All posts by News Editor

ازبکستان کی فضائی حدود پر غیرقانونی پرواز کرنے والا افغان فوجی جہاز گر کر تباہ ہوگیا جبکہ 585 فوجیوں کو لے کر آنے والے 46 ایئرکرافٹ کو زبردستی روک دیا گیا اور پڑوسی ملک تاجکستان میں 100 سے زائد فوجیوں سے لدا جہاز لینڈ کر گیا۔

خبرایجنسی اے ایف پی کی رپورٹ کے مطابق ازبکستان کی حکومت کا کہنا تھا کہ گزشتہ دو روز کے دوران افغانستان کے 46 ایئرکرافٹ کو لینڈ کرنے پر مجبور کیا گیا جو غیرقانونی طور پر فضائی سرحد عبور کر رہے تھے اور ان میں 585 فوجی سوار تھے۔

سرکاری پراسیکیوٹر کی جانب سےجاری بیان میں کہا گیا کہ 22 فوجی جہاز اور 24 فوجی ہیلی کاپٹرز کو ترمیز ایئرپورٹ پر زبردستی اتارا گیا۔

قبل ازیں ازبکستان کی وزارت کے ترجمان بخروم ذوالفقاروف نے مقامی میڈیا کی رپورٹس کی تصدیق کرتے ہوئے کہا تھا کہ ‘فوجی جہاز نے غیرقانونی طور پر ازبکستان کی سرحد پار کی تھی، جس کی تفتیش کی جارہی ہے’۔

انہوں نے بتایا کہ افغان فوجی جہاز اتوار کو افغانستان کی سرحد سے منسلک جنوبی صوبے سرخونداریو میں گر کر تباہ ہوا۔

روسی نیوز ایجنسیوں نے وزارت دفاع کا حوالہ دیتے ہوئے اپنی رپورٹس میں کہا تھا کہ جہاز کو ازبکستان کی فورسز کی جانب سے مار گرایا گیا ہے۔

ازبکستان کے سرکاری پراسیکیوٹر نے حادثے کا شکار ہونے والے جہاز کے حوالے سے کہا کہ افغان فوجی جہاز اس وقت حادثے سے دوچار ہوا جب لینڈنگ کے لیے تعاون کرنے والے ازبکستان کے سرکاری جہاز سے ٹکرا گیا۔

بیان میں کہا گیا کہ اس جہاز کے پائلٹس پیراشوٹ کے ذریعے جان بچانے میں کامیاب ہوئے۔

پراسیکیوٹر کے بیان میں مزید کہا گیا کہ اتوار کو ایمو دریا کے راستے 158 شہری اور فوجی اہلکار ازبکستان میں داخل ہوئے تھے اور ان سے تفتیش کی جارہی ہے۔

سرخونداریو کے علاقائی دارالحکومت ترمیز میں ایک ڈاکٹر نے بتایا تھا کہ ان کے ہسپتال میں2 افراد کو لایا گیا تھا جو افغان فوج کی وردی میں ملبوس تھے۔

انہوں نے کہا تھا کہ پیراشوٹ کے ذریعے لینڈ کرنے والا ایک زخمی کو لایا گیا تھا جن کی ہڈیاں ٹوٹ گئی تھیں۔

سماجی رابطے کی ویب سائٹ ٹیلی گرام میں موصول ہونے والی تصاویر اور ویڈیوز میں فوجی وردی میں ایک آدمی کو طبی امداد لیتےہوئے دیکھا جاسکتا ہے۔

ڈاکٹر کا کہنا تھا کہ ہسپتال میں ایک روز قبل بھی تین فوجی لائے گئے تھے جبکہ مجموعی طور پر 84 فوجیوں نے طالبان کے قبضے کے بعد غیر قانونی طور پر سرحد پار کرکے ازبکستان میں داخل ہوچکے ہیں۔

ازبکستان کی وزارت خارجہ کا کہنا تھا کہ افغان فوجیوں کو سرحد پر حراست میں لیا گیا تھا لیکن انسانی بنیادوں پر امداد بھی دی گئی۔

