All posts by News Editor

اسلام آباد: خریداری کے قواعد میں نرمی کے ساتھ ہی پاکستان نے 30 اپریل سے 28 جون کے درمیان سپلائی کے لیے ڈالر کی طے شدہ قیمت پر 8 امپورٹڈ لیکیفیڈ نیچرل گیس (ایل این جی) کارگو طلب کرلیے۔

رپورٹ کے مطابق پاکستان ایل این جی لمیٹڈ (پی ایل ایل)، جو ایل این جی درآمد کرنے کے ذمہ دار عوامی شعبوں میں سے ایک ہے، نے پیر کو مئی اور جون میں 8 کارگو کی فراہمی کے لیے بولی کی دعوت دی تھی اور 30 مارچ کی آخری تاریخ (تقریباً ایک ہفتے کا وقت) طے کیا تھا۔

کمپنی معاہدوں کی بولی کی جانچ پڑتال اور ایوارڈ کے درمیان وقت کو بھی کم کرے گی۔

30 اپریل کو ایک کارگو کی فراہمی اور اس کے بعد مئی میں چار ہفتوں اور جون میں تین ہفتوں کے لیے بولی کی دعوت دی گئی ہے۔

پی ایل ایل نے اپنی ویب سائٹ پر لکھا کہ ‘بولی دہندگان سے درخواست کی گئی ہے کہ وہ بولی دستاویز کا بغور جائزہ لیں کیونکہ اس عمل میں کچھ اہم اصلاحات نافذ کی گئیں ہیں’۔

کمپنی نے بولی دہندگان سے یہ بھی کہا ہے کہ وہ اپنی بولیاں برینٹ کروڈ پرائز سے منسلک کرنے کے بجائے طے شدہ ڈالر کے نرخ میں پیش کریں۔

کچھ مہینوں قبل چند ہنگامی ٹینڈرز کے علاوہ پی ایل ایل نے ہمیشہ برینٹ کروڈ پرائز کے طور پر بولی طلب کی تھی۔

اس کے نتیجے میں مختلف اقسام کی حدود اور بولی کی قیمتیں زیادہ ہوگئیں کیونکہ سپلائی کرنے والوں کو اپنے جہازوں اور ایل این جی کو روکنا پڑا تھا۔یہ اقدام نجی اسپاٹ پلیئرز کے برعکس تھا جو مختصر نوٹس پر حتمی فیصلے کرسکتے ہیں۔

گزشتہ مہینے کے آخر میں وفاقی کابینہ نے پی ایل ایل کو پبلک پروکیورمنٹ ریگولیٹری اتھارٹی (پی پی آر اے) کے قواعد 35 سے جزوی چھوٹ دے دی تھی جس میں تشخیصی رپورٹ کے اعلان اور اسپاٹ کارگو کے لیے ٹینڈرز دینے کے درمیان مدت میں نرمی کی گئی تھی۔

واضح رہے کہ پاکستان کی کل ایل این جی کی نصف سے زیادہ درآمدات طویل المدتی معاہدوں پر مبنی ہیں جبکہ باقی ضروری مقدار اسپاٹ ٹینڈرز کے ذریعے پوری کی جاتی ہے۔

کراچی: پاکستان اسٹیل ملز (پی ایس ایم) نے 7 کیٹیگریز میں متعدد افسران کو برطرف کردیا، سابق ملازمین کا اندازہ ہے کہ تقریباً 5 سے 6 سو افسران اس فیصلے سے متاثر ہوئے ہیں۔

رپورٹ کے مطابق گزشتہ برس نومبر کے آخری ہفتے میں 49 فیصد ورکرز اور 70 فیصد افسران کو نکالا گیا جس کے تحت 4 ہزار 544 افراد بے روزگار ہوئے۔

جب 22 مارچ کو نکالے گئے ملازمین کی مجموعی تعداد پوچھی گئی تو اسٹیل ملز کے چیف ایگزیکٹو افسر بریگیڈیئر (ر) شجاع ایچ خرازمی کا کہنا تھا کہ انہیں افسران کی صحیح تعداد نہیں معلوم۔

