All posts by News Editor

ملک بھر میں عید الاضحیٰ کے موقع پر عوام کی جانب سے کورونا ایس او پیز کی خلاف ورزی جاری ہیں جس سے کیسز میں بھی اضافہ دیکھنے میں آیا ہے اور گزشتہ 24 گھنٹوں میں مثبت کیسز کی شرح 6.30 فیصد ریکارڈ کی گئی۔

پاکستان میں کورونا کے اعداد و شمار بتانے والی ویب سائٹ (covid.gov.pk) کے مطابق گزشتہ 24 گھنٹوں کے دوران ملک بھر میں کورونا کے 34 ہزار 216 ٹیسٹ کیے گئے جن میں سے 2158 افراد میں وائرس کی تصدیق ہوئی جب کہ وائرس سے 40 افراد انتقال کر گئے۔

سرکاری پورٹل کے مطابق ملک میں گزشتہ 24 گھنٹوں کے دوران کورونا کے مثبت کیسز کی شرح 6.30 فیصد رہی۔

سرکاری پورٹل کے مطابق ملک میں کورونا سے ہلاکتوں کی تعداد 22928 ہو گئی اور مجموعی کیسز 9 لاکھ 98 ہزار 609 تک جاپہنچے ہیں۔

اس کے علاوہ 24 گھنٹوں کے دوران ملک بھر میں 895 مریض کورونا سے صحتیاب بھی ہوئے ہیں جس کے بعد مجموعی طور پر صحتیاب ہونے والوں کی تعداد 9 لاکھ 22 ہزار 929 ہوگئی ہے۔

گلگت بلتستان میں چار روز سے جاری شدید بارشوں کے باعث لینڈ سلائیڈنگ، سیلاب اور گلیشیائی جھیل پھٹنے سے ہزاروں افراد متاثر ،متعدد گاڑیاں تباہ اور شاہراہ قراقرم بند ہوگئی۔

دیامر پولیس کنٹرول روم کے مطابق تتہ پانی اور لال پڑی کے مقام پر بھاری لینڈ سلائیڈنگ سے شاہراہِ قراقرم آج دوسرے روز بھی ٹریفک کے لیے بند رہی جس کے باعث سیکڑوں مسافر اور سیاح مختلف مقامات پر پھنس گئے ہیں۔

علاوہ ازیں تتہ پانی کے مقال پر لینڈ سلائیڈنگ سے آئل ٹینکر اور مسافروں کی گاڑیاں تباہ ہو گئیں ہیں تاہم جانی نقصان نہیں ہوا۔

ادھر دیامر انتطامیہ کا کہنا ہے کہ شاہراہِ قراقرم بحال کرنے کی کوششیں جاری ہیں تاہم پہاڑ سے مسلسل پتھر گرنے کے باعث بحالی کا کام متاثر ہو رہا ہے، تاہم بابوسر روڈ کو ٹریفک کے لیے بحال کر دیا گیا ہے۔

ڈیزاسٹر منیجمنٹ گلگت بلتستان کے مطابق گوپس بدصوات کے مقام پر گلیشیائی جھیل پھٹنے سے 2 گاؤں کے باہمی رابطے منقطع ہو گئے اور سیلاب کے باعث میں متعدد افراد نقل مکانی کر چکے ہیں جبکہ وسیع اراضی، درخت اور گھر بھی متاثر ہوئے۔

ڈیزاسٹر منیجمنٹ کے مطابق ہنزہ وا خان پٹی سے متصل وادی شمشال جانے والی واحد سڑک بھی سیلابی ریلے میں بہہ گئی اور نگر ضلع میں متعدد گاؤں کو ملانے والی میاچھر روڈ بھی سیلاب کی نذر ہونے سے آمد و رفت بند ہے۔

پاک فوج کے شعبہ تعلقات عامہ آئی ایس پی آر کے مطابق غذر بدصوات میں سیلاب میں پھنس جانے والے گاؤں میں آرمی ہیلی کاپٹر کے ذریعے امدادی اشیا تقسیم کی گئی اور فورس کمانڈر نے علاقے کا دوہ کر کے بحالی اور امدادی کاموں کا جائزہ لیا۔

خیال رہے کہ گلگت کے نواحی علاقے نلتر میں 2 ہفتے قبل گلیشیائی جھیل پھٹنے سے آنے والے سیلاب کے نتیجے میں 4 افراد لاپتا ہو گئے تھے جنہیں تاحال تلاش نہیں کیا جاسکا۔