بیان میں کہا گیا کہ ازبکستان کے حکام دوسری جانب افغان حکام سے ان کی واپسی کے لیے بات کر رہے ہیں۔

دوسری جانب ازبکستان کے پڑوسی ملک تاجکستان کا کہنا تھا کہ اس نے ملک کے جنوبی علاقے میں واقع بوختار ایئرپورٹ میں 100 سے زائد افغان فوجیوں کو لینڈ کرنے کی اجازت دی گئی ہے۔

تاجکستان کی وزارت خارجہ کے شعبہ نشر و اطلاعات کی جانب سے روسی میڈیا کو بتایا گیا کہ ‘تاجکستان کو ایس او ایس سگنلز موصول ہوئے، جس کے بعد عالمی معاہدوں کے تحت فیصلہ کیا گیا کہ افغان فوجیوں کو ایئرپورٹ پر لینڈ کرنے کی اجازت دی جائے گی’۔

افغانستان میں طالبان کے قبضے کے بعد سابق سوویت ریاستوں تاجکستان، ازبکستان اور ترکمانستان میں مہاجرین کی آمد کے خدشات ہیں۔

رپورٹ کے مطابق تینوں میں سے صرف تاجکستان واحد ملک ہے، جس نے طالبان کے ساتھ مذاکرات کیے اور انہیں یقین دہانی کروائی گئی کہ خطے میں امن اور انفراسٹرکچر کے منصوبے جاری رکھے جائیں گے۔

شہر کی اہم شاہراہیں کچہرا منڈیاں بن گئیں، سروس روڈ پر تجاوزات کی بھرمار۔ شہریوں کا سڑک سے گزرنا مشکل ہوگیا، صفائی کے عملے نے آنکھیں بند کرلیں۔

شہر کی اہم شاہراہوں جی ٹی روڈ، شاہدرہ ونڈالہ روڈ، دولت خان روڈ اور لاجپت روڈ کچرا منڈیاں بن گئیں۔ صفائی نہ ہونے کے باعث بیماریاں پھلینے کا خدشہ پیدا ہوگیا جبکہ صفائی کے عملے نے بھی اپنی آنکھیں بند کرلیں۔ اہم شاہراہوں کی سروس روڈ پر بھی تجاوزات قائم ہونے سے شہریوں کا پیدل چلنا بھی دشوار ہوگیا۔ شاہدرہ 150 فٹ چوڑی سروس روڈ پر ریڑھی بان چنگ چی رکشہ مافیا عرصہ دراز سے قابض ہیں، جس کی وجہ سے سڑک سے گزرنے والی ٹریفک کی روانی متاثر ہوتی ہے بلکہ پیدل چلنے والوں کو بھی شدید مشکلات کا سامنا ہے۔

ایمرجنسی کی صورتحال میں ایمبولینسز کئی کئی دیر ٹریفک میں پھنسی رہنا معمول بن گیا ہے جبکہ شہر میں جگہ جگہ کچرے کے ڈھیر بھی لگے ہوئے ہیں مگر ایل ڈبلیو ایم سی کا عملہ ہفتوں کچرا نہیں اٹھاتا ۔ شہریوں کا کہنا ہے کہ انتظامیہ کو بارہا شکایت کے باوجود صفائی کی جاتی ہے اور نا ہی تجاوزات ہٹائی جاتی ہیں۔

شہریوں کا کہنا ہے کہ انتظامیہ وقتی طور پر کاروائی کر کے ریڑھی بانوں سے ہفتہ وصولی کرکے واپس چلے جاتے ہیں شہریوں نے انتظامیہ سے تجاوزات کے خاتمے کا مطالبہ کیا ہے۔

دوسری جانب ماہرین کا کہنا ہے کہ کچرے کوجلانے سے شہریوں میں سانس اور جلدی امراض کی بیماریاں تیزی سے پھیلنے کا خدشہ ہے جبکہ ٹھوس فضلات کی وجہ سے ہیپاٹائٹس، ہیضہ، دست، پیچش اور دیگر بیماریوں کا قہر بڑھ سکتا ہے۔