اسٹیل ملز کے ترجمان محمد افضل کا کہنا ہے کہ وہ کسی سوال کا جواب نہیں دے سکتے کیوں کہ خود وہ بھی نکال دیے گئے ہیں۔

ملازمین کو ارسال کردہ خط کے مطابق اسٹیل ملز انتظامیہ نے سی او بی پی اور ریفریکٹریز ڈپارٹمنٹ کے سوا پروڈکشن ڈائریکٹوریٹ کے تمام افسران، قابل انجینیئرز اور آئی ٹی ماہرین کے سوا ٹیکنکل سروسز ڈائریکٹرز کے تمام افسران کو نکالنے کا فیصلہ کیا ہے۔

ان کے علاوہ قابل انجینئرز کے سوا پروڈکشن، پلاننگ اینڈ کنٹرول، پبلک ریلیشن ڈپارٹمنٹ، پاکستان اسٹیل انسٹیٹیوٹ آف ٹیکنالوجی اینڈ کارپوریٹ پلاننگ اینڈ انویسٹمنٹ کے تمام افسران کو بھی فارغ کرنے کا فیصلہ کیا گیا۔

ساتھ ہی ساتھ سیکیورٹی ڈپارٹمنٹ کے تمام اسسٹنٹ منیجرز اور ڈپٹی منیجرز، مارکیٹنگ اور انٹرنل آڈٹ ڈپارٹمنٹ کے غیر تکنیکی عہدوں پر کام کرنے والے انجینیئرز، فنانس اور اے اینڈ پی ڈائریکٹوریٹ کے سوا تمام کانٹریکٹ اور ڈیلی ویجز کے افسران، اسلام آباد اور لاہور میں تعینات انجینئرز اور ماسٹر ڈگری رکھنے والے ملازمین کے سوا زونل دفاتر کے افسران کو بھی فارغ کرنے کا فیصلہ کیا گیا۔

خط میں مزید کہا گیا کہ چونکہ آپ برطرف ہونے والے ملازمین کی مذکورہ بالا کیٹیگری سے تعلق رکھتے ہیں اس لیے آپ کی ملازمت فوری طور پر ختم کی جاتی ہے۔

خط کے مطابق ‘تاہم فوری برطرفی کے باوجود آپ کو ملازمت کی شرائط و ضوابط کے مطابق قانونی واجبات کے علاوہ مارچ 2021 کی تنخواہ ادا کی جائے گی’۔

خط میں کہا گیا کہ یہ فیصلہ نہ صرف ملازمین بلکہ انتظامیہ کے لیے بھی تکلیف دہ ہے تاہم ملک اور اسٹیل ملز کے مفاد میں یہ فیصلہ اٹھایا گیا۔

برطرفیوں کا جواز دیتے ہوئے انتظامیہ کا کہنا تھا کہ اسٹیل ملز کئی برسوں سے نقصان برداشت کررہی ہے اور جون 2020 تک اس خسارے کا حجم 2 کھرب 12 ارب روپے تک پہنچ گیا تھا جبکہ ملز میں پیداواری کام سال 2015 سے موقوف ہے۔

افغان صدر اشرف غنی نے امریکا کا پیش کردہ امن منصوبہ مسترد کردیا ہے اور اس کے متبادل کے طور پر وہ آئندہ 6ماہ میں نئے صدارتی انتخابات کی تجویز پیش کریں گے۔

دو سینئر سرکاری عہدیداروں نے خبر رساں ایجنسی رائٹرز کو بتایا کہ غنی اگلے ماہ ترکی میں ہونے والے بین الاقوامی اجتماع میں اس منصوبے کا اعلان کرتے ہوئے ان کی منتخب حکومت کو عبوری انتظامیہ سے بدلنے کی امریکی تجویز کو مسترد کردیں گے۔

امریکا نے گزشتہ سال تقریباً دو دہائیوں کے بعد یکم مئی تک افغانستان سے اپنی فوجیں واپس بلانے پر اتفاق کیا تھا اور اس وقت امریکی انتظامیہ حکومت اور طالبان کے مابین جنگ ختم کرنے کے لیے ایک امن معاہدے پر دباؤ ڈال رہی ہے، قطر میں افغان فریقین کے مابین مذاکرات تعطل کا شکار ہو گئے ہیں۔

