریاں نہیں کر رہا۔

ان کا مزید کہنا تھا کہ موجودہ صورتحال میں افغانستان میں ایک سیاسی تصفیہ مشکل لگ رہا ہے۔

وزیر اعظم عمران خان نے کہا کہ جب طالبان کسی تصفیے پر پہنچنے کے لیے پاکستان کے دورے پر آئے تھے اس وقت انہوں نے ان کو قائل کرنے کی کوشش کی تھی۔

وزیر اعظم کے مطابق طالبان رہنماؤں کا کہنا تھا کہ ‘معاملہ یہ ہے کہ جب تک صدر اشرف غنی یہاں موجود ہیں وہ افغان حکومت سے بات چیت نہیں کریں گے’۔

پاکستان پر اثرات
وزیراعظم عمران خان نے صحافیوں سے گفتگو کے دوران زور دیا کہ افغانستان میں کسی قسم کی کشیدگی کی صورت میں سب سے زیادہ نقصان پاکستان کا ہے۔

ان کا کہنا تھا کہ ‘پوچھا گیا تھا کہ کیا آپ پریشان ہیں، ہم بالکل پریشان ہیں کیونکہ وہاں طویل عرصے سے جاری خانہ جنگی جو ملک براہ راست متاثر ہوگا، وہ افغانستان کے بعد پاکستان ہوگا’۔

انہوں نے وضاحت کرتے ہوئے کہا کہ طالبان پختون اکثریتی گروپ ہے اور پاکستان میں پختون اکثریتی علاقوں میں اس کے اثرات پڑیں گے۔

وزیراعظم نے کہا کہ ‘ایسا 2003/2004 میں ہوا تھا کہ افغانستان میں ہونے والے واقعات پر ہمارے پختون علاقوں میں ردعمل آیا تھا اور پاکستان نے 70 ہزار شہری گنوائے کیونکہ ہم امریکا کی حمایت کر رہے تھے’۔

ان کا کہنا تھا کہ ‘اس مرتبہ بھی یہ خدشہ ہے کہ ہمارے پختون علاقوں میں دوبارہ مسائل ہوں گے جبکہ تقربیاً 30 لاکھ افراد قبائلی علاقوں سے بے گھر ہوگئے تھے’۔

وزیراعظم نے نشان دہی کی کہ پاکستان میں پہلے ہی 30 لاکھ رجسٹرد مہاجرین ہیں اور بڑی تعداد شمار میں بھی نہیں ہے، دوسری جانب ‘ہماری معیشت ابھی بحال ہو رہی ہے تو ہم نہیں چاہتے کہ مہاجرین کا ایک اور ریلہ آئے’۔

انہوں نے کہا کہ افغانستان میں خانہ جنگی سے پاکستان کے وسطی ایشیا سے منسلک ہونے اور معاشی ایجنڈے کے منصوبے کو نقصان پہنچے گا۔

ان کا کہنا تھا کہ طالبان کی جانب سے افغان حکومت کو عسکری قبضے کے ذریعےبے دخل کردیا تو پاکستان کے لیے ‘ڈراؤنا خواب جیسے حالات’ ہوں گے۔

انہوں نےکہا کہ افغانستان کثیرالنسلی ملک ہے، اگر طالبان نے قبضے کی کوشش کی اور ایک گروپ کو دوسروں پر مسلط کرنے کی کوشش کی تو پھر اس سے ‘مسلسل بدامنی ہوگی اور پاکستان ایسا نہیں چاہتا ہے’۔

ان کا کہنا تھا کہ افغانستان میں کشیدگی سے پاکستان پر اثرات ہوں گے۔

عمران خان نے کہا کہ ‘افغانستان کے مقابلے میں پاکستان کی آبادی کا بڑا حصہ پختون ہے اور وہ ممکنہ طور پر دنیا میں غیرملکی تسلط کے خلاف سب سے زیادہ بپھرے ہوئے لوگ ہیں، عام حالات میں وہ ایک دوسرے سے لڑتے ہیں لیکن بیرونی فورسز کا معاملہ آتا ہے تو وہ سب یکجا ہوجاتے ہیں’۔