لاہور ہائیکورٹ کا مبینہ پولیس مقابلوں کے متعلق بڑا فیصلہ، پولیس افسروں کی درخواست پر لاہورہائیکورٹ نےمبینہ پولیس مقابلوں کی جوڈیشل انکوائری پر پابندی عائد کردی گئی۔جسٹس سہیل ناصر نےاپنے فیصلے میں لکھا کہ مفاد عامہ کے وقوعہ کی تحقیقات جوڈیشل کمیشن کر سکتا ہے، سی پی او یا آر پی او حکومت کو انکوائری کی درخواست دے سکتے ہیں۔

تفصیلات کے مطابق جسٹس سہیل ناصر نے شاہد چودھری کی درخواست پر 18 صفحات پر مشتمل تحریری فیصلہ جاری کردیا ،تحریری فیصلہ عدالتی نظیر بھی قرار، فیصلے کی نقول صوبہ بھر کے سیشن ججز کوبھجوانے کابھی حکم دیا گیا ہے۔جسٹس سہیل ناصر نے اپنے تحریری فیصلہ میں لکھا ہے کہ پولیس کو جوڈیشل انکوائری کروانے کی از خود درخواست دینے کا کوئی اختیار نہیں، پولیس افسران کی درخواست پر مبینہ پولیس انکوائری کی کوئی قانونی حیثیت نہیں,, پولیس مقابلوں کی جوڈیشل انکوائری کروانے کی درخواستیں دیکر پولیس افسران اپنے اختیارات سے تجاوز کرتے رہے ہیں، فیصلہ میں مزید کہا گیا ہے کہ سی پی او یا آر پی او حکومت کی تعریف میں نہیں آتے، سیشن ججز پولیس کی درخواستوں پر ضابطہ فوجداری کی دفعہ 174 اور 176 کی غلط تشریح کر کے جوڈیشل انکوائری کا حکم دیتے رہے، سیشن ججز کو پولیس افسر کی درخواست پر پولیس مقابلے کی جوڈیشل انکوائری کی منظوری دینے کا اختیار نہیں۔

تحریری فیصلہ کے مطابق مجسٹریٹ قتل، حادثاتی موت یا خود کشی کیس میں صرف موت کے سبب کی انکوائری کر سکتا ہے، مجسٹریٹ یہ نہیں کہہ سکتا کہ وقوعہ کا ذمہ دار کون ہے، مجسٹریٹ کو حقائق کی تلاش کرنے کا بھی اختیار نہیں، مجسٹریٹ انکوائری رپورٹ میں کسی کو ذمہ دار بھی نہیں ٹھہرا سکتا، پولیس مقابلے، قتل یا خود کشی کیس کی جوڈیشل انکوائری پولیس تحقیقات سے پہلے کروائی جاتی ہے، مفاد عامہ کے وقوعہ کے حقائق کی تحقیقات محض پنجاب ٹربیونلز آف انکوائریز ایکٹ کے تحت قائم جوڈیشل کمیشن ہی کر سکتا ہے، سی پی او یا آر پی حکومت کو ہی پولیس مقابلے کی جوڈیشل انکوائری کی درخواست دے سکتے ہیں، فیصلہ میں مزید کہا گیا ہے کہ۔حکومت کا اختیار ہے کہ سی پی او کی جوڈیشل انکوائری کروانے کی درخواست پر انکوائری ٹربیونل بنائے یا نہ بنائے،سیشن ججز پولیس مقابلوں کی انکوائری کی براہ راست موصول ہونیوالی درخواستوں کا بغور جائزہ لیں، سیشن جج صرف کسی کی موت کی وجہ کی انکوائری کرنے کی منظوری دیں۔

