All posts by News Editor

وسطی چین میں شدید بارشوں کے نتیجے میں آنے والے سیلاب کی وجہ سے اب تک مختلف واقعات میں 33 افراد ہلاک ہوچکے ہیں، ایک ہفتے سے جاری بارشوں سے سب سے زیادہ چین کا صوبہ ہینن متاثر ہوا ہے۔

غیر ملکی خبررساں اداروں کی رپورٹس کے مطابق شدید خراب موسم کی وجہ سے مزید شہر زیرآب آگئے اور فصلیں تباہ ہوگئیں چین کے سرکاری خبررساں ادارے نے اب تک 18 کروڑ 90 لاکھ ڈالر کے نقصان کا تخمینہ لگایا ہے۔

چین کے شہر چنگ ژاؤ میں 3 روز میں ریکارڈ بارش ہوئی، جس کی وجہ سے پانی کی گزرگاہیں بھر گئیں اور مٹی سے آلودہ پانی سڑکوں، سرنگوں اور سب وے سسٹم میں بھر گیا۔

ٹوکیو: جاپان میں منعقد ہونے والے ٹوکیو اولمپکس 2020 کی افتتاحی تقریب کے ڈائریکٹر، کینتارو کوبایاشی کو برطرف کردیا گیا ہے کیونکہ انہوں نے 1990 کے عشرے میں ہولوکاسٹ کا مذاق اُڑایا تھا۔

برطرفی کا یہ اعلان آج صبح اولمپکس 2020 کے صدر سیکو ہاشیموتو نے ایک میڈیا بریفنگ میں کیا۔

سیکو ہاشیموتو نے اعلان میں بتایا کہ کوبایاشی نے 1990 کے عشرے میں ایک پروگرام کے دوران مزاحیہ انداز سے تبصرہ کرتے ہوئے ہولوکاسٹ کا مذاق اڑایا تھا جس کی وجہ سے انہیں برطرف کیا جارہا ہے۔

واضح رہے کہ دوسری عالمی جنگ میں نازی جرمنوں کے ہاتھوں یہودیوں کی بڑے پیمانے پر نسل کشی کو ’’ہولوکاسٹ‘‘ کہا جاتا ہے جس میں اندازاً 60 لاکھ یہودی قتل کیے گئے تھے۔

اگرچہ کینتارو کوبایاشی نے اپنے مذکورہ تبصرے کو ’’لفظوں کا احمقانہ انتخاب‘‘ قرار دیتے ہوئے اس پر معافی مانگ لی تھی لیکن یہودیوں کی عالمی تنظیموں نے یہ معافی قبول نہیں کی تھی۔

ٹوکیو اولمپکس 2020 کی افتتاحی تقریب کےلیے کوبایاشی کی بطور سربراہ تقرری کو عالمی یہودی حلقوں میں شدید ناپسندیدگی کی نگاہ سے دیکھا جارہا تھا۔

یہودی حقوق کی عالمی تنظیم سائمن ویزنتہال سینٹر نے خبردار کیا تھا کہ وہ اولمپکس میں کسی ایسے عہدیدار کو برداشت نہیں کرے گی جو ماضی یہودی تاریخ کے بدترین سانحے کو مذاق کا نشانہ بنا چکا ہو۔

عالمی یہودی احتجاج کے باعث ٹوکیو اولمپکس 2020 کی انتظامی کمیٹی نے افتتاحی تقریب کے ’’متنازعہ سربراہ‘‘ کو برطرف کردیا ہے تاکہ دنیا بھر میں موجود یہودیوں کی دل آزاری نہ ہو۔

راولپنڈی: آئی ایس پی آر کا کہنا ہے کہ پاک فوج 25 جولائی کو آزاد کشمیر انتخابات میں سیکیورٹی فرائض انجام دے گی۔