امریکی نمائندہ خصوصی زلمے خلیل زاد ایک ایسی تجویز پیش کی جس میں کابل حکومت کی جگہ عبوری انتظامیہ ہو گی لیکن اشرف غنی نے کسی بھی ایسے حل کی بھرپور مخالفت کی ہے جس کے تحت ان کی منتخب حکومت کو غیرمنتخب جانشینوں کے لیے حکومت چھوڑنی پڑے۔

ایک سینئر سرکاری عہدیدار نے نام ظاہر نہ کرنے کی شرط پر بتایا کہ ہم استنبول کے اجلاس میں یہ جوابی تجویز پیش کرنے جا رہے ہیں کہ اگر طالبان سیز فائر پر راضی ہوتے ہیں تو تو جلد از جلد صدارتی انتخابات کرا دیے جائیں۔

ایک اور افغان سرکاری عہدیدار نے کہا کہ صدر کبھی بھی اس سے دستبردار ہونے پر راضی نہیں ہوں گے اور ان کا ماننا ہے کہ آئندہ کوئی بھی حکومت سیاسی معاہدے کے بجائے جمہوری عمل کے ذریعے تشکیل دی جانی چاہیے۔

ایک تیسرے سینئر عہدیدار نے یہ بھی کہا کہ غنی کی ممکنہ تجویز میں جلد صدارتی انتخابات شامل ہوں گے البتہ یہ نہیں بتایا کہ یہ انتخابات کب تک کرائے جائیں گے، انہوں نے مزید بتایا کہ غنی نے پہلے ہی زلمے خلیل زاد سے اپنا روڈ میپ شیئر کیا تھا۔

امریکا نے اپنی تاریخ کی سب سے طویل جنگ کے خاتمے کے لیے گزشتہ سال طالبان سے جس معاہدے پر اتفاق کیا تھا اس کی مدت کے خاتمے میں اب محض کچھ ہتے باقی ہیں اور امرکا کابل حکومت اور طالبان کی اقتدار میں شراکت داری یقنی بنانے کے لیے علاقائی حمایت کا مطالبہ کررہا ہے۔

لیکن سفارت کاروں اور غیر ملکی عہدیداروں نے کہا ہے کہ اشرف غنی کی حمایت کے بغیر امریکی منصوبوں پر آگے بڑھنا مشکل ہو گا۔

اس خطے کے دورے کے دوران زلمے خلیل زاد دوحہ اور اسلام آباد میں بھی قیام کریں گے اور آئندہ ماہ اقوام متحدہ کی شمولیت کی حامل کانفرنس کے ترکی میں انعقاد پر اصرار کریں گے۔

افغان عہدیداروں نے کہا کہ اشرف کی جوابی تجویز کے طور پر ان کی حکومت اقوام متحدہ سے نئے انتخابات کا قریب سے مشاہدہ کرنے کے لیے کہے گی تاکہ یہ یقینی بنایا جاسکے کہ اسے تمام فریقین نے قبول کر لیا ہے۔

صدارتی محل کے ترجمان نے اس پر کوئی تبصرہ کرنے سے انکار کردیا۔

قطر کے دارالحکومت دوحہ میں افغان حکومت اور طالبان کے مابین امن مذاکرات میں بہت کم پیشرفت ہوئی ہے اور ہر گزرتے دن کے ساتھ تشدد میں اضافہ ہوتا جا رہا ہے۔

2001 کے آخر میں افغان مخالفین اور امریکی فضائی حملوں کے ذریعے اقتدار سے بے دخل کیے جانے والے طالبان غیر ملکی حمایت سے چلنے والی افغان حکومت سے برسر پیکار ہے، طالبان جنگ بندی کو مسترد کر چکے ہیں اور ان کا کہنا ہے کہ وہ براہ راست عبوری حکومت میں شامل نہیں ہوں گے۔

متنازع صدارتی انتخابات کے بعد گزشتہ سال مارچ میں غنی نے دوسری پانچ سالہ مدت کے لیے صدر کے عہدے کا حلف لیا تھا۔