جوڈیشل انکوائری کے دوران مجسٹریٹ کسی بھی صورت میں ضابطہ فوجداری کی دفعہ 176 کے دائرہ اختیار سے تجاوز نہیں کر سکتا، مجسٹریٹ انکوائری میں یہ نہیں واضح کر سکتا کہ موت کا ذمہ دار کون ہے، جوڈیشل انکوائری کے دوران مجسٹریٹ یہ بھی قرار نہیں دے سکتا کہ کونسا ملزم گنہگار اور بے گناہ ہے، عدالت نے فیصلہ پنجاب کے تمام ججوں اور ایکس کیڈر ججوں کو مکمل عملدرآمد کیلئے بھجوانے کا حکم دیا ہے۔درخواست گزار نےاپنےخاونداوربھائی کو پولیس مقابلےمیں قتل کرنےکیخلاف درخواست دائر کی تھی،خاتون نے خاوند زاہد محمود اور بھائی شاہد انجم کے قتل کا مقدمہ درج کرنے کی بھی استدعا کی تھی۔پولیس پر خاتون کے خاوند اور بھائی کو جعلی پولیس مقابلے میں قتل کرنے کا الزام تھا۔پولیس نے انسپکٹر عمران عباس کے قتل کے الزام پرخاتون کے خاوند اور بھائی کا حقیقی پولیس مقابلہ ہونے اور جوڈیشل انکوائری کروانے کا دعویٰ کیاتھا۔

سیکرٹری بلدیات نورالامین مینگل کا ایک اور بڑا انتظامی فیصلہ ، سیف سٹی لاہور کو سمارٹ سٹی لاہور بنانے کی منتقلی کے منصوبے پر عملدرآمدکا اختیار سیف سٹی کو دے دیا گیا۔

تفصیلات کے مطابق سیکرٹری بلدیات نورالامین مینگل کا ایک اور بڑا انتظامی فیصلہ کیا ہے ۔ سیف سٹی لاہور کو سمارٹ سٹی لاہور بنانے کی منتقلی کے منصوبے پر عملدرآمد کا اختیار ایم سی ایل سے لے کر سیف سٹی کو دیدیا گیا ہے۔ منصوبے کے لئے مختص 85 کروڑ 20 لاکھ کے فنڈز بھی منتقل کرنے کی باقاعدہ منظوری دے دی گئی ۔ سیکرٹری بلدیات نے ایم سی ایل کو منصوبے کی لاگت ، فزبیلٹی سمیت تمام ابتدائی پلاننگ سیف سٹی کو دینے کی ہدایت کردی ہے ۔ اس سے قبل سیف سٹی کو سمارٹ سٹی بنانے کے لئے ایم سی ایل عملدرآمد ایجنسی کا کام کررہی تھی

سیکرٹری بلدیات نے منصوبے کی اہمیت اور سیف سٹی کے ساتھ بہتر کوارڈینیشن کے باعث فیصلہ کیا ۔ سیکرٹری بلدیات نورالامین مینگل کا کہنا ہے کہ میونسپل اداروں کو بھی ہوگی انتظامی امور چلانے کے لئے سیف سٹی اتھارٹی کی رہنمائی حاصل ہوگی ۔

شالیمار میں آشنا نے پانچ بچوں کی ماں کو قتل کرنے کے بعد اپنی زندگی کا بھی خاتمہ کرلیا ،متوفی اور مقتولہ دونوں رشتہ دار تھے۔ افسوسناک واقعہ شالیمار کے علاقے شیلر چوک میں پیش آیا، جہاں آشنا نے خاتون کو قتل کرنے کے بعد خود کشی کرلی۔

اہل خانہ کا کہنا ہے کہ مقتولہ مسرت بی بی کا اپنے رشتہ دار اصغر سے جھگڑا ہوا، جس پر طیش میں آکر اصغر نے پہلے مسرت بی بی کو فائرنگ کرکے قتل کیا اور پھر خود بھی اپنی زندگی کا خاتمہ کرلیا ۔

اطلاع ملتے ہی پولیس بھی موقع پر پہنچ گئی۔ پولیس کا کہنا ہے کہ مقتولہ پانچ بچوں کی ماں تھی۔ دونوں کی لاشوں کو تحویل میں لیکر تحقیقات کا آغاز کر دیا گیا۔