انہوں نے کہا کہ امریکا کی قیادت میں 2001 میں شروع ہونے والے دہشت گردی کے خلاف جنگ میں پاکستان کی شمولیت سے ‘قبائلی علاقوں میں خانہ جنگی’ ہوئی اور اس کے نتیجے میں جہاد کے نام پر انتہاپسند تنظیمیں وجود میں آئیں جو روس کے خلاف تھی وہ پاکستان کے خلاف ہوگئیں۔

ان کا کہنا تھا کہ ‘پاکستان کے مفاد میں ہے کہ افغانستان میں ایک سیاسی حل نکلے اور تمام فریقین مل کر حکومت بنائیں، جس میں ان کی نمائندگی ہو’۔

‘طالبان پر پاکستان کا اثر و رسوخ نہیں’
وزیراعظم نے طالبان پر پاکستان کے اثر و رسوخ کے حوالے سے ایک سوال پر کہا کہ 2001 میں جب پاکستان نے طالبان کی حکومت کو تسلیم کیا تھا اور ان پر ‘سب سے زیادہ اثر و رسوخ رکھتا تھا’ تو اس وقت بھی انہوں نے اسامہ بن لادن کی حوالگی سے انکار کردیا تھا۔

انہوں نے کہا کہ ‘پاکستان کا ان پر اثر و رسوخ نہیں رہا’۔

ان کا کہنا تھا کہ جو کوئی یہ سمجھتا ہے کہ افغانستان کو باہر سے بیٹھ کر کنٹرول کیا جاسکتا ہے تو وہ افغانوں کے رویوں سے واقف نہیں ہے اور لوگ کٹھ پتلی نہیں ہوسکتے۔

عمران خان نے کہا کہ ‘اگر میں 1990 کی دہائی میں پاکستان کا پالیسی ساز ہوتا تو ہم اسٹریٹجک ڈیپتھ کے اس منصوبے کی حوصلہ افزائی نہیں کرتا جو اس وقت پاکستان کی پالیسی تھی’۔

انہوں نے کہا کہ ‘یہ قابل فہم بات ہے کیونکہ بھارت جو حجم میں پاکستان سے7 گنا زیادہ ہے، جو مغربی ہمسایے سے کشیدگی میں ملوث تھا اور پاکستان کا سیکیورٹی سیٹ اپ دو محاذوں پر کشیدگی کا شکار تھا تو اسی لیے ہمیشہ افغانستان میں پاکستان کی حامی حکومت کی کوشش کی گئی’۔

ان کا کہنا تھا کہ افغان حکومت پر اثر و نفوذ کی کوششیں کام نہیں آئیں گی کیونکہ افغانستان کے عوام اس کو تسلیم نہیں کریں گے اور باہر سے کنٹرول کرن کا کوئی بھی تاثر ساکھ ختم کردے گا۔

انہوں نے کہا کہ ‘پاکستان کو کسی بھی حکومت کے ساتھ کام کرنا چاہیے جس کو افغانستان کے عوام نے منتخب کیا ہو’۔

افغان حکومت کا رویہ
وزیراعظم عمران خان کا کہنا تھا کہ رواں برس کے اوائل میں طالبان کے سینئر رہنماؤں کے دورہ پاکستان کے موقع پر انہیں سیاسی حل کے لیے راغب کرنے کی کوشش کی تھی لیکن انہوں نے صدر اشرف غنی سے مذاکرات سے انکار کیا تھا۔