پاک فوج کے شعبہ تعلقات عامہ (آئی ایس پی آر) کے مطابق پاک فوج 25 جولائی کو آزاد کشمیر انتخابات میں سیکیورٹی کے فرائض انجام دے گی، آزاد کشمیر کے الیکشن کمیشن نے پاک فوج کو سیکیورٹی اور پرامن ماحول کے انتظامات کیلئے طلب کیا ہے۔

ترجمان پاک فوج کے مطابق پاک فوج کی کوئیک ری ایکشن فورس کے تحت 22 سے 26 جولائی تک تعینات ہو گی، یہ تعیناتی آئین کے آرٹیکل 245 کے تحت کی گئی ہے، آزاد کشمیر میں پرامن انتخابات کیلئے آزاد کشمیر پولیس کے ساتھ دیگر صوبوں کے قانون نافذ کرنیوالے اداروں کے اہلکار اور نیم فوجی دستے بشمول رینجرز اور ایف سی اہلکار بھی فرائض سرانجام دیں گے۔

آئی ایس پی آر کے مطابق ان انتظامات کا مقصد بلاتعطل پرامن انداز میں انتخابات کا انعقاد کرانا ہے، زرائع کے مطابق پاک آرمی کا پولنگ سٹیشنوں، پولنگ کے عمل یا انتخابی سامان کی ترسیل سے کوئی تعلق نہیں ہوگا۔

قومی سلامتی کے مشیر (این ایس اے) ڈاکٹر معید یوسف نے کہا ہے کہ افغانستان کے سینئر عہدیداروں کے ‘احمقانہ بیانات’ سے خود افغانستان کی سبکی ہورہی ہے اور یہ عہدیدار جان بوجھ کر پاکستان کے ساتھ دو طرفہ تعلقات کو نقصان پہنچا رہے ہیں۔

سماجی رابطے کی ویب سائٹ ٹوئٹر پر اپنے بیان میں معید یوسف نے کہا کہ ‘پاکستان افغانستان میں جامع سیاسی حل کے لیے سہولت کاری جاری رکھنے کے لیے بدستور پرعزم ہے’۔

انہوں نے کہا کہ ‘اس حوالے سے وزیراعظم عمران خان نے ہماری کوششیں جاری رکھنے کے لیے حال ہی میں صدر اشرف غنی سے ملاقات پر اتفاق کیا تھا’۔

مشیر قومی سلامتی نے کہا کہ ‘کابل میں چند بگاڑ پیدا کرنے والے عناصر کی جانب سے تلخ اور غلط بیانات، جو بدقسمتی سے ہمارے افغان بہن بھائیوں پر بطور سینئر عہدیدار کے مسلط ہیں اور مسلسل دوطرفہ تعلقات خراب کی کوشش کر رہے ہیں، جس کا مقصد اپنی ناکامیوں سے توجہ سے ہٹانا ہے’۔

انہوں نے کہا کہ ‘افغانستان کو روزانہ اس طرح کے احمقانہ بیانات سے شرمندہ کیا جا رہا ہے، افغانوں کو یقین ہونا چاہیے کہ ہر کوئی ان بگاڑنے والے عناصر کے مذموم ایجنڈے کو دیکھ سکتا ہے’۔

معید یوسف کا کہنا تھا کہ ہم افغانستان میں امن و استحکام کے لیے پاکستان کے تعاون پر شرپسند عناصر کے اثرات پڑنے کی اجازت نہیں دیں گے۔

یاد رہے کہ وزیراعظم عمران خان نے گزشتہ ہفتے ازبکستان کے دارالحکومت تاشقند میں وسطی اور جنوبی ایشیا کے ممالک کے درمیان تعلقات کو مضبوط بنانے کے لیے منعقدہ کانفرنس میں خطاب کے دوران افغان صدر اشرف غنی کے الزامات کو مسترد کردیا تھا۔

وزیراعظم عمران خان نے کہا تھا کہ کسی بھی ملک نے افغان طالبان کو مذاکرات کی میز پر لانے کے لیے پاکستان سے زیادہ کوششیں نہیں کیں، افغانستان میں جو کچھ ہو رہا ہے اس کا الزام پاکستان پر دھرنا انتہائی ناانصافی ہے۔

اسی طرح دفترخارجہ نے افغان نائب صدر امر اللہ صالح کے ان الزامات کی تردید کردی تھی کہ پاک فضائیہ نے اسپن بولدک کی سرحدی گزرگاہ سے طالبان کو پیچھے دھکیلنے کی کسی بھی کارروائی پر افغان سیکیورٹی فورسز کو باضابطہ وارننگ دی ہے-

امر اللہ صالح نے اپنے ایک متنازع بیان میں دعویٰ کیا تھا کہ پاک فضائیہ کئی علاقوں میں طالبان کو فضائی مدد فراہم کررہی ہے۔

دفترخارجہ نے کہا تھا کہ اس طرح کے الزامات جنگ زدہ افغانستان میں افغان سربراہی اور افغانوں پر مشتمل حل میں کردار ادا کرنے کی پاکستان کی مخلصانہ کوششوں کو مجروح کررہے ہیں۔

بیان میں کہا گیا تھا کہ پاکستان، ‘افغانستان میں امن کے لیے پر عزم ہے اور رکاوٹوں کے باجود اس مقصد کی جانب کوششیں جاری رکھے گا’۔

افغان نائب صدر کے متنازع بیان پر دفترخارجہ نے مزید کہا تھا کہ ‘تاہم یہ ضروری ہے کہ اس اہم موقع پر تمام تر توانائیاں افغانستان میں شراکتی، وسیع بنیاد اور جامع سیاسی حل کے لیے صرف کی جائیں’۔

قبل ازیں دفترخارجہ نے 17 مئی کو بھیافغان طالبان کے ساتھ تعلقات کے حوالے سے پاکستان کے خلاف افغان صدر اشرف غنی کے ‘غیر ذمہ دارانہ بیانات اور بے بنیاد الزامات’ پر اپنے سنگین تحفظات کا اظہار کیا تھا۔

ترجمان دفترخارجہ نے کہا تھا کہ پاکستان نے اسلام آباد میں افغان سفیر کو سخت احتجاج ریکارڈ کراتے ہوئے اپنے تحفظات سے آگاہ کردیا ہے۔

ان کا کہنا تھا کہ ‘پاکستان نے اس بات پر زور دیا ہے کہ بے بنیاد الزامات سے اعتماد میں کمی آئے گی اور دونوں برادر ممالک کے درمیان ماحول خراب ہوگا اور افغان امن عمل کو آسان بنانے میں پاکستان کی جانب سے جو تعمیری کردار ادا کیا جا رہا ہے وہ نظرانداز ہوسکتا ہے’۔

پاک فوج کے سپہ سالار جنرل قمر جاوید باجوہ نے شہدا کی عظمت کو سلام پیش کرتے ہوئے کہا ہے کہ ملک کے دفاع کے لئے اپنی جان کی قربانی دینے سے بڑا کوئی کام نہیں، پوری قوم کو اپنے قومی ہیروز کی ان قربانیوں پر فخر ہے۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف قمر جاوید باجوہ اپنی اہلیہ کے ہمراہ ہری پور کے قریبی گاؤں میں کیپٹن باسط علی شہید کے گھر گئے اور ان کے درجات کی بلندی کیلئے فاتحہ خوانی کی۔

اس موقع انہوں نے کیپٹن باسط علی شہید کے خاندان کے افراد سے ملاقات کی اور ان کے سروں پر شفقت کا ہاتھ رکھا۔ آرمی چیف جنرل قمر جاوید باجوہ نے کہا کہ پوری قوم کو اپنے قومی ہیروز کی ان قربانیوں پر فخر ہے۔ ملک کے دفاع کیلئے اپنی جان کی قربانی دینے سے بڑا کوئی کام نہیں ہے۔

آرمی چیف جنرل قمر جاوید باجوہ نے پاکستان دشمنوں کے خلاف مسلح افواج کے پختہ عزم کو بھی دہرایا۔

آئی ایس پی آر کے مطابق آرمی چیف کیپٹن عفان مسعود خان شہید اور لیفٹیننٹ محمد عکاشہ طلال شہید کے گھر بھی گئے۔ آرمی چیف نے شہدا کیلئے دعا اور فاتحہ خوانی کی۔ آرمی چیف نے فرض کی ادائیگی کیلئے جان کا نظرانہ پیش کرنے والے شہدا کو سراہا۔

وفاقی وزیر اطلاعات فوادچوہدری نے افغانستان کے نائب صدر امراللہ صالح کے بیان پر سخت ردعمل کا اظہار کیا ہے۔

اپنی ٹوئٹ میں فواد چوہدری نے کہا کہ افغانستان آپ جیسے دغابازوں کا نہیں بلکہ بہادر افغانوں کا ہے۔

ان کا کہنا تھاکہ آپ جیسےمٹھی بھرلوگوں کی افغانستان اور خطےمیں دلچسپی کم ہی ہے، آپ صرف ایک مردار خور ہیں جو وقت آنے پر محفوظ مقام منتقل ہوجائیں گے۔

خیال رہے کہ افغانستان کے نائب صدر امراللہ صالح کی جانب سے مسلسل پاکستان کے خلاف ہرزہ سرائی کی جارہی ہے۔

دبئی انٹرنیشنل ائیرپورٹ پر دو مسافر طیارے آپس میں ٹکرا گئے تاہم اس حادثے میں کسی قسم کا جانی نقصان نہیں ہوا۔

غیرملکی خبررساں ادارے کے مطابق دبئی انٹرنیشنل ائیرپورٹ پر فلائی دبئی اور گلف ائیرلائن کے مسافر طیارے ٹیکسی روڈ پر آپس میں ٹکرا گئے جس سے جہاز کے روں کو معمولی نقصان پہنچا تاہم حادثے میں کسی قسم کا جانی نقصان نہیں ہوا۔

فلائی دبئی کے ترجمان کے مطابق بوئنگ 737 نے کرغزستان کے لیے اڑان بھرنا تھی تاہم حادثے میں جہاز کے پروں کو معمولی نقصان پہنچا جس کے بعد جہاز کو کھڑا کردیا گیا ہے اور اب مسافروں کو دوسری پرواز سے پہنچایا جائے گا۔

ترجمان گلف ائیر نے کہا کہ حادثے کے نتیجے میں جہاز کی دُم کو نقصان پہنچا تاہم ائیرلائن کی جانب سے دوسرے جہاز کی نشاندہی نہیں کی گئی ہے۔

پاکستانی فلموں اور ڈراموں کی مقبول اداکارہ صبا قمر نے مزاحیہ انداز میں اب تک شادی نہ کرنے کی وجہ بتادی۔

صبا قمر نے شادی نہ کرنے کی وجہ انسٹاگرام اسٹوری میں ایک میم شیئر کرتے ہوئے بتائی۔

اداکارہ کی جانب سے شیئر کی گئی اسٹوری میں لکھا تھا کہ ‘کوئی مجھ سے پوچھتا ہے کہ آپ اب تک سِنگل کیوں ہیں؟’۔

صبا قمر کے مطابق وہ اس سوال کا جواب دیتی ہیں کہ یہ چار دِن کی توجہ کے چکر میں روز روز کی ٹینشن مجھے نہیں چاہیے۔

اداکارہ صبا قمر کی مذکورہ انسٹاگرام اسٹوری سوشل میڈیا پر وائرل ہورہی ہے اور مداحوں کے مطابق شاید اداکارہ اسی وجہ سے اب تک غیرشادی شدہ ہیں۔

خیال رہے کہ اس سے قبل رواں برس مارچ میں اداکارہ صبا قمر کے حوالے سے خبریں گردش میں تھیں کہ وہ جلد عظیم خان نامی ایک کاروباری شخص سے شادی کرنے والی ہیں۔

اداکارہ نے خود بھی ایک انٹرویو میں تصدیق کی تھی کہ وہ عظیم خان سے شادی کرنے والی ہیں اور انہوں نے نے انسٹاگرام پر اپنی تصویر پوسٹ کی تھی، جس کے کیپشن میں انہوں نے لکھا تھا کہ ‘اگر کچھ ہونا ہوگا تو ہوجائے گا’۔

صبا قمر کی مذکورہ پوسٹ پر عظیم خان نے کمنٹ کیا تھا کہ ‘اس سال شادی کرلیتے ہیں؟ جس پر اداکارہ نے انہیں جواب دیا تھا کہ ’قبول ہے‘۔

بعدازاں اپریل میں صبا قمر نے اعلان کیا تھا کہ وہ عظیم خان سے شادی نہیں کررہی اور فوری طور پر شادی کرنے کا فیصلہ بعض ذاتی وجوہات اور مسائل کی بنا پر کیا ہے۔

کم عمر لڑکیوں کے ریپ اور خواتین کے جنسی استحصال کے جرم میں 23 سال کی قید کاٹنے والے ہولی وڈ کے 69 سالہ پروڈیوسر ہاروی وائنسٹن نے لاس اینجلس میں 5 خواتین کے ریپ اور جنسی حملے کے الزامات کے دوسرے ٹرائل سے قبل اپنی بے گناہی ثابت کرنے کے لیے عدالت سے رجوع کرلیا۔

برطانوی خبررساں ادارے ‘رائٹرز’ کی رپورٹ کے مطابق ہاروی وائنسٹن گزشتہ روز لاس اینجلس کی اعلیٰ عدالت میں وہیل چیئر پر، براؤن رنگ کے قیدیوں کے لباس میں پہنچے۔

خیال رہے کہ مارچ 2020 میں 23 برس قید کی سزا سنائے جانے کے بعد ہاروی وائنسٹن پہلی مرتبہ عوامی منظرنامے پر نظر آئے۔

ہاروی وائنسٹن نے کسی کے ساتھ زبردستی جنسی تعلق رکھنے کے الزامات کی تردید کی ہے اور 2020 میں نیویارک میں سنائی گئی سزا اور قید کے خلاف اپیل کی ہے۔

ہاروی وائنسٹن پر لاس اینجلس میں 2004 سے 2013 تک ریپ اور جنسی حملوں کے مجموعی طور پر 11 الزامات عائد ہیں جن کے متاثرین کی تعداد 5 ہے۔

ہاروی وائنسٹن کے خلاف ترمیم شدہ شکایت میں الزام لگایا گیا ہے کہ انہوں نے ستمبر 2004 سے ستمبر 2005 کے درمیان بیورلی ہلز کے ایک ہوٹل میں ایک خاتون کا ریپ کیا اور بیورلی ہلز ہوٹل ہی میں نومبر 2009 سے نومبر 2010 کے دوران ایک اور خاتون کا دو مرتبہ ریپ کیا۔

اگر ہاروی وائنسٹن کو ان الزامات پر سزا ہوئی تو ہوسکتا ہے کہ وہ اپنی باقی زندگی جیل می گزاریں۔

ہاروی وائنسٹن کے وکیل نے کہا کہ ان الزامات کے کوئی فرانزک شواہد یا قابل اعتبار گواہان موجود نہیں ہیں۔

مارک ورکس میں نے عدالت کے باہر صحافیوں سے گفتگو کرتے ہوئے کہا کہ یہ الزامات بے بنیاد ہیں، ہمیں یقین ہے کہ اگر اس کیس میں شفاف ٹرائل ہوا تو ہاروی وائنسٹن بری ہوجائیں گے۔

گزشتہ روز اپنے اٹارنی کے ذریعے درخواست دائر کرنے کے بعد ہاروی وائنسٹن کو 29 جولائی کو ہونی والی اگلی سماعت تک جیل میں رہنے کا حکم دیا گیا ہے۔

خیال رہے کہ ہاروی وائنسٹن پر سب سے پہلے اکتوبر 2017 میں 3 درجن خواتین نے جنسی ہراسانی، استحصال، فحش حرکتیں کرنے کے مطالبات اور بلیک میلنگ جیسے الزامات لگائے تھے جس کے بعد دنیا بھر میں ‘می ٹو’ مہم کا آغاز ہوا تھا۔

بعد ازاں ہاروی وائنسٹن کے خلاف رفتہ رفتہ دیگر خواتین اور اداکارائیں بھی سامنے آئیں اور مجموعی طور پر ان پر 100 کے قریب خواتین نے ریپ اور جنسی تشدد کے الزامات لگائے تھے۔

ہاروی وائنسٹن پر الزامات لگانے والی خواتین میں معروف اداکارائیں بھی شامل تھیں جب کہ ان پر متعدد ایسی خواتین نے بھی الزامات لگائے جو نشانہ بنتے وقت نابالغ تھیں، جس کے بعد ان کے خلاف امریکا کی مختلف ریاستوں کی عدالتوں میں سول اور فوجداری مقدمات دائر کیے گئے تھے۔

ابھی تک ہاروی وائنسٹن کو صرف ایک ہی کیس میں امریکی ریاست نیویارک کی عدالت نے جیل بھیجا ہے، جبکہ ان کے خلاف لاس اینجلس سمیت متعدد شہروں کی عدالت میں انتہائی سنگین نوعیت کے مقدمات زیر التوا ہیں۔

علاوہ ازیں ہاروی وائنسٹن کو درجنوں سول مقدمات کا بھی سامنا ہے، جن میں خواتین نے ان کے خلاف ہرجانے کے دعوے دائر کر رکھے ہیں اور انہوں نے مذکورہ خواتین کو رواں ماہ نئے ساڑھے 3 کروڑ ڈالر کے تصفیے کی پیش کش بھی کر رکھی ہے۔

اس سے قبل ہاروی وائنسٹن نے متعدد خواتین کے ساتھ ایک کروڑ 90 لاکھ ڈالر میں تصفیہ طے کیا تھا مگر عدالت نے ایک خاتون کی شکایت پر ان کے تصفیے کو مسترد کردیا تھا، جس کے بعد انہوں نے خواتین کو اضافی رقم والے تصفیے کی پیش کش کی تھی۔

ریپ اور خواتین کے جنسی استحصال کے الزامات میں آسکر اکیڈمی نے بھی ہاروی وائنسٹن کی رکنیت ختم کر رکھی ہے، جب کہ دیگر کئی فلمی تنظیموں نے بھی ان کے خلاف کارروائی کر رکھی ہے۔

پاکستان نے بھارتی حکام کی جانب سے عیدالاضحی ٰ کے موقع پر مقبوضہ کشمیر میں عیدالاضحیٰ کے اجتماعات اور جانوروں کی قربانی پر پابندیوں کی مذمت کرتے ہوئے کہا کہ یہ عمل مسلمانوں کے جذبات کی توہین اور تعصب کی عکاسی کرتا ہے۔

دفتر خارجہ کا یہ بیان ایک ایسے موقع پر سامنے آیا ہے جب یہ رپورٹس منظر پر آئیں کہ وادی میں فوجی محاصرے اور پابندیوں کی وجہ سے وہاں کے رہائشی نماز عید بھی ادا نہیں کر سکے۔

ترجمان دفتر خارجہ زاہد حفیظ چوہدری نے ایک بیان میں کہا کہ پاکستان مقبوضہ کشمیر میں بھارتی حکام کی جانب سے عیدالاضحی ٰ کے موقع پر اجتماعات اور جانوروں کی قربانی پر پابندیوں کی شدید مذمت کرتا ہے۔

ان کا کہنا تھا کہ اسلامی تاریخ کے اہم ترین دن کے موقع پر نماز عید اور مذہبی اجتماعات پر پابندی بھارتی حکومت کی مقبوضہ جموں و کشمیر کے مسلمانوں کے جذبات کی توہین اور تعصب کی عکاسی کرتی ہے اور یہ مذہبی آزادی کے بنیادی حق کی کھلی خلاف ورزی ہے۔

انہوں نے کہا کہ پاکستان نے عالمی برادری، اقوام متحدہ اور انسانی حقوق کے دیگر اداروں پر زور دیا ہے کہ وہ کشمیری عوام کے مذہبی اور آزادی کے حق کو غصب اور بین الاقوامی قوانین اور کنونشنز کی خلاف ورزیوں کا نوٹس لیں۔

دفتر خارجہ کے ترجمان نے کہا کہ بھارت کو اس حقیقت کا ادراک ہونا چاہیے کہ ایسے اقدامات کشمیریوں کی خواہش اور آزادی کے جذبات کو نہیں دبا سکتے۔

انہوں نے کہا کہ پاکستان کشمیریوں کے پیدائشی حق، حق خود ارادیت کی حمایت کے عزم کا اعادہ کرتا ہے جس کا اقوام متحدہ کی سلامتی کونسل کی قرارداوں میں وعدہ کیا گیا ہے۔

ادھر کشمیر میڈیا سروس کے مطابق مقبوضہ کشمیر میں قابض انتظامیہ کی طرف سے عائد کی گئی پابندی اور مسلسل فوجی محاصرے کے باعث نماز عید ادا نہیں کر سکے۔

اس حوالے سے بتایا گیا ہے کہ لوگوں کی نقل وحرکت پر پابندی عائد کردی گئی ہے اور انہیں تاریخی جامع مسجد سرینگر، درگاہ حضرت بل، عیدگاہوں اور دیگر بڑی مساجد میں نما ز عید ادا کرنے کی اجازت نہیں دی گئی۔

کشمیر میڈیا سروس نے بتایا کہ بھارت مخالف احتجاجی مظاہروں کو روکنے کے لیے لوگوں کو نماز عید، نماز جمعہ اور مسلمانوں کے دیگر تہواروں پر جمع ہونے کی اجازت نہیں دے رہے ہیں جبکہ کشمیری مسلمان آزادانہ طور پر گائے کی قربانی کرنے سے بھی قاصر ہیں۔

ان کا کہنا تھا کہ کشمیریوں کی سیاسی قیادت سید علی گیلانی، میرواعظ عمر فاروق، محمدیاسین ملک، شبیر احمد شاہ، ڈاکٹر حمید فیاض، مسرت عالم بٹ، آسیہ اندرابی، نعیم احمد خان اور دیگر ہزاروں رہنما، کارکن، نوجوان اور طلبہ مسلسل جیلوں اور گھروں میں نظربند ہیں۔

گزشتہ ہفتے ہندوستانی حکومت نے مقبوضہ کشمیر میں عید الاضحی پر تمام جانوروں کے ذبیحہ پر پابندی عائد کردی تھی۔

جمعرات کو حکومت کی جانب سے جاری اعلامیے میں انتظامیہ کو جانوروں کی بہبود کے قوانین کا حوالہ دیتے ہوئے کہا گیا تھا کہ وہ گائے/ بچھڑوں، اونٹوں اور دیگر جانوروں کے غیرقانونی قتل کو روکیں۔

تاہم ایک دن بعد حکام نے بتایا کہ جانوروں کی قربانی پر کوئی پابندی نہیں ہے اور گزشتہ بات غلط فہمی پر مبنی تھی۔