All posts by News Editor

اسلام آباد: جے یو آئی (ف) کے سربراہ مولانا فضل الرحمان نے افغان طالبان کو ان کی کامیابی پر مبارکباد دیتے ہوئے ہر قسم کے تعاون کی یقین دہانی کرائی ہے.

جے یو آئی (ف) کی جانب سے جاری بیان کے مطابق مولانا فضل الرحمان نے افغانستان میں تحریک اسلامی طالبان افغانستان کی بیس سالہ طویل جہاد کی کامیابی پر مبارکباد دیتے ہوئے انہیں ہر قسم کے تعاون کی یقین دہانی کرائی ہے۔

مولانا فضل الرحمان نے کہا کہ تحریک اسلامی طالبان کے امیر مولوی ہیبة اللہ اور ان کے تمام رفقاء کو اس عظیم کامیابی پر مبارکباد پیش کرتے ہیں، جمعیت نے روز اول سے امریکا اور نیٹو افواج کے افغانستان پر حملے کو جارحیت اور تجاوز جب کہ طالبان کی مزاحمت کو جائز دفاع قرار دیا تھا، مخلصانہ قربانیوں کے بعد اللہ تعالی کی مدد اور تائید سے طالبان نے اپنے وطن افغانستان کو عالمی قوتوں سے آزاد کرادیا ہے۔
سربراہ جے یو آئی (ف) کا کہنا تھا کہ ہم افغانستان کے عوام کو بالخصوص اور امت مسلمہ کو بالعموم مبارکباد کا مستحق قرار دیتے ہیں، طالبان قیادت نے فتوحات حاصل کرنے کے بعد امن ، خیر سگالی اور مفاہمت کی پالیسی کے ساتھ جس نئے نظام کے آغاز کیا ہے، جمعیت اسے قدر کے نگاہ سے دیکھتی ہے، ہم توقع رکھیں گے کہ اسی خلوص ، اورتدبر کے ساتھ بہتر حکمت عملی کے ذریعہ ایک پر امن اور مستحکم اسلامی افغانستان کی تشکیل میں کامیاب ہوں گے۔

اسلام آباد: سینیٹ کی قائمہ کمیٹی برائے دفاع نے افغانستان کی موجودہ صورت حال پر غور کے لیے پارلیمنٹ کامشترکہ اجلاس بلانے کا مطالبہ کردیا۔

پارلیمنٹ ہاؤس اسلام آباد میں مشاہد حسین سید کی سربراہی میں سینیٹ کی قائمہ کمیٹی برائے دفاع کا اجلاس ہوا جس میں افغانستان کے حوالے سے متفقہ قرارداد منظور کی گئی اور موجودہ صورت حال پر غور کے لیے پارلیمنٹ کا مشترکہ اجلاس بلانے کا مطالبہ کردیا۔

قرارداد میں کہا گیا ہے کہ پاکستان کی افعانستان کے حوالے سے پالیسی واضح ہے، ہم افغانستان میں اتحاد، علاقائی سالمیت اور خود مختاری کی حمایت کرتے ہیں، افغانستان میں خانہ جنگی سے بچنے کے لیے پرامن سیاسی تبدیلی وسیع البنیاد اتفاق پر ہونی چاہیے، افغان سرزمین کسی ملک کے خلاف استعمال نہیں ہونی چاہیے، پاکستان کے خلاف سرحد پار دہشت گردی کے لئے افغان سر زمین استعمال نہ ہو۔
کمیٹی کے چیئرمین مشاہد حسین سید نے کہا کہ بھارت کے 87 ٹریننگ کیمپ پاکستان کے خلاف کام کر رہے ہیں، 66 بھارتی ٹریننگ کیمپ افغانستان میں ہیں، افغانستان میں عبوری حکومت کے لیے مذاکرات شروع ہو چکے ہیں،افغان عوام اپنی مرضی کی حکومت بنائیں جو سب کی نمائندہ ہو، طالبان نے بھی کہا ہے کہ ماضی کی غلطیاں نہیں دہرائیں گے، باہر کا کوئی ملک افغان حکومت کو ڈکٹیٹ کرنے کی کوشش نہ کرے، عالمی برادری افغانستان کی تعمیر نو میں مدد کریں۔