انہوں نے کہا کہ میں نے 2019 صدارتی انتخابات سے قبل عبوری حکومت کی تجویز دی تھی لیکن اس بیان پر افغان حکومت نے بڑی تنقید کی تھی لیکن جب اشرف غنی منتخب ہوئے اور طالبان کو شامل نہیں کیا گیا تو پھر س کے بعد مسائل شروع ہوئے اور اسی وقت سے انہیں تسلیم کرنے اور مذاکرات کرنے پر زور دیتا رہا ہوں۔

انہوں نے کہا کہ ‘اب افغان حکومت پاکستان پر بہت زیادہ تنقید کر رہی ہے اور وہ سمجھتے ہیں کہ ہمارے پاس کچھ جادوئی طاقت ہے، جس کے ذریعے ہم طالبان سے جو کروانا چاہیں کروائیں گے’۔

ان کا کہنا تھا کہ افغان حکومت کو سمجھنا چاہیے کہ امریکی انخلا کے بعد پاکستان کو حاصل سہولت ختم ہوچکی ہے۔

انہوں نے کہا کہ جب امریکا نے انخلا کی تاریخ دی ہے، تب سے طالبان کو سمجھانا مشکل ہوگیا ہے اور اب افغان حکومت وہاں کی صورت حال پر الزام پاکستان کو دے رہی ہے۔

عمران خان کا کہنا تھا کہ ‘وہ سمجھتے ہیں کہ پاکستان کے پاس سپر نیچرل طاقت ہے اور ہم سپر پاور پلس ہیں اور ایسی طاقت ہے کہ 60 ہزار سے 70 ہزار طالبان کو افغان حکومت کے 3 لاکھ فوجیوں سے، جو ایئرکرافٹ اور جدید ہتھیاروں سے لیس ہے، اس کے باوجو ہم طالبان کو کامیابی دلانے کی طاقت رکھتے ہیں’۔

انہوں نے کہا کہ افغان حکومت چاہتی ہے کہ امریکا دوبارہ مداخلت کرے لیکن وہ یہاں 20 سال تک رہے ہیں تو وہ اب ایسا کیا کریں گے جو وہ گزشتہ 20 سال میں نہ کرسکے۔

وزیراعظم کا کہنا تھا کہ پاکستان نے واضح کردیا ہے کہ ‘ہماری سرزمین افغانستان میں کارروائیوں کے لیے استعمال نہیں ہوگی تاکہ ہم افغانستان کی خانہ جنگی میں دوبارہ الجھ نہ جائیں اور اپنی حدود میں کوئی فوجی بیس دینا نہیں چاہتے’۔

ان کا کہنا تھا کہ ‘جہاں تک میری معلومات ہیں، امریکی 31 اگست کے بعد ہر قسم کی کارروائیاں یہاں تک افغانستان میں حملے بھی بند کردیں گے’۔

یاد رہے کہ طالبان، اشرف غنی اور ان کی حکومت کو امریکی کٹھ پتلی سمجھتے ہیں، ان کے اور افغان مذاکراتی ٹیم کے درمیان بات چیت کا آغاز گزشتہ برس ستمبر میں ہوا تھا لیکن اس میں کوئی قابل ذکر پیش رفت نہ ہوسکی۔

امریکا سمیت متعدد ممالک کے نمائندے قطر کے دارالحکومت دوحہ میں جنگ بندی کرانے کی آخری کوشش کے طور پر دونوں فریقین سے بات چیت کر رہے ہیں۔

امریکی افواج نے طالبان کی پیش قدمی کے خلاف افغان فورسز کی مدد کے لیے فضائی حملے جاری رکھے ہیں لیکن یہ واضح نہیں کہ کیا 31 اگست کے بعد بھی یہ تعاون جاری رہے گا۔

وزیر اعظم عمران خان نے کہا کہ پاکستان واضح کرچکا ہے کہ وہ افغانستان سے امریکی انخلا کے بعد ملک میں کوئی امریکی فوجی اڈا نہیں چاہتا۔

وفاقی وزیر داخلہ شیخ رشید کا کہنا ہے کہ افغان سفیر کی بیٹی کا تین مختلف زبانوں میں انٹرویو پاکستان کے خلاف میڈیا وار کا حصہ ہے۔