لاہور ہائیکورٹ میں ریور راوی فرنٹ اربن ڈویلپمنٹ پراجیکٹ کے متعلق درخواستوں پر سماعت، عدالت نے پنجاب حکومت کو منصوبے کیلئے اراضی ایکوائر کرنے سے روک دیا، حکومت کو روڈا کی ماحولیاتی رپورٹ پر حتمی فیصلے سے روکنے کے حکم میں بھی توسیع کر دی گئی۔

جسٹس عابد حسین چٹھہ نے ریور راوی فرنٹ اربن ڈویلپمنٹ پراجیکٹ کے متعلق درخواستوں پر سماعت کی، درخواستگزاروں کی جانب سے رافع عالم سمیت دیگر وکلاء پیش ہوئے، وفاقی حکومت کی جانب سے ایڈیشنل اٹارنی جنرل نصراحمد نے آگاہ کیا کہ ہائیکورٹ نے روڈا کیخلاف دائر دو درخواستوں میں حکم امتناعی جاری کر رکھا ہے، جس وجہ سے کام رکا ہوا ہے، اس کیس میں سڑکوں میں حکم امتناعی نہیں، وہاں تعمیرات کی اجازت دے دیں۔

جسٹس عابد حسین چٹھہ نے ایڈیشنل اٹارنی جنرل سے کہا کہ اگر حکم امتناعی نہیں تو آپ عدالت کیا لینے آئے ہیں، ایڈیشنل اٹارنی جنرل نے کہا وہاں پتہ بھی ہلتا ہے تو یہ توہین عدالت کی درخواست دائر کر دیتے ہیں۔

درخواست گزاروں کے وکیل نے کہا کہ وفاقی حکومت کی متفرق درخواست پر ہمارا کیس متاثر ہوگا۔ استدعا ہے وفاقی حکومت کی درخواست مسترد کردی جائے۔ وکیل نے بتایا کہ اس کیس میں پہلے سے سننے والی عدالت نے سماعت چودہ ستمبر تک ملتوی کررکھی ہے, استدعا ہے اس کیس کو متعلقہ بنچ کو بھجوا دیں۔

عدالت نے روڈا کی سڑکیں بنانے کیلئے دائر متفرق درخواست پر اجازت دینے کی استدعا مسترد کرتے ہوئے فریقین کو نوٹس جاری کر دئیے۔ جسٹس عابد حسین چٹھہ نے کیس متعلقہ عدالت کو بھجوانے کی ہدایت کرتے ہوئے سماعت ملتوی کردی۔

میزبان و ماڈل متھیرا نے سوشل میڈیا سے اپنی تمام تصاویر ڈیلیٹ کردیں۔

سوشل میڈیا کے مقبول پلیٹ فارم انسٹاگرام پر متھیرا کی جانب سے ایک اسٹوری شیئر کرتے ہوئے مداحوں کو تصاویر ڈیلیٹ کیے جانے سے متعلق اطلاع دی گئی۔

متھیرا نے اپنی پوسٹ میں لکھا کہ میں اپنی تصاویر کچھ وقت کے لیے ہٹارہی ہوں، محرم کے یہ 10 دن ہر انسان کے لیے خاصے مختلف ہیں۔

انہوں نے کہا کہ میں مجالس میں شرکت کرتی ہوں اس لیے میں نہیں چاہتی کہ میری پروفائل پر کچھ ایسی تصاویر ہوں جو اس مہینے کے لیے غیر موزوں ہو۔

متھیرا نے اپنے پیغام میں مزید لکھا کہ ہر انسان کا زندگی گزارنے کا اپنا طریقہ ہے، براہ مہربانی مجھ پر سوال اٹھانا اور الزام لگانا بند کریں۔

متھیرا کے انسٹاگرام اکاؤنٹ پر اس وقت صرف 2 پوسٹ موجود ہیں جو کہ محرم الحرام کی مناسبت سے ہیں۔

بولی وڈ کے مقبول اداکار انیل کپور کی چھوٹی صاحبزادی اور اداکارہ سونم کپور کی بہن فلم ساز ریا کپور نے دیرینہ دوست سے شادی کرلی۔