اسلام آباد: ترجمان دفتر خارجہ زاہد حفیظ چوہدری نے کہا ہے کہ افغانستان میں دیرپا امن اور استحکام کا حصول اور چار دہائیوں سے جاری تنازع کا خاتمہ عالمی برادری کی مشترکہ ذمہ داری ہے۔

زاہد حفیظ چوہدری نے کہا کہ ہم افغانستان میں تیزی سے بدلتی صورت حال پر گہری نظر رکھے ہوئے ہیں، پاکستان سمجھتا ہے کہ موجودہ صورت حال میں افغان قیادت مل کر کام کرے تاکہ افغانستان میں پائیدار امن اور استحکام کی راہ ہموار ہوسکے، پاکستان نے ہمیشہ افغنستان کے مسئلے کے سیاسی حل پر زور دیا ہے اور اس کے لیے ہم اپنا تعمیری کردار ادا کرتے رہیں گے۔

ترجمان دفتر خارجہ نے کہا کہ ہمارے خیال میں افغانستان میں دیرپا امن اور استحکام کا حصول اور چار دہائیوں سے جاری تنازع کا خاتمہ عالمی برادری کی مشترکہ ذمہ داری ہے ۔ ہم امید کرتے ہیں کہ ہماری اجتماعی کوششیں افغانستان میں دیرپا امن ، ترقی اور خوشحالی لانے میں معاون ثابت ہوں گی۔

وزیراعظم عمران خان نے پاکستان بھر میں تعلیم کے شعبے میں طبقاتی تقسیم کو ختم کرنے کے لیے یکساں نصابِ تعلیم کا اجرا کردیا۔

اس حوالے سے اسلام آباد میں منعقدہ ایک تقریب سے خطاب کرتے ہوئے ان کا کہنا تھا کہ ‘وزیر تعلیم شفقت محمود اور ان کی ٹیم کو خراج تحسین پیش کرنا چاہتا ہوں’۔

ان کا کہنا تھا کہ ’25 سال سے یہ نظریہ تھا کہ پاکستان میں ایک دن ایک ہی نصاب پورے ملک میں پڑھایا جائے، لوگ کہتے تھے کہ یہ ناممکن ہے کیونکہ جنہوں نے اس کے فیصلے کرنے تھے ان کے بچے انگریزی میڈیم اسکول میں پڑھتے تھے اور ان ہی کے لیے ساری نوکریاں تھی’۔

انہوں نے کہا کہ سول سروس میں جانے کے لیے بھی انگریزی میڈیم پڑھنا ضروری تھا۔

عمران خان کا کہنا تھا کہ برطانوی حکومت انگریزی میڈیم اس لیے لائی تھی کہ وہ ہندوستان میں اپنا کلچر نافذ کرنا چاہتے تھے۔

ان کا کہنا تھا کہ ‘ہم نے آزاد ہونے کے بعد انگریزی میڈیم کے نصاب کو ایک کرنے کے بجائے اسے جاری رکھا جس کی وجہ سے یہ تفرقہ بڑھتا گیا’۔

انہوں نے کہا کہ ‘جب میں نے لاہور کی ٹیم سے کرکٹ کھیلنا شروع کی تو ہمارے درمیان اتنا فرق تھا کہ ٹیم کے لوگوں سے دوستی بھی نہیں ہوسکتی تھی’۔

انہوں نے بتایا کہ ‘میری سوچ تھی کہ ہمیں موقع ملے تو ایک نصاب لائیں تاکہ ہمارے قوم کی سوچ ایک ہو، ایلیٹ طبقہ اگر کسی نظام سے فائدہ اٹھارہا ہو تو وہ اسے تبدیل ہونے نہیں دیتا’۔

