All posts by News Editor

بھارت کی جانب سے پاکستان کو ایک مرتبہ پھر افغانستان کی صورتحال پر اقوام متحدہ کی سلامتی کونسل مٰں ہونے والی بحث میں شرکت کرنے سے روکنے کی کوشش پر پاکستان نے ‘رکاوٹ ڈالنے کے اقدامات’ اور ملک سے نفرت کی مذمت کی ہے۔

رپورٹ کے مطابق بھارت، جو سلامتی کونسل کا موجودہ صدر ہے، اس نے اشرف غنی حکومت کے سفیر کو اس ہنگامی اجلاس کا حصہ بننے کی اجازت دی۔

پاکستان اور افغانستان دونوں نے اقوامِ متحدہ کی سلامتی کونسل کے رول نمبر 37 کے تحت اپنی درخواستیں جمع کروائی تھیں جو ایک غیر رکن ملک کو کونسل سے خطاب کرنے کی اجازت دیتی ہے۔

دونوں ممالک موجودہ کونسل کے رکن نہیں ہیں جس کے 5 مستقل اور 10 غیر مستقل اراکین ہوتے ہیں، اس سے قبل بھارت نے ایران کو بھی روکا تھا۔

پیر کے روز پاکستان کی جانب سے ہنگامی اجلاس میں شرکت کی درخواست جمع کروائی گئی تھی جو رواں ماہ جمع کروائی گئی دوسری درخواست تھی، جسے بھارت نے مسترد کردیا۔

حالانکہ اس سلسلے میں دیگر اراکین سے بھی مشاورت کی جاتی ہے لیکن کونسل کا صدر حتمی فیصلہ کرتا ہے۔

بعد ازاں اقوامِ متحدہ میں پاکستان کے مستقبل مندوب منیر اکرم کا ایک نیوز بریفنگ میں کہنا تھا کہ بھارت کا انکار انتہائی افسوسناک ہے۔

انہوں نے کہا کہ ہمیں یقین ہے کہ افغانستان کی تقدیر میں اس اہم ترین موڑ پر پاکستان کی شراکت اہم ہے۔

انہوں نے کہا کہ بھارت نے اسی رول کے ذریعے افغانستان کو اجازت دے دی جو اس وقت 15 ممالک کا حصہ نہیں ہے لیکن ایران اور پاکستان کو روک دیا۔

ان کا کہنا تھا کہ بھارت کے متعصبانہ اور رکاوٹ پر مبنی اقدامات پاکستان کے لیے اس کی نفرت کی مثال ہیں، وہ افغانستان میں تنازع جاری رکھنے اور وہاں سے پاکستان کے خلاف دہشت گردی کی سرپرستی جاری رکھنے کا ارادہ رکھتا ہے۔

دوسری جانب اقوامِ متحدہ میں افغانستان کے مندوب غلام اسحٰق زئی نے اس خوف کے بارے میں بات کی، جس نے کابل اور دیگر افغان شہروں کو اپنی لپیٹ میں لے رکھا ہے۔

ان کا کہنا تھا کہ کابل کے شہری بتا رہے ہیں کہ طالبان نے شہر کے کچھ علاقوں میں گھر گھر تلاشی لینا شروع کردی ہے، لوگوں کے نام لکھ رہے ہیں اور اپنی ٹارگٹ لسٹ میں موجود افراد تلاش کررہے ہیں۔

ان کا کہنا تھا کہ دارالحکومت کابل میں ٹارگٹ کلنگ اور لوٹ مار کی اطلاعات بھی موصول ہورہی ہیں۔

پاکستانی مندوب کا کہنا تھا کہ افغان مندوب ایک معزز ساتھی ہیں لیکن جس شخص نے انہیں تعینات کیا تھا وہ افغانستان سے فرار ہوچکا ہے اس لیے معلوم نہیں وہ سلامتی کونسل کے اجلاس میں کس کی ایما پر شرکت کررہے ہیں۔

ان کا کہنا تھا کہ اگر پاکستان کونسل میں بات کرتا تو ہم سفارتکاروں، بین الاقوامی اداروں کے نمائندوں اور دیگر افراد کے افغانستان سے انخلا میں سہولت فراہم کرنے کی اپنی کوششوں سے بھی آگاہ کرتے۔

انہوں نے مزید کہا کہ پاکستان کا ہمیشہ سے یقین تھا کہ افغان تنازع کا کوئی عسکری حل نہیں ہے اور افغانستان میں ایک جامع سیاسی تصفیے کی کوشش جاری رکھے ہوئے ہے۔

امریکا نے پاکستان سمیت نصف درجن دیگر ممالک سے رابطہ کیا ہے جس کے بارے میں اس کا خیال ہے کہ وہ افغانستان کی صورت حال پر اثر انداز ہو سکتے ہیں۔

پاکستان، چین، روس، بھارت اور ترکی کے وزرائے خارجہ اور برطانیہ کے سیکریٹری خارجہ ان اعلیٰ سفارتکاروں میں شامل تھے جن سے امریکی سیکریٹری خارجہ اینٹونی بلنکن نے رابطہ کیا۔

انہوں نے نیٹو کے سیکریٹری جنرل اور یورپی یونین کے اعلیٰ نمائندوں سے بھی بات کی۔

خیال رہے کہ پاکستان کی افغانستان کے ساتھ 2 ہزار 252 کلومیٹر طویل سرحد ہے جبکہ چین کی واخان راہداری کے ساتھ ایک چھوٹی لیکن حساس سرحد افغانستان کے ساتھ منسلک ہے۔

روس اور افغانستان کے درمیان سرحد نہیں تاہم 1989 میں جنگ زدہ ملک سے اپنی فوجوں کے انخلا کے بعد سے افغان باغیوں کے ساتھ قریبی تعلقات استوار کر چکا ہے۔

ترکی نے بھی روایتی طور پر افغانستان کے ساتھ اچھے تعلقات قائم کر رکھے ہیں اور برطانیہ کا بھی وہاں کچھ اثر و رسوخ ہے۔

اس کے علاوہ یورپی یونین نے افغانستان کے ساتھ اقتصادی امداد فراہم کرنے میں امریکا کے ساتھ شراکت داری کی اور وہاں امریکا کی فوجی موجودگی کی حمایت کرتا رہا ہے۔

چین سے رابطے میں امریکا نے اپنے خدشات کا اظہار کیا کہ بیجنگ خطے میں اپنا اثر و رسوخ بڑھانے کے لیے افغانستان سے امریکا کے انخلا کا فائدہ اٹھا سکتا ہے۔

امریکی پالیسی سازوں کا خیال ہے کہ چین کے مسلم اکثریتی صوبے سنکیانگ میں مسائل بیجنگ اور واشنگٹن کے درمیان تعاون کا موقع فراہم کرتے ہیں۔

ان کا کہنا تھا کہ ان کی طرح چین بھی خطے میں مذہبی شورش نہیں چاہتا کیونکہ اس سے سنکیانگ پر منفی اثرات مرتب ہوں گے۔

واشنگٹن کا خیال ہے کہ بھارت، افغانستان میں بھی مفید ثابت ہو سکتا ہے جہاں وہ مختلف مقامات پر اثر و رسوخ رکھتا ہے۔

تاہم واشنگٹن میں پالیسی سازوں اور اسکالرز نے بارہا کہا کہ ان میں سے کوئی بھی ملک افغانستان کے ساتھ پاکستان کے تعلقات کی گہرائی سے مطابقت نہیں رکھتا۔

ڈونلڈ ٹرمپ اور جو بائیڈن دونوں انتظامیہ نے عوامی سطح پر طالبان کے ساتھ فروری 2020 کے امن معاہدے کو حتمی شکل دینے میں پاکستان کی حمایت کو تسلیم کیا ہے۔

مزید یہ کہ واشنگٹن افغانستان میں اثر و رسوخ کے لیے بھارت اور پاکستان کے درمیان جدوجہد سے آگاہ ہے اور چاہتا ہے کہ دونوں ممالک اپنی دشمنی سے حساس علاقے میں پہلے سے کشیدہ صورتحال کو مزید کشیدہ نہ ہونے دیں۔

اس سلسلے میں اینٹونی بلنکن نے پیر کے روز اپنے بھارتی اور پاکستانی ہم منصبوں سے ٹیلی فونک رابطہ کیا۔

وزیر خارجہ کا اینٹونی بلنکن سے افغانستان صورتحال پر تبادلہ خیال
سیکریٹری اینٹونی بلنکن کی کال کے بعد امریکی محکمہ خارجہ نے دو بیانات جاری کرتے ہوئے کہا کہ ‘سیکریٹری اینٹونی بلنکن نے پاکستانی وزیر خارجہ شاہ محمود قریشی سے بات کی’۔

سیکریٹری اینٹونی بلنکن اور وزیر خارجہ شاہ محمود قریشی نے افغانستان اور وہاں پیدا ہونے والی صورتحال پر تبادلہ خیال کیا۔

ریڈیو پاکستان کی رپورٹ کے مطابق وزیر خارجہ شاہ محمود قریشی نے کہا کہ پاکستان، افغانستان میں امن و استحکام کی کوششوں کو فروغ دینے کے لیے امریکا سمیت دیگر بین الاقوامی شراکت داروں کے ساتھ قریبی رابطے میں رہے گا۔

وزیر خارجہ نے زور دیا کہ ایک جامع سیاسی حل ہی آگے بڑھنے کا واحد راستہ ہے، افغانستان کے لیے امریکا کے معاشی تعاون کا تسلسل بھی انتہائی اہم ہے۔

اس کے علاوہ بتایا گیا کہ شاہ محمود قریشی نے اینٹونی بلنکن کو پاکستان سے سفارتی مشنز اور بین الاقوامی اداروں کے عملے اور دیگر افراد کو افغانستان سے نکالنے میں سہولت کاری کے حوالے سے پاکستان کی کوششوں سے آگاہ کیا۔

بھارت سے رابطہ
امریکی سیکریٹری خارجہ کی جانب سے جاری کردہ بیان کے مطابق سیکریٹری اینٹونی بلنکن نے ‘بھارتی وزیر خارجہ ڈاکٹر ایس جے شنکر سے افغانستان اور وہاں کی بدلتی ہوئی صورتحال کے بارے میں بھی بات کی’۔

اس کے باوجود بھارت نے پاکستان کے ساتھ اپنی کشیدگی کو کم کرنے کی کوئی علامت ظاہر کی اور پیر کو اس نے پاکستان کو ایک مرتبہ پھر افغان صورتحال پر اقوام متحدہ کی سلامتی کونسل (یو این ایس سی) کی بحث میں حصہ لینے سے روک دیا۔

بھارت سلامتی کونسل کے موجودہ بھارتی صدر نے اشرف غنی کی حکومت کے سفیر کو ہنگامی اجلاس سے خطاب کی اجازت دی۔

پاکستان اور افغانستان دونوں نے اپنی درخواستیں یو این ایس سی کے رول 37 کے تحت جمع کرائی تھیں جو ایک غیر رکن کو کونسل سے خطاب کرنے کی اجازت دیتا ہے۔

دونوں موجودہ کونسل کے ممبر نہیں ہیں جس کے پانچ مستقل اور دس غیر مستقل ارکان ہیں۔

اس سے قبل بھارت نے ایران کو بھی ایک سیشن سے خطاب کرنے سے روک دیا تھا۔

ایسا کرتے ہوئے بھارت نے اقوام متحدہ کے سیکریٹری جنرل انتونیو گوتریس کی افغانستان پر بین الاقوامی اتحاد کی اپیل کو بھی نظر انداز کیا تھا۔

اقوام متحدہ کے سربراہ نے کہا تھا کہ اب وقت آگیا ہے کہ ایک ہو کر کھڑے ہوں۔

انہوں نے اقوام پر زور دیا کہ وہ افغان مہاجرین کو قبول کرنے اور ملک بدری کو روکنے کے لیے آمادگی ظاہر کریں۔

ہنگامی اجلاس سے اپنے خطاب میں اقوام متحدہ کے سربراہ نے اقوام پر زور دیا کہ وہ اس تقسیمی انداز سے گریز کریں اور انہیں یاد دلایا کہ افغانستان کی آج کی صورت حال میں پوری عالمی برادری کے تعاون کی ضرورت ہے۔

انہوں نے کہا کہ ‘آئندہ چند روز اہم ہوں گے، دنیا دیکھ رہی ہے، ہم افغانستان کے لوگوں کو اکیلا نہیں چھوڑ سکتے اور نہ ہی چھوڑ سکتے ہیں’۔

بعد ازاں اقوام متحدہ میں پاکستان کے سفیر منیر اکرم نے نیویارک میں نیوز بریفنگ کے دوران بھارت پر تنقید کی۔

ان کا کہنا تھا کہ ‘بھارتی تردید انتہائی افسوسناک ہے، ہمیں یقین ہے کہ افغانستان کی تقدیر میں اس اہم موڑ پر پاکستان کی شراکت اہم ہے’۔

منیر اکرم نے کہا کہ بھارت کی جانبدارانہ اور رکاوٹ پر مبنی کارروائیاں پاکستان سے نفرت کی عکاسی کرتی ہیں۔

انہوں نے بھارت پر الزام لگایا کہ وہ ‘افغانستان میں تنازع جاری رکھنے اور افغانستان سے پاکستان کے خلاف دہشت گردی کی سرپرستی جاری رکھنے کی منصوبہ بندی کر رہا ہے’۔

اسلام آباد: صدر ڈاکٹر عارف علوی نے مغربی دنیا اور افغان حکام کی جانب سے طالبان کی حمایت کا الزام مسترد کر دیا۔

ترکی کے سرکاری ٹی وی ٹی آر ٹی کو انٹرویو میں صدر ڈاکٹر عارف علوی نے کہا کہ پاکستان پر الزام تراشی کا سلسلہ اب بند ہونا چاہیے، افغانستان میں افغان عوام کی مرضی کی حکومت ہونی چاہیے، عوام کی مرضی سے جو بھی حکومت بنی اس کی حمایت کرینگے، افغان عوام نے طالبان کو خوش آمدید کہا ہے، وزیراعظم عمران خان نے ہمیشہ کہا ہے کہ لڑائی افغان مسئلےکا حل نہیں۔

ڈاکٹر عارف علوی نے کہا کہ افغانستان کا پڑوسی ملک ہونے کے ناطے پاکستان کی اہمیت ہے، پاکستان امریکا تعلقات ہمیشہ سے اچھے اور مضبوط رہے ہیں، کوئی بھی ملک افغانستان کی سابق حکومت کے زوال کا ذمہ دار نہیں، افغانستان کی تعمیر نو کیلئے عالمی برادری کو آگے آنا ہو گا، طالبان نے ضمانت دی ہے کہ افغانستان کی سرزمین کسی دوسرے ملک کے خلاف استعمال نہیں ہوگی۔

صدر مملکت کا کہنا تھا کہ پاکستان اور ترکی کا کئی معاملات پر یکساں موقف ہے، دونوں میں مثالی دوستی ہے اور کئی شعبوں میں مزید تعاون بڑھانے کی ضرورت ہے، دونوں کے درمیان افغان معاملے پر بھی بات ہوئی ہے، افغانستان میں کسی طرح بھی خونریزی نہیں ہونی چاہیے، میرا نہیں خیال کہ افغانستان میں خواتین کے ساتھ امتیازی سلوک کیا جائے گا۔

صدر مملکت نے مزید کہا کہ پاکستان عالمی برادری کو مقبوضہ کشمیر کی بدترین صورتحال سے آگاہ کر رہا ہے، پاکستان بھارت سمیت تمام ہمسایہ ملکوں کے ساتھ بہتر تعلقات کا خواہاں ہے، بھارتی حکومت اقلیتوں کے ساتھ امتیازی سلوک کر رہی ہے، ہم نے عالمی برادری کو بھارت کے اپنی اقلیتوں کے ساتھ ناروا سلوک سے آگاہ کیا ہے۔

اسلام آباد: سپریم کورٹ نے 2018 کے عام انتخابات میں پنجاب اسمبلی کی نشست پر شاہ محمود قریشی کو ہرانے والے سلمان نعیم کی رکنیت بحال کردی۔

جسٹس عمر عطا بندیال کی سربراہی میں سپریم کورٹ کے 3 رکنی بینچ نے پنجاب اسمبلی کی نشست پی پی 217 سے سلمان نعیم کی نااہلی سے متعلق الیکشن کمیشن کے فیصلے کو کالعدم قرار دے دیا۔ سپریم کورٹ نے فریقین کا موقف سننے کے بعد سلمان نعیم کو رکن پنجاب اسمبلی بحال کر دیا ہے۔

سلمان نعیم نے 2018 کے انتخابات میں آزاد امیدوار کی حیثیت سے پنجاب اسمبلی کی نشست پی پی 217 پر موجودہ وزیر خارجہ شاہ محمود قریشی کو شکست دی تھی۔

واضح رہے کہ الیکشن کمیشن نے سلمان نعیم کو کم عمری اور دو شناختی کارڈز رکھنے پر نا اہل کیا تھا۔ سلمان نعیم نے الیکشن کمیشن کے فیصلے کو لاہورہائی کورٹ میں چیلنج کیا تھا تاہم عدالت عالیہ نے ان کی درخواست خارج کردی تھی، جس کے بعد انہوں نے سپریم کورٹ سے رجوع کیا تھا۔

اسلام آباد: وزارت سائنس اینڈ ٹیکنالوجی نے الیکشن کمیشن کو الیکٹرانک ووٹنگ مشین پر ڈیمو دیا جس کے بعد الیکشن کمیشن نے اپنی ٹیکنیکل ٹیم نامزد کرتے ہوئے تجاویز و خدشات بھی پیش کردیں۔

الیکشن کمیشن نے کہا ہے کہ ٹیکنالوجی کے استعمال کی حمایت کرتے ہیں لیکن ایسی مشین چاہتے ہیں جس سے نظام سبوتاژ نہ ہو۔

حکومت نے ای وی ایم کو مزید بہتر بنانے کی یقین دہانی کرادی۔ وفاقی وزیر سنیٹر شبلی فراز نے کہا الیکشن کمیشن سے آئندہ انتخابات شفاف اور بغیر کسی تنازعے کے ہونے پر اتفاق کیاگیا، طے کیا گیا ہے کہ 2023 کے الیکشن ٹیکنالوجی کے استعمال سے ہونگے۔

حکومت کی جانب سے وفاقی وزیر شبلی فراز اور سیکرٹری وزارت سائنس اینڈ ٹیکنالوجی ڈاکٹر اختر نذیر بھی ڈیمو میں شریک ہوئے۔ ذرائع کے مطابق وزارت سائنس اینڈ ٹیکنالوجی کی جانب سے تیار کی گئی الیکٹرانک ووٹنگ مشین کی خصوصیات پر مبنی ویڈیو کے ساتھ پریکٹیکل ڈیمو بھی دیا گیا۔ ای وی ایم کی موسمی حالات سے مطابقت، واٹر پروف اور سائبر حملے سے محفوظ ہونے سے متعلق بریفنگ دی گئی۔

ڈیمو کے بعد میڈیا سے گفتگو کرتے ہوئے وفاقی وزیر شبلی فراز نے کہا وزیراعظم نے کہا تھا چاہے الیکشن نتائج ہمارے خلاف آجائیں لیکن الیکٹرانک ووٹنگ کے ذریعے الیکشن ہونا چاہیے، مینوئل الیکشن نے ہمیں کچھ نہیں دیا ، الیکشن کمیشن کے عہدیداران نے 75 کے قریب سوالات کیے ، کوئی ایسا سوال نہیں تھا جس کا ہمارے پاس جواب نہ ہو۔

سینیٹر شبلی فراز نے بتایا کہ چیف الیکشن کمشنر نے مشین بنانے پر ہمیں مبارکباد بھی دی، بدقسمتی سے اس ملک میں ہر الیکشن تنازعات کا شکار ہوتے ہیں،پارلیمنٹ ای وی ایم سے متعلق قانون سازی کرے گی۔

وفاقی وزیر نے مزید کہا کہ الیکٹرانک ووٹنگ مشین کے حوالے سے ٹائم لائنز بنائیں گے،اپوزیشن جماعتیں پاکستان میں انتخابات شفاف بنانا چاہتی ہیں تو آئیں مذاکرات کریں،اپوزیشن الیکٹرانک ووٹنگ پر اپنی تجاویز دیں۔

آئی سی سی مینز ٹی 20 ورلڈ کپ 2021 کے شیڈول کا اعلان کردیا گیا، جو متحدہ عرب امارات اور عمان میں 17 اکتوبر سے شروع ہوگا اور فائنل 14 نومبر کو دبئی میں کھیلا جائے گا۔

اس مرتبہ ٹی 20 ورلڈ کپ میں پاکستان اور بھارت کو ایک ہی گروپ میں شامل کیا گیا ہے جن کے درمیان پہلا میچ 24 اکتوبر کو ہوگا۔

پاکستان کے میچز:

24 اکتوبر: پاکستان بمقابلہ بھارت، دبئی
26 اکتوبر: پاکستان بمقابلہ نیوزی لینڈ
29 اکتوبر: پاکستان بمقابلہ افغانستان
2 نومبر: پاکستان بمقابلہ گروپ اے کے راؤنڈ 1 کوالیفائر میں دوسرے نمبر پر آنے والی ٹیم
7 نومبر: پاکستان بمقابلہ گروپ بی کے راؤنڈ 1 کوالیفائر میں پہلے نمبر پر آنے والی ٹیم
پہلا راؤنڈ
پہلے راؤنڈ میں ٹورنامنٹ 17 اکتوبر کو میزبان عمان اور پاپوا نیو گنی کے درمیان راؤنڈ 1 گروپ بی کے مقابلے سے شروع ہوگا، گروپ بی میں دیگر ٹیمیں شام 6 بجے مد مقابل آئیں گی۔

گروپ اے میں آئرلینڈ، نیدرلینڈز، سری لنکا اور نمیبیا پر مشتمل ہے جو اگلے روز ابوظبی میں ایکشن میں ہوں گے۔

راؤنڈ 1 کے میچ 22 اکتوبر تک جاری رہیں گے اور ہر گروپ میں سرفہرست دو ٹیمیں 23 اکتوبر سے شروع ہونے والے ٹورنامنٹ کے سپر 12 مرحلے میں جائیں گی۔

سپر 12
ٹورنامنٹ کا دوسرا مرحلہ، سپر 12 مرحلہ 23، اکتوبر کو ابوظبی میں شروع ہوگا جس میں گروپ 1 میں پہلا مقابلہ آسٹریلیا اور جنوبی افریقہ کے درمیان ہوگا۔

اس کے بعد دبئی میں انگلینڈ اور ویسٹ انڈیز کے درمیان میچ کھیلا جائے گا۔

پرانے حریف انگلینڈ اور آسٹریلیا 30 اکتوبر کو دبئی میں مد مقابل آئیں گے۔

گروپ کا اختتام 6 نومبر کو آسٹریلیا اور ویسٹ انڈیز کے درمیان ابوظبی اور انگلینڈ اور جنوبی افریقہ کے درمیان شارجہ میں ہونے والے میچز سے ہوگا۔

گروپ 2 کا آغاز بھارت اور پاکستان کے درمیان 24 اکتوبر کو دبئی میں ہوگا۔

اس کے بعد پاکستان 26 اکتوبر کو شارجہ میں نیوزی لینڈ کا مقابلہ کرے گا، افغانستان کا پہلا میچ 25 اکتوبر کو شارجہ میں ہوگا۔

یہ گروپ 8 نومبر کو اختتام پذیر ہوگا جب بھارت گروپ اے سے دوسرے نمبر پر آنے والے راؤنڈ 1 کوالیفائر سے مقابلہ کرے گا۔

فائنلز
پہلا سیمی فائنل 10 نومبر کو ابوظبی میں ہوگا اور دوسرا سیمی فائنل 11 نومبر کو دبئی میں کھیلا جائے گا۔

اس کے بعد ٹورنامنٹ کا آخری تصادم 14 نومبر، اتوار کو دبئی میں ہوگا۔

تحریک انصاف کے امیدوار بیرسٹر سلطان آزاد کشمیر کے صدر منتخب ہو گئے، انہوں نے 34 ووٹ حاصل کئے۔ موجودہ صدر مسعود خان 24 اگست کو اپنی پانچ سالہ صدارتی مدت پوری کریں گے جس کے بعد سلطان محمود حلف اٹھائیں گے۔

مظفرآباد میں قانون ساز اسمبلی کے ارکان نے اگلے پانچ سال کے لئے صدر منتخب کر لیا۔ پی ٹی آئی کے صدارتی امیدوار بیرسٹر سلطان محمود کی پوزیشن پہلے ہی مضبوط تھی، ان کو مسلم کانفرنس کے سردار عتیق اور جموں و کشمیر پیپلزپارٹی کے حسن ابراہیم کی بھی حمایت حاصل تھی۔

قانون ساز اسمبلی میں پی ٹی آئی کے 32، پاکستان پیپلزپارٹی کے 11، مسلم لیگ نوازکے 7، آل جموں و کشمیر مسلم کانفرنس اور جموں و کشمیر پیپلزپارٹی کا ایک ایک ووٹ تھا۔ بیرسٹر سلطان محمود ایل اے 3 میرپور سے رکن اسمبلی منتخب ہوئے۔ صدر منتخب ہونے پر وہ اسمبلی سیٹ چھوڑ دیں گے۔

یاد رہے بیرسٹر سلطان 2015 سے پی ٹی آئی آزاد کشمیر کے صدر ہیں۔ بیرسٹر سلطان 1985 سے نویں بار رکن قانون ساز اسمبلی منتخب ہوئے ہیں۔

اسلام آباد: ای الیون لڑکا لڑکی جنسی تشدد کیس میں بڑی پیش رفت ہوگئی۔

اسلام آباد ہائی کورٹ نے شریک ملزم عمر بلال مروت کو رہا کرنے کا حکم دے دیا۔ عدالت نے شریک ملزم عمر بلال مروت کی درخواست ضمانت بعد از گرفتاری منظور کرتے ہوئے اسے دس دس لاکھ روپے کے دو مچلکے جمع کرانے کا حکم دیا۔

ملزم کی جانب سے شیر افضل مروت جبکہ مدعی کی جانب سے حسن جاوید شورش نے کیس کی پیروی کی۔ مرکزی ملزم عثمان مرزا سمیت 7 ملزم اڈیالہ جیل میں قید ہیں۔ جوڈیشل مجسٹریٹ وقار گوندل نے پولیس کو دس ستمبر تک چلان جمع کرانے کا حکم دے رکھا ہے۔

رنجیت سنگھ کے مجسمے کو نقصان پہنچانے کا معاملہ، لاہو پولیس نے ملزم کو گرفتار کرلیا۔

سی سی پی او لاہور غلام محمود ڈوگر کے مطابق رنجیت سنگھ کے مجسمے کو نقصان پہنچانے والے ملزم رضوان کو گرفتار کر لیا گیا۔ ملزم نے ہتھوڑے سے مجسمے کو نقصان پہنچایا۔ ملزم کے خلاف سخت قانونی کارروائی عمل میں لائی جائے گی۔ سی سی پی او لاہور غلام محمود ڈوگر نے ایس پی سٹی کو فوری موقع پر دورہ کرنے کی ہدایت کر دی۔

دوسری جانب وزیراعظم کے معاون خصوصی ڈاکٹر شہباز گل نے ٹویٹ کرتے ہوئے کہا کہ ‏لاہور میں رنجیت سنگھ کے مجسمے کو نقصان پہنچانے والے ملزم کے خلاف فوری کاروائی ہوگی، پچھلے دنوں سمیع اللہ کے مجسمے کی بھی بے حرمتی کی گئی، یہ بیمار ذہنیت کی علامات ہیں، ایسے اقدام سے پاکستان کے تشخیص کو نقصان پہنچانے کی کوشش کی جاتی ہے، پولیس ایسے ملزموں کے خلاف سخت کاروائی کرے گی۔

کورونا وائرس سے 95 افراد جاں بحق ہوگئے، جس کے بعد اموات کی تعداد 24 ہزار 573 ہوگئی۔ پاکستان میں کورونا کے تصدیق شدہ کیسز کی تعداد 11 لاکھ 5 ہزار 300 ہوگئی۔

نیشنل کمانڈ اینڈ آپریشن سینٹر کے تازہ ترین اعدادوشمار کے مطابق گذشتہ 24 گھنٹوں کے دوران 3 ہزار 221 نئے کیسز رپورٹ ہوئے، پنجاب میں 3 لاکھ 73 ہزار 718، سندھ میں 4 لاکھ 13 ہزار 379، خیبر پختونخوا میں ایک لاکھ 53 ہزار 134، بلوچستان میں 31 ہزار 632، گلگت بلتستان میں 9 ہزار 442، اسلام آباد میں 94 ہزار 402 جبکہ آزاد کشمیر میں 29 ہزار 593 کیسز رپورٹ ہوئے۔

ملک بھر میں اب تک ایک کروڑ 69 لاکھ 50 ہزار 196 افراد کے ٹیسٹ کئے گئے، گذشتہ 24 گھنٹوں کے دوران 48 ہزار 181 نئے ٹیسٹ کئے گئے، اب تک 9 لاکھ 93 ہزار 304 مریض صحتیاب ہوچکے ہیں جبکہ 4 ہزار 896 مریضوں کی حالت تشویشناک ہے۔

پاکستان میں کورونا سے ایک دن میں 95 افراد جاں بحق ہوئے جس کے بعد وائرس سے مرنے والوں کی تعداد 24 ہزار 573 ہوگئی۔ پنجاب میں 11 ہزار 412، سندھ میں 6 ہزار 475، خیبرپختونخوا میں 4 ہزار 679، اسلام آباد میں 837، بلوچستان میں 335، گلگت بلتستان میں 166 اور آزاد کشمیر میں 669 مریض جان سے ہاتھ دھو بیٹھے۔