صدر جو بائیڈن کی سربراہی میں نئی ​​امریکی انتظامیہ یکم مئی سے پہلے اپنے منصوبوں پر نظرثانی کر رہی ہے کیونکہ گزشتہ سال ڈونلڈ ٹرمپ انتظامیہ نے طالبان سے اس بات پر اتفاق کیا تھا کہ مئی 2021 تک افغانستان میں موجود بقیہ ڈھائی ہزار فوجی بھی وطن واپس لوٹ جائیں گے ۔

طالبان خبردار کر چکے ہیں کہ اگر امریکا انخلا کے لیے ڈیڈ لائن کو پورا نہیں کرتا ہے تو اس کے سنگین نتائج برآمد ہوں گے۔

رائے پور: بھارتی ریاست چھتیس گڑھ میں ماؤنواز باغیوں کے بارودی سرنگ دھماکے میں سیکیورٹی فورس کے 3 اہلکار ہلاک اور متعدد زخمی ہوگئے۔

بھارتی میڈیا کے مطابق ریاست چھتیس گڑھ کے ضلع نرائن پور میں پیرا ملٹری فورس ’’ ڈسٹرکٹ ریزرو گارڈ‘‘ کی گاڑی کو دھماکے سے اُڑا دیا گیا، بارودی سرنگ دھماکا اس وقت کیا گیا جب سیکیورٹی گاڑی وہاں سے گزر رہی تھی۔
دھماکے میں ضلعی ریزرو گارڈ کے 3 اہلکار موقع پر ہی دم توڑ گئے جب کہ 5 سے زائد زخمی ہیں جن میں سے دو کی حالت نازک ہونے کے باعث ہلاکتوں میں اضافے کا خدشہ ظاہر کیا جا رہا ہے۔

حملے کی ذمہ داری ماؤنواز مسلح تنظیم ’’ نیکسلائٹ‘‘ نے قبول کرلی ہے جو مغربی بنگال اور چھتیس گڑھ میں علیحدگی پسند تنظیم کہلائی جاتی ہیں اور اس تنظیم کیخلاف آپریشن کے لیے سینٹرل ریزرو پولیس فورس کو استعمال کیا جاتا ہے۔

واضح رہے کہ چھتیس گڑھ اور مغربی بنگال میں بھارتی فوج اور پیرملٹری فورس پر حملوں کی ذمہ دار نیکسلائٹ تحریک کا آغاز 1967 میں ہوا تھا۔ یہ تنظیم چینی رہنما ماؤزے تنگ کے نظریات اور فلسفے سے متاثر ہے اور باغیانہ سرگرمیوں میں ملوث رہی ہے۔

برسلز: یورپی یونین، برطانیہ، کینیڈا اور امریکا نے چین کے صوبے مغربی سنکیانگ کے علاقے میں انسانی حقوق کی مبینہ خلاف ورزیوں پر چین میں عہدیداروں کے خلاف مربوط پابندیوں کا آغاز کردیا۔

غیر ملکی خبر رساں ادارے اے پی کی رپورٹ کے مطابق یورپی یونین نے سنکیانگ میں چار سینئر عہدیداروں پر پابندیاں عائد کیں۔پابندیوں میں اہلکاروں کے اثاثوں کو منجمد کرنا اور ان پر مغربی ممالک کے سفر پر پابندی عائد شامل ہے۔اس کے علاوہ یورپی شہریوں اور کمپنیوں کو انہیں مالی مدد فراہم کرنے کی بھی اجازت نہیں ہے۔

27 ممالک پر مشتمل بلاک سنکیانگ پروڈکشن اینڈ کنسٹرکشن کورپس پبلک سیکیورٹی بیورو کے اثاثوں کو بھی منجمد کرچکا ہے جس میں اس کو سنکیانگ چلانے والی اور اس کی معیشت کو کنٹرول کرنے والی ایک سرکاری معاشی اور نیم فوجی تنظیم کے طور پر بتایا گیا ہے۔

برطانوی سیکریٹری خارجہ ڈومینک راب نے کہا کہ یہ اقدامات برطانیہ، امریکا، کینیڈا اور 27 ممالک کی یورپی یونین کی طرف سے ایغور مسلمانوں کے خلاف سنگین انسانی حقوق کی پامالی سے متعلق ‘سامنے آنے والے شواہد’ کے تحت کارروائی کرنے پر سفارت کاری کا حصہ ہیں۔