وزیر اعظم کا کہنا تھا کہ یہ پہلا قدم ہے اس میں مزید مشکلات کا سامنا کرنا ہوگا، لوگ کہیں گے کہ ہماری تعلیمی نظام تباہ ہورہا ہے۔

ان کا کہنا تھا کہ جب بھی کوئی بڑا قدم اٹھایا جاتا ہے تو کشتیاں جلانی پڑتی ہیں، ہم تمام مشکلات کے باوجود اس ملک کو ایک قوم بنائیں گے۔

انہوں نے کہا کہ ‘ہمارے ملک کو ایک اور بہت بڑا نقصان یہ ہوا کہ ہم صرف انگریزی زبان نہیں سیکھتے بلکہ ان کا کلچر ہی اپنا رہے ہیں’۔

ان کا کہنا تھا کہ ‘اگر ہم کسی کے کلچر کو اپناتے ہیں تو ذہنی طور پر غلام ہوجاتے ہیں جسے ختم کرنا بہت مشکل ہوتا ہے’۔

انہوں نے کہا کہ ‘ایک غلام ذہن بڑے کام نہیں کرسکتا، آپ کسی کی کاپی کرکے اچھے غلام بن سکتے ہیں مگر ان سے آگے نہیں جاسکتے’۔

عمران خان کا کہنا تھا کہ غلامی کی زنجیریں توڑنی بہت ضروری ہیں اور ایک نصاب سے ہمیں آزادی کی راہ ملے گی۔

ان کا کہنا تھا کہ ‘8ویں، 9ویں اور 10ویں جماعت میں سیرت نبوی پڑھائی جائے گی، اسے 2023 کا ٹائم لائن دیا گیا ہے شفقت محمود سے درخواست کرتا ہوں کہ اسے 5 یا 6 ماہ میں نافذ کریں اتنی دیر کی ضرورت نہیں’۔

انہوں نے کہا کہ دنیا کی تاریخ میں کسی کی اتنی کامیابی نہیں جو ہمارے نبی ﷺ کی ہے، اللہ ہمیں ہماری ہی بہتری کے لیے حکم دیتا ہے کہ حضرت محمد ﷺ کی زندگی سے سیکھو۔

انہوں نے کہا کہ ‘ہماری کوشش یہ ہوسکتی ہے کہ ہم اپنے بچوں کو راستہ دکھائیں اس لیے چاہتا ہوں کہ یہ جلد از جلد ہو’۔

وزیر اعظم کا کہنا تھا کہ علامہ اقبال صدیوں کے سب سے بڑے اسلامی اسکالر تھے، انہیں دین کی سمجھ تھی، پھر انہوں نے مغربی فلسفہ پڑھا تو وہ بہتر تجزیہ کرسکے تھے اور ان کا تجزیہ آج بھی متعلقہ ہے جبکہ اب ہم یا تو مغرب کی طرف دیکھتے ہیں یا دوسری طرف مغرب کو جانتے ہی نہیں ہیں۔

ان کا کہنا تھا کہ تعلیم سے لوگوں نے ایٹم بم بنایا جس سے لاکھوں کی جانیں جاتی ہیں اور کسی نے کروڑوں کی جانیں بچائیں، تعلیم کافی نہیں اس کے ساتھ انسانیت بھی ضروری ہے۔

انہوں نے کہا کہ ‘ہم چاہتے ہیں کہ پاکستان کی اقلیتوں کو بھی ان کے مذہب کے بارے میں پڑھایا جائے کیونکہ تمام مذاہب انسانیت کا درس دیتے ہیں’۔

قبل ازیں وزیرِ اعظم عمران خان نے پاکستان بھر میں تعلیم کے شعبے میں طبقاتی تقسیم کو ختم کرنے کے لیے یکساں نصابِ تعلیم کا اجرا کیا۔