یہ خبریں پہلے ہی تھیں کہ ریا کپور دیرینہ دوست سے 14 اور 15 اگست کی درمیانی شب رشتہ ازدواج میں بندھ جائیں گی۔

ٹائمز آف انڈیا کے مطابق ریا کپور نے دیرینہ دوست فلم ساز کرن بولانی سے 14 اور 15 اگست کی درمیانی شب شادی کی۔

شادی کی تقریب ممبئی کے علاقے جوہو میں واقع انیل کپور کے گھر پر منعقد کی گئی، جس میں دونوں خاندانوں کے افراد نے شرکت کی۔

اسی حوالے سے ہندوستان ٹائمز نے بتایا کہ ریا کپور نے 15 اگست کو شادی کی اور بعد ازاں 16 اگست کو فلم پروڈیوسر نے شریک حیات کے ساتھ تصویر شیئر کرتے ہوئے رشتہ ازدواج میں بندھنے کی تصدیق کی۔

اس سے قبل ریا کپور نے شادی کے بعد انسٹاگرام اسٹوری پر اپنی سہیلی فیشن ڈیزائنر مسابہ گپتا کی جانب سے شیئر کی گئی ایک تصویر شیئر کی تھی، جس میں خاتون کے پاؤں پر مہندی کی سجاوٹ کو دیکھا جا سکتا تھا۔

فلم فیئر کے مطابق مذکورہ تصویر ریا کپور کی اپنی ہی تھی تاہم ان کی تصویر پہلے ان کی سہیلی مسابہ گپتا نے شیئر کی تھی، جسے بعد ازاں انہوں نے بھی شیئر کیا۔

بھارتی میڈیا کے مطابق ریا کپور اور کرن بولانی کی شادی کی تقریبات کا آغاز 14 اگست کی دوپہر کو ہوا تھا اور اسی رات کو دیر گئے دونوں نے سات پھیرے لیے۔

ان کی شادی کے حوالے سے ’زوم‘ ٹی وی نے بتایا کہ بیٹی کے رشتہ ازدواج میں منسلک ہونے کے بعد انیل کپور نے خوشی سے گھر کے باہر موجود میڈیا ورکرز میں مٹھائی بھی تقسیم کی۔

ویڈیو میں انیل کپور کے میڈیا ورکرز میں مٹھائی کے پیکٹ تقسیم کرتے ہوئے اور ان سے بیٹی کی اچھی زندگی کے لیے دعاؤں کی درخواست کرتے ہوئے انہیں دیکھا اور سنا جا سکتا ہے۔

ویڈیو میں شادی میں شرکت کے لیے آنے والے مہمانوں کو بھی دکھایا گیا، جن میں انیل کپور کے بڑے بھائی فلم ساز بونی کپور اور چھوٹے بھائی سنجے کپور کو بھی دیکھا جا سکتا ہے۔

ویڈیو میں ارجن کپور، جھانوی اور خوشی کپور سمیت کپور خاندان کے دیگر قریبی افراد کو بھی شادی کی تقریب میں شرکت کرتے ہوئے دکھایا گیا۔

ویڈیو میں ریا کپور کی بڑی بہن اداکار سونم کپور کو بھی شوہر آنند آہوجا کے ہمراہ دکھایا گیا۔

ریا کپور نے اپنی بہن سونم کپور کی تین فلمیں، عائشہ، خوبصورت اور ویرے دی ویڈنگ پروڈیوس کی ہیں جب کہ ان کے شوہر کرن بولائی نے درجنوں فلموں میں بطور اسسٹنٹ ہدایت کار خدمات سر انجام دی ہیں۔

پاکستانی ڈراموں کی مقبول اداکارہ حرا مانی کو شوبز میں خدمات پر ‘گلوبل ویمن میڈیا’ ایوارڈ سے نواز دیا گیا۔

حرا مانی کو یہ ایوارڈ گورنر پنجاب چوہدری سرور کی جانب سے گورنر ہاؤس لاہور میں منعقدہ ایک تقریب میں دیا گیا۔

اداکارہ نے اپنی تصاویر انسٹاگرام پر شیئر کرتے ہوئے مداحوں کو ایوارڈ ملنے سے متعلق بتایا۔

اپنی پوسٹ میں انہوں نے لکھا کہ ‘بہت شکریہ سرور صاحب آپ کے اس خوبصورت اخلاق کا، میرے کام کو سراہنے کا، اس ایوارڈ کا شکریہ، جیوے پاکستان’۔

انسٹاگرام پر شیئر کی گئی تصاویر میں وہ گورنر پنجاب سے ایوارڈ وصول کرتے ہوئے نظر آرہی ہیں۔

حرا مانی کو ایوارڈ ملنے پر انڈسٹری کے متعدد اداکاروں نے انہیں مبارکباد دی۔

یہ بھی پڑھیں: مانی اگر شادی شدہ بھی ہوتے تو میں ان ہی سے شادی کرتی، حرا مانی

ان کے شوہر نے گلوبل ویمن میڈیا ایوارڈ ملنے پر خوشی کا اظہار کرتے ہوئے لکھا کہ حرا مانی اس ایوارڈ کی حقدار تھیں۔

خیال رہے کہ حرا مانی اپنی منفرد اداکاری کی وجہ سے بہت مقبول ہیں اور ڈراما سیریل ‘میرے پاس تم ہو’ اور ‘دو بول’ میں ان کے کردار کو بہت زیادہ پسند کیا گیا تھا۔

وہ ‘یقین کا سفر’، ‘ٹھیس’، ‘سن یارا’، ‘محبتیں چاہتیں’ اور ‘کشف’ سمیت مختلف ڈراموں میں اپنی اداکاری کے جوہر دکھا چکی ہیں۔

حرا مانی ان دنوں نجی چینل کے ڈرامے میں ‘یوں تو ہے پیار بہت’ میں عفان وحید کے مقابل نظر آرہی ہیں۔

شہرت یافتہ گلوکار و اداکار عاطف اسلم نے کہا ہے کہ اگر انہیں اچھا اسکرپٹ ملا تو وہ ضرور چھوٹی اسکرین پر کام کریں گے۔

عاطف اسلم نے یہ بیان ایک ایسے وقت میں دیا ہے جب کہ گزشتہ کچھ عرصے سے ان سے متعلق خبریں ہیں کہ وہ جلد ہی چھوٹی اسکرین پر بھی دکھائی دیں گے۔

ٹی وی ڈیبیو کرنے کے حوالےسے پوچھے گئے ایک سوال کے جواب میں انہوں نے ’بی بی سی‘ کو بتایا کہ ان کے مداح انہیں چھوٹی اسکرین پر بھی دیکھنا چاہتے ہیں اور وہ اچھی کہانی ملنے پر ضرور ڈراموں میں کام کریں گے۔

انہوں نے چھوٹی اسکرین پر جلوے دکھانے کی اپنی خبروں سے متعلق کہا کہ انہوں نے بھی خود سے متعلق افواہیں سن رکھی ہیں مگر فوری طور پر ایسا سچ ہوتا دکھائی نہیں دیتا۔

گلوکار نے واضح کیا کہ اگر انہیں اچھی کہانی اور کردار دیا گیا تو وہ ضرور چھوٹی اسکرین پر کام کریں گے، تاہم ساتھ ہی کہا کہ مداح انہیں جلد ٹی وی پر دیکھنے کی امید نہ رکھیں۔

انٹرویو میں عاطف اسلم نے اس بات کی تصدیق کی کہ وہ رواں سال ماہرہ خان کے ساتھ ایک گانے میں دکھائی دیں گے اور دونوں ایک دہائی بعد اسکرین پر رومانس کریں گے۔

اس سے قبل دونوں نے ’بول‘ نامی فلم میں ایک ساتھ کام کیا تھا اور ان کی جوڑی کو بہت سراہا گیا تھا جبکہ عاطف اسلم نے بھی ماہرہ خان کے ساتھ کام کرنے کو خوش قسمتی قرار دیتے ہوئے انہیں سنجیدہ اور اچھی اداکارہ قرار دیا۔

انٹرویو میں عاطف اسلم نے بولی وڈ کیریئر پر بھی کھل کر بات کی اور یہ بھی بتایا کہ وہ نئے پروڈیوسرز و گلوکاروں کے ساتھ کام کرنے سے نہیں گھبراتے بلکہ وہ ایسے لوگوں کے ساتھ کام کرکے تجربات کرنے پر یقین رکھتے ہیں۔

گلوکار کا کہنا تھا کہ کیریئر کے 17 سال بعد بھی وہ تجربات کرنے پر یقین رکھتے ہیں اور یہی وجہ ہے کہ انہوں نے حال ہی میں ویلو میوزک اسٹیشن کے ذریعے ماضی کے مقبول گانے ’کدی تے ہنس بول کو‘ نئے انداز میں گاکر نئی نسل کی توجہ حاصل کرنے سمیت شوکت علی صاحب کو خراج عقیدت پیش کیا۔

ہر وقت شاہ رخ خان کے لیے حاضر ہوں، عاطف اسلم
شاہ رخ خان جب کہیں ان کےلیے گانا تیار کروں گا، گلوکار—فائل فوٹو: فیس بک/ اسکرین شاٹ
مذکورہ انٹرویو میں عاطف اسلم نے ماضی میں بولی وڈ بادشاہ شاہ رخ خان کے لیے گانا نہ گانے کے معاملے پر بھی کھل کر بات کی۔

’رفتہ رفتہ‘ گلوکار کا کہنا تھا کہ ماضی میں انہوں نے شاہ رخ خان کی ٹیم کی فرمائش پر اداکار کے لیے ’گیروا‘ گانا بھی ریکارڈ کرواکر انہیں بھجوا دیا تھا مگر انہیں کوئی جواب نہیں دیا گیا۔

میزبان کے ایک سوال کے جواب میں عاطف اسلم نے واضح کیا کہ شاہ رخ خان نے ان سے براہ راست کبھی رابطہ نہیں کیا، البتہ 2015 کی فلم ’دل والے‘ کے وقت ان کی ٹیم نے گلوکار سے رابطہ کرکے گانا تیار کرنے کی دخواست کی تھی۔

’دل دیاں گلاں‘ گلوکار نے بتایا کہ انہوں نے شاہ رخ خان کی ٹیم کی درخواست پر ہی ’دل والے‘ کے لیے ’گیروا‘ گانا تیار کرکےانہیں بھجوایا بھی تھا مگر پھر انہیں کوئی جواب نہیں دیا گیا۔

انہوں نے شاہ رخ خان کی تعریف کرتے ہوئے انہیں اچھا انسان قرار دیا اور کہا کہ وہ ان کے لیے ہمیشہ گانا تیار کرنے کے لیے موجود ہیں۔

عاطف اسلم نے شاہ رخ خان کو پیغام دیا کہ وہ ان کے لیے ہر وقت حاضر ہیں، وہ جب کہیں گے ان کے لیے وہ گانا تیار کریں گے۔

خیال رہے کہ 2015 میں ہی شاہ رخ خان نے کاجول کے ہمراہ ایک انٹرویو میں کہا تھا کہ انہوں نے عاطف اسلم کو گانا بنانے کے لیے کہا مگر پاکستانی گلوکار نے انکار کردیا۔

شاہ رخ خان نے کہا تھا کہ مصروفیت کی وجہ سے عاطف اسلم نے ان کے لیے گانا تیار نہیں کیا مگر اب انہوں نے انکشاف کیا ہے کہ انہوں نے تو گانا تیار کرکے بھجوا بھی دیا تھا مگر بولی وڈ اداکار کی ٹیم نے انہیں کوئی جواب نہیں دیا۔

عاطف اسلم نے جس ’گیروا‘ گانے کو شاہ رخ خان کی ٹیم کو تیار کرکے بھیجا تھا بعد میں اسے ’دل والے‘ کے لیے بھارتی گلوکار ارجیت سنگھ اور انتارا مترا نے گایا تھا اور اسے کاجول و شاہ رخ پر فلمایا گیا تھا۔