امریکی وزیر خارجہ انٹونی بلنکن نے ایک بیان میں کہا کہ متحدہ رد عمل نے بین الاقوامی انسانی حقوق کی خلاف ورزی کرنے یا ان کا غلط استعمال کرنے والوں کو ایک مضبوط پیغام بھیج دیا ہے اور ‘ہم مشترکہ شراکت داروں کے ساتھ ہم آہنگی میں مزید اقدامات کریں گے، ہم چین کے جرائم کے فوری خاتمے اور متعدد متاثرین کے لیے انصاف کے حصول کے لیے پوری دنیا میں اپنے اتحادیوں کے ساتھ کھڑے رہیں گے’۔

چین نے یورپی یونین کے اس اقدام کا فوری جواب دیتے ہوئے 10 یورپی افراد اور چار اداروں پر پابندیاں عائد کیں اور کہا کہ چین کے مفادات کو نقصان پہنچا ہے اور جھوٹ اور غلط معلومات پھیلائی گئی ہیں۔

ابتدائی طور پر چین نے سنکیانگ میں ایغور مسلمانوں کو حراست میں لینے کے لیے کیمپوں کے وجود سے انکار کیا تھا تاہم بعد ازاں اسے انہوں نے ملازمت کی تربیت فراہم کرنے اور بنیاد پرست جہادی نظریے کے حامل افراد کو نئے سرے سے تعلیم دینے کے مراکز کے طور پر بتایا تھا۔
حکام نے وہاں انسانی حقوق کی پامالی کے تمام الزامات کی تردید کی ہے۔
چینی وزارت نے 10 افراد اور چار اداروں کے خلاف پابندیاں عائد کرنے کا اعلان کرتے ہوئے کہا کہ انہیں اور ان کے اہلخانہ کو چین، ہانگ کانگ یا مکاؤ میں داخل ہونے پر پابندی عائد کی جائے گی اور ان علاقوں کے ساتھ مالی معاملات سے بھی انکار کردیا جائے گا۔

لاہور: وفاقی حکومت نے مریم نواز کی پیشی کے موقع پر نیب آفس کی سیکیورٹی کے لیے رینجرز تعینات کرنے کی منظوری دے دی۔

مریم نواز کی 26 مارچ کو نیب پیشی کے حوالے سے نیب لاہور نے وفاقی وزارت داخلہ اور پنجاب حکومت کو رینجرز اور پولیس کی تعیناتی کےلئے درخواست دی جس میں نیب دفتر کو ریڈ زون قرار دینے کی بھی استدعا کی گئی۔

وفاقی وزارت داخلہ نے نیب آفس لاہور کی سیکورٹی کیلئے رینجرز تعینات کرنے کی منظوری دے دی۔ نیب آفس کے احاطے کی سیکورٹی رینجرز اور پولیس کے سپرد ہوگی۔
پنجاب حکومت کی ذیلی کابینہ کمیٹی برائےامن وامان نیب آفس کو ریڈ زون قرار دینے کے حوالے سے نیب لاہور کی درخواست پر فیصلہ کرے گی۔

علاوہ ازیں نیب لاہور میں مریم نواز کی 26 مارچ کو پیشی کے دوران گرفتاری کی افواہیں پھیلی ہوئی ہیں تاہم ذرائع کے مطابق نیب کی جانب سے مریم نواز کی گرفتاری کے کوئی امکانات موجود نہیں۔

لاہور ہائی کورٹ نے نیب اور مریم نواز سے 7 اپریل 2021 کو جواب طلب کر رکھا ہے اور ہائی کورٹ میں کیس کا جواب جمع کروانے کیلئے مریم نواز کو طلب کیا گیا ہے۔ ان کیلئے چوہدری شوگر ملز کیس میں صرف سوالنامہ رکھا جائے گا۔ چوہدری شوگر ملز کیس کی پیشی مکمل ہونے پر جاتی عمرہ اراضی کیس میں سوال ہونگے۔ تفتیش کا ریکارڈ نیب حکام ہائی کورٹ کے روبرو پیش کرینگے۔