اسلام آباد میں میڈیا سے گفتگو کرتے ہوئے شیخ رشید کا کہنا تھا کہ افغان سفیر کی بیٹی ہماری بیٹیوں کی طرح ہے، وہ اغوا نہیں ہوئی تھی، اس معاملے پر پاکستان کو مورد الزام نہ ٹھہرائیں۔

شیخ رشید کا کہنا تھا کہ بھارت نے پاکستان کے خلاف میڈیا وار شروع کر رکھی ہے اور افغان سفیر کی بیٹی سلسلہ خیل کا 3 مختلف زبانوں میں انٹرویو پاکستان کے خلاف میڈیا وار کا حصہ ہے، یہی رویہ جاری رکھا گیا تو ہمارے پاس ساری فوٹیج اور ثبوت موجود ہیں، شواہد پیش کیے تو پھر کسی کو گلہ نہیں ہونا چاہیے، ہم نے افغان ٹیم کو مکمل طور پر مطمئن کرکے بھیجا ہے۔

نور مقدم قتل کیس کے حوالے سے بات کرتے ہوئے شیخ رشید کا کہنا تھا کہ قاتل کی فارنزک رپورٹ مل گئی ہے اور میچ بھی کر گئی ہے، نور مقدم کیس میں والدین سمیت ملزمان کے نام ای سی ایل میں ڈال دیئے گئے ہیں۔

حکومت مخالف اپوزیشن اتحاد پاکستان ڈیموکریٹک موومنٹ (پی ڈی ایم) سے متعلق بات کرتے ہوئے وفاقی وزیر نے کہا کہ پی ڈی ایم کا اجلاس انجمن ستائش باہمی کی میٹنگ تھی، وہ تو پچھلے سال بھی جلسے کر رہے تھے ہمیں جلسے کرنے پر کوئی اعتراض نہیں ہے۔

ان کا کہنا تھا کہ فضل الرحمان کا کہنا ہے کہ افغانستان میں مذاکرات ہونے چاہئیں، یہی تو عمران خان بھی کہہ رہے ہیں، پی ڈی ایم نے افغانستان پر جو بیان دیا، عمران خان کا بھی یہی بیانیہ ہے کہ افغانستان کا مسئلہ افغانیوں پر چھوڑتے ہیں، ہم افغانستان میں مذاکرات اور امن کے حامی ہیں، یہی بات پی ڈی ایم والے بھی کر رہے ہیں۔

افغان مہاجرین کے حوالے سے بات کرتے ہوئے وزیر داخلہ کا کہنا تھا کہ کورونا اور این سی او سی ایجنڈے کے تحت پاک افغان سرحد بند ہے، بارڈر مینجمنٹ کی وجہ سے افغان مہاجرین وہاں سے یہاں نہیں آ رہے، افغان مہاجرین ترکی اور دیگر ملکوں کا رخ کر رہے ہیں۔

ایک سوال کے جواب میں وزیر داخلہ کا کہنا تھا سابق وزیراعظم نواز شریف کی شریانیں سکڑ رہی ہیں تو پاکستان آئیں اور قوم کو سچ بتائیں، شہباز شریف نے اب تک اپیل نہیں کی، میں نہیں سمجھتا کہ وہ باہر جانا چاہتے ہیں، شہباز شریف میڈیا میڈیا کھیلنا چاہتے ہیں۔

انہوں نے کہا کہ پی ڈی ایم ہےکیا، ایک فضل الرحمان اور دوسری ن لیگ، باقی 9 جماعتوں کا کوئی نام بتا دیں، ان 9 جماعتوں کی تو میری طرح ایک سیٹ بھی نہیں ہے، پی ڈیم ای ٹائیں ٹائیں فش ہے، چوں چوں کا مربہ ہے۔