وزیر اعلیٰ گلگت بلتستان نے تمام بند سڑکیں فوری کھولنے اور سیلاب سے متاثرہ خاندانوں کو امداد فراہم کرنے اور محکمہ داخلہ، برقیات اور ایف ڈبلیو او کو بحالی کا کام تیز کرنے کے احکامات جاری کیے ہیں۔

ادھر ڈپٹی ڈائریکٹر محکمہ اطلاعات فاروق احمد خان نے محکمہ داخلہ کے حوالے سے بتایا کہ شاہراہِ قراقرم لینڈ سلائیڈنگ سے 9 مقامات پر بند تھی جن میں 7 مقامات پر بحالی کا کام مکمل کرلیا گیا ہے اور دو جگہوں پر کام صبح سےجاری ہے، مسافروں اور سیاحوں کو چلاس سے باہر سفر نہ کرنے کی ہدایات دی گئی ہیں۔

شاہراہ قراقرم پر لینڈ سلائیڈنگ سے گلگت بلتستان اور راولپنڈی کے مابین زمینی رابطہ بھی منقطع ہو گیا ہے۔

کراچی کے سمندر میں کنٹینرز سے لدا جہاز موسم کی خرابی کے باعث لنگرانداز ہونے کے مقام سے دور سی ویو پہنچ گیا جہاں وہ دوسرے روز بھی موجود ہے جبکہ حکام کی جانب سے اسے واپس متعلقہ مقام تک پہنچانے کے لیے اقدام نہیں اٹھایا گیا ہے۔

کراچی پورٹ ٹرسٹ (کے پی ٹی) کے مطابق ایم وی ہینگ ٹونگ نامی جہاز چین کے شہر شنگھائی سے ترکی کے شہر استنبول جا رہا تھا اور کراچی کی بندرگاہ میں مکمل طور پر داخل نہیں ہوا تاہم وہ پاکستان کے سمندر میں رکا اور عملے کی تبدیلی کا انتظار کر رہا ہے۔

سمندر میں خرابی کے باعث جہاز اپنے لنگر انداز ہونے کے مقام سے کٹ گیا اور کم گہرے پانی کی طرف جانے لگا اور جب کے پی ٹی کو جہاز کے بارے میں آگاہ کیا گیا تو کارگو پہلے ہی کم گہرے پانی میں کھڑا تھا۔

کے پی ٹی نے پاکستان میری ٹائم سیکیورٹی ایجنسی (پی ایس ایم اے) کو الرٹ کردیا لیکن وہ بھی زیادہ مدد نہیں پہنچا سکی۔

کے پی ٹی کا کہنا تھا کہ بندرگاہ کے نیویگیشن چینل کو جہاز کے ساحل کی طرف جانے کا اشارہ نہیں ملا۔

ان کا کہنا تھا کہ ‘جہاز کے تحفظ کی ذمہ داری اس کے مالک کی ہے’ تاہم کے پی ٹی اور پی ایس ایم اے پاکستان کے پانیوں میں کسی قسم کے آپریشنل اور تیکنیکی مدد کے لیے بدستور دستیاب ہوں گے۔

کراچی کے ساحل پر کھڑا ہونے والا 98 میٹر لمبا اور 20 میٹر چوڑا جہاز ہانگ کانگ کی کمپنی کی ملکیت ہے، اس کو 2010 میں تیار کیا گیا اور اس میں سامان کی گنجائش 3 ہزار 600 ڈیڈ ویٹ ٹن کی ہے۔

خیال رہے کہ عام طور پر پاکستان کے پانیوں میں داخل ہونے والے جہاز پاکستانی پرچم لہراتے ہیں لیکن ایم وی ہینگ ٹونگ میں پاناما کا جھنڈا لہرا رہا ہے اور ہنگامی طور پر اس کی تبدیلی کا بھی نہیں سوچا گیا۔

ٹی وی پر جیسے ہی کراچی کے ساحل پر جہاز کی آمد کی خبر چلی تو کئی شہریوں نے سی ویو کی طرف رخ کر لیا۔

سی ویو پر موجود متعدد افراد کنیٹروں سے لدا ہوا جہاز دیکھ کر حیران ہوئے اور خدشے میں پڑ گئے کہیں جہاز کو نقصان نہ پہنچے جبکہ دیگر نے حیرانی کا اظہار کیا کہ سمندر کی شدید لہریں جہاز کو توڑ نہ دے۔

دوسری جانب مون سون کی بارشوں کے باعث سی ویو پر شہریوں کے جانے پر پابندی عائد ہے اور دفعہ 144 نافذ ہے، جس کےباعث لوگوں کو ساحل کی طرف جانے سے روکنے کے لیے عبدالستار ایدھی ایونیو پر رکاؤٹیں کھڑی کی گئی ہیں۔

کوئٹہ: پاک افغان بارڈر دو دن بند رہنے کے بعد آج کھول دیا گیا ہے۔

14 جولائی کو چمن سے متصل افغانستان کے اہم ضلع اسپن بولدک پر طالبان نے کنٹرول حاصل کرلیا تھا اور باب دوستی پر اپنے جھنڈے بھی لگادیئے تھے، جس کے بعد پاکستان کی جانب سے باب دوستی کو عارضی طور پر سیل کرکے سیکیورٹی کی بھاری نفری تعینات کردی گئی تھی۔

لیویز حکام کے مطابق پاکستان میں پھنسے افغان شہریوں کی واپسی کے لیے باب دوستی کے چمن بارڈرکو 2 دن کے بعد عارضی طور پر پیدل آمدورفت کے لیے کھول دیا گیا ہے، باب دوستی گیٹ صبح 8 سے10 بجے جب کہ شام 4 سے 6 بجے تک کھلا رہے گا۔

لیویز حکام کا کہنا ہے کہ پاکستان میں داخل ہونے والے افراد کیلئے بارڈر پرکورونا ٹیسٹ لازمی ہے، اور صرف قانونی دستاویزا ت رکھنے والے افراد کو سرحد کے آر پار جانے کی اجازت ہوگی، پاکستان کی جانب سے اس اقدام کے بعد اب تک ہزاروں افغان شہری اس سہولت کا فائدہ اٹھاتے ہوئے اپنے آبائی ملک میں داخل ہوچکے ہیں، جب کہ سرحد پار سے بھی درجنوں پاکستانی اپنے ملک میں واپس آئے ہیں، اس موقع پر سیکیورٹی کے سخت اقدامات کئے گئے ہیں۔

اسلام آباد پولیس نے وفاقی دارالحکومت میں پاکستان کے سابق سفارت کار کی بیٹی کے قتل کی تفتیش کے حوالے سے واضح کرتے ہوئے کہا کہ ملزم گرفتاری کے وقت مکمل ہوش و حواس میں تھا جبکہ ان کے قبضے سے آلہ قتل کے ساتھ ایک پستول بھی برآمد ہوا۔

ایس ایس پی انوسٹی گیشن اسلام آباد عطاالرحمٰن نے سابق سفارت کار کی بیٹی کے قتل کی ابتدائی تفتیش سے میڈیا کو آگاہ کرتے ہوئے کہا کہ نور مقدم کی ظاہر کے ہاتھوں قتل کی اطلاع ملتے ہی پولیس موقع پر پہنچ گئی اور ملزم کو کو گرفتار کرلیا۔

ان کا کہنا تھا کہ جائے وقوع کو گھیرے میں لے کر ہماری نیشنل فارنزک سائنس ایجنسی نے وہاں سے فرانزک شواہد جمع کیا اور پوری کوشش کی ہے کہ کوئی معمولی شواہد بھی ضائع نہ ہوں تاکہ کسی کو بھی فائدہ نہ مل سکے۔

انہوں نے کہا کہ ملزم ہماری حراست میں ہے جبکہ آئی جی اسلام آباد نے متاثرہ خاندان سے ملاقات کی اور جائے وقوع کا بھی دورہ کیا، تمام افسران اس کیس میں لگے ہوئے۔

ان کا کہنا تھا کہ آئی جی اسلام آباد نے خصوصی تحقیقاتی ٹیم تشکیل دی، جس کی سربراہی ایس ایس پی انوسٹی گیشنز، ایس پی سٹی، اے ایس پی کوہسار شامل ہے۔

ایس ایس پی انوسٹی گیشنز عطاالرحمٰن نے کہا کہ سوشل میڈیا پر اس حوالے سے کنفیوژن ہے لیکن میں واضح کرنا چاہتا ہوں کہ ملزم ہماری حراست میں ریمانڈ پر ہے اور ان کو موقع سے گرفتار کیا گیا ہے۔

ان کا کہنا تھا کہ ہم متاثرہ خاندان کے ساتھ کھڑے ہیں اور ان کو انصاف دلانا ہمارا فرض اور ذمہ داری ہے، ملزم سے اس وقت تفتیش ہو رہی ہے۔

صحافی کے سوال پر ان کا کہنا تھا کہ ہماری ابتدائی تفتیش کے مطابق نور مقدم دو دنوں سے گھر میں نہیں تھی لیکن جس رات کو وقوعہ ہوا ہے، اس حوالے سے ملازمین سے بھی تفتیش کر رہے ہیں کہ وہ کتنے دنوں سے یہاں موجود تھی۔

ایس ایس پی انوسٹی گیشنز نے کہا کہ 20 جولائی کی رات کو واقعہ ہوا اور ہمیں یہاں کے کسی رہائشی سے فون کرکے اطلاع دی، تھانے سے بمشکل 10 منٹ کا فاصلہ ہے تو جلد ہی پہنچی ہے۔

انہوں نے کہا کہ اس واقعہ کا کوئی عینی شاہد نہیں ہے، اس لیے مذکورہ گھر کے ملازمین سے تفتیش کر رہے ہیں۔

ملزم کے نشے کی حالت میں گرفتاری سےمتعلق سوال پر پولیس افسر نے بتایا کہ ملزم کے نشے سے متعلق تفتیش ہمارا کام نہیں ہے لیکن جب ان کو گرفتار کیا گیا تو وہ اس وقت مکمل ہوش و حواس میں تھا۔

ان کا کہنا تھا کہ شاید ملزم کا نشے کا ریکارڈ ہوگی لیکن اس وقت مکمل ہوش میں تھا اور اس وقت ملزم نے دوسروں پر بھی حملہ کیا جس پر انہوں نے باندھا اور پولیس بھی فوری موقعے پر پہنچ گئی، جب واقعہ ہوا تو وہ مکمل ہوش و حواس میں تھا۔

ایس ایس پی انوسٹی گیشنز عطاالرحمٰن کا کہنا تھا کہ اس کے گھر سے پستول بھی برآمد ہوا ہے لیکن ہماری تفتیش اور میڈیکل رپورٹ کے مطابق بھی گولی نہیں چلی اور اس حوالے سے کوئی زخم بھی نہیں ہے لیکن ان کے پاس پستول تھا اور برآمد بھی ہوا ہے۔

ان کا کہنا تھا کہ پستول جب برآمد ہوا تو گولی اس میں پھنس گئی تھی، نشے اور بحالی کے حوالے سے ہم پوچھ رہے ہیں لیکن ہماری زیادہ توجہ اس طرف نہیں ہے لیکن تفتیش کے حوالے سے اس نے بڑی زیادتی کی ہے اور وہ ہوش میں تھا۔

انہوں نے کہا کہ ہم نے واقعہ کے وقت ان کی ذہنی کیفیت پر توجہ مرکوز رکھی اور اس کے مطابق وہ مکمل ہوش و حواس میں تھا لیکن اگر نشے کا کوئی ریکارڈ ہے تو وہ تفتیش کا ڈومین نہیں ہے۔

صحافیوں کے سوالوں پر ان کا کہنا تھا کہ برطانیہ میں ان کے کریمنل ریکارڈ کے حوالے سے ہمارے پاس کوئی ریکارڈ نہیں ہے، اگر ملک کے اندر کوئی ایف آئی آر ہو تو ریکارڈ ہمارے پاس آجاتا ہے لیکن ہم تفتیش میں کسی دوسرے ملک میں جرائم میں ملوث رہنے کے حوالے سے پوچھ سکتےہیں۔

ایس ایس پی انوسٹی گیشنز نے کہا کہ ہمارے پاس تفتیش دو نکات پر چل رہی ہے، ایک ملزم اور دوسرے گھر کے ملازمین سے تفتیش ہو رہی ہے اور اس میں ان کے جھگڑے کا ذکر ہے۔

انہوں نے وضاحت کرتے ہوئے کہا کہ اب یہ بات کہ اس وقت کیا ہوا اور کس وجہ سے انہوں نے قتل کیا تو یہ تھوڑا سا وضاحت طلب ہے لیکن میں پھر یہی کہوں گا کہ چاہے جتنی بھی بڑی وجہ ہو کسی کو یہ حق نہیں پہنچتا کہ دوسرے کو اس طرح وحشیانہ طریقے سے قتل کرے۔

ایک سوال پر ان کا کہنا تھا کہ قتل جس کمرے میں ہوا وہ گھر کے اوپر والے حصے میں تھا اور ملازمین کو شور کی آواز آئی لیکن یہ تعین کرنا ہے کہ آیا ان کو معلوم تھا کہ اس کا اختتام قتل پر ہوگا یا نہیں، اگر انہیں معلوم تھا کہ اس کا نتیجہ قتل ہے تو پھر وہ بھی غفلت کے ارتکاب میں آتے ہیں لیکن اگر انہیں انجام کا معلوم نہ ہو تو پھر اس کو اسی حد تک ذمہ دار ٹھہرائیں گے۔

انہوں نے کہا کہ ایک قتل ہوا ہے، ملزم موقع سے گرفتار ہوا ہے اور اس برآمدگی ہوئی ہے، اس لیے ان کو کوئی فائدہ حاصل ہوگا، اگر یہاں تک کہ وہ انکار بھی کرے کیونکہ اس طرح ملزم کبھی اعتراف نہیں کرتا اور پولیس کے سامنے اعتراف کی بھی محدود قانونی حیثیت ہوتی ہے۔

پولیس افسر نے بتایا کہ ہمیں اپنی تفتیش کا پورا اختیار حاصل ہے، ہمارے رپورٹ ٹھوس شواہد کی بنیاد پر ہوگی چاہے اور اپنا بیان دے یا نہ دے، ہم اس کو پوری سزا دلوا کر رہیں گے۔

انہوں نے کہا کہ پولیس کی تفتیش میں ملزم کے ذہنی مریض ہونے سے کوئی لینا دینا نہیں ہے، ہماری توجہ اس واقعے پر ہے، جس وقت وہ ذہنی طور پر ٹھیک تھا۔

ایس ایس پی انوسٹی گیشنز نے بتایا کہ آلہ قتل برآمد ہوا ہے جو آری نہیں تھی، چاقو تھا اور پستول بھی برآمد ہوا لیکن ہماری ابتدائی تفتیش کے مطابق پستول استعمال نہیں ہوا ہے۔

یاد رہے کہ 20 جولائی کو اسلام آباد کے سیکٹر ایف سیون،فور میں ایک گھر میں سابق پاکستانی سفارت کار کی بیٹی کو قتل کردیا گیا تھا۔

مقتولہ کی شناخت نور مقدم کے نام سے ہوئی تھی جو سابق سفارت کار شوکت مقدم کی بیٹی تھیں اور ان کی عمر 27 برس تھی۔

پولیس نے ابتدائی طور پر بتایا تھا کہ لڑکی پر فائرنگ کے بعد تیز دھار آلے سے بھی وار کیا گیا جبکہ واقعے میں ایک اور شخص زخمی ہوا اور واقعے میں مبینہ طور پر ملوث ہونے پر لڑکی کے ایک دوست ظاہر ذاکر کو گرفتار کر لیا گیا ہے جو ملک کے معروف تاجر کا بیٹا ہے۔

بعدازاں پولیس نے ان کےخلاف مقتولہ کے والد کی شکایت پر ظاہر کے خلاف تعزیرات پاکستان کی دفعہ 302 کے تحت ایف آئی آر درج کی گئی۔

خاتون کے بہیمانہ قتل نے وفاقی دارالحکومت میں خواتین کی حفاظت کے حوالے سے نئی بحث کو جنم دیا ہے اور سماجی رابطوں کی ویب سائٹ ٹوئٹر پر ‘جسسٹس فار نور’ کے ہیش ٹیگ سے ہزاروں ٹوئٹس کی گئیں۔

اطلاعات کے مطابق یہ گزشتہ چند دنوں کے دوران ملک میں کسی خاتون پر تیسرا سفاکانہ حملہ ہے۔

بالی ووڈ اداکارہ فاطمہ ثنا شیخ کے مداح ان سے سوال کر رہے ہیں کہ وہ کب اداکار عامر خان سے شادی کریں گی؟

رواں ماہ بھارتی اداکار عامر خان اور ان کی اہلیہ کرن راؤ میں شادی کے 15 سال بعد علیحدگی ہوگئی۔ طلاق کے بعد بھارت میں ٹویٹر پر عامر خان اور فاطمہ ثنا شیخ کا نام ٹرینڈ کرنے لگا تھا۔ صارفین طلاق کی وجہ عامر خان کے فاطمہ ثنا شیخ سے قریبی تعلقات کو قرار دے رہے تھے۔

اداکارہ فاطمہ ثنا شیخ سوشل میڈیا پر کافی متحرک ہیں۔ دو روز قبل جب اداکارہ نے انسٹاگرام اکاؤنٹ پر اپنی تصاویر شیئر کیں تو مداحوں نے یہاں بھی عامر خان کا ذکر چھیڑ دیا۔ تصاویر پوسٹ ہوتے ہی ان پر کمنٹس آنا شروع ہوگئے جس میں مداحوں نے ایک ہی سوال کیا کہ وہ عامر خان سے کب شادی کر رہی ہیں؟

ایک مداح نے تصاویر پر تبصرے میں لکھا ’سجنا ہے مجھے سجنا (عامر خان) کے لیے‘۔ دوسرے مداح نے لکھا کہ وہ عامر خان اور فاطمہ ثنا کی شادی کے انتظار میں ہیں۔

یاد رہے کہ اداکارہ نے اپنے بالی ووڈ کے سفر کا آغاز 2016ء میں عامر خان کے ساتھ فلم ’دنگل‘ سے کیا۔

یورپی پیرا گلائیڈرز نے بلتورو( سیاچن) میں 8407 میٹر کی بلندی پر پیرا گلائیڈنگ کرکے نیا عالمی ریکارڈ بنا دیا، اس سے پہلے عالمی ریکارڈ 8157 میٹر کاتھا۔

پاکستان ایڈونچر اسپورٹس کا پُرکشش ترین مرکز بن گیا ہے، پیرا گلائیڈرز کی اس ٹیم میں آرمی اسکول آف فیزیکل ٹریننگ کاکول کی ٹیم بھی شامل تھی۔ 6 یورپی پیرا گلائیڈرز عالمی شہرت یافتہ پیرا گلائیڈر انٹائن جراڈ کی قیادت میں 25 مئی سے ہنزہ اور اسکردو میں موجود تھے۔

جون میں ان پیرا گلائیڈرز نے ہنزہ کی پہاڑیوں پر پریکٹس کی، ان کا مشن پیرا گلائیڈنگ کرکے بُلندی پر جانے کا عالمی ریکارڈ بنانا تھا،پہلا ریکارڈ بھی یورپی پیرا گلائیڈرانٹائن جراڈ نے بنایا تھا، پاکستان کیلیے یہ اعزاز کی بات ہے کہ نیا ریکارڈ اس کی سر زمین پر بنا۔

پاکستان آرمی پیرا گلائیڈنگ ٹیم کی قیادت کیپٹن احسن نے کی، ان کے ساتھ حوالدار قاسم اور حوالدار مُقید بھی اس مہم میں شامل تھے، انھوں نے 5 سے 6 ہزار میٹر بلند 4 مختلف چوٹیوں سے کامیاب پیرا گلائیڈنگ کی۔

بھارتی ریاست مغربی بنگال کی 17 سالہ لڑکی کو بالی وڈ سپر اسٹار شاہ رخ خان سے ملاقات کا جھانسہ دیکر ممبئی اسمگل کیا جارہا تھا جسے ممبئی پولیس نے بر وقت کارروائی کرتے ہوئے بازیاب کرا لیا۔

رپورٹس کے مطابق لڑکی شاہ رخ خان کی مداح تھی اور اپنے پسندیدہ اداکار سے ملنا چاہتی تھی۔

پولیس کی جانب سے بازیاب کرائے جانے کے بعد لڑکی کو ایک شیلٹر ہوم بھیج دیا گیا ہے جبکہ ملزم کو گرفتار کرلیا گیا ہے جس کی شناخت سبحان شیخ کے نام سے ہوئی ہے۔

رپورٹس کے مطابق لڑکی 12ہویں جماعت کی طالبہ ہے، اس نے فیس بک کے ذریعےملزم سے دوستی کی جس نے لڑکی سے جھوٹ بولا اور خود کو ایک ایونٹ منیجر ظاہر کیا۔

15 جولائی کو ملزم پالشیپارہ پہنچا اور لڑکی کو اس کی کوچنگ کلاس سے لیا اور کولکتہ لے گیا،جہاں سے وہ ہوورا سے لڑکی کو ممبئی لے کر جا رہاتھا۔

ادھر لڑکی کے والدین نے پولیس اسٹیشن میں گمشدگی کی شکایت درج کروا دی تھی جس کے بعد پولیس حرکت میں آئی اور لڑکی کی تصویر ہر جگہ شیئر کردی اور تمام ریلوے اسٹیشنوں کو الرٹ کردیا گیا تاہم اتوار کے روز لڑکی کو ہوورا جنکشن سے ٹرین میں سی سی ٹی وی کیمرے کی مدد سے پہچانا گیا۔

اس کے بعد لڑکی کو پولیس نے اپنی تحویل میں لے لیا اورملزم کو گرفتار کرلیا۔

پاکستان کرکٹ ٹیم کا دورہ انگلینڈ مکمل ہوگیا ہے جس کے بعد قومی اسکواڈ ویسٹ انڈیز روانہ ہوگیا ۔

دورہ انگلینڈ میں قومی ٹیم نے تین ون ڈے اور تین ٹی ٹوئنٹی میچز کی سیریز کھیلی اور دونوں سیریز میں اسے شکست کا سامنا کرنا پڑا۔

انگلینڈ کے بعد اب قومی ٹیم کالی آندھی کو انہی کے دیس میں قابو کرنے کے مشن پر بارباڈوس روانہ ہوگئی۔

پاکستان ٹیم ویسٹ انڈیز کے خلاف 2 ٹیسٹ اور 5 ٹی ٹوئنٹی میچز کی سیریز کھیلےگی، پاکستان میں موجود 11 کھلاڑی بھی 26 جولائی کو بارباڈوس جائیں گے۔

ان تمام 11 کھلاڑیوں کی پاکستان میں آئسولیشن کل سے شروع ہوگی،ہوٹل پہنچنے پر کھلاڑیوں کے کوویڈ ٹیسٹ بھی لیے جائیں گے، تمام 11کھلاڑی 26جولائی کو براستہ لندن بار بارڈوس روانہ ہوں گے۔

پاکستان اور ویسٹ انڈیز کے درمیان پہلا ٹیسٹ 12اگست سے جمیکا میں کھیلا جائےگا۔

ٹوکیو اولمپکس پرکورونا کے سائے منڈلانے لگے، امریکا کی 18 سالہ جمناسٹ کا کورونا ٹیسٹ مثبت آگیا اور اب تک اولمپک ولیج میں موجود 2 درجن سے زائد افراد کا کورونا ٹیسٹ مثبت آچکاہے۔

ٹوکیو اولمپکس کی آرگنائزنگ کمیٹی کے چیف توشیو روموٹو نے دُنیا کے سب سے بڑے کھیلوں کے ایونٹ کے ملتوی ہونے کے خدشے کا اظہار کردیا ہے۔

توشیو روموٹو کا کہنا ہے کہ اولمپکس کو آخری لمحات میں بھی ملتوی کیا جاسکتا ہے۔

ان گیمز کا آغاز 23 جولائی سے ہونا ہےلیکن جاپان میں کورونا کے بڑھتے کیسز آرگنائزرز کیلئے پھر بڑا مسلہ بن گئے ہیں۔

امریکا کی 18 سالہ جمناسٹ کا جاپان میں کورونا ٹیسٹ مثبت آیا،اس وقت جاپان میں 20 ہزار سے زائد ایتھلیٹس اور آفیشلز موجود ہیں جن میں 2 درجن سے زائد لوگوں کا کورونا ٹیسٹ مثبت آچکاہے جس میں3 ایتھلیٹس اولمپک ولیج میں موجود ہیں۔

دوسری جانب جاپانی عوام میں ہزاروں کی تعداد میں ایتھلیٹس کی ٹوکیو آمد سے کورونا پھیلنے پر گہری تشویش پائی جاتی ہے۔

واضح رہے اولمپکس کے 6 کھیلوں میں پاکستان کے 10 ایتھلیٹس بھی شرکت کررہے ہیں جبکہ ٹوکیو اولمپکس میں شرکت کے لیے ویٹ لفٹر طلحہ طالب لاہور سے جاپان روانہ ہوگئے ہیں۔

یاد رہے گزشتہ سال دنیا بھر میں پھیلے کورونا وائرس کے باعث ٹوکیو اولمپکس ملتوی کردیےگئے تھے۔