اسلام آباد: براڈشیٹ اسکینڈل کی تحقیقاتی رپورٹ وزیراعظم عمران خان کو پیش کردی گئی۔

ذرائع کے مطابق وزیراعظم عمران خان کی قانونی ٹیم نے انہیں براڈ شیٹ اسکینڈل کی تحقیقاتی رپورٹ پیش کی جس پر وزیراعظم نے یہ رپورٹ کابینہ کے اجلاس میں پیش کرنے کی ہدایت کی ہے۔

ذرائع کا کہناہےکہ رپورٹ کابینہ کے آئندہ اجلاس میں پیش کی جائے گی اور کابینہ جائزہ لے کر رپورٹ پبلک کرنے کی منظوری دے گی۔

واضح رہے کہ جسٹس ریٹائرڈ عظمت سعید شیخ کی سربراہی میں بننے والے انکوائری کمیشن نے براڈ شیٹ کیس کی تحقیقات مکمل کر لی ہیں۔

ذرائع کے مطابق براڈشیٹ انکوائری کمیشن کی 100 صفحات پر مشتمل رپورٹ تیار کر لی گئی ہے، انکوائری رپورٹ رواں ہفتے کسی بھی دن وفاقی حکومت کو بھجوا دی جائے گی۔

ذرائع کا بتانا ہے کہ 100 صفحات کی رپورٹ کے ساتھ مخلتف شخصیات کے بیانات اور دستاویزات کو الگ رکھا گیا ہے۔

امریکی جریدے بلوم برگ نے دعویٰ کیا ہے کہ پاک بھارت امن روڈ میپ کے لیے متحدہ عرب امارات کی قیادت نے مصالحتی کردار ادا کیا۔

بلوم برگ کے مطابق دنیا گزشتہ ماہ بھارت اورپاکستان کی اعلیٰ فوجی قیادت کی جانب سے 2003 کے جنگ بندی معاہدے کی پاسداری کے مشترکہ عزم پر حیران تھی لیکن متحدہ عرب امارات کے وزیر خارجہ شیخ عبداللہ بن زید اس کے 24 گھنٹوں سے بھی کم وقت میں دہلی کےایک روزہ دورے پر گئے تھے۔

بلوم برگ کے مطابق عرب امارات کے وزیرخارجہ عبداللہ بن زید نے 26 فروری کو بھارتی ہم منصب ایس جے شنکر سے ملاقات کی اور بند دروازے میں ہوئے اجلاس سے آگاہ حکام نے پاکستان بھارت سیز فائر معاہدے کی پاسداری کے اعلان کو عرب امارات کی ایک ماہ قبل شروع کی جانے والی کوشش کے سلسلے میں اہم پیش رفت قرار دیا۔

بلوم برگ کا کہنا ہے کہ پاک بھارت سیز فائر اس بڑے روڈ میپ کا محض آغاز ہے جس کا مقصد ہمسایہ ملکوں کے درمیان پائیدار امن قائم کرنا ہے، سیزفائر سے متعلق مشترکہ اعلان کے بعد عرب امارات نے اپنے سرکاری اعلامیے میں دو ملکوں کی کوششوں کو تاریخی قرار دیتےہوئے سراہا تھا۔

بلوم برگ کے مطابق اگلے مرحلے میں دونوں ملک اپنے سفارتی عملے کو دہلی اور اسلام آباد میں متعین کریں گےجس کے بعد مشکل مرحلہ آئے گا، اس مرحلے میں دوطرفہ تجارت اور کشمیر کے مسئلے کے دیرپا حل پر بات ہوگی۔

غیر ملکی میڈیا کا کہنا ہے کہ پاکستانی وزارتِ خارجہ ان اطلاعات پر کسی ردعمل کا اظہار آج کر سکتی ہے۔

ملک بھر میں آج قومی وملّی جوش و جذبے سے یوم پاکستان منایا جارہا ہے۔

آج کا دن 23 مارچ 1940 کو آل انڈیا مسلم لیگ کے اجلاس میں منظور کی گئی قرارداد کی یاد میں منایا جاتا ہے جس کی روشنی میں برصغیر کے مسلمانوں نے اپنے لئے ایک علیحدہ وطن کا خواب شرمندہ تعبیر کیا۔ یہ قرارداد لاہور منٹو پارک میں پیش کی گئی جہاں اس کی یادگار کے طور پر مینار پاکستان تعمیر کیا گیا۔