وزیر اعظم آفس کے میڈیا ونگ سے جاری بیان کے مطابق معاشرتی اقدار، تقافتی و مذہبی تنوع کا احترام، عملی زندگی کے پہلو اور پیشہ ورانہ تعلیم و ہنر بھی نصاب کے اہم پہلو ہیں۔

یکساں تعلیمی نصاب اکیسویں صدی سے ہم آہنگ نصاب طالبِ علموں میں مثبت تنقیدی سوچ اور تخلیقی صلاحیتوں کو نکھارنے میں معاون ثابت ہوگا۔

بیان میں کہا گیا کہ حکومت کے ہر شہری کو ترقی کے یکساں مواقع فراہم کرنے کے وژن کے عین مطابق، یکساں نصابِ تعلیم طبقاتی فرق کو ختم کرنے میں ایک اہم سنگِ میل ثابت ہوگا۔

وزیرِ اعظم تقریب میں مہمانِ خصوصی کے طور پر شریک ہوئے تھے۔

چمن: گڈز ٹرانسپورٹرز نے ٹرک ڈرائیوروں سے بھتہ لینے اور انہیں تشدد کا نشانہ بنانے کے خلاف کوئٹہ چمن شاہراہ بلاک کردی۔

تفصیلات کے مطابق چمن میں گڈز ٹرانسپورٹرز نے ٹرک ڈرائیوروں سے بھتہ لینے اور انہیں تشدد کا نشانہ بنانے کے خلاف احتجاج کرتے ہوئے کوئٹہ چمن شاہراہ بلاک کردی۔ جس کی وجہ سے شاہراہ پر گاڑیوں کی لمبی قطاریں لگ گئیں اور مسافروں کو مشکلات کا سامنا کرنا پڑا۔

احتجاج کرنے والوں کا کہنا تھا کہ ٹرک ڈرائیوروں سے ناصرف بھتہ لیا جاتا ہے بلکہ انہیں تشدد کا نشانہ بھی بنایا جاتا ہے، بھتہ خوروں اور تشدد کرنے والوں کے خلاف ایف آئی آر کے اندراج تک احتجاج جاری رہے گا۔

لاہور: قومی ایئر لائن پی آئی اے نے کابل ائیرپورٹ پر سیکیورٹی کی غیر یقینی صورتحال کے باعث فضائی آپریشن معطل کردیا۔

تفصیلات کے مطابق کابل ائیرپورٹ پر سیکیورٹی کی غیر یقینی صورتحال، عملے کی غیر موجودگی اور رن وے پر لوگوں کے بے پناہ ہجوم کے باعث اپنا آپریشن بند کردیا ہے۔

ذرائع کا کہنا ہے کہ پی ائی اے حکام نے کابل آپریشن بند کرنے کا فیصلہ پاکستانی وزارت خارجہ اور افغان سول ایوی ایشن سے مشاورت کے بعد کیا ہے، پی آئی اے حکام کا کہنا ہے کہ مسافروں، عملے اور اثاثوں کی حفاظت کی خاطر پروازیں غیر معینہ مدت کیلئے ملتوی کی گئی ہیں۔
اس سے قبل پی آئی اے نے کابل کے درمیان 3 اضافی پروازیں چلانے کا فیصلہ کیا تھام ان 3 پروازوں کے ذریعے 900 کے قریب پاکستانیوں اور دیگر غیر ملکیوں کا کابل سے نکالا جانا تھا۔

کورونا وائرس سے 72 افراد جاں بحق ہوگئے، جس کے بعد اموات کی تعداد 24 ہزار 478 ہوگئی۔ پاکستان میں کورونا کے تصدیق شدہ کیسز کی تعداد 11 لاکھ 10 ہزار 79 ہوگئی۔