ان کا کہنا تھا پی ڈی ایم کو کہنا چاہتا ہوں کہ پاکستان ایک اہم کردار ادا کرنے جا رہا ہے، پاکستان دنیا کے اہم ترین ایشو پر مرکزی کردار ادا کرنے والا ملک بننے والا ہے۔

پی ڈی ایم والے جو مرضی کر لیں الیکشن وقت پر ہوں گے: وفاقی وزیر
پنجاب میں تحریک عدم اعتماد سے متعلق سوال پر وفاقی وزیر کا کہنا تھا کہ اپوزیشن پنجاب میں عدم اعتماد کا شوق پورا کر لے، پنجاب حکومت کے ساتھ ہوتا ہے اپوزیشن کے ساتھ نہیں۔

ملک میں قبل از قت انتخابات سے متعلق سوال پر شیخ رشید کا کہنا تھا کچھ نہیں ہونے جا رہا، جو مرضی کر لیں الیکشن وقت پر ہوں گے، عمران خان نے تین سال نکال لیے ہیں، ایک سال تو الیکشن مہم میں لگ جاتا ہے، پانچواں سال الیکشن کی تیاری کا ہوتا ہے۔

مظفرآباد: پاکستان تحریک انصاف (پی ٹی آئی) کے علاقائی صدر بیرسٹر سلطان محمود نے 17 اگست کو ہونے والے آزاد جموں و کشمیر (اے جے کے) کے صدارتی انتخابات میں پارٹی کے امیدوار بننے پر رضامندی کا اظہار کردیا ہے۔

رپورٹ کے مطابق بیرسٹر سلطان محمود 25 جولائی کو ایل اے 3، میرپور 3 سے قانون ساز اسمبلی (ایم ایل اے) کے رکن منتخب ہوئے۔

1985 کے بعد سے ہونے والے عام انتخابات میں سے انہوں نے 7 عام انتخابات میں کامیابی حاصل کی جس کے علاوہ انہوں نے اس حلقے میں ہونے والے دو ضمنی انتخابات میں بھی کامیابی حاصل کی تھی۔

تحریک انصاف کی آزاد جموں و کشمیر کے انتخابات میں کامیابی کے بعد وزیر اعظم کے امیدوار کے طور پر نامزد ہونے کی توقع کرنے والے بیرسٹر سلطان محمود کو 5 اگست کو اس وقت ایک دھچکا لگا جب سردار عبدالقیوم نیازی، جو آزاد کشمیر کے وزیر اعظم کے امیدواروں کی فہرست میں کہیں بھی نہیں تھے، کو وزیر اعظم عمران خان نے عہدے کے لیے منتخب کیا۔

اسمبلی میں اپنا ووٹ ڈالنے کے فوراً بعد پی ٹی آئی کے علاقائی سربراہ مظفر آباد سے بظاہر مایوسی کی حالت میں اپنے حلقہ انتخاب کے لیے روانہ ہو گئے تھے۔

تاہم میرپور میں انہوں نے خوشگوار موڈ میں اپنے حامیوں کے ایک بڑے اجتماع سے خطاب کیا تھا۔

انہوں نے کہا تھا کہ ‘مجھے راحت محسوس ہوتی ہے کہ میں نے گزشتہ سات سالوں میں (آزاد جموں کشمیر میں) دن رات کام کیا اور آخر کار اقتدار حاصل کرلیا ہے’۔

اپنے ووٹروں کو یقین دلاتے ہوئے کہ مہم کے دوران ان سے کیے گئے تمام وعدے پورے کیے جائیں گے، انہوں نے ان کو یہ کہہ کر مطمئن کیا کہ سیاست ٹی 20 نہیں بلکہ ایک ٹیسٹ میچ ہے اور بالآخر وہ اس میں فاتح بن کر ابھریں گے۔

ذرائع کے مطابق پی ٹی آئی کی قیادت نے بیرسٹر سلطان محمود کو بتایا کہ ان کے صدر کے عہدے پر فائز ہونے کے بعد ان کے بیٹے کو میرپور 3 سے متعارف کرایا جائے گا اور بعد میں کابینہ میں شامل کیا جائے گا۔

ابتدا میں انہوں نے ہچکچاہٹ کا مظاہرہ کیا کیونکہ اس صورت میں انہیں اسمبلی اور پارٹی کا اعلیٰ علاقائی دفتر دونوں چھوڑنا پڑے گا تاہم سلطان محمود نے وزیراعظم عمران خان سے خود اس حوالے سے بات کرنے کے بعد اپنا ارادہ بدل لیا۔

ان کی رضامندی کے بعد وفاقی وزیر برائے کشمیر امور علی امین گنڈا پور نے صدر کے عہدے کے لیے ان کی امیدوار ہونے کا اعلان کیا۔

خیال رہے کہ بیرسٹر سلطان محمود کشمیر کی سیاست میں ایک اہم مقام رکھتے ہیں اور وزیراعظم عمران خان نے آزاد کشمیر کے صدر کے عہدے کے لیے ان کے نام کی منظوری دے دی ہے۔

دریں اثنا بیرسٹر سلطان محمود کی رضامندی اور علی امین گنڈا پور کے اعلان کے بعد آزاد کشمیر میں پی ٹی آئی پارلیمانی پارٹی میں ایک مبینہ گروہ بندی ختم ہونے کا خیال سامنے آیا ہے جس نے ریاستی کابینہ کی تشکیل میں تاخیر کی تھی۔

ذرائع نے دعویٰ کیا کہ ابتدائی طور پر 12 رکنی کابینہ جس میں آزاد کشمیر کے علاقے سے 9 اور پاکستان میں کشمیری مہاجرین کے دو حلقے شامل تھے، کو سینیٹر سیف اللہ نیازی اور علی امین گنڈا پور نے حتمی شکل دی۔

دونوں رہنماؤں نے اپنے پورٹ فولیو کا انتخاب بھی کیا تھا۔

یہاں یہ بات قابل ذکر ہے کہ ذرائع نے بتایا کہ آزاد جموں و کشمیر کے وزیر اعظم جو آئین کے تحت وزیروں کے تقرر کا اختیار رکھتے ہیں اور ان کے لیے مناسب محکموں کو الاٹ کرتے ہیں، اس عمل میں کہیں بھی شامل نہیں ہیں۔

اسلام آباد: این سی او سی کے سربراہ اسد عمر نے کہا کہ ایک برس کے دوران کورونا ایس او پیز کی سب سے زیادہ خلاف ورزی سیاستدانوں کی طرف سے ہوئی ہے۔

اپنی ٹوئٹ میں اسد عمر نے کہا کہ انہوں نے آزاد جموں و کشمیر کے انتخابات کو چند ماہ کے لیے ملتوی کر نے اور اس سے قبل ایک خصوصی ویکسی نیشن مہم شوع کرنے کی سفارش کی تھی۔ آزاد کشمیر کے انتخابات نے اب وہاں وبا کا پھیلاؤ بڑھانے میں سب سے زیادہ کردار ادا کیا ہے اور اب وہاں کورونا مثبت کیسز کی شرح 25 سے 30 فیصد ہوگئی ہے.

اسد عمر نے مزید کہا کہ دو ہفتے قبل بلاول بھٹو زرداری دھمکیاں دے رہے تے کہ اگر کراچی میں کورونا پھیلا تو اس کے ذمہ دار وزیر اعظم عمران خان اور ان کے وزرا ہوں گے لیکن اب اپوزیشن اتحاد پی ڈی ایم نے کراچی میں جلسے کا اعلان کیا ہے۔ افسوس کی بات یہ ہے کہ گزشتہ ایک برس کے دوران کورونا ایس او پیز کی سب سے زیادہ خلاف ورزی سیاستدانوں کی طرف سے ہوئی ہے۔