اس دن کی مناسبت سے ملک بھر میں عام تعطیل ہے۔ دن کا آغاز وفاقی دارالحکومت میں 31 جب کہ صوبائی دارالحکومتوں میں 21 ،21 توپوں کی سلامی سے ہوا۔ نماز فجر کے اجتماعات میں ملک و ملت کی سلامتی اور استحکام کے لئے خصوصی دعائیں مانگی گئیں۔ جب کہ دیگر مذاہب کے ماننے والوں کی عبادت گاہوں میں بھی خصوصی دعائیہ تقاریب کا اہتمام کیا گیا۔ ملک بھر میں کورونا ایس اوز پیز کو مد نظر رکھتے ہوئے تقریبات منعقد کی جارہی ہیں۔ تمام سرکاری و نجی عمارتوں پر قومی پرچم لہرائے جارہے ہیں، آج کے دن کی مناسبت سے سرکاری و نجی ٹی وی اور ریڈیو چینلز سے خصوصی دستاویزی پروگرام نشر کیے جارہے ہیں جس میں یوم پاکستان کی اہمیت کو اجاگر کیا جارہا ہے۔
کراچی میں بابائے قوم قائد اعظم محمد علی جناح اورلاہورمیں شاعر مشرق علامہ اقبال کے مزار پر گارڈز کی تبدیلی کی سادہ اور پُروقار تقریبات منعقد کی گئیں۔ یوم پاکستان کی مناسبت سے ہر سال شکر پڑیاں گراؤنڈ اسلام آباد میں مسلح افواج کی شاندار پریڈ کا انعقاد ہوتا ہے تاہم اس مرتبہ اسلام آباد اور راول پنڈی میں وقفے وقفے سے بارش کا سلسلہ جاری ہے جس کی وجہ سے روایتی پریڈ کو 2 روز کے لیے ملتوی کردیا گیا ہے۔ پاک فوج کے شعبہ تعلقات عامہ آئی ایس پی آر کے مطابق یوم پاکستان کی پریڈ اب 25 مارچ کو ہوگی۔ مسلح افواج کی پریڈ مقررہ وقت پر شکرپڑیاں میں ہوگی۔

پاکستان میں کورونا وائرس کے پھیلاؤ کے پیشِ نظر نیشنل کمانڈ اینڈ آپریشن سینٹر (این سی او سی) نے ملک بھر میں نئی پابندیاں عائد کردی ہیں اور حکام مسلسل احتیاطی تدابیر اپنانے کے لیے عوام پر زور دے رہے ہیں۔

ملک میں گزشتہ 6 روز سے 3 ہزار سے زائد کیسز رپورٹ ہورہے ہیں اور 24 گھنٹوں میں بھی اس متعدی وائرس کے کیسز میں 3 ہزار 270 کا اضافہ ہوا جبکہ 72 مریض زندگی کی بازی ہار گئے۔

اسی طرح ملک میں کورونا وائرس متاثرین کی مجموعی تعداد 6 لاکھ 33 ہزار 741 تک جا پہنچی ہے جس میں سے 13 ہزار 935 مریض انتقال کر چکے ہیں۔

علاوہ ازیں گزشتہ 24 گھنٹوں میں کووِڈ 19 کا شکار مزید ایک ہزار 733 مریض صحتیاب ہونے میں کامیاب رہے اور یوں صحتیاب مریضوں کی مجموعی تعداد 5 لاکھ 85 ہزار 271 ہوگئی۔
پاکستان میں اس وائرس سے اب تک 92.4 فیصد مریض صحتیاب ہوچکے ہیں جبکہ فعال کیسز کی تعداد 34 ہزار 741 تک جا پہنچی ہے۔

واضح رہے کہ ملک میں کورونا وائرس کا پہلا کیس 26 فروری 2020 کو رپورٹ ہوا تھا، جس کے بعد ملک میں تعلیمی اداروں کی بندش کے ساتھ ساتھ مختلف پابندیوں اور لاک ڈاؤن کے نفاذ اور ہٹانے کا سلسلہ جاری رہا۔