نیشنل کمانڈ اینڈ آپریشن سینٹر کے تازہ ترین اعدادوشمار کے مطابق گذشتہ 24 گھنٹوں کے دوران 3 ہزار 669 نئے کیسز رپورٹ ہوئے، پنجاب میں 3 لاکھ 72 ہزار 750، سندھ میں 4 لاکھ 12 ہزار 165، خیبر پختونخوا میں ایک لاکھ 52 ہزار 625، بلوچستان میں 31 ہزار 583، گلگت بلتستان میں 9 ہزار 396، اسلام آباد میں 94 ہزار 108 جبکہ آزاد کشمیر میں 29 ہزار 452 کیسز رپورٹ ہوئے۔

ملک بھر میں اب تک ایک کروڑ 69 لاکھ 2 ہزار 15 افراد کے ٹیسٹ کئے گئے، گذشتہ 24 گھنٹوں کے دوران 53 ہزار 644 نئے ٹیسٹ کئے گئے، اب تک 9 لاکھ 89 ہزار 13 مریض صحتیاب ہوچکے ہیں جبکہ 4 ہزار 787 مریضوں کی حالت تشویشناک ہے۔

پاکستان میں کورونا سے ایک دن میں 72 افراد جاں بحق ہوئے جس کے بعد وائرس سے مرنے والوں کی تعداد 24 ہزار 478 ہوگئی۔ پنجاب میں 11 ہزار 372، سندھ میں 6 ہزار 439، خیبرپختونخوا میں 4 ہزار 668، اسلام آباد میں 834، بلوچستان میں 335، گلگت بلتستان میں 164 اور آزاد کشمیر میں 666 مریض جان سے ہاتھ دھو بیٹھے۔

ڈسٹرکٹ اینڈ سیشن کورٹ اسلام آباد نے نور مقدم قتل کیس میں نامزد مرکزی ملزم ظاہر جعفر کے جوڈیشل ریمانڈ میں 30 اگست تک توسیع کردی۔

ملزم ظاہر ذاکر جعفر کی روبکار ڈیوٹی جج جوڈیشل مجسٹریٹ ثاقب جواد کی عدالت میں پیش کی گئی ملزم کو حوالات میں لایا گیا لیکن عدالت میں پیش نہیں کیا گیا۔

علاوہ ازیں پولیس نے ملزمان افتخار اور جمیل کے ڈی این اے کرانے کے لیے درخواست ڈیوٹی جج کو پیش کی تھی جس پر عدالت نے ظاہر ذاکر جعفر کے 2 ملازمین کا ڈی این اے کروانے کے درخواست منظور کرلی۔

ڈسٹرکٹ اینڈ سیشن کورٹ اسلام آباد کی جانب سے دونوں ملزمان کا ڈی این اے کرانے کی اجازت دینے پر پولیس نے دونوں ملزمان کو اڈیالہ جیل سے طلب کرلیا گیا۔

ساتھ ہی پولیس نے تھراپی سینٹر کے مالک سمیت 6 گرفتار ملزمان کو ایک روزہ جسمانی ریمانڈ مکمل ہونے پر ڈیوٹی جج جوڈیشل مجسٹریٹ ثاقب جواد کی عدالت میں پیش کیا۔

ملزمان میں تھراپی سینٹر کا مالک طاہر ظہور، ملازمین وامق ریاض، دلیپ کمار، ثمر عباس، عبدالحق اور زخمی امجد محمود شامل ہیں۔

زخمی ملازم امجد محمود کو واقعے کے روز ظاہر جعفر نے چھری مار کر زخمی کیا تھا۔

مدعی نے اپنے ضمنی بیان میں تھراپی سینٹر کے مالک سمیت ملازمین کو نامزد کیا تھا تاہم پولیس نے ملزمان کو ہفتہ اور اتوار کی درمیانی شب گرفتار کرلیا گیا تھا۔

سماعت کے دوران جج نے ملزمان کی تعداد کے بارے میں استفسار کیا کہ کیا ملزمان5 ہی ہیں؟ جس پر پراسیکیوٹر ساجد چیمہ نے بتایا کہ کل 6 ملزمان ہیں۔