دریں اثنا اب ملک میں وائرس کی تیسری لہر کے پیشِ نظر کئی علاقوں میں دوبارہ لاک ڈاؤن اور اسمارٹ لاک ڈاؤن لگائے گئے جبکہ کاروباری سرگرمیوں کے اوقات کار بھی محدود کردیے گئے ہیں۔

آج 23 مارچ کو پاکستان کے چاروں صوبوں اور وفاقی اکائیوں میں وائرس کی صورتحال کچھ یوں ہے:

سندھ
صوبہ سندھ پاکستان کا کورونا وائرس سے سب سے زیادہ متاثر ہونے والا صوبہ ہے تاہم حالیہ لہر کے دوران پنجاب کے مقابلے میں سندھ کی صورتحال قدرے بہتر ہے۔

یہاں گزشتہ 24 گھنٹوں میں وائرس نے مزید 174 افراد کو متاثر کیا اور خوش قسمتی سے اموات کی تعداد میں گزشتہ 2 روز سے اضافہ نہیں ہوا۔

اس طرح سندھ میں وائرس کے اب تک رپورٹ ہونے والے کیسز کی تعداد 2 لاکھ 63 ہزار 464 ہوگئی اور اموات 4 ہزار 479 پر برقرار ہیں۔

پنجاب
صوبہ پنجاب میں کورونا وائرس کی صورتحال خاصی بگڑی ہوئی ہے اور اس ضمن میں صوبے میں متعدد پابندیاں بھی عائد کی گئی ہیں۔

گزشتہ 24 گھنٹوں کے دوران پنجاب میں ایک ہزار 929 کیسز رپورٹ ہوئے جبکہ 57 مریض انتقال کر گئے۔

اس طرح پنجاب میں مجموعی کیسز کی تعداد 2 لاکھ 969 اور اموات 6 ہزار 39 ہوگئیں۔

خیبرپختونخوا
ادھر خیبرپختونخوا میں گزشتہ 24 گھنٹوں کے دوران عالمی وبا کے 482 نئے کیسز کی تشخیص ہوئی اور 10 اموات رپورٹ ہوئیں۔

اس طرح سامنے آنے والے ان اعداد و شمار کے بعد وہاں کیسز کی مجموعی تعداد 80 ہزار 519 اور اموات 2 ہزار 225 تک پہنچ گئیں۔

بلوچستان
رقبے کے لحاظ سے ملک کے سب سے بڑے صوبے بلوچستان میں گزشتہ روز 5 نئے کیسز سامنے آئے اور مزید کوئی موت رپورٹ نہیں ہوئی۔

اس طرح وہاں مجموعی کیسز کی تعداد 19 ہزار347 ہوگئی جبکہ اموات کی تعداد 203 ہے۔

اسلام آباد
ملک کے وفاقی دارالحکومت میں عالمی وبا کے 590 نئے کیسز کی تصدیق ہوئی اور مزید 3 مریض انتقال کر گئے۔

یوں اسلام آباد میں مجموعی کیسز 52 ہزار 676 تک پہنچ گئے اور اب تک 548 مریض انتقال کر چکے ہیں۔

آزاد کشمیر
آزاد کشمیر میں بھی کورونا کیسز تشویشناک حد تک بڑھ رہے ہیں اور گزشتہ روز مزید 88 افراد اس سے متاثر ہوئے جبکہ 2 مریض دم توڑ گئے۔

آزاد کشمیر میں کورونا متاثرین کی تعداد 11 ہزار 792 تک جا پہنچی ہے جبکہ مرنے والوں کی تعداد 338 ہے۔

گلگت بلتستان
گلگت بلتستان کی حکومت خطے کو کورونا فری قرار دے چکی تھی تاہم گزشتہ روز وہاں 2 نئے کیسز سامنے آئے۔

اس علاقے میں کورونا کے مجموعی طور پر 4 ہزار 974 کیسز رپورٹ ہوچکے ہیں جبکہ 103 افراد کا انتقال ہوا۔