جس پر جج نے اظہارِ برہمی کرتے ہوئے کہا کہ آپ نے پرچہ ریمانڈ پر صرف 5 نام لکھے ہیں۔

جوڈیشل مجسٹریٹ نے ریمارکس دیے کہ پرانا پرجہ ریمانڈ سامنے لائیں اور بعدازاں عدالت نے پرانا پرچہ ریمانڈ دیکھ کر ملزم کا نام نئے پرچہ ریمانڈ میں لکھنے کی ہدایت کی۔

جوڈیشل مجسٹریٹ ثاقب جواد نے کہا کہ پرچہ ریمانڈ میں طاہر ظہور کا نام بھی لکھا جائے، اس پر ملزمان کے وکیل نے کہا کہ ان کا ضمنی بیان میں بھی نام نہیں۔

ملزمان کے وکیل نے کہا کہ ملزمان کی حد تک کوئی دفعہ نہیں ہے اور عدالت سے استدعا کی ملزمان کو مقدمے سے خارج کیا جائے۔

دورانِ سماعت پراسیکیوٹر ساجد چیمہ نے عدالت کو بتایا کہ ضمنی بیان 24 جولائی کو لکھا گیا تھا جبکہ ایک ضمنی بیان 8 اگست کو بھی لکھا گیا تھا، جس میں مدعی نے ان ملزمان کو نامزد کیا تھا۔

اس پر ملزمان کے وکیل نے کہا کہ آپ ضمنی بیان پڑھیں اس میں طاہر ظہور کا نام ہی نہیں تھا، کل جو ضمنی بیان ہوا وہ بھی دیکھ لیں۔

جج نے ریمارکس دیے کہ کل کے بیان میں طاہر ظہور کا نام نہیں ہے اس پر پراسیکیوٹر ساجد چیمہ نے عدالت کو بتایا کہ سی ڈی آر سے ثابت ہوتا ہے مرکزی ملزم کے والد نے طاہر ظہور کو فون کیا۔

پراسیکیوٹر کے جواب پر جج نے ریمارکس دیے کہ مطلب یہ ہوا ان ملزمان نے جرم کو چھپانے کی کوشش کی ہے۔

اس پر ملزمان کے وکیل نے کہا کہ اگر ہم جرم چھپاتے تو ہمارا ایک ملزم زخمی کیوں ہوتا؟اور ملزم طاہر ظہور کی حد تک کوئی دفعہ نہیں۔

ملزمان کے وکیل نے مزید کہا کہ ملزمان کے خلاف دفعہ201 کے تحت مقدمہ درج کیا گیا ہے یہ قابل ضمانت ہے ہم مچلکے دینے کو تیار ہیں۔

وکیل نے مزید کہا کہ ملزم طاہر ظہور کی عمر 75 سال ہے دل کے مریض ہیں انہیں کوئی طبی سہولت نہیں دی گئی۔

جس پر جج نے پراسیکیوٹر سے استفسار کیا کہ مقدمہ میں کیا کیا دفعات ہیں؟کون سا ملزم زخمی ہے؟ ‘

اس پر پراسیکیوٹر نے مقدمے کی دفعات پڑھ کر سنائیں اور زخمی ملزم امجد نے کمرہ عدالت میں اپنے زخم بھی دکھائے ۔

ملزمان کے وکیل نے کہا کہ ملزم طاہر ظہور کی حد تک عدالت درخواست ضمانت منظور کرے یا مقدمے سے ان کا نام خارج کردے۔

جس پر عدالت نے ملزم طاہر ظہور کو مقدمے سے خارج کرنے اور ملزمان جوڈیشل ریمانڈ پر جیل بھیجنے سے متعلق فیصلہ محفوظ کیا۔

بعدازاں عدالت نے تمام ملزمان کو جوڈیشل ریمانڈ پر جیل بھیج دیا اور ڈسٹرکٹ اینڈ سیشن کورٹ اسلام آباد نے ملزمان کو دوبارہ 30 اگست کو پیش کرنے کا حکم دیتے ہوئے سماعت ملتوی کردی۔

سماعت سے قبل نور مقدم کے والد بھی عدالت پہنچے تھے اور انہوں نے مذکورہ کیس کے حوالے سے میڈیا سے گفتگو بھی کی تھی۔

نور مقدم کے والد کا کہنا تھا کہ ابھی تک کیس کی کارروائی سے مطمئن ہوں، آلہ قتل سے کسی اور کے فنگر پرنٹس ملنے کا کیا فائدہ جب قاتل موجود ہے۔

وزرات خزانہ نے پیٹرولیم مصنوعات کی قیمتوں میں ردوبدل کا نوٹیفکیشن جاری کردیا۔

نوٹیفکیشن کے مطابق پیٹرول اور ڈیزل کی قیمتیں برقرار رکھی گئی ہیں تاہم مٹی کے تیل اور لائٹ ڈیزل کی فی لیٹر قیمت میں اضافہ کیا گیا ہے۔

نوٹیفکیشن میں کہا گیا ہے کہ مٹی کے تیل کی قیمت میں 81 پیسے فی لیٹر جبکہ لائٹ ڈیزل کی قیمٹ میں ایک روپے 10 پیسے فی لیٹر اضافہ کیا گیا ہے۔

نوٹیفکیشن کے مطابق پیٹرول کی قیمت 119 روپے 80 پیسے فی لیٹر اور ہائی اسپیڈ ڈیزل کی قیمت 116 روپے 53 پیسے فی لیٹر پر برقرار رہے گی۔

پیٹرولیم مصنوعات کی قیمتوں میں ردو بدل کا اطلاق رات 12 بجے ہوگا جبکہ یہ قیمتیں اگلے 15 دن کیلئے ہوں گی۔

خیال رہے کہ گزشتہ روز آئل اینڈ گیس ریگولیٹری اتھارٹی (اوگرا) نے پیٹرول کی قیمت میں 50 پیسے فی لیٹر اور ڈیزل کی قیمت میں 2 روپے 50 پیسے فی لیٹر اضافےکی تجویز دی تھی۔

پاکستان پہلی مرتبہ ‘مینوفیکچرڈ ان پاکستان’ کے ٹیگ کے ساتھ متحدہ عرب امارات (یو اے ای) کو کھیپ بھیجنے کے ساتھ فور جی اسمارٹ فونز کا برآمد کنندہ بن گیا۔

رپورٹ کے مطابق انووی ٹیلی کام کے تیار کردہ پہلے 5 ہزار 500 اسمارٹ فونز جمعہ کو یو اے ای برآمد کیے گئے۔

تاہم موبائل فون کے مقامی مینو فیکچررز نے برآمدات معاون پالیسی بنانے پر زور دیا ہے تا کہ پاکستان مشرق وسطیٰ کے خطے میں حریفوں کو شکست دے سکے۔

پاکستان ٹیلی کمیونیکیشن اتھارٹی نے کمپنی کو اس کامیابی پر مبارک باد دی اور اس امید کا اظہار کیا کہ مستقبل میں اسمارٹ فونز کی برآمدات میں مزید اضافہ ہوگا۔

ریگولیٹر نے اپنے ایک بیان میں کہا کہ ‘یہ ملک میں موبائل ڈیوائس کی مینو فیکچرنگ کا ماحول بنانے کے لیے کی گئی ٹھوس کوششوں کا نتیجہ ہے’۔

انووی ٹیلی کام پرائیویٹ لمیٹڈ کو موبائل فون مینوفیکچرنگ کی اجازت اپریل میں دی گئی تھی اور انہوں نے اپنا پہلا برآمدی آرڈر چار ماہ میں مکمل کرلیا۔

انووی ٹیلی کوم کے چیف ایگزیکٹو ذیشان میاں نور کا کہنا تھا کہ ان کا اہم ہدف مشرق وسطیٰ کی کم قیمت مارکیٹوں مثلاً عراق، ایران اور افغانستان میں داخل ہونا تھا۔

انہوں نے کہا کہ ‘ہم چینی برانڈ مینوفیکچر کر رہے ہیں اور خلیجی ممالک میں تارکین وطن ملازمین کی بڑی تعداد موجود ہے’۔

ان کا مزید کہنا تھا کہ خلیجی ممالک میں امیر صارفین دنیا کے بہترین موبائل فونز کو ترجیح دیتے ہیں اور ہمیں اس مارکیٹ میں داخل ہونے کی کوشش بھی نہیں کرنی چاہیے۔

انہوں نے کہا کہ مذکورہ ممالک کی عوامی مارکیٹیں ان کا اولین ہدف ہیں، ایران، عراق اور افغانستان کا عام شہری 100 ڈالرز تک کے موبائل فونز کو ترجیح دیتا ہے۔

وزیر آئی ٹی اور ٹیلی کمیونیکشن امین الحق نے ڈان کو بتایا کہ سازگار حکومتی پالیسیوں نے پاکستان کو خالصتاً موبائل درآمد کنندہ سے برآمد کنندہ میں تبدیل ہونے کاسنگ میل عبور کرنے میں مدد دی ہے۔

انہوں کہا کہ موبائل ڈیوائسز بنانے والی مقامی کمپنیوں کو سازگار ماحول فراہم کیا جارہا ہے اور ڈیوائس آئیڈینٹی فکیشن رجسٹریشن اور بلاکنگ سسٹم (ڈی آئی آر بی ایس) سے موبائل فونز کی اسمگلنگ رک چکی ہے۔

وفاقی وزیر کا مزید کہنا تھا کہ آئندہ سال موبائل فونز کے اسپئر پارٹ کی پیداوار کے بعد مقامی مینوفیکچررز بالآخر زائد قیمت موبائل فونز کا بھی رخ کریں گے۔

دوسری جانب اس میدان کے تجربہ کار کھلاڑیوں کا کہنا تھا کہ بدلتے ہوئے منظر کے پیش نظر برآمدی مارکیٹ کو فروغ دینے کے حوالے سے حکومت کا نقطہ نظر سست تھا۔

ٹرانسیشن ٹیکنو الیکٹرانک کے سی ای اور عامر اللہ والا کا کہنا تھا کہ چین سے موبائل فونز کی مجموعی برآمدات ایک کھرب 40 ارب ڈالر ہے لیکن یہ صرف مزدوری کی کم لاگت کی وجہ سے تھا جس میں اب نمایاں اضافہ ہورہا ہے۔

انہوں نے کہا کہ چین ہائی- ٹیک کی طرف بڑھ رہا ہے اور اپنی موبائل فون مینوفیکچرنگ دیگر ممالک مثلاً بھارت، ویتنام، انڈونیشیا اور بنگلہ دیش منتقل کر رہا ہے۔

ان کا مزید کہنا تھا کہ ویت نام اور انڈونیشیا میں مزدوری کی لاگت بہت زیادہ تھی اور بڑھتی ہوئی سیاسی کشیدگی کی وجہ سے چینی کاروبار بھارت میں نہیں پھیل رہے ہیں۔

انہوں نے کہا کہ اب بنگلہ دیش سے مقابلے کے لیے پاکستان واحد کھلاڑی بچا ہے لیکن کیا حکومت ہمیں بھی اس ہی سطح کی سہولتیں فراہم کرنے کو تیار ہے۔

عامر اللہ والا نے تبصرہ کیا کہ ہم نے ثابت کیا ہے کہ سرمایہ کار ہدف پورا کر سکتے ہیں لیکن مستقبل میں موبائل فونز سیٹ کی برآمدگی حکومت پالیسیوں پر منحصر